អន្តរជាតិ៖ មន្ត្រីក្រសួងការបរទេសរុស្ស៊ីម្នាក់បាននិយាយនៅថ្ងៃសុក្រនេះថា បេឡារុសអាចនឹងចូលទៅក្នុងជម្លោះនៅប្រទេសអ៊ុយក្រែន ប្រសិនបើទីក្រុងទីក្រុងកៀវសម្រេចចិត្ត «ឈ្លានពាន» ប្រទេសណាមួយនោះ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី១៣ ខែមករា ឆ្នាំ២០២៣។

ថ្មីៗនេះប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានគូសបញ្ជាក់ថា «កងកម្លាំងអ៊ុយក្រែត្រូវតែត្រៀមទុកជាមុន នៅព្រំដែនជាមួយបេឡារុស ប៉ុន្តែនៅពេលនេះអ្វីដែលយើងបានឃើញ គឺមានតែសេចក្តីថ្លែងការណ៍កំញើញតែប៉ុណ្ណោះ។ ទោះជាយ៉ាងណា យើងត្រូវតែត្រៀមខ្លួនឲ្យបានរួចរាល់ទាំងនៅព្រំដែន និងក្នុងតំបន់»។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋ មន្ត្រីមួយរូបនៃក្រសួងការបរទេសរុស្ស៉ី គឺលោក អូឡេកស៉ី ប៉ូលីឈុក (Aleksey Polishchuk) បាននិយាយថា សមយុទ្ធយោធារបស់រុស្ស៉ីជាមួយបេឡារុសរៀបចំឡើងដើម្បីការពារការបង្កហេតុ ហើយបានព្រមានថាបេឡារុសអាចនឹងចូលរួមក្នុងជម្លោះអ៊ុយក្រែន ប្រសិនបើខ្លួនឬរុស្ស៊ីត្រូវបានគេឈ្លានពាន។ ទោះជាយ៉ាងណាវាអាស្រ័យលើថ្នាក់ដឹកនាំប្រទេសទាំងពីរ ថានឹងធ្វើការសម្រេចចិត្តបែបណា។

គួរបញ្ជាក់ថា រុស្ស៉ីធ្លាប់ប្រើប្រាស់ទឹកដីបេឡារុសដើម្បីបើកការវាយប្រហារមកលើអ៊ុយក្រែន កាលពីថ្ងៃទី២៤ ខែកុម្ភៈ ហើយចាប់តាំងពីខែតុលា ឆ្នាំ២០២២មក បានដាក់ពង្រាយទាហានរបស់ខ្លួនទៅក្នុងកងម្លាំងយោធារួមរុស្ស៉ី-បេឡារុស។ ចាប់តាំងពីពេលនោះមក ប្រទេសទាំងពីរបានយល់ព្រមពង្រឹងកិច្ចសហប្រតិបត្តិការយោធារបស់ពួកគេ ដោយបង្កើនការភ័យខ្លាចថា ទីក្រុងមូស្គូអាចប្រើប្រាស់សម្ព័ន្ធមិត្តជិតស្និទ្ធរបស់ខ្លួនមួយនេះ ដើម្បីបើកការវាយលុកថ្មីលើអ៊ុយក្រែនចេញពីភាគខាងជើង ៕

ប្រទេសថៃ ៖ កាលពីថ្ងៃទី១៣ ខែមករា លោក Wiboon Wongsakul មន្ត្រីរដ្ឋាករទឹកក្នុងតំបន់បានថ្លែងថា លោកបានបញ្ជាឱ្យរដ្ឋាករទឹកចំនួន២៣៤សាខាទូទាំងប្រទេសថៃ ជាពិសេស សាខាស្ថិតនៅទីក្រុងទេសចរណ៍ ដូចជា ភូកេត ក្រៈប៊ី ឈៀងម៉ៃ អាយុធ្យា កោះសមុយ (ខេត្តស៊ូរ៉ាត់ថានី) និងផាត់តាយ៉ា (ខេត្តឈុនបុរី) ឱ្យត្រៀមប្រព័ន្ធផលិតទឹកស្អាត និងចែកចាយទឹកស្អាត ។

លើសពីនេះ លោកក៏ជំរុញដំណើរការគម្រោងចែកចាយប្រព័ន្ធទឹកស្អាតទៅកាន់តំបន់ផ្សេងៗតាមផែនការគ្រោងទុក ដើម្បីអាចគ្រប់គ្រងការប្រើប្រាស់ទឹកស្អាតគ្រប់គ្រាន់ដល់ពលរដ្ឋនៅក្នុងតំបន់ និងភ្ញៀវទេសចរ ស្របតាមការងើបឡើងវិញនៃសេដ្ឋកិច្ច និងទេសចរណ៍ក្រោយពីការរាតត្បាតនៃជំងឺកូវីដ-១៩ ថយចុះ ។

ថៃបានបើកប្រទេសទទួលភ្ញៀវទេសចរគ្រប់ជាតិសាសន៍ រួមទាំងភ្ញៀវទេសចរចិនផងដែរ បន្ទាប់ពីចិនបានអនុញ្ញាតឱ្យពលរដ្ឋខ្លួនធ្វើដំណើរទៅបរទេស ខណៈខកខានអស់៣ឆ្នាំ ។ បច្ចុប្បន្ន ថៃបានលុបចោលការពិនិត្យប័ណ្ណចាក់វ៉ាក់សាំងដើម្បីសម្រួលដល់ការចូលប្រទេស ។ អាជ្ញាធរទេសចរណ៍ថៃសង្ឃឹមថា នឹងមានភ្ញៀវទេសចរអន្តរជាតិចូលមកកម្សាន្តក្នុងប្រទេសឆ្នាំនេះជាង២៥លាននាក់ ក្នុងនោះ គេរំពឹងថាភ្ញៀវទេសចរចិននឹងស្មើ៥លាននាក់ ។

រដ្ឋាករទឹកសូមណែនាំដល់ខាងសណ្ឋាគារ ភោជនីយដ្ឋាន និងទីកន្លែងទេសចរណ៍ផ្សេងៗគួរពិនិត្យមើល និងសម្អាតប្រព័ន្ធទឹកស្អាតឱ្យត្រូវតាមស្តង់ដារអនាម័យ ដោយលាងសម្អាតធុងទឹកជាប្រចាំ និងបិទគម្របធុងទឹកឱ្យជិតដើម្បីការពារធូលី សត្វល្អិតដែលទំហំតូចអាចធ្លាក់ចូលក្នុងទឹក ។

ការលិចជ្រាបទឹក ឬប្រព័ន្ធទឹកម៉ាស៊ីនខូច វាអាចជាមូលហេតុធ្វើឱ្យទឹកហូរខ្សោយ គួរតែជួសជុលឡើងវិញដើម្បីកសាងទំនុកចិត្ត និងចំណាប់អារម្មណ៍ពីភ្ញៀវទេសចរអន្តរជាតិចង់ធ្វើដំណើរមកលេងថៃ ។ ការមានទឹកស្អាតប្រើប្រាស់គ្រប់គ្រាន់នឹងជួយចែកចាយប្រាក់ចំណូលផ្នែកទេសចរណ៍ទៅកាន់ទីប្រជុំជនផ្សេងៗ និងជំរុញសេដ្ឋកិច្ចឱ្យរីកលូតលាស់យូរអង្វែង ៕ ប្រភព ៖ khaosod

ប្រទេសថៃកំពុងសម្លឹងមើលភ្ញៀវទេសចរបរទេស រហូតដល់ ៨០លាននាក់ក្នុងមួយឆ្នាំ នៅឆ្នាំ ២០២៧ ដែលជាចំនួនកើនឡើងពីរដង បើធៀបនឹងឆ្នាំ ២០១៩ ជាឆ្នាំផ្ទុះជំងឺរាតត្បាតកូវីដ១៩។

រដ្ឋមន្ត្រីក្រសួងទេសចរណ៍ថៃ លោក ហ្វីផាត រ៉ាត់ឆាគីត ប្រាកាន (Phiphat Ratchakitprakarn) បានកំណត់គោលដៅរយៈពេល ៥ ឆ្នាំ កាលពីថ្ងៃព្រហស្បតិ៍ ដោយមានបំណងបង្កើតប្រាក់ចំណូលប្រចាំឆ្នាំ ពីវិស័យទេសចរណ៍ ចំនួន ៥ ពាន់ពាន់លានបាត នៅឆ្នាំ ២០២៧ ដែលស្ទើរតែកើនឡើងបីដង នៃទំហំ ១.៩៣ ពាន់ពាន់លានបាត ដែលបង្កើតបានដោយសារតការមកដល់របស់ជនបរទេស ក្នុងឆ្នាំ ២០១៩។

នៅឆ្នាំ២០២៣នេះ ក្រសួងទេសចរណ៍ថៃរំពឹងថា នឹងឃើញភ្ញៀវទេសចរបរទេសយ៉ាងតិច ២៥ លាននាក់ចូលមកក្នុងប្រទេសថៃ ដែលជួយវិស័យនេះងើបឡើងវិញ កើនដល់ ៦០% នៃកម្រិតមុនការរាតត្បាត។

យោងតាមអាជ្ញាធរទេសចរណ៍ថៃ (TAT) បានឱ្យដឹងថា កាលពីឆ្នាំមុន មានភ្ញៀវទេសចរបរទេសចំនួន ១១.៨១ លាននាក់បានទៅទស្សនាប្រទេសថៃ។ ប្រភពបាបន្តថា ភ្ញៀវបរទេសភាគច្រើន កាលពីឆ្នាំមុន គឺមកពីម៉ាឡេស៊ី (១.៩៥លាននាក់) បន្ទាប់មកគឺឥណ្ឌា ឡាវ កម្ពុជា និងសិង្ហបុរី៕

ប្រភព៖ Nation Thailand

តុលាការជប៉ុនបាននិយាយថា ជនសង្ស័យបាញ់សម្លាប់អតីតនាយករដ្ឋមន្ត្រី Shinzo Abe ត្រូវបានចោទប្រកាន់ នៅថ្ងៃសុក្រ ទី១៣ ខែមករា បន្ទាប់ពីការត្រួតពិនិត្យផ្នែកចិត្តសាស្រ្តដ៏យូរបានរកឃើញថា លោកសមនឹងទទួលបានការកាត់ក្តី ហើយថែមទាំងប្រឈមនឹងទោសប្រហារជីវិត។

ជនជាប់ចោទ តេសូយ៉ា យ៉ាម៉ាហ្គាមី (Tetsuya Yamagami) ត្រូវបានឃុំខ្លួនភ្លាមៗ បន្ទាប់ពីអតីតនាយករដ្ឋមន្ត្រីជប៉ុន អាបេ ត្រូវបានបាញ់សម្លាប់ កាលពីខែកក្កដាឆ្នាំមុន ខណៈពេលកំពុងថ្លែងសុន្ទរកថាយុទ្ធនាការនៅទីក្រុងណារ៉ាភាគខាងលិច។

បុរសអាយុ៤២ ឆ្នាំរូបនេះបានចំណាយពេលជាច្រើនខែដើម្បីឆ្លងកាត់ការវាយតម្លៃផ្នែកវិកលចរិកដែលបានបញ្ចប់កាលពីដើមសប្តាហ៍នេះ ជាមួយនឹងការផ្ទេររបស់គាត់ទៅកាន់ស្ថានីយ៍ប៉ូលីស។

លោក Yamagami ប្រឈមមុខនឹងការចោទប្រកាន់ពីបទមនុស្សឃាត និងការបំពានច្បាប់គ្រប់គ្រងអាវុធ នេះបើតាមអ្នកនាំពាក្យតុលាការស្រុក Nara លោក កេនីឈីរ៉ូ ណូមូរ៉ា (Kenichiro Nomura)។ ដោយបន្ថែមថា លោកអាចប្រឈមមុខនឹងការកាត់ទោសប្រហារជីវិត៕

ប្រភព៖ Post.English

បរទេស៖ ស្ពាន Hussaini Hanging Bridge គឺជាស្ពានខ្សែពួរមួយក្នុងចំណោមស្ពានខ្សែពួរដែលមិនមានភាពច្បាស់លាស់ និងត្រូវបានគេស្គាល់ថាជាស្ពានគ្រោះថ្នាក់ជាងគេនៅភាគខាងជើងប្រទេសប៉ាគីស្ថាន។

ស្ពានខ្សែពួរនេះឆ្លងកាត់បឹង Borit នៅ Upper Hunza  នៃប្រទេសប៉ាគីស្ថាន ដោយស្ពាននេះត្រូវបានគេមើលឃើញថា ហាក់ដូចជាខ្វះការថែទាំ និងជួសជុលមិនបានល្អ និងគិតថាប្រសិនបើអ្នកបោះជំហានខុស អ្នកនឹងអាចមានគ្រោះថ្នាក់ ឬធ្លាក់ចូលទៅក្នុងទន្លេ Hunza ជាក់ជាមិនខាន ព្រោះស្ពាននេះមានលក្ខណៈញ័រ និងមិនមានលំនឹងត្រឹមត្រូវនោះឡើយ។

ទោះបីជាមានរូបរាងដ៏គ្រោះថ្នាក់យ៉ាងណាក៏ដោយ Hussaini គឺជាស្ពានដែលមានសុវត្ថិភាព ហើយបានក្លាយទៅជាកន្លែងទាក់ទាញទេសចរណ៍បំផុតមួយ ដោយមានអ្នកឡើងភ្នំបានសាកល្បង របស់ពួកគេ ខណៈដែលពួកគេធ្វើដំណើរដោយប្រុងប្រយ័ត្នក្នុងការឆ្លងកាត់វា។

យ៉ាងណាក៏ដោយសម្រាប់អ្នក ធ្លាប់ឡើងភ្នំ ពួកគេតែងតែចូលចិត្តសាកល្បងភាពក្លាហានរបស់ពួកគេ ដោយធ្វើដំណើរឆ្លងកាត់ស្ពាននេះជានិច្ច នៅពេលដែលពួកគេមកសម្សាន្តនៅទីនេះ។

យ៉ាងណាមិញស្ពាននេះគឺជាការច្នៃប្រឌិតសំណង់ដ៏ល្អបំផុតមួយក្នុងប្រវត្តិសាស្ត្រមនុស្សជាតិ ដោយពួកគេបានអនុញ្ញាតឱ្យបុព្វបុរសរបស់យើងអាចធ្វើដំណើរពីតំបន់មួយទៅតំបន់មួយទៀត ដោយមិនចាំបាច់ធ្វើដំណើរផ្លូវឆ្ងាយ ឬកាត់បន្ថយពេលវេលាបានយ៉ាងច្រើន ជាមួយនឹងស្ពានឆ្លងទឹកទន្លេបានយ៉ាងលឿនជាមុន។

ជាមួយគ្នានោះមានស្ពានចាស់ៗជាច្រើនដែលត្រូវបានអាជ្ញាធរក្នុងតំបន់ជួសជុលឡើងវិញ ហើយអ្នកទេសចរជាច្រើនមានការភ្ញាក់ផ្អើលនៅពេលដែលឃើញស្ពានចាស់ៗមួយចំនួននៅតែឈរ និងត្រូវបានប្រើប្រាស់ដោយអ្នកទេសចរ និងអ្នកដំណើរជាច្រើននៅតំបន់នោះ៕ ប្រភព៖atlasobscura

អន្តរជាតិ៖ ក្រុមអ្នកវិភាគបាននិយាយថា ការផ្លាស់ប្តូររបស់លោកប្រធានាធិបតី វ្ល៉ាឌីមៀ ពូទីន ដោយជំនួសមេបញ្ជាការកំពូលដើម្បីដឹកនាំសង្រ្គាមអ៊ុយក្រែននៅសប្តាហ៍នេះ គឺជាសញ្ញានៃភាពមិនចុះសម្រុងគ្នាខាងផ្នែកយោធា ហើយបង្ហាញថាលោកអស់ការអត់ធ្មត់នឹងកងទ័ពរុស្ស៊ីដែលមិនអាចយកឈ្នះសង្រ្គាមបាន។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី១៣ ខែមករា ឆ្នាំ២០២៣។

ថ្មីៗនេះក្រសួងការពារជាតិរុស្ស៉ីបានតែងតាំង លោក វ៉ាឡេរី ជឺរ៉ាស៉ីម៉ូវ (Valery Gerasimov) ជាអ្នកទទួលខុសត្រូវធ្វើសង្រ្គាមនៅអ៊ុយក្រែន ហើយមេបញ្ជាការចាស់ គឺលោក សឺហ្គៃ ស៊ូវូរីគីន នឹងក្លាយទៅជាអនុប្រធានរបស់ លោក ជឺរ៉ាស៉ីម៉ូវ វិញ ដែលត្រូវធ្វើការជាមួយឧត្តមសេនីយ៍ពីរនាក់ផ្សេងទៀត។ ក្រុមអ្នកសង្កេតការណ៍រុស្ស៊ី និងលោកខាងលិចបានលើកឡើងស្រដៀងគ្នាថា ទង្វើនេះគឺជាសញ្ញាមួយបង្ហាញថា លោក ពូទីន កាន់តែខឹងសម្បារចំពោះការតស៊ូរបស់អ៊ុយក្រែន ប៉ុន្តែក៏មានកំហុសនៅក្នុងចំណោមបញ្ជាការកងទ័ពរុស្ស៊ីផងដែរ ខណៈកំពុងប្រឈមនឹងការលំបាកក្នុងបំណងចង់ការបើកការវាយលុកដ៏ធំមួយលើអ៊ុយក្រែន ដែលអាចកើតមានក្នុងរយៈពេលប៉ុន្មានសប្តាហ៍ខាងមុខ។

គួរបញ្ជាក់ថា បើតាមក្រុមអ្នកវិភាគ ការដាក់មេទ័ពម្នាក់ឲ្យទទួលបន្ទុកប្រតិបត្តិការវាយប្រហារផ្លូវគោកគឺមិនមែនជារឿងធម្មតានោះទេ ព្រោះក្រៅពីក្នុងពីការដឹកនាំយុទ្ធសាស្រ្តនៅសមរភូមិហើយនោះ ក៏នៅមានកិច្ចការសម្របសម្រួល ទំនាក់ទំនងនយោបាយ ការវាយតម្លៃលើការគំរាមកំហែង និងគ្រប់គ្រងស្តុកអាវុធផងដែរ​ ៕

បរទេស៖ ក្រុមហ៊ុនអាកាសចរណ៍ឡាវ គ្រោងនឹងពង្រីកសេវាកម្មលើផ្លូវអាកាសចរជាច្រើនជាមួយប្រទេសចិន ដើម្បីស្វាគមន៍ សម្រាប់រដ្ឋាភិបាលទីក្រុងប៉េកាំងក្នុងការបើកប្រទេសឡើងវិញ។

ទីភ្នាក់ងារសារព័ត៌មានស៊ីនហួរ បានរាយការណ៍ពីទីក្រុងវៀងច័ន្ទ ប្រទេសឡាវ នៅថ្ងៃទី១៣ ខែមករា ឆ្នាំ២០២៣ ថាក្រុមហ៊ុនអាកាសចរណ៍ឡាវ ដែលជាក្រុមហ៊ុនអាកាសចរណ៍ជាតិរបស់ប្រទេសឡាវ បានប្រកាសផែនការបង្កើនសេវាហោះហើរបន្ថែម ក្នុងអំឡុងខែ កុម្ភៈ និង ខែមីនាខាងមុខនេះ ដើម្បីស្វាគមន៍ភ្ញៀវទេសចរចិនមកកាន់ប្រទេសឡាវ។

ការបង្កើន និងពង្រឹងសេវាហោះហើររវាងប្រទេសទាំងពីរនេះ គឺធ្វើឡើងបន្ទាប់ពីរដ្ឋាភិបាលក្រុងប៉េកាំងបានបន្ធូរបន្ថយវិធានការគ្រប់គ្រងកូវីដ -១៩ ស្ទើរតែទាំងអស់កាលពីថ្ងៃទី ៨ ខែមករា ឆ្នាំ២០២៣កន្លងទៅ។

ក្នុងនោះផងដែរលោក Nudang Chanthaphasuk នាយកពាណិជ្ជកម្មនៃក្រុមហ៊ុនអាកាសចរ Lao Airlines បាននិយាយថាក្រុមហ៊ុនអាកាសចរណ៍កំពុងរង់ចាំការឆ្លើយតបពីប្រទេសចិន អំពីការដាក់សំណើដើម្បីបន្ថែមជើងហោះហើរប្រចាំថ្ងៃ ពីទីក្រុងវៀងចន្ទន៍ ទៅទីក្រុងគុនមីង រាជធានីនៃខេត្តយូណាន និងទីក្រុងធំៗជាច្រើនទៀត រួមមាន Guangzhou, Shanghai, Chengdu, Changzhou និង Hangzhou ជាដើម។

គួររំលឹកផងដែរថាបច្ចុប្បន្នក្រុមហ៊ុនអាកាសចរណ៍ឡាវកំពុងដំណើរការជើងហោះហើរ ៣ ដងក្នុងមួយសប្តាហ៍ពីទីក្រុងវៀងច័ន្ទទៅកាន់ទីក្រុងគុនមីងនៃប្រទេសចិន។ លើសពីនេះក្រុមហ៊ុនអាកាសចរណ៍ឡាវគ្រោងនឹងបង្កើនចំនួនជើងហោះហើរបន្ថែម ពីហ្លួងព្រះបាង ដែលស្ថិតនៅខាងជើង និងចំប៉ាសាក់ នៅភាគខាងត្បូងនៃប្រទេសឡាវ ជាមួយនឹងគោលដៅជាច្រើននៅក្នុងប្រទេសចិនជាគោលដៅបន្ថែមទៀត៕ ប្រភព៖ Dailynews

បរទេស៖ រោងចក្រផលិតផ្លាស្ទិករបស់កូរ៉េខាងត្បូងមួយនៅក្នុងសួនឧស្សាហកម្ម Bac Ninh បានឆាបឆេះយ៉ាងសន្ធោសន្ធៅកាលពីថ្ងៃព្រហស្បតិ៍ម្សិលមិញនេះ ដែលបណ្ដាលឱ្យរោងជាង ៤,០០០ ម៉ែត្រការ៉េត្រូវបានដុតបំផ្លាញគ្មានសល់។

កាលពីថ្ងៃទី ១២ ខែមករា ឆ្នាំ២០២៣ កន្លងទៅនេះ មានសេចក្ដីការណ៍មួយបានឱ្យដឹងថា មានករណីអគ្គីភ័យឆាបឆេះនៅក្នុងក្រុមហ៊ុន Esd Korea Vina Co. មានទំហំ៤,០០០ ម៉ែត្រការ៉េ នៅខាងក្នុងសួនឧស្សាហកម្ម Bac Ninh ក្នុងខេត្តភាគខាងជើងនៃប្រទេសកូរ៉េ។

បើតាមប្រភពបានឱ្យដឹងថាករណីឆាបឆេះនេះចាប់ផ្តើមនៅម៉ោងប្រហែលម៉ោង ៣ និង ៣០ នាទីព្រឹកឈានចូលថ្ងៃព្រហស្បតិ៍ម្សិលមិញនេះ។

ជាមួយគ្នានោះបើតាមការឱ្យដឹងរបស់សាក្សីដែលធ្វើការនៅក្នុងក្រុមហ៊ុនក្បែរនោះបាននិយាយថា បានលឺសំលេងមនុស្សស្រែកខណៈ និងមានកម្មករជាច្រើននាក់រត់ចេញពីក្នុងរោងចក្រ។

ដំបូងឡើយគេឃើញភ្លើងឆេះនៅជ្រុងតូចមួយនៃឃ្លាំង ប៉ុន្តែវាក៏បានគ្របដណ្ដប់លើអគារសិក្ខាសាលាទាំងមូលបន្ទាប់ពីរយៈពេល ២០ នាទី ព្រោះតែមានខ្យល់បក់ខ្លាំងធ្វើឱ្យភ្លើងឆេះរាលដាលកាន់តែ លឿន ។

បន្ទាប់ពីហេតុការកើតឡើង រថយន្តពន្លត់អគ្គិភ័យជាង១០០គ្រឿង និងរថយន្តពន្លត់អគ្គិភ័យ១៤គ្រឿង ត្រូវបានបញ្ជូនមកកាន់កន្លែងកើតហេតុ ដើម្បីពន្លត់ភ្លើង ហើយមកដល់ម៉ោង៨ព្រឹក ផ្សែងខ្មៅនៅតែហុយចេញពីកណ្តាលរោងចក្រ ក្រុមអ្នកពន្លត់អគ្គីភ័យបានព្យាយាមចូលទៅដល់ទីតាំងពីគ្រប់ទិសទី ដើម្បីពន្លត់ភ្លើង។

រោងចក្រទាំងមូលត្រូវបានឆាបឆេះទាំងស្រុងដោយដំបូលស័ង្កសីខូចទ្រង់ទ្រាយ ដោយសារភ្លើង ហើយរាល់ផលិតផលខាងក្នុងត្រូវបានបំផ្លាញដូចគ្នា។ តែសំណាងល្អគ្មានសេក្ដីរាយការណាមួយបញ្ជាក់ពី រងរបួស ឬរងគ្រោះក្នុងអគ្គីភ័យនោះឡើយ ក្រុមអ្នកស៊ើបអង្កេតកំពុងស្វែងរកការពិតនៃមូលហេតុបណ្ដាលឱ្យមានភ្លើងឆាបឆេះ៕ ប្រភព៖ E.vnexpress

អន្តរជាតិ៖ ក្រុមហ៊ុនផលិតសព្វាវុធធំៗរបស់លោកខាងលិចដែលពាក់ព័ន្ធនឹងការផ្គត់ផ្គង់យោធាដល់អ៊ុយក្រែនរកបានប្រាក់ចំណូល ១២៤ពាន់លានដុល្លារកាលពីឆ្នាំ២០២២។

វិស័យឧស្សាហកម្មយោធា និងការពារជាតិដ៏ធំបំផុតនៃរដ្ឋសមាជិកណាតូ បានឃើញតម្លៃទីផ្សាររបស់ពួកគេកើនឡើង ២១.៥ភាគរយ នៅឆ្នាំ២០២២ ចំពេលមានជម្លោះអូសបន្លាយក្នុងប្រទេសអ៊ុយក្រែន និងប្រតិបត្តិការជួសជុលអាវុធដ៏ខ្លាំងក្លានៅអឺរ៉ុបខាងលិច។

គេហទំព័រ ឌីហ្វេន ញ៉ូវ (Defense News) និង ត្រាដីងវីញ៉ូវ (Tradingview) បានផ្សាយថា តាមការប៉ាន់ប្រមាណថាមូលធននីយកម្មទីផ្សាររួមនៃសាជីវកម្មបានកើនឡើងពី ៥៧៩ ពាន់លានដុល្លារក្នុងខែធ្នូ ឆ្នាំ២០២១ កើន ដល់៧០៣ពាន់លានដុល្លារក្នុងខែធ្នូ ឆ្នាំ២០២២។

ចំណាត់ថ្នាក់នេះរួមមានក្រុមហ៊ុនចំនួន ២៥ ដែលមានមូលធនប័ត្រទីផ្សារជាង ១ពាន់លានដុល្លារដែលត្រូវបានជួញដូរនៅលើទីផ្សារភាគហ៊ុន និងមានផលិតផលយោធាគ្របដណ្តប់លើប្រាក់ចំណូលរបស់ពួកគេ ក៏ដូចជាឈ្មោះដែលកំពុងចូលរួមយ៉ាងសកម្មក្នុងការផ្គត់ផ្គង់អាវុធដល់អ៊ុយក្រែន។

អ្នកនិពន្ធនៃរបាយការណ៍បានដាក់ឈ្មោះក្រុមហ៊ុនផលិតអាវុធអាល្លឺម៉ង់ រ៉ែនមេថល (Rheinmetall) ជាក្រុមហ៊ុនដែលមានការកើនឡើងតម្លៃទីផ្សារខ្ពស់បំផុតក្នុងរយៈពេល ១២ខែចុងក្រោយនេះ ជាមួយនឹងការកើនឡើងតម្លៃភាគហ៊ុន ១២២ភាគរយ ។

ក្រុមហ៊ុនផលិតដ្រូន និងរ៉ុក្កែតរបស់បារាំងឈ្មោះ ថាលេស (Thales) បានឃើញការកើនឡើង ៥៤ភាគរយ នៅក្នុងតម្លៃទីផ្សារ។ក្រុមហ៊ុនម៉ៅការការពារជាតិអាមេរិក ណតរ៉ូប គ្រូមែន (Northrop Grumman) បានកើនឡើង ៤៤ភាគរយ ខណៈដែលភាគហ៊ុននៃក្រុមហ៊ុនផលិតឧបករណ៍បាញ់រ៉ុក្កែត ហ៊ឺម៉ាស់ ឡុកហេដ ម៉ាទីន (HIMARS Lockheed Martin) បានកើនឡើង៤២ភាគរយ ៕