បរទេស៖ យន្តហោះពាណិជ្ជកម្ម “Jetstar Japan” ដែលកំពុងប្រតិបត្តិការក្នុងប្រទេសជប៉ុន បានធ្វើការចុះចតបន្ទាន់នៅអាកាសយានដ្ឋានក្នុងទីក្រុង Nagoya  បន្ទាប់ពីអ្នកបើកយន្តហោះត្រូវបានជូនដំណឹងអំពី “ការគំរាមកំហែងគ្រាប់បែក”។

ទីភ្នាក់ងារសារព័ត៌មានបរទេសរាយការណ៍ពីទីក្រុងតូក្យូ ប្រទេសជប៉ុន កាលពីថ្ងៃទី ៧ មករា ឆ្នាំ២០២៣នេះ ដោយដកស្រង់ព័ត៌មានពីប្រព័ន្ធផ្សព្វផ្សាយក្នុងស្រុកជប៉ុន ថាជើងហោះហើររបស់អ្នកដំណើររបស់ក្រុមហ៊ុន Jetstar Japan Airlines Flight GK501 ជាមួយនឹងអ្នកដំណើរ ១៣៦ នាក់ និងសមាជិកនាវិក ៦ នាក់ផ្សេងទៀត គ្រោងនឹងចាកចេញពីអាកាសយានដ្ឋានអន្តរជាតិណារីតា ជាយក្រុងតូក្យូ ទៅអាកាសយានដ្ឋានអន្តរជាតិ Fukuoka នៅព្រឹកថ្ងៃសៅរ៍ ម៉ោងក្នុងស្រុក។

ទោះបីជាយ៉ាងណា យន្តហោះត្រូវបានធ្វើការចុះចតជាបន្ទាន់នៅអាកាសយានដ្ឋានអន្តរជាតិ Chubu  ជាយក្រុងណាហ្គោយ៉ា កណ្តាលនៃប្រទេស « ដើម្បីឲ្យអាជ្ញាធរពាក់ព័ន្ធចាត់វិធានការទប់ស្កាត់ » រួមទាំងការជម្លៀសអ្នកដំណើរទាំងអស់ទៅកាន់តំបន់សុវត្ថិភាព ក្រោយពីអ្នកបើកយន្តហោះត្រូវបានជូនដំណឹងអំពី “ការគំរាមកំហែងគ្រាប់បែក”។

ជាមួយគ្នានោះប្រភពនៅអាកាសយានដ្ឋាន Chubu និងទីភ្នាក់ងារប៉ូលីសទីក្រុង Nagoya ក៏បានធ្វើការចែករំលែកព័ត៌មានភ្លាមៗ ព្រមទាំងបានបញ្ជាក់ថា អ្នកបើកយន្តហោះបានស្នើសុំចុះចតជាបន្ទាន់ បន្ទាប់ពីមានការគំរាមកំហែងតាមរយៈការហៅចូលទូរស័ព្ទពីជើងហោះហើរ GK501 ដោយសំឡេងក្នុង ទូរសព្ទជាសំឡេងមនុស្សប្រុស ហើយប្រើលេខការហៅទូរស័ព្ចចូលពីបរទេស។

ទោះជាយ៉ាងណាការចុះចតទទួលបានជោគជ័យ និងមិនមានបង្កឱ្យមានអ្នកដំណើរមានបញ្ហាអ្វីនោះឡើយ។

យ៉ាងណាមិញប្រភពព័ត៌មានបានបញ្ជាក់បន្ថែមយ៉ាង ដូច្នេះថា លទ្ធផលនៃការស្រាវជ្រាវគ្រប់ជ្រុងនៃយន្តហោះដោយអ្នកជំនាញ រកមិនឃើញមានជាតិផ្ទុះ និងវត្ថុគួរឱ្យសង្ស័យឡើយ ប៉ុន្តែមន្ទីរពាក់ព័ន្ធ នឹងបន្តស៊ើបអង្កេតឲ្យបានហ្មត់ចត់បន្ថែម៕ ប្រភព៖ Dailynews

បរទេស៖ ប្រទេសឡាវបានបើកបណ្តាញខ្សែបញ្ជូន ៥០០គីឡូវ៉ាត់ (500 kV) តភ្ជាប់ស្ថានីយរង នៅភូមិមួយក្នុងចំប៉ាសាក់ ភាគខាងត្បូងនៃប្រទេស ជាមួយតំបន់ព្រំដែនកម្ពុជា។

នាថ្ងៃទី ៧ ខែមករា ឆ្នាំ២០២៣ ទីភ្នាក់ងារព័ត៌មានស៊ីនហួរ បានរាយការណ៍ពីទីក្រុងវៀងច័ន្ទ ប្រទេសឡាវ ថាលោកថុងផាត់ អ៊ីនធឿង ជំនួយការរដ្ឋមន្ត្រីក្រសួងថាមពល និងរ៉ែឡាវ បាននិយាយអំពី គម្រោងមួយនេះថាវានឹងដើរតួយ៉ាងសំខាន់ក្នុងការអភិវឌ្ឍន៍វិស័យថាមពលក្នុងប្រទេសឡាវ ជាពិសេសសក្តានុពលនៃការចែកចាយអគ្គិសនីដល់ប្រជាពលរដ្ឋក្នុងមូលដ្ឋាន និងរួមចំណែកដល់ការអភិវឌ្ឍន៍សេដ្ឋកិច្ចបន្ថែម។

ជាមួយគ្នានោះនាយកគ្រប់គ្រងអគ្គិសនីឡាវ (EDL) លោក Chanthboon Sukalun បានមានប្រសាសន៍ថា បណ្តាញបញ្ជូន និងស្ថានីយ៍រងគឺជាផ្នែកមួយនៃគម្រោងជាតិ ដែលប្រើប្រាស់បច្ចេកទេសទំនើប ជាមួយនឹងតម្លៃវិនិយោគខ្ពស់។ ហើយនេះជាព្រឹត្តិការណ៍សំខាន់មួយក្នុងយុទ្ធសាស្ត្រនាំចេញអគ្គិសនីទៅប្រទេសជិតខាងរបស់ឡាវ ជាពិសេសគឺប្រទេសកម្ពុជា។

ដោយបណ្តាញបញ្ជូនថាមពលនេះផងដែរមានប្រវែងជាង ២០០ គីឡូម៉ែត្រ និង រត់កាត់តំបន់ទន្លេមេគង្គនៃ ខេត្ត ចំប៉ាសាក់ រួមទាំងស្រុក Sanamxay និង Phu Vong ក្នុងខេត្ត Attapeu ។

គួរបញ្ជាក់ផងដែរថា នាពេលបច្ចុប្បន្នប្រទេសឡាវមានប្រភពថាមពលចំនួន ៩០ ដែលមានសមត្ថភាពដំឡើងសរុបជិត ១១,០០០ មេហ្គាវ៉ាត់ត្រឹមឆ្នាំ ២០២២ ដែលក្នុងនោះមានរោងចក្រវារីអគ្គិសនីចំនួន ៧៧ កន្លែង រោងចក្រថាមពលពន្លឺព្រះអាទិត្យចំនួន ៨ រោងចក្រថាមពលជីវម៉ាសចំនួនចំនួន៤ និងរោងចក្រថាមពលធ្យូងថ្មចំនួន ១។

លើសពីនេះ ប្រទេសឡាវគ្រោងនឹងផលិតថាមពលបន្ថែម ១.៨០៧ មេហ្គាវ៉ាត់ នៅចន្លោះឆ្នាំ ២០២១ ដល់ឆ្នាំ ២០២៥ ដោយបែងចែកជាវារីអគ្គិសនី ៥៧ ភាគរយ ដោយថាមពលធ្យូងថ្ម ១៩ភាគរយ និងថាមពលពន្លឺព្រះអាទិត្យ ២៤ភាគ និង ៧៧.៥៩ភាគរយពីវារីអគ្គិសនី។

យ៉ាងណាមិញប្រទេសឡាវមានគំនិតសាងសង់វារីអគ្គិសនីជាច្រើននេះឡើងមក គឺសម្រាប់ជាផ្នែកមួយនៃយុទ្ធសាស្ត្រប្រែក្លាយប្រទេសទៅជា “វារីអគ្គិសនី” នៃអាស៊ីអាគ្នេយ៍៕ ប្រភព៖ Dailynews

ប្រទេសន័រវេស និងអាល្លឺម៉ង់ ៖ ប្រទេសន័រវេស និងអាល្លឺម៉ង់ បានចុះហត្ថលេខាលើកិច្ចព្រមព្រៀងរួមគ្នាមួយដើម្បីបង្កើនការផលិតថាមពលកកើតឡើងវិញ និងអភិវឌ្ឍន៍ឧស្សាហកម្មពណ៌បៃតង ។ ការសហការគ្នានេះមានគោលដៅកាត់បន្ថយការបញ្ចេញកាបូនម៉ូណូអុកស៊ីត ឬឧស្ម័នបង្កកំដៅផែនដី និងកាត់បន្ថយការពឹងផ្អែកលើឧស្ម័នធម្មជាតិពីរុស្ស៊ីផងដែរ ។

ការប្រកាសសហការគ្នា ថ្លែងដោយនាយករដ្ឋមន្ត្រីន័រវេស លោក Jonas Gahr Store និងរដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោក Robert Habeck ។ ខ្លឹមសារនៃកិច្ចព្រមព្រៀងមានផែនការសហការលើផ្នែកអ៊ីដ្រូសែន បច្ចេកវិទ្យាថ្ម ថាមពលខ្យល់នៅជាយសមុទ្រ ការចាប់យកកាបូន និងការផ្ទុក ។

Equinor ក្រុមហ៊ុនប្រេងរបស់រដ្ឋាភិបាលន័រវេស និងក្រុមហ៊ុនថាមពលរបស់អាល្លឺម៉ង់ Real World Evidence (RWE) បានប្រកាសផែនការរួមគ្នាអភិវឌ្ឍន៍ផ្នែកផលិត និងការប្រើប្រាស់អ៊ីដ្រូសែនកាបូនទាប ដើម្បីជួយឱ្យអាល្លឺម៉ង់កាត់បន្ថយការពឹងផ្អែកថាមពលធ្យូងថ្ម និងកាត់បន្ថយការបំភាយឧស្ម័នផ្ទះកញ្ចក់នាថ្ងៃអនាគត ។

ប្រទេសន័រវេសបានយកឈ្នះរុស្ស៊ី ខណៈរុស្ស៊ីជាប្រទេសអ្នកនាំចេញឧស្ម័នធម្មជាតិធំជាងគេនៅអឺរ៉ុបតាំងពីឆ្នាំមុន ។ ក្រុមហ៊ុន Equinor ជាអ្នកនាំចេញថាមពលធំជំនួសក្រុមហ៊ុនថាមពលរុស្ស៊ី ខណៈអាល្លឺម៉ង់កំពុងជំរុញការអភិវឌ្ឍសេដ្ឋកិច្ចពណ៌បៃតង (មិនប៉ះពាល់បរិស្ថាន) ជាមួយការស្វែងរកថាមពលជំនួស និងចេញឆ្ងាយពីឧស្ម័នធម្មជាតិរបស់រុស្ស៊ី ។ អាល្លឺម៉ង់ និងសហភាពអឺរ៉ុប (EU) បានប្រើវិធានការមិនជួញដូរឧស្ម័នជាមួយរុស្ស៊ី ដើម្បីបង្ខំឱ្យរុស្ស៊ីបញ្ឈប់ប្រតិបត្តិការកងទ័ពរបស់ខ្លួនជាមួយអ៊ុយក្រែន ហើយត្រូវរុស្ស៊ីតបតវិញដោយប្រើវិធានការតឹងតែង គឺមិននាំចេញឧស្ម័នទៅឱ្យប្រទេសណាដែលមិនមែនជាមិត្តភក្តិរុស្ស៊ី ឬមិនជួញដូរជាមួយរុស្ស៊ី ៕

ប្រភព ៖ TNN World

ប្រទេសថៃ៖ ក្នុងនាមជាប្រទេសជិតខាងប្រជាពលរដ្ឋខ្មែរគួរមានការប្រុងប្រយ័ត្ន បន្ទាប់ពីនាយកដ្ឋានឧតុនិយមនៃប្រទេសថៃបានបង្ហាញថាខ្យល់ត្រជាក់ សាយភាយគ្របលើប្រទេសថៃ ដែលធ្វើឱ្យអាកាសធាតុត្រជាក់ខ្លាំងនៅតំបន់ភាគខាងជើងនៃប្រទេសនាពេលព្រឹកជាមួយនឹងសីតុណ្ហភាពធ្លាក់ចុះដល់ ៤-២ អង្សាសេ។ ដោយឡែកសម្រាប់ភាគខាងត្បូងនឹងមានភ្លៀងធ្លាក់និងខ្យល់បក់បោកខ្លាំងរហូរដល់កម្រិតកម្ពស់ទឹកសមុទ្រឡើងដល់៤ម៉ែត្រ។

នាថ្ងៃទី៧ ខែមករា ឆ្នាំ ២០២៣ នាយកដ្ឋានឧតុនិយមការព្យាករណ៍អាកាសធាតុទូទៅសម្រាប់ ២៤ ម៉ោងក្នុងប្រទេសថៃ បានឱ្យដឹងថាតំបន់ដែលមានសម្ពាធខ្ពស់ ឬម៉ាសខ្យល់ត្រជាក់ខ្លាំង បានរីករាលដាលគ្របដណ្តប់ប្រទេសថៃផ្នែកខាងលើ និងសមុទ្រចិនខាងត្បូង។ ប្រការនេះធ្វើឱ្យអាកាសធាតុត្រជាក់ នៅភាគខាងជើង និង ភាគឦសានប្រទេសថៃសម្រាប់ពេលព្រឹក ដែលសីតុណ្ហភាពនឹងធ្លាក់ចុះពី ៤-២ អង្សាសេ។

ជាមួយគ្នានោះផងដែរ សម្រាប់តំបន់ភាគខាងត្បូងវិញ នឹងមានខ្យល់មូសុងដែលមានកម្លាំងខ្លាំងបោកបក់លើឈូងសមុទ្រថៃ ដែលវានឹងកង្កើនសម្ពាធទាប គ្របដណ្តប់លើសមុទ្រចិនខាងត្បូងផ្នែកខាងក្រោម ហើយនឹងមានការផ្លាស់ទីទៅជិតចុងឧបទ្វីប Yuan ។

ឥទ្ធិពលខាងលើវានឹងបង្កឱ្យមានភ្លៀងធ្លាក់ច្រើន និង ភ្លៀងធ្លាក់ខ្លាំងនៅតំបន់ខ្លះនៅភាគខាងត្បូង ជាមួយនឹងរលកខ្យល់នៅឈូងសមុទ្រខាងក្រោមនៃប្រទេសថៃមានកម្លាំងខ្លាំងដែលបណ្ដាលឱ្យមាន រលកសមុទ្រមានកម្ពស់ពី ២ ទៅ ៤ ម៉ែត្រ និងមានផ្គររន្ទះខ្លាំង។

ទោះជាយ៉ាងណាអាជ្ញាធរក្នុងតំបន់ក៏បានព្រមានអ្នកបើកទូកនៅឈូងសមុទ្រថៃ ដោយស្នើឱ្យធ្វើដំណើរឱ្យមានការប្រុងប្រយ័ត្ន ហើយចៀសវាងការជិះទូកនៅតំបន់ដែលមានខ្យល់ព្យុះផ្គររន្ទះ លើសពីនេះចំពោះទូកតូចៗនៅតំបន់នោះ ត្រូវផ្អាកការចាកចេញពីច្រាំងរហូតដល់ថ្ងៃទី ៨ ខែមករា ឆ្នាំ២០២៣ ក៏ដូចជាត្រូវប្រុងប្រយ័ត្នចំពោះគ្រោះថ្នាក់នៃខ្យល់បក់បោកមកច្រាំងទន្លេក្នុងអំឡុងពេលនេះផងដែរ។

អាស្រ័យហេតុនេះក្នុងនាមយើងជាប្រទេសជិតខាង សូមបងប្អូនមានការប្រុងប្រយ័ត្នឱ្យបានខ្ពល់ ព្រោះថាឥទ្ធិពលនេះនឹងសាយភាយមកកាន់ប្រទេសកម្ពុជាយើងជាក់ជាមិនខាន ជាពិសេសបងប្អូនដែលរស់នៅតំបន់ជាប់សមុទ្រ និងបងប្អូនអ្នកនេសាទតាមដងសមុទ្រជាដើម គួរតែយកចិត្តទុកដាក់ពីសុវត្តិភាពឱ្យបានខ្ពស់៕ ប្រភព៖ Thairath

ប្រទេសថៃ ៖ តាមប្រព័ន្ធផ្សព្វផ្សាយពិភពលោក Forbes ឱ្យដឹងថា ថៃបានជាប់លំដាប់ទី៩ ជាប្រទេសគួរឱ្យចង់រស់នៅពេលចូលនិវត្តន៍ប្រចាំឆ្នាំ២០២៣ ចំណែកប្រទេសលំដាប់លេខ១ គឺព័រទុយហ្គាល់ ។

ក្នុងរយៈពេល៦ឆ្នាំកន្លងមកនេះ Forbes បានចាត់ចំណាត់ថ្នាក់ប្រទេសដែលចំណាយថោកបំផុតក្នុងការរស់នៅ ដោយនៅឆ្នាំ២០២៣ អ្នកជំនាញរបស់ International Living បានបង្ហាញពីទីកន្លែងទាំង១០ ដែលគួរឱ្យរស់នៅពេលចូលនិវត្តន៍ ឬអ្នកដែលត្រូវការមានជីវិតល្អប្រសើរ ដោយផ្អែកតាមការវិភាគកត្តាផ្សេងៗដូចជា ការចំណាយក្នុងការរស់នៅ អាកាសធាតុ ទិដ្ឋាការ កន្លែងរស់នៅ និងការព្យាបាលសុខភាពជាដើម ។

ប្រទេសគួរឱ្យចង់រស់នៅលំដាប់លេខ១ គឺព័រទុយហ្គាល់ ដោយសារប្រាក់ដុល្លារអាមេរិកថ្លៃជាងធ្វើឱ្យការចាយវាយប្រាក់យូរ៉ូក្នុងប្រទេសនេះចុះថោក ហើយគេអាចស្នើសុំទិដ្ឋាការដោយងាយស្រួលដើម្បីរស់នៅក្នុងរយៈពេលយូរ ។ រីឯការចាយវាយផ្សេងៗសម្រាប់មនុស្ស២នាក់ស្មើប្រមាណ២.៨០០ដុល្លារអាមេរិកក្នុង១ខែ បើរស់នៅម្នាក់ឯង ការចាយវាយស្មើប្រមាណ២.០០០ដុល្លារអាមេរិកក្នុង១ខែ ហើយបើរស់នៅក្នុងទីក្រុងតូចៗ ការចាយវាយនឹងថោកជាងនេះទៀត ។

ចំណែកប្រទេសថៃស្ថិតក្នុងលំដាប់ទី៩ ដូចគ្នានឹងប្រទេសអ៊ីតាលី ចំណុចខ្លាំងគឺថៃមានសីតុណ្ហភាពក្តៅល្មម មានធម្មជាតិ និងវប្បធម៌ដ៏ស្រស់ស្អាត ហើយការចំណាយលើការរស់នៅសមរម្យ ធ្វើឱ្យថៃជាប់ក្នុងលំដាប់ប្រទេសដែលគេចង់មករស់នៅបន្ទាប់ពីចូលនិវត្តន៍ ។

អ្នកសារព័ត៌មានរបស់ International Living ឱ្យដឹងថា ជនបរទេសអាចទិញខុនដូបានដោយងាយនៅប្រទេសថៃ ដោយតម្លៃខុនដូមានបន្ទប់គេង២ អាចក្រោម៣ម៉ឺនដុល្លារអាមេរិក ហើយបើជួលវិញក្នុងតម្លៃ១៨០ដុល្លារអាមេរិកក្នុង១ខែ បើរស់នៅ២នាក់អាចចំណាយប្រាក់ត្រឹម១.៥៩៦ដុល្លារអាមេរិកក្នុង១ខែ ។

ចំណែកប្រទេសផ្សេងទៀតដែលជាប់លំដាប់ដូចគ្នា គឺលំដាប់លេខ២ ប្រទេសម៉ិកស៊ិក, លេខ៣ ប៉ាណាម៉ា, លេខ៤ អេក្វាឌ័រ, លេខ៥ កូស្តារីកា, លេខ៦ អេស្ប៉ាញ, លេខ៧ ក្រិក និងលេខ៨ បារាំង ។ អ្នកចាត់ចំណាត់ថ្នាក់នេះបានពិចារណាទិន្នន័យ ប៉ុន្តែមិនមែនមានន័យថា វាជាទិន្នន័យការស្ទង់មតិបែបវិទ្យាសាស្ត្រទេ ព្រោះពួកគេចាត់ឡើងដោយសាកសួរការយល់ឃើញ និងព័ត៌មានពីអ្នករស់នៅទីកន្លែងផ្សេងៗ ។

ទោះយ៉ាងណា ប្រទេសមួយចំនួនមានចំណាត់ថ្នាក់ធ្លាក់ចុះ គឺវៀតណាម និងម៉ាឡេស៊ី ទោះបីប្រទេសទាំងពីរមានអាកាសធាតុក្តៅល្មម មនុស្សម្នារួសរាយ ការចាយវាយក្នុងការរស់នៅថោក ប៉ុន្តែបញ្ហាទិដ្ឋាការធ្វើឱ្យពិបាករស់នៅយូរអង្វែង ៕

អន្តរជាតិ៖ ក្រុមតាលីបង់​ដែល​កំពុង​គ្រប់គ្រងប្រទេស​អាហ្វហ្គានីស្ថាន បាន​ចុះ​ហត្ថលេខា​លើ​កិច្ចព្រម​ព្រៀង​ជា​អន្តរជាតិ​ទី​ ១​ របស់​ខ្លួន​ជាមួយ​ក្រុមហ៊ុន​ប្រេង​ឥន្ធនៈ​របស់ចិនកាល​ពី​ថ្ងៃ​ព្រហស្បតិ៍ម្សិលមិញ​ ដើម្បី​ឃួង​យក​ប្រេងនិង​អភិវឌ្ឍអាង​ប្រេង​បម្រុង​នៅ​ភាគ​ខាង​ជើង​របស់​ប្រទេស​នេះ។​

ក្រុម​មន្ត្រីជាន់ខ្ពស់​តាលីបង់​ និង​ឯកអគ្គរដ្ឋទូត​ចិន​ប្រចាំ​រដ្ឋធានី​កាប៊ុល​ប្រទេស​អាហ្វហ្គានីស្ថាន​ លោក​ វ៉ាង យី (Wang Yi)​ បាន​ចូល​រួមក្នុង​ពិធី​ចុះហត្ថលេខា​ ដែល​មាន​ការ​ផ្សាយ​បន្តផ្ទាល់​តាម​ទូរទស្សន៍នៅ​ក្នុង​រដ្ឋធានី​កាប៊ុល​របស់​ប្រទេស​អាហ្វហ្គានីស្ថាន​ផង​ដែរ។

រដ្ឋមន្ត្រីក្រសួង​រ៉ែ​អាហ្វហ្គានីស្ថាន​ លោក សាហាប៊ូឌីន ឌីឡាវ៉ាំ (Shahabuddin Dilawar) បានថ្លែងក្នុង​ពិធី​ចុះ​ហត្ថលេខា​នោះ​ថា ការ​ចុះ​កិច្ចព្រមព្រៀង​ជាមួយ​ក្រុមហ៊ុន​ចិន​ ស៊ីនជីង សេនត្រល់ អាស៊ី ផេត្រូលីម អែន ហ្គាស ស៊ីអូ (Xinjiang Central Asia Petroleum and Gas Co) (CAPEIC) ​និង​មាន​ការ​បណ្តាក់​ទុនពី​ចិន​ប្រមាណ​ ១៥០​ លាន​ដុល្លារ​អាមេរិក​ក្នុង​មួយ​ឆ្នាំៗ ក្នុង​ការឃួង​ប្រេង​ពី​តំបន់​អាងស្តុក​ទឹក​នៃទន្លេ អាមូរ (Amu) ក្នុង​ប្រទេស​អាហ្វហ្គានីស្ថាន។

លោក​បាន​បន្ថែម​ទៀត​ថា​ កិច្ចព្រមព្រៀង​នោះ​នឹង​គ្រប​ដណ្តប់​លើ​ផ្ទៃដី​ប្រមាណ ៤.៥០០ ​គីឡូម៉ែត្រ​ក្រឡា​ជា​រួម​ នៅ​ក្នុង​តំបន់ សារីប៉ុល (Saripol) ខាង​ជើង​ ក្នុង​ខេត្ត ចោវស្យូន (Jowzjan) និង​ខេត្ត ហ្វារីយ៉ាប (Faryab) របស់​អាហ្វហ្គានីស្ថាន ដោយ​បង្កើត​ការងារ​ដល់​ពលរដ្ឋ​អាហ្វហ្គានីស្ថាន​ ចំនួន​ប្រមាណ​ ៣ ពាន់នាក់​ផង​ដែរ។

រដ្ឋមន្ត្រី​ក្រសួង​រ៉ែ​អាហ្វហ្គានីស្ថាន​រូប​នេះ បាន​លើក​ឡើងទៀត​ថា​ ការ​វិនិយោគ​របស់​ចិន ត្រូវ​គេ​រំពឹង​ថា​នឹង​កើន​ឡើងប្រមាណ ​៥៤០ ​លាន​ដុល្លារ​អាមេរិក​ ក្នុង​រយៈពេល​បី​ឆ្នាំ​ នៅ​ក្នុង​កិច្ចសន្យា​ដែលមានរយៈពេល​ ២៥ ​ឆ្នាំ​នោះ។ លោក​បន្ត​ទៀត​ថា​ រដ្ឋបាល​តាលីបង់​ នឹង​មាន​ចំណែកក្នុង​ភាព​ជា​ដៃគូ​ប្រមាណ​ ២០%​ នៅ​ក្នុង​គម្រោង​នោះ​ ​ដោយក្នុង​កិច្ចសន្យា​នោះមាន​ «ខ»​ មួយ​ចែង​ថា​ នឹង​បង្កើន​រហូត​ដល់​ ៧៥% ​ផង​ដែរ។

ឯកអគ្គរដ្ឋទូត​ចិន​ក៏​បាន​ជំរុញ​ដល់​ក្រុម​ហ៊ុន​ចិន​ ឱ្យ​អនុវត្ត​ឱ្យ​បាន​ត្រឹមត្រូវទៅ​លើច្បាប់របស់​អាហ្វហ្គានីស្ថាន​ ​ជាមួយ​នឹង​ការ​បំពេញ​ការងារ​ដោយ​ការ​ទទួល​ខុសត្រូវ​ និងកាតព្វកិច្ចនានា​ ដែល​បាន​ចែង​ក្នុង​កិច្ចសន្យា​នោះ ៕