ប្រទេសជប៉ុន ៖ ក្រសួងសុខាភិបាល ការងារ និងសុខុមាលភាពរបស់ជប៉ុន បានចេញលិខិតមួយច្បាប់ទៅកាន់សមាគមឱសថស្ថាន និងស្ថាប័នពាក់ព័ន្ធនានា ដើម្បីស្នើឱ្យឱសថស្ថានលក់ថ្នាំពេទ្យ និងហាងលក់ថ្នាំតូចៗ ចេញវិធានការទប់ស្កាត់ការទិញថ្នាំក្នុងចំនួនច្រើនរបស់ភ្ញៀវទេសចរ ដូចជា ថ្នាំគ្រុនក្តៅ និងថ្នាំបំបាត់ការចុកចាប់សម្រាប់ព្យាបាលជំងឺកូវីដ ។ ឱសថស្ថានត្រូវតែកំណត់ចំនួនថ្នាំដែលទិញក្នុង១លើកសម្រាប់មនុស្សម្នាក់ ហើយចៀសវាងការទិញម្តងទៀត ។

នៅក្នុងលិខិតនេះក៏បានអំពាវនាវផងដែរដល់ឱសថស្ថាន ហាងលក់ថ្នាំពេទ្យនានា ព្រមទាំងអ្នកលក់ដុំ មិនត្រូវបញ្ជាទិញថ្នាំច្រើនពេកមកស្តុកទុកទេ ។ សំណើនេះមិនបាននិយាយសំដៅដល់ប្រទេសណាមួយជាក់លាក់ទេ តែក៏មានសេចក្តីរាយការណ៍មកថា ភ្ញៀវទេសចរចិននៅប្រទេសជប៉ុនកំពុងនាំគ្នាសម្រុកទិញថ្នាំពេទ្យ ក្រោយពីការឆ្លងរាលដាលនៃជំងឺកូវីដ-១៩ នៅចិនកើនឡើងខ្លាំង ។

តាមទិន្នន័យរបស់ក្រសួងសុខាភិបាលឱ្យដឹងថា ការស្តុកទុកថ្នាំនៅប្រទេសជប៉ុន មិនទាន់មានការខ្វះខាតនៅឡើយទេក្នុងពេលនេះ តែប្រទេសជប៉ុនបារម្ភថា ការទិញថ្នាំក្នុងចំនួនច្រើនរបស់ភ្ញៀវទេសចរអាចប៉ះពាល់ដល់ស្ថិរភាពការផ្គត់ផ្គង់ថ្នាំរបស់ជប៉ុននាថ្ងៃអនាគត និងធ្វើឱ្យពលរដ្ឋជប៉ុនប្រឈមនឹងការខ្វះខាតថ្នាំផងដែរ ៕

ប្រភព ៖ RDnewsOnline

បរទេស៖ រដ្ឋមន្ត្រីក្រសួងកសិកម្ម និងសហករណ៍ថៃ បានរៀបចំបំផ្លាញ និងកប់សាច់ជ្រូកដែលគេរកឃើញថារត់ពន្ធខុសច្បាប់ចំនួន ៧០០,០០០ គីឡូក្រាម ដែលជាសាច់ជ្រូកច្រើនបំផុតក្នុងប្រវត្តិសាស្ត្រ និងមានតម្លៃ ១២៣ លានបាតឬ ស្មើរនឹង 3,707,499 ដុល្លារ នៅក្នុងខេត្ត ភេទចា បុរី(Phetchaburi)។

កាលពីថ្ងៃទី ១២ ខែមករា ឆ្នាំ២០២៣  លោកបណ្ឌិត ឆា ឡើម ឆៃ សិ អន (Chalermchai Sri-on រដ្ឋមន្ត្រីក្រសួងកសិកម្ម និងសហករណ៍ បានអញ្ជើញជាអធិបតីក្នុងពិធីបំផ្លាញ និងកប់សាច់ជ្រូករត់ពន្ធខុសច្បាប់ នៅមជ្ឈមណ្ឌលស្រាវជ្រាវ និងអភិវឌ្ឍន៍ចំណីសត្វ ក្នុង ស្រុក ឆា អាម (Cha-am ) ខេត្ត ភេទចា បុរី (Phetchaburi) ជាមួយភ្នាក់ងារក្រោមឱវាទជាច្រើនរូបផ្សេងទៀត។

បើតាមប្រភពដដែលបានឱ្យដឹងថា ការបំផ្លាញសាច់ជ្រូក ក៏ដូចជាសាច់ផ្សេងៗជាច្រើនទៀត មានទម្ងន់ដល់ទៅ 723,786 គីឡូក្រាម ដែលមានតម្លៃ ១២៣ លានបាត ឬស្មើរនឹង 3,707,499 ដុល្លារ ដែលតម្រូវឱ្យមានការដឹកជញ្ជូនមកកាន់ទីតាំងបំផ្លាញចោល ចំនួន ៣៥ ជើងនៃរថយន្តកុងតឺន័រធំៗចំនួន ៣។

ជាមួយគ្នានោះនាយកដ្ឋាន អភិវឌ្ឍន៍ បសុសត្វ និង ស្ថាប័នពាក់ព័ន្ធក៏បានសហការគ្នាអនុវត្តច្បាប់ ក្នុងករណីមានការស៊ើបអង្កេតយ៉ាងតឹងរ៉ឹង និងកាត់ទោសដល់អ្នករត់ពន្ធ គ្រឿងក្នុងសត្វ ព្រមទាំងសាច់គ្រប់ប្រភេទ ជាពិសេសគឺសាច់ជ្រូក។

យ៉ាងណាមិញលោកបណ្ឌិត Chalermchai Sri-on ក៏បាននិយាយបន្ថែមថា ការបង្ក្រាបការនាំចូលសាច់ជ្រូកខុសច្បាប់នេះគឺដើម្បីការពារអ្នកប្រើប្រាស់ ពីព្រោះសាច់ជ្រូក និង សាច់ផ្សេងៗទៀតដែលរត់ពន្ធដោយគ្មានការត្រួតពិនិត្យអាចបង្កឱ្យកើតជំងឺដល់សត្វ និង គ្មានសុវត្ថិភាពសម្រាប់អ្នកប្រើប្រាស់ រួមទាំងការបំផ្លាញយន្តការតម្លៃជ្រូកក្នុងស្រុក បង្កការខូចខាតយ៉ាងសម្បើមដល់ប្រព័ន្ធចិញ្ចឹមជ្រូករបស់ប្រទេសថៃ។

និងចង់ឱ្យកសិករ ក៏ដូចជាអ្នកប្រើប្រាស់មានទំនុកចិត្តថា ក្រសួងកសិកម្ម និងសហករណ៍បានការពារយ៉ាងពេញលេញនូវមុខរបររបស់កសិករ ព្រមទាំងសុខភាពអ្នកប្រើប្រាស់យ៉ាងយកចិត្តទុកដាក់ ដោយមន្ត្រីពាក់ព័ន្ធនឹង ប្រតិបត្តិការយ៉ាងខ្លាំងក្លាលើចំណាត់ការមួយនេះបន្ត៕ ប្រភព៖ Thaich8

ប្រទេសចិន ៖ សារព័ត៌មានរ៉យទ័ររាយការណ៍ថា បច្ចុប្បន្ន នៅតាមមន្ទីរពេទ្យឯកជននានានៅក្រុងហុងកុងនិងថៃ កំពុងតែទទួលភ្ញៀវទេសចរចិនជាច្រើននាក់ ដោយពួកគេបានមកចាក់វ៉ាក់សាំង mRNA និងវ៉ាក់សាំងផ្សេងទៀត ក្រោយពីចិនបើកប្រទេសរបស់ខ្លួន និងបន្ធូរបន្ថយវិធានការរឹតបន្តឹងកូវីដកាលពីថ្ងៃទី៨ ខែមករា កន្លងមក ។

ក្នុងកិច្ចសម្ភាសន៍អ្នកដំណើរម្នាក់ឈ្មោះ Yoyo Liang អាយុ៣៦ឆ្នាំ មកពីទីក្រុងប៉េកាំងថា នាងបានធ្វើដំណើរពីក្រុងប៉េកាំងទៅក្រុងហុងកុង ដើម្បីមកកម្សាន្តផង និងចាក់វ៉ាក់សាំងការពារជំងឺកូវីដផង ។ នាងបានមកចាក់វ៉ាក់សាំងនៅមន្ទីរពេទ្យមួយកន្លែងក្នុងក្រុងហុងកុង ដោយចំណាយប្រាក់អស់១.៨៨៨ដុល្លារហុងកុង (ស្មើប្រមាណ២៤២ដុល្លារអាមេរិក) ។

នាងបន្តថា នាងបានចាក់វ៉ាក់សាំងស៊ីណូវ៉ាក់រួចហើយក្នុងរយៈពេល២ឆ្នាំកន្លងមកនេះ តែនាងត្រូវការចាក់វ៉ាក់សាំងដុសជំរុញ mRNA ដូច្នេះ នាងក៏សម្រេចចិត្តធ្វើដំណើរមកក្រុងហុងកុង ។

លោក Lam Wingho សមាជិកគណៈកម្មការវិទ្យាសាស្ត្រហុងកុងឱ្យដឹងថា តាមការសិក្សានាពេលថ្មីៗនេះរំពឹងថា ជនជាតិចិនជាច្រើននាក់ទៀតនឹងធ្វើដំណើរមកកាន់ក្រុងហុងកុងដើម្បីកម្សាន្តផង និងចាក់វ៉ាក់សាំងដុសជំរុញផង ហើយមានពលរដ្ឋហុងកុងជាច្រើននាក់សួរលោកថា តើពួកគេអាចនាំបងប្អូនពីចិនមកចាក់វ៉ាក់សាំងនៅទីនេះបានឬអត់ ។

លើសពីនេះ ថៃក៏ជាប្រទេសមួយដែរសម្រាប់ភ្ញៀវទេសចរចិនមកកម្សាន្ត និងត្រូវការចាក់វ៉ាក់សាំង ។ លោក Pipat Ratchakitprakarn រដ្ឋមន្ត្រីក្រសួងទេសចរណ៍ និងកីឡា ធ្លាប់បានថ្លែងកាលពីខែធ្នូថា ក្រសួងកំពុងពិចារណាស្នើសុំវ៉ាក់សាំងដុសជំរុញដើម្បីចាក់ឱ្យភ្ញៀវទេសចរអន្តរជាតិមិនគិតប្រាក់ ហើយនយោបាយនេះបានទទួលការចាប់អារម្មណ៍យ៉ាងខ្លាំងពីភ្ញៀវចិន ។ នយោបាយរបស់ថៃ មិនគ្រាន់តែទាក់ទាញភ្ញៀវទេសចរប៉ុណ្ណោះទេ តែជនបរទេសក៏អាចជ្រើសរើសចាក់វ៉ាក់សាំងជាច្រើនប្រភេទនៅថៃផងដែរ ។

Goldman Sachs ជាធនាគារវិនិយោគដ៏ធំរបស់សហរដ្ឋអាមេរិក បានបញ្ជាក់ពីលទ្ធផលស្ទង់មតិរបស់ខ្លួននៅថ្ងៃទី២៧ ធ្នូថា ការបើកប្រទេសរបស់ចិននឹងធ្វើឱ្យឧស្សាហកម្មទេសចរណ៍របស់ហុងកុង និងថៃ ទទួលបានប្រយោជន៍ខ្លាំងបំផុត ៕

ប្រភព ៖ 3plus News

រដ្ឋធានីណៃពិដោរ៖ ស្របពេលមីយ៉ាន់ម៉ា កំពុងតែធ្លាក់ចូលទៅក្នុងវិបត្ដិនយោបាយ កាន់តែជ្រៅៗទៅ ក្រោយអំពីរដ្ឋប្រហារយោធា រឹបអូសអំណាចពីរដ្ឋាភិបាលស៊ីវិលរបស់លោកស្រី អ៊ោង សានស៊ូជី កាលពីថ្ងៃទី១ ខែកុម្ភៈ ឆ្នាំ២០២១ ហើយឥឡូវនេះ ក៏មានសេចក្ដីរាយការណ៍ជាបន្ដបន្ទាប់ អំពីកងទ័ពរបបសឹកមួយនេះ កំពុងតែប្រព្រឹត្ដអំពើឃោរឃៅ ខណៈសភាប្រជាជាតិអាស៊ាន ជំរុញឲ្យរដ្ឋាភិបាលថៃ បើកការស៊ើបអង្កេត ទៅលើលើទំនាក់ទំនងបណ្ដាញឧក្រិដ្ឋកម្មរបស់មេដឹករបបយោធា នៅក្នុងប្រទេសនេះ។

សារព័ត៌មានភូមា The Irrawaddy បានចេញផ្សាយ កាលពីថ្ងៃព្រហស្បតិ៍ ទី១២ ខែមករា ថា សមាជិកសភាអាស៊ាន ទទួលបន្ទុកសិទ្ធិមនុស្ស (APHR) បានអំពាវនាវឱ្យរដ្ឋាភិបាលថៃ បើកការស៊ើបអង្កេត អំពីទំនាក់ទំនងរបស់ប្រមុខរបបយោធាមីយ៉ាន់ម៉ា លោកឧត្ដមសេនីយ៍ មីន អ៊ោង ហ្លាង (Min Aung Hlaing) ជាមួយនឹងឈ្មួញកណ្តាលលក់គ្រឿងសព្វាវុធរបស់ភូមា ដែលត្រូវបានចាប់ខ្លួន កាលពីខែកញ្ញា ឆ្នាំ២០២២ នៅក្នុងរាជធានីបាងកក។

លោក ទុន មីន ឡាត (Tun Min Latt) អាយុ៥៣ឆ្នាំ ជាឈ្មួលកណ្ដាលលក់គ្រឿងសព្វាវុធរបស់របបសឹកមីយ៉ាន់ម៉ា ត្រូវបានចាប់ខ្លួន ជាមួយនឹងជនជាតិថៃ ចំនួន៣នាក់ នៅក្នុងការឆ្មក់បង្ក្រាបមួយ នៅក្នុងទីក្រុងប៉ាងកក កាលពីថ្ងៃទី១៧ ខែកញ្ញា ឆ្នាំ២០២២។ លុះមកដល់ថ្ងៃទី១៣ ខែធ្នូ មេឈ្មួញអាវុធរូបនោះ ត្រូវបានចោទប្រកាន់ អំពីបទជួញដូរគ្រឿងញៀន លាងលុយកខ្វក់ និង ឧក្រិដ្ឋកម្មឆ្លងដែន។

លោក ឆាលស៍ សានទៀហ្គោ (Charles Santiago) ប្រធានសិទ្ធិមនុស្ស នៃសភាអាស៊ាន ( APHR) បានបញ្ជាក់ ថា «អាជ្ញាធរថៃ គួរតែបើកការស៊ើបអង្កេត ទៅលើទំនាក់ទំនងរបស់លោកឧត្ដមសេនីយ៍ មីន អ៊ោងហ្លាង (Min Aung Hlaing) មេដឹកនាំរបបសឹកមីយ៉ាន់ម៉ា និង ក្រុមគ្រួសាររបស់គាត់ ជាមួយពិភពលោកខាងក្រៅ ហើយបង្ហាញនូវការរកឃើញរបស់ខ្លួន ជាសាធារណៈ។ ប្រសិនបើរដ្ឋាភិបាលក្រុងបាងកក រកឃើញ ថា ពួកគេបានបំពារបំពានច្បាប់ថៃ ពួកគេគួរតែត្រូវបានចោទប្រកាន់ នៅក្នុងតុលាការថៃ ផងដែរ»។

លោក Charles Santiago បានបន្ថែម ថា «ពួកឧត្ដមសេនីយ៍យោធាមីយ៉ាន់ម៉ា បាន និង កំពុងតែចូលរួម នៅក្នុងការធ្វើអាជីវកម្មខុសច្បាប់ អស់រយៈពេលជាច្រើនទសវត្សរ៍កន្លងមកហើយ។ ក្រុមមន្ត្រីជាន់ខ្ពស់យោធា នៅក្នុងប្រទេសអាស៊ានមួយនេះ មានដូចជា លោក Min Aung Hlaing មិនត្រឹមតែប្លន់យកធនធានធម្មជាតិរបស់ប្រទេសមីយ៉ាន់ម៉ា តាមរយៈការបង់ពន្ធប៉ុណ្ណោះទេ ប៉ុន្តែពួកគេថែមទាំង មានការជាប់ពាក់ព័ន្ធនឹងការជួញដូរគ្រឿងញៀន ឬ យ៉ាងហោចណាស់ ក៏បិទភ្នែកធ្វើមិនដឹងមិនឮ ជាថ្នូរនឹងការបង់ថ្លៃធ្វើអ្វីៗទាំងនោះផងដែរ»។

ប៉ូលិសថៃ បានបញ្ជាក់ ថា ការចាប់ខ្លួនលោក ទុន មីន ឡាត (Tun Min Latt) និង បក្ខពួករបស់គាត់ កាលពីខែកញ្ញា កន្លងទៅ អាជ្ញាធរថៃ បានរឹបអូសគ្រឿងញៀន និង វត្ថុតាងពាក់ព័ន្ធ មានតម្លៃ ប្រហែលជាង២០០លានបាត (ប្រាក់ថៃ) ឬស្មើនឹង ប្រហែល៥,៤លានដុល្លារសហរដ្ឋអាមេរិក។

ផ្អែកលើកំណត់ត្រារឹបអូសបាននោះ អង្គការយុត្តិធម៌ សម្រាប់មីយ៉ាន់ម៉ា (JFM) ជាក្រុមសកម្មជនសម្ងាត់ តាមដានអាជីវកម្មរបស់របបយោធា បានអះអាង ថា វត្ថុដែលរឹបអូសបាន ពីផ្ទះរបស់មេឈ្មួញអាវុធ នៅទីក្រុងបាងកក រួមមាន ឯកសារពាក់ព័ន្ធនឹងខុនដូ មានបន្ទប់គេង ចំនួន៤ នៅទីក្រុងបាងកក មានតម្លៃជិត១លានដុល្លារអាមេរិក ជាកម្មសិទ្ធិរបស់លោក អ៊ោង ព្យា សុន (Aung Pyae Sone) ជាកូនប្រុសរបស់លោកឧត្ដមសេនីយ៍ Min Aung Hlaing មេដឹកនាំរបបយោធាមីយ៉ាន់ម៉ា។ ចំណែកភស្ដុតាងផ្សេងៗទៀត ដែលត្រូវរឹបអូសបាន រួមមានសៀវភៅធនាគារពាណិជ្ជសៀម (Siam Commercial Bank) ចំនួន២ក្បាល ជាកម្មសិទ្ធិរបស់លោកស្រី ខីនធីរី ថេត ម៉ុន (Khin Thiri Thet Mon) ជាកូនស្រីរបស់លោក Min Aung Hlaing។

ការជំរុញឲ្យរដ្ឋាភិបាលថៃ បើកការស៊ើបអង្កេត លើមេដឹកនាំរបបសឹកមីយ៉ាន់ម៉ា ពីសភាអាស៊ាន នេះ បានកើតឡើង ស្របគ្នាជាមួយនឹងសេចក្ដីរាយការណ៍ជាច្រើន អំពីកងទ័ពរបបសឹក បាន និង កំពុងតែប្រព្រឹតអំពើឃោរឃៅ ដើរដុតបំផ្លាញផ្ទះសម្បែងរបស់អ្នកស្រុក និង ដុតសម្លាប់មនុស្សទាំងរស់ ប្រឆាំងនឹងអ្នកទាំងឡាយណា មានការសង័្សយជាប់ពាក់ព័ន្ធនឹងក្រុមចលនាប្រឆាំងនឹងរដ្ឋាភិបាល៕

បរទេស៖ អ្នកដំណើររាប់សិបនាក់ត្រូវខកជើងហោះហើរ ក្រោយយន្តហើយមួយគ្រឿងធ្វើដំណើរហោះឡើង ដោយមិនដឹងខ្លួនថាបានភ្លេចភ្ញៀវនៅខាងក្រោមចំនួន៥៥នាក់។

កាលពីពេលថ្មីកន្លងទៅនេះ មានសេចក្ដីរាយការណ៍មួយបានឱ្យដឹងថា អ្នកដំណើរចំនួន ៥០ នាក់ដែលត្រៀមខ្លួនធ្វើដំណើរហោះហើរតាមក្រុមហ៊ុនអាកាសចរដែលមានឈ្មោះថា Go First Airways នៅក្នុងទីក្រុងBengaluru ក្នុងប្រទេសឥណ្ឌា ក្នុងគោលដៅធ្វើដំណើរឆ្ពោះទៅក្រុង Delhi។

ប៉ុន្តែរឿងដ៏ហួសចិត្តក៏បានកើតឡើង នៅពេលដែលជើងហោះហើរ G8 116 បានហោះចេញពីអាកាសយានដ្ឋាន នៅម៉ោង ៦.៣០ នាទីព្រឹក ដោយបានភ្លេចអ្នកដំណើរប្រហែល ៥៥ នាក់ត្រូវបានទុកចោលរហូតត្រូវបានខកខានជើងហោះហើរ។

ជាមួយគ្នានោះអ្នកដំណើរត្រូវបានគេរាយការណ៍ថាបានធ្វើការហោះហើរចាកចេញនៅបួនម៉ោងបន្ទាប់ពីខកខាន នៅម៉ោងប្រហែល ១០ ព្រឹក។

ទោះជាយ៉ាងណាបន្ទាប់ពីបញ្ហានេះបានកើតឡើងនិយតករអាកាសចរណ៍ បានផ្ញើការជូនដំណឹងទៅក្រុមហ៊ុនអាកាសចរណ៍សម្រាប់ “កំហុសមួយនេះ” ។

ក្នុងនោះ Go First ក៏បានធ្វើការសុំទោសចំពោះអ្វីដែលហៅថា “ការត្រួតពិនិត្យមិនបានត្រឹមត្រូវដោយអចេតនា” និងផ្តល់នូវការប៉ះបូវ ជូនអ្នកដំណើរដែលរងផលប៉ះពាល់ដោយការផ្ដល់សំបុត្រធ្វើដំណើរដោយឥតគិតថ្លៃម្នាក់មួយសន្លឹកដើម្បីធ្វើដំណើរគ្រប់ទីកន្លែងនៅក្នុងប្រទេសឥណ្ឌាក្នុងឆ្នាំបន្ទាប់។

បន្ថែមពីនោះសេចក្តីថ្លែងការណ៍បាននិយាយថា នាវិកដែលពាក់ព័ន្ធក្នុងឧប្បត្តិហេតុនេះ ក៏ត្រូវបានដកចេញពីការងារផងដែរ៕ ប្រភព៖ NDTV

អាមេរិក ៖ កាលពីថ្ងៃទី១២ ខែមករា AFP រាយការណ៍ថា មន្ត្រីអាមេរិកបានប្រកាសបញ្ជូនកងម៉ារីនឆ្នេរសមុទ្រទៅប្រចាំនៅប្រទេសជប៉ុន ដើម្បីទប់ទល់នឹងការគំរាមកំហែងពីប្រទេសចិន ដែលកំពុងរីករាលដាលទូទាំងតំបន់អាស៊ី ។

រដ្ឋមន្ត្រីក្រសួងការពារជាតិអាមេរិក លោក ឡយ អូស្ទីន និងលោក Anthony Blinken រដ្ឋមន្ត្រីក្រសួងការបរទេសអាមេរិក បានពិភាក្សាគ្នានៅទីក្រុងវ៉ាស៊ីនតោនជាមួយលោក Hamada Yasudasu រដ្ឋមន្ត្រីការពារជាតិជប៉ុន និងលោក Hayashi Yoshimasa រដ្ឋមន្ត្រីការបរទេសជប៉ុន ។ ភាគីទាំងពីរបានចេញសេចក្តីថ្លែងការណ៍រួមគ្នាថា នឹងពង្រឹងសមត្ថភាពផ្នែកកងទ័ពរបស់ប្រទេសទាំងពីរឱ្យកាន់តែទំនើប ដើម្បីទប់ទល់នឹងការគំរាមកំហែងកាន់តែខ្លាំងឡើងរបស់ចិន ។

កងម៉ារីនឆ្នេរសមុទ្រនឹងចូលទៅប្រចាំការនៅខេត្តអូគីណាវ៉ារបស់ប្រទេសជប៉ុនក្នុងឆ្នាំ២០២៥ ជំនួសកងវរសេនាតូចកាំភ្លើងធំ ខណៈកងម៉ារីនឆ្នេរសមុទ្រអាចប្រតិបត្តិតួនាទីទាំងផ្នែកជម្លោះនិងដែនអាកាស ស្របពេលប្រទេសចិនកំពុងអភិវឌ្ឍន៍ផ្កាយរណបយ៉ាងឆាប់រហ័សនាប៉ុន្មានឆ្នាំចុងក្រោយនេះ ។

អាមេរិក និងជប៉ុននិយាយថា ការវាយប្រហារផ្នែកអាកាសចាត់ទុកជាការប្រឈមចំពោះសន្តិសុខជាតិនៃប្រទេសសម្ព័ន្ធមិត្តទាំងពីរ ។ យោងតាមមាត្រា ៥ នៃសន្ធិសញ្ញាសន្តិសុខអាមេរិក-ជប៉ុនបញ្ជាក់ថា ការវាយប្រហារប្រទេសណាមួយ មិនថាវាយប្រហារជប៉ុន ឬអាមេរិក គឺចាត់ទុកជាការវាយប្រហារទាំងពីរប្រទេស ។

ជាមួយគ្នានេះ ក្នុងកិច្ចប្រជុំក្រុមប្រទេសឧស្សាហកម្មឈានមុខគេលើពិភពលោក (G7) រួមមាន ប្រទេសកាណាដា បារាំង អាល្លឺម៉ង់ អ៊ីតាលី ជប៉ុន និងអង់គ្លេស លោកនាយករដ្ឋមន្ត្រីជប៉ុន Fumio Kishida បានពិភាក្សាគ្នាពីការជំរុញទំនាក់ទំនងផ្នែកកងទ័ពរបស់ប្រទេសសម្ព័ន្ធមិត្តទាំងអស់ផងដែរ ៕ប្រភព ៖ Khaosod

បរទេស៖ បើតាមរដ្ឋាភិបាលម៉ាឡេស៊ី បានឱ្យដឹងថាប្រទេសខ្លួនអាចនឹងបញ្ឈប់ការនាំចេញប្រេងដូងទៅកាន់សហភាពអឺរ៉ុបទាំងស្រុង ដើម្បីប្រឆាំងនឹងច្បាប់ថ្មីរបស់សហភាពអឺរ៉ុប ដែលនឹងអនុម័តច្បាប់មិននាំចូលផលិតផល “ពាក់ព័ន្ធការកាប់បំផ្លាញព្រៃឈើ។

កាលពីថ្ងៃទី ១២ ខែមករា ឆ្នាំ២០២៣ មានសេចក្ដីរាយការពីសារព័ត៌មាន រ៉យទ័រ បានឱ្យដឹងថាប្រទេសម៉ាឡេស៊ី និងឥណ្ឌូនេស៊ី បាន គំរាមបញ្ឈប់ការនាំចេញប្រេងដូងទៅកាន់សហភាពអឺរ៉ុប ឬ EU បន្ទាប់ពីមានការមិនពេញចិត្តនឹងច្បាប់ថ្មីរបស់សហភាពអឺរ៉ុប ក្នុងការបញ្ឈប់ការនាំចូលទំនិញ និងផលិតផលដែលសហភាពអឺរ៉ុបចាត់ទុកថាជាការកាប់បំផ្លាញព្រៃឈើ។

ស្ថានភាពនេះកើតឡើងចំពេលមានភាពចម្រូងចម្រាសពីអ្នក បរិស្ថានដែលបានស្តីបន្ទោសឧស្សាហ កម្មប្រេងដូងជាមូលហេតុចម្បងនៃការកាប់បំផ្លាញព្រៃឈើនៅអាស៊ីអាគ្នេយ៍ ទោះបីជាម៉ាឡេស៊ី និងឥណ្ឌូនេស៊ីមានការត្រួតពិនិត្យ និងវិញ្ញាបនបត្រសម្រាប់អ្នកនាំចេញក៏ដោយ។

បញ្ហានេះលោក ហ្វែត ឌីលាស់ យូសូវ (Fadillah Yusof) រដ្ឋមន្ត្រីក្រសួងកសិកម្ម និងផលិតផលកសិកម្មម៉ាឡេស៊ី  បាននិយាយថា មន្ត្រីម៉ាឡេស៊ី និងឥណ្ឌូនេស៊ី នឹងពិភាក្សាអំពីបញ្ហានៃបទប្បញ្ញត្តិថ្មីពីសហភាពអឺរ៉ុប  ដែលមិនទទួលយកផលិតផលដែលគេមើលឃើញថាបំផ្លាញព្រៃឈើ លុះត្រាតែប្រទេសនាំចេញអាចបញ្ជាក់ការចោទប្រកាន់របស់សហភាពអឺរ៉ុបមិនពិត។

ក្នុងនោះរបាយការណ៍ក៏បានបញ្ជាក់ផងដែរថា សហភាពអឺរ៉ុបក៏ស្ថិតក្នុងចំណោមប្រទេសដែលបាននាំចូលប្រេងដូងកំពូលរបស់ពិភពលោកផងដែរ មុនពេលដែលច្បាប់ថ្មីរបស់សហភាពអឺរ៉ុបបានអនុម័តច្បាប់នេះឡើងកាលពីខែធ្នូ ឆ្នាំ ២០២២ កន្លងទៅ រហូតបានបង្កើតឱ្យមានការមិនពេញចិត្តក្នុងចំណោមប្រទេសនាំចេញប្រេងដូងធំជាងគេលើពិភពលោក រួមទាំងម៉ាឡេស៊ី និងឥណ្ឌូនេស៊ីផងដែរ។

ទោះជាយ៉ាងណាអាជ្ញាធរម៉ាឡេស៊ី និងឥណ្ឌូណេស៊ី ធ្លាប់បាននាំពាក្យបណ្ដឹងទៅកាន់អង្គការពាណិជ្ជកម្មពិភពលោក ដោយនិយាយថា ច្បាប់ថ្មីរបស់សហភាពអឺរ៉ុបគឺជាការរើសអើង និងបង្កើតរបាំងពាណិជ្ជកម្មដ៏ធំមួយ។

គួរបញ្ជាក់ផងថាតម្រូវការប្រេងដូងរបស់សហភាពអឺរ៉ុប ត្រូវបានគេរំពឹងថានឹងថយចុះក្នុងរយៈពេល ១០ឆ្នាំខាងមុខ ដោយសារផែនការអភិវឌ្ឍន៍ថាមពលសកលរបស់សហភាពអឺរ៉ុបដែលមានគោលបំណងកាត់បន្ថយការពឹងផ្អែកលើឥន្ធនៈដែលមកពីប្រេងដូង (ដូចជា ចំហេះ) ត្រឹមឆ្នាំ ២០៣០ ដោយសារវាទាក់ទងនឹងការកាប់បំផ្លាញព្រៃឈើ៕ ប្រភព៖ Khaosod