បរទេស៖ ក្រុមក្មេងទំនើងមួយក្រុមបានបើកការបាញ់ប្រហារ ដោយមានគ្រាប់បែកមួយគ្រាប់បានគប់ ទៅកាន់ សណ្ឋាគារមួយនៅកណ្តាលទីក្រុងកាប៊ុល ប្រទេសអាហ្វហ្គានីស្ថាន មុនពេលការបង្រ្កាបដោយកងកម្លាំងសន្តិសុខបានសម្លាប់មនុស្ស ៣ នាក់ និងរបួស ១៨ នាក់ផ្សេងទៀត។

ទីភ្នាក់ងារសារព័ត៌មាន អាល់ចា សេរ៉ា(Al Jazeera) បានរាយការណ៍ថា នៅថ្ងៃទី ១២ ខែធ្នូ ឆ្នាំ ២០២២ មានក្រុមប្រដាប់អាវុធបានវាយប្រហារសណ្ឋាគារ ឡុង ហ្គែន (Longan) ក្នុងសង្កាត់ពាណិជ្ជកម្ម ចា រិណាវ (Charinau) កណ្តាលទីក្រុងកាប៊ុលនៃប្រទេសអាហ្វហ្គានីស្ថាន។ ដែលនៅទីនោះជាសណ្ឋាគារ មានភ្ញៀវទេសចរណ៍ និងភ្ញៀវបរទេសស្នាក់នៅជាច្រើន ហើយភាគច្រើនជាជនជាតិចិន។

ជាមួយគ្នានោះអ្នកនាំពាក្យរដ្ឋាភិបាលតាលីបង់បាននិយាយថា មុនពេលកើតហេតុយ៉ាងហោចណាស់មានខ្មាន់កាំភ្លើងបីនាក់បានលួចចូលសណ្ឋាគារនេះ រួចក៏ធ្វើបាញ់បោះទៅកាន់មនុស្សក្នុងសណ្ឋាគារ ព្រមទាំងមានការគប់គ្រាប់បែកបង្កជាអគ្គិភ័យផងដែរ។

ទោះជាយ៉ាងណាបន្ទាប់ពីមានហេតុការខាងលើ ក្រុមមន្ត្រីសន្តិសុខក្នុងតំបន់ក៏បានចុះបង្ក្រាបយ៉ាងក្ដៅគគុករហូតដល់ មន្ត្រីប៉ូលិសសម្រេចចិត្តបាញ់សម្លាប់ក្រៅប្រព័ន្ធតុលាការបណ្ដាលឱ្យជនបង្ក ៣ នាក់ស្លាប់បាត់បង់ជីវិត និងមនុស្ស ១៨ នាក់ផ្សេងទៀតបានរងរបួស ដែលភាគច្រើនជាជនជាតិចិន។

ប្រភពដដែលបានបន្ថែមថាគ្មានជនបរទេសណាម្នាក់ស្លាប់ក្នុងឧបទ្ទវហេតុនេះទេ ប៉ុន្តែមានភ្ញៀវបរទេសក្នុងសណ្ឋាគារពីរនាក់បានរងរបួសធ្ងន់ ខណៈពេលដែលពួកគេព្យាយាមលោតចេញពីបង្អួចដើម្បីគេចខ្លួនពីគ្រោះថ្នាក់ដោយអាវុធ។

គួរបញ្ជាក់ផងដែរថាក្នុងប៉ុន្មានខែថ្មីៗនេះប្រទេសអាហ្វហ្គានីស្ថាន មានការទម្លាក់គ្រាប់បែក និងការវាយប្រហារជាបន្តបន្ទាប់នៅក្នុងប្រទេស ដែលភាគច្រើនបង្កឡើងដោយពួកសកម្មប្រយុទ្ធ អាយ ស៊ីស (ISIS) នៅក្នុងប្រទេសអាហ្វហ្គានីស្ថានផ្ទាល់៕ ប្រភព៖ Thairath

អន្តរជាតិ៖ វិមានក្រឹមឡាំង បានឲ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងមិនធ្វើសន្និសីទសារព័ត៌មានមុនដំណាច់ឆ្នាំ ជាមួយអ្នកសារព័ត៌មាន នោះទេ ហើយដែលនេះជាការលុបចោលលើកដំបូងបំផុតក្នុងរយៈពេល១០ឆ្នាំ ខណៈសង្រ្គាមនៅអ៊ុយក្រែន ជិតចូលដល់ខែទី១០។ នេះបើយោងតាមការដកស្រង់ ផ្សាយពីទីភ្នាក់ងារសារព័ត៌មាន AFP នៅថ្ងៃអង្គារ ទី១៣ ខែធ្នូ ឆ្នាំ២០២២។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បាននិយាយកាលពីថ្ងៃចន្ទសប្តាហ៍នេះថានឹងមិនមានសន្និសីទសារព័ត៌មាន មុនចូលឆ្នាំថ្មី នោះទេ ប៉ុន្តែបានកត់សម្គាល់ថា លោក ពូទីន នៅតែថ្លែងសុន្ទរកថាជាទៀងទាត់ទៅកាន់សារព័ត៌មាន និងជូនដំណឹងពីដំណើរទស្សនកិច្ចបរទេស។

យ៉ាងនេះក្តី លោក ប៉េសកូវ មិនបានផ្តល់ហេតុផលសម្រាប់ការមិនរៀបចំសន្និសីទប្រចាំឆ្នាំ ដែលជាធម្មតាមានរយៈពេលជាច្រើនម៉ោងនោះទេ ស្របពេល ក្រុមអ្នកជំនាញខ្លះចាត់ទុកថាការលុបចោលសន្និសីទនេះ គឺដោយសារតែសង្គ្រាមរបស់រុស្ស៊ីនៅអ៊ុយក្រែន។

គួរបញ្ជាក់ថា លោក ពូទីន ដែលកាន់អំណាចតាំងពីឆ្នាំ២០០០ តែងតែធ្វើសន្និសីទសារព័ត៌មានរៀងរាល់ខែធ្នូ ដែលជាព្រឹត្តិការណ៍មួយលើកមុខមាត់របស់លោក នៅលើទូរទស្សន៍រដ្ឋ។ នៅ២០២២ឆ្នាំនេះ គឺជាលើកទីមួយហើយក្នុងរយៈពេល១០ឆ្នាំមកនេះ ដែលលោក ពូទីន មិនប្រារព្ធព្រឹត្តិការណ៍ខែធ្នូ ដែលជាឱកាសដ៏កម្រមួយសម្រាប់អ្នកសារព័ត៌មាននៅខាងក្រៅវិមានក្រឹមឡាំង រួមទាំងអ្នកកាសែតអន្តរជាតិ ដើម្បីសួរសំណួរទៅកាន់ប្រធានាធិបតីរុស្ស៊ី ដោយផ្ទាល់​ ៕

បរទេស៖ នាថ្ងៃទី១៣ ខែធ្នូ ឆ្នាំ២០២២ កាសែត The Daily Star បានយការណ៍ថា កីឡាករបាល់ទាត់លំដាប់កំពូលរបស់អ៊ីរ៉ង់ម្នាក់ កំពុងប្រឈមមុខនឹងការកាត់ទោសប្រហារជីវិត បន្ទាប់ពីគាត់ត្រូវបាន “បង្ខំ” ឱ្យសារភាពតាមទូរទស្សន៍ទាក់ទងនឹងការធ្វើយុទ្ធនាការទាមទារសិទ្ធិស្ត្រី និងសេរីភាពក្នុងប្រទេសថាមិនសមរម្យ។

ទាក់ទងនឹងបញ្ហាខាងលើ សហព័ន្ធកីឡាករបាល់ទាត់ FIFPRO បានបង្ហោះសារកាលពីយប់ថ្ងៃចន្ទ ទី១២ ខែធ្នូនេះ ថា FIFPRO ពិតជាមានការភ្ញាក់ផ្អើល និងខកចិត្តចំពោះរបាយការណ៍ដែលថាកីឡាករបាល់ទាត់អាជីពលោក Amir Nasser-Azadani ប្រឈមនឹងការប្រហារជីវិតនៅអ៊ីរ៉ង់បន្ទាប់ពីលោកធ្វើយុទ្ធនាការទាមទារសិទ្ធិស្ត្រី និង សេរីភាពជាមូលដ្ឋានក្នុងប្រទេស ឈរក្នុងសាមគ្គីភាព ហើយអំពាវនាវឲ្យដក ទណ្ឌកម្មចេញភ្លាមៗ។

ជាមួយគ្នានោះបើយោងតាមការចុះផ្សាយរបស់សារព័ត៌មាន Iran Wire ដែលជាប្រព័ន្ធផ្សព្វផ្សាយដ៏ សំខាន់របស់ប្រទេសនេះបានបន្ថែមថា ប្រព័ន្ធតុលាការនៃសាធារណរដ្ឋអ៊ីស្លាមគ្រោងនឹងព្យួរកកីឡាករបាល់ទាត់វ័យ ២៦ ឆ្នាំរូបនេះ បន្ទាប់ពីលោក Nasser-Azadani ដែលជាជនជាប់ចោទ និងពីរនាក់ទៀតបានបង្ហាញខ្លួននៅលើកញ្ចក់ទូរទស្សន៍រដ្ឋកាលពីថ្ងៃទី ២០ ខែវិច្ឆិកាកន្លងទៅ ពួកគេត្រូវបានគេឱ្យអានការសារភាពដែល “បង្ខំ” ពីអាជ្ញាធរ។

គួរបញ្ជាក់ផងដែរថាប្រទេសអ៊ីរ៉ង់កំពុងជួបប្រទះការតវ៉ាទូទាំងប្រទេស មូលហេតុគឺបន្ទាប់ពីការស្លាប់របស់ Mahsa Amini អាយុ ២២ ឆ្នាំ ខណៈពេលដែលនាងស្ថិតនៅក្រោមការឃុំឃាំងរបស់ប៉ូលីសនៅក្នុងខែកញ្ញាកន្លងទៅ ហើយនាងត្រូវបានឃុំខ្លួនដោយការចោទប្រកាន់ថាបានបំពានច្បាប់តឹងរ៉ឹងទាក់ទង នឹងការគ្របក្បាលរបស់ស្ត្រី៕ ប្រភព៖ Sanook