ប្រទេសកូរ៉េខាងជើង ៖ កាលពីថ្ងៃទី៧ ខែមីនា កន្លងមក AFP រាយការណ៍ថា អ្នកនាង គីម យ៉ូជុង ជាប្អូនស្រីរបស់មេដឹកនាំដ៏មានឥទ្ធិពលនៅកូរ៉េខាងជើង លោក គីម ជុងអ៊ុន លើកឡើងថា បើអាមេរិករារាំងការសាកល្បងមីស៊ីលរបស់កូរ៉េខាងជើងនៅមហាសមុទ្រប៉ាស៊ីហ្វិក គឺចាត់ទុកថា ជាការប្រកាសសង្គ្រាម ។ កូរ៉េខាងជើងបានប្រកាសបែបនេះ ក្រោយពីអាមេរិក និងកូរ៉េខាងត្បូងមានផែនការធ្វើសមយុទ្ធរួមគ្នាធំបំផុតនៅខែមីនា ឆ្នាំ២០២៣ ក្នុងរយៈពេល៥ឆ្នាំ ។

អ្នកនាង គីម យ៉ូជុង លើកឡើងថា មហាសមុទ្រប៉ាស៊ីហ្វិកមិនមែនជាកម្មសិទ្ធិរបស់អាមេរិក ឬជប៉ុនទេ ហើយប្រទេសកូរ៉េខាងជើងបានត្រៀមខ្លួនជានិច្ចដើម្បីទប់ទល់នឹងស្ថានការណ៍នេះ ដោយកូរ៉េខាងជើងបានប្រុងប្រៀបខ្លួនគ្រប់ពេលទាំងអស់ ។

ចំណែកក្រសួងការបរទេសកូរ៉េខាងជើងបានចោទប្រកាន់អាមេរិកថា មានចេតនាធ្វើឱ្យស្ថានភាពកាន់តែតានតឹង ដោយសារការធ្វើសមយុទ្ធផ្លូវអាកាសរួមគ្នាជាមួយកូរ៉េខាងត្បូង ។ ដូច្នេះ វាបង្ហាញយ៉ាងច្បាស់ថា អាមេរិកនឹងប្រើអាវុធនុយក្លេអ៊ែរប្រឆាំងជាមួយកូរ៉េខាងជើង និងចង់បង្កើតសង្គ្រាម ។ លើសពីនេះ កូរ៉េខាងជើងបានបង្ហាញការសោកស្តាយពីការខ្វះភាពទទួលខុសត្រូវ និងបារម្ភពីការពង្រីកអំណាចរបស់អាមេរិក ។

គួរបញ្ជាក់ថា អាមេរិក និងកូរ៉េខាងត្បូងបានធ្វើសមយុទ្ធផ្លូវអាកាសរួមគ្នាចាប់ពីថ្ងៃទី៦ ខែមីនា កន្លងមក ក្នុងនោះមានយន្តហោះទម្លាក់គ្រាប់បែកធុនធ្ងន់ B-52H របស់អាមេរិក ដែលវាអាចផ្ទុកអាវុធនុយក្លេអ៊ែរ ហើយប្រទេសទាំងពីរក៏បានធ្វើសមយុទ្ធរួមគ្នាផ្សេងទៀតផងដែរ ។

ប្រទេសសម្ព័ន្ធមិត្តទាំងពីរបានបង្កើនកិច្ចសហការផ្នែកការពារជាតិ ដោយបានធ្វើសមយុទ្ធផ្នែកកងទ័ពដើម្បីប្រឈមមុខនឹងការគំរាមកំហែងពីកូរ៉េខាងជើងកាន់តែកើនឡើង ខណៈកូរ៉េខាងជើងបានសាកល្បងបាញ់មីស៊ីលជាច្រើនលើកក្នុងរយៈពេល២-៣ខែកន្លងមក ។ កូរ៉េខាងជើងបញ្ជាក់ថា គម្រោងអាវុធនុយក្លេអ៊ែរ និងមីស៊ីលរបស់កូរ៉េខាងជើង គឺដើម្បីការពារខ្លួនប៉ុណ្ណោះ ហើយមានប្រតិកម្មយ៉ាងខ្លាំងនឹងការធ្វើសមយុទ្ធរវាងអាមេរិក និងកូរ៉េខាងត្បូង ដោយកូរ៉េខាងជើងនិយាយថា ជាការធ្វើសមយុទ្ធទាំងបំពាន ៕ ប្រភព ៖ khaosod

រដ្ឋធានីប៊ែរឡាំង៖ ក្រោយពេលក្រុមមន្រ្ដីសហរដ្ឋអាមេរិក កំពុងតែព្រួយបារម្ភ អំពីឧបករណ៍ស្ទួច (Crane) ធំៗ ផលិតដោយប្រទេសចិន កំពុងតែប្រើប្រាស់ នៅតាមកំពង់ផែពាសពេញប្រទេសមហាអំណាចមួយនេះ ដោយរួមទាំងកន្លែងមួយចំនួន ប្រើប្រាស់ដោយយោធា អាចនឹងក្លាយឧបករណ៍ចារកម្មលាក់ខ្លួន សម្រាប់ក្រុងប៉េកាំង នោះមក អាល្លឺម៉ង់ ក៏ត្រូវបានគេរាយការណ៍ អំពីគម្រោងហាមឃាត់ ដល់ក្រុមហ៊ុនហួវ៉ៃ (Huawei) និង ក្រុមហ៊ុន ZTE រហូតធ្វើឲ្យចិន ផ្ទុះនូវការមិនសប្បាយចិត្តយ៉ាងខ្លាំង។

សារព័ត៌មាន NY Breaking បានចេញផ្សាយ កាលពីព្រឹក ថ្ងៃពុធ ទី៨ ខែមីនា ឆ្នាំ២០២៣ ថា ស្ថានទូតចិន ប្រចាំនៅក្នុងប៊ែរឡាំង បានបញ្ជាក់ ថា ចិន មានការមិនពេញចិត្ដយ៉ាងខ្លាំង ជាមួយនឹងគម្រោងរបស់អាល្លឺម៉ង់ ហាមឃាត់ដល់ក្រុមហ៊ុន Huawei និង ក្រុមហ៊ុន ZTE គ្រប់គ្រងដោយរដ្ឋចិន ពីបណ្ដាញ 5G របស់ប្រទេសនេះ។

ស្ថានទូតចិន ប្រចាំនៅក្រុងប៊ែរឡាំង បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃពុធ ថា «ប្រសិនបើសេចក្ដីរាយការណ៍នោះ ក្លាយជាការពិតមែន ចិន មានការភ្ញាក់ផ្អើលយ៉ាងខ្លាំង និង មិនពេញចិត្ត ខណៈនាយកដ្ឋានពាក់ព័ន្ធរបស់រដ្ឋាភិបាលអាល្លឺម៉ង់ បានសម្រេចចិត្តបែបនេះ ដោយគ្មានមូលដ្ឋានពិតប្រាកដណាមួយ មកបញ្ជាក់។ ក្រុងប៉េកាំង ប្រឆាំងដាច់ខាត ចំពោះការបង្កើតគោលគំនិតសន្តិសុខជាតិរបស់អាល្លឺម៉ង់ និង ការរំលោភបំពានអំណាចរដ្ឋ ដើម្បីជ្រៀតជ្រែក នៅក្នុងកិច្ចសហប្រតិបត្តិការទីផ្សារ ជាមួយចិន។ សកម្មភាពបែបនេះ មិនត្រឹមតែបំពារបំពាន មកលើច្បាប់សេដ្ឋកិច្ច និង គោលការណ៍ប្រកួតប្រជែង ដោយយុត្តិធម៌ប៉ុណ្ណោះទេ ប៉ុន្តែវាថែមទាំងបង្កគ្រោះថ្នាក់ ដល់អ្នកដទៃ ជាជាងផលប្រយោជន៍ផ្ទាល់ខ្លួន។

ការអត្ថាធិប្បាយរបស់ស្ថានទូតចិន បានកើតឡើង ក្រោយពេលកាសែតរបស់អាល្លឺម៉ង់ Zeit Online (ហ្សេត អនឡាញ) បានរាយការណ៍ ថា ក្រុងប៊ែកឡាំង កំពុងតែរៀបចំ ហាមឃាត់ដល់ក្រុមហ៊ុនទូរគមនាគមន៍ ពីការប្រើប្រាស់សមាសធាតុមួយចំនួនរបស់ក្រុមហ៊ុនបច្ចេកវិទ្យាយក្សចិន Huawei និង ZTE បន្ទាប់ពីមានការហាមឃាត់ស្រដៀងគ្នា ដោយអូស្ត្រាលី ជប៉ុន ចក្រភពអង់គ្លេស និង សហរដ្ឋអាមេរិក។

សារព័ត៌មានរបស់អាល្លឺម៉ង់ដដែលនេះ បានរាយការណ៍ ថា ទីភ្នាក់ងារសន្តិសុខតាមអ៊ិនធើណេត និង ក្រសួងមហាផ្ទៃរបស់អាល្លឺម៉ង់ បានសម្រេចចិត្ត ក្រោយការចំណាយពេល អស់ជាច្រើនខែ នៅក្នុងការស៊ើបអង្កេត លើបណ្តាញ 5G របស់ប្រទេស សម្រាប់ទប់ទល់ហានិភ័យសុវត្ថិភាព ដែលអាចនឹងកើតឡើង។

ជាមួយគ្នានេះ ក្រុមមន្ត្រីសន្តិសុខលោកខាងលិច បានអះអាងថា ក្រុមហ៊ុន Huawei និង ZTE បង្កការគំរាមកំហែង ដល់សន្តិសុខជាតិ និង ឯកជនភាព ដោយសារតែក្រុមហ៊ុនទាំងនេះ មានទំនាក់ទំនងយ៉ាងជិតស្និទ្ធ ជាមួយនឹងក្រុងប៉េកាំង។ បញ្ហានេះ ធ្វើឱ្យពួកគេមិនស័ក្តិសម សម្រាប់ការចូលរួម នៅក្នុងបណ្តាញទំនាក់ទំនងជំនាន់ក្រោយនេះឡើយ។

ដោយឡែក ក្រុមមន្រ្ដីសហរដ្ឋអាមេរិក និង មន្ទីរបញ្ចកោណ ឯណោះវិញ ក៏កំពុងតែព្រួយបារម្ភ ថា ដងសន្ទូចយក្ស (Giant Crane) ផលិត ដោយប្រទេសចិន កំពុងតែប្រតិបត្ដិការ នៅតាមកំពង់ផែនានាពាសពេញ សហរដ្ឋអាមេរិក ដោយរួមទាំងកន្លែងផ្សេងទៀត ត្រូវប្រើប្រាស់ដោយយោធា អាចនឹងក្លាយជាឧបករណ៍ចារកម្មរបស់ក្រុងប៉េកាំង។

ក្រុមមន្ត្រីសន្តិសុខជាតិ និង មន្ទីរបញ្ចកោណមួយចំនួន បានប្រៀបធៀបឧបករណ៍ស្ទូចយក្ស (Crane) ស្ទូចពីកប៉ាល់ទៅច្រាំង ផលិតដោយក្រុមហ៊ុន ZPMC មានមូលដ្ឋាន នៅប្រទេសចិន អាចជាឧបករណ៍ចាប់សញ្ញាដ៏ទំនើប អាចចុះឈ្មោះ និង តាមដានភ័ស្តុតាង ហើយទិសដៅរបស់កុងតឺន័រ។ សកម្មភាពបែបនេះ កំពុងតែជំរុញឱ្យមានការព្រួយបារម្ភ ថា ចិន អាចចាប់យកព័ត៌មាន អំពីសម្ភារ ដែលត្រូវបានដឹកជញ្ជូននៅក្នុង ឬ ក្រៅប្រទេស ដើម្បីគាំទ្រដល់ប្រតិបត្តិការយោធារបស់សហរដ្ឋអាមេរិក នៅជុំវិញពិភពលោក៕

ប្រទេសវៀតណាម ៖ ការផលិតទំនិញក្នុងផ្នែកឧស្សាហកម្ម និងការនាំចេញរបស់វៀតណាមបានកើនឡើងនៅខែកុម្ភៈ ឆ្នាំ២០២៣ បើធៀបនឹងឆ្នាំ២០២២ ក្នុងនោះមួយផ្នែកដោយសារចំនួនការលក់ស្បែកជើងកើនឡើង ។ ការផលិតកើនឡើងនេះជាសញ្ញាបង្ហាញថា តម្រូវការទំនិញវៀតណាមបានងើបឡើងវិញក្នុងពិភពលោក ។

ទោះយ៉ាងណា អ្នកគ្រប់គ្រងនៅតាមបណ្តារោងចក្រលើកឡើងថា តម្រូវការទំនិញវៀតណាមនៅលើពិភពលោកមិនច្បាស់លាស់ ហើយការផលិតទូរស័ព្ទស្មាតហ្វូន និងឧបករណ៍ទូរស័ព្ទដៃបានធ្លាក់ចុះ បើទោះជាការនាំចេញទូរស័ព្ទស្មាតហ្វូនកើនឡើងក្តី ។

ការិយាល័យស្ថិតិជាតិបញ្ជាក់ថា ការនាំចេញទំនិញរបស់វៀតណាមបានកើនឡើង១១% នៅខែកុម្ភៈ ឆ្នាំ២០២៣ បើធៀបនឹងឆ្នាំ២០២២ ហើយការផលិតទំនិញក្នុងផ្នែកឧស្សាហកម្មកើនឡើង៣,៦% ក្នុងរយៈពេលដូចគ្នា ។ ការផលិតទំនិញកើនឡើងនៅខែកុម្ភៈនេះ គឺក្រោយពីការផលិតទំនិញបានធ្លាក់ចុះ៨% នៅខែមករា ឆ្នាំ២០២៣ ដូច្នេះ ការផលិតទំនិញតែងធ្លាក់ចុះជាធម្មតានៅថ្ងៃឈប់សម្រាកចូលឆ្នាំវៀតណាម ។

ទោះយ៉ាងណា ការផលិតទូរស័ព្ទស្មាតហ្វូនរបស់ក្រុមហ៊ុន Samsung នៅវៀតណាមបានធ្លាក់ចុះជិត១០% រីឯការផលិតឧបករណ៍ទូរស័ព្ទដៃក៏បានធ្លាក់ចុះជិត១៥%ដែរ ។ ជាមួយគ្នានេះ ការនាំចេញទូរស័ព្ទស្មាតហ្វូនបានកើនឡើង១៤,៧% ។

ចំណែកការផលិតស្បែកជើងវិញបានកើនឡើងជិត១៩% នៅខែកុម្ភៈ ឆ្នាំ២០២៣ ហើយការនាំចេញកើនឡើង៤,១% ក្រោយពីបានធ្លាក់ចុះខ្លាំងនៅខែមករា ។ ទោះយ៉ាងណា ក្នុងរយៈពេល២ខែដំបូងនៃឆ្នាំ២០២៣ ការនាំចេញស្បែកជើងបានធ្លាក់ចុះ១៦% បើធៀបនឹងរយៈពេលដូចគ្នាឆ្នាំ២០២២ ។

ការនាំចេញទំនិញវៀតណាមបានកើនឡើងយ៉ាងខ្លាំងនៅខែកុម្ភៈ ឆ្នាំ២០២៣ ស្មើនឹងទឹកប្រាក់២៥,៨៨ពាន់លានដុល្លារអាមេរិក ក្រោយពីធ្លាក់ចុះ២១,៣% នៅខែមករា ។ រីឯការនាំចូលទំនិញបានធ្លាក់ចុះប្រមាណ៦,៧% ៕ ប្រភព ៖ AEC connect