ភ្នំពេញ៖ ក្រសួងធនធានទឹក និងឧតុនិយម បានឲ្យដឹងថាកម្ពុជានឹងចុះត្រជាក់រហូតដល់១៥អង្សាសេ។

យោងតាមសេចក្តីជូនដំណឹងពីស្ថានភាពធាតុអាកាសនៅកម្ពុជា ចាប់ពីថ្ងៃទី២៨ ខែធ្នូ ដល់ថ្ងៃទី៣ ខែមករា ឆ្នាំ២០២៣ ក្រសួងបញ្ជាក់ថា ព្រះរាជាណាចក្រកម្ពុជា បន្តទទួលរងឥទ្ធិពលពីទ្រនុងនៃសម្ពាធខ្ពស់ (ចិន) នៅក្នុងកម្រិតបង្គួរ និងខ្យល់មូសុងឦសាន្ត ក្នុងកម្រិតមធ្យម។

ក្រសួងបញ្ជាក់ថា ស្ថានភាពបែបនេះនឹងធ្វើឲ្យ៖
១៖ តំបន់ទំនាបកណ្តាល * សីតុណ្ហភាពអប្បបរមា មានពី ១៨-២២ °C * សីតុណ្ហភាពអតិបរមា មានពី ២៨-៣២ °C * ធាតុអាកាសចុះត្រជាក់ក្នុងកម្រិតមធ្យម ។

២៖ តំបន់ខ្ពង់រាប * សីតុណ្ហភាពអប្បបរមា មានពី ១៥-១៩ °C * សីតុណ្ហភាពអតិបរមា មានពី ២៨-៣២ °C * ធាតុអាកាសចុះត្រជាក់ក្នុងកម្រិតបង្គួរ។ ខេត្តមណ្ឌលគិរី ខេត្តរតនគិរី ខេត្តព្រះវិហារ និងខេត្តឧត្តរមានជ័យ សីតុណ្ហភាពអប្បបរមា មានក្នុងរង្វង់ ១៥-១៧°C នាពេលព្រឹក និងយប់។

៣៖ តំបន់មាត់សមុទ្រ * សីតុណ្ហភាពអប្បបរមា មានពី ១៩-២២ °C * សីតុណ្ហភាពអតិបរមា មានពី ២៩-៣២ °C * អាកាសធាតុចុះត្រជាក់ក្នុងកម្រិតខ្សោយ។

ជាមួយគ្នានេះ ក្រសួងអំពាវនាវដល់បងប្អូនប្រជាពលរដ្ឋ សូមយកចិត្តទុកដាក់ប្រុងប្រយ័ត្ន ព្រមទាំងថែរក្សាសុខភាព ចំពោះស្ថានភាពធាតុអាកាស ដែលនៅតែបន្តចុះត្រជាក់៕

ភ្នំពេញ៖ កីឡាករប្រដាល់ ​ធឿន ធារ៉ា បានធ្វើឲ្យមជ្ឈដ្ឋានមហាជន សម្តែងនូវក្តីរំភើបយ៉ាងខ្លាំង ក្រោយពីបានផ្ដួលកីឡាករលំដាប់កំពូលប្រទេសថៃ គ្រងខ្សែក្រវាត់ Thai Fight ត្រឹមទឹកទី១ និងឈានទៅយកខ្សែក្រវាត់ និងពានរបស់ព្រះមហាក្សត្រថៃ ក្នុងកម្មវិធីប្រកួតប្រដាល់ «THAI FIGHT 100 Years Nakhon Ban»កាលពីថ្ងៃទី២៤ ខែធ្នូ ឆ្នាំ២០២២ នៅក្នុងទីក្រុងបាងកក។ ហើយនេះក៏ត្រូវបានចាត់ទុកជាប្រវត្តិសាស្រ្តគុនខ្មែរ និងក៏ដូចលើកមុខមាត់កម្ពុជាខ្លាំងផងដែរ។

យ៉ាងណាមិញមុននឹងក្លាយជាម្ចាស់ខ្សែក្រវាត់រួមទាំងពានរង្វាន់នៅក្នុងសង្វៀនលំដាប់កំពូលរបស់ថៃនេះ តើកីឡាករ ធឿន ធារ៉ា មានប្រវត្តិតស៊ូក្នុងជីវិតយ៉ាងណា…? KBN News នឹងលើកយកប្រវត្តិខ្លះៗរបស់កីឡាករ ធឿន ធារ៉ា មកជូនប្រីយ៍មិត្ត៖ កីឡាករ ធឿន ធា​រ៉ា ជាអ្នកប្រដាល់គុនខ្មែរ កើតក្នុងគ្រួសារ​ក​សិ​ករ​ក្រីក្រ នៅភូមិស្តៅ ឃុំព្រៃកណ្តៀង ស្រុកពាមរ ខេត្តព្រៃវែង។ បច្ចុប្បន្នគេមានវ័យ២៤ឆ្នាំ មានភរិយា និងមានកូន​ស្រីម្នាក់​នៅក្នុងបន្ទុក​។

ដោយសារកត្តាជីវភាព ធឿន ធារ៉ា ដែលជាកូនប្រុសតែម្នាក់ក្នុងគ្រួសារ និងមាន​បងប្អូនស្រី ៣នាក់ រូបគេ ​មិន​បាន​សិក្សា​រៀនសូត្រឱ្យបានជ្រៅជ្រះនោះ​ទេ ពោល​គឺ​ធំ​ដឹងក្តី​ឡើងនៅ​ប្រទេស​ថៃ​ ដោយផ្តើម​ធ្វើ​ការ​ជាកម្មករសំណង់​នៅ​ប្រទេស​ថៃ មុនឈានជើង​ចូល​​ហ្វឹកហាត់​ប្រដាល់នៅអាយុ​១៧ឆ្នាំ ដោយសារតែ​ចិត្តស្រឡាញ់ក្បាច់គុនដូនតា និងចង់ល្បីដូចអ្នកប្រដាល់រាមច្បងល្បីៗផងនោះ កីឡាករធឿន ធារ៉ា បានចូលហ្វឹកហាត់ប្រដាល់គុនខ្មែរ ទោះបីជាមានការ​ហាម​ឃាត់ពី​ឪពុក​ម្ដាយក៏ដោយ។

កីឡាករ ធឿន ធារ៉ា បានចូលហ្វឹកហាត់តាមរយៈមិត្តភក្កិនៅក្លិបក្រសួងកសិកម្ម ដែលមានលោកគ្រូឆ្លាម-ស ជាគ្រូបង្វឹកនៅអំឡុង​ឆ្នាំ​២០១៦ ហើយ​ធ្លាប់ប្រកួតនៅ​សង្វៀនក្នុងស្រុក បានប្រហែលមួយឆ្នាំ និងឆ្លងកាត់ការប្រកួតបាន៩ប្រកួត ដោយរូបគេផ្តួលដៃគូ​៨ដងឱ្យសន្លប់ និងស្មើម្ដង មុន​លោកគ្រូបញ្ជូនបន្តទៅហ្វឹកហាត់នៅប្រទេសថៃ ព្រោះតែឃើញថ្វីដៃល្អ​។ ចំណែក ការទៅ​ហ្វឹក​ហាត់​នៅក្នុងក្លឹបមួយនាប្រទេសថៃ អ្នកប្រដាល់ដែលមានដើមកំណើតនៅខេត្តព្រៃវែងរូបនេះ ឆ្លងកាត់ការប្រកួតប្រហែល៥០ដង​ ធ្វើឱ្យ​អ្នកគាំ​ទ្រគុនខ្មែរ​មួយ​ចំនួនស្គាល់រូបគេតាមរយៈការឡើងវ៉ៃនៅសង្វៀនមេកមួយថៃ​(Max Mauy Thai)។

កីឡាករ ធឿន ធារ៉ា បានសម្រេចចូលរោងការនៅឆ្នាំ២០១៨ ដោយសារពិបាកឡើងចុះទៅថៃ ទើបរូបគេត្រលប់មកហ្វឹក​ហាត់​នៅស្រុកខ្មែរ ដោយចូលហ្វឹកហាត់នៅក្លឹបអេ ភូថង កីឡាវិញ​។ ​យ៉ាងណា កីឡាករ ធឿន ធារ៉ា មកហ្វឹកហាត់នៅខ្មែរបានជាង៤ឆ្នាំហើយ ប៉ុន្តែរូបគេពុំដែល​មាន​ឈ្មោះ​ប្រកួតដណ្តើមខ្សែក្រវាត់នៅក្នុងស្រុកឡើយ ព្រោះគីឡូធ្ងន់ដូចរូបគេនេះ ពិបាករកដៃគូធ្វើការប្រកួតប្រជែងណាស់។ ប៉ុន្តែ កីឡាករ ធឿន ធារ៉ា ក៏ធ្លាប់ឈ្នះពានកណ្តាប់ដៃមាស ប្រកួតវ៉ៃ១ទល់នឹង៣នាក់ កាលពី​ថ្មីៗនេះដែរ មុនរូបគេឈ្នះខ្សែក្រវាត់ និងពានស្តេចថៃ​កាលពីថ្ងៃទី២៤ ខែធ្នូ កន្លងទៅ។

ជាចុងក្រោយនេះ KBN ក៏សូមចូលរួមអបអរសាទរដល់កីឡាករ ធឿន ធារ៉ា ដែលបានបង្ហាញសមត្ថភាពដ៏អស្ចារ្យលើសង្វៀនខ្នាតអន្តរជាតិ ដែលបានលើកមុខមាត់កីឡាករគុនខ្មែរ ឱ្យកាន់តែល្បីរន្ទឺលើឆាកអន្តរជាតិ ៕

ភ្នំពេញ៖ កំពង់ផែស្វយ័តភ្នំពេញ ក្នុងរយៈពេល១១ខែ ឆ្នាំ២០២២នេះរកចំណូលបានចំនួន ៣៧,០៤៩,២៧៨ដុល្លារ កើនឡើង២២% បើធៀបរយៈពេលដូចគ្នា ឆ្នាំ២០២១ មានចំនួន ៣០,៣៩០,១៧២ដុល្លារ។

យោងតាមសេចក្ដីប្រកាសព័ត៌មាន នៅថ្ងៃទី២៦ ខែធ្នូ ឆ្នាំ២០២២ បានបញ្ជាក់ថា ប្រភពចំណូល របស់កំពង់ផែស្វយ័តភ្នំពេញ ដែលទទួលបាននៅរយៈពេល១១ខែ ឆ្នាំ២០២២នេះ រួមមាន៖
* ទី១៖ ចំណូលពីប្រតិបត្តិការផែ មានចំនួន ២៩,១៧១,២៨២ដុល្លារ។
* ទី២៖ ចំណូលបានពីអាជ្ញាធរផែ មានចំនួន ៣,៧៨១,៧៧២ដុល្លារ។
* ទី៣៖ ចំណូលបានពីសេវាកម្មផ្សេងៗ មានចំនួន ២៧២,៦៣២ដុល្លារ។
* ទី៤៖ ចំណូលផ្សេងៗ មានចំនួន ៣,៨២៣,៥៩២ដុល្លារ។

ចំពោះលទ្ធផលការងារអាជីវកម្ម សេវាកម្ម អនុវត្ដសម្រាប់១១ខែ ឆ្នាំ២០២២ របស់កំពង់ផែស្វយ័តភ្នំពេញ រួមមាន៖
ទី១៖ ទំនិញ-ប្រេងឥន្ធនៈមានចំនួន ៣,៦៤៦,០២៩តោន កើនឡើង៣.៥៨% បើប្រៀបធៀបរយៈពេលដូចគ្នា នៅឆ្នាំ២០២១ ចំនួន ៣,៥១៩,៨៤៤តោន។

ទី២៖ នាវាផ្ទុកទំនិញឆ្លងកាត់ មានចំនួន ៣,២៧១ជើង កើនឡើង៥៤.៧៣ភាគរយ បើប្រៀបធៀបរយៈពេលដូចគ្នា នៅឆ្នាំ២០២១ ចំនួន២,១១៤ជើង។

ទី៣៖ បរិមាណកុងតឺន័រ មានចំនួន ៣៨៣,២៦១ធីអ៊ីយូ កើនឡើង២១.៤០ភាគរយ បើប្រៀបធៀបរយៈពេលដូចគ្នា នៅឆ្នាំ២០២១ ចំនួន៣១៥,៦៩២ធីអ៊ីយូ។

ទី៤៖ នាវាទេសចរណ៍ មានចំនួន៧៨ជើង កើនឡើង៧៨.០០ភាគរយ។

ទី៥៖ បរិមាណអ្នកដំណើរ មានចំនួន៥,០៧៥នាក់ កើនឡើង៥,០៧៥.០០ភាគរយ។

គូសបញ្ជាក់ផងដែរថា នៅឆ្នាំ២០២១ កំពង់ផែស្វយ័តភ្នំពេញ ទទួលបាននូវប្រាក់ចំណេញចំនួន ១២,៧០៧,៨៣១ដុល្លារ៕

សម្រាប់សិស្សានុសិស្សដែលទើបតែប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ចប់ ហើយមានដុងសិល្បៈ មិនដឹងថាគួរជ្រើសរើសសាលាណាល្អមែនទេ ថ្ងៃនេះគហទំព័រ KBN សូមណែនាំលោកអ្នកទៅស្គាល់សកវិទ្យាល័យមួយដែលមានកេរ្តិ៍ឈ្មោះល្បីជាងគេខាងផ្នែកសិល្បៈ នៅកម្ពុជា។

សាកលវិទ្យាល័យភូមិន្ទវិចិត្រសិល្បៈ (RUFA ឬសាលារចនា) ជាគ្រឹះស្ថានឧត្តមសិក្សាដ៏ចំណាស់មួយ និងមានកេរ្តិ៍ឈ្មោះបោះសម្លេងខ្លាំងខាងផ្នែកសិល្បៈ។

សាកលវិទ្យាល័យភូមិន្ទវិចិត្រសិល្បៈ មានមហាវិទ្យាល័យចំនួន ៥ ដែលមានមុខជំនាញដូចខាងក្រោម :

១. មហាវិទ្យាល័យបុរាណវិទ្យា

• ជំនាញ: បុរាណវិទ្យា
• ជំនាញ: មគ្គុទេសក៍បេតិកភណ្ឌវប្បធម៌

២. មហាវិទ្យាល័យស្ថាបត្យកម្ម និងនគរូនីយវិទ្យា

• ជំនាញ៖ ស្ថាបត្យកម្ម និងនគរូបនីយវិទ្យា

៣. មហាវិទ្យាល័យតូរ្យតន្តី្រ

• ជំនាញ: ឧបករណ៍តន្តី្រ (បុរាណ និងសម័យ) និង ជំនាញ៖បញ្ញាវង់ភ្លេង
• ជំនាញ: តន្ត្រីវិទ្យា
• ជំនាញ:និពន្ធតន្តី
• ជំនាញ: ចម្រៀង (បុរាណ និងជាពួក)

៤. មហាវិទ្យាល័យសិល្បៈសូនរូប

• ជំនាញ: វិចិត្រកម្ម
• ជំនាញ: ចម្លាក់ទំនើប និង ជំនាញ៖ តុបតែងលម្អនៃស្ថាបត្យកម្ម

៥. មហាវិទ្យាល័យសិល្បៈនាជសាស្ត្រ

• ជំនាញ: ដឹកនាំរឿង ល្ខោននិយាយ
• ជំនាញ: ដឹកនាំរឿង ល្ខោនបាសាក់
• ជំនាញ: ដឹកនាំរឿង ល្ខោនខោល
• ជំនាញ: ដឹកនាំរឿង ល្ខោនអាប៉េ
• ជំនាញ: ដឹកនាំរឿង របាំប្រពៃណី និងសៀក
• ជំនាញ: ដឹកនាំរឿង ល្ខោនក្បាច់បុរាណ
• ជំនាញ: ដឹកនាំរឿង ល្ខោនយីកេ
• ជំនាញ: ដឹកនាំរឿង ល្ខោនមហោរី
• ជំនាញ: ដឹកនាំរឿង ល្ខោនកំណាព្យ
• ជំនាញ: ដឹកនាំរឿង ល្ខោនស្រមោលស្បែកធំ

សាកលវិទ្យាល័យភូមិន្ទវិចិត្រសិល្បៈ មានទីតាំងនៅអគារលេខ ៧២ កាច់ជ្រុងផ្លូវព្រះអង្គយុគន្ធរ (លេខ១៩) និងផ្លូវមគ្គវ័ន សង្កាត់ជ័យជំនះ ខណ្ឌដូនពេញ រាជធានីភ្នំពេញ(ទ្វរស័ព្ទលេខ ០២៣ ៩៨៦ ៤១៧)៕

ប្រភព: សៀវភៅណែមគ្គុទេសសិក្សាក្រសួងអប់រំ យុវជន និង​កីឡា

អង្គការអភិរក្សអន្តរជាតិបានរាយការណ៍ថាបានរកឃើញ”ផ្សោត អ៊ីរ៉ាវ៉ាឌី ឬផ្សោតក្បាលត្រឡោក” ដែលជាថនិកសត្វកម្រក្នុងប្រទេសកម្ពុជាដែលបានស្លាបចំនួន ១១ ក្បាលចាប់តាំងពីដើមឆ្នាំកន្លងមកនេះ ដោយថ្ងៃទី២៣ក៏មានរបាយការណ៍ពីការស្លាប់របស់សត្វផ្សោតប្រភេទនេះចំនួន២ក្បាលបន្ថែមទៀតផងដែរ។

រាយការណ៍ពីរាជធានីភ្នំពេញ នាថ្ងៃទី ២៦ ខែធ្នូ ឆ្នាំ២០២២នេះថា អង្គការមូលនិធិសត្វព្រៃពិភពលោក (WWF) ប្រចាំកម្ពុជាបានចេញសេចក្តីថ្លែងការណ៍មួយ កាលពីថ្ងៃអាទិត្យមុនអំពី ការស្លាប់សត្វផ្សោតដ៏កម្រមួយប្រភេទ ដែលជាថនិកសត្វដែលជិតផុតពូជចំនួន២ក្បាល។

ក្នុងនោះគេបានឱ្យដឹងថាផ្សោតមួយ ក្បាលដែលជាសត្វផ្សោតញីពេញវ័យ មានប្រវែង ១៩៦សង់ទីម៉ែត្រ ទម្ងន់ ៩៣គីឡូក្រាម និងអាយុចន្លោះពី ៧-១០ឆ្នាំ បានងាប់នៅចំណុច ឃុំកោះទ្រុង ក្រុងក្រចេះ ខេត្តក្រចេះ កាលពី ថ្ងៃ ទី ២២ ខែ ធ្នូ ឆ្នាំ ២០២២

ចំណែកសត្វផ្សោតឈ្មោលពេញវ័យមួយក្បាលទៀតត្រូវបានគេប្រទះឃើញអណ្តែតតាមទឹកទន្លេ ក្បែរអន្លង់កោះដំបងត្រង់ទីតាំងព្រំប្រទល់រវាងខេត្តក្រចេះ និងខេត្តស្ទឹងត្រែងកាលពីថ្ងៃ ទី ១៨ ធ្នូ ដោយសត្វផ្សោតទាំងពីរក្បាលនេះ បាន ស្លាប់ដោយសារជាប់នឹងមងនេសាទ។

ទោះជាយ៉ាងណាប្រទះឃើញចុងក្រោយនេះត្រូវបានគេបង្ហាញវាជាសត្វផ្សោតដែលបានងាប់សរុបមានចំនួនសរុប១១ក្បាលរាប់ចាប់តាំងពីដើមឆ្នាំ២០២២នេះ។

ជាលទ្ធិផលអង្គការមូលនិធិសត្វព្រៃពិភពលោក (WWF) ប្រចាំកម្ពុជា បានអំពាវនាវដល់អាជ្ញាធរ និងសមត្ថកិច្ចពាក់ព័ន្ធឱ្យដាក់ចេញវិធានបន្ទាន់ ដើម្បីបង្រ្កាបការនេសាទខុសច្បាប់នៅតាមតំបន់អភិរក្សនានា ក្រោយពីសត្វផ្សោតដែលជាប្រភេទសត្វជិតផុតពូជចំនួន២ក្បាល បានស្លាប់ជាបន្តបន្ទាប់។

បន្ថែមពីនោះប្រធានអង្គការមូលនិធិសត្វព្រៃពិភពលោក(WWF) ក៏បានលើកឡើងថា សត្វផ្សោតទន្លេមេគង្គដែលជាប្រភេទសត្វកម្រក្នុងបញ្ជីក្រហមរបស់អង្គការIUCN នឹងផុតពូជទាំងស្រុង ប្រសិនបើគ្មានវិធានការទប់ស្កាត់បន្ទាន់ចំពោះការនេសាទខុសច្បាប់នៅតាមតំបន់អភិរក្ស៕