ឯកឧត្តម វ៉ាត់ ចំរើន អគ្គលេខាធិការគណៈកម្មការរៀបចំកីឡាស៊ីហ្កេមលើកទី៣២ (CAMSOC)បានថ្លែងឱ្យដឹងថា រាជរដ្ឋាភិបាលកម្ពុជានឹងផ្តល់ប្រាក់រង្វាន់លើកទឹកចិត្តសម្រាប់អត្តពលិកដែលដណ្តើមមេដាយទាំង៣ប្រភេទពីព្រឹត្តិការណ៍ កីឡាស៊ីហ្គេមឆ្នាំ២០២៣ និងប៉ារ៉ាហ្គេមលើកទី១២។ សម្រាប់អ្នកឈ្នះមេដាយមាសនឹងទទួលបាន៤០លានរៀល មេដាយប្រាក់៣០លានរៀល និងសំរឹទ្ធិ១៦លានរៀល។

កីឡាស៊ីហ្គេមលើកទី៣២ នឹងបើកជាផ្លូវការនាថ្ងៃទី ៥ ខែឧសភា និង បិទបញ្ចប់នាថ្ងៃ ទី ១៧ ខែឧសភា ។ប៉ុន្តែប្រភេទកីឡាខ្លះនឹងចាប់ផ្តើមពីថ្ងៃទី ២៩ ខែមេសាទៅ។ ចំណែកកីឡាអាស៊ានប៉ារ៉ាហ្គេម នឹងចាប់ផ្តើមពីថ្ងៃទី ៣ ដល់ ទី ៩ ខែ មិថុនា។ រហូតមកដល់ថ្ងៃ២៤កុម្ភៈ នេះនៅសល់តែ៧០ថ្ងៃទៀតទេ៕

រដ្ឋបាលរាជធានីភ្នំពេញ បានជូនដំណឹងពីការបើកខ្សែពិសេសរថយន្តក្រុងសាធារណៈ (Expres Bus)សម្រាប់បម្រើដល់ការធ្វើដំណើទៅទស្សនា ព្រឹត្តិការណ៍ប្រកួតកីឡាអាស៊ីអាគ្នយ៍ លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ដោយពលរដ្ឋជិះដោយមិនបង់ប្រាក់។

តាមសេចក្តីជូនដំណឹងនៅថ្ងៃទី៥ ឧសភា រដ្ឋបាលរាជធានីភ្នំពេញ នឹងរៀបចំខ្សែរត់ពិសេស រថយន្តក្រុងសាធារណៈ (Epress Bus) របស់រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ សម្រាប់បម្រើដល់ការធ្វើដំណើររបស់ មហាជន រួមទាំងភ្ញៀវជាតិ និងភ្ញៀវអន្តរជាតិទាំងអស់ ទៅទស្សនាក្នុងព្រឹត្តិការណ៍ប្រកួតកីឡាខាងលើ ចាប់ពីថ្ងៃទី៥ ខែឧសភា ឆ្នាំ២០២៣ ដល់ ថ្ងៃទី៩ ខែមិថុនា ឆ្នាំ២០២៣ ដោយមិនបង់ប្រាក់ ក្នុងនោះរួមមាន៖

១- ខ្សែរត់ពិសេសរថយន្តក្រុងសាធារណៈ (Express Bus) ខ្សែទី១៖ ចេញដំណើរពីចំណតរង់ចាំរថយន្តក្រុងកោះពេជ្រ តាមបណ្តោយវិថីតីរព្រះស៊ីសុវត្ថិ ឆ្ពោះមកចំណតរង់ចាំរថយន្តក្រុងនៃពហុកីឡដ្ឋានជាតិមរតកតេជោ ដែលនឹងឈប់ នៅទីតាំងសំខាន់ៗមួយចំនួនដូចជា៖ ទីតាំងប្រកួតសណ្ឋាគារណាហ្គាវើលដ៍ទី១ និង ទី២ រួចបន្តដំណើរលើតីរវិថី ព្រះស៊ីសុវត្ថិ, ឈប់នៅស្ថានីយចំណតរង្វង់មូលកួចកាណុង និងឈប់នៅទីតាំងប្រកួត នៃកីឡដ្ឋានកងយោធពលខេមរ ភូមិន្ទ(ស្តាតចាស់) បន្ទាប់មកឆ្លងស្ពានមិត្តភាពកម្ពុជា-ជប៉ុន ដោយឈប់នៅទីតាំងប្រកួតដាយណូស័រអឹឡាយហ្វ ទីតាំង ប្រកួតមជ្ឈមណ្ឌលសន្និបាត និង ពិព័រណ៍OCIC ទីតាំងប្រកួតក្នុងបុរីរុងរឿង និងទីតាំងប្រកួតសហភាពសហព័ន្ធយុវជន កម្ពុជារាជធានីភ្នំពេញ (ស.ស.យ.ក) រួចបន្តដំណើរតាមផ្លូវជាតិលេខ៦អា, ឈប់នៅទីតាំងប្រកួតវាយកូនហ្គោលហ្គាឌិន ស៊ីធីហើយធ្វើដំណើរឆ្ពោះមកចំណតរង់ចាំរថយន្តក្រុងនៃពហុកីឡដ្ឋានជាតិមរតកតេជោ។

២- ខ្សែរត់ពិសេសរថយន្តក្រុងសាធារណៈ (Express Bus) ខ្សែទី២៖ ចេញដំណើរពីចំណតរង់ចាំរថយន្តក្រុងពហុកីឡដ្ឋាន ជាតិអូឡាំពិក តាមបណ្ដោយមហាវិថីសហព័ន្ធរុស្ស៊ី បន្តមកមហាវិថីព្រះមុនីវង្ស ឆ្ពោះមកចំណតរង់ចាំរថយន្តក្រុង នៃ ពហុកីឡដ្ឋានជាតិមរតកតេជោ ដែលនឹងឈប់នៅទីតាំងសំខាន់ៗមួយចំនួនដូចជា៖ ឈប់នៅស្ថានីយចំណតរង់ចាំ រង្វង់មូលកួចកាណុង និងឈប់នៅទីតាំងប្រកួតកីឡដ្ឋានកងយោធពលខេមរភូមិន្ទ (ស្តាតចាស់) រួចបន្តដំណើរមក វិថីឧកញ៉ាឃ្លាំងមឿង កាត់តាមតំបន់អភិវឌ្ឍន៍កាំកូស៊ីធី, ឈប់នៅទីតាំងប្រកួតក្លឹបបាល់ទាត់ភ្នំពេញក្រោន និងឈប់ នៅទីតាំងប្រកួតកីឡដ្ឋានព្រីនស៍ និងបន្តដំណើរតាមមហាវិថីឈ្នះឈ្នះទៅកាន់ចំណតរង់ចាំរថយន្តក្រុង នៃពហុកីឡដ្ឋានជាតិមរតកតេជោ៕

«អ្នកចម្បាំងក្រុងអង្គរ» ពីតារាចម្រៀង នីកូ , ពេជ្រ សូលីកា , រ៉ាប៊ី , ភី សេន , បាក់យ៉ុង និង ជេន បានផលិតជាពិសេសដើម្បីអបអរកម្ពុជាក្នុងនាមជាម្ចាស់ផ្ទះនៃការរៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។ អ្វីដែលមិននឹកស្មាន នៅពីក្រោយការផលិត MV បទចម្រៀងនេះ ពេជ្រ សូលីកា ត្រូវបញ្ជូនទៅកាន់មន្ទីរពេទ្យភ្លាមៗព្រោះដួលសន្លប់បាត់ស្មារតី។

ពិតជាមានមោទកភាពណាស់សម្រាប់ប្រទេសកម្ពុជា ដែលបង្កើតប្រវត្តិសាស្រ្តថ្មីលើទឹកដីអច្ឆរិយជាម្ចាស់ផ្ទះនៃការប្រកួតកីឡាអាស៊ីអាគ្នេយ៍លើកទី៣២។ ជាកិច្ចតបស្នងមាតុភូមិតារាចម្រៀងជាច្រើនបានរួបរួមគ្នាផលិតបទចម្រៀងតាមបែបផែនផ្សេងៗគ្នាដើម្បីអបអរសាទរនាឱកាសនេះ។
ក្នុងនោះបទចម្រៀងមួយបទមានចំណងជើងថា «អ្នកចម្បាំងក្រុងអង្គរ» ពីសិល្បករ៦រូបបញ្ចូនគ្នា ទទួលបានការគាំទ្រពីមហាជនមានទស្សនា១លានដង រហូតក្រុមការងារផលិតបទចម្រៀងនេះបានទម្លាយពីសកម្មភាពក្រៅឆាកនៃក្រុមការងារខ្លួនមានការលះបង់ខ្លាំង ក្នុងនោះគឺតារាចម្រៀង ពេជ្រ សូលីកា បានដួលសន្លប់បាត់ស្មារតី ត្រូវបញ្ជូលទៅកាន់មន្ទីរពេទ្យភ្លាមៗ។

តាមរយៈផេក 3fun បាន រៀបរាប់ថា ក្រុមការងារនិងសិល្បករទាំង៦រូបរួមមាន៖នីកូ , ពេជ្រ សូលីកា , រ៉ាប៊ី , ភី សេន , បាក់យ៉ុង និង ជេន ត្រូវងើបតាំងពីម៉ោង២ភ្លឺ ឈរក្រោមកំដៅថ្ងៃ ដាច់បាយ អត់ហ៊ានសម្រាក ព្រោះមានពេលតែ១ថ្ងៃសម្រាប់ថតបទនេះ រហូតមានអ្នកខ្លះដួល សន្លប់ ដឹកទៅពេទ្យភ្លាមៗ ធូរបានបន្តិចក៏ត្រឡប់មកថតវិញ ធ្វើយ៉ាងណាបំពេញការងារជូនជាតិឱ្យបានទាន់ពេលវេលា ដោយក្តីស្រលាញ់ចេញពីបេះដូង អស់កម្លាំងកាយ តែកម្លាំងចិត្តជូនជាតិ ។ មិនត្រឹមតែប៉ុណ្ណោះដំណើរការនៃការផលិតបទចម្រៀងនេះមានឧបសគ្គច្រើន ដែលគម្រោងផលិតបទនេះមានរយៈពេលខ្លី ប៉ុន្តែក្រុមការងារតស៊ូជាមួយគ្នា ជំនះឧបសគ្គជាមួយគ្នា ដើម្បីជាអនុស្សាវរីយិ៍នៃការចងចាំដ៏ល្អបំផុត និងដើម្បីជាតិមាតុភូមិ ៕

ក្រសួងអប់រំ យុវជន និងកីឡា បានចេញសេចក្តីថ្លែងការប្រកាសគាំទ្រដល់ឯកឧត្តមនាយឧត្តមសេនីយ៍ សៅ សុខា បន្តធ្វើជាប្រធានសហព័ន្ធកីឡាបាល់ទាត់កម្ពុជា ជាបន្តទៀត បន្ទាប់ពីប្រធាន FFC រូបនេះប្រកាសថាលោកនឹងលាលែងពីតំណែងប្រសិនបើក្រុមជម្រើសជាតិបាល់ទាត់បុរសកម្ពុជាអាយុក្រោម២២ឆ្នាំ មិនអាចឈានដល់វគ្គពាក់កណ្តាលផ្តាច់ព្រ័ត្របាន ខណៈកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី៣២នេះ។

សេចក្តីថ្លែងការរបស់ក្រសួងអប់រំ នៅថ្ងៃទី៣ ខែឧសភា ឆ្នាំ២០២៣ បានឱ្យដឹងថា ក្រោមការដឹកនាំរបស់ ឯកឧត្តម នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់ រយៈពេលជាង១០ឆ្នាំកន្លងមក បានធ្វើឱ្យ កីឡាបាល់ទាត់ នៅក្នុងព្រះរាជាណាចក្រកម្ពុជា មានការរីកចម្រើន ទាំងបរិមាណ និងគុណភាព ជាអាទិ៍ សមត្ថភាពកីឡាករ គ្រូបង្វឹក មន្ត្រី អាជ្ញាកណ្តាល និងក្លិបបាល់ទាត់អាជីព នានា មានសមត្ថភាព និងមានលទ្ធភាពចូលរួមការប្រកួតប្រជែងជាលក្ខណៈតំបន់ និងអន្តរជាតិ ជាពិសេស នៅក្នុងការប្រកួតនាពេលកន្លងមក ការខិតខំប្រកួត និងបច្ចេកទេសលេងបាល់របស់កីឡាករបាល់ទាត់កម្ពុជា បានទាក់ទាញទស្សនិកជនឱ្យចូលរួមទស្សនាផ្ទាល់ និងទស្សនាតាមអនឡាញ ភ្លូកទឹក ភ្លូកដី និងជឿជាក់ថា បាល់ទាត់កម្ពុជានឹងឈានទៅប្រកួតប្រជែងនៅកម្រិតតំបន់បាន។

បន្ថែមលើនេះទៀត ក្នុងស្មារតីកសាង និងប្រមូលនូវធនធានកីឡាករបាល់ទាត់ ឯកឧត្តម នាយឧត្ដម សេនីយ៍ ប្រធានសហព័ន្ធ បានរៀបចំឱ្យមាននូវទីលានបាល់ទាត់នៅតាមសាលាតម្រង់ទិសទាំង ២៥ រាជធានី ខេត្ត និងរៀបចំកម្មវិធីអភិវឌ្ឍកីឡាបាល់ទាត់នៅតាមសាលាបឋមសិក្សា និងអនុវិទ្យាល័យ ដែលកត្តាទាំងនេះ បានធ្វើឱ្យសិស្សានុសិស្ស និងយុវជនជាច្រើន ចូលរួមហ្វឹកហាត់ និងលេងកីឡាបាល់ទាត់។ ម្យ៉ាងវិញទៀត ក្រោមការដឹកនាំរបស់ ឯកឧត្តម នាយឧត្តមសេនីយ៍ ប្រធានសហព័ន្ធ ការលេងកីឡាបាល់ទាត់ មានសកម្មភាព យ៉ាងផុលផុសក្នុងស្រទាប់យុវវ័យ នៅគ្រប់ទីកន្លែង ក្នុងព្រះរាជាណាចក្រកម្ពុជា។
ក្រសួងអប់រំ យុវជន និងកីឡាសូមប្រកាសគាំទ្រ និងស្នើសុំ ឯកឧត្តម នាយឧត្តមសេនីយ៍ សៅ សុខា នៅបន្តធ្វើជាប្រធានសហព័ន្ធកីឡាបាល់ទាត់កម្ពុជាបន្តទៀត៕

រដ្ឋបាលរាជធានីភ្នំពេញ នាថ្ងៃទី៣ ខែឧសភា ឆ្នាំ២០២៣ បានប្រកាសពីទីតាំងមួយចំនួននៅរាជធានីភ្នំពេញដែលមានការផ្សាយបន្តផ្ទាល់ពិធីបើក និងបិទព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ នៅវិមានពហុកីឡដ្ឋានមរតកតេជោ ខណៈកម្មវិធីនេះពុំមានសំបុត្រចែកជូនពលរដ្ឋដើម្បីទស្សនាផ្ទាល់នោះទេ។

សាលារាជធានីភ្នំពេញ បានបង្ហាញទីតាំងចំនួន៧ទីតាំងដែលមានការផ្សាយបន្តផ្ទាល់ចាប់ពីម៉ោង ៦:៣០ នាទីយប់ រហូតដល់ចប់ពិធី ដែលរួមមាន៖
១-សួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ
២-សួនច្បារមាត់ទន្លេទល់មុខភោជនីយដ្ឋានមេត្រូ ស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ
៣-ក្នុងបុរីប៉េងហួតបឹងស្ទើរ ស្ថិតនៅក្នុងសង្កាតីនិរោធ ខណ្ឌច្បារអំពៅ
៤-សួនច្បារមិត្តភាពក្បែរក្រសួងការពារជាតិ ស្ថិតនៅក្នុងសង្កាត់មិត្តភាព ខណ្ឌ៧មករា
៥-សួនច្បារទល់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ ស្ថិតនៅក្នុងសង្កាត់ គោកឃ្លាង ខណ្ឌសែនសុខ
៦-សួនច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ
៧-ទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ។

គួរបញ្ជាក់ផងដែរថា កម្ពុជានឹងរៀបចំពិធី បើក និងបិទព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ក្រោមអធិបតីភាពដ៏ខ្ពង់ខ្ពស់បំផុត សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលប្រព្រឹត្តទៅនាថ្ងៃទី០៥ ខែឧសភា ឆ្នាំ២០២៣ និងថ្ងៃទី១៧ ខែឧសភា ឆ្នាំ២០២៣៕

អាជ្ញាធរជាតិអប្សរាប្រកាសជូនដំណឹងដល់ពលរដ្ឋពីការការបិទចរាចរ និងការបង្វរទិសដៅទស្សនា ទៅតាមទីតាំងសំខាន់ៗមួយចំនួននៅ រមណីយដ្ឋានអង្គរ ដើម្បីរៀបចំព្រឹត្តិការណ៍ប្រកួតស៊ីហ្គេមលើកទី៣២ (32nd SEA Games) និងអាស៊ាន ប៉ារ៉ាហ្គេម លើកទី១២(12 ASEAN Para Games) ឆ្នាំ២០២៣។

តាមសេចក្តីជូនដំណឹងបានឱ្យដឹងថា ការបិទចរាចរ និងការបង្វែរទិសដៅទស្សនាទៅតាមទីតាំងសំខាន់ៗមួយចំនួននៅរមណីយដ្ឋានអង្គរ ដែលត្រូវរៀបចំប្រកួតកីឡាដូចខាងក្រោម៖
១- បិទការចេញចូលបរិវេណមុខប្រាសាទអង្គរវត្ត រហូតដល់ខ្លោងទ្វារដៃឆ្នាំង សម្រាប់ការប្រកួត កីឡារត់ម៉ារ៉ាតុន និងដើរប្រណាំង នៅថ្ងៃទី៦ ខែឧសភា ឆ្នាំ២០២៣ ចាប់ពីម៉ោង៥៖៣០នាទី ព្រឹក ដល់ម៉ោង១៨៖០០នាទីល្ងាច។

២- បិទការចូលទស្សនាប្រាសាទអង្គរវត្តតាមច្រកខាងលិច និងបិទការឆ្លងកាត់ទៅទស្សនាតំបន់ អង្គរធំ នៅថ្ងៃទី១១ ខែឧសភា ឆ្នាំ២០២៣ ចាប់ពីម៉ោង៦៖០០នាទីព្រឹក ដល់ម៉ោង១៣៖០០ នាទីរសៀល ដើម្បីរៀបចំការប្រកួតវិញ្ញាសាទោចក្រយានបុរស និងនារីចម្ងាយ៥០គ.ម ដែលនឹងប្រព្រឹត្តទៅនៅជុំវិញផ្លូវមុខអង្គរវត្ត ត្រពាំងសេស និងផ្លូវប៉ារីសអង្គរវត្ត។ ភ្ញៀវទេសចរអាចចូល ទស្សនាតាមច្រកខាងកើតប្រាសាទអង្គរវត្ត។

៣- បិទការឆ្លងកាត់បរិវេណវង់ធំ នៅថ្ងៃទី១២ និងថ្ងៃទី១៣ ខែឧសភា ឆ្នាំ២០២៣ ចាប់ពីម៉ោង ៦៖០០នាទីព្រឹក ដល់ម៉ោង១៥៖០០នាទីរសៀល ដើម្បីរៀបចំការប្រកួតវិញ្ញាសាកង់គួកបុរស និងនារីចម្ងាយ១៧១,៥គម និង៩៨គ.ម៕

កូរ៉េខាងត្បូង៖ រាជរដ្ឋាភិបាលកូរ៉េកំពុងប្រឈមមុខនឹងការខ្វះខាតកម្លាំងពលកម្មនិងបញ្ហាធនធានមនុស្ស នៅតាមកសិដ្ឋាន និងរោងចក្រ ខណៈដែលយុវជនកូរ៉េខាងត្បូងភាគច្រើនចាត់ទុកថាការងារនេះមានកម្រិតទាប ដោយកង្វះខាតនេះនឹងធ្វើឱ្យកសិដ្ឋាន និងរោងចក្រមួយចំនួនគ្មានកម្មករ។
បច្ចុប្បន្នក្រសួងការងារ កំពុងរៀបចំផែនការជ្រើសរើសពលករបរទេសប្រមាណ ១១ម៉ឺននាក់ ក្នុងកិច្ចខិតខំប្រឹងប្រែងដោះស្រាយរាល់បញ្ហាដែលកើតមាន ។ ប្រទេសកូរ៉េបានចាប់ផ្តើមមានគោលនយោបាយជាច្រើនដើម្បីទាក់ទាញពលករបរទេសដូចជាការបង្កើនកម្រិតទទួលទាន មុខរបរ ពេលវេលាធ្វើការ ប្រាក់បៀវត្សរ៍ និងរបបប្រាក់ខែ។ លើសពីនេះ និយោជកជាច្រើនក៏បានសាងសង់កន្លែងស្នាក់នៅប្រកបដោយផាសុខភាព និងបំពាក់ដោយសម្ភារៈល្អផងដែរ ។

ការស្ទង់មតិរបស់សកម្មជន និងកម្មករនៅឆ្នាំ ២០២១ បានរកឃើញថា ជនអន្តោប្រវេសន៍នៅ Pocheon ត្រូវធ្វើការពី ១០ ទៅ ១៥ ម៉ោងក្នុងមួយថ្ងៃ ដោយមានការឈប់សម្រាកថ្ងៃសៅរ៍រៀងរាល់ខែ។ ក្នុងមួយខែៗ ទទួលបានប្រាក់ខែពី ១,៣០០-១,៦០០ ដុល្លារ ដែលទាបជាងប្រាក់បៀវត្សរ៍អប្បបរមាដែលបានកំណត់។
លោក Kim Dal-sung ដែលគ្រប់គ្រងមជ្ឈមណ្ឌលពលករអន្តោប្រវេសន៍នៅទីក្រុង Pocheon បាននិយាយថា ខណៈពេលដែលរដ្ឋាភិបាលកំពុងធ្វើការដើម្បីកែលម្អស្ថានភាពនេះ លក្ខខណ្ឌការងារសម្រាប់ពលករចំណាកស្រុកជាច្រើននៅតែមានសភាពធ្ងន់ធ្ងរនៅឡើយ។

ប្រការនេះបាននាំឱ្យក្រុមការងាររបស់លោក Kim-suk ត្រួតពិនិត្យលំនៅដ្ឋាន និងកន្លែងធ្វើការរបស់ពលករបរទេសឱ្យបានទៀងទាត់ យ៉ាងហោចណាស់ពីរដងក្នុងមួយសប្តាហ៍ និងរក្សាទំនាក់ទំនងតាមទូរស័ព្ទ ដើម្បីឱ្យពួកយើងអាចជួយក្នុងករណីមានអាសន្ន។

ចំណែកឯកសិដ្ឋានរបស់លោក Kim-wing លោកបានសាងសង់បន្ទប់ស្នាក់នៅយ៉ាងទូលាយសម្រាប់កម្មករកាលពី៤ឆ្នាំមុន មុនពេលដែលគោលនយោបាយរបស់រដ្ឋាភិបាលត្រូវបានអនុវត្ត។ ក្រៅពីការផ្តល់លក្ខខណ្ឌរស់នៅដ៏សម្បូរបែបនេះ និយោជកគិតថានេះគឺជាមធ្យោបាយដ៏ល្អបំផុតក្នុងការរក្សាកម្មករបរទេស៕
ប្រភព៖vnexpress