រាជធានីភ្នំពេញ៖ ទីបំផុតថែត្រូវតែគោរពបទឈប់បាញ់ឲ្យទាល់តែបាន! នាយករដ្ឋមន្រ្តីម៉ាឡេស៊ី ប្រកាសថា កម្ពុជានិងថៃ នឹងត្រូវអនុវត្តបទឈប់បា.ញ់ ចាប់ពីវេលាម៉ោង១០យប់ថ្ងៃសៅរ៍ ទី១៣ ខែធ្នូនេះតទៅ ដោយហាមមិនឲ្យមានការចល័តកងទ័ព និងប្រយុទ្ធគ្នាបន្តទៀតជាធរមាន។ នេះបើយោងតាមការបញ្ជាក់របស់លោក អាន់វ៉ា អុីប្រាហុីម។

យោងតាមបណ្តាញទំនាក់ទំនងសង្គមហ្វេសប៊ុក នៅរសៀលថ្ងៃទី១៣ ធ្នូនេះ លោក អាន់វ៉ា អ៊ីប្រាហ៊ីម បានបង្ហាញពីការព្រួយបារម្ភយ៉ាងខ្លាំង របស់ម៉ាឡេស៊ីចំពោះស្ថានភាពជម្លោះព្រំដែនកម្ពុជា-ថៃនេះ ហើយបានជំរុញឱ្យភាគីទាំងពីរអនុវត្តការអត់ធ្មត់ជាអតិបរមា បញ្ឈប់រាល់ទម្រង់នៃអរិភាព និងជៀសវាងសកម្មភាពយោធាបន្ថែមទៀត រួមទាំងការប្រើប្រាស់កម្លាំង ឬចលនាឆ្ពោះទៅមុខ នៃអង្គភាពប្រដាប់អាវុធ ដែលមានប្រសិទ្ធិភាពចាប់ពីថ្ងៃទី១៣ ខែធ្នូ ឆ្នាំ២០២៥ វេលាម៉ោង២២:០០នាទីយប់តទៅ ។

បន្ថែមលើអ្វីដែលហៅថាបទឈប់បា.ញ់ ជាការគាំទ្រដល់ការបន្ធូរបន្ថយជម្លោះ និងលើកកម្ពស់តម្លាភាព លោក អាន់វ៉ា បានស្នើឱ្យដាក់ពង្រាយក្រុមអ្នកសង្កេតការណ៍អាស៊ាន AOT ដឹកនាំដោយប្រមុខកងកម្លាំងប្រដាប់អាវុធម៉ាឡេស៊ី ដើម្បីតាមដានស្ថានការណ៍វិវត្តន៍ ជាក់ស្ដែង។ បេសកកម្មនេះនឹងត្រូវបានធ្វើឡើងដោយការតាមដានតាមរយៈផ្កាយរណបដែលផ្ដល់ដោយរដ្ឋភិបាលសហរដ្ឋអាមេរិក ក្នុងពេលជាមួយគ្នា។

ដោយឡែកចំពោះលទ្ធផលអំពីការតាមដានតាមរយៈផ្កាយរណប និងការសង្កេតការណ៍ខាងលើនេះ នឹងត្រូវបានប្រមូលទិន្នន័យដោយ AOT ហើយត្រូវធ្វើបទបង្ហាញនៅឯកិច្ចប្រជុំថ្នាក់រដ្ឋមន្ត្រីការបរទេសអាស៊ាននៅថ្ងៃអង្គារ ទី១៦ ខែធ្នូ។ របាយការណ៍នឹងពន្យល់ពីស្ថានភាពជាក់ស្ដែង ក្នុងនោះរួមមានទាំងជំហររវាងភាគីទាំង២ ឈរលើផលប្រយោជន៍នៃការទទួលខុសត្រូវ ការកសាងទំនុកចិត្ត និងការថែរក្សាសន្តិភាព ក៏ដូចជាស្ថិរភាពក្នុងតំបន់។

ជាចុងក្រោយ លោក អាន់វ៉ា អុីប្រាហុីម បានបញ្ជាក់ថា លោកបញ្ជាក់ថា ម៉ាឡេស៊ីនៅតែប្តេជ្ញាធ្វើការយ៉ាងជិតស្និទ្ធជាមួយដៃគូអាស៊ាន និងសហគមន៍អន្តរជាតិ ដើម្បីធានាថាការសន្ទនា ការអត់ធ្មត់ និងការទូតមានជោគជ័យ ៕

បន្តិចទៀតនេះការពិតនឹងត្រូវលាតត្រដាង! នាយករដ្ឋមន្រ្តីម៉ាឡេសុី លោក អាន់វ៉ា អុីប្រាហុីម បានធ្វើការបញ្ជាក់នាមុននេះបន្តិចថា លទ្ធផលតាមដានផ្កាយរណប និងការសង្កេតនៅកន្លែងពីជម្លោះព្រំដែនកម្ពុជា-ថៃ នឹងត្រូវបង្ហាញកៅក្នុងកិច្ចប្រជុំរដ្ឋមន្ត្រីការបរទេសអាស៊ាននៅថ្ងៃទី១៦ ខែធ្នូខាងមុខ ដែលនេះនឹងបង្ហាញយ៉ាងច្បាស់ថាភាគីណាជាអ្នករំលោ.ភបទឈប់បា.ញ់។

យោងតាមការបង្ហោះនៅលើទំព័រហ្វេសប៊ុកផ្លូវការ នារសៀលថ្ងៃសៅរិ៍ទី១៣ ខែធ្នូ ឆ្នាំ២០២៥ លោក អាន់វ៉ា អុីប្រាហុីម នាយករដ្ឋមន្រ្តីម៉ាឡេសុី និងជាប្រធានប្ដូរវេនអាស៊ាន បានសរសេថា បន្ទាប់ពីការពិភាក្សារបស់លោកជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ និងដោយសារតែភាពតានតឹងនៅតែបន្តនៅតាមព្រំដែនកម្ពុជា-ថៃ លោកបានធ្វើការហៅទូរស័ព្ទដាច់ដោយឡែកជាមួយនាយករដ្ឋមន្ត្រី អនុទីន ឆាន់វីរៈគុល នៃប្រទេសថៃ និងនាយករដ្ឋមន្ត្រី ហ៊ុន ម៉ាណែត នៃប្រទេសកម្ពុជា។

នៅក្នុងអំឡុងពេលនៃការផ្លាស់ប្ដូរនោះ លោក អាន់វ៉ា បានបង្ហាញពីក្ដីព្រួយបារម្ភរបស់លោក និងជំរុញឲ្យភាគីជម្លោះទាំងសងខាង បន្តការអត់ធ្មត់អតិបរមា បញ្ឈប់គ្រប់ទម្រង់នៃអរិភាព និងជៀសវាងសកម្មភាពយោធាណាមួយបន្ថែមទៀត រួមទាំងការប្រើប្រាស់កម្លាំង ឬចលនាទៅមុខនៃអង្គភាពប្រដាប់អាវុធ ដោយមានប្រសិទ្ធភាពចាប់ពីថ្ងៃទី 13 ខែធ្នូ ឆ្នាំ 2025 តទៅ វេលាម៉ោង 22:00 យប់ (ម៉ោងនៅក្នុងតំបន់)។

ជាមួយគ្នានេះ លោកបានបញ្ជាក់អំពីបេសកកម្មរបស់ក្រុមអ្នកសង្កេតការណ៍អាស៊ាន (AOT) ដែលផ្តល់ការគាំទ្រដោយរដ្ឋាភិបាលសហរដ្ឋអាមេរិកតាមរយៈប្រព័ន្ធផ្កាយរណបថា លទ្ធផលតាមដាននេះ នឹងត្រូវបើកបង្ហាញនៅក្នុងកិច្ចប្រជុំរដ្ឋមន្ត្រីការបរទេសអាស៊ាននៅថ្ងៃអង្គារ ទី 16 ខែធ្នូខាងមុខ។

នាយករដ្ឋមន្រ្តីម៉ាឡេសុី បានគូសបញ្ជាក់ពីសារៈសំខាន់របស់វាថា របាយការណ៍នេះនឹងផ្តល់នូវការពន្យល់ដ៏ច្បាស់លាស់អំពីស្ថានភាព រួមទាំងជំហររបស់ភាគីទាំងពីរ ក្នុងផលប្រយោជន៍នៃការទទួលខុសត្រូវ ការកសាងទំនុកចិត្ត និងការរក្សាសន្តិភាព និងស្ថិរភាពនៅក្នុងតំបន់។

គួរជម្រាបថា តារយៈការប្រកាសរបស់នាយករដ្ឋមន្រ្តីម៉ាឡេសុីដូចខាងលើនេះ ពិភពលោកទាំងមូលនឹងបានដឹងថា តើមានអ្វីខ្លះដែលបានកើតឡើងឲ្យប្រាកដ? តើភាគីណាជាអ្នកគោរពកិច្ចព្រមព្រៀងសន្តិភាព និងភាគីណាជាអ្នកបង្ករសង្រ្គា.ម រំលោ.ភបទឈប់បា.ញ់ និងល្មើសច្បាប់អន្តរជាតិ។ អាស្រ័យហេតុនេះ សូមរង់ចាំអ៊ុតមើលលទ្ធផលនេះទាំងអស់គ្នា៕

សារព័ត៌មាន Nikkei Asia ដ៏ធំរបស់ជប៉ុន បានចេញផ្សាយនូវអត្ថបទមួយដែលនិយាយអំពីការផ្ដល់សិទ្ធិអំណាចពីនាយករដ្ឋមន្រ្តីទៅឲ្យយោធាក្នុងការធ្វើសង្រ្គា.មរបស់ថៃថា គឺជាល្បែងរបស់អនុទីន ក្នុងការស្ទូចយកសម្លេងឆ្នោតគាំទ្រពីពលរដ្ឋ តាមរយៈការប្រើប្រាស់ចលនាជាតិនិយមដែលផ្ដោតសំខាន់ទៅលើយោធា។

តាមរយៈអត្ថបទដែលបានចុះផ្សាយនៅថ្ងៃសៅរិ៍ ទី១៣ ខែធ្នូ ឆ្នាំ២០២៥ Nikkei Asia បានដាក់ចំណងជើងធំៗថា «អនុទិន លេងសន្លឹកបៀរយោធាជាតិនិយម ដើម្បីជំរុញក្តីសង្ឃឹមក្នុងការបោះឆ្នោត» អមដោយខ្លឹមសារយ៉ាងដូច្នេះថា ឧបនាយករដ្ឋមន្ត្រី អនុទិន ឆាន់វីរៈគុល បានអនុម័តជំហរជាតិនិយមដ៏រឹងមាំ ដែលផ្តោតលើយោធា ដែលជាចលនាមួយដែលត្រូវបានគេមើលឃើញច្បាស់ថា ជាកិច្ចខិតខំប្រឹងប្រែងមួយ ដើម្បីប្រមូលផ្តុំអ្នកបោះឆ្នោតអភិរក្សនិយម និងបង្កើនឱកាសសម្រាប់គណបក្សរបស់គាត់ មុនពេលការបោះឆ្នោតអាណត្តិក្រោយមកដល់។

ដោយសង្កត់ធ្ងន់លើការផ្ដល់ការគាំទ្រដល់កងកម្លាំងប្រដាប់អាវុធ និងសន្តិសុខជាតិ អនុទិន ហាក់ដូចជាកំពុងយកខ្លួនឯងធ្វើជានុយ ដើម្បីទាក់ទាញសម្លេងឆ្នោត ដែលឱ្យតម្លៃដល់ស្ថិរភាព អធិបតេយ្យភាព និងស្ថាប័នប្រពៃណី។ យុទ្ធសាស្ត្រនេះឆ្លុះបញ្ចាំងពីទិដ្ឋភាពនយោបាយ ដែលមានការប្រកួតប្រជែងកាន់តែខ្លាំងឡើងក្នុងប្រទេសថៃ ដែលគណបក្សទាំងអស់កំពុងស្វែងរកការបង្រួបបង្រួមប្លុកអ្នកបោះឆ្នោតសំខាន់ៗ។

ជាមួយគ្នានោះ អ្នកវិភាគជាច្រើនបានលើកឡើងថា ការបន្លិចឡើងនូវចលនាជាតិនិយមយោធា អាចជួយអនុទិន ឲ្យសម្គាល់វេទិការបស់ខ្លួន ខណៈពេលដែលទាក់ទាញដល់ផ្នែកនៃអ្នកបោះឆ្នោតដែលមានការព្រួយបារម្ភអំពីភាពតានតឹងក្នុងតំបន់ និងសណ្តាប់ធ្នាប់ក្នុងស្រុក។ ទាំងនេះគឺជាការលើកឡើងនៅក្នុងអត្ថបទរបស់ Nikkei Asia។

ដោយឡែក បើតាមការកត់សម្គាល់នូវភាពជាក់ស្ដែងទាក់ទងនឹងស្ថានការណ៍ព្រំដែនរវាងកម្ពុជា និងថៃ មុនពេលផ្ទុះការប្រយុទ្ធគ្នាជាថ្មីយើងឃើញថា កម្ពុជារក្សានិងគោរពបានយ៉ាងល្អនូវបទឈប់បា.ញ់ ព្រមទាំងការអនុវត្តតាមសេចក្ដីថ្លែងការណ៍រួមស្តីពីកិច្ចព្រមព្រៀងសន្តិភាពនៅទីក្រុងគូឡាឡាំពួ។ ការណ៍នេះផ្ទុយស្រឡះពីភាគីថៃ ដែលតែងបង្កហេតុ បង្កើតស្ថានការណ៍ ដើម្បីញុះញង់ និងចោ.ទប្រកាន់កម្ពុជាម្ដងហើយម្ដងទៀតមិនចេះចប់ ជាពិសេសនាពេលចុងក្រោយបំផុត ដែលនាយករដ្ឋមន្រ្តីថៃប្រកាសច្បាប់អាជ្ញារសឹក បើកដៃឲ្យយោធាធ្វើអ្វីបានតាមចិត្ត រួចលាលែងពីតំណែងដើម្បីគេចចេញពីការចរចា។

ទាំងនេះគឺជាភ័ស្តុងតាងដែលបង្ហាញយ៉ាងច្បាស់ថា តាមការពិត អនុទីន គ្មានគំនិតបោះបង់ចោលអំណាច ឬប្រគល់អំណាចទៅឲ្យប្រជាជនអ្វីនោះទេ គេគ្រាន់តែធ្វើបែបនេះដើម្បីឲ្យកម្ពុជា ឬអ្នកដែលមានសមត្ថកិច្ចសម្របសម្រួលទំនាក់ទំនងកម្ពុជា-ថៃឈឺក្បាល និងពិបាកចរចាតែប៉ុណ្ណោះ។

អ្វីដែលគេកាន់តែចំណេញពីការធ្វើបែបនេះនោះគឺ ការទុកសិទ្ធិឲ្យយោធាជាអ្នកសម្រេច នឹងធ្វើឲ្យទំនាក់ទំនងយោធា និងរដ្ឋាភិបាលមានភាពជិតស្និតនឹងគ្នាជាងមុន ជាពិសេសវាក៏ទទួលបានការពេញចិត្តពីសំណាក់ប្រជាជនថៃភាគច្រើនផងដែរ ដែលនេះនឹងហុចផលវិជ្ជមានដល់ការបោះឆ្នោតសម្រាប់គណបក្សរបស់អនុទីននាពេលឆាប់ៗខាងមុខ៕