សហរដ្ឋអាមេរិក ៖ ការិយាល័យសុវត្ថិភាព និងសុខភាពការងារ The Occupational Safety and Health Administration (OSHA) ស្ថិតក្រោមក្រសួងការងាររបស់អាមេរិក បញ្ជាក់ថា Amazon មិនបានគិតពីសុវត្ថិភាព និងសុខភាពបុគ្គលិកផ្នែកឃ្លាំងទំនិញរបស់ខ្លួនទេ ។

ការិយាល័យសុវត្ថិភាព និងសុខភាពការងារបានបញ្ជាក់នៅក្នុងលិខិតដែលផ្ញើទៅកាន់ Amazon ថា បុគ្គលិកដែលបំពេញតួនាទីលើកដាក់ទំនិញក្នុងឃ្លាំងប្រចាំទីក្រុងឌេលថូណា រដ្ឋផ្លរីដា, ទីក្រុងវ៉ាគីហ្គិន រដ្ឋអ៊ីលីណយ និងទីក្រុងនីវវិនឌ័រ រដ្ឋញូវយ៉ក មានគ្រោះថ្នាក់ដោយសារឈឺចាប់ពេលការបំពេញការងារ ជាពិសេស បរិវេណខ្នង និងជំងឺផ្សេងទៀតដែលពាក់ព័ន្ធនឹងឆ្អឹងខ្នង ដោយសារតែការងារតម្រូវឱ្យពួកគេធ្វើឱ្យបានរហ័ស ជាជាងគិតពីសុវត្ថិភាព ។ មូលហេតុដែលបណ្តាលឱ្យបុគ្គលិកឈឺចុកចាប់នេះ គឺដោយសារការលើកដាក់ទំនិញធ្ងន់ និងរយៈពេលបំពេញការងារ ។

លោក Doug Park មន្ត្រីការិយាល័យសុវត្ថិភាព និងសុខភាពការងារ ចង្អុលបង្ហាញថា បើទោះជា Amazon តម្រូវឱ្យការបញ្ជូនទំនិញទៅកាន់អតិថិជនបានឆាប់រហ័ស និងមានប្រសិទ្ធភាពក្តី ប៉ុន្តែ Amazon បែរជាមិនចាប់អារម្មណ៍ពីសុវត្ថិភាព និងសុខភាពរបស់បុគ្គលិក ។ ការិយាល័យសុវត្ថិភាពបញ្ជាក់ថា បានស្នើឱ្យមានការផាកពិន័យ Amazon ក្នុងទឹកប្រាក់ជាង៦ម៉ឺនដុល្លារអាមេរិកសម្រាប់ការមិនគោរពសិទ្ធបុគ្គលិក ។

ចំណែកក្រុមហ៊ុន Amazon បានសម្តែងការមិនយល់ស្របនឹងការចោទប្រកាន់ខាងលើ ហើយនិយាយថា ក្រុមហ៊ុនព្រមរួមសហការ ប៉ុន្តែការចោទប្រកាន់នេះមិនមែនជាការពិតទេ ពាក់ព័ន្ធនឹងសុវត្ថិភាពបុគ្គលិកធ្វើការក្នុងឃ្លាំងទំនិញ ។ Amazon និយាយថា ក្រុមហ៊ុនបានកាត់បន្ថយអត្រារងរបួសរបស់បុគ្គលិកជិត១៥%ហើយ ក្នុងចន្លោះពីឆ្នាំ២០១៩ ដល់ឆ្នាំ២០២១ ។ លើសពីនេះ ក្រុមហ៊ុនបានប្រើវិធីសាស្ត្រកាត់បន្ថយហានិភ័យនានាផងដែរ និងដាស់តឿនឱ្យបុគ្គលិកឈប់សម្រាក និងផ្លាស់ប្តូរគ្នាធ្វើការ ។

ទោះយ៉ាងណា ពេលមុននេះ បុគ្គលិករបស់ Amazon ធ្លាប់បានផ្តល់បទសម្ភាសន៍ថា ក្រុមហ៊ុនប្រើឱ្យពួកគេធ្វើការធ្ងន់ ហើយតាមដានការងារគ្រប់ពេលផងដែរ ៕

ប្រភព ៖ beartai BRIEF

រដ្ឋធានីជេរូសាឡឹម៖ ស្របពេលស្ថានការណ៍ កាន់តែមានភាពតានតឹងខ្លាំងឡើង នៅតំបន់មជ្ឈិមបូព៌ានោះ កងទ័ពសហរដ្ឋអាមេរិក និង អ៊ីស្រាអែល បានបញ្ចេញយន្ដហោះប្រយុទ្ធ យន្ដហោះទម្លាក់គ្រាប់បែកនុយក្លេអ៊ែរ យន្ដហោះគ្មានមនុស្សបើកឬដ្រូន និង នាវាមុជទឹកដ៏ធំសម្បើម បង្ហាញសាច់ដុំដ៏ខ្លាំងក្លា មានគោលដៅគំរាមកំហែង ទៅលើប្រទេសអ៊ីរ៉ង់ និង គូប្រជែងរបស់ខ្លួន។

សារព័ត៌មាន The Eurasia Times បានផ្សាយ ថា ក្រសួងការពារជាតិអ៊ីស្រាអែល និង បញ្ជាការកណ្ដាលរបស់សហរដ្ឋអាមេរិក ហៅកាត់ CENTCOM បានចាប់ផ្ដើមធ្វើសមយុទ្ធយោធារួមគ្នាដ៏ធំមួយ អស់រយៈពេលជាច្រើនថ្ងៃកន្លងមកនេះ នៅលើដែនអាកាសរបស់ប្រទេសអ៊ីស្រាអែល និង នៅភាគខាងកើត សមុទ្រមេឌីទែររ៉ាណេ (Mediterranea)។ សមយុទ្ធយោធានេះ នឹងត្រូវបញ្ចប់ នៅថ្ងៃទី២៧ ខែមករា ដោយមានការចូលរួម ពីយន្ដហោះចម្បាំង ចំនួន១៤០គ្រឿង នាវាចម្បាំងចំនួន១២គ្រឿង និង ប្រព័ន្ធកាំភ្លើងធំរាប់សិបគ្រឿងរបស់កងទ័ព នៃប្រទេសទាំង២។

ទីបញ្ជាការកណ្ដាលរបស់កងទ័ពសហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍មួយ ថា នៅក្នុងចំណោមយន្ដហោះទាំង១៤០គ្រឿងនោះ ដែលយន្ដហោះ ចំនួន១០០គ្រឿង រាប់បញ្ចូលទាំង យន្ដហោះទម្លាក់គ្រាប់បែកយុទ្ធសាស្រ្ដហោះចម្ងាយឆ្ងាយ ប្រភេទ B-52 ចំនួន៤គ្រឿង យន្ដហោះបំបាំងកាយដ៏ទំនើប ប្រភេទ F-35 ចំនួន៤គ្រឿង យន្ដហោះប្រដេញ ប្រភេទ F/A-18 ចំនួន៤៥គ្រឿង និង យន្ដហោះគ្មានមនុស្សបើក ឬ ដ្រូនដ៏ទំនើបហោះហើរចម្ងាយឆ្ងាយ ប្រភេទ MQ-9 Reaper ចំនួន២គ្រឿង ដែលមកពីកងទ័ពរបស់សហរដ្ឋអាមេរិក។ ក្រៅពីនេះ ក៏មានយន្ដហោះប្រយុទ្ធ ឬ ប្រដេញ ប្រភេទ F-15, F-16 យន្ដហោះដឹកជញ្ជូនយោធា ប្រភេទ AC-130 ឧទ្ធម្ភាគចក្រ ប្រភេទ Apache (អាប៉ាជេ) យន្ដហោះសង្គ្រោះ និង យន្ដហោះចាក់ប្រេងឥន្ធនៈ ចូលរួមផងដែរ។

បើតាមមន្រ្ដីជាន់ខ្ពស់មួយរូបរបស់ក្រសួងការពារជាតិសហរដ្ឋអាមេរិក បានអះអាង ថា ការធ្វើសមយុទ្ធយោធាដ៏ធំសម្បើមមួយនេះ មានន័យ ចង់ផ្ញើសារដ៏សំខាន់មួយ ទៅកាន់ប្រទេសអ៊ីរ៉ង់ និង ដៃគូប្រជែងផ្សេងៗទៀត ថា ក្រុងវ៉ាស៊ីនតោន មិនបានរវល់ខ្វាយច្រើនខ្លាំងពេក ជាមួយនឹងការលុកលុយរបស់រុស្ស៊ី ទៅលើប្រទេសអ៊ុយក្រែន ក៏ដូចជា ការគំរាមកំហែងរបស់ចិន នៅក្នុងការប្រមូលផ្តុំកម្លាំងយោធា ដែលមានទំហំប៉ុនណានោះឡើយ។

ទីបញ្ជាការកណ្ដាលរបស់កងទ័ពសហរដ្ឋអាមេរិក បានសង្កត់ធ្ងន់ ថា ការធ្វើសមយុទ្ធយោធាដ៏ធំមួយនេះ មានគោលបំណងបង្កើននូវការត្រៀមខ្លួនរួចជាស្រេច សម្រាប់កងទ័ពសហរដ្ឋអាមេរិក និង អ៊ីស្រាអែល ទាំងមូល ហើយក៏ជាបង្ហាញនូវសមត្ថភាពរបស់ពួកគេ ដើម្បីធ្វើកិច្ចសហប្រតិបត្ដិការ និង បង្កើនស្ថិរភាព នៅក្នុងតំបន់។

លោកឧត្ដមសេនីយ៍ មីឆែល គូរីលឡា (Michael Kurilla) មេបញ្ជាការ CENTCOM បានកត់សម្គាល់ ថា សមយុទ្ធនេះ ពង្រឹងសមត្ថភាពរបស់កងទ័ព នៃប្រទេសទាំងពីរ នៅក្នុងការឆ្លើយតបទៅនឹងភាពអាសន្ន និង បង្ហាញ អំពីការប្តេជ្ញាចិត្តរបស់ពួកគេ សម្រាប់តំបន់មជ្ឈិមបូព៌ា។ កងទ័ពទាំងនេះ នឹងអនុវត្តនូវបទបញ្ជា និង ការគ្រប់គ្រងរួមគ្នា ទាំងប្រតិបត្តិការតាមផ្លូវអាកាស នៅក្នុងសង្គ្រាមលើផ្ទៃសមុទ្រ ការស្វែងរក និងការជួយសង្គ្រោះ នៅក្នុងការប្រយុទ្ធ ការវាយប្រហារតាមប្រព័ន្ធអេឡិកត្រូនិក ការបង្ក្រាបទៅលើកិច្ចការពារដែនអាកាសរបស់សត្រូវ ការសម្របសម្រួល និង ការឈ្លបយកការណ៍ ក៏ដូចជា ការរារាំងតាមផ្លូវអាកាស ផងដែរ៕

ប្រទេសអាហ្វហ្គានីស្ថាន ៖ ចំនួនអ្នកស្លាប់ដោយសារអាកាសធាតុត្រជាក់ខ្លាំងនៅអាហ្វហ្គានីស្ថាន បានកើនឡើងដល់១៧៥នាក់ និងបសុសត្វងាប់ដល់៧ម៉ឺនក្បាល ។ អង្គការសហប្រជាជាតិបញ្ជាក់ថា ពលរដ្ឋចំនួន៦លាននាក់នឹងអត់ឃ្លានក្នុងរដូវរងានេះ ខណៈសីតុណ្ហភាពក្នុងតំបន់ត្រជាក់ខ្លាំងខុសពីធម្មតា គឺ -៣៤អង្សារសេ ។

អាកាសធាតុត្រជាក់ខ្លាំងបានបណ្តាលឱ្យប៉ះពាល់ដល់ពលរដ្ឋរស់នៅក្នុងប្រទេស ហើយក៏ធ្វើឱ្យប៉ះពាល់ដល់បសុសត្វផងដែរ ។ អ្នកនាំពាក្យគ្រោះមហន្តរាយរបស់រដ្ឋាភិបាលតាលីបង់បញ្ជាក់ថា បសុសត្វប្រមាណ៧ម៉ឺនក្បាលទូទាំងប្រទេសបានងាប់ដោយសារត្រជាក់ខ្លាំងពេក ។ ចំណែកផ្លូវសំខាន់ៗជាច្រើនទូទាំងប្រទេស ក៏មិនអាចធ្វើដំណើរបានដែរ ក្រោយពីមានខ្យល់ព្យុះ និងព្រិលធ្លាក់ខ្លាំង ហើយពិបាកជួយសង្គ្រោះពលរដ្ឋអាហ្វហ្គានីស្ថាន ។

ជាមួយគ្នានេះ អគ្គលេខាធិការរងនៃអង្គការសហប្រជាជាតិ (UN) លោក Martin Griffith បម្រើការផ្នែកកិច្ចការមនុស្សធម៌ បានបញ្ជាក់កាលពីថ្ងៃទី២៥ ខែមករាថា រដូវរងានៅប្រទេសអាហ្វហ្គានីស្ថានពេលនេះខ្លាំងក្លាបំផុតក្នុងអំឡុងពេល១៥ឆ្នាំ ។ លោកដាស់តឿនថា ពលរដ្ឋប្រមាណ៦លាននាក់ក្នុងប្រទេសនេះកំពុងជួបភាពអត់ឃ្លាន ។

ចំណែកពលរដ្ឋរស់នៅទីក្រុងកាប៊ុល ជាទីក្រុងធំរបស់ប្រទេសអាហ្វហ្គានីស្ថាន ក៏ជួបនឹងអាកាសធាតុត្រជាក់ដូចគ្នាដែរ ។ ពួកគេបានអំពាវនាវទៅកាន់អង្គការសង្គ្រោះអន្តរជាតិ និងសមាគមពិភពលោក ជួយសង្គ្រោះពួកគេឱ្យរួចផុតពីភាពអត់ឃ្លានក្នុងរដូវត្រជាក់នេះផង ។

គួរបញ្ជាក់ថា គ្រោះមហន្តរាយកើតឡើងស្របពេលដែលប្រទេសអាហ្វហ្គានីស្ថានកំពុងជួបវិបត្តិសេដ្ឋកិច្ចយ៉ាងខ្លាំង ក្រោយពីអង្គការសង្គ្រោះជាច្រើនឈប់ធ្វើការនៅអាហ្វហ្គានីស្ថានកាលពីពេលកន្លងមកដើម្បីតវ៉ាទៅរដ្ឋាភិបាលតាលីបង់ ដែលហាមបុគ្គលិកអង្គការក្រៅរដ្ឋាភិបាលជាស្ត្រីធ្វើការ ៕ ប្រភព ៖ TNN World