ប្រទេសបារាំង ៖ បារាំងបានប្រកាសផែនការបង្កើនអាយុចូលនិវត្តន៍រហូតដល់៦៤ឆ្នាំ ដែលវាជាផ្នែកមួយនៃផែនការកែទម្រង់ប្រព័ន្ធចូលនិវត្តន៍ ប៉ុន្តែពលរដ្ឋ៨០% មិនយល់ស្របនឹងផែនការនេះទេ ខណៈសហជីពកម្មករបានណាត់គ្នាធ្វើបាតុកម្មនៅប៉ុន្មានថ្ងៃខាងមុខ ។

នាយករដ្ឋមន្ត្រីបារាំង លោកស្រី Reelisabeth Bourne បានប្រកាសផែនការបង្កើនអាយុចូលនិវត្តន៍ដល់៦៤ឆ្នាំនៅឆ្នាំ២០៣០ ។ ផែនការកំណែទម្រង់ប្រព័ន្ធចូលនិវត្តន៍ គឺជានយោបាយចម្បងក្នុងនយោបាយកែទម្រង់របស់ប្រធានាធិបតីបារាំងលោក Emmanuel Macron ដែលជំរុញការដឹកនាំកំណែទម្រង់តាំងពីលោកឡើងកាន់តំណែងជាប្រធានាធិបតីបារាំងលើកដំបូងនៅឆ្នាំ២០១៧ ។

ប៉ុន្តែផែនការកែទម្រង់ប្រព័ន្ធចូលនិវត្តន៍របស់លោក Macron ត្រូវបានពន្យារពេលជាច្រើនដង ដែលធ្វើឱ្យមានការធ្វើបាតុកម្ម និងការរាតត្បាតជំងឺកូវីដ-១៩ ធ្វើឱ្យលោកផ្អាកផែនការនេះនៅឆ្នាំ២០២០ ។ លើកនេះគឺជាការព្យាយាមលើកទី២ ក្នុងការធ្វើកំណែទម្រង់ប្រព័ន្ធចូលនិវត្តន៍ ដែលមិនមែនជារឿងងាយឡើយ ។

ផែនការនេះ ក៏គ្មានការគាំទ្រពីពលរដ្ឋផងដែរ ជាពិសេសមន្ត្រីរាជការ ព្រោះធ្វើឱ្យពួកគេបានទទួលប្រាក់ចូលនិវត្តន៍ និងទទួលផលប្រយោជន៍យឺតយ៉ាវ ខណៈពលរដ្ឋបារាំងត្រូវប្រឈមជាមួយការចំណាយខ្ពស់ក្នុងការរស់នៅ ។ តាមការស្ទង់មតិបង្ហាញថា ពលរដ្ឋបារាំង៤នាក់ក្នុងចំណោម៥នាក់ ឬស្មើ៨០%របស់ពលរដ្ឋបារាំងទាំងអស់ ប្រឆាំងនឹងផែនការនេះ ។

សហជីពកម្មករជាច្រើនកន្លែងមានផែនការធ្វើបាតុកម្មនៅថ្ងៃទី១៩ ខែមករា និងបានណាត់គ្នាពិភាក្សាពីផែនការនេះ ហើយពួកគេនឹងធ្វើបាតុកម្មជាច្រើនដងទៀតដើម្បីប្រឆាំងជាមួយការបង្កើនអាយុចូលនិវត្តន៍ ។

នាយករដ្ឋមន្ត្រី Bourne ដាស់តឿនថា ប្រសិនបើបារាំងមិនធ្វើកំណែទម្រង់ប្រព័ន្ធចូលនិវត្តន៍ទេ វានឹងមានឱនភាពដ៏ធំធេងទៅថ្ងៃអនាគត ។ លើសពីនេះ ការធ្វើកំណែទម្រង់នឹងជួយរក្សាតុល្យភាពថវិកាដែលប្រើសម្រាប់ចូលនិវត្តន៍ និងជួយសន្សំប្រាក់ដល់១៧.៧០០យូរ៉ូក្នុង១ឆ្នាំនៅឆ្នាំ២០៣០ ។

ដំណាក់កាលបន្តទៀត ផែនការបង្កើនអាយុចូលនិវត្តន៍នឹងត្រូវបញ្ជូនទៅរដ្ឋសភា ហើយនឹងទទួលបានការអនុម័តពីរដ្ឋសភាផងដែរ ។ គួរបញ្ជាក់ថា ផែនការខាងលើបានធ្វើឱ្យគណបក្សរបស់លោក Macron បាត់បង់អាសនៈនៅក្នុងសភានៅពេលបោះឆ្នោតកាលពីឆ្នាំមុន ៕

ប្រភព ៖ TNN World

បរទេស៖ កងទ័ពជើងទឹកអាមេរិករឹបអូសបាន AK-47 ចំនួន ២,០០០ ដើមជាងពីទូកនេសាទមួយគ្រឿង ដែលគេសង្ស័យថាកាំភ្លើងទាំងអស់នេះ នឹងត្រូវដឹកជញ្ជូនប្រគល់ទៅឲ្យពួកក្រុមឧទ្ទាម Houthi របស់ យេម៉ែន។

នាថ្ងៃទី ១២ ខែមករា​ ឆ្នាំ២០២៣ មានសេចក្តីរាយពីសារព័ត៌មាន NBC Newe បានឱ្យដឹងថា កាលពីថ្ងៃសុក្រសប្តាហ៍មុន កងនាវាចរអាមេរិក ប្រទះឃើញទូកនេសាទគួរឲ្យសង្ស័យមួយគ្រឿង ដោយធ្វើដំណើរជិះទូកឆ្លងកាត់ឈូងសមុទ្រ អូម៉ង់ពីអ៊ីរ៉ាក់ ទៅយេម៉ែន។

ជាមួយគ្នានោះគេដឹងច្បាស់ថា ផ្លូវនេះត្រូវបានប្រើជាញឹកញាប់ក្នុងការដឹកជញ្ជូនទំនិញខុសច្បាប់ទៅ កាន់ក្រុមឧទ្ទាម Houthi។

ក្នុងនោះបន្ទាប់ពីការឃាត់ទូក  និងត្រួតពិនិត្យ គេបានរកឃើញជនជាតិយេម៉ែនចំនួន៦នាក់ រួមទាំងកាំភ្លើង AK-47 ចំនួនចំនួន ២,១១៦ ដើមដែលត្រូវបានដឹកជញ្ជូនតាមទូកនេសាទនេះ។ ហើយនាវិកអាមេរិកក៏បានរឹបអូសកាំភ្លើងដ៏ច្រើនសន្ធឹកសន្ធាប់ និងបានធ្វើការឃាត់ខ្លួនមនុស្សទាំង៦នាក់ក្នុងការស៊ើបអង្កេត និងដោះស្រាយបន្ត។ ខណៈគេសង្ស័យថាអាវុធទាំងនេះបានដឹកជញ្ជូន គោលដៅប្រគល់ទៅឲ្យពួកក្រុមឧទ្ទាម Houthi របស់ យេម៉ែន។

គួររំលឹកថាកាលពីថ្ងៃទី ១ ខែធ្នូ ឆ្នាំ២០២២ កន្លងទៅ កងទ័ពជើងទឹកអាមេរិកក៏ធ្លាប់បានរឹបអូស គ្រាប់រំសេវ ជាង ៥០ តោន ហ្វុយហ្ស៊ីប និង គ្រាប់ រ៉ុក្កែត ពីទូកនេសាទ នៅឈូងសមុទ្រ អូម៉ង់នេះដូចគ្នា។

បន្ថែមពីនោះពួកគេក៏ធ្លាប់ស្ទាក់ចាប់ការដឹកជញ្ជូនគ្រឿងផ្ទុះដ៏ធំរបស់ប្រទេសអ៊ីរ៉ង់នៅលើទូកនេសាទមួយគ្រឿង ដែលធ្វើដំណើរទៅកាន់ប្រទេសយេម៉ែន និងធ្វើការត្រួតពិនិត្យ រកឃើញផ្ទុកសារធាតុផ្ទុះជាង ១៨០ តោនផងដែរ។

ទន្ទឹមនឹងការរឹបអូសនេះផងដែរ ឧត្តមនាវាឯក Brad Cooper មេបញ្ជាការនៃបញ្ជាការកណ្តាល កងនាវាចរទី៥ កងម៉ារីនអាមេរិក និងកងកម្លាំងម៉ារីនចម្រុះ បាននិយាយថា “ការដឹកជញ្ជូន និងការផ្តល់អាវុធនេះគឺជាផ្នែកមួយនៃគំរូការបះបោរដែលកំពុងបន្តពីប្រទេសអ៊ីរ៉ង់”។

គួរបញ្ជាក់ផងដែរថា សម្រាប់ក្រុមឧទ្ទាម Houthi គាំទ្រដោយអ៊ីរ៉ង់ បន្ទាប់ពីបានកាន់កាប់រដ្ឋធានីសាណារបស់យេម៉ែននៅក្នុងឆ្នាំ ២០១៤ មក ក្រុមចម្រុះដឹកនាំដោយអារ៉ាប៊ីសាអូឌីតក៏បានធ្វើអន្តរាគមន៍នៅឆ្នាំបន្ទាប់ រហូតដល់សង្គ្រាមស៊ីវិលយេម៉ែន ធ្លាក់ក្នុងស្ថានការណ៍ដ៏អាក្រក់ និងនាំឱ្យមានភាពក្រីក្រ ក៏ដូចជាសង្គ្រាម រីករាលដាល ដែលធ្វើឱ្យប្រជាជនទទួលរងគ្រោះ និងរបួសរាប់ម៉ឺននាក់៕ ប្រភព៖ pptvhd36

ប្រទេសស៊ុយអែត ៖ អាជ្ញាធរស៊ុយអែតបានត្រឡប់មកប្រើប្រាស់ប្រព័ន្ធកេណ្ឌទាហានម្តងទៀត និងបង្កើនថវិកាការពារជាតិស្មើ២% នៃផលិតផលក្នុងស្រុកសរុប (GDP) ។

រដ្ឋាភិបាលស៊ុយអែតទទួលស្គាល់ថា បានស្តារឡើងវិញក្នុងការកេណ្ឌទាហាន រហូតដល់ការចល័តជនស៊ីវិលសម្រាប់បេសកកម្មសង្គ្រោះបន្ទាន់ផ្សេងៗ និងបង្កើនថវិកាការពារជាតិស្មើ២% នៃផលិតផលក្នុងស្រុកសរុប ។ លោកនាយករដ្ឋមន្ត្រី Ulf Christerson ឱ្យដឹងថា រដ្ឋាភិបាលនឹងចាប់ផ្តើមអនុវត្តក្នុងសប្តាហ៍នេះ ។

លោក Karl-Oscar Bohlin រដ្ឋមន្ត្រីក្រសួងការពារជាតិ ទទួលខុសត្រូវផ្នែកការពារជនស៊ីវិលរបស់ស៊ុយអែតថ្លែងថា គម្រោងនេះនឹងដឹកនាំជនស៊ីវិលឱ្យទទួលបានការបណ្តុះបណ្តាលត្រឹមត្រូវក្នុងផ្នែកសង្គ្រោះផ្សេងៗនៅទីក្រុង បង្កើនសមត្ថភាពឆ្លើយតប គ្រប់គ្រងស្ថានភាពអាសន្ន ឬការវាយលុកដែលអាចកើតមានឡើង ។ លោកបន្តថា រដ្ឋាភិបាលមានចំណែករួមក្នុងការធ្វើការងារឱ្យទូលំទូលាយ ហើយស្នើសុំការកេណ្ឌទាហានក្នុងផ្នែកផ្សេងទៀតរបស់គម្រោងការពារជនស៊ីវិល ។

ទោះយ៉ាងណា គេនៅមិនទាន់ច្បាស់ទេថា គម្រោងខាងលើនេះនឹងមានជនស៊ីវិលចូលរួមប៉ុន្មាននាក់ ប៉ុន្តែសារព័ត៌មានក្នុងតំបន់បញ្ជាក់ថា ពលរដ្ឋប្រមាណ៣.០០០នាក់អាចត្រូវគេហៅចូលក្នុងគម្រោងនេះជាលើកដំបូង ។ វាបានឆ្លុះបញ្ចាំងពីការត្រៀមខ្លួនការពារប្រទេសរបស់ស៊ុយអែតក្នុងសម័យសង្គ្រាមត្រជាក់ ។

គួរបញ្ជាក់ថា ការកេណ្ឌជនស៊ីវិលរបស់ស៊ុយអែតត្រូវបានផ្អាកកាលពីឆ្នាំ២០០៨កន្លងមក ដោយទាំងប្រទេសស៊ុយអែត និងហ្វាំងឡង់ បានឈប់ធ្វើជាអ្នកនៅកណ្តាល ហើយសុំចូលរួមជាសមាជិកអង្គការសន្ធិសញ្ញាអាត្លង់ទិកខាងជើង (ណាតូ) បន្ទាប់ពីមានទំនាស់រវាងប្រទេសរុស្ស៊ី និងអ៊ុយក្រែន ៕

ប្រភព ៖ TNN World

បរទេស៖ ក្រុមអ្នកគ្រប់គ្រងអាវុធ បរិស្ថាន និងក្រុមសកម្មជនដទៃទៀតជាង ១០០ ផ្សេងទៀតបានអំពាវនាវឱ្យរដ្ឋបាលរបស់ប្រធានាធិបតី Joe Biden ចេញការសុំទោសជាផ្លូវការ ព្រមទាំងផ្តល់សំណងសមរម្យដល់កោះ Marshall  សម្រាប់ផលប៉ះពាល់នៃការសាកល្បងនុយក្លេអ៊ែរដ៏ធំតាំងពីក្នុងអំឡុងទសវត្សរ៍ឆ្នាំ ១៩៤០ និងឆ្នាំ ១៩៥០។

នាថ្ងៃទី ១១ ខែមករា ឆ្នាំ២០២៣ សារព័ត៌មានរ៉យទ័រ បានធ្វើសេចក្តីរាយការណ៍ពីទីក្រុងវ៉ាស៊ីនតោន សហរដ្ឋអាមេរិក ថាក្រុមសកម្មជន ដឹកនាំដោយសមាគមគ្រប់គ្រងអាវុធ រួមជាមួយនឹង Greenpeace ដែលជាក្រុមគ្រូពេទ្យសម្រាប់ទំនួលខុសត្រូវសង្គម និង Marshall Lease Education Initiative (MEI) បានដាក់លិខិតមួយទៅកាន់លោក Joe Biden កាលពីថ្ងៃទី ៥ ខែធ្នូ ឆ្នាំ២០២២កន្លងទៅ ដោយជំរុញឱ្យរដ្ឋាភិបាលក្រុងវ៉ាស៊ីនតោនគោរពការសន្យារបស់ខ្លួនក្នុងការការពារបរិស្ថាននៅលើកោះMarshall ក្រោយក្នុងការចរចាបន្តជាមួយគ្នា ទាក់ទងនឹងការបន្តកិច្ចព្រមព្រៀងទំនាក់ទំនងសេរី (COFA) ដែលផ្អែកលើទំនាក់ទំនងជាមួយទឹកដីក្នុងមហាសមុទ្រប៉ាស៊ីហ្វិក ចាប់តាំងពីទសវត្សរ៍ឆ្នាំ ១៩៨០។

ពិតណាស់កន្លងមកប្រទេសកោះនេះរក្សាទំនាក់ទំនងយ៉ាងជិតស្និទ្ធជាមួយរដ្ឋាភិបាលក្រុងវ៉ាស៊ីនតោន ប៉ុន្តែក្រោយមកអ្នកវិភាគជាច្រើនបានព្រមានថា ទំនាក់ទំនងរវាងតំបន់ទាំងពីនេះ បានបរាជ័យ ក្រោយអាមេរិកមិនបានបំពេញលក្ខខណ្ឌថ្មីសម្រាប់ជំនួយសេដ្ឋកិច្ចដល់កោះMarshall។

ដែលនេះផ្ទុយពីរដ្ឋាភិបាលវ៉ាស៊ីនតោនធ្លាប់បានប្តេជ្ញាដោះស្រាយបញ្ហាបរិស្ថាន សុខភាពសាធារណៈ និងបញ្ហាសុខុមាលភាពផ្សេងទៀតដែលមាននៅក្នុងកោះ Marshall។

ជាមួយគ្នានោះក្រុមសកម្មជន ពួកគេបានទាមទាសេចក្ដីថ្លែងការសុំទោសជាផ្លូវការ និងផ្ដល់សំណង សម្រាប់ការគាំទ្រការការពារបរិស្ថានរយៈពេលវែង ដោយពង្រីកលទ្ធភាពទទួលបានសេវាថែទាំសុខភាព ជាពិសេសជំងឺទាក់ទងនឹងការប៉ះពាល់នឹងវិទ្យុសកម្ម និងបញ្ចេញឯកសារទាក់ទងនឹងការធ្វើតេស្តនុយក្លេអ៊ែរឱ្យបានច្បាស់លាស់ ក្រោយពីអាមេរិកបានជ្រើសទីតាំងនៃកោះMarshall មកធ្វើជាកន្លែងតេស្តសាកល្បងនុយក្លេអ៊ែរដ៏ធំតាំងពីក្នុងអំឡុងទសវត្សរ៍ឆ្នាំ ១៩៤០ និងឆ្នាំ ១៩៥០ ដែលវាបានផ្ដល់ផលប៉ះពាល់យ៉ាងធ្ងន់ធ្ងរ។

យ៉ាងមិញ មន្ត្រីក្រសួងម្នាក់បាននិយាយកាលពីខែមុនថា ក្រសួងកំពុងស្វែងរកតំបន់ដែលសហរដ្ឋអាមេរិកអាចផ្តល់ជំនួយទូលំទូលាយ ដើម្បីដោះស្រាយតម្រូវការដែលមានស្រាប់ជូនដល់ពួកគេ៕ ប្រភព៖ Dailynews

អ្នកដំណើរ២នាក់ បានរងរបួសនៅលើយន្ដហោះ Scoot Airline ដែលត្រៀមហោះចេញពីអាកាសយានដ្ឋានអន្តរជាតិ Taoyuan កោះតៃវ៉ាន់ ឆ្ពោះទៅកាន់ប្រទេស សិង្ហបុរី កាលពីថ្ងៃអង្គារ ក្រោយមានហេតុការណ៍ផ្ទុះដុំសាកថ្ម Power Bank ស្របពេលដែលត្រៀមនឹងហោះហើរ។ នេះបើយោងតាមការចេញផ្សាយដោយសារព័ត៌មាន The Straits Times នាថ្ងៃពុធ ទី១១ ខែមករា ឆ្នាំ២០២៣។

អ្នកដំណើរ២នាក់ បានរងរបួសនៅលើយន្ដហោះ Scoot Airline ដែលត្រៀមហោះចេញពីអាកាសយានដ្ឋានអន្តរជាតិ Taoyuan កោះតៃវ៉ាន់ ឆ្ពោះទៅកាន់ប្រទេស សិង្ហបុរី កាលពីថ្ងៃអង្គារ ក្រោយមានហេតុការណ៍ផ្ទុះដុំសាកថ្ម Power Bank ស្របពេលដែលត្រៀមនឹងហោះហើរ។ នេះបើយោងតាមការចេញផ្សាយដោយសារព័ត៌មាន The Straits Times នាថ្ងៃពុធ ទី១១ ខែមករា ឆ្នាំ២០២៣។

រថយន្ដពន្លត់អគ្គីភ័យ ត្រូវបានដាក់ពង្រាយទៅកាន់កន្លែងកើតហេតុភ្លាមៗ បន្ទាប់ពីអាជ្ញាធរអាកាសយានដ្ឋានបានទទួលការជូនដំណឹងនៅម៉ោង ៧:៤០នាទីយប់ ហើយយន្ដហោះបានត្រឡប់ទៅកាន់ផ្លូវរត់វិញបន្ទាប់ពីភ្លើងត្រូវបានពន្លត់។

ក្រោយបញ្ចប់បញ្ហា ក្រុមការងារជើងហោះហើរ TR993 បានសូមអភ័យទោសចំពោះឧប្បត្តិហេតុនេះ ហើយបានប្រកាសពីសុវត្ថិភាពរបស់អតិថិជន និងនាវិក គឺជាអាទិភាពចម្បងរបស់ក្រុមហ៊ុន យើងនឹងស៊ើបអង្កេតលើឧប្បត្តិហេតុនេះជាបន្ដទៀត៕

ប្រភព៖ CNA

ប្រទេសម៉ិកស៊ិក ៖ ប្រធានាធិបតីម៉ិកស៊ិក លោក Andres Manuel Lopez Obrador បានបញ្ជាក់ក្នុងសេចក្តីថ្លែងការណ៍ថា លោកបានអំពាវនាវដល់លោក Joe Biden ប្រធានាធិបតីអាមេរិក ជំរុញដល់សភាអាមេរិកធ្វើកំណែទម្រង់ច្បាប់អន្តោប្រវេសន៍ ដើម្បីជួយឱ្យជនជាតិម៉ិកស៊ីកូជាច្រើនលាននាក់ដែលធ្វើអន្តោប្រវេសន៍ទៅអាមេរិក បានរស់នៅលើទឹកដីអាមេរិកដោយស្របច្បាប់ ។

ប្រធានាធិបតីម៉ិកស៊ីកូបានបញ្ជាក់ដែរថា ភាគីទាំងអស់បានឯកភាពគ្នាជំរុញការអភិវឌ្ឍផ្នែកសេដ្ឋកិច្ចដោយបង្កើតគណៈកម្មការត្រួតពិនិត្យការនាំចូលទំនិញ ដើម្បីអនុញ្ញាតឱ្យអាមេរិកខាងជើងមិនសូវពឹងផ្អែកលើទ្វីបផ្សេងទៀត ។ ក្រៅពីនេះ ប្រទេសម៉ិកស៊ិកនឹងជួយអាមេរិកគ្រប់គ្រងការនាំចូលថ្នាំបំបាត់ការឈឺចាប់ (Fentanil) ដែលគេជឿថា គឺជាមូលហេតុនៃការស្លាប់របស់ជនជាតិអាមេរិកជាច្រើននាក់ ។

សេចក្តីថ្លែងការណ៍របស់លោកប្រធានាធិបតីម៉ិកស៊ិក គឺបន្ទាប់ពីការបញ្ចប់កិច្ចប្រជុំមេដឹកនាំអាមេរិកខាងជើង ដែលរៀបចំឡើងនៅទីក្រុងម៉ិកស៊ីកូ ជាមួយលោក Biden ប្រធានាធិបតីអាមេរិក និងនាយករដ្ឋមន្ត្រីកាណាដា លោក Justin Trudeau ។ គោលបំណងសំខាន់នៃកិច្ចប្រជុំនេះ គឺពិភាក្សាពីការសហការគ្នាលើផ្នែកសេដ្ឋកិច្ច និងដោះស្រាយបញ្ហាការលួចនាំចូលថ្នាំញៀន បញ្ហាជនអន្តោប្រវេសន៍ខុសច្បាប់ និងបញ្ហាអាកាសធាតុផ្លាស់ប្តូរ ជាដើម ៕

ប្រភព ៖ TNN World

ប្រទេសថៃ៖ នាវារាជសុខោទ័យ ដែលជានាវារបស់រាជវង្សថៃ ត្រូវបានលិចនៅកណ្តាលឈូងសមុទ្រថៃ បន្ទាប់ពីម៉ាស៊ីនមានបញ្ហា ហើយបានពន្លិចកងទ័ពចំនួន ១០៥នាក់កាលពីថ្ងៃទី ១៨ ខែធ្នូ ឆ្នាំ២០២២កន្លងទៅ ពេលនេះគណៈកម្មាធិការវិធីសាស្រ្ត កំពុងធ្វើកិច្ចប្រជុំ ត្រៀមប្រាក់១០០លានបាត ឬស្មើរនឹង 2,999,400 ដុល្លារ ក្នុងការជួយសង្គ្រោះនាវានេះចេញពីបាតសមុទ្រឡើងមកវិញ។

ក្រឡែកទៅមើលកាលពីថ្ងៃទី ១៨ ខែធ្នូ ឆ្នាំ២០២២  មានសោកនាដកម្ម នៃឧប្បត្តិហេតុនៃការលិចនាវារបស់រាជវង្ស “រាជសុខោទ័យ” បន្ទាប់ពីមានព្យុះ និងខ្យល់បក់ខ្លាំងនៅកណ្តាលឈូងសមុទ្រថៃ ក្នុងស្រុកបាងសាផាន ខេត្ត ប្រាជួបគិរីខាន់។

ជាលទ្ធិផល បណ្តាលឲ្យទាហានចំនួន ១០៥ នាក់បានលិចលងក្នុងសមុទ្រ និងជួយសង្គ្រោះមនុស្សបាន ៧៦ នាក់ប៉ុណ្ណោះ ចំណែកមន្ត្រី ២៤ នាក់បានស្លាប់ និង ៥ នាក់ផ្រេងទៀតបាត់ខ្លួនរកមិនទាន់ឃើញរហូតមកទល់ពេលនេះ។

ទោះជាយ៉ាងណា បន្ទាប់ពីមានសោកនាដកម្មដ៏អាក្រក់ដែលបានកើតឡើងរយៈពេលជិតមួយខែមកហើយនោះ ក៏មានសេចក្ដីរាយការណ៍ពីកងទ័ពជើងទឹកថៃថា គណៈកម្មាធិការសង្គ្រោះកងទ័ពជើងទឹក ដឹកនាំដោយឧត្តមនាវាឯក អាក់ ឌុម ផាន់ អៀម(Adung Phan-iam) អគ្គមេបញ្ជាការនៃកងទ័ពជើងទឹកថៃ បានរៀបចំកិច្ចប្រជុំគណៈកម្មាធិការដើម្បីស្វែងរកសេចក្តីសន្និដ្ឋានស្តីពីការជ្រើសរើសក្រុមហ៊ុនដែលគួរឱ្យទុកចិត្តដើម្បី រកវិធីសាស្រ្តសង្គ្រោះនាវារាជសុខោទ័យ ដែលបានលិចនៅបាតឈូងសមុទ្រថៃកន្លងទៅ។

ជាមួយគ្នានោះគេបានបញ្ជាក់លក្ខខណ្ឌ សម្រាប់ក្រុមហ៊ុនថា នាវាត្រូវតែរក្សាទុកដើម្បីឱ្យវានៅតែអាចបន្តប្រើប្រាស់បាន ដោយមិនរុះរើ ឬកាត់នាវាឱ្យដាច់ពីគ្នា មុននឹងលើកវាឡើងនោះឡើយ។ ហើយការសង្គ្រោះនាវានេះក៏មានជំនួយពីកងទ័ពជើងទឹក ដែលដើរតួយ៉ាងសំខាន់ក្នុងការចុះប្រតិបត្តិការមួយនេះ។

ទោះជាយ៉ាងណាបើតាមការប៉ាន់ប្រមាណគេបានឱ្យដឹងថា ថវិកាក្នុងការចំណាយលើការសង្គ្រោះនាវា រាជសុខោទ័យ នឹងមានចំនួនប្រហែល ១០០ លានបាត ឬស្មើរនឹង 2,999,400 ដុល្លារ។

យ៉ាងមិញបើតាមប្រភពពីក្រុមហ៊ុនឯកជនដែលត្រូវបានគេជ្រើសរើស បាននិយាយថា ពួកគេអាចនាំទូកទាំងមូលឡើងមកលើបាន និងប្រើបច្ចេកទេស ក៏ដូចជាឧបករណ៍ប្រកបដោយប្រសិទ្ធភាពក្នុងការស្ទូច ប៉ុន្តែឧបករណ៍មួយចំនួនត្រូវតែនាំចូលពីបរទេស ដែលវាអាចចំណាយពេលខ្លះដើម្បីដំណើរការទទួលបានជោគជ័យ៕ ប្រភព៖ Thairath