ខេត្តបន្ទាយមានជ័យ៖ អាជ្ញាធរខេត្តបន្ទាយមានជ័យ ដឹកនាំដោយលោក លី សារី អភិបាលរងខេត្ត សមត្ថកិច្ចនគរបាល មន្ត្រីកងរាជអាវុធហត្ថ និងមន្ត្រីអាជ្ញាធរក្រុងសិរីសោភ័ណ ចុះត្រួតពិនិត្យទីតាំងដីក្រុមហ៊ុន KP MORN DANY Land & House ឬ ម៉ន ដានី លក់ដីឡូតិ៍ នៅផ្លូវជាតិលេខ៥ ក្នុងសង្កាត់ទឹកថ្លា ក្រុងសិរីសោភ័ណ និងភូមិសាលាក្រហម ឃុំសំរោង ស្រុកអូរជ្រៅ ដែលបន្តសកម្មភាពលក់ដីឡូតិ៍ល្មើសច្បាប់ ខណៈអាជ្ញាធរបានឱ្យផ្អាកសកម្មភាព…។

លោក លី សារី អភិបាលរងខេត្ត បានឱ្យដឹងថា មូលហេតុដែលអាជ្ញាធរចុះទៅត្រួតពិនិត្យ និងហាមឃាត់ក្រុមហ៊ុន KP MORN DANY Land & House ឬ ម៉ន ដានី លក់ដីឡូតិ៍ នាពេលនេះ ក៏ព្រោះតែអាជ្ញាធររដ្ឋបាលខេត្តមើលឃើញថា ក្រុមហ៊ុននៅតែបន្តសកម្មភាពលក់ដីឡូតិ៍ ដែលអាជ្ញាធរបានហាមឃាត់ ព្រោះតែដីទាំងនោះ អត់ទាន់មានច្បាប់ត្រឹមត្រូវ ដែលអាចបង្កហានិភ័យ និងគ្រោះថ្នាក់ដល់អតិថិជន..។

លោកអភិបាលរងខេត្ត បញ្ជាក់ថា មូលហេតុដែលលោកចុះទៅត្រួតពិនិត្យនោះ គឺបន្ទាប់ពីក្រុមហ៊ុន បានស្នើសុំមករដ្ឋបាលក្រុង-ខេត្តដឹកដីយកទៅចាក់នៅក្នុងគម្រោងដីឡូតិ៍នោះ ហើយអាជ្ញាធរបានរកឃើញភាពមិនប្រក្រតីមួយចំនួនដូចជា៖ ទី១. លិខិតស្នើសុំចាក់ដីរបស់ឈ្មោះម៉ន ដានី ជាម្ចាស់ក្រុមហ៊ុន ស្នើសុំអនុញ្ញាតច្បាប់បំពេញអាចម៍ដីកម្មសិទ្ធិឯកជន (ចាក់ដី) ហើយ មិនទាន់មានលិខិតអនុញ្ញាត ប៉ុន្តែបានធ្វើសកម្មភាពចាក់ដី សង់សំណងផ្សេងៗ និងបានផ្សព្វផ្សាយពីអាជីវកម្មលក់ដី លំនៅឋាន និងផ្ទះវិឡា។ ទី២. យោងលិខិតរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត។ ទី៣. ពិនិត្យលើឯកសារដី មានឈ្មោះផ្សេងៗ និងមិនមានលិខិតអនុញ្ញាតនៅឡើយ ។

លោកអភិបាលរងខេត្ត បានឱ្យដឹងបន្តថា ក្នុងនាមជាអាជ្ញាធររដ្ឋបាលខេត្ត លោកមានក្ដីសោមនស្សចំពោះក្រុមហ៊ុនមួយចំនួន ដែលមានបំណងចង់មកបណ្តាក់ទុនវិនិយោគលើទឹកដីខេត្តភាគខាងលិចនេះ ប៉ុន្តែក្រុមហ៊ុនវិនិយោគទាំងអស់ ក៏ត្រូវគោរពច្បាប់របស់ប្រទេសកម្ពុជាដែរ មិនអាចធ្វើអ្វីមួយបំពានច្បាប់ឡើយ។ ដូច្នេះ ក្នុងនាមជាអាជ្ញាធរដែនដី គឺមានតែហាមឃាត់ ប្រសិនបើរកឃើញថា ក្រុមហ៊ុនណាមួយមិនគោរពច្បាប់ដែលកំពុងនៅជាធរមាននោះ។ ក្រោយពីភាក្សាជាមួយក្រុមមន្ត្រីជំនាញពាក់ព័ន្ធ ក្រុមការងារបានឯកភាពលើការចុះពិនិត្យស្ថានភាពទូទៅរបស់ក្រុមហ៊ុនខាងលើ ដោយការចុះធ្វើអធិការកិច្ចលើបច្ចេកទេសសំណង់ផ្ទះល្វែង ផ្ទះវីឡា របស់បុរី ម៉ន ដានីនេះតែម្ដង។ ម៉្យាង ម្ចាស់បុរី បានព្យាយាមគេចវេះ មិនចូលខ្លួនមកសហការ ឬដោះស្រាយជាមួយអាជ្ញាធរ ដោយទុកឱ្យតែបុគ្គលិកបម្រើការងារធម្មតាក្នុងក្រុមហ៊ុន ចេញមកជួប ដែលសកម្មភាពនេះ គឺជាការមើលស្រាលអាជ្ញាធរដែនដី។

ដោយឡែក លោក ឡុង វុធ អនុប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី បានឱ្យដឹងថា អាជ្ញាធរមន្ទីរ បានជូនដំណឹងដល់ម្ចាស់ក្រុមហ៊ុនរួចហើយ ពីការហាមឃាត់មិនឱ្យធ្វើសកម្មភាព ប៉ុន្តែក្រុមហ៊ុននេះ មិនគោរពតាមការណែនាំរបស់អាជ្ញាធរទេ។ ចំណែកពេលអាជ្ញាធរចុះមកត្រួតពិនិត្យ និងហាមឃាត់លើកទី១ គឺភាគីក្រុមហ៊ុនបញ្ជាក់ថា ក្រុមហ៊ុនកំពុងរត់ការ ហើយក៏ចាប់ផ្តើមធ្វើសកម្មភាពបណ្តើរៗដែរ ដើម្បីទុបទល់លើការខាតបង់នៃការចំណាយទៅលើបុគ្គលិកទៅវិញ។ ចំណែកប្រជាពលរដ្ឋដែលបានជ្រុលខ្លួនទិញដីឡូតិ៍ ទិញផ្ទះល្វែង ឬផ្ទះវីឡា កំពុងព្រួយបារម្ភពីការខាតបង់ប្រាក់កាសរបស់ខ្លួន ក្រោយពេលដឹងថា ក្រុមហ៊ុនKP MORN DANY Land & House ឬ ម៉ន ដានី លក់ដីឡូតិ៍ ធ្វើអាជីវកម្មគ្មានច្បាប់អនុញ្ញាតបែបនេះ…៕

ភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ ជំរុញក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណការនិងដឹកជញ្ជូន ឱ្យពន្លឿនការសិក្សាគម្រោងសាងសង់ផ្លូវរថភ្លើងល្បឿនលឿន ពីរាជធានីភ្នំពេញទៅខេត្តព្រះសីហនុ និងផ្លូវរថភ្លើងល្បឿនលឿនពីរាជធានីភ្នំពេញទៅក្រុងប៉ោយប៉ែត ដោយអភិវឌ្ឍន៍លើផ្លូវរថភ្លើងដែលមានស្រាប់ ដើម្បីបម្រើឱ្យវិស័យដឹកជញ្ជូនកាន់តែសម្បូរបែប ជំរុញកំណើនសេដ្ឋកិច្ច-សង្គមកម្ពុជាឱ្យកាន់តែរីកចម្រើន បង្កើនប្រាក់ចំណូល និងលើកកម្ពស់ជីវភាពប្រជាជន។

បើតាមសេចក្ដីប្រកាសព័ត៌មាន ស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីចេញផ្សាយ ព្រលប់ថ្ងៃទីថ្ងៃទី១៣ ខែមករា ឆ្នាំ២០២៣ ក៏បានឱ្យដឹងដែរថា ក្នុងកិច្ចប្រជុំនោះ សម្ដេចតេជោ លើកទឹកចិត្តឱ្យក្រសួងស្ថាប័នពាក់ព័ន្ធនិងវិស័យឯកជន ជំរុញការអភិវឌ្ឍផលិតកម្មនិងការកែច្នៃផលិតផលកសិកម្មឬកសិឧស្សាហកម្ម មានជាអាទិ៍ ស្រូវ កៅស៊ូ ដំឡូងមី និងស្វាយចន្ទី ជាដើម ដើម្បីបង្កើនតម្លៃបន្ថែម និងពង្រីកទីផ្សារនៃការនាំចេញ។

ទន្ទឹមនេះដែរ សម្ដេចតេជោនាយករដ្ឋមន្ត្រី បានសម្រេចផ្ដល់ដី និងផ្ទះដែលជាទ្រព្យសម្បត្តិរដ្ឋ ដែលលោក គង់ គាំ បានស្ម័គ្រចិត្តប្រគល់ត្រឡប់ជូនក្រសួងការបរទេសនិងសហប្រតិបត្តិការអន្តរជាតិវិញ ទៅឱ្យគណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីប្រើប្រាស់ធ្វើជាទីស្នាក់ការរបស់ គណៈកម្មាធិការជាតិរៀបចំការបោះឆ្នោត៕

ភ្នំពេញ៖ ជនសង្ស័យជាលោក សង្ឃក្លែងក្លាយចំនួន ០៧នាក់ និងអ្នកបេីកបររថយន្តចំនួន ១នាក់ ត្រូវបានកម្លាំងនៃអធិការដ្ឋាននគរបាលខណ្ឌពោធិ៍សែនជ័យឃាត់ខ្លួន ។

ការឃាត់ខ្លួននេះបានធ្វើឡើងនៅថ្ងៃទី១៣ ខែមករា ឆ្នាំឲ២០២៣ វេលាម៉ោង១១:៣០នាទីព្រឹក ស្ថិតនៅភូមិព្រៃ ជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

វត្ថុតាំងដកហូតរួមមាន ៖ បាតសំរាប់បិណ្ឌដាក់បាយចំនួន៧គ្រឿង ,ស្បង់ ជីវមួយចំនួន និង សម្ភារៈមួយចំនួន ទៀត ។

បច្ចុប្បន្ន ជនសង្ស័យខាងលើ កំពុងឃាត់ខ្លួននៅអធិការ ដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕

ភ្នំពេញ ៖ អគ្គនាយកដ្ឋានកៅស៊ូបានឲ្យថឹងថា នៅឆ្នាំ២០២២ កម្ពុជារកចំណូលបានជាង ៥៣១លានដុល្លារ ពីការនាំចេញជ័រកៅស៊ូ និងឈើកៅស៊ូ។

យោងតាមរបាយការណ៍ របស់អគ្គនាយកដ្ឋានកៅស៊ូ បានឲ្យថឹងថា បរិមាណនាំចេញជ័រកៅស៊ូ និងឈើកៅស៊ូ នៅឆ្នាំ២០២២ មានការកើនឡើង ប៉ុន្ដែចំណូលថយចុះ ដោយសារតម្លៃលក់ជ័រកៅស៊ូធ្លាក់ចុះប្រមាណ ២២៥ដុល្លារក្នុង១តោន បើធៀបនឹងឆ្នាំ២០២១។

របាយការណ៍បានបញ្ជាក់ថា ចំណូលសរុបឆ្នាំ២០២២ ពីការនាំចេញជ័រកៅស៊ូ និងឈើកៅស៊ូ មានចំនួន ៥៣១,៨៦៣,៨៤២ដុល្លារ ក្នុងនោះចំណូលពីការនាំចេញជ័រកៅស៊ូ ចំនួន ៥២៧,៧៧៤,៥៦៩ដុល្លារ និងចំណូលពីការនាំចេញឈើកៅស៊ូ ចំនួន ៤,០៨៩,២៧៣ដុល្លារ។

ចំពោះបរិមាណ នៃការនាំចេញនៅឆ្នាំ២០២២ កម្ពុជាបាននាំចេញជ័រកៅស៊ូចំនួន ៣៧២,៩០០តោន បានកើនឡើងចំនួន ៦,៦០០តោន ស្មើនឹង២% ធៀបនឹងរយៈពេលដូចគ្នានៃឆ្នាំមុន។ រីឯការនាំចេញឈើកៅស៊ូវិញ សម្រេចបានចំនួន ២៦,៤៨៩ម៉ែត្រគូប។

បើតាមរបាយការណ៍ របស់អគ្គនាយកដ្ឋានកៅស៊ូ បានគូសបញ្ជាក់ថា សម្រាប់តម្លៃលក់ជ័រកៅស៊ូមធ្យម នៅឆ្នាំ២០២២ ថ្លៃ ១,៤១៥ដុល្លារ ក្នុងមួយតោន បានថយចុះចំនួន២២៥ដុល្លារ ក្នុងមួយតោន ស្មើនឹង១៤% ធៀបនឹងរយៈពេលដូចគ្នានៃឆ្នាំមុន។

គិតត្រឹមឆ្នាំ២០២២ ផ្ទៃដីកៅស៊ូសរុបមានចំនួន ៤០៤,៥៧៨ហិកតា ក្នុងនោះ ផ្ទៃដីចៀរជ័រមានចំនួន ៣១៥,៣៣២ហិកតា ស្មើនឹង៧៨% និងផ្ទៃដីថែទាំមានចំនួន ៨៩,២៤៦ហិកតា ស្មើនឹង២២%។

គូសបញ្ជាក់ថា ឆ្នាំ២០២១ កម្ពុជារកចំណូលបានជាង៦១១លានដុល្លារ ពីការនាំចេញជ័រកៅស៊ូ និងឈើកៅស៊ូ។ ក្នុងនោះ នាំចេញជ័រកៅស៊ូ ចំនួន ៣៦៦,៣០០តោន និងនាំចេញឈើកៅស៊ូ ចំនួន៦,២៩២ ម៉ែត្រគូប៕

ចង់​មាន​ទម្លាប់​ថ្មី ពេល​ខ្លះ​មិន​ស្មុគស្មាញ​ទេ តែ​តម្រូវ​​ឲ្យ​អ្នក​មាន​ការ​តាំង​ចិត្ត​ទៀង​ទាត់​ ព្រម​ទាំង​ដឹង​ពី​យុទ្ធសាស្រ្ត​ដើម្បី​សម្រេច​គោល​ដៅ​មួយ​នេះ។

១ អ្នកគួរចាប់ផ្តើមពីទម្លាប់តូចៗសិន

ជំនួស​ឲ្យ​ការ​បង្ខំ​ខ្លួន​ឯង​នៅ​ដំណាក់​ដំបូង អ្នក​អាច​ចាប់​ផ្តើម​ពី​ចំណុច​តូច​ៗ​សិន។ ឧ៖​អ្នក​ចង់​ផ្លាស់​ប្តូរទម្លាប់​គេង​យឺត ដោយ​ចង់​ក្រោក​ពី​គេង​នៅ​ម៉ោង​៦ព្រឹក។ ​អ្នក​មិន​បាច់​ត្រូវ​បង្ខំ​ខ្លួន​ឯង​ក្រោក​ម៉ោង​៥ព្រឹក​នោះ​ទេ ដោយ​ចាប់​ផ្តើម​ដាក់​ម៉ោង​រោទិ៍​ត្រឹម​ម៉ោង​៥:៥០ សិន។ ទម្លាប់​បែប​នេះ​បាន​មួយ​អាទិត្យ បន្ទាប់​មក​ ចាំ​រំកិល​មក​ម៉ោង​៥​កន្លះ ​ហើយ​កាន់​តែ​រំកិល​មក​ត្រឹម​ម៉ោង​៥​ព្រឹក​វិញ។ ធ្វើ​បែប​នេះ ​ជួយ​អ្នក​​រក្សា​បាន​នូ​ទម្លាប់​ល្អ​ដោយ​សន្តិភាព​​និង​មិន​ធ្វើបាប​ខ្លួន​ឯង​ពេក។

២ បង្កើន​ទម្លាប់​បន្តិចម្តងៗ តែនៅតែជាជំហានតូច

រាល់​ថ្ងៃ ​អ្នក​គ្រាន់​តែ​​ត្រូវ​ការ​សមិទ្ធិផល ១%​នៃ​គោលដៅ​ជាក់​លាក់​របស់​អ្នក។ ការ​បង្កើត​ទម្លាប់​ថ្មី មិន​ថា​ធំ​ឬ​តូច ​គួរ​តែ​បង្កើន​ម្តង​មួយ​ជំហាន​ៗ ​មិន​មែន​ប្រញាប់។ ​ម្យ៉ាង​ទៀត ​នៅពេល​អ្នក​ធ្វើ​បាន​សម្រេច វា​ជា​អាវុធ​ដ៏​មាន​ថាមពលជម្រុញ​ឲ្យ​អ្នក​ចង់​បន្ត​ជំហាន​មួយ​បន្ទាប់​ទៀត។ ​ឧ៖ ​អ្នក​ធ្លាប់​ចំណាយ​ពេល​លេង​ទូរសព្ទ​​មុន​ចូល​គេង​ដល់​ទៅ​៣​ម៉ោង ​តែ​អ្នក​អាច​កាត់​បន្ថយមក​ត្រឹម​១​ម៉ោង​មុន​ចូល​គេង​វិញ។

៣ ​ប្រសិន​បើ​អ្នក​ល្មើស​វិន័យ ឆាប់​ត្រលប់​មក​វិញ

សូម្បី​តែ​មនុស្ស​ជោគជ័យ​ម្នាក់ ក៏​ពិបាក​នឹង​មិន​សាង​កំហុស​ដែរ ដូច្នេះ​កុំ​ថា​ឡើយ​នៅពេល​អ្នក​ចាប់​ផ្តើម​ទម្លាប់​អ្វី​ថ្មី​នៅ​ពេល​ដំបូងៗ។ ​ម្ល៉ោះហើយ ​អ្នក​​ត្រូវ​ឆាប់​ភ្ញាក់​ខ្លួន ​ហើយ​ទាញ​ខ្លួន​ឯង​មក​វិញ ​នៅពេល​ដឹង​ថា​ខ្លួន​បាន​ល្មើស​វិន័យ​ដែល​បាន​កំណត់។ ​កុំ​បន្ត​ពន្យាពេល​ម្តង​ហើយ​ម្តង​ទៀត កុំ​អនុញ្ញាត​ឲ្យ​ទម្លាប់​អាក្រក់​ត្រលប់​មក​ម្តង​​ហើយ​ម្តង​ទៀត ខណៈ​ដែល​អ្នក​កំពុង​ពង្រឹង​ខ្លួន​ឯង​ឲ្យ​ល្អ​ជាង​មុន៕