សារព័ត៌មាន vnexpress បានចុះផ្សាយនៅថ្ងៃទី១៩ ខែមេសា ឆ្នាំ២០២៣ នេះថា វៀតណាមកាត់បន្ថយការចំណាយរបស់ខ្លួនចំនួន ៥០ ១៥០ ដុល្លារក្នុងមួយថ្ងៃ នៃព្រឹត្តិការណ៍ស៊ីហ្គេម ក្រោយកម្ពុជាជាម្ចាស់ផ្ទះផ្តល់កន្លែងស្នាក់នៅដោយឥតគិតថ្លៃសម្រាប់គណៈប្រតិភូចូលរួមការប្រកួតកីឡាស៊ីហ្គេមលើកទី៣២។

ប្រភពដដែលបានឱ្យដឹងទៀតថា នេះជារឿងមិនធ្លាប់មានក្នុងប្រវត្តិសាស្ត្រស៊ីហ្គេម មិន ដូចប្រទេសអាស៊ីអាគ្នេយ៍មុនៗរៀបចំឡើយដោយប្រតិភូចូលរួមត្រូវចំណាយ៥០ដុល្លារក្នុងម្នាក់ក្នុងមួយថ្ងៃ ប៉ុន្តែខាងកម្ពុជាទាំងការស្នាក់នៅ ហូបចុក ការចូលរួមទស្សនាសុទ្ធតែមិនគិតថ្លៃទាំងអស់ ប៉ុន្តែតម្រូវឱ្យមានការចុះឈ្មោះជាមុន។

ការសម្រេចចិត្តរបស់កម្ពុជាក្នុងការមិនយកប្រាក់ពីប្រតិភូកីឡាបានចូលរួមចំណែកកាត់បន្ថយការចំណាយយ៉ាងធំសម្រាប់ប្រទេសដែលចូលរួមប្រកួត។ តួយ៉ាង គណៈប្រតិភូកីឡាវៀតណាមចូលរួមការប្រកួតកីឡាដែលមានមនុស្សចំនួន ១ ០០៣ នាក់នឹងត្រូវចំណាយ ៥០ ១៥០ ដុល្លារក្នុងមួយថ្ងៃ ដូច្នេះក្នុងមួយព្រឹត្តិការណ៍នេះនឹងចំណាយជាង៥០ម៉ឺនដុល្លារប្រសិនបើកម្ពុជាគិតថ្លៃកន្លែងស្នាក់នៅនិងការហូកចុក។

គួរបញ្ជាក់ថា នេះជាលើកទីមួយដែលកម្ពុជាធ្វើជាម្ចាស់ផ្ទះស៊ីហ្គេម ដែលឆ្នាំនេះមានកីឡាចំនួន៣៧ប្រភេទត្រូវប្រកួតដោយមានកីឡាខ្លះចាប់ផ្តើមប្រកួត មុនកាលកំណត់ជាផ្លូវការដែលព្រឹត្តិទៅចាប់ពីថ្ងៃទី៥-១៧ ខែឧសភា ឆ្នាំ២០២៣៕

ប្រទេសថៃ ៖ លោក Anutin Charnvirakul ឧបនាយករដ្ឋមន្ត្រី និងជារដ្ឋមន្ត្រីក្រសួងសុខាភិបាល ព្រមទាំងលោកវេជ្ជបណ្ឌិត Opas Karnkawinpong មកពីក្រសួងសុខាភិបាល បានរួមគ្នាធ្វើកិច្ចប្រជុំត្រួតពិនិត្យស្ថានការណ៍ជំងឺកូវីដ-១៩ រួមជាមួយនាយកប្រតិបត្តិក្រសួងសុខាភិបាល ព្រមទាំងមន្ត្រីពាក់ព័ន្ធមួយចំនួនទៀត ។ លោក Anutin ថ្លែងថា លោកបានស្តាប់ពីស្ថានការណ៍ជំងឺកូវីដដែលបានឆ្លងរាតត្បាតខ្លាំងនៅប្រទេសថៃ ហើយបើតាមការព្យាកររបស់នាយកដ្ឋានគ្រប់គ្រងជំងឺ គឺជំងឺកូវីតនេះមិនធ្ងន់ធ្ងរដូចពេលមុនទេ ។

លោក Anutin លើកឡើងថា ពលរដ្ឋថៃភាគច្រើនមានភាពស៊ាំនឹងជំងឺនេះហើយ ទាំងការឆ្លងរោគ និងការទទួលបានវ៉ាក់សាំង ។ រីឯករណីជំងឺកូវីដពូជថ្មីឈ្មោះ XBB.1.16 ដែលគេផ្សព្វផ្សាយថា កំពុងឆ្លងរាលដាលខ្លាំង ហើយធ្វើឱ្យមនុស្សជាច្រើនបារម្ភនោះ គឺវាជារឿងធម្មជាតិដែលមេរោគត្រូវបំលែងខ្លួនគ្រប់ពេលវេលា ។ ប៉ុន្តែវាជាពូជផ្សំគ្នារបស់ពូជអូមីក្រុង ហើយវាមិនធ្ងន់ធ្ងរលើសពូជចាស់ទេ ។ ចំណែកអ្នកងាយឆ្លងជំងឺកូវីដពូជថ្មីនេះ គឺអ្នកមិនទាន់បានចាក់វ៉ាក់សាំង ឬទទួលបានវ៉ាក់សាំងចុងក្រោយលើសពី៦ខែ ។

លោក Anutin បន្តថា ការចាក់វ៉ាក់សាំងការពារជំងឺកូវីដ នៅតែមានភាពចាំបាច់ដើម្បីធ្វើឱ្យខ្លួនយើងស៊ាំ ហើយវានឹងជួយមិនឱ្យយើងឈឺធ្ងន់ធ្ងរ និងស្លាប់ ជាពិសេស ក្រុមងាយឆ្លងជំងឺនេះ ។ លោកបានបញ្ជាឱ្យមន្ទីរពេទ្យនៅទូទាំងប្រទេស និងមន្ទីរពេទ្យស្ថិតក្រោមការគ្រប់គ្រងរបស់នាយកដ្ឋាន រៀបចំកន្លែងចាក់វ៉ាក់សាំងការពារជំងឺកូវីដ ដោយផ្តល់លក្ខណៈងាយស្រួលដល់ពលរដ្ឋ ។

បច្ចុប្បន្ន ប្រទេសថៃមានវ៉ាក់សាំងភាគច្រើនជាប្រភេទ Bivalent ។ ក្រុមគ្រូពេទ្យនិយាយថា ពលរដ្ឋអាចចាក់វ៉ាក់សាំងការពារជំងឺកូវីដ និងវ៉ាក់សាំងការពារផ្តាសាយធំបានក្នុងពេលជាមួយគ្នា ។ ដូច្នេះ សំណូមពរឱ្យពលរដ្ឋទាំងអស់នាំគ្នាមកចាក់វ៉ាក់សាំងការពារកូវីដ និងវ៉ាក់សាំងផ្តាសាយធំព្រមគ្នា ។ រីឯករណីពលរដ្ឋបារម្ភថា ជំងឺកូវីដនឹងឆ្លងរាតត្បាតខ្លាំងនោះ ក្រុមគ្រូពេទ្យសូមបញ្ជាក់ថា មន្ទីរពេទ្យបានត្រៀមរួចស្រេចហើយក្នុងការព្យាបាលជំងឺជូនពលរដ្ឋ ដូចជា ថ្នាំ និងឧបករណ៍ផ្សេងៗ ។

ចំណែកការផ្សព្វផ្សាយព័ត៌មានពីជំងឺធ្ងន់ធ្ងរផ្សេងៗដូចជា ហូរឈាមពីរន្ធច្រមុះ និងភ្នែកក្រហមនោះ គឺអាការៈទាំងនេះអាចកើតឡើងបាន ប៉ុន្តែវាមិនកើតឡើងចំពោះមនុស្សគ្រប់គ្នាទេ ។ កន្លងមក មានពលករបរទេសមកធ្វើការនៅប្រទេសថៃ ហើយបានស្លាប់ភ្លាមៗបន្ទាប់ពីពិនិត្យតាម ATK ឃើញលទ្ធផលវិជ្ជមាន ហើយគេនិយាយថា ពលករនេះបានឆ្លងជំងឺកូវីដពូជថ្មី XBB.1.16 ដោយសារភ្នែកមានពណ៌ក្រហម ។ ដូច្នេះ វាមិនអាចទៅរួចទេ ព្រោះបើឆ្លងជំងឺកូវីដមែន វាមិនបានធ្វើឱ្យស្លាប់ភ្លាមៗទេ គឺត្រូវឈឺជាមុនសិន ។

ជាចុងក្រោយ លោក Anutin បានចាត់ឱ្យនាយកដ្ឋានគ្រប់គ្រងជំងឺបង្កើនការផ្សព្វផ្សាយព័ត៌មាន ដើម្បីឱ្យពលរដ្ឋបានយល់ដឹងកាន់តែច្រើន និងចៀសវាងការភ័យខ្លាច ៕ ប្រភព ៖ sanook

វៀតណាម៖ សមាគមស្វាយចន្ទីវៀតណាម (Vinacas) ទើបតែបានផ្ញើឯកសារ “សំណើសុំជំនួយ” ទៅកាន់សហព័ន្ធពាណិជ្ជកម្ម និងឧស្សាហកម្មវៀតណាម (VCCI) ក្រសួងឧស្សាហកម្ម និងពាណិជ្ជកម្ម ដោយបញ្ជាក់ពីការលំបាកក្នុងត្រីមាសទីមួយ។
យោងតាមក្រុមហ៊ុន Vinacas ឧស្សាហកម្មគ្រាប់ស្វាយចន្ទីរបស់វៀតណាមគឺជាក្រុមហ៊ុនឈានមុខគេលើពិភពលោកក្នុងការផលិត និងនាំចេញអស់រយៈពេលជាច្រើនឆ្នាំ ប្រហែល ៣.៥ ទៅ ៣.៨ ពាន់លានដុល្លារក្នុងមួយឆ្នាំ។ ប៉ុន្តែជំហរនេះកំពុងរង្គោះរង្គើដោយសារស្ថានភាពកើនឡើងនៃគ្រាប់ស្វាយចន្ទីនាំចូល និងការប្រកួតប្រជែងមិនយុត្តិធម៌។

ក្រុមហ៊ុន Vinacas មានការព្រួយបារម្ភថា ចន្លោះប្រហោងពីគោលនយោបាយនាំចេញ-នាំចូល បណ្តាលឱ្យគ្រាប់ស្វាយចន្ទីអាហ្វ្រិកកើនឡើងយ៉ាងខ្លាំង ហើយសហគ្រាសក្នុងស្រុកមានហានិភ័យនៃការក្ស័យធន។
យោងតាមក្រុមហ៊ុន Vinacas បានឱ្យដឹងថា “នេះគឺជាផលវិបាកនៃការអនុញ្ញាតឱ្យនាំចូលគ្រាប់ស្វាយចន្ទីរបស់ទ្វីបអាហ្វ្រិកចូលទៅប្រទេសវៀតណាមដោយមិនអនុវត្តវិធានការដើម្បីការពារឧស្សាហកម្មកែច្នៃក្នុងស្រុក”។
សហគ្រាសក្នុងស្រុកបាត់បង់គុណសម្បត្តិប្រកួតប្រជែងរបស់ពួកគេ ដោយសារវត្ថុធាតុដើម (គ្រាប់ស្វាយចន្ទីឆៅ) ត្រូវបង់ពន្ធនាំចេញទៅអាហ្វ្រិក ខណៈទ្វីបអាហ្វ្រិកនាំចូលគ្រាប់ស្វាយចន្ទីកែច្នៃទៅវៀតណាមដោយគ្មានពន្ធ។
ទាក់ទិននឹងការពិតនេះក្រុមហ៊ុន Vinacas បានស្នើទៅរដ្ឋាភិបាល និងក្រសួងឧស្សាហកម្ម និងពាណិជ្ជកម្ម ដើម្បីចរចាឱ្យប្រទេសអាហ្វ្រិកលើកលែងពន្ធលើគ្រាប់ស្វាយចន្ទីឆៅ ដើម្បីបង្កើតភាពយុត្តិធម៌ក្នុងការប្រកួតប្រជែង។ ប្រសិនបើសំណើនេះមិនត្រូវបានបំពេញទេ វៀតណាមគួរតែពិចារណាដាក់ពន្ធនាំចូល ២៥% លើគ្រាប់ស្វាយចន្ទីកែច្នៃរបស់ទ្វីបអាហ្វ្រិក ដូចដែលឥណ្ឌាកំពុងអនុវត្ត ដើម្បី “ការពារអនាគតនៃឧស្សាហកម្មគ្រាប់ស្វាយចន្ទីឆៅនៅក្នុងស្រុក ៕ ប្រភព៖vnexpress

ប្រទេសចិន ៖ រថភ្លើងឆ្លងកាត់ព្រំដែនប្រទេសចិន និងឡាវ មានប្រវែងជាង១.០០០គីឡូម៉ែត្រ ត្រូវបានគេដាក់ឱ្យដំណើរការនៅខែធ្នូ ឆ្នាំ២០២១ ប៉ុន្តែវាផ្តល់សេវាកម្មសម្រាប់តែអ្នកដំណើរក្នុងប្រទេសប៉ុណ្ណោះ ដោយសារនៅពេលនោះ មានការឆ្លងរាតត្បាតនៃជំងឺកូវីដ-១៩ ។ ប៉ុន្តែនៅឆ្នាំ២០២៣នេះ រថភ្លើងចិន-ឡាវបានតភ្ជាប់ការធ្វើដំណើររវាងប្រទេសទាំងពីរកាន់តែច្រើន និងជួយជំរុញដល់វិស័យទេសចរណ៍ឆ្លងកាត់ព្រំដែនផងដែរ ។

ខ្សែរថភ្លើងនេះនឹងចតចំនួន៨ស្ថានីយនៅតាមបណ្តោយផ្លូវ រួមទាំងស្ថានីយទេសចរណ៍ពេញនិយមមួយចំនួនផងដែរដូចជា ក្រុងស៊ីបសងប៉ាន់ណា ស្ថិតនៅភាគនិរតីប្រទេសចិន និងក្រុងហ្លួងព្រះបាង ប្រទេសឡាវ ។ អ្នកធ្វើដំណើរតាមរថភ្លើងនេះដំបូង ដែលចាកចេញពីប្រទេសចិនទៅកាន់ក្រុងវៀងចន្ទប្រាប់ថា វាជាបទពិសោធន៍ធ្វើដំណើរថ្មីមួយគួរឱ្យរំភើប ។

ខេត្តយូណាន ប្រទេសចិន គឺជាចំណុចគោលដៅសំខាន់មួយសម្រាប់សិស្ស-និស្សិតឡាវ ។ រថភ្លើងតភ្ជាប់គ្នាយ៉ាងពេញលេញនេះ នឹងជួយផ្តល់ភាពងាយស្រួលយ៉ាងខ្លាំងដល់ពួកគេក្នុងការធ្វើដំណើរឆ្លងកាត់ព្រំដែន ។ និស្សិតឡាវរៀននៅប្រទេសចិនប្រាប់ថា ខ្លួនមិនធ្លាប់គិតថា ការធ្វើដំណើរចេញពីគុនមីងទៅកាន់ក្រុងវៀងចន្ទ នឹងឆាប់រហ័សបែបនេះទេ ។

ក្រៅពីនេះ រថភ្លើងចិន-ឡាវបានដឹកជញ្ជូនទំនិញជាង១៨លានតោនផងដែរ ។ ឯកអគ្គរដ្ឋទូតឡាវប្រចាំប្រទេសចិន លោកស្រី Khamphao Ernthavanh បានថ្លែងថា រថភ្លើងតភ្ជាប់រវាងប្រទេសទាំងពីរនឹងជួយទាក់ទាញវិនិយោគិនពីប្រទេសចិន និងពីទូទាំងពិភពលោកកាន់តែច្រើនមកវិនិយោគនៅឡាវ ព្រមទាំងជួយលើកកម្ពស់ការតភ្ជាប់ទំនាក់ទំនងក្នុងតំបន់អាស៊ានផងដែរ ៕ ប្រភព ៖ China Face