បរទេស៖ មានការភ័យស្លន់ស្លោសម្រាប់ក្រុមវេជ្ជបណ្ដិតនៅក្នុងមន្ទីរពេទ្យ ក្រោយបុរសចំណាស់ម្នាក់បានត្រៀមខ្លួនរួចជាស្រេចសម្រាប់ការវះកាត់ និងការព្យាបាល បន្ទាប់ពីគ្រូពេទ្យជួយយកគ្រាប់កាំភ្លើងខ្នាតធំកាលពីសម័យសង្គ្រាមលោកលើកទី ១ ដែលបានបង្កប់នៅក្នុងរន្ធគូថរបស់គាត់។

កាលពីពេលថ្មីៗកន្លងទៅនេះកាសែត New York Post បានរាយការណ៍អំពីហេតុការណ៍ដ៏គួរឱ្យភ្ញាក់ផ្អើលមួយបានកើតឡើងនៅក្នុងមន្ទីរពេទ្យទាំងមូល នៅពេលដែលបុរសចំណាស់ម្នាក់ត្រូវបានក្រុមគ្រូពេទ្យរកឃើញថាមានគ្រាប់កាំភ្លើងធំមួយគ្រាប់កាលពីសម័យសង្គ្រាមលោកលើកទី១ ដែលជាប់ក្នុងរន្ធគូថរបស់គាត់។

ទាក់ទងនឹងហេតុការណ៍ខាងលើ បើតាមសេចក្តីរាយការណ៍បានឲ្យដឹងថាហេតុការណ៍នេះបានកើតឡើងទៅលើអ្នកជំងឺបុរសអាយុ ៨៨ ឆ្នាំម្នាក់ ត្រូវបានបញ្ជូនទៅកាន់មន្ទីរពេទ្យ Sainte Musse នៃប្រទេស បារាំង  ដើម្បីសុំឱ្យគ្រូពេទ្យជួយយកគ្រឿងផ្ទុះបុរាណចេញពីរាងកាយរបស់គាត់ ប៉ុន្តែសំណើនេះបាន បង្កឲ្យមានការភ័យខ្លាចចំពោះការផ្ទុះគ្រាប់នេះឡើងខណៈពេលវះកាត់។

ទោះជាយ៉ាងណាការទាមទារឲ្យមានអន្តរាគមន៍ពីទីផ្នាក់ងារកម្ចាត់គ្រាប់បែក និងគ្រឿងផ្ទះត្រូវបានបញ្ជាឱ្យជម្លៀសអ្នកជំងឺសង្គ្រោះបន្ទាន់មួយចំនួនចេញជាមុនសិនមុននឹងធ្វើការវះកាត់។

យ៉ាងណាមិញមន្ទីរពេទ្យក៏បានបញ្ជាក់ផងដែរថា អ្នកឯកទេសកម្ចាត់គ្រឿងផ្ទុះ ក៏បានធានានិង ប្រាប់ ថាវាគឺជាគ្រាប់កាំភ្លើងធំក្នុងសង្គ្រាមលោកលើកទី១ ដែលប្រើដោយទាហានបារាំង ហើយវាមានលទ្ធភាពតិចតួចណាស់ដែលគ្រាប់កាំភ្លើងនឹងផ្ទុះឡើងខណៈពេលវះកាត់។

បន្ទាប់ពីមានការធានាអះអាងពីអ្នកជំនាញ ក្រុមគ្រូពេទ្យក៏ចាប់ផ្តើមដំណើរការវះកាត់​ និងបានព្យាយាមយកវត្ថុនោះចេញមកក្រៅ ដែលវាមានប្រវែងជិត ៨ អ៊ីញ និងទទឹងជាង ២ អ៊ីញចេញពីរន្ធគូថរបស់បុរសនោះ។

ទោះជាយ៉ាងណា បើតាមព័ត៌មានចុងក្រោយពីខាងមន្ទីរពេទ្យគេបានរកឃើញថាអ្នកជំងឺក្រោយពេលវះកាត់ដោយជោគជ័យ ពេលបច្ចុប្បន្ននេះគាត់ស្ថិតក្នុងសុខភាពល្អ ហើយត្រូវបានគេរំពឹងថានឹងជាសះស្បើយពេញលេញពីការវះកាត់។

យ៉ាងណាមិញគេបានសន្និដ្ឋានថា អ្នកជំងឺប្រហែលជាបានយកគ្រាប់កាំភ្លើងធំពីសម័យបុរាណនេះដាក់ចូលរន្ធគូថដើម្បីភាពរីករាយផ្លូវភេទរបស់គាត់៕ ប្រភព៖ Sanook

អន្តរជាតិ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយនៅថ្ងៃពុធសប្ដាហ៍នេះ (ម៉ោងនៅសហរដ្ឋអាមេរិក) ថាជំនួយរាប់ពាន់លានដុល្លារ ដែលសភាអាមេរិកអនុម័តផ្ដល់ឱ្យប្រទេសរបស់លោកដើម្បីប្រយុទ្ធប្រឆាំងនឹងការឈ្លានពានរបស់រុស្ស៉ី មិនមែនជាជំនួយសប្បុរសធម៌នោះទេ ប៉ុន្តែជាការវិនិយោគមួយ នៅក្នុងសន្តិសុខសកល។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២២។

លោក ហ្សេលេនស្គី ធ្វើការកត់សម្គាល់ខាងលើ នៅក្នុងពេលថ្លែងសុន្ទរកថាទៅកាន់សភាអាមេរិក នាឱកាសបំពេញទស្សនកិច្ចនៅសហរដ្ឋអាមេរិក ដែលជាដំណើរនៅក្រៅ ប្រទេសជាលើកដំបូងបំផុត ចាប់តាំងពីសង្រ្គាមផ្ទុះឡើងកាលពីថ្ងៃទី២៤ ខែកុម្ភៈមក។ លោក ហ្សេលេនស្គី បានគូសបញ្ជាក់ដូច្នេះថា «លុយរបស់អ្នកមិនមែនជាជំនួយ សប្បុរសធម៌​នោះទេ ប៉ុន្តែវាជាការវិនិយោគមួយដើម្បីសន្តិសុខសកល និងប្រជាធិបតេយ្យ»។

គួរបញ្ជាក់ថា នៅចំពោះមុខសភាអាមេរិក លោក ហ្សេលេនស្គី ក៏បានរំឮកឡើងវិញផងដែរថាកិច្ចចរចាសន្តិភាពជាមួយរុស្ស៉ី មិនអាចជាការសម្រុះសម្រួលពាក់ព័ន្ធនឹង អធិបតេយ្យ និងបូរណភាពទឹកដីអ៊ុយក្រែនជាដាច់ខាត ជាមួយការសង្កត់ធ្ងន់ថាអ៊ុយក្រែននឹងមិនចុះចាញ់ ឬចុះញ៉មនោះទេ តែក៏សង្ឃឹមដែរថាគណបក្សទាំង២ របស់ សហរដ្ឋអាមេរិកនឹងបន្តគាំទ្រអ៊ុយក្រែន៕

អន្តរជាតិ៖​ រដ្ឋមន្ត្រីការពារជាតិរុស្ស៊ី លោក សឺហ្គៃ សយហ្គូ (Sergei Shoigu)បាននិយាយថា កាំជ្រួចមីស៊ីលអន្តរទ្វីប សាម៉ាត (Sarmat) ដំបូងនឹងត្រូវដាក់ពង្រាយក្នុងការប្រយុទ្ធចាប់ពីឆ្នាំ២០២៣ តទៅ។ នេះបើយោងតាមការចុះផ្សាយរបស់សារព័ត៌មាន Vnexpress ។

រដ្ឋមន្ត្រីការពារជាតិរុស្សី លោក Sergei Shoigu បាននិយាយក្នុងជំនួបជាមួយប្រធានាធិបតី វ្ល៉ាឌីមៀ ពូទីន ថា “មីស៊ីលបាលីស្ទិកអន្តរទ្វីប Sarmat ដំបូងបង្អស់ (ICBM) នឹងត្រូវបានដាក់ឱ្យដំណើរការត្រៀមប្រយុទ្ធនៅឆ្នាំក្រោយ។

ប្រទេសរុស្ស៊ីគ្រោងនឹងដាក់ពង្រាយ ICBMs ចំនួន២២ប្រភេទ រួមទាំងមីស៊ីល RS-28 Sarmat, RS-24 Yars និងប្រព័ន្ធអាវុធល្បឿនលឿន អាវីនហ្គាដ (Avangard) ទៅកាន់កងកម្លាំងមីស៊ីលយុទ្ធសាស្ត្រក្នុងឆ្នាំ២០២៣។

លោកពូទីន បាននិយាយថា ទីក្រុងម៉ូស្គូនឹងបន្តកិច្ចខិតខំប្រឹងប្រែងដើម្បីធ្វើទំនើបកម្ម និងកែលម្អសមត្ថភាពប្រយុទ្ធរបស់កងកម្លាំងមីស៊ីលរបស់ខ្លួន។ លោកបានមានប្រសាសន៍ថា “យុទ្ធសាស្ត្រនុយក្លេអ៊ែរជាវិធានការចម្បងដើម្បីធានាអធិបតេយ្យភាព និងបូរណភាពទឹកដីរបស់រុស្ស៊ី ព្រមទាំងសមតុល្យយុទ្ធសាស្ត្រ និងតុល្យភាពនៃអំណាចនៅលើពិភពលោក”។

គម្រោងមីស៊ីលទំនើប Sarmat ត្រូវបានចាប់ផ្តើមដោយប្រទេសរុស្ស៊ីក្នុងឆ្នាំ ២០១១ ដើម្បីជំនួសស៊េរី R-36M ដែលហួសសម័យ។ នេះគឺជា “អាវុធទំនើប” មួយក្នុងចំណោមអាវុធទាំង៦ ដែលត្រូវបានណែនាំដោយប្រធានាធិបតី ពូទីន នៅដើមឆ្នាំ ២០១៨ ដោយបានឆ្លងកាត់ដំណាក់កាលសាកល្បងជាច្រើន មុនពេលការបាញ់សាកល្បងពេញលេញនៃមីស៊ីលនៅថ្ងៃទី២០ ខែមេសា។

មន្ត្រីរុស្ស៊ី បាន និយាយកាលពីខែមេសាថា កាំជ្រួចដំបូងគេត្រូវបានគេរំពឹងថានឹងបញ្ជូនទៅកាន់អង្គភាពមួយនៅក្នុងខេត្តក្រាស្នូយ៉ាស់ (Krasnoyarsk) ចម្ងាយប្រហែល ៣ ០០០ គីឡូម៉ែត្រពីភាគខាងកើតទីក្រុងមូស្គូ។ ប្រព័ន្ធកាំជ្រួច Sarmat សរុបចំនួន ៤៦ នឹងត្រូវប្រគល់ជូនកងទ័ពរុស្ស៊ី។ ពួកវានឹងត្រូវដាក់នៅក្នុងកន្លែងបាញ់បង្ហោះកាំជ្រួច R-36M2 ចាស់ដែលបង្កើតឡើងដោយសហភាពសូវៀត ជួយរុស្ស៊ីសន្សំធនធាន និងពេលវេលា។

Sarmat នីមួយៗមានប្រវែង ៣៥,៥ម៉ែត្រ អង្កត់ផ្ចិត ៣ម៉ែត្រ ផ្ទុកប្រេងបាន ១៧៨តោន និងមានចម្ងាយជាង ១៨ ០០០គីឡូម៉ែត្រ។ ក្បាលគ្រាប់ជាមូលដ្ឋានរបស់ Sarmat មានកម្លាំងខ្លាំងរហូតដល់ ៥០លានតោននៃ TNT ដែលបំពាក់ដោយឧបករណ៍បំភាយជាច្រើនដើម្បីបញ្ឆោតការការពារសត្រូវ។

ក្បាលគ្រាប់មានល្បឿនអតិបរមាលើសពី ២៥ ០០០ គីឡូម៉ែត្រក្នុងមួយម៉ោង ប្រើប្រព័ន្ធណែនាំឯករាជ្យដើម្បីវាយលុកគោលដៅផ្សេងៗ ក៏ដូចជាអាចប្តូរទិសដៅដោយខ្លួនឯងក្នុងដំណាក់កាលបង្វិលដើម្បីជៀសវាងការស្ទាក់ចាប់។

លោកឧត្តមសេនីយ៍ សឺហ្គី ខារ៉ាកៀវ (Sergey Karakaev) មេបញ្ជាការកងកម្លាំងមីស៊ីលយុទ្ធសាស្ត្ររបស់រុស្ស៊ី បាននិយាយថា មីស៊ីល Sarmat ក៏អាចផ្ទុកក្បាលគ្រាប់ អាវីនហ្គាដ ហាយផើសូនិច (Avangard hypersonic) ជាច្រើនផងដែរ ដែលជួយពួកគេកម្ចាត់ប្រព័ន្ធការពារណាមួយនៅក្នុងពិភពលោកនាពេលបច្ចុប្បន្ននេះ ៕

ប្រទេសថៃ៖ ពិតជារឿងដ៏គួរឱ្យភ្ញាក់ផ្អើល ក្រោយពី ឌីជេស្រីវ័យក្មេងម្នាក់ ត្រូវបានបុរសអាថ៌កំបាំង ហុចកែវស្រាឱ្យផឹក លុះមិនដល់៥នាទីផង ស្រាប់តែនាងដួលសន្លប់កណ្តាលហ្វូងមនុស្សជាច្រើន ដែលមានទាំងការហូរឈាមគ្រប់រន្ធលើដងខ្លួន គួរអោយខ្លាច និងបានបញ្ជូនទៅកាន់មន្ទីរពេទ្យសង្គ្រោះបន្ទាន់។

វាជាការព្រមានសម្រាប់ស្ត្រីទាំងអស់ ដែលតែងតែកម្សាន្តពេលយប់ត្រូវប្រយ័ត្ន ហើយកុំទទួលយកភេសជ្ជៈពីមនុស្សចម្លែក ព្រោះយើងមិនអាចដឹងទេថាមានអ្វីនៅក្នុងភេសជ្ជៈនោះ?

ជាក់ស្ដែងដូចជាករណីនារីជនជាតិថៃដែលជា ឌីជេ(DJ) ក្នុងក្លិបម្សាន្តម្នាក់នាងបានធ្វើការចែករំលែកនូវរឿងរ៉ាវដ៏គួរឱ្យភ័យខ្លាចជាខ្លាំង នាថ្ងៃទី ២១ ខែធ្នូ ឆ្នាំ ២០២២នេះថា ៖

“នាងជា ឌីជេ(DJ)  នៅក្នុងក្លិបកម្សាន្តមួយកន្លែង ពេលនាងចុះពីស្តង់ឌីជេមានគេហុចភេសជ្ជៈឲ្យផឹកមួយកែវ ដោយមិនចង់ខ្វះសុជីវធម៌ ក៏សម្រេចយកវាទៅផឹកដោយមិនគិតច្រើន ប៉ុន្តែក្រោយពីបានផឹកភេសជ្ជៈ រួចភ្លាម ពុំមានសញ្ញាស្រវឹងអ្វីឡើយ តែមួយសន្ទុះមក មិនដល់ ៥ នាទីផង ខ្លួនក៏បានសន្លប់ដួលបោក ក្បាលនឹងឥដ្ឋ  តែអ្វីដែលគួរឱ្យតក់ស្លុតនោះគឺមានឈាមចេញគ្រប់រន្ធលើរាងកាយ មានទាំងចេញតាមច្រមុះ ត្រចៀក និងមានឡើងជាំឈាមលើជង្គង់ជាដើម។”

តែជាសំណាងល្អក្រោយពីមានអាការនេះកើតឡើងមានមនុស្សនៅទីនោះ រួមទាំងមិត្តប្រុសរបស់នាងផងដែរ ទើបអាចជួយបញ្ជូនខ្លួនទៅកាន់មន្ទីរពេទ្យ និងក្រុមគ្រូពេទ្យធ្វើការសង្គ្រោះជីវិតទាន់ពេលវាលាដែលស្ថិតក្នុងស្ថានភាពធ្ងន់ធ្ងរ  ជាមួយគ្នានោះប្រសិនបើគ្មានមនុស្សច្រើននៅកន្លែងកើតហេតុច្បាស់ជាជនបង្ក នឹងនាំនាងទៅណាក៏មិនដឹង។

យ៉ាងណាមិញនារីរងគ្រោះបានបន្តថា នាងមិនដឹងថាភាគីម្ខាងទៀតដាក់អ្វីចូលក្នុងកែវទេ ព្រោះមានអារម្មណ៍ថាមិនស្រវឹង ដោយប្រសិទ្ធភាពរបស់វាគឺស្រដៀងនឹងថ្នាំស្ពឹកដែលប្រើក្នុងការវះកាត់ វាធ្វើសកម្មភាពយ៉ាងលឿន រហូតខ្លួនមិនចាំអ្វីទាំងអស់ និងបានក្លាយជាបទពិសោធន៍ដ៏គួរឱ្យភ័យខ្លាចក្នុងជីវិត។

ទោះជាយ៉ាងណាក្រោយពីនារីរងគ្រោះបានចែករំលែងនូវរឿងរ៉ាងផ្ទាល់ខ្លួនរួចមក ក៏មានមហាជនជាច្រើនបានបង្ហើបថា នេះគឺជាប្រភេទគ្រឿងញៀនថ្មីមួយប្រភេទ ដែលមានឥទ្ធិពល ឱ្យមានអារម្មណ៍ មានភាពតានតឹង និងអារម្មណ៍ស្វាហាប់ ឡើងចុះមិនទៀង ប៉ុន្តែវាមិនធ្ងន់ធ្ងររហូតធ្វើឱ្យបាត់បង់ជីវិតឡើយ៕ ​ប្រភព៖ ​Kapook

កាប៊ុល៖ ក្រសួងអប់រំដែលគ្រប់គ្រងដោយក្រុមតាលីបង់នៃប្រទេសអាហ្វហ្គានីស្ថាន កាលពីថ្ងៃអង្គារសប្តាហ៍នេះ បានផ្អាកការចូលរៀននៅសកលវិទ្យាល័យ ដោយនិស្សិតស្រី រហូតដល់មានការជូនដំណឹងបន្ថែម ខណៈការសម្រេចបែបនេះរងនូវថ្កោលទោសយ៉ាងខ្លាំងពីសំណាក់សហរដ្ឋអាមេរិក ចក្រភពអង់គ្លេស និងអង្គការសហប្រជាជាតិ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២១ ខែធ្នូ ឆ្នាំ២០២២។

លិខិតមួយដែលត្រូវបានបញ្ជាក់ដោយអ្នកនាំពាក្យរបស់ក្រសួងអប់រំឧត្តមសិក្សា បានណែនាំដល់សាកលវិទ្យាល័យសាធារណៈ និងឯកជនអាហ្វហ្គានីស្ថាន ឲ្យផ្អាកការចូលរៀនរបស់និស្សិតស្រីជាបន្ទាន់ ស្របតាមសេចក្តីសម្រេចរបស់គណៈរដ្ឋមន្ត្រី។

ការប្រកាសរបស់រដ្ឋាភិបាលតាលីបង់ ដែលមិនត្រូវបានទទួលស្គាល់ជាអន្តរជាតិនោះ បានកើតឡើងចំពេលដែលក្រុមប្រឹក្សាសន្តិសុខអង្គការសហប្រជាជាតិ បានជួបប្រជុំគ្នានៅទីក្រុងញូវយ៉ក ស្តីពីអាសនៈនៅ UN របស់ប្រទេសអាហ្វហ្កានីស្ថាន។

គួរបញ្ជាក់ថា សហរដ្ឋអាមេរិក អង់គ្លេស និង UN កំពុងសម្លឹងរកមើលអ្វីដែលខ្លួនអាចធ្វើបានបន្ថែមទៀត ដើម្បីរារាំងសកម្មភាពរបស់ក្រុមតាលីបង់ ជាពិសេសលើករណីបិទសិទ្ធិស្រ្តី៕