រដ្ឋធានីកៀវ៖ ថ្វីបើក្រុងកៀវ កំពុងតែវាយលុករុលទៅមុខ រំដោះទឹកដីរបស់ខ្លួន ចេញពីការគ្រប់គ្រងរបស់ទាហានរុស្ស៊ី ប្រកបដោយជោគជ័យ នៅលើសមរភូមិមួយចំនួនយ៉ាងណាក៏ដោយ ប៉ុន្ដែមេទ័ពចម្រុះរបស់សហរដ្ឋអាមេរិក បានចាត់ទុកការវាយបករបស់កងទ័ពអ៊ុយក្រែន ក្លាយជាការប្រយុទ្ធដ៏លំបាកបំផុត និង មានការចំណាយយ៉ាងច្រើន។

សារព័ត៌មាន Al Jazeera បានចេញផ្សាយ នៅថ្ងៃសុក្រ ទី១៦ ខែមិថុនា ថា លោកនាយឧត្ដមសេនីយ៍ ម៉ាក មីលឡេ (Mark Milley) នាយអគ្គសេនាធិការចម្រុះ នៃកងទ័ពសហរដ្ឋអាមេរិក បានបញ្ជាក់ ថា កងទ័ពអ៊ុយក្រែន កំពុងតែវាយរុលទៅមុខ នៅក្នុងការវាយបក ទៅលើកម្លាំងទាហានរុស្ស៊ី។ ជ័យជម្នះនេះ នឹងត្រូវការពេលវេលាយូរ និង មានការចំណាយខ្ពស់។

មេទ័ពកំពូលរបស់សហរដ្ឋអាមេរិក រូបនេះ បានសង្កត់ធ្ងន់ ថា កងទ័ពរំដោះទឹកដីរបស់អ៊ុយក្រែន ប្រឈមមុខនឹងការប្រយុទ្ធដ៏ស្វិតស្វាញ នៅក្នុងការវាយបក ដែលកំពុងតែបន្ត ប្រយុទ្ធប្រឆាំងនឹងកម្លាំងទាហានរុស្ស៊ី។ យុទ្ធនាការរំដោះទឹកដីរបស់អ៊ុយក្រែន ទំនងជានឹងមានតម្លៃខ្ពស់។

ការវាយតម្លៃរបស់សហរដ្ឋអាមេរិក លើការវាយបករបស់រដ្ឋាភិបាលក្រុងកៀវ បានកើតឡើង ស្របពេលក្រុមប្រយុទ្ធរបស់ឆេឆេន (Chechen) បានអះអាង ថា ពួកគេកំពុងតែដាក់ពង្រាយកម្លាំងទាហានរបស់ខ្លួន នៅក្នុងតំបន់បែលហ្គោរូដ (Belgorod) ទឹកដីរបស់រុស្ស៊ី នៅជាប់នឹងព្រំដែនរបស់អ៊ុយក្រែន ដើម្បីការពារនូវការវាយប្រហារណាមួយ ពីក្រុមចលនាតស៊ូរបស់រុស្ស៊ី គាំទ្រអ៊ុយក្រែន ប្រឆាំងនឹងក្រុងមូស្គូ ហើយវាស្របគ្នានឹងក្រុមមន្ត្រីយោធាអ៊ុយក្រែន កាលពីថ្ងៃព្រហស្បតិ៍ បានរាយការណ៍ អំពីការវាយលុករុលទៅមុខ នៅលើសមរភូមិជាច្រើន។

លោកនាយឧត្ដមសេនីយ៍ ម៉ាក មីលឡេ នាយអគ្គសេនាធិការចម្រុះ នៃកងទ័ពសហរដ្ឋអាមេរិក បានបញ្ជាក់ នៅក្នុងកិច្ចប្រជុំមួយ នៅឯទីស្នាក់ការកណ្ដាលរបស់អង្គការណាតូ ស្ថិតក្នុងទីក្រុងប៊្រុចសែលស៍ (Brussels) ប្រទេសប៊ែលហ្ស៊ិក កាលពីថ្ងៃព្រហស្បតិ៍ ថា «កងទ័ពអ៊ុយក្រែន បានចាប់ផ្ដើមវាយបករបស់ពួកគេ ហើយបានរុលទៅមុខជាលំដាប់។ នេះជាការប្រយុទ្ធដ៏លំបាកមួយ ហើយវាជាការប្រយុទ្ធដ៏ឃោរឃៅបំផុត។ សកម្មភាពរំដោះទឹកដីនេះ ទំនងជានឹងចំណាយពេលច្រើន និង ចំណាយខ្ពស់។

លោក ឡយដ៍ អូស្ទីន (Lloyd Austin) រដ្ឋមន្រ្ដីក្រសួងការពារជាតិសហរដ្ឋអាមេរិក បានថ្លែង ទៅកាន់កិច្ចប្រជុំ នៃក្រុមទំនាក់ទំនងរបស់ប្រទេសចំនួន៥០ ដឹកនាំដោយសហរដ្ឋអាមេរិក ដែលបានផ្តល់ជំនួយយោធាដល់អ៊ុយក្រែន ថា រដ្ឋាភិបាលក្រុងកៀវ ត្រូវការនូវការគាំទ្រ ទាំងរយៈពេលខ្លី និង រយៈពេលវែង ដោយសារតែសង្គ្រាម កំពុងតែបន្ដ នៅក្នុងរយៈពេលយូរ ហើយអ៊ុយក្រែន ត្រូវការអាវុធជាច្រើនបន្ថែមទៀត។ ថ្វីបើមានការខាតបង់ ដោយការវាយប្រហារតបតពីទាហានរុស្ស៊ី យ៉ាងណាក្ដី ក៏កងទ័ពអ៊ុយក្រែន នៅតែមានកម្លាំងច្រើន សម្រាប់ការវាយបក ទៅលើសត្រូវដែរ។

ដោយឡែក ក្រុងមូស្គូ បានបង្ហាញឃ្លីបវីដេអូ អំពីរថក្រោះ Leopard ផលិតដោយអាល្លឺម៉ង់ និង រថពាសដែកប្រយុទ្ធ Bradley (ប្រេដលី) បានផ្ដល់ឲ្យដោយសារសហរដ្ឋអាមេរិក ត្រូវបានរឹបអូសពីអ៊ុយក្រែន នៅក្នុងការចាប់ផ្ដើមវាយបករបស់ក្រុងកៀវ។

លោករដ្ឋមន្រ្ដីក្រសួងការពារជាតិសហរដ្ឋអាមេរិក បានសង្កត់ធ្ងន់ ថា «ខ្ញុំគិត ថា ទាហានរុស្ស៊ី បានបង្ហាញដល់ពួកយើង អំពីរថចម្បាំងដូចគ្នានេះ ចំនួន៥ប្រហែល១០០០ដង អំពីមុំផ្សេងៗគ្នា ចំនួន១០។ ប៉ុន្តែបើយើងនិយាយតាមត្រង់ទៅ កងទ័ពការពារទឹកដីរបស់អ៊ុយក្រែន នៅតែមានសមត្ថភាពប្រយុទ្ធ ហើយមានកម្លាំងប្រយុទ្ធច្រើន»។

លោករដ្ឋមន្រ្ដី ឡយដ៍ អូស្ទីន បានបន្ថែម ថា «នេះជាសង្គ្រាម ដូច្នេះយើងដឹង ហើយថា វាជាការប្រយុទ្ធនាំឲ្យខូចខាតដល់ភាគីទាំង២ ហើយអ្វីដែលសំខាន់បំផុតនោះ ក្រុងកៀវ មានសមត្ថភាពជួសជុលគ្រឿងយុទ្ធោបករណ៍ខូចខាត យកទៅប្រើប្រាស់ នៅលើសមរភូមិវិញ។ ចំណែកការប្រយុទ្ធ កំពុងតែបន្ដយ៉ាងស្វិតស្វាញ ដូចអ្វីដែលយើងបានរំពឹងទុកជាមុន ហើយខ្ញុំជឿជាក់ថា ចំណុលដ៏ល្អបំផុត នៅក្នុងលក្ខខណ្ឌនៃការទ្រទ្រង់ ប្រហែលជាមានអត្ថប្រយោជន៍ នៅចុងបញ្ចប់ នៃថ្ងៃនេះ»។

លោកឧត្ដមសេនីយ៍ អូឡេស៊ី ហារ៉ូម៉ូវ (Oleksii Hromov) មេបញ្ជាការកងទ័ពអ៊ុយក្រែន បានបញ្ជាក់ កាលពីថ្ងៃព្រហស្បតិ៍ ថា «អ៊ុយក្រែន បានរំដោះទីតាំងចំនួន៧ មានផ្ទៃដីទំហំ ១០០គីឡូម៉ែត្រការ៉េ នៅក្នុងការវាយបកដ៏ធំ ចំនួន២ទិសដៅ នៅភាគខាងត្បូងរបស់ប្រទេសអ៊ុយក្រែន។ បន្ថែមពីនេះ យើងត្រៀមខ្លួនជាស្រេច សម្រាប់បន្តការប្រយុទ្ធ ដើម្បីរំដោះទឹកដីរបស់យើង បើទោះជាធ្វើ ដោយដៃទទេយ៉ាងណាក៏ដោយ»។

ដោយឡែក លោក វ៉្លាឌីមៀ ពូទីន (Vladimir Putin) បានលើកឡើង នៅសប្ដាហ៍នេះ ថា កម្លាំងទាហានរុស្ស៊ី កំពុងតែបង្កឲ្យខូចខាត ដល់កងទ័ពអ៊ុយក្រែន កើនឡើងចំនួន១០ជាង ខណៈពួកគេកំពុងតែស៊ូទ្រាំ ហើយការវាយបករបស់ក្រុងកៀវ បានរងបរាជ័យ៕

បរទេស៖ យោងតាមរដ្ឋាភិបាលក្នុងតំបន់នៃកោះ Faroe ដែលជាទឹកដីស្វយ័តរបស់ដាណឺម៉ាកបាននិយាយកាលពីថ្ងៃទី ១៥ ខែមិថុនា ថាសត្វផ្សោតជាង ៥០០ ក្បាលត្រូវបានគេសម្លាប់ចោល ដោយសារពិធីបុណ្យសាសនា។

អ្នកនាំពាក្យរបស់រដ្ឋាភិបាល Faroese ក៏បានបន្ថែមទៀតថា ជារៀងរាល់រដូវក្តៅ ប្រជាជននៅទីនេះតែងតែប្រារព្ធពិធីសាសនាមួយ ដោយធ្វើការបរបាញ់សត្វបង្ហូរឈាម ដែលរឿងនេះធ្វើឱ្យមានការចាប់អារម្មណ៍យ៉ាងខ្លាំងជុំវិញពិភពលោក និងធ្វើឱ្យអ្នកអភិរក្សធម្មជាតិសត្វខឹងសម្បារ ដោយពួកគេបានចាត់ទុកសកម្មភាពនេះព្រៃផ្សៃណាស់។

អង្គការបរិស្ថាន Sea Shepherd ក៏បានរិះគន់ខ្លាំងៗលើការអនុញ្ញាតរបស់កប៉ាល់ទ័ពជើងទឹកដាណឺម៉ាកផងដែរ ក្នុងការមិនរារាំងនិងបណ្តោយឱ្យប្រជាជនធ្វើអ្វីតាមចិត្ត។ ទោះជាយ៉ាងណាក៏ដោយការបរបាញ់នៅតែត្រូវបានគាំទ្រយ៉ាងទូលំទូលាយ ដោយសារប្រជាជននៅទីនោះបានប្រកែកថាប្រព័ន្ធផ្សព្វផ្សាយបរទេស និងអង្គការក្រៅរដ្ឋាភិបាលមិនគោរពវប្បធម៌ និងប្រពៃណីក្នុងស្រុករបស់ពួកគេ។

ជារៀងរាល់ឆ្នាំ ប្រជាជននៅកោះហ្វារ៉ូ តែងតែសម្លាប់ត្រីធំៗជាច្រើនប្រភេទ ប្រហែល ៨០០ ក្បាល។ ក្នុងឆ្នាំ ២០២២ អាជ្ញាធរក៏បានកំណត់ចំនួនសត្វផ្សោតពណ៌សនៅអាត្លង់ទិក ដែលឱ្យពួកគេសម្លាប់ក្នុងមួយឆ្នាំៗមកត្រឹម ៥០០ ក្បាល បន្ទាប់ពីពួកគេធ្លាប់ធ្វើការសម្លាប់សត្វផ្សោតច្រើនជាង ១,៤០០ ក្បាល។ ទោះជាយ៉ាងណាក៏ដោយមនុស្សជាច្រើននៅលើពិភពលោក ហាក់មិនពេញចិត្តនូវទង្វើព្រៃផ្សៃរបស់ប្រជាជនក្នុងតំបន់នោះផងដែរ។ ប្រភព៖vnexpress

រដ្ឋធានីវ៉ាស៊ីនតោន៖ ក្រោយការលុបចោលដំណើរទស្សនកិច្ចរបស់ខ្លួន ក្រោមការចោទប្រកាន់ ប្រឆាំងនឹងក្រុងប៉េកាំង អំពីការបញ្ជូនបាឡុងចារកម្ម ហោះឈបយកការណ៍ នៅពីលើដែនអាកាស នៃតំបន់ហាមឃាត់ដ៏រស៊ើបបំផុតរបស់សហរដ្ឋអាមេរិក កាលពីដើមឆ្នាំ២០២៣នោះមក ប្រមុខការទូតរបស់ប្រទេសមហាអំណាចកំពូលរបស់ពិភពលោក ទាំងយោធា និង សេដ្ឋកិច្ច គ្រោងនឹងធ្វើដំណើរបំពេញទស្សនកិច្ច ទៅកាន់ប្រទេសចិន ដោយផ្ដោតយ៉ាងសំខាន់ ទៅលើសន្ដិភាព នៅច្រកសមុទ្រតៃវ៉ាន់។

សារព័ត៌មាន Taiwan News បានចេញផ្សាយ កាលពីព្រឹក ថ្ងៃសុក្រ ទី១៦ ខែមិថុនា ថា លោក ដាញ៉ែល ជេ. គ្រីថែនប្រ៊ីនខ៍ (Daniel J. Kritenbrink) ឧបការី រដ្ឋមន្រ្ដីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និង តំបន់ប៉ាស៊ីហ្វិក បានបញ្ជាក់ កាលពីថ្ងៃពុធ ថា លោក អេនតូនី ប៊្លីនខេន (Antony Blinken) ប្រមុខការទូតសហរដ្ឋអាមេរិក នឹងបញ្ជាក់ អំពីការគាំទ្ររបស់រដ្ឋាភិបាលក្រុងវ៉ាស៊ីនតោន ចំពោះសន្ដិភាពក្នុងតំបន់ នៅច្រកសមុទ្រតៃវ៉ាន់ នៅក្នុងអំឡុងដំណើរទស្សនកិច្ចរបស់គាត់ ទៅកាន់ប្រទេសចិន ចន្លោះពីថ្ងៃទី១៨-១៩ ខែមិថុនា។

លោកឧបការី រដ្ឋមន្រ្ដីក្រសួងការបរទេសសហរដ្ឋអាមេរិក រូបនេះ បានថ្លែង នៅក្នុងអំឡុងសន្និសីទសារព័ត៌មានពិសេសមួយរបស់ក្រសួងការបរទេស ថា «ខ្ញុំគិត ថា អ្នកនឹងអាចប្រមើលមើល ថា លោកប្រមុខការទូតសហរដ្ឋអាមេរិក នឹងរំឭកឡើងវិញនូវចំណាប់អារម្មណ៍របស់ក្រុងវ៉ាស៊ីនតោន នៅក្នុងការថែរក្សាសន្តិភាព និង ស្ថិរភាព នៅទូទាំងច្រកសមុទ្រតៃវ៉ាន់។ បញ្ហាច្រកសមុទ្រតៃវ៉ាន់ «ក្លាយជាបញ្ហាដ៏សំខាន់បំផុត និង ក៏ជាបញ្ហាប្រឈម ហើយវាជាចំណុចដ៏រសើបបំផុត រវាងសហរដ្ឋអាមេរិក និង ប្រទេសចិន»។

លោកឧបការី រដ្ឋមន្រ្ដីក្រសួងការបរទេស ដាញ៉ែល ជេ. គ្រីថែនប្រ៊ីនខ៍ បានបន្ថែម ថា នេះជាលើកដំបូង ដែលលោករដ្ឋមន្រ្ដី ប្ល៊ីនខេន នឹងធ្វើដំណើរទៅកាន់ប្រទេសចិន នៅក្នុងឋានៈជាប្រមុខការទូតសហរដ្ឋអាមេរិក ហើយក៏ជារដ្ឋមន្រ្ដីការបរទេសលើកដំបូង បានធ្វើដំណើរទៅកាន់ប្រទេសចិន ចាប់តាំងពីឆ្នាំ២០១៨មក។ នៅក្នុងដំណើរទស្សនកិច្ច នាពេលខាងមុខនេះ លោករដ្ឋមន្រ្ដី គ្រោងនឹងរៀបចំកិច្ចប្រជុំជាបន្តបន្ទាប់ ជាមួយមន្ត្រីកំពូលៗរបស់ចិន នៅក្នុងរដ្ឋធានីប៉េកាំង។

លោកឧបការីរដ្ឋមន្រ្ដីក្រសួងការបរទេសសហរដ្ឋអាមេរិក ទទួលបន្ទុកអាស៊ីខាងកើត និង កិច្ចការតំបន់ប៉ាស៊ីហ្វិក រូបនេះ បានសង្កត់ធ្ងន់ ថា ដំណើរទស្សនកិច្ចរបស់ប្រមុខការទូតសហរដ្ឋអាមេរិក មានគោលដៅសំខាន់ៗចំនួន៣ រួមមាន ទី១-លោករដ្ឋមន្រ្ដី មានគោលបំណង បង្កើតបណ្ដាញទំនាក់ទំនងជាចំហ សម្រាប់ពិភាក្សា អំពីបញ្ហាប្រឈមសំខាន់ៗ ដើម្បីដោះស្រាយនូវការយល់ខុស និង រារាំងដល់ការគណនាខុស។ ទី២-លោករដ្ឋមន្រ្ដី នឹងការពារតម្លៃ និង ផលប្រយោជន៍របស់សហរដ្ឋអាមេរិក ហើយបង្ហាញនូវការព្រួយបារម្ភ អំពីបញ្ហាមួយចំនួន និង ពិភាក្សា អំពីបញ្ហាប្រឈម លើសន្តិសុខក្នុងតំបន់ និង ពិភពលោក។ ទី៣-លោករដ្ឋមន្រ្ដី នឹងស្វែងរកនូវកិច្ចសហប្រតិបត្តិការ ប្រកបដោយសក្តានុពល លើវិស័យ ជាច្រើន មានជាអាទិ៍៖ បញ្ហាអាកាសធាតុ និង សេដ្ឋកិច្ច ក៏ដូចជា ការបង្កើននូវការផ្លាស់ប្តូរ រវាងប្រជាជន នៃប្រទេសទាំងពីរ។

លោកឧបការី រដ្ឋមន្រ្ដីការបរទេស សហរដ្ឋអាមេរិក បានបន្ថែម ថា «ការផ្តោតយ៉ាងសំខាន់របស់យើង ជាថ្មីម្តងទៀត ត្រូវតែមានការពិភាក្សា ដោយភាពស្មោះត្រង់ និង ដោយផ្ទាល់ ហើយប្រកបដោយការស្ថាបនា លើផ្នែកទាំង៣នេះ»។

លោក ខឺត កាមបែល (Kurt Campbell) មន្រ្ដីសម្របសម្រួលកិច្ចការតំបន់ឥណ្ឌូ-ប៉ាស៊ីហ្វិក បានបញ្ជាក់ ថា នៅពេលនិយាយ អំពីការចូលរួម ជាមួយប្រទេសចិន នោះ សហរដ្ឋអាមេរិក មានគោលបំណង«គ្រប់គ្រងនូវការប្រកួតប្រជែង» ហើយសហការគ្រប់ទីកន្លែង ដែលអាចធ្វើទៅបាន ខណៈនៅតែថែរក្សាទំនាក់ទំនងយ៉ាងច្បាស់លាស់។

មន្រ្ដីសម្របសម្រួលកិច្ចការតំបន់ឥណ្ឌូ-ប៉ាស៊ីហ្វិក រូបនេះ បានចង្អុលបង្ហាញ ថា «នៅក្នុងរយៈពេល២ឆ្នាំចុងក្រោយនេះ មានចំនួនប្រទេស និង អង្គការនានា បានសម្តែងនូវការគាំទ្រ ចំពោះសន្តិភាព និង ស្ថិរភាពនៅច្រកសមុទ្រតៃវ៉ាន់ កាន់តែកើនឡើងច្រើន។ នេះជាការអភិវឌ្ឍន៍ដ៏សំខាន់មួយ សម្រាប់សេចក្តីថ្លែងការណ៍ដ៏ច្បាស់លាស់ ជុំវិញការព្រួយបារម្ភជាសកល អំពីសំណុំ នៃបញ្ហាទាំងនេះ។ ខ្ញុំគិត ថា សហរដ្ឋអាមេរិក កំពុងតែស្វែងរកនូវការប្តេជ្ញាចិត្តយ៉ាងច្បាស់លាស់ជាទ្វេភាគី និង ការប្តេជ្ញាចិត្តយ៉ាងមុតមាំ នៅក្នុងការថែរក្សាសន្តិភាព និង ស្ថិរភាព…។

ដំណើរទស្សនកិច្ចរបស់លោកប្រមុខការទូតសហរដ្ឋអាមេរិក កើតឡើង ចំពេលទំនាក់ទំនងរវាងសហរដ្ឋអាមេរិក និង ចិន កំពុងតែធ្លាក់ចុះដល់កម្រិតទាបបំផុត។ កាលពីខែមុន លោក វីល្លីយ៉ាម ប៊ឺនស៍ (William Burns) ប្រមុខទីភ្នាក់ងារស៊ើបការណ៍សម្ងាត់ CIA បានធ្វើដំណើរទៅកាន់ប្រទេសចិន ដើម្បីជួបពិភាក្សា ជាមួយnwgសមភាគីរបស់គាត់ ហើយថែមទាំងបើកបណ្តាញទំនាក់ទំនង នៅក្នុងបណ្តាញស៊ើបការណ៍សម្ងាត់។

ទន្ទឹមគ្នានេះ ក្រសួងការពារជាតិតៃវ៉ាន់ ក៏កំពុងតែរៀបចំ ធ្វើសមយុទ្ធយោធា Han Kuang (ហាន គួង) ប្រចាំឆ្នាំរបស់ខ្លួន នៅខែក្រោយ ចន្លោះពីថ្ងៃទី២៤ដល់២៨ខែកក្កដា។ បន្ថែមពីលើនេះ តៃវ៉ាន់ កាលពីថ្ងៃអង្គារ (ទី១៣ ខែមិថុនា) ក៏បានចេញផ្សាយនូវសៀវភៅណែនាំចុងក្រោយបំផុតរបស់ខ្លួន ការពារដល់ជនស៊ីវិល ដោយរួមបញ្ចូលទាំងការណែនាំ អំពីរបៀបបង្កើតឧបករណ៍ជម្លៀសបន្ទាន់ នៅក្នុងករណីមានព្រឹត្តិការណ៍វាយលុកឈ្លានពាន ពីចិន លើមកកោះតៃវ៉ាន់៕

ប្រទេសចិន ៖ Regent International គឺជាអាផាតមិនដ៏ល្បីឈ្មោះមួយនៅទីក្រុងហាងចូវ ប្រទេសចិន និងមានមនុស្សរស់នៅក្នុងអាផាតមិននេះប្រមាណជាង២ម៉ឺននាក់ ហើយចំនួននេះស្មើនឹងចំនួនមនុស្សរស់នៅក្នុងទីក្រុងមួយដែរ ។ អាផាតមិននេះបានបង្កលក្ខណៈងាយស្រួល និងផ្តល់សេវាកម្មគ្រប់បែបយ៉ាងសម្រាប់អ្នករស់នៅ ក្នុងនោះភាគច្រើនជាយុវវ័យ ។

អគារអាផាតមិន Regent International មានរាងជាអក្សរ S និងមានទីតាំងស្ថិតនៅមជ្ឈមណ្ឌលអាជីវកម្មក្នុងទីក្រុងហាងចូវ ។ គេបានសាងសង់អគារនេះឡើង និងរចនាម៉ូដឱ្យក្លាយជាសណ្ឋាគារទំនើបមួយ ប៉ុន្តែក្រោយមក សណ្ឋាគារនេះត្រូវបានគេផ្លាស់ប្តូរមកធ្វើជាអាផាតមិនសម្រាប់ជួលវិញ ក្នុងនោះមានបន្ទប់រាប់ពាន់បន្ទប់ មានតូច និងធំទៅតាមតម្រូវការ ។

អាផាតមិននេះមានកម្ពស់សរុប២០៦ម៉ែត្រ ស្មើជាង៣០ជាន់ ហើយវាបានក្លាយជាទីប្រជុំជនដែលមានសេវាកម្មសម្បូរបែប និងបង្កលក្ខណៈងាយស្រួលក្នុងការប្រកបអាជីវកម្មផ្សេងៗដូចជា ភោជនីយដ្ឋានធំៗសម្រាប់ផ្តល់សេវាកម្មដល់អ្នករស់នៅរាប់ម៉ឺននាក់ មានអាងហែលទឹក ហាងកាត់សក់ និងហាងធ្វើក្រចក ជាដើម ។ អ្នករស់នៅក្នុងអាផាតមិនភាគច្រើនជាយុវវ័យដែលទើបបញ្ចប់ការសិក្សាពីសាកលវិទ្យាល័យ ឬកំពុងតែសិក្សានៅសាកលវិទ្យាល័យឆ្នាំចុងក្រោយ ។

សារព័ត៌មានចិនចុះផ្សាយថា ក្នុងអាផាតមិននេះ សម្រាប់បន្ទប់ទំហំតូចគ្មានបង្អួច គេនឹងដាក់ជួលក្នុងតម្លៃប្រមាណ១.៥០០យាន់ក្នុង១ខែ ចំណែកបន្ទប់ធំ និងមានរានហាលនៅខាងមុខ តម្លៃជួលស្មើនឹង៤.០០០យាន់ក្នុង១ខែ ឬច្រើនជាងនេះ ។

អគារអាផាតមិន Regent International គឺជាអគារមួយក្នុងចំណោមអគារដ៏ធំបំផុតនៅប្រទេសចិន ហើយចំនួនអ្នករស់នៅក្នុងអគារនេះបានធ្វើឱ្យគេជជែកវែកញែកក្នុងបណ្តាញសង្គមចិនផងដែរ ។ បើពិចារណាពីចំនួនបន្ទប់ និងចំនួនជាន់របស់អគារនេះ គេប៉ាន់ស្មានថា អគារនេះមានមនុស្សរស់នៅចាប់ពី១១.០០០នាក់ រហូតដល់២២.០០០នាក់ ៕ប្រភព ៖ khaosod