ប្រទេសវៀតណាម៖ វៀតណាមបានដាក់បង្ហាញនូវសព្វាវុធដ៏ទំនើបៗ និងសម្បូបែប នៅក្នុងការតាំងពិព័រណ៍សព្វាវុធ និងបច្ចេកវិទ្យាការពារជាតិក្រោមប្រធានបទ “ពិព័រណ៍ការពារជាតិអន្តរជាតិវៀតណាមឆ្នាំ ២០២២” ជាលើកដំបូងរបស់ខ្លួននៅទីក្រុងហាណូយ។

នាថ្ងៃទី ៨ ខែធ្នូ ឆ្នាំ២០២២ នេះ ទីភ្នាក់ងារសារព័ត៌មានបរទេសបានរាយការណ៍ពីទីក្រុងហាណូយ នៃប្រទេសវៀតណាម ទាក់ទងនឹងការ ពិព័រណ៍សព្វាវុធ និងបច្ចេកវិទ្យាការពារជាតិក្រោមប្រធានបទ “ពិព័រណ៍ការពារជាតិអន្តរជាតិវៀតណាមឆ្នាំ ២០២២” ។

ក្នុងនោះការតាំងបង្ហាញពិព័រណ៍សព្វាវុធនេះផងដែរ ត្រូវបានប្រព្រឹត្តិធ្វើឡើងនៅក្នុងទីតាំងនៃអាកាសយានដ្ឋានអន្តរជាតិហាណូយ ក្នុងទីក្រុងហាណូយផ្ទាល់ ហើយពិព័រណ៍នេះនឹងបន្តរហូតដល់ ៣ ថ្ងៃបន្ទាប់ទៀត។

ប្រភពដដែលបានបញ្ជាក់ថា ពិព័រណ៍នេះជាពិព័រណ៍អាវុធធំបំផុតរបស់វៀតណាម ដែលមានការបង្ហាញនូវអាវុធទំនើបៗជាច្រើបប្រភេទ ដែលមានការចូលរួមពីសំណាក់ទីភ្នាក់ងាររដ្ឋាភិបាល សហគ្រាសរដ្ឋ និងក្រុមហ៊ុនឯកជនធំៗ សរុបចំនួន ១៧៤ មកពីប្រទេសចំនួន ៣០ រួមទាំងសហរដ្ឋអាមេរិក រុស្ស៊ី និងរដ្ឋជាសមាជិកនៃសហភាពអឺរ៉ុប (EU)ផងដែរ។

ទន្ទឹមនឹងនោះ នាយករដ្ឋមន្ត្រីនៃប្រទេសវៀតណាមលោក ផាម មិញ ជិញ (Pham Minh Chinh) បានចាត់ទុកថា គោលនយោបាយសន្តិសុខរបស់ប្រទេសគឺផ្អែកលើការការពារខ្លួន។ ប៉ុន្តែសម្រាប់រដ្ឋាភិបាលក្រុងហាណូយវិញ យល់ឃើញថានេះគឺដើម្បីជាសន្តិភាពសម្រាប់ការរៀបចំព្រឹត្តិការណ៍នេះឡើង ព្រមទាំងជួយផ្សព្វផ្សាយឱកាសដល់សហគ្រិន និងផ្តល់ជម្រើសសម្រាប់គ្រប់វិស័យដែលពាក់ព័ន្ធ ចំពេលដែលបញ្ហាប្រឈមនឹងភូមិសាស្ត្រនយោបាយពិភពលោកកំពុងកើតមានឡើង៕ ប្រភព៖ Dailynews

អន្តរជាតិ៖ ​នៅថ្ងៃទី៧ ខែធ្នូ រិះគន់ប្រធានាធិបតីរុស្ស៊ី វ្ល៉ាឌីមៀ ពូទីន ដែលនិយាយពីការប្រើប្រាស់អាវុធនុយក្លេអ៊ែរ ជាការគ្មានការគិតពិចារណា បន្ទាប់ពីមេដឹកនាំរុស្ស៊ីរូបនេះព្រមានជាថ្មីពីហានិភ័យនៃសង្រ្គាមនុយក្លេអ៊ែរ ហើយនឹងប្រើអាវុធប្រភេទនេះដើម្បីការពារទឹកដីខ្លួន។

ថ្លែងក្នុងកិច្ចប្រជុំក្រុមប្រឹក្សាសិទ្ធិមនុស្សរបស់រុស្ស៊ីដែលចេញផ្សាយតាមទូរទស្សន៍ ប្រធានាធិបតីរុស្ស៊ី វ្ល៉ាឌីមៀ ពូទីន លើកឡើងថា ក្រុងមូស្គូនឹងការពារខ្លួនជាមួយគ្រប់មធ្យោបាយដែលមានទាំងអស់។ លោកក៏បានព្រមានជាថ្មីពីហានិភ័យនៃសង្រ្គាមនុយក្លេអ៊ែរដែរ ប៉ុន្តែអះអាងថា រុស្ស៊ីនឹងប្រើអាវុធនុយក្លេអ៊ែរដើម្បីតបទៅវិញប៉ុណ្ណោះ មិនមែនវាយប្រហារទៅមុនទេ។

«យើងមិនឆ្កួតទេ យើងដឹងថាអាវុធនុយក្លេអ៊ែរជាអ្វី»។ ប្រធានាធិបតីរុស្ស៊ីបញ្ជាក់បែបនេះនៅថ្ងៃទី៧ ខែធ្នូ ដោយបន្ថែមថា អាវុធរុស្ស៊ីជឿនលឿន និងទំនើបជាងប្រទេសនុយក្លេអ៊ែរផ្សេងទៀត ប៉ុន្តែក្រុងមូស្គូមិនដើរលើកអាវុធនេះគំរាមពិភពលោកទេ។

យ៉ាងណាមិញ ភ្លាមៗអាម៉េរិកដែលតែងបញ្ជូនជំនួយអាវុធយោធាឱ្យអ៊ុយក្រែនរិះគន់ថា នេះជាការនិយាយដោយគ្មានការត្រិះរិះរបស់លោក ពូទីន។ កន្លងមក ក្រុងវ៉ាស៊ីនតោនព្រមានថា ក្រុងមូស្គូអាចនឹងប្រើអាវុធនុយក្លេអ៊ែរវាយប្រហារអ៊ុយក្រែន បន្ទាប់ពីលោក ពូទីន គំរាមប្រើអាវុធប្រល័យលោកប្រភេទនេះការពារទឹកដីដែលខ្លួនដណ្តើមបានពីអ៊ុយក្រែន។

« យើងគិតថា ការនិយាយពីអាវុធនុយក្លេអ៊ែរដែលមិនពិចារណាឱ្យបានត្រឹមត្រូវគ្មានការទទួលខុសត្រូវទាល់តែសោះ»។ អ្នកនាំពាក្យក្រសួងការបរទេសអាម៉េរិក លោក នីត ប្រាយ (Ned Price) ប្រាប់អ្នកកាសែតបែបនេះនៅថ្ងៃទី៧ ខែធ្នូ។

ទាក់ទងនឹងការប្រយុទ្ធគ្នានៅអ៊ុយក្រែនវិញ លោក ពូទីន បញ្ជាក់ថានឹងមិនមានការចល័តទ័ពនៅពេលនេះបន្ថែមទៀតទេ ប៉ុន្តែជម្លោះនៅអ៊ុយក្រែនក៏នឹងមិនបញ្ចប់ក្នុងរយៈពេលខ្លីខាងមុខដែរ។

«សម្រាប់រយៈពេលនៃប្រតិបត្តិការយោធាពិសេស ជាការពិតណាស់នេះអាចជាដំណើរការដ៏យូរមួយ»។ ប្រធានាធិបតីរុស្ស៊ីលើកឡើងបែបនេះអំឡុងកិច្ចប្រជុំក្រុមប្រឹក្សាសិទ្ធិមនុស្សដដែល។

សូមបញ្ជាក់ថា រុស្ស៊ីចាប់ផ្តើមឈ្លានពានអ៊ុយក្រែនតាំងពីចុងខែកុម្ភៈ ប៉ុន្តែលោក ពូទីន លើកឡើងកាលពីខែកក្កដាថា រុស្ស៊ីទើបតែចាប់ផ្តើមប្រតិបត្តិសឹករបស់ខ្លួនប៉ុណ្ណោះ។ បន្ថែមពីនេះ នៅខែកញ្ញា ក្រុងមូស្គូបានចល័តទ័ពបម្រុងយ៉ាងតិច ៣០ ម៉ឺននាក់ដើម្បីបន្តប្រយុទ្ធនៅអ៊ុយក្រែន ប៉ុន្តែតាំងពីនោះមក ទ័ពរុស្ស៊ីដកថយចេញពីទឹកដីអ៊ុយក្រែនជាច្រើន។​ តាមទិន្នន័យរបស់វិទ្យាស្ថានសិក្សាពីសង្រ្គាមដែលផ្តល់ឱ្យកាសែតញូវយ៉កថាម (New York Times អ៊ុយក្រែនដណ្តើមបានទឹកដី ៥៤ ភាគរយមកវិញពីរុស្ស៊ីដែលក្តោបក្តាប់តាំងពីសង្រ្គាមចាប់ផ្តើម​ ៕

បរទេស៖ ពិតជាគួរឱ្យហួសចិត្ត និងបង្កការភ្ញាក់ផ្អើលជាខ្លាំង ក្រោយប៉ូលិសធ្វើការចាប់ខ្លួនស្ត្រីជាអ្នកជំងឺជនជាតិអាឡឺម៉ង់ម្នាក់ ជាប់ចោទពីបទល្មើលលួចដកបំពង់ខ្យល់អុកស៊ីហ្សែនរបស់អ្នកជំងឺរួមបន្ទប់ជាមួយគ្នា រហូតទៅដល់ពីរដង ដោយអះអាងថាឮសំឡេងរំខាន។

កាលពីពេលថ្មីៗនេះមានសេចក្ដីរាយការណ៍មួយបានឱ្យដឹងថា អ្នកជំងឺស្ត្រីជនជាតិអាល្លឺម៉ង់អាយុ ៧២ ឆ្នាំម្នាក់ត្រូវបានចាប់ខ្លួន និង កាត់ទោសក្រោយពីសង្ស័យបិទបំពង់ខ្យល់អុកស៊ីហ្សែនរបស់អ្នកជំងឺវ័យចំណាស់ម្នាក់ទៀត ក្នុងបន្ទប់ជាមួយគ្នានៅខាងក្នុងមន្ទីរពេទ្យ Mannheim ប្រទេសអាល្លឺម៉ង់ ដោយសារតែនាងខឹងនឹងសំឡេងរំខាន់របស់វា។

បន្ទាប់ពីស្ត្រីរូបនោះបានប្រព្រឹត្តនូវបទល្មើសរហូតបណ្តាលឱ្យអ្នកជំងឺស្រីអាយុ ៧៩ ឆ្នាំមានបញ្ហាយ៉ាងធ្ងន់ធ្ងរ ហើយគិលានុបដ្ឋាយិកាបានប្រញាប់ប្រញាល់ជួយសង្គ្រោះជីវិតអ្នកជំងឺឱ្យរួចផុតពីវិបត្តិ ហើយស្ត្រីរងគ្រោះនាងនៅតែត្រូវស្ថិតក្រោមការមើលថែរបស់វេជ្ជបណ្ឌិត និងគិលានុបដ្ឋាយិកាយ៉ាងជិតស្និទ្ធ និងយកចិត្តទុកដាក់។

គួរបញ្ជាក់ថាជនជាប់ចោទត្រូវបានគេរាយការណ៍ថា ទង្វើបទល្មើសនេះជនបង្កមិនមែនធ្វើតែម្ដងនោះទេ ដោយគាត់បានព្យាយាមបិទបំពង់ខ្យល់ របស់អ្នកជំងឺអាយុ ៧៩ ឆ្នាំម្តងហើយម្ដងទៀត ដោយលើកទីមួយ ពេទ្យ និងគិលានុបដ្ឋាយិកាបានព្យាយាមពន្យល់នាងថា បំពង់ខ្យល់មានសារៈសំខាន់ខ្លាំងណាស់ចំពោះអ្នកជំងឺម្នាក់ទៀត ហើយហាមនាងបិទម៉ាស៊ីនរបស់គេ ប៉ុន្តែនៅល្ងាចថ្ងៃដដែលនោះជនបង្កក៏បានប្រព្រឹត្តម្តងទៀត ដោយអះអាងថាវាបានផ្ដល់សំលេងរំខានចេញពីម៉ាស៊ីនអុកស៊ីហ្សែន។

ទោះជាយ៉ាងណា ជាបឋម ជនជាប់ចោទត្រូវបានគេនាំខ្លួនទៅកាន់តុលាការពីបទប៉ុនប៉ងមនុស្សឃាត ហើយនឹងត្រូវបានគេចាប់ឃុំខ្លួនជាបណ្ដោះអាសន្ន រង់ចាំការស៊ើបអង្កេតបន្តទៀត៕ ប្រភព៖ Thairath

បរទេស៖ អស្ចារ្យណាស់ប្រទេសអ៊ីតាលីបំភ្លឺដើមឈើណូអែលដ៏ធំបំផុតរបស់ពិភពលោកនៅតំបន់ Gubbio នៅលើភ្នំមួយកន្លែងអមទៅដោយភ្លើងពណ៌ដ៏ស្រស់ស្អាតមានកំពស់រាប់រយគីឡូម៉ែត្រ និងដណ្ដើមបានកំណត់ត្រាជើងឯក Guinness Book of World Records។

ថ្ងៃនៃបុណ្យណូអែលក៏កាន់តែខិតជិតមកដល់ ក្នុងនោះនាពេលថ្មីៗនេះប្រទេសអ៊ីតាលីបានធ្វើការតាំងបង្ហាញនូវភាពអស្ចារ្យពីនៃដើមណូអែលដែលមានទំហំធំគ្មានពីរ នឹងអស្ចារ្យបំផុត ជាមួយនឹងពិធីបំភ្លឺដើមឈើណូអែលនៅលើភ្នំ Inquino  កណ្តាលនៃប្រទេសអ៊ីតាលីផ្ទាល់។

ពិតណាស់ដើមណូអែលដ៏ធំសម្បើមនេះបានបង្កើតឡើងដោយភ្លើងជិត ៣០០ អំពូល មានកំពស់ ៧៥០ ម៉ែត្រ ទទឹង ៤៥០ ម៉ែត្រ និងត្រូវការខ្សែភ្លើង ៨.៥ គីឡូម៉ែត្រ ដើម្បីបំភ្លឺអំពូល បន្ទាប់ពីចុចប៊ូតុងដើម្បីបើកភ្លើងដើមឈើណូអែលកាំជ្រួចត្រូវបានអុជនៅពីលើដើមណូអែល ដើម្បីស្វាគមន៍ និងអបអរពិធីបុណ្យនៃសុភមង្គល។

ជាមួយនឹងពិធីបើកបំភ្លឺភ្លើងនោះផងដែរក៏មានមនុស្សម្នា និងភ្ញៀវទេសចរជាច្រើនកុះករបានធ្វើការមកចូលទស្សនានូវភាពអស្ចារ្យនៅក្នុងតំបន់នេះយ៉ាងរីករាយ។

ពិធីបំភ្លឺដើមឈើណូអែលនៅ Gubbio គឺជាប្រពៃណីដែលបានបន្តតាំងពីឆ្នាំ ១៩៨១ ហើយនៅឆ្នាំនេះត្រូវបានផ្តល់កិត្តិយសដោយលោក Roberto Morroni អនុប្រធាន Umbria  មកចុចកុងតាក់ភ្លើងវិញម្ដង ព្រោះកាលពីឆ្នាំមុនក៏មានវត្តមានមនុស្សល្បីៗជាច្រើនដែលធ្វើការងារនេះ ក្នុងនោះមាន  អតីតប្រធានាធិបតីអ៊ីតាលី Giorgio Napolitano និងមានអ្នកអវកាសយានិក Paolo Nespoli ផងដែរ៕ ប្រភព៖ Thairath