បរទេស៖ រដ្ឋជាច្រើននៅក្នុងប្រទេសម៉ាឡេស៊ី លិចនៅក្រោមកម្រិតទឹកជំនន់ដ៏ខ្ពស់ និងធ្ងន់ធ្ងរ បន្ទាប់ពីមានភ្លៀងធ្លាក់ខ្លាំងក្នុងសប្តាហ៍នេះ ជាលទ្ធផលបានបណ្តាលឱ្យមនុស្សយ៉ាងហោចណាស់ ៥ នាក់បានស្លាប់។

ទីភ្នាក់ងារសារព័ត៌មានបរទេសបានរាយការណ៍ពីទីក្រុងកូឡាឡាំពួរ នៃប្រទេសម៉ាឡេស៊ី នាថ្ងៃទី ២២ ខែធ្នូ ឆ្នាំ២០២២នេះថា ទីភ្នាក់ងារឧតុនិយមជាតិម៉ាឡេស៊ី បានបង្ហាញពីស្ថានភាពទឹកជំនន់នៅក្នុងរដ្ឋ ជាច្រើនដែលស្ថិតក្នុងស្ថានភាពធ្ងន់ធ្ងរ ដោយសារគ្រោះទឹកជំនន់បន្ទាប់ពីមានព្យុះផ្គររន្ទះ និងមានភ្លៀងធ្លាក់ខ្លាំងយ៉ាងលឿន ចាប់តាំងពី ដើមសប្តាហ៍នេះ។

ជាលទ្ធផលគ្រោះធម្មជាតិនេះ ត្រូវបានទីភ្នាក់ងារបង្ការ និង កាត់បន្ថយគ្រោះមហន្តរាយម៉ាឡេស៊ីបាន បញ្ជាក់យ៉ាងដូច្នេះថា គ្រោះធម្មជាតិនេះបានបណ្តាលឱ្យមនុស្សយ៉ាងហោចណាស់៥នាក់បានស្លាប់ និងមនុស្សសរុបជាង ៧២,០០០ នាក់នៅក្នុងរដ្ឋដែលរងផលប៉ះពាល់យ៉ាងធ្ងន់ធ្ងរ ដែលត្រូវតែជម្លៀសចេញពីផ្ទះរបស់ពួកគេជាបន្ទាន់។

លើសពីនោះគេបានព្រមានថាភ្លៀងធ្លាក់ខ្លាំងនឹងបន្តគ្របដណ្តប់នៅតំបន់ទាំងនេះរហូតដល់ថ្ងៃខាងមុខ និងអាជ្ញាធរបានណែនាំប្រជាជនដែលរស់នៅក្នុងតំបន់គ្រោះថ្នាក់គួរធ្វើជម្លៀសខ្លួនទៅនៅឯជម្រកបណ្តោះអាសន្នក្នុងរដ្ឋ Kelantan ក៏ដូចជាបានពិភាក្សាអំពីការបែងចែកថវិកាគ្រាអាសន្នដំបូងចំនួន ៤០ លានរីងហ្គីត ឬប្រហែល១០ដុល្លារក្នុងម្នាក់ ដល់ទីភ្នាក់ងារគ្រោះមហន្តរាយជាតិ ដើម្បីបង្កើនប្រសិទ្ធភាពនៃការជួយប្រជាជន៕ ប្រភព៖ Dailynews

រដ្ឋធានីវ៉ាស៊ីតោន៖ នៅក្នុងដំណើរទៅបំពេញទស្សនកិច្ចលើកទី១របស់ប្រធានាធិបតីអ៊ុយក្រែន ទៅជាន់ទឹកដីរបស់សហរដ្ឋអាមេរិក ចាប់តាំងពីសង្គ្រាមរបស់ក្រុងមូស្គូ បានផ្ទុះឡើង កាលពីថ្ងៃទី២៤ ខែកុម្ភៈនោះ ពិភពលោក បានផ្ដោតការចាប់អារម្មណ៍យ៉ាងខ្លាំង ទៅលើជំនួប រវាងមេដឹកនាំ នៃទាំង២ប្រទេសនេះ ហើយក៏មានមនុស្សជាច្រើន ងឿងឆ្ងល់ ថាតើសហរដ្ឋអាមេរិក បានផ្ដល់គ្រឿងយុទ្ធោបករណ៍ និង លុយប៉ុន្មាន សម្រាប់ក្រុងកៀវ ប្រយុទ្ធតស៊ូ ការពារទឹកដី និង សេរីភាពរបស់ពួកគេ?

សារព័ត៌មានយោធា 1945 (ណាញធីនហ្វ័រធីហ្វាយ) បានចេញផ្សាយ កាលពីថ្ងៃព្រហស្បតិ៍ ទី២២ ខែធ្នូ ថា បើតាមបណ្ដាញផ្សព្វផ្សាយនានារបស់សហរដ្ឋអាមេរិក បានរាយការណ៍ ថា លោក វ៉ូឡូឌីមៀរ ហ្សេឡែនស្គី (Volodymyr Zelensky) ប្រធានាធិបតីអ៊ុយក្រែន កាលពីថ្ងៃពុធ បានជួបជាមួយនឹងសមភាគីសហរដ្ឋអាមេរិក លោក ចូ បៃដិន (Joe Biden) និង ក៏មានជំនួប នៅក្នុងសម័យប្រជុំសភារបស់សហរដ្ឋអាមេរិក ផងដែរ។ ប៉ុន្ដែគោលបំណងដ៏សំខាន់ នៃដំណើរទស្សនកិច្ចនេះ ត្រូវគេដឹងយ៉ាងច្បាស់ណាស់ ថា គឺដើម្បីទទួលបាននូវការគាំទ្រផ្នែកហិរញ្ញវត្ថុ និង យោធាបន្ថែមទៀត សម្រាប់ប្រទេសអ៊ុយក្រែន ធ្វើសង្គ្រាម រយៈពេលយូរ ប្រឆាំងនឹងរុស្ស៊ី។

ចាប់តាំងពីដើមឆ្នាំ២០២២ រហូតមកដល់ពេលនេះ សហរដ្ឋអាមេរិក បានផ្តល់ប្រាក់ និង ជំនួយយោធា មានតម្លៃរាប់ពាន់លានដុល្លារ ជួយដល់រដ្ឋាភិបាលក្រុងកៀវ (Kyiv)។ ប៉ុន្ដែនៅមុនពេលប្រធានាធិបតី និងសភា ខ្នះខ្នែងជំរុញបន្ថែមដល់អ្នកបង់ពន្ធរបស់អាមេរិក នោះ សភាគួរតែទាមទារឱ្យសេតវិមាន ពន្យល់ឲ្យបានច្បាស់លាស់ អំពីរបៀប នៃការរួមចំណែកបន្ថែមទៀត សម្រាប់ការគាំទ្រដល់ផលប្រយោជន៍ជាតិសំខាន់ៗរបស់សហរដ្ឋអាមេរិក។

បើតាមកម្មវិធីតាមដានការគាំទ្រអ៊ុយក្រែនរបស់វិទ្យាស្ថានខៀល (Kiel) បានឲ្យដឹង ថា គិតត្រឹម ថ្ងៃទី២០ ខែវិច្ឆិកា រហូតមកដល់ពេលនេះ សហរដ្ឋអាមេរិករួមចំណែក ជាង៥០ពាន់លានដុល្លារ ជួយដល់កិច្ចខិតខំប្រឹងប្រែង នៅក្នុងសង្រ្គាមរបស់ក្រុងកៀវ ប្រឆាំងនឹងការលុកលុយរបស់រុស្ស៊ី។ ចំណែកវិភាគទានសរុប មកពីបណ្ដាប្រទេសទាំង២៧ ជាសមាជិក សហភាពអឺរ៉ុប គឺមានចំនួន៥៥ពាន់លានដុល្លារ។ ប៉ុន្តែប្រទេសដែលចូលរួមវិភាគទានដ៏ធំបំផុតតែមួយគត់ នៅលើទ្វីបមួយនេះ គឺប្រទេសអាល្លឺម៉ង់ ដោយផ្ដល់កញ្ចប់ជំនួយរបស់ខ្លួន មានទំហំទឹកប្រាក់ ប្រហែល១៥ពាន់លានដុល្លារអាមេរិក។

ជាមួយនឹងការប្ដេជ្ញាយ៉ាងម៉ឺងម៉ាត់របស់ក្រុងវ៉ាស៊ីនតោន ប្រឆាំងនឹងការឈ្លានពានរបស់រុស្ស៊ី នោះ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានស្នើកញ្ចប់ជំនួយបន្ថែម ចំនួន៣៧ពាន់លានដុល្លារ ទៅកាន់សភា ដើម្បីបញ្ជូនទៅឲ្យអ៊ុយក្រែន។ ប៉ុន្ដែសភារបស់ប្រទេសមហាអំណាចកំពូលមួយនេះ ថែមទាំងបានកំណត់កញ្ចប់ជំនួយបន្ថែមពីលើនេះ លើសពីសំណើរបស់ប្រធានាធិបតី ដោយអនុម័ត រហូតដល់៤៥ពាន់លានដុល្លារ ដែលធ្វើឲ្យកញ្ចប់វិភាគទានរបស់អាមេរិក កើនដល់ជាង ១០០ពាន់លានដុល្លារ។ ទាំងសហរដ្ឋអាមេរិក អឺរ៉ុប និង អ៊ុយក្រែន សុទ្ធតែក្លាយជាប្រធានបទគ្រប់គ្រាន់ សម្រាប់អនុញ្ញាតឱ្យក្រុងវ៉ាស៊ីនតោន កៀកស្មា បង្ហាញន័យយ៉ាងច្បាស់លាស់ ជាបន្ទុកដ៏ចម្បង សម្រាប់ការផ្តល់មូលនិធិជួយដល់សន្តិសុខអឺរ៉ុប។

បញ្ហាសន្តិសុខអឺរ៉ុប មិនអាចមានសារៈសំខាន់ខ្លាំងបំផុត សម្រាប់តែសហរដ្ឋអាមេរិក ច្រើនជាងបណ្ដាប្រទេស នៅទ្វីបអឺរ៉ុបនោះឡើយ។ សហរដ្ឋអាមេរិក អាចជូនពរអ៊ុយក្រែន ឲ្យទទួលបានជ័យជម្នះ ហើយគាំទ្រពួកគេយ៉ាងខ្លាំង ជាមួយនឹងជំនួយផ្នែកហិរញ្ញវត្ថុ និង យោធាសំខាន់ៗ។ ប៉ុន្តែដរាបណា សភា និង សេតវិមាន មានសុច្ឆន្ទៈចង់ផ្ដល់ប្រាក់ទាំងនោះ ទៅឲ្យអ៊ុយក្រែន ហើយសភាអឺរ៉ុប នឹងនៅតែមានសុច្ឆន្ទៈ មិនគ្រាន់តែអង្គុយរង់ចាំសាទរ និង ទះដៃអបអរ។

លោក Zelensky បានថ្លែង នៅក្នុងឃ្លីបវីដេអូមួយ ថា កងទ័ពរបស់គាត់ «បានប្រគល់ទង់ជាតិអ៊ុយក្រែន ដ៏ស្រស់ស្អាតរបស់យើង ជាមួយនឹងហត្ថលេខារបស់ពួកគេ សម្រាប់យើង បញ្ជូនបន្ត ទៅកាន់សភា និង ប្រធានាធិបតីសហរដ្ឋអាមេរិក។ អ៊ុយក្រែន មានអំណរគុណ ចំពោះការគាំទ្រ ដែលសហរដ្ឋអាមេរិក បាន និង កំពុងតែផ្តល់ឲ្យ រហូតមកទល់ពេលនេះ»។ ជាមួយគ្នានេះដែរ ប្រធានាធិបតីអ៊ុយក្រែន បានទទួលស្គាល់ថា «ជំនួយទាំងនេះ នៅតែមិនទាន់គ្រប់គ្រាន់នោះដែរ។ វាជាតម្រុយមួយ បង្ហាញថា វាមិនគ្រប់គ្រាន់នោះទេ»។

មេដឹកនាំសហរដ្ឋអាមេរិក បានថ្លែង ថា សហរដ្ឋអាមេរិក គាំទ្រដល់ជនជាតិអ៊ុយក្រែន ហើយលើសពីការអាណិតអាសូរ ចំពោះបុព្វហេតុរបស់ពួកគេ។ យើងនឹងផ្ដល់ជំនួយជាង៥០ពាន់លានដុល្លារ ដោយមានទាំងប្រព័ន្ធបាញ់គ្រាប់រ៉ុក្កែតដ៏ទំនើបបំផុត និង កាំភ្លើងផ្លោងមួយចំនួន, គ្រាប់កាំភ្លើងធំទំហំ១៥៥មិល្លីម៉ែត្រ ជាងមួយលានគ្រាប់, គ្រាប់រំសេវរាប់សិបលានគ្រាប់ផ្សេងទៀត, មីស៊ីល និង គ្រាប់រ៉ុក្កែតរាប់ម៉ឺនគ្រាប់, ការហ្វឹកហ្វឺនដល់កងទ័ពអ៊ុយក្រែន និង ការកំណត់គោលដៅចារកម្ម សម្រាប់ជួយដល់អ៊ុយក្រែន កំណត់អត្តសញ្ញាណ និង វាយប្រហារបំផ្លាញកម្លាំងទាហានរុស្ស៊ី នៅលើសមរភូមិ។ យើងបានធ្វើច្រើនជាងបណ្ដាប្រទេសផ្សេងទៀត ពោលគឺច្រើនជាង រាប់សិបដង នៃបណ្ដាប្រទេសជាមិត្តសម្ពន្ធមិត្ត»។

ប្រធានាធិបតីសហរដ្ឋអាមេរិក បានសង្កត់ធ្ងន់ ថា បើនិយាយឲ្យខ្លីទៅ យើងមិនមែនមានកាតព្វកិច្ច សម្រាប់តែផ្តល់អ្វីៗដល់អ៊ុយក្រែន ប៉ុណ្ណោះទេ។ យើងបានផ្តល់ប្រាក់យ៉ាងច្រើន និង គ្រឿងសឹករួចមកហើយ ដោយគ្មានសន្ធិសញ្ញា ឬ កាតព្វកិច្ចណាមួយ សម្រាប់ការបង្ខិតបង្ខំដល់ក្រុងកៀវ នោះដែរ។

ប្រធានាធិបតីសហរដ្ឋអាមេរិក បានបន្ថែម ថា «យើងមានបទពិសោធន៍ដ៏ឈឺចាប់ ពីអ្វីដែលបានកើតឡើង ខណៈធនធានហិរញ្ញវត្ថុ និង យោធារបស់អាមេរិក បានហូរចូលទៅក្នុងប្រទេសមួយផ្សេងទៀត មិនទាក់ទងទៅនឹងផលប្រយោជន៍សន្តិសុខជាតិរបស់សហរដ្ឋអាមេរិក ដោយគ្រាន់តែជាការរួមចំណែក ស្របពេលយើងបានចំណាយប្រាក់ អស់ជិត២ពាន់ពាន់លានដុល្លារ ទៅលើសង្រ្គាម អស់រយៈពេល២០ឆ្នាំ នៅក្នុងប្រទេសអាហ្វហ្គានីស្ថាន ហើយយើងគ្មានបានទទួលអ្វីមកវិញ សម្រាប់ប្រទេសរបស់យើង នោះឡើយ»៕

ខណ្ឌចំនួន៤ នៅក្នុងទីក្រុងបាងកកប្រទេសថៃមានកម្រិតបំពុលខ្យល់លើសពីកម្រិតសុវត្ថិភាព នៅព្រឹកថ្ងៃពុធនេះ បើយោងតាមរដ្ឋបាលក្រុងបាងកក ។

នាយកដ្ឋានបរិស្ថានរបស់រដ្ឋបាលបានរាយការណ៍ថា ខណ្ឌ Watthana, Nong Khaem, Nong Chok និង Pathum Wan មានកម្រិតគ្រោះថ្នាក់នៃ កំហាប់ភាគល្អិតនិចល PM 2.5 ។

ការវាស់វែងនៅស្ថានីយ៍គុណភាពខ្យល់ក្នុងតំបន់ទាំងបួនបានរកឃើញ កំហាប់ភាគល្អិតនិចល PM 2.5 ចន្លោះពី ៣០ ទៅ ៥៣ មីក្រូក្រាម (mcg) ក្នុងមួយម៉ែត្រគូប ។

គួរបញ្ជាក់ផងដែរថា PM2.5 សំដៅលើ “ភាគល្អិត” (ភាគល្អិតល្អ ឬដំណក់ទឹក) នៅក្នុងខ្យល់។ កម្រិតសុវត្ថិភាពគឺ ៥០mcg លេខលើសពីចំនួននេះត្រូវបានចាត់ទុកថា មានគ្រោះថ្នាក់ ៕

ប្រភព៖ Nation Thailand

ថៃ៖ នារីម្នាក់ បាន​ព្រមានពីការ​ញ៉ាំ​សាច់​ជ្រូក​ម៉ូកាថៈ ដែលជាអាហារដ៏ពេញនិយមបំផុតសម្រាប់ប្រទេសថៃ ក៏ដូចជាប្រទេសកម្ពុជាយើងផងដែរ ខណៈក្រោយ​ពេលដែលនាង​ញ៉ាំ​រួច ស្រាប់តែស្បែកមានបញ្ហាចេញកន្ទួល​រាលដាល​ពេញ​រាងកាយ ដោយចាំបាច់ត្រូវទៅមន្ទីរពេទ្យដើម្បីចាក់ថ្នាំស្តេរ៉ូអ៊ីត លើសពីនេះនៅពេលដែលកន្ទួលនោះបាត់ហើយវាក៏មានផលប៉ះពាល់ផងដែរ។ នេះបើការបញ្ជាក់របស់​លោក​វេជ្ជបណ្ឌិត​បញ្ជាក់​ ដោយលោកបានអះអាងថា ប្រហែល​បណ្តាល​មក​ពី​សារធាតុ​ដែល​ត្រាំ​ក្នុង​ខ្ទះ​ទើបបណ្ដាលឱ្យមានផលប៉ះពាល់បែបនេះ។

គួររំលឹកដែលថា កាលថ្ងៃទី ៤ ខែធ្នូ​ ឆ្នាំ ២០២២ កន្លងទៅនេះ ខាងអាជ្ញាធរប្រទេសថៃ បានសម្រុកទៅចាប់កន្លែងចែកចាយសាច់គ្រឿងក្នុងសត្វ ដ៏ធំមួយកន្លែង ដែលបានបើកលក់ដូរខុសច្បាប់ ហើយថែមទាំងប្រើប្រាស់ជាតិគីមីដែលប៉ះពាល់ដល់សុខភាពទៀតផង។

កន្លែងលក់មួយកន្លែងនេះ គឺមានទីតាំងស្ថិតនៅក្នុងខេត្តឈុនបុរី ប្រទេសថៃ ហើយក្នុងនោះ មានការរាយការណ៍មកថា កន្លែងមួយនេះ ជាកន្លែងលក់ដូរ សាច់ និង គ្រឿងក្នុងសត្វគោ និ​ង​ ជ្រូក ចែកចាយឱ្យខាងហាងលក់មូកៈថៈ បានបើកលក់ដូរដោយលួចលាក់ខុសច្បាប់ ទើបខាងអាជ្ញាធរពាក់ព័ន្ធដែលមាន នាយកដ្ឋានអភិវឌ្ឍន៍បសុសត្វ បានបញ្ជូនមន្រ្តីជាច្រើន ចុះមកត្រួតពិនិត្យ។

ខណៈចុះមកត្រួតពិនិត្យនេះ គេបានរកឃើញថា កន្លែងលក់ខាងលើ ពិតជាខុសច្បាប់ពិតមែន ដោយមិនមានច្បាប់អនុញ្ញាតិពាក់ព័ន្ធការលក់អាហារ គ្មានអាជ្ញារប័ណ្ណជួញដូរ បញ្ជូនសាច់សត្វ ព្រមទាំងគ្មានលិខិតបញ្ជាក់ណាមួយច្បាស់លាស់ឡើយ។ លើសពីនេះទៅទៀត អាជ្ញាធរថែមទាំងបានរកឃើញទៀតថា គ្រឿងក្នុងទាំងនោះ មានការដាក់ត្រាំសារជាតិគីមី ដែលមានដូចជា Formalin, caustic soda និង hydrogen peroxide ដើម្បីរក្សាទុកឱ្យបានយូរទៀតផង។

ជាក់ស្ដែងនៅថ្ងៃទី២២ ខែធ្នូ ឆ្នាំ ២០២២ អ្នកប្រើប្រាស់ Twitter ម្នាក់ មានរឿងមួយនិយាយអំពីបទពិសោធន៍នៃការញ៉ាំសាច់ជ្រូកអាំង។ ហើយត្រឡប់មកវិញជាមួយនឹងផលប៉ះពាល់អវិជ្ជមានដែលមិននឹកស្មានដល់ចំពោះសុខភាពនាង​ទៅ​ញ៉ាំ​សាច់អាំងម៉ូកាថៈ​នៅ​ភោជនីយដ្ឋាន​មួយ​ ប៉ុន្តែ​ក្រោយ​មក​រូបនាងមិន​អាច​ដក​ដង្ហើម​បាន​ទេ ដោយឡើងមានកន្ទួលក្រហមពាសពេញរាងកាយ ដែលមើលទៅគួរអោយខ្លាចណាស់។

ពេលទៅជួបគ្រូពេទ្យដើម្បីដឹងពីមូលហេតុ គ្រូពេទ្យប្រាប់ថា ទំនងជាបណ្តាលមកពីសារធាតុគីមីដែលត្រាំនៅក្នុងសាច់ ដូចជាសាច់ជ្រូក សាច់គោ គ្រឿងក្នុង គ្រឿងសមុទ្រជាដើម ទើបបណ្តាលឲ្យមានរោគសញ្ញាបែបនេះ។ ទោះ​ជា​យ៉ាង​ណា​ពេល​នេះ​នាង​បាន​ធូរ​ស្បើយ​ហើយ ហើយនាងក៏បានរំលឹកចាំបាច់ត្រូវប្រុងប្រយ័ត្នបន្ថែមទៀតអំពីការញ៉ាំ ជាពិសេសអំពីអនាម័យ ៕