ភ្នំពេញ៖ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ប្រាប់បណ្តាញព័ត៌មានឱ្យដឹងថា ក្រោយស៊ើបអង្កេតបឋម សមត្ថកិច្ចបានរកឃើញថា ជនបង្កៃគ្រាប់បែកនៅក្បែរណាហ្គាវើលដ៍ គឺជាជនជាតិចិន ហើយករណីនេះ មិនមែនរឿងនយោបាយ ឬភេរវកម្មនោះទេ។

នាយឧត្តមសេនីយ៍ បានបញ្ជាក់ថា ករណីបង្កៃគ្រាប់បែកនេះ ជនបង្កបានរថយន្តទំនើបមួយគ្រឿង យកគ្រាប់បែកទៅដាក់នៅកន្លែងកើតហេតុ ហើយបានចាកចេញទៅ។ រថយន្តនោះត្រូវបានសមត្ថកិច្ចកំណត់មុខសញ្ញាបាន តាមរយៈផ្លាកលេខ ដែលបង្ហាញថា ម្ចាស់រថយន្តនោះគឺជាជនជាតិចិន។

ទោះជាយ៉ាងនេះក្តី សមត្ថកិច្ចកំពុងបន្តស្រាវជ្រាវ ដើម្បីចាប់ខ្លួនជន​បង្ក ចំពោះករណីបង្កៃគ្រាប់បែកនេះបន្តទៀត។ នេះបើតាមការបញ្ជាក់របស់ នាយឧត្តមសេនីយ៍។

សូមបញ្ជាក់ថា នៅព្រឹកព្រលឹមថ្ងៃទី១៥ ខែធ្នូ ឆ្នាំ២០២២នេះ មានករណីគ្រាប់បែកបង្កៃមួយគ្រាប់ដែលប្រឡាក់ដោយនំខេក ត្រូវបានគេប្រទះឃើញបង្កៃ នៅចំណុចក្រុមហ៊ុនណាហ្គាវើល២ តាមផ្លូវរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

បើតាមប្រភពរបស់សមត្ថកិច្ច បានឱ្យដឹងថា គ្រាប់បែកនេះ ត្រូវបានបុគ្គលិកក្រុមហ៊ុនសុិនទ្រី ប្រទះឃើញ នៅក្នុងថង់ពណ៌សមួយ នៅខាងមុខក្រុមហ៊ុនណាហ្គាវើលដ៍ ហើយបានរាយការណ៍ជូនសន្តិសុខក្រុមហ៊ុននេះ រហូតដល់មានការប្តឹងបន្តទៅដល់សមត្ថកិច្ច។ បន្ទាប់ពីប្រទះឃើញនេះ គ្រាប់បែកក៏ត្រូវបានកម្លាំងសមត្ថកិច្ចជំនាញស៊ីម៉ាក់ ក៏បានរៀបចំបំផ្ទុះគ្រាប់បែកនេះចោលតែម្តង៕

ភ្នំពេញ៖ អគ្គនាយកដ្ឋានអត្តសញ្ញាណកម្ម បានបង្ហាញពីរបៀបឆែកមើលអត្តសញ្ញាណប័ណ្ណសញ្ជាតិខ្មែរ ដែលបានថតរួច ធ្វើហើយឬនៅ?

ដែលក្នុងនោះមានដូចខាងក្រោម៖
១ សាមីខ្លួនយកបង្កាន់ដៃទៅសាកសួរនៅកន្លែងដែលបានថត និងបំពេញបែបបទ ក្រោយរយៈពេល ៣០ ទៅ ៤៥ថ្ងៃ នៃថ្ងៃការងារ។

២ ចូលគេហទំព័រ www. gdi.gov.kh ជ្រើសយកប៊ូតុង ព័ត៌មានអត្តសញ្ញាណប័ណ្ណ រួចវាយលេខបង្កាន់ដៃទទួលពាក្យចូល នោះព័ត៌មានអំពីអត្តសញ្ញាណប័ណ្ណបានដំណើរការ ឬបោះពុម្ពហើយ ឬមានបញ្ហាយ៉ាងណា ព្រមទាំងមានលេខរបស់មន្ត្រីទទួលបន្ទុក ដើម្បីទំនាក់ទំនងសាកសួរបន្ថែម។

៣ ទាញយកកម្មវិធី GDI eServices ពីទូរស័ព្ទតាម ប្រព័ន្ធAndroid ឬ iOs រួចចុចចូលប៊ូតុង តាមដានពាក្យស្នើសុំ ហើយវាយលេខបង្កាន់ដៃចូល នោះព័ត៌មានអំពីអត្តសញ្ញាណប័ណ្ណបានដំណើរការ ឬបោះពុម្ពហើយ ឬមានបញ្ហាយ៉ាងណា ព្រមទាំងមានលេខរបស់មន្ត្រីទទួលបន្ទុក ដើម្បីទំនាក់ទំនងសាកសួរបន្ថែម។

៤ ទំនាក់ទំនងមកមន្ត្រីប្រចាំការសេវាកម្មអត្តសញ្ញាណកម្ម និងប្រតិកម្មរហ័ស រៀងរាល់ថ្ងៃច័ន្ទ ដល់សុក្រ ក្នុងម៉ោងធ្វើការ ដោយឥតគិតថ្លៃសេវាទូរស័ព្ទគ្រប់ប្រព័ន្ធ តាមរយៈលេខ ១២៧១ ៕

ត្រី «ប៉ាសាណាក់» ឬអាចហៅបានថាជា «ត្រីសាលម៉ុនយក្សទន្លេមេគង្គ» ដែលពលរដ្ឋខ្មែរខានបានឃើញវត្តមានរបស់ត្រីនេះតាំងពីអំឡុងទសវត្សរ៍ឆ្នាំ ២០០០ បានបង្ហាញមុខកាលពីពេលថ្មីៗនេះជាលើកដំបូងនៅតំបន់ទន្លេមេគង្គ នៃខេត្តស្ទឹងត្រែង ពោលគឺជាង២០មកហើយ ដោយត្រូវបានប្រជានេសាទ នេសាទបាន និងអ្នកជំនាញបានជួបប្រទះពេលគេយកទៅលក់នៅទីផ្សារក្នុងខេត្តស្ទឹងត្រែង។ នេះបើតាមការផ្សាយលើទំព័រហ្វេសប៊ុកផ្លូវការរបស់ ឯកឧត្តម នេត្រ ភក្ត្រា រដ្ឋលេខាធិការ និងអ្នកនាំពាក្យក្រសួងបរិស្ថាន នៅថ្ងៃទី១៣ ខែធ្នូ ឆ្នាំ២០២២នេះ។

ត្រីប៉ាសាណាក់ ត្រូវបានចាត់ថ្នាក់ជាប្រភេទត្រីទទួលរងការគំរាមកំហែងជិតផុតពូជនៅក្នុងបញ្ជីក្រហមរបស់អង្គការ សហភាពអន្តរជាតិសម្រាប់អភិរក្សធម្មជាតិ (IUCN) នៅតែបង្ហាញវត្តមាននៅកម្ពុជាយើងនៅឡើយទេ។ នេះមានន័យថាទន្លេមេគង្គ ឬទន្លេសាប នៅតែជាជម្រករបស់ប្រភេទត្រីជិតផុតពូជ ប្រភេទត្រីកម្រ និងត្រីទឹកសាបដទៃទៀត។

ត្រីប៉ាសាណាក់នេះ ភាគច្រើនរស់នៅតំបន់មេគង្គលើ និងប៉ែកខាងប្រទេសឡាវ និងប្រទេសថៃ។ ដោយឡែកវាបង្ហាញវត្តមានច្រើននៅទន្លេស្រែពក កាលពីពេលកន្លងទៅហើយ ទីនោះជាជម្រករបស់ប្រភេទត្រីប៉ាសាណាក់នេះ រួមនឹងប្រភេទត្រីទឹកសាបជាច្រើនទៀត។ យោងតាមសៀវភៅស្តីពីត្រីទឹកសាបនៃព្រះរាជាណាចក្រកម្ពុជា ត្រីប៉ាសាណាក់ ដែលមានឈ្មោះវិទ្យាសាស្រ្ត Aaptosyax grypus ជាប្រភេទត្រីមានស្រកាល្អិត មាត់ធំ ថ្គាមខាងក្រោមធំស្នាមគន្លាក់នៅកណ្តាល និងថ្គាមលើគ្របដណ្តប់លើថ្គាមក្រោម គ្មានពុកមាត់ និងព្រុយខ្នងគ្មានទ្រនុងរឹង ហើយពោះរាងមូល ខ្លួនរាងស្រឡូន និងមានប្រវែងវែងបំផុត ១០០សង់ទីម៉ែត្រ ឬ១ម៉ែត្រ។

ចំពោះលក្ខណៈជីវសាស្រ្តរបស់ត្រីប៉ាសាណាក់វិញ វាជាប្រភេទត្រីដែលមានទំហំធំ និងរស់នៅតាមតំបន់នៃទន្លេមេគង្គ។ ត្រីប៉ាសាណាក់ ធ្វើចរាចរណ៍ឡើងពីខែមករា ទៅខែកុម្ភៈ រកកន្លែងពងកូននៅតាមអន្លង់តាមដងទន្លេមេគង្គ ក្នុងខេត្តស្ទឹងត្រែងខាងក្រោមល្បាក់ខោន។ ត្រីនេះកម្រចាប់វាបានណាស់នៅប្រទេសកម្ពុជា ហើយប្រជានេសាទនៅស្រុកថាឡាបរិវាត់ ខេត្តស្ទឹងត្រែង និងខេត្តរតនគិរី (ទន្លេស្រែពក) ធ្លាប់ចាប់ត្រីនេះ នៅទន្លេមេគង្គដោយឧបករណ៍នេសាទមង។ វាជាប្រភេទត្រីស៊ីកូនត្រីដទៃជាអាហារ និងអាចចាប់បានដោយឧបករណ៍មង អួន សន្ទូច និងសំណាញ់។

ត្រីប៉ាសាណាក់ ស្ថិតក្នុងពពួកទី១ នៃឧបសម្ព័ន្ធ របស់ត្រីទឹកសាប នៃព្រះរាជាណាចក្រកម្ពុជា ដែលមាន០៣ប្រភេទ ហើយត្រីប៉ាសាណាក់នេះ ជាពពួកត្រីស ដែលមានន័យថាជាប្រភេទត្រីដែលរស់នៅជិតពេញមួយឆ្នាំ ក្នុងជម្រកសំខាន់ៗ តាមទន្លេ និងដៃធំៗនៃទន្លេ និងជាប្រភេទត្រីធ្វើចរាចរណ៍ឆ្ងាយ គឺចេញពីទន្លេចូលទៅតំបន់លិចទឹកនៅរដូវវស្សា លុះទឹកស្រក វាត្រលប់មកជម្រកសំខាន់របស់វាវិញ។ សរីរាង្គវិទ្យារបស់ពពួកត្រីស មិនអាចផ្សាំទៅនឹងលក្ខខណ្ឌបរិស្ថាននៃតំបន់ដីសើម ដូចជាកម្រិតអុកស៊ីសែនទាបដូចប្រភេទត្រីខ្មៅទេ ៕

ភ្នំពេញ៖ នារី​ម្នាក់​ស្រែកយំ​នៅ​មុខ​ទីតាំង KTV មួយ​កន្លែង បន្ទាប់​ពី​ត្រូវ​បុរសជនជាតិចិន​ម្នាក់​ប្រើ​ហិ.ង្សា​មក​លើ​រូប​នាង ​ដោយសារ​តែ​នាង​ជា​អ្នក​អង្គុយ​កំដរ​ភ្ញៀវ​ផឹកស្រា​ច្រើន​ពេក ​គ្រាន់តែ​រឿង​សុំ​ចូល​បន្ទប់ទឹក​សោះ បង្ក​ការ​ភ្ញាក់ផ្អើល​កាលពី​វេលា​ម៉ោង​២​និង​២០​នាទី​រំលង​អធ្រាត្រ​ឈាន​ចូល​ថ្ងៃ​ទី​១៥ ខែធ្នូ ឆ្នាំ​២០២២​ នៅ​ចំណុច​ទីតាំង​ KTV មួយ​កន្លែង​​មាន​ស្លាក​យីហោ GOLD PALACE នៅ​តាម​បណ្តោយ​ផ្លូវ​លេខ​៤៧ ស្ថិត​ក្នុង​សង្កាត់​ស្រះ​ចក ខណ្ឌដូនពេញ ​រាជធានីភ្នំពេញ ។

យោង​តាម​ប្រភព​ព័ត​មាន​ពី​នារី​រង​គ្រោះ​បាន​ឲ្យ​ដឹង​ថា នៅ​មុន​ពេល​កើតហេតុ​នាង​បាន​អង្គុយ​នៅ​ក្នុង​បន្ទប់​មួយ​ក្នុង KTV ខាងលើ​ជាមួយ​ជន​បង្ក​ជា​ជនបរទេស​និយាយ​ភាសា​ចិន​ ហើយ​ជនបរទេស​ខាងលើ​បាន​ឲ្យ​នាង​កំដរ​ផឹកស្រា​ជាមួយ ដោយ​សារ​ផឹក​ច្រើន​ពេក នាង​ក៏​សុំ​ចូល​បន្ទប់ទឹក តែ​ស្មាន​មិន​ដល់ ត្រូវ​ជនបរទេស​ខាងលើ​ប្រើ​ហិ.ង្សា​មក​លើ​​នាង​ ដោយ​ចាប់​ច្របាច់ក មិន​ឲ្យ​ចូល​បន្ទប់ទឹក​នោះ​ទេ​។

ក្រោយ​ពេល​កើតហេតុ នាង​បាន​ស្រែក​ឆោឡោ​យ៉ាង​ខ្លាំង ដោយសារ​ទទួល​រង​អំពើ​ហិ.ង្សា ​បន្ទាប់មក​ត្រូវ​សន្តិសុខ KTV នាំ​នាង​ចេញ​ទៅ​ខាងក្រៅ​ទៅ​វិញ​ ហើយ​នារី​រង​គ្រោះ​មិន​សុខចិត្ត បាន​ស្រែក​រក​អ្នក​សារព័ត៌មាន​អោយ​ជួយ​ផ្សព្វផ្សាយ ​ដើម្បី​ទាមទារ​រក​យុត្តិធម៌​ចំពោះ​ខ្លួន ព្រមទាំង​បាន​ស្រែកយំ​ក្តែ​ង​ៗ​ជាមួយ​ទឹកភ្នែក​ថា «នារី​KTV​ក៏​ជា​មនុស្ស​ដែរ​បង​ៗ» ។

ក្រោយ​កើតហេតុ​ ដោយសារ​មានការ​ចុះ​មក​អន្តរាគមន៍ និង​សម្របសម្រួល​ពី​សមត្ថកិច្ច​មូលដ្ឋាន​នៃ​ប៉ុស្តិ៍​នគរបាល​រដ្ឋបាល​ស្រះ​ចក នារី​រង​គ្រោះ​សម្រេច​ទទួលយក​សំណង​ចំនួន​៥០០​ដុល្លារ ដើម្បី​បញ្ចប់រឿង​នៅ​ទីតាំង​កើត​ហេតុតែ​ម្តង ​៕