ទីភ្នាក់ងារឧតុនិយមជប៉ុននិយាយថា គ្មានការគំរាមកំហែងពីរលកយក្សស៊ូណាមិដល់ប្រទេសជប៉ុននោះទេ បន្ទាប់ពីភ្នំភ្លើង សេមេរូ ដែលស្ថិតនៅភាគខាងកើតនៃកោះជ្វារបស់ឥណ្ឌូនេស៊ី បានផ្ទុះក្នុងថ្ងៃអាទិត្យទី៤ ខែធ្នូ ឆ្នាំ២០២២។

មន្ត្រីជប៉ុនបាននិយាយថា មិនមានការប្រែប្រួលគួរឱ្យកត់សម្គាល់នៃកម្រិតទឹកទន្លេ ត្រូវបានគេសង្កេតឃើញនៅតាមឆ្នេរសមុទ្ររបស់ជប៉ុន និងប្រទេសផ្សេងទៀតក្នុងរយៈពេលជិត៧ម៉ោង បន្ទាប់ពីការផ្ទុះភ្នំភ្លើងទេ។

ទោះបីជាយ៉ាងណា រដ្ឋាភិបាលឥណ្ឌូនេស៊ីបានបង្ខំឱ្យអាជ្ញាធរត្រូវជម្លៀសមនុស្សប្រមាណ ២,០០០នាក់ទៅកាន់កន្លែងសុវត្ថិភាព ហើយការប្រកាសអាសន្នត្រូវបានដំឡើងដល់កម្រិតខ្ពស់បំផុត សម្រាប់តំបន់ភ្នំភ្លើងនេះ។

សូមរម្លឹកផងដែរថា ជាមួយនឹងភ្នំភ្លើងសរុបចំនួន ១៤២ ឥណ្ឌូណេស៊ីជាប្រទេសមានចំនួនប្រជាជនច្រើនជាងគេបំផុតនៅលើពិភពលោកនេះ មានប្រជាជនរហូតដល់ ៨.៦លាននាក់កំពុងរស់នៅក្បែរភ្នំភ្លើង ដែលស្ថិតក្នុងគម្លាតតែ ១០គីឡូម៉ែត្រប៉ុណ្ណោះ៕

ប្រភព៖ CNA

អន្តរជាតិ៖ អ៊ុយក្រែន បាននិយាយថារុស្ស៉ីបានបាញ់ស្រោចមីស៊ីលសាជាថ្មី កាលពីថ្ងៃចន្ទដើមសប្ដាហ៍នេះដោយបំផ្លាញផ្ទះជាច្រើនខ្នង នៅក្នុងតំបន់ភាគអាគ្នេយ៍ និងបណ្ដាល ឱ្យមានតំបន់ជាច្រើនផ្សេងទៀត គ្មានអគ្គិសនីប្រើប្រាស់ ខណៈទីក្រុងមូស្គូ បានចោទប្រកាន់ថាទីក្រុងកៀវ បានវាយប្រហារដោយប្រើយន្ដហោះដ្រូលើមូលដ្ឋានទ័ពអាកាស របស់ខ្លួនចំនួន២ នៅក្នុងទឹកដីរុស្ស៉ី ដែលស្ថិតនៅចម្ងាយរាប់រយគីឡូម៉ែត្រពីសមរភូមិ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី៦ ខែធ្នូ ឆ្នាំ២០២២។

នៅក្នុងសុន្ទរកថាមួយ លោកប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី បានបញ្ជាក់ថាមនុស្សយ៉ាងហោច ៤នាក់បានស្លាប់ នៅក្នុងការវាយប្រហារដោយមីស៊ីលរុស្ស៉ី ហើយភាគច្រើននៃមីស៊ីលជាង ៧៩គ្រាប់ត្រូវបានបាញ់ទម្លាក់ ខណៈក្រុមអ្នកជំនាញកំពុងព្យាយាមស្ដារថាមពលអគ្គិសនីឡើងវិញ ចំពេលសីតុណ្ហភាពនៅតាមផ្នែកខ្លះ នៃប្រទេសអ៊ុយក្រែន បានធ្លាក់ចុះដល់ក្រោមសូន្យអង្សាសេ។

ប៉ុន្តែ ក្នុងថ្ងៃចន្ទដដែលនោះដែរ ក្រសួងការពារជាតិរុស្ស៉ី បានអះអាងថាយន្ដហោះដ្រូនរបស់អ៊ុយក្រែនបានវាយប្រហារលើលើមូលដ្ឋានទ័ពអាកាសចំនួន២ នៅក្នុងតំបន់ រីយ៉ាហ្សាន់ (Ryazan) និងសារ៉ាតូវ (Saratov) ក្នុងទឹកដីរុស្ស៉ីដោយស្លាប់ទាហាន ៣នាក់ និង៤នាក់ទៀតរងរបួស ហើយយន្ដហោះចម្បាំង២គ្រឿង រងការខូចខាត ដោយសារបំណែកយន្ដហោះដ្រូនដែលត្រូវបានបាញ់ទម្លាក់។

យ៉ាងណាក៏ដោយ អ៊ុយក្រែន​មិនបានអត្ថាធិប្បាយអ្នីលម្អិតឆ្លើយតបទៅនឹងការចោទប្រកាន់របស់រុស្ស៉ីនោះទេ។ តែប្រសិនបើនេះជាការពិតមែន នោះវានឹងក្លាយជា ការវាយប្រហារចូលយ៉ាងជ្រៅបំផុតក្នុងទឹកដីរុស្ស៉ី ចាប់តាំងពីសង្រ្គាមផ្ទុះឡើងកាលពីខែកុម្ភៈមក។ មូលដ្ឋានទ័ពអាកាស អែនជែល (Engels) នៅក្បែរទីក្រុង Saratov មានចម្ងាយ ៧៣០គីឡូម៉ែត្រពីភាគអាគ្នេយ៍ទីក្រុងមូស្គូ ៕

ចិន៖ ទីក្រុងប៉េកាំងបានបង្កើតប៉ុស្តិ៍ប៉ូលីសនៅក្រៅប្រទេសជាង ១០០កន្លែងនៅទូទាំងពិភពលោក ដើម្បីត្រួតពិនិត្យ ការយាយី និងក្នុងករណីខ្លះដែលមានការធ្វើមាតុភូមិនិវត្តន៍ពលរដ្ឋចិន ដែលកំពុង និរទេសខ្លួន ដោយប្រើការរៀបចំសន្តិសុខទ្វេភាគី ជាមួយបណ្តាប្រទេសនៅអឺរ៉ុប និងអាហ្រ្វិក ដើម្បីទទួល បានវត្តមានយ៉ាងទូលំទូលាយជាអន្តរជាតិ។ នេះបើយោងតាមការចុះផ្សាយរបស់សារព័ត៌មាន CNN នៅថ្ងៃទី ០៥ ខែធ្នូ ឆ្នាំ២០២២។

អ្នកធ្វើយុទ្ធនាការសិទ្ធិមនុស្សដែលមានមូលដ្ឋាននៅទីក្រុងម៉ាឌ្រីដ បាននិយាយថា ខ្លួនបានរកឃើញភ័ស្តុតាងថា ប្រទេសចិនកំពុងប្រតិបត្តិការប៉ុស្តិ៍ប៉ូលីសចំនួន ៤៨ បន្ថែមទៀតនៅ បរទេស ចាប់តាំងពីក្រុមនេះបានបង្ហាញពីវត្តមាននៃស្ថានីយ៍ចំនួន ៥៤កន្លែងនៅក្នុងខែកញ្ញា។

ការចេញផ្សាយថ្មី ដែលផ្តោតលើទំហំនៃបណ្តាញ និងពិនិត្យមើលតួនាទីដែលគំនិតផ្តួចផ្តើមប៉ូលីសរួមគ្នា រវាងប្រទេសចិន និងបណ្តាប្រទេសអឺរ៉ុបមួយចំនួន រួមទាំងប្រទេសអ៊ីតាលី ក្រូអាស៊ី ស៊ែប៊ី និងរូម៉ានី បានដើរតួក្នុងការសាកល្បងការពង្រីកខ្លួនរបស់ចិនកាន់តែទូលំទូលាយ។

ក្នុងចំណោមការអះអាងថ្មីៗដែលត្រូវបានចាត់ថ្នាក់ដោយក្រុមនេះ បង្ហាញថា ជនជាតិចិនម្នាក់ ត្រូវបានបង្ខិតបង្ខំឱ្យត្រឡប់ទៅផ្ទះវិញ ដោយប្រតិបត្តិករដែលធ្វើការលាក់កំបាំង នៅក្នុងប៉ុស្តិ៍ប៉ូលីសនៅ ក្រៅប្រទេសរបស់ចិន នៅជាយក្រុងប៉ារីស ដែលត្រូវបានជ្រើសរើសយ៉ាងច្បាស់លាស់ សម្រាប់គោល បំណងនោះ បន្ថែមពីលើការបង្ហាញមុនថា ជនជាតិចិនពីរនាក់ទៀត ត្រូវ​បាន​បញ្ជូន​ត្រឡប់​មក​វិញ​ដោយ​បង្ខំ​ពី​អឺរ៉ុប មួយ​នៅ​ស៊ែប៊ី មួយ​ទៀត​នៅ​អេស្ប៉ាញ៕

រដ្ឋធានីកៀវ៖ កងទ័ពអ៊ុយក្រែន បានអះអាងថា ការវាយប្រយុទ្ធគ្នា នៅក្នុងរយៈពេល២៤ម៉ោងកន្លងមកនេះ ទាហានរុស្ស៊ី បានបាត់បង់ជីវិត ចំនួន៥៤០នាក់ ហើយជាមួយនឹងតួលេខថ្មីនេះ បានធ្វើឲ្យក្រុងមូស្គូ បាត់បង់ទាហាន កើនឡើង ជិតដល់៩២ ០០០នាក់។

សារព័ត៌មាន Ukrinform បានចេញផ្សាយ កាលពីថ្ងៃចន្ទ ទី៥ ខែធ្នូ ថា អគ្គសេនាធិការកងទ័ពអ៊ុយក្រែន បានបង្ហោះ នៅលើបណ្ដាញសង្គមហ្វេសប៊ុក ថា រុស្ស៊ី បានបាត់បង់កងទ័ព កើនឡើង រហូតដល់ ៩១ ៦៩០នាក់ ចាប់តាំងពីការផ្ទុះសង្គ្រាម នៅថ្ងៃទី២៤ ខែកុម្ភៈ រហូតមកដល់ថ្ងៃទី៥ ខែធ្នូ ឆ្នាំ២០២២។ រីឯទាហានរុស្ស៊ី បានរងគ្រោះថ្នាក់ខ្លាំង នៅលើសមរភូមិលីម៉ាន់ (Lyman) និង បាខ្មូត (Bakhmut)។

ប្រភពព័ត៌មានដដែល បានបន្ដ ថា ក្រៅពីការបាត់បង់កម្លាំងទាហានប្រយុទ្ធនោះ រុស្ស៊ី ក៏បានរងការខូចខាតគ្រឿងយុទ្ធោបករណ៍ មានតម្លៃរាប់ពាន់លានដុល្លារសហរដ្ឋអាមេរិក ដោយសារកងទ័ពអ៊ុយក្រែន បាញ់កម្ទេច រួមមាន យន្ដហោះចម្បាំង ចំនួន២៨១គ្រឿង, ឧទ្ធម្ភាគចក្រ ចំនួន ២៦៤គ្រឿង, នាវាចម្បាំងតូចធំ ចំនួន១៦គ្រឿង, រថក្រោះ ចំនួន២ ៩២៤គ្រឿង, រថពាសដែក ចំនួន ៥ ៩០០គ្រឿង, ប្រព័ន្ធកាំភ្លើងផ្លោង ចំនួន ១ ៩១៤គ្រឿង, ប្រព័ន្ធបាញ់គ្រាប់រ៉ុក្កែតចម្រុះ ចំនួន ៣៩៥គ្រឿង, ប្រព័ន្ធប្រឆាំងនឹងយន្ដហោះចម្បាំង ចំនួន២១១គ្រឿង, ដ្រូន ចំនួន១ ៥៨២គ្រឿង, រថយន្ដយោធា និង រថយន្ដដឹកប្រេងឥន្ធនៈ ចំនួន ៤ ៤៩៧គ្រឿង ព្រមទាំងគ្រឿងសឹកជាច្រើនទៀត…។

ទោះជាយ៉ាងណា គេនៅមិនទាន់មានរបាយការណ៍ជាក់លាក់ណាមួយ បញ្ជាក់អំពីតួលេខពិតប្រាកដ ពីប្រភពឯករាជ្យណាមួយនៅឡើយ។ តួលេខខាងលើនេះ គ្រាន់តែបានចេញផ្សាយ ដោយភាគីអ៊ុយក្រែន តែប៉ុណ្ណោះ។

ដោយឡែក ភាគីរុស្ស៊ី វិញ មិនបានបញ្ជាក់នោះទេ ជុំវិញការបាត់បង់ទាហានរបស់ខ្លួន នៅលើសមរភូមិ ក្រោមហេតុផល ជាការងារសម្ងាត់របស់ជាតិ។ លើសពីនេះ ក្រុងមូស្គូ ថែមទាំងបានហាមឃាត់ដល់ប្រជាជនរបស់ខ្លួន និយាយជាសាធារណៈ ជុំវិញសកម្មភាពពាក់ព័ន្ធនឹងកងទ័ព រួមទាំង ការកេណ្ឌទ័ព សីលធម៌របស់កងទ័ព ស្ថានភាពកងទ័ព …ជាដើម សូម្បីតែសមាជិករបស់កងទ័ពណាម្នាក់ប្រព្រឹត្ដខុស ក៏មិនអនុញ្ញាតឲ្យនិយាយនោះដែរ ដោយរុស្ស៊ី ចាត់ទុកជាកិច្ចការសម្ងាត់របស់ជាតិ។

ដោយឡែក លោក ឡយ អូស្ទីន (Lloyd Austin) រដ្ឋមន្រ្ដីក្រសួងការពារជាតិ សហរដ្ឋអាមេរិក បានអះអាង កាលពីខែមុន ថា ទាហានរុស្ស៊ី ប្រហែល១០ម៉ឺននាក់ បានស្លាប់ និង រងរបួស នៅលើសមរភូមិរបស់អ៊ុយក្រែន។ ចំណែកកងទ័ពការពារទឹកដីរបស់អ៊ុយក្រែន ក៏បានរងគ្រោះថ្នាក់ ប្រហាក់ប្រហែលគ្នានេះដែរ។

លោក មីខៃឡូ ប៉ូដូលយ៉ាក់ (Mykhailo Podolyak) ទីប្រឹក្សារបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) បានបង្ហាញ អំពីការធ្វើបច្ចុប្បន្នភាព នៃចំនួនកងទ័ពរបស់ក្រុងកៀវ បាត់បង់ជីវិតជាលើកទី១ ចាប់តាំងពីចុងខែសីហា ខណៈនោះ មេទ័ពកំពូលអ៊ុយក្រែន បានអះអាង ថា កងទ័ពរបស់ខ្លួន ជិត៩ ០០០នាក់ បានបាត់បង់ជីវិត។

លោកទីប្រឹក្សារបស់ប្រធានាធិបតីអ៊ុយក្រែន រូបនេះ កាលពីថ្ងៃព្រហស្បតិ៍ ទី២ ខែធ្នូ បានប្រាប់ដល់បណ្ដាញទូរទស្សន៍របស់អ៊ុយក្រែន Channel 24 ថា «យើងមានតួលេខជាផ្លូវការ ពីអគ្គសេនាធិការកងទ័ពអ៊ុយក្រែន និង តួលេខពីមេទ័ពកំពូល អំពីចំនួនកម្លាំងការពារទឹកដី ចន្លោះពី ១២ ៥០០០ ទៅ១៣ ០០០ បានបាត់បង់ជីវិត ចាប់តាំងពីការផ្ទុះសង្គ្រាមរបស់រុស្ស៊ី រហូតមកដល់ពេលនេះ។ យើងនិយាយជាចំហ អំពីចំនួនកងទ័ពរបស់យើងបានស្លាប់ ប៉ុន្ដែចំនួនកងទ័ពរងរបួស ពិតជាច្រើន ជាងកងទ័ពដែលបានស្លាប់»។

លោក Podolyak បានបន្ថែម ថា លោកប្រធានាធិបតី ហ្សេឡែនស្គី នឹងប្រកាសតួលេខផ្លូវការជាសាធារណៈ ខណៈពេលវេលាត្រឹមត្រូវណាមួយចូលមកដល់។

កងទ័ពអ៊ុយក្រែន បានវាយបកយ៉ាងខ្លាំង ទៅលើកម្លាំងទាហានរុស្ស៊ី វិញ ចាប់តាំងពីដើមខែកញ្ញា រហូតរំដោះបានទឹកដីរបស់ពួកគេ ជាបន្តបន្ទាប់ នៅតំបន់ភាគឦសាន និង ភាគខាងត្បូងប្រទេស រួមទាំង ទីក្រុងខឺរសុន (Kherson) ដែលជាទីក្រុងយុទ្ធសាស្រ្ដដ៏សំខាន់ បានធ្លាក់ទៅក្រោមការគ្រប់គ្រងរបស់រុស្ស៊ី ក្រោយការចាប់ផ្ដើមសង្គ្រាម កាលពីថ្ងៃទី២៤ ខែកុម្ភៈ។

ការិយាល័យឧត្ដមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ (OHCHR) បានធ្វើកំណត់ត្រា អំពីជនស៊ីវិលរងគ្រោះថ្នាក់ នៅក្នុងសង្គ្រាមអ៊ុយក្រែន មាន ចំនួន ១៧ ១៨១នាក់ ដោយរាប់បញ្ចូលទាំងអ្នកស្លាប់ ចំនួន ៦ ៧០២នាក់ និង រងរបួស ចំនួន ១០ ៤៧៩នាក់៕