ប្រទេសចិន ៖ រូបិយប័ណ្ណយាន់របស់ប្រទេសចិនត្រូវបានគេយកទៅប្រើប្រាស់ក្នុងប្រព័ន្ធទូទាត់អន្តរជាតិជាបន្តបន្ទាប់ ។ អ្នកវិភាគជាច្រើននាក់លើកឡើងថា គេនឹងទូទាត់ប្រាក់យាន់ក្នុងពាណិជ្ជកម្មរវាងប្រទេស ដូចគ្នានឹងការចាយប្រាក់ដុល្លារអាមេរិកដែលមានឥទ្ធិពលជាង ។

កាលពីខែមីនា ឆ្នាំ២០២៣ ការទូទាត់ប្រាក់រវាងប្រទេសរបស់ចិនបានចាយប្រាក់យាន់ច្រើនជាងប្រាក់ដុល្លារអាមេរិកជាលើកដំបូង ហើយប្រទេសអាហ្សង់ទីនបានប្រកាសថា នឹងទូទាត់ថ្លៃផលិតផលចិនជាប្រាក់យាន់ជំនួសប្រាក់ដុល្លារទៀតផង ដើម្បីកាត់បន្ថយទុនបម្រុងប្រាក់ដុល្លារថយចុះ ។ ប៉ុន្តែការចាយប្រាក់យាន់នៅទូទាំងពិភពលោកអាចលំបាក បើពិចារណាពីតម្រូវការគ្រប់គ្រងប្រាក់យាន់យ៉ាងតឹងរ៉ឹង ។ បើតាមប្រព័ន្ធពាណិជ្ជកម្មថ្មីដែលកំពុងរីកលូតលាស់យ៉ាងឆាប់រហ័ស ជាពិសេស ពេលប្រទេសរុស្ស៊ីត្រូវបានដកចេញពីប្រព័ន្ធទូទាត់ប្រាក់ភាគច្រើនរបស់ប្រទេសលោកខាងលិច បានធ្វើឱ្យមានការអភិវឌ្ឍថ្មីៗកាន់តែច្រើន ។

លោក Chi Lo អ្នកវិនិយោគជាន់ខ្ពស់របស់ក្រុមហ៊ុនហុងកុង BNP Paribas Asset Management និយាយថា ប្រទេសនាំចេញ និងនាំចូលផលិតផលធំៗនៅលើពិភពលោក ដូចជា ប្រទេសចិន រុស្ស៊ី និងប្រេស៊ីល កំពុងសហការគ្នាចាយប្រាក់យាន់ដើម្បីទូទាត់ប្រាក់រវាងប្រទេស ។ ដូច្នេះ ការសហការរបស់ប្រទេសទាំងនេះអាចទាក់ទាញឱ្យប្រទេសផ្សេងៗងាកមកចាយប្រាក់យាន់ក្នុងការទូទាត់ប្រាក់នាថ្ងៃអនាគត ហើយប្រទេសភាគច្រើនអាចចាយប្រាក់យាន់ជំនួសប្រាក់ដុល្លារផងដែរ ។

សង្គ្រាមរវាងប្រទេសរុស្ស៊ី និងអ៊ុយក្រែន បានធ្វើឱ្យបណ្តាប្រទេសលោកខាងលិចដាក់ទណ្ឌកម្មសេដ្ឋកិច្ចមកលើរុស្ស៊ី ហើយធ្វើឱ្យរុស្ស៊ីក្លាយជាមជ្ឈមណ្ឌលពាណិជ្ជកម្មដ៏ធំបំផុត ស្ថិតក្នុងលំដាប់ទី៤ ដែលចាយប្រាក់យាន់នៅក្រៅប្រទេសចិន ។ ដូច្នេះ ប្រាក់យាន់បានកាន់កាប់ចំណែកទីផ្សារប្តូរប្រាក់បរទេសយ៉ាងឆាប់រហ័សនៅរុស្ស៊ី គឺពីតិចជាង១% កាលពីដើមឆ្នាំ២០២២ កើនឡើងដល់៤០%-៤៥% ។ រីឯចំណែកទីផ្សារពាណិជ្ជកម្មលើពិភពលោក បើយោងតាម SWIFT បង្ហាញថា បានកើនឡើង៤,៥% នៅខែកុម្ភៈ ខណៈកាលពី២ឆ្នាំមុនបានកើនឡើង១,៣% ហើយប្រាក់ដុល្លារមានចំណែកទីផ្សារស្មើ៨៤% ។

ទោះយ៉ាងណា ប្រាក់ដុល្លារអាមេរិក យូរ៉ូ ផោន និងប្រាក់យ៉េន នៅតែមានឥទ្ធិពលក្នុងការធ្វើពាណិជ្ជកម្មលើពិភពលោក ដោយសារគេអាចចាយវាយប្រាក់ទាំងនេះយ៉ាងទូលំទូលាយ និងភ្ជាប់ជាមួយសេដ្ឋកិច្ចបើកចំហផ្សេងៗ ប៉ុន្តែប្រាក់យាន់របស់ចិនមិនអាចធ្វើបែបនេះបានទេ ៕

ប្រភព ៖ AEC Connect

នៅវេលាម៉ោង៧យប់ ថ្ងៃទី១២ ខែឧសភា នេះ ក្រុមបាល់ទាត់ជម្រើសជាតិនារីកម្ពុជា ត្រូវ ប៉ះក្រុមជម្រើសជាតិនារីវៀតណាម ក្នុងវគ្គពាក់កណ្តាលផ្តាច់ព្រ័ត្រ នៅពហុកីឡដ្ឋានជាតិអូឡាំពិក ហើយនេះជាប្រវត្តិសាស្រ្តសម្រាប់បាល់ទាត់នារីកម្ពុជាមានឱកាសអាចឈានដល់វគ្គនេះជាលើកដំបូងក្នុងព្រឹត្តិការណ៍ស៊ីហ្គេម។

ក្នុងជំនួបវគ្គសន្សំពិន្ទុកន្លងមក ក្រុមបាល់ទាត់នារីរបស់កម្ពុជាមានឱកាសអាចឈានដល់វគ្គពាក់កណ្តាលផ្តាច់ព្រ័ត្រក្នុងប្រវត្តិសាស្រ្តរបស់ខ្លួនក្រោយពីឈ្នះ២ប្រកួត និងចាញ់១ នាពេលកន្លងមកដែលធ្វើឱ្យមហាជនកំពុងសម្តែងក្តីត្រេកអរយ៉ាងខ្លាំងដែលឃើញក្រុមបាល់ទាត់នារីកាន់តែរីកចម្រើនជាបន្តបន្ទាប់។

ក្នុងជំនួបដំបូងថ្ងៃបើកឆាកការប្រកួតនាយប់ថ្ងៃទី៣ ខែឧសភា ឆ្នាំ២០២៣ នៅកីឡដ្ឋាន ស្មាត អ អេស អិន ក្រុមបាល់ទាត់នារីកម្ពុជា បានយកឈ្នះក្រុមជម្រើសជាតិឡាវ ក្នុងលទ្ធផល២ទល់០ ខណៈការប្រកួតលើកទី២ ត្រូវប៉ះគ្នាជាមួយសង្ហិបុរី កម្ពុជាបានយកឈ្នះក្នុងលទ្ធផល ១ទល់០ កាលពីយប់ថ្ងៃទី៦ ខែឧសភា។ ក្នុងការប្រកួតទី៣របស់ខ្លួន ក្រុមជម្រើសជាតិកម្ពុជា បានចាញ់ក្រុមជម្រើសជាតិថៃក្នុងលទ្ធផល ៣ទល់០ នាយប់ថ្ងៃទី៩ ខែឧសភា។

ទោះបីជាចាញ់១ប្រកួតក្តី តែក្រុមបាល់ទាត់នារីកម្ពុជា មានឱកាសចូលដល់វគ្គពាក់កណ្តាលផ្តាច់ព្រ័ត្រ ដែលត្រូវប៉ះគ្នាជាមួយក្រុមជម្រើសជាតិនារីវៀតណាមនារាត្រីនេះ ដូច្នេះបងប្អូនជនរួមជាតិកុំភ្លេចចូលរួមគាំទ្រផ្តល់កម្លាំងចិត្តឱ្យក្រុមបាល់ទាត់នារីទាំងអស់គ្នា៕

ប្រទេសចិន៖ អ្នកវិទ្យាសាស្ត្រចិនកាលពីថ្ងៃទី ៩ ខែឧសភា បានប្រកាសថាពួកគេបានបំបែកឯតទគ្គកម្មពិភពលោកសម្រាប់សមត្ថភាពបញ្ជូនទិន្នន័យខ្សែកាបអុបទិក single-core multi-core ដែលឈានដល់ ៤.១ Pbit/s ជាមួយនឹង ១៩-core fiber ។

មន្ទីរពិសោធន៍នៃបច្ចេកវិទ្យាទំនាក់ទំនងអុបទិក និងបណ្តាញនៃសាជីវកម្មបច្ចេកវិទ្យាគមនាគមន៍ និងព័ត៌មានចិន (CICT) បានបង្កើតឯតទគ្គកម្មពិភពលោកដែលបានសម្រេចនូវសមត្ថភាពបញ្ជូនសរុប ៤.១ Pbit/s ដែលកើនឡើងជិត ៤០% ពីកំណត់ត្រាកាលពីឆ្នាំមុន។ ដើម្បីបង្កើតកំណត់ត្រាថ្មីមួយនេះបាន លោក Xiao Xi ប្រធានមន្ទីរពិសោធន៍បាននិយាយថា ក្រុមអ្នកស្រាវជ្រាវរបស់លោក បានអភិវឌ្ឍន៍នូវរចនាសម្ព័ន្ធប្រព័ន្ធអុបទិកស្តាំដែលធ្វើឱ្យប្រសើរឡើង និងក្បួនដោះស្រាយដំណើរការសញ្ញាឌីជីថល ។

ដោយរក្សាបាននូវកម្រិតបញ្ជូននៃ ១៧ THz ជាមួយនឹងក្រុម S, C និង L ក្រុមស្រាវជ្រាវបានបង្កើនប្រសិទ្ធភាពឧបករណ៍អេឡិចត្រូនិកមួយចំនួននៅក្នុងប្រព័ន្ធសម្រាប់ spectroscopy នៅក្នុងដែនអុបទិកជ្រុល ដែលធ្វើអោយប្រសើរឡើងនូវដំណើរការនៃឆានែលបញ្ជូននៅក្នុងតំបន់ប្រេកង់ទាបខុសៗគ្នា។ ក្នុងពេលជាមួយគ្នានេះ ពួកគេក៏បានអនុវត្តក្បួនដោះស្រាយកម្រិតខ្ពស់ផងដែរ ដើម្បីបង្កើតថាមពលបញ្ជូនច្រើនបំផុតនៃ ៦៨០ ឆានែលប្រវែងរលកនៅក្នុងក្រុម S, C និង L ។ ដោយហេតុនេះ ក្រុមអ្នកស្រាវជ្រាវបានបង្កើនថាមពលបញ្ជូនអតិបរមានៃស្នូល និងឆានែលនីមួយៗដោយកែតម្រូវព័ត៌មានវិទ្យា នៃសញ្ញា៕

ប្រភព៖vnexpress

ប្រទេសឥណ្ឌា ៖ សារព័ត៌មានរ៉យទ័ររាយការណ៍ថា រដ្ឋាភិបាលរបស់លោក Narendra Modi នាយករដ្ឋមន្ត្រីប្រទេសឥណ្ឌាបានសាងសង់វិទ្យាស្ថានវេជ្ជសាស្ត្រដើម្បីព្យាបាលជំងឺឯកទេសរាប់សិបកន្លែង តាំងពីលោកចូលកាន់តំណែងនៅឆ្នាំ២០១៤ ។ លើសពីនេះ រដ្ឋាភិបាលបានដាក់ផែនការសាងសង់មន្ទីរពេទ្យបង្អែកយ៉ាងតិច១កន្លែងសម្រាប់៧៦១ស្រុកនៅប្រទេសឥណ្ឌា ប៉ុន្តែបញ្ហានៅត្រង់ថា ឥណ្ឌានៅតែខ្វះខាតគ្រូពេទ្យជំនាញ ខណៈឥណ្ឌាបានក្លាយជាប្រទេសមានពលរដ្ឋច្រើនបំផុតលើពិភពលោក ។

រដ្ឋាភិបាលឥណ្ឌាបានព្យាយាមរកវិធីបង្កើនចំនួនគ្រូពេទ្យ ដោយបង្កើតសាកលវិទ្យាសាស្ត្រវេជ្ជសាស្ត្រកាន់តែច្រើន ។ បើតាមទិន្នន័យរបស់ក្រសួងសុខាភិបាលបញ្ជាក់ថា រដ្ឋាភិបាលឥណ្ឌាបានទទួលយកនិស្សិតលើសមុនទ្វេដងដើម្បីរៀនពេទ្យថ្នាក់បរិញ្ញាបត្រ គឺស្មើចំនួន១០១.០៤៣នាក់ទាំងសាកលវិទ្យាល័យឯកជន និងរដ្ឋ ។ កាលពីឆ្នាំ២០១៤ ឥណ្ឌាបានទទួលនិស្សិតឱ្យរៀនពេទ្យត្រឹមតែ៥១.៣៤៨នាក់ប៉ុណ្ណោះ ហើយមាននិស្សិតជាង១,៧៦លាននាក់បានមកប្រឡងចូលរៀនពេទ្យនៅឆ្នាំ២០២២ ។

បើតាមទិន្នន័យរបស់រដ្ឋាភិបាលថា ចំនួនមន្ទីរពេទ្យរដ្ឋបានកើនឡើង៩% នៅពេលលោក Narendra Modi កាន់តំណែង ។ ទោះយ៉ាងណា ឥណ្ឌាខ្វះខាតគ្រូពេទ្យជាង៣.០០០តំណែងនៅតាមមន្ទីរពេទ្យធំៗចំនួន៣១កន្លែង រួមទាំងវិទ្យាស្ថានវេជ្ជសាស្ត្រជាច្រើនកន្លែងទៀត ។ មិនតែប៉ុណ្ណោះ ឥណ្ឌាប្រឈមនឹងការខ្វះខាតគ្រូពេទ្យផ្នែកវះកាត់, ព្យាបាលរោគស្ត្រី និងកុមារនៅតាមមន្ទីរពេទ្យក្នុងតំបន់ជនបទទៀតផង ។ រីឯនៅតាមមន្ទីរពេទ្យតូចៗ មានគ្រូពេទ្យត្រឹមតែ៤.៤៨៥នាក់ប៉ុណ្ណោះ ខណៈមន្ទីរពេទ្យទាំងនេះត្រូវការគ្រូពេទ្យរហូតដល់២១.៩២០តំណែង ។

មូលនិធិសុខភាពសាធារណៈ ជាអង្គការមិនរកប្រាក់ចំណេញលើកឡើងថា គ្រូពេទ្យឥណ្ឌាបានទៅធ្វើការនៅក្រៅប្រទេស ឬទៅធ្វើការនៅមន្ទីរពេទ្យឯកជននៅតាមទីក្រុងធំៗ ។ ហេតុនេះ ទើបពលរដ្ឋជនបទត្រូវទៅព្យាបាលជំងឺនៅតាមទីក្រុង ហើយការខ្វះខាតគ្រូពេទ្យ គឺជាមូលហេតុធ្វើឱ្យអ្នកជំងឺជាច្រើននាក់ត្រូវរង់ចាំនៅក្រៅមន្ទីរពេទ្យ ៕ ប្រភព ៖ bangkokbiznews

ប្រទេសម៉ាឡេស៊ី ៖ វាបានធ្វើឱ្យគេចាប់អារម្មណ៍នៅទូទាំងប្រទេសម៉ាឡេស៊ី ខណៈហាងមួយឈ្មោះ Sutera នៅទីក្រុង Johor Bahru បានរៀបចំកម្មវិធី Sutera Pet Fair 2023 ចាប់ពីថ្ងៃទី២៨ ខែមេសា ដល់ថ្ងៃទី១ ខែឧសភា ឆ្នាំ២០២៣ ។ ក្នុងកម្មវិធីនេះមានការប្រកួតប្រជែងសត្វចិញ្ចឹមជាច្រើនប្រភេទ ប៉ុន្តែអ្វីដែលគេចាប់អារម្មណ៍ច្រើនបំផុត គឺការប្រកួតប្រជែងឆ្មាធាត់ ។

ការប្រកួតនេះប្រកបដោយបរិយាកាសសប្បាយរីករាយ ខណៈម្ចាស់ឆ្មាទាំងឡាយបាននាំគ្នាមកតម្រង់ជួរ ព្រមទាំងឱបឆ្មារបស់ពួកគេដោយក្តីរំភើប ។ នៅពេលឡើងលើវេទិកា ពួកគេក៏បានបង្ហាញពីចំណុចគួរឱ្យស្រឡាញ់របស់ឆ្មាទៅកាន់អ្នកចូលរួម ព្រមទាំងយកឆ្មាទាំងនោះទៅថ្លឹងទម្ងន់ និងវាស់ទំហំខ្លួនផងដែរ ។

គេសង្កេតឃើញថា សត្វឆ្មាដែលបានមកចូលរួមប្រកួតនេះ ឆ្មាខ្លះពេញចិត្តនឹងម្ចាស់វានាំមកប្រកួត រីឯឆ្មាខ្លះទៀតបានស្រែកខ្លាំងៗតែម្តង ដែលធ្វើឱ្យអ្នកស្រឡាញ់សត្វចិញ្ចឹមមកចូលរួមក្នុងកម្មវិធីសប្បាយរីករាយជាខ្លាំង ។

ការបង្ហោះកម្មវិធីប្រកួតឆ្មាធាត់របស់ហាង Sutera បានល្បីល្បាញនៅទូទាំងប្រទេសម៉ាឡេស៊ី និងមានចំនួន Share ចេញជាង៤ម៉ឺនដងឯណោះ ហើយមានអ្នកចូលមកបញ្ចេញមតិជាច្រើន ។ អ្នកលេងបណ្តាញសង្គមភាគច្រើនចូលចិត្តកម្មវិធីនេះ និងបាន Share ទៅកាន់មិត្តភក្តិ និងគ្រួសារពួកគេដើម្បីយកឆ្មារបស់ខ្លួនមកប្រកួតដែរ ។

ទោះយ៉ាងណា មនុស្សមួយចំនួនបង្ហាញពីចំណុចអវិជ្ជមានថា ពួកគេបារម្ភថា ការប្រកួតនេះអាចធ្វើឱ្យម្ចាស់ឆ្មាបង្ខំឱ្យឆ្មាខ្លួនស៊ីចំណីច្រើនជាងមុនដើម្បីឈ្នះក្នុងការប្រកួតឆ្មាធាត់ ហើយវានឹងធ្វើឱ្យប៉ះពាល់ដល់សុខភាពឆ្មាផងដែរ ៕ ប្រភព ៖ khaosod