ប្រទេសអង់គ្លេស ៖ សារព័ត៌មានរ៉យទ័ររាយការណ៍ថា គេចាត់ទុកថ្ងៃទី១ ខែកុម្ភៈ គឺជាថ្ងៃ «Walkout Wednesday» ឬជាថ្ងៃណាត់ពលរដ្ឋអង់គ្លេសចំនួន៥០ម៉ឺននាក់មកពីសហជីពការងារជាច្រើន ដើម្បីធ្វើបាតុកម្មទាមទារប្រាក់ឈ្នួលសមរម្យ និងលក្ខខណ្ឌការងារប្រកបដោយសុវត្ថិភាព ។

សារព័ត៌មានរ៉យទ័ររាយការណ៍ថា ការណាត់គ្នាឈប់ធ្វើការមកធ្វើបាតុកម្មនៅពេលនេះ ធ្វើឱ្យសាលារៀនជាច្រើនកន្លែងត្រូវបិទទ្វារ ខណៈការធ្វើដំណើរដោយរថភ្លើងក៏ត្រូវផ្អាកភ្លាមៗផងដែរ ដោយសារក្រុមបាតុករភាគច្រើនជាមន្ត្រីរាជការ អ្នកបើករថភ្លើង គ្រូបង្រៀន និងបុគ្គលិកសាកលវិទ្យាល័យ ។

លោកស្រី Mary Bousted អគ្គលេខាធិការសហភាពការអប់រំជាតិ បញ្ជាក់ថា សមាជិកម្នាក់ៗរបស់សហជីពមានអារម្មណ៍ថា ពួកគេគ្មានជម្រើសផ្សេង ក្រៅពីឈប់ធ្វើការមកធ្វើបាតុកម្ម ដោយសារប្រាក់ឈ្នួលធ្លាក់ចុះ ហើយមានមនុស្សជាច្រើនបានលាឈប់ពីអាជីពនេះ ។ ក្នុងរយៈពេល១២ឆ្នាំ គេបានកាត់ប្រាក់ខែគ្រូបង្រៀនរហូត ហើយប្រាក់ខែទទួលបានតិចខ្លាំងណាស់ ។ លោកស្រីថា ៖ «គ្មានអ្នកណាម្នាក់ចង់ឈប់ធ្វើការទេ ប៉ុន្តែវាដល់ពេលផ្លាស់ប្តូរហើយ» ។

ដោយសារអតិផរណាខ្ពស់ជាង១០% ក្នុងរយៈពេល៤ទសវត្សរ៍ គេឃើញប្រទេសអង់គ្លេសមានការធ្វើបាតុកម្មជាច្រើនដង ក្នុងនោះ កាលពីចុងខែធ្នូ ឆ្នាំ២០២២ មានសហជីពជាច្រើន រួមទាំងមន្ត្រីសុខាភិបាល និងផ្នែកដឹកជញ្ជូន ខណៈផ្នែកឯកជនមានបុគ្គលិកឃ្លាំងរបស់ Amazon និងបុគ្គលិកប្រៃសណីយ៍ Royal Mail បានប្រមូលផ្តុំគ្នាធ្វើបាតុកម្មទាមទារប្រាក់ខែសមរម្យផងដែរ ។

លោកស្រី Gillian Keegan រដ្ឋមន្ត្រីក្រសួងអប់រំអង់គ្លេសបញ្ជាក់ថា ការយល់ព្រមធ្វើតាមការទាមទារដំឡើងប្រាក់ខែ គឺកាន់តែធ្វើឱ្យអត្រាអតិផរណាកើនឡើងខ្ពស់ប៉ុណ្ណោះ ។

សារព័ត៌មាន CNBC រាយការណ៍ថា ក្រុមបាតុករមានគ្រូបង្រៀនចំនួន៣០ម៉ឺននាក់ត្រូវបានកាត់ប្រាក់ខែយ៉ាងតិច២៣% តាំងពីឆ្នាំ២០១០ ។ ក្រៅពីនេះ មានមន្ត្រីរាជការប្រមាណ១០ម៉ឺននាក់ គ្រូបង្រៀនបើកបរ ឆ្មាំសមុទ្រ មន្ត្រីនាយកដ្ឋានការងារ និងសោធននិវត្តន៍ បុគ្គលិកសាកលវិទ្យាល័យ៧ម៉ឺននាក់ គ្រូបង្រៀន សន្តិសុខ និងអ្នកបើកបររថភ្លើងប្រមាណ១០ម៉ឺននាក់ ដែលធ្វើឱ្យបាតុកម្មលើកនេះមានអ្នកចូលរួមច្រើនបំផុតក្នុងរយៈពេល១០ឆ្នាំ ៕ ប្រភព ៖ beartai BRIEF

កាលពីថ្ងៃអាទិត្យ ទី២៩ ខែមករា ឆ្នាំ២០២៣ កន្លងទៅនេះ អង្គការផ្កាយសមុទ្រ (ISF) និងក្រុមហ៊ុន ធានារ៉ាប់រងអាយុជីវិត AIA Cambodia មានក្តីសោមនស្សរីករាយក្រៃលែងក្នុងការប្រកាសពីកិច្ច សហការដ៏យូរអង្វែងរបស់ខ្លួន​សម្រាប់ឆ្នាំថ្មីនេះ ដែលជាឆ្នាំទី៦ហើយ​នៃព្រឹត្តិការណ៍ការប្រកួតបាល់ ទាត់វិលជុំកុមារ និងយុវជន AIA – ISF Youth League ។ ព្រឹត្តិការណ៍បើកការប្រកួតបាល់ទាត់នេះ  បានប្រព្រឹត្តទៅនៅកីឡាដ្ឋាន AIA Stadium, KMH Park ក្នុងរាជធានីភ្នំពេញ ។ កិច្ចសហការនេះមានគោល បំណងរួមចំណែកលើកស្ទួយ និងអភិវឌ្ឍវិស័យកីឡាបាល់ទាត់នៅថ្នាក់មូលដ្ឋាន ក៏ដូចជាផ្តល់ឱកាស ដល់កុមារ និងយុវជនក្រីក្រ ដើម្បីបង្ហាញសមត្ថភាពរបស់ខ្លួន និងសម្រេចក្តីស្រមៃរបស់ពួកគេទៀតផង ។

ព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA – ISF Youth League គឺជាការប្រកួតបាល់ទាត់ ថ្នាក់មូលដ្ឋានធំជាងគេបង្អស់ ដែលផ្តល់ឱកាសដល់កុមារ និងយុវជនកម្ពុជាក្រីក្រ ក្នុងការលេងកីឡា ក្នុងបរិស្ថានមួយដ៏សុវត្ថិភាព ។ ដោយមានការប្តេជ្ញាចិត្តជួយកាត់បន្ថយភាពក្រីក្រ តាមរយៈការផ្តល់ឱកាស​ស្មើៗគ្នាដល់កុមារក្រីក្រឲ្យទទួលបានការអប់រំ សេវាថែទាំសុខភាព និងការលេងកីឡា អង្គការផ្កាយសមុទ្រ ដែលជាអង្គការក្រៅរដ្ឋាភិបាលមួយ​នៅកម្ពុជាបានធ្វើការរួមគ្នាជាមួយនឹងក្រុមហ៊ុនធានារ៉ាប់រង អាយុជីវិតដ៏ធំបំផុតមួយគឺក្រុមហ៊ុន​ AIA Cambodia ។ ភាពជាដៃគូមួយនេះត្រូវបានបង្កើតឡើងតាំង ពីឆ្នាំ២០១៧មកម្ល៉េះ ដោយអង្គការផ្កាយសមុទ្រ និងក្រុមហ៊ុនធានារ៉ាប់រងអាយុជីវិត AIA Cambodia  បានធ្វើការជាមួយគ្នាយ៉ាងសស្រាក់សស្រាំជួយឲ្យប្រជាជនកម្ពុជាមានសុខភាពល្អ និងជីវិតកាន់តែ ប្រសើរ ។

ក្នុងឆ្នាំនេះទៀតសោត ព្រឹត្តិការណ៍បើកការប្រកួតបាល់ទាត់វិលជុំកុមារ និងយុវជន AIA – ISF Youth League នៅរាជធានីភ្នំពេញ ទទួលបានការចូលរួមពីប្អូនៗកីឡាករកីឡាការនីសរុបចំនួន ៧២ក្រុម ដែលក្រុមនីមួយៗ សុទ្ធតែបានប្រឹងប្រែងហ្វឹកហាត់យ៉ាងអស់ពីកម្លាំងកាយចិត្ត និងត្រៀមខ្លួនរួច ជាស្រេចក្នុងការបង្ហាញទេពកោសល្យរៀងៗខ្លួន ដើម្បីដណ្តើមយកជ័យលាភីក្នុងការប្រកួតដ៏ធំមួយនេះ ។

អង្គការផ្កាយសមុទ្រ និងក្រុមហ៊ុនធានារ៉ាប់រងអាយុជីវិត AIA Cambodia មានក្តីរំភើបរីករាយយ៉ាងខ្លាំង ក្នុងការប្រកាសជាព័ត៌មានថានៅក្នុងឆ្នាំ២០២៣នេះ ព្រឹត្តិការណ៍ប្រកួតបាល់ទាត់វិលជុំកុមារ និង យុវជន AIA – ISF Youth League នឹងផ្តល់ឱកាសដល់កីឡាករកីឡាការនីនៅទូទាំងប្រទេសកម្ពុជា សរុបជិត ១,៥០០ នាក់ក្នុងការចូលរួមប្រកួតក្នុងព្រឹត្តិការណ៍នេះ ។

• ថ្ងៃអាទិត្យ ទី២៩ ខែមករា – ព្រឹត្តិការណ៍បើកការប្រកួតបាល់ទាត់វិលជុំកុមារ និងយុវជន នៅរាជធានីភ្នំពេញ ដែលមានកីឡាករកីឡាការនីចំនួនសរុប ១,១៩៤នាក់ មកពី៧២ក្រុម ។
• ថ្ងៃអាទិត្យ ទី១២ ខែកុម្ភៈ​ – ព្រឹត្តិការណ៍បើកការប្រកួតបាល់ទាត់វិលជុំកុមារ និងយុវជន នៅទីរួមខេត្តកំពង់ធំ ដែលមានកីឡាករចំនួនសរុប ៣៦០នាក់ មកពី៣០ក្រុម ។

៨ក្រុមដែលឈ្នះការប្រកួតនៅរាជធានីភ្នំពេញ និង ៤ក្រុមដែលឈ្នះការប្រកួតនៅខេត្តកំពង់ធំ និងចូលរួមព្រឹត្តិការណ៏ ការប្រកួតបាល់ទាត់កុមារ និងយុវជន វគ្គផ្តាច់ព្រ័ត្រ AIA-ISF Grand Championship​ Final ដែលនឹងប្រព្រឹត្តទៅនៅខែមិថុនាខាងមុខនេះ។

ឆ្នាំ២០២៣ នេះគឺជាឆ្នាំទី៦ហើយ ដែលក្រុមហ៊ុនធានារ៉ាប់រងអាយុជីវិត AIA Cambodia បានធ្វើការឧបត្ថម្ភគាំទ្រក្នុងការរៀបចំព្រឹត្តិការណ៍ប្រកួតបាល់ទាត់កុមារ និងយុវជន ។ ចាប់តាំងពីការចាប់ផ្តើមនៃកិច្ចសហការនេះ អង្គការផ្កាយសមុទ្របានពង្រីកវិសាលភាពនៃការប្រកួត បាល់ទាត់នេះ ដោយធ្វើការជាមួយនឹងកុមារ និងយុវជនកាន់តែច្រើនឡើងៗនៅទូទាំងប្រទេស ។ ដោយប្រើប្រាស់កម្មវិធីបាល់ទាត់ដើម្បីបង្កើតផលវិជ្ជមានក្នុងសង្គម អង្គការផ្កាយសមុទ្រកំពុងតែផ្តល់ ឱកាសស្មើៗគ្នាដល់កុមារ និងយុវជនក្រីក្រនៅកម្ពុជា ដើម្បីឲ្យពួកគេអាចអភិវឌ្ឍជំនាញបំណិនជីវិត និងទទួលបានភាពរីករាយក្នុងជីវិតទៀតផង ។

ក្នុងព្រឹត្តិការណ៍បើកការប្រកួតនាថ្ងៃអាទិត្យនេះ ទទួលបានការចូលរួមពីក្រុមកីឡាករកីឡាការនីជា កុមារ និងយុវជន ដែលចែកជា ៦ប្រភេទអាយុ ដូចជា៖ ក្រុមកុមារា និងក្រុមកុមារីអាយុក្រោម១៤ឆ្នាំ ក្រុមកុមារា និងក្រុមកុមារីអាយុក្រោម១០ឆ្នាំ ក្រុមកុមារា និងកុមារីអាយុក្រោម១៨ឆ្នាំ ដែលក្រុមនី​មួយៗនឹងប្រកួតយ៉ាងស្វាហាប់ដណ្តើមយកពានរង្វាន់ ។​ អ្នកស្រី ជួប វិច្ឆិកា ជាប្រធានអង្គការផ្កាយសមុទ្រ រួមនឹងលោក Andrew Loh ជាអគ្គនាយកប្រតិបត្តិក្រុមហ៊ុនធានារ៉ាប់រងអាយុជីវិត AIA Cambodia   និងលោក ជួប សុភ័ក្រ្ត ជាទូតសុច្ឆនៈអង្គការផ្កាយសមុទ្រ និងពិធីករស្ថានីយទូរទស្សន៍បាយ័ន  បានចូលរួមផ្តល់កិត្តិយសសំដែងមតិបើកកម្មវិធី ។ អ្វីដែលកាន់តែពិសេសនោះគឺកញ្ញា Shannon Moloney ជាគ្រូបង្វឹកជាន់ខ្ពស់ផ្នែកអភិវឌ្ឍបាល់ទាត់អន្តរជាតិរបស់ក្លឹបបាល់ទាត់ Tottenham Hotspur Football Club បានធ្វើដំណើរពីទីក្រុងហុងកុង ដើម្បីមកចូលរួមក្នុងព្រឹត្តិការណ៍នេះ និងចែករំលែកពីបច្ចេកទេសកម្តៅសាច់ដុំមុនពេលប្រកួតទៅកាន់កីឡាករកីឡាការនីផងដែរ ។ ក្រៅពីនេះ កម្មវិធីនេះក៏មានការចូលរួមពីកីឡាការនីអាជីពគឺកញ្ញា ចាន់ ជាតិនីតា មកពីក្លឹបបាល់ទាត់ភ្នំពេញក្រោន និងកីឡាករអាជីពប្រចាំក្លឹបអាយអេសអាយ ដង្កោរសែនជ័យ លោក ឆេង ចន្ថា ដែលលោក និងកញ្ញាបានចែករំលែកអំពីបទពិសោធន៍ផ្ទាល់ខ្លួនក្នុងវិស័យកីឡាបាល់ទាត់ ។ គួរបញ្ជាក់ផងដែរថា កីឡាករ និងកីឡាការនីទាំងពីររូបនេះក៏ធ្លាប់បានចូលរួមប្រកួតប្រជែងក្នុង ព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA – ISF Youth League រដូវកាលមុនៗទៀតផង ។

សូមចូលរួមទស្សនាព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA – ISF Youth League នេះ ឲ្យបានច្រើនកុះករ ។

កាលវិភាគប្រកួតតាមក្រុម៖

សម្រាប់ព័ត៌មានលម្អិត សូមទំនាក់ទំនងមកកាន់ពួកយើង តាមរយៈអីុម៉ែល​ info@isfcambodia.org ឬចូលទៅកាន់គេហទំព័រផ្លូវការរបស់អង្គការផ្កាយសមុទ្រ៖​ https://isfcambodia.org/ ។

អំពីអង្គការផ្កាយសមុទ្រ

អង្គការផ្កាយសមុទ្រ គឺជាមូលនិធិកម្ពុជាមួយដែលទទួលបានពានរង្វាន់ និងមានបទពិសោធន៍ ជាង១៥ឆ្នាំក្នុងការប្រើប្រាស់ការអប់រំ កីឡា និងគម្រោងអភិវឌ្ឍន៍សហគមន៍ ដើម្បីជួយកុមារងាយរង គ្រោះនៅកម្ពុជា និងក្រុមគ្រួសាររបស់ពួកគេឲ្យរួចចាកផុតពីភាពក្រីក្រ ។ កិច្ចគាំទ្រផ្តោតលើសហគមន៍ របស់អង្គការនេះត្រូវបានធ្វើឡើងដោយបុគ្គលិកកម្មវិធី ដែលមានបទពិសោធន៍ជាច្រើនឆ្នាំ ក្នុងការធ្វើ ការយ៉ាងជិតស្និតជាមួយនឹងអាជ្ញាធរមូលដ្ឋាន ដើម្បីនាំឲ្យមានផ្លាស់ប្តូរប្រកបដោយនិរន្តរភាពនៅក្នុង រាជធានីភ្នំពេញ និងក៏ដូចជាប្រទេសកម្ពុជាទាំងមូល ។

សព្វថ្ងៃនេះ កម្មវិធីរបស់យើងកំពុងធ្វើការជាមួយសិស្សានុសិស្សចំនួនជាង ៧០០នាក់ តាមរយៈកម្មវិធី អប់រំ ដោយផ្តល់ឲ្យពួកគេនូវការសិក្សាពីថ្នាក់ពន្លឿនរហូតដល់ថ្នាក់បឋមសិក្សា មធ្យមសិក្សា ឧត្តម សិក្សា និងរហូតដល់ពួកគេមានការងារធ្វើ ។ កុមារក្រីក្រនៅទីក្រុងភ្នំពេញ ដែលមិនធ្លាប់បានចូល រៀនទទួលបានឱកាសសិក្សាកម្មវិធីសិក្សាជាតិដែលតម្រូវឲ្យពួកគេរៀនពីរថ្នាក់ក្នុងឆ្នាំតែមួយរហូត ដល់ពួកគេអាចចូលរៀនថ្នាក់ ដែលសមស្របទៅនឹងអាយុរបស់ខ្លួន ក៏ដូចជាចូលរៀននៅសាលារដ្ឋ បាន ។​ សិស្សទាំងអស់ទទួលបានការ ឧបត្ថម្ភគាំទ្រជាឯកសណ្ឋានសិក្សា សម្ភារៈសិក្សា និងកញ្ចប់ អាហារប្រចាំខែសម្រាប់ក្រុមគ្រួសារទាំងមូល ខណៈដែលពួកគេកំពុងរៀនសូត្រនៅសាលារៀន ។ បន្ថែមពីនេះទៀត សិស្សក៏ទទួលបានការប្រឹក្សាការងារ និងការគាំទ្រដទៃទៀត ដើម្បីជួយពួកគេឲ្យ ទទួលបាននូវការងារដែលមានស្ថេរភាពផងដែរ ។

ការពិនិត្យតាមដាន និងវាយតម្លៃយ៉ាងល្អិតល្អន់បានរំលេចឲ្យឃើញពីតម្រូវការចាំបាច់នៃការគាំទ្រទាំង ស្រុង ដើម្បីបង្កើនលទ្ធភាពទទួលបានការអប់រំពេញលេញ ជាហេតុផលដែលធ្វើឲ្យពួកយើងធ្វើការ ជាមួយនឹងក្រុមគ្រួសារទាំងមូលដើម្បីជួយកាត់បន្ថយឧបសគ្គសង្គម និងសេដ្ឋកិច្ចផ្សេងៗ ដើម្បីធានា បានថាគ្មានគម្រោងណាមួយត្រូវដំណើរតែឯកឯងនោះទេ ។ អង្គការផ្កាយសមុទ្រកម្ពុជាធ្វើការជាមួយ នឹងអ្នកទទួលផលចំនួន ៣,០០០នាក់ ដោយផ្តល់ឲ្យពួកគេនូវអាហារូបត្ថម្ភ ថ្នាក់អក្ខរកម្ម និងជួយរក ការងារធ្វើ ដើម្បីជួយឲ្យក្រុមគ្រួសាររបស់សិស្សមានប្រភពចំណូលមួយជាក់លាក់ ។

 អំពី អេ​ អាយ​ អេ

អេ អាយ អេ គ្រុប លីមីតធីត និង សាខា (តទៅហៅថា អេ អាយ អេ “AIA” ឬ គ្រុប “Group”) មានក្រុមហ៊ុនធានារ៉ាប់រងជីវិតនៅទូទាំងតំបន់អាស៊ីដែលស្ថិតក្នុងបញ្ជីឈ្មោះសាធារណៈឯករាជ្យធំជាងគេ។ ក្រុមហ៊ុនមានវត្តមាននៅលើទីផ្សារចំនួន ១៨ នៅអាស៊ីប៉ាស៊ីហ្វិក – សាខាគ្រប់គ្រងទាំងស្រុង និង ក្រុមហ៊ុនបុត្រសម្ព័ន្ធនៅចិនដីគោក ទីក្រុងហុងកុង SAR(១)  ប្រទេសថៃ សឹង្ហបូរី ម៉ាឡេស៊ី អូស្ត្រាលី កម្ពុជា ឥណ្ឌូនេស៊ី មីយ៉ាន់ម៉ា ញ៉ូហ្ស៊ីលែន ហ្វីលីពិន កូរ៉េខាងត្បូង ស្រីលង្កា តៃវ៉ាន់(ចិន)  រៀតណាម ប៊្រុយណេ ម៉ាកាវSAR(២) និង ក្រុមហ៊ុនបណ្ដាក់ទុនរួម ៤៩ ភាគរយនៅប្រទេសឥណ្ឌា។

ក្នុងពេលបច្ចុប្បន្ន អាជីវកម្មរបស់ អេ អាយ អេ ដែលត្រូវបានបង្កើតឡើងលើកដំបូងនៅទីក្រុងសៀងហៃ កាលពីមួយសតវត្សកន្លងទៅក្នុងឆ្នាំ ១៩១៩ ។ ជាក្រុមហ៊ុនឈានមុខគេមួយនៅលើទីផ្សារក្នុងតំបន់ អាស៊ីប៉ាស៊ីហ្វិក (អតីត-ជប៉ុន) ដោយផ្តោតទៅលើបុព្វលាភធានារ៉ាប់រងជីវិត និង មានតួនាទីនាំមុខគេនៅ គ្រប់ទីផ្សារភាគច្រើនរបស់ខ្លួន ។ ក្រុមហ៊ុនមានទ្រព្យសរុបចំនួន ៣៤០ ពាន់លានដុល្លារអាមេរិក គិតត្រឹមថ្ងៃទី៣១ ខែធ្នូ ឆ្នាំ២០២១។

អេ អាយ អេ ឆ្លើយតបតាមតម្រូវការនៃប្រាក់សន្សំ និង ការការពាររយៈពេលវែងរបស់ពលរដ្ឋទូទៅតាមរយៈ ការផ្ដល់នូវផលិតផលដ៏សម្បូរបែប និង សេវាកម្មជាច្រើនរួមមាន ការធានារ៉ាប់រងអាយុជីវិតធានារ៉ាប់រង លើគ្រោះថ្នាក់ ធានារ៉ាប់រងសុខភាព និង ផែនការសន្សំប្រាក់ ។ គ្រុបក៏ផ្ដល់ដំណោះស្រាយ អត្ថប្រយោជន៍សម្រាប់បុគ្គលិក ធានារ៉ាប់រងឥណទាន និង សេវាកម្មប្រាក់សោធនិវត្តន៍ជូនដល់និយោជក ។ តាមរយៈបណ្ដាញភ្នាក់ងារ ដៃគូ និង បុគ្គលិកដ៏ទូលំទូលាយនៅទូទាំងតំបន់អាស៊ីប៉ាស៊ីហ្វិក អេ អាយ អេ បានផ្ដល់ការការពារដល់ម្ចាស់បណ្ណសន្យារ៉ាប់រងជារូបវ័ន្តបុគ្គលច្រើនជាង ៣៩ លាននាក់ និងសមាជិកដែលបាន ចូលរួមក្នុងគម្រោងបណ្ណសន្យារ៉ាប់រងជាក្រុមជាង ១៦ លាននាក់។

អេ អាយ អេ គ្រុបលីមីតធិត (AIA Group Limited) ត្រូវបានដាក់បញ្ចូលក្នុង តារាងនៃក្រុមប្រឹក្សា ភិបាលចម្បងនៃ គណកម្មាធិការផ្សារមូលបត្រទីក្រុងហុងកុង (Main Board of The Stock Exchange of Hong Kong Limited) ដែលស្ថិតក្រោមច្បាប់ផ្សារមូលបត្រ “១២៩៩” ស្របតាមច្បាប់ស្ដីពី ការទទួលប្រាក់តម្កល់នៃសហរដ្ឋអាមេរិក (កម្រិត ១) A (American Depositary Receipts (Level 1) ដែលធ្វើពាណិជ្ជកម្មលើទីផ្សារស្របច្បាប់ (រូបសញ្ញា៖ “AAGIY”)។

សំគាល់៖

១. ទីក្រុងហុងកុងSAR  គឺសំដៅទៅលើតំបន់រដ្ឋបាលពិសេសនៃទីក្រុងហុងកុង

២​. ម៉ាកាវ SAR គឺសំដៅទៅលើតំបន់រដ្ឋបាលពិសេសនៃម៉ាកាវ

*ឈ្មោះត្រូវបានប្តូរដើម្បីការពារឯកជនភាពបុគ្គល ។

ប្រទេសលោកខាងលិចបានប្រកាសដាក់ទណ្ឌកម្មបន្ថែមទៀតដល់ប្រទេសមីយ៉ាន់ម៉ា ក្នុងនោះ អង្គភាព និងបុគ្គលដែលជាប់ឈ្មោះក្នុងបញ្ជីខ្មៅ មានទាំងគណៈកម្មការបោះឆ្នោត មន្ត្រីថាមពល និងសមាជិករដ្ឋាភិបាលយោធា ។

ក្រសួងហិរញ្ញវត្ថុអាមេរិកបានប្រកាសកាលពីថ្ងៃទី៣១ ខែមករា ពីការបង្កើនទណ្ឌកម្មប្រឆាំងនឹងបុគ្គល៦រូប និងអង្គភាពចំនួន៣ របស់មីយ៉ាន់ម៉ា រួមទាំងគណៈកម្មការបោះឆ្នោត ក្រុមហ៊ុនរុករករ៉ែ នាយកប្រតិបត្តិក្រសួងថាមពល មន្ត្រី និងអតីតមន្ត្រីកងទ័ព ដោយអ្នកទាំងអស់នេះមិនអាចប្រើប្រាស់ប្រាក់ និងធនធានក្រោមការគ្រប់គ្រងរបស់អាមេរិកបានទេ ។ អ្នកនាំពាក្យក្រសួងបញ្ជាក់ថា លើកនេះជាលើកដំបូងដែលអាមេរិកដាក់ទណ្ឌកម្មក្រុមហ៊ុនមីយ៉ាន់ម៉ា Oil and Gas Enterprise (MOGE) ជាក្រុមហ៊ុនថាមពលរបស់រដ្ឋ និងជាកន្លែងបង្កើតប្រាក់ចំណូលធំបំផុតតែមួយរបស់រដ្ឋាភិបាលយោធា ដោយនាយកគ្រប់គ្រង និងនាយករងត្រូវបានដាក់ឈ្មោះក្នុងបញ្ជីខ្មៅ ។

លើសពីនេះ ប្រទេសកាណាដាក៏បានដាក់ទណ្ឌកម្មបុគ្គល៦រូប និងហាមនាំចេញ ចែកចាយ ឬផ្គត់ផ្គង់ប្រេងឥន្ធនៈដល់អាកាសយានដ្ឋានមីយ៉ាន់ម៉ា ។ ចំណែកប្រទេសអូស្ត្រាលីបានដាក់ទណ្ឌកម្មសមាជិកក្នុងរដ្ឋាភិបាលយោធា និងក្រុមហ៊ុនគ្រប់គ្រងដោយកងទ័ព ហើយប្រទេសអង់គ្លេសបានដាក់ទណ្ឌកម្មក្រុមហ៊ុនចំនួន២ និងបុគ្គល២រូប ដែលមានចំណែកផ្គត់ផ្គង់ប្រេងឥន្ធនៈដល់អាកាសយានដ្ឋានកងទ័ពអាកាសប្រើក្នុងប្រតិបត្តិការទម្លាក់គ្រាប់បែក ។

ការប្រកាសដាក់ទណ្ឌកម្មរបស់ប្រទេសទាំង៤នេះកើតឡើងក្នុងឱកាសគម្រប់ខួប២ឆ្នាំ ដែលកងទ័ពមីយ៉ាន់ម៉ាធ្វើរដ្ឋប្រហារដណ្តើមអំណាចកាលពីថ្ងៃទី១ ខែកុម្ភៈ ឆ្នាំ២០២១ ហើយនាំឱ្យមានការធ្វើបាតុកម្ម និងការបង្ក្រាបយ៉ាងបង្ហូរឈាម ។

គួរបញ្ជាក់ថា នៅថ្ងៃទី១ ខែកុម្ភៈ ពលរដ្ឋមីយ៉ាន់ម៉ារស់នៅក្រៅប្រទេសបានជួបជុំគ្នាធ្វើបាតុកម្មក្នុងឱកាសគម្រប់ខួប២ឆ្នាំនៃរដ្ឋប្រហារ នៅផ្នែកខាងក្រៅនៃស្ថានទូតមីយ៉ាន់ម៉ា ក្រុងបាងកក ប្រទេសថៃ, ក្រុងតូក្យូ ប្រទេសជប៉ុន និងក្រុងម៉ានីល ប្រទេសហ្វីលីពីន ៕

ប្រភព ៖ NationWorldNews

ក្រោយតែមានហេតុការណ៍តារាស្រីតៃវ៉ាន់ម្នាក់ បានយក Vape ឆ្លងដែន ចូលក្នុងប្រទេសថៃ ហើយដោយបានឱ្យលុយប៉ូលិស២៧ពាន់បាត ដើម្បីបិទមាត់នោះ ​ពេលនេះមេធាវីប៉ូលីសក្រុងបាងកកបានចោទប្រកាន់ថា “ប៉ូលិសបានទទួលសូកប៉ាន់ពីតារាស្រីតៃវ៉ាន់ម្នាក់ ក្នុងការយករបស់ខុសច្បាប់ចូលប្រទេសខ្លួន”។

មេធាវីប៉ូលីសក្រុងបាងកក លោក រុន ណារ៉ុង បាន​ព្រមាន​ថា មនុស្ស​ដែល​ចាប់​បាន​ដោយ​ប្រើ​ថ្នាំ​ជក់​អាច​ត្រូវ​ផ្ដន្ទាទោស​ដាក់​ពន្ធនាគារ ៥ឆ្នាំ និង​ពិន័យ​ជា​ប្រាក់ ៤ ដង​នៃ​តម្លៃ​ឧបករណ៍។

មិនតែប៉ុណ្ណោះ ការ​ជក់​ Vape ​នៅ​ទី​សាធារណៈ​ក៏​បាន​រំលោភ​លើ​មាត្រា ៤២ នៃ​ច្បាប់​គ្រប់គ្រង​ថ្នាំ​ជក់​ដែល​ត្រូវ​ពិន័យ​ជា​ប្រាក់ ៥០០០ បាត។

លើសពីនេះទៅទៀតការនាំចូល Vape និងទឹកVape  គឹខុសនឹងច្បាប់នាំចូល/នាំចេញ ហើយត្រូវផ្តន្ទាទោសដាក់ពន្ធនាគាររហូតដល់ ១០ ឆ្នាំ និង/ឬពិន័យជាប្រាក់ប្រាំដងនៃតម្លៃទំនិញ។

គួរបញ្ជាក់ផងដែរថា​ កាលពីឆ្នាំ ២០១៥ ក្រុមបឹក្សាភិបាលការពារអ្នកប្រើប្រាស់ក៏បាន ហាមឃាត់ការលក់បារីអេឡិចត្រូនិច និង បារ៉ាគូ អ៊ីបារ៉ាគូ (ហ្សុីហ្សា)​ ដោយពិន័យជាប្រាក់ចំនួន៥សែណ បាត ឬក៏អាចឈានដល់ការជាប់ពន្ធនាគាររហូតដល់៥ឆ្នាំ ផងដែរ សម្រាប់អ្នកដែលបំពានច្បាប់នេះ៕

ប្រភព៖ National Thailand

PayPal ជាសេវាទូទាត់ប្រាក់តាមអនឡាញដ៏ធំបំផុតរបស់ពិភពលោក បានប្រកាសកាត់បន្ថយបុគ្គលិករបស់ខ្លួនចំនួន២.០០០នាក់ ឬស្មើ៧% របស់បុគ្គលិកទាំងអស់ ដោយសារបញ្ហាចម្បង គឺមកពីស្ថានភាពសេដ្ឋកិច្ច ។

លោក ឌែន ឈូលមែន ប្រធាន និងនាយកប្រតិបត្តិរបស់ PayPal បញ្ជាក់ថា ក្រុមហ៊ុនកំពុងរកវិធីដោះស្រាយនឹងបញ្ហាប្រឈមមុខសេដ្ឋកិច្ច ដោយក្រុមហ៊ុននឹងកាត់បន្ថយបុគ្គលិកនៅសប្តាហ៍ខាងមុខ ហើយសម្រាប់បុគ្គលិកណាដាក់ពាក្យឈប់នឹងទទួលបានប្រាក់សំណងយ៉ាងសមរម្យ ។ លោកថ្លែងថា ៖ «ខ្ញុំសូមថ្លែងអំណរគុណសម្រាប់ការមានចំណែករួមដ៏មានអត្ថន័យ ដែលបុគ្គលិកទាំងអស់បានបំពេញការងារឱ្យ PayPal» ។

លោកបន្ថែមថា ៖ «ការផ្លាស់ប្តូរអាចជារឿងលំបាកមួយ ជាពិសេសបំផុតនោះ សម្រាប់មិត្តរួមការងារទាំងអស់ និងបុគ្គលិកដែលចាកចេញទៅ យើងនឹងប្រឈមមុខជាមួយគ្នា ។ យើងធ្វើការវិនិយោគជាយុទ្ធសាស្ត្រដើម្បីពង្រឹងសមត្ថភាពស្នូលរបស់យើង ក៏ដូចជាទំនុកចិត្ត និងភាពស្មោះត្រង់របស់អតិថិន» ។

កាលពីឆ្នាំ២០២២ កន្លងមក តម្លៃភាគហ៊ុនរបស់ PayPal បានធ្លាក់ចុះលើសពី៥០% បើទោះជារបាយការណ៍លទ្ធផលប្រចាំត្រីមាសទី៣ ឆ្នាំ២០២២ ក្រុមហ៊ុននឹងបង្កើតប្រាក់ចំណូលច្រើនជាងការរំពឹងទុកក្តី ប៉ុន្តែតម្លៃភាគហ៊ុនរបស់ PayPal នៅតែធ្លាក់ចុះ ក្រោយពីប្រាក់ចំណូលប៉ាន់ស្មានក្នុងត្រីមាសទី៤ ឆ្នាំ២០២២ របស់ក្រុមហ៊ុនធ្លាក់ចុះជាងអ្នកវិភាគរំពឹងទុកទៅទៀត ។

នេះជាការកាត់បន្ថយបុគ្គលិកក្នុងឧស្សាហកម្មបច្ចេកវិទ្យា ដែលក្រុមហ៊ុនភាគច្រើនកំពុងព្យាយាមកាត់បន្ថយដើមទុន ដើម្បីទប់ទល់នឹងការផ្លាស់ប្តូរតម្រូវការសេវាកម្មឌីជីថល ឧបសគ្គសេដ្ឋកិច្ចកើតពីជំងឺរាតត្បាត អត្រាការប្រាក់កើនឡើង និងភាពភ័យខ្លាចនៃវិបត្តិសេដ្ឋកិច្ចផងដែរ ។

គួរបញ្ជាក់ថា នៅខែមករា ឆ្នាំ២០២៣ ក្រុមហ៊ុន Microsoft, Alphabet និង Amazon ព្រមទាំងក្រុមហ៊ុនផ្សេងៗទៀតបានប្រកាសកាត់បន្ថយបុគ្គលិករបស់ខ្លួនជាច្រើនពាន់នាក់ ៕

ប្រភព ៖ pptvhd36

ប្រទេសរុស្ស៊ី ៖ តាមសេចក្តីថ្លែងការណ៍ពីក្រសួងការបរទេសរុស្ស៊ី កាលពីថ្ងៃទី៣០ ខែមករាថា ប្រធានាធិបតីចិន លោក ស៊ី ជិនពីង នឹងធ្វើដំណើរទស្សនកិច្ចមកកាន់ទីក្រុងមូស្គូ ប្រទេសរុស្ស៊ី ក្នុងអំឡុងខួប១ឆ្នាំនៃសង្គ្រាមរុស្ស៊ី-អ៊ុយក្រែន និងជាហេតុការណ៍សំខាន់នៃរបៀបវារៈទ្វេភាគីរបស់ប្រទេសទាំងពីរ ។ គេចាត់ទុកជាការមកកាន់ទឹកដីរុស្ស៊ីលើកដំបូងរបស់លោក ជិនពីង តាំងពីខែមិថុនា ឆ្នាំ២០១៩ ដែលមេដឹកនាំចិនបានចូលរួមប្រជុំសេដ្ឋកិច្ច រយៈពេល៣ថ្ងៃ នៅក្រុង Saint Petersburg ។

វាជាការជួបមុខគ្នាលើកដំបូងរបស់មេដឹកនាំទាំងពីរ បន្ទាប់ពីចិនបន្ធូរបន្ថយវិធានការទប់ស្កាត់ជំងឺកូវីដ-១៩ ។ មេដឹកនាំទាំងពីរបានជួបមុខគ្នាលើកចុងក្រោយនៅកិច្ចប្រជុំកំពូលអង្គការសហប្រតិបត្តិការសៀងហៃ (Shanghai Cooperation Organization) នៅក្រុងសាម៉ាកខាន់ ប្រទេសអ៊ូសបេគីស្ថាន កាលពីកញ្ញា ឆ្នាំ២០២២ ។

ទោះយ៉ាងណា នៅមិនទាន់មានការបញ្ជាក់ណាមួយពីប្រទេសចិន អំពីការធ្វើទស្សនកិច្ចរបស់មេដឹកនាំចិនទេ ។ ប្រធានាធិបតីប្រទេសរុស្ស៊ី លោក វ៉្លាឌីមៀ ពូទីន បានអញ្ជើញលោក ជិនពីង ក្នុងពេលជជែកគ្នាតាមវីដេអូខល (video call) កាលពីចុងខែធ្នូ ឆ្នាំ២០២២ អំពីការសហការគ្នាលើផ្នែកជាច្រើន រួមទាំងពាណិជ្ជកម្ម និងថាមពលផងដែរ ។

សារព័ត៌មាន TASS របស់រុស្ស៊ីបានរាយការណ៍ដោយផ្អែកតាមក្រសួងការបរទេសរុស្ស៊ីថា ក្នុងឆ្នាំ២០២៣នេះ រុស្ស៊ី និងចិននឹងរួមដៃគ្នាពង្រឹង និងលើកកម្ពស់ទំនាក់ទំនងទ្វេភាគីរវាងរដ្ឋាភិបាលទាំងពីរ ។

សម្រាប់ព័ត៌មានថា មេដឹកនាំចិននឹងធ្វើដំណើរទៅកាន់រុស្ស៊ីនោះ បន្ទាប់ពីរដ្ឋមន្ត្រីក្រសួងការបរទេសអាមេរិក លោក Anthony Blinken ត្រៀមជួបជាមួយប្រទេសចិន នៅទីក្រុងប៉េកាំងក្នុងសប្តាហ៍នេះ ហើយអ្នកវិភាគបានចោទសួរពីការវិវត្តទៅមុខនៃទំនាក់ទំនងរវាងប្រទេសទាំងពីរ ។

South China Morning Post រាយការណ៍ថា ចិនជាដៃគូពាណិជ្ជកម្មធំបំផុតរបស់រុស្ស៊ីយូរមកហើយ ហើយការដាក់ទណ្ឌកម្មពាណិជ្ជកម្មពីប្រទេសលោកខាងលិចប្រឆាំងនឹងរុស្ស៊ី ដោយសារធ្វើសង្គ្រាមជាមួយអ៊ុយក្រែននោះ ធ្វើឱ្យពាណិជកម្មរបស់ពួកគេកើនឡើង ។

ក្រសួងការបរទេសរុស្ស៊ីបញ្ជាក់ថា កិច្ចសហការជាមួយប្រទេសជាមិត្តរបស់រុស្ស៊ីបានដំណើរការជាបន្តបន្ទាប់ ដើម្បីតស៊ូជាមួយការព្យាយាមរបស់អាមេរិកដែលចង់កាន់កាប់ពិភពលោក និងបញ្ជាក់ថា ចិនជាមិត្តរបស់រុស្ស៊ីក្នុងពេលបច្ចុប្បន្ននេះ ។ ស្របពេលមានការផ្លាស់ប្តូរភូមិសាស្ត្រនយោបាយធ្ងន់ធ្ងរ ទីក្រុងមូស្គូ និងប៉េកាំង បានសម្របសម្រួលគោលនយោបាយការបរទេសយ៉ាងមានប្រសិទ្ធភាព រក្សាសន្តិភាព និងស្ថេរភាពរបស់ពិភពលោក ដើម្បីបញ្ចប់ជម្លោះក្នុងភូមិភាគ ជម្នះការប្រឈមមុខដាក់គ្នា និងលើកកម្ពស់ការរួមកម្លាំង ៕

ប្រភព ៖ TNN World