ប្រទេសថៃ ៖ តាមការចុះផ្សាយរបស់សារព័ត៌មាន Matichon Online នៅថ្ងៃទី១៥ ខែធ្នូ ឆ្នាំ២០២៥ ចៅហ្វាយស្រុកឃុនហាន ខេត្តស៊ីសាកេត (ដែលមានព្រំប្រទល់ជាប់ខេត្តឧត្តរមានជ័យ និងខេត្តព្រះវិហារ) បានចេញសេចក្តីប្រកាសឱ្យពលរដ្ឋជម្លៀសចេញពីលំនៅឋានជាបន្ទាន់ និងដាក់ទោស.តាមច្បាប់សម្រាប់អ្នកមិនអនុញ្ញាតតាម ។ សេចក្តីប្រកាសបញ្ជាក់ថា ពលរដ្ឋត្រូវទៅស្នាក់នៅជំរំភៀសសឹក ជម្រកបណ្តោះអាសន្ន ឬទីកន្លែងមានសុវត្ថិភាព រហូតដល់ស្ថានការណ៍ព្រំដែនកម្ពុជា-ថៃធូរស្រាលឡើងវិញ ។

អាជ្ញាធរថៃប្រកាសឱ្យពលរដ្ឋខ្លួនជម្លៀសចេញជាបន្តបន្ទាប់ក្រោយពីកងទ័ពថៃបើកការវាយប្រហារកម្ពុជាតាំងពីថ្ងៃទី៧ ខែធ្នូ នៅតំបន់ជាច្រើនតាមបណ្តោយព្រំដែន ហើយកងទ័ពថៃបានធ្វើសង្គ្រាមកាន់តែខ្លាំងក្លាបណ្តាលឱ្យខូចខាតប្រាសាទបុរាណ ស្ពាន និងលំនៅឋានពលរដ្ឋកម្ពុជាជាច្រើនខ្នង ។ អាជ្ញាធរខេត្តស៊ីសាកេតប្រកាសថា ពលរដ្ឋណាដែលមិនព្រមជម្លៀសតាមសេចក្តីប្រកាសនេះនឹងមានទោសតាមច្បាប់ ផ្ទុយនឹងមាត្រា៥២ ។

ក្រៅពីប្រកាសឱ្យពលរដ្ឋជម្លៀសចេញជាបន្ទាន់ ចៅហ្វាយស្រុកឃុនហាន ខេត្តស៊ីសាកេត បានហាមឃាត់ពលរដ្ឋមិនឱ្យធ្វើដំណើរត្រឡប់មកភូមិស្រុកវិញដាច់ខាត ដោយឱ្យស្នាក់នៅជំរំភៀសសឹកជាបណ្តោះអាសន្នក្នុងអំឡុងពេលកងទ័ពថៃបង្កើនការវាយប្រហារកម្ពុជាមិនដកដៃ ដែលការហាមឃាត់នេះអនុវត្តចាប់ពីថ្ងៃទី១៥ ខែធ្នូ តទៅ ។

គួរបញ្ជាក់ថា សង្គ្រា.មឈ្លានពា.នរបស់កងទ័ពថៃមកលើកម្ពុជាបានឈានដល់ថ្ងៃទី៩ហើយ បើគិតត្រឹមថ្ងៃទី១៥ ខែធ្នូ ហើយរហូតមកទល់ពេលនេះ មិនទាន់មានសញ្ញាណាមួយបង្ហាញថា សង្គ្រាមនឹងបញ្ចប់ពេលណាទេ ក្រោយនាយករដ្ឋមន្ត្រីថៃចាំផ្ទះល្មោ.ភសង្គ្រា.មទាត់ចោលការអន្តរាគមន៍ឱ្យមានបទឈប់បា.ញ់របស់ប្រធានាធិបតីអាមេរិក លោក Donald Trump ។ លោក Anutin Charnvirakul កំពុងប្រើប្រាស់ការប្រយុទ្ធគ្នានៅព្រំដែនជាមួយកម្ពុជាដើម្បីរកសំឡេងគាំទ្រ ខណៈការបោះឆ្នោតនៅថៃអាចនឹងធ្វើឡើងនៅខែកុម្ភៈ ឆ្នាំ២០២៦ ។

លោក Anutin បានរំលាយសភាកាលពីថ្ងៃទី១២ ខែធ្នូ ប្រគល់អំណាចឱ្យពលរដ្ឋបោះឆ្នោតជ្រើសរើសនាយករដ្ឋមន្ត្រីថ្មីមុនពេលកំណត់ ដែលការសម្រេចចិត្តនេះស្របពេលកងទ័ពថៃកំពុងវាយប្រហារឈ្លានពានកម្ពុជាជាថ្មីនៅតាមបណ្តោយព្រំដែនយ៉ាងខ្លាំងក្លា បន្ទាប់ពីលោក Anutin ទាត់ចោលបទឈប់បាញ់ និងកិច្ចព្រមព្រៀងសន្តិភាពទីក្រុងគូឡាឡាំពួរ ។ ប៉ុន្តែអ្នកវិភាគថា ការរំលាយសភាយ៉ាងតក់ក្រហល់ គឺជាលេសគេចមិនចរចាជាមួយប្រធានាធិបតីអាមេរិក និងបើកដៃឱ្យកងទ័ពថៃធ្វើសង្គ្រាមឈ្លានពានកម្ពុជាបន្តទៀតដែលព្រះមហាក្សត្រថៃគាំទ្រផែនការនេះ ។

កាលពីថ្ងៃទី១៣ ខែធ្នូ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានបង្ហោះសារក្រោយពីពិភាក្សាតាមទូរស័ព្ទជាមួយនាយករដ្ឋមន្ត្រីម៉ាឡេស៊ី លោក Anwar Ibrahim និងលោកប្រធានាធិបតី Trump ដើម្បីស្វែងរកវិធីឱ្យមានបទឈប់បាញ់រវាងកម្ពុជា-ថៃ និងឱ្យភាគីទាំងពីរវិលទៅរកការអនុវត្តសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងគូឡាឡាំពួរ ។ សម្តេចបញ្ជាក់ថា ហេតុការណ៍បាញ់ប្រហារកាលពីរសៀលថ្ងៃទី៧ ខែធ្នូ ដែលបណ្តាលឱ្យផ្ទុះការប្រយុទ្ធជាថ្មីរវាងប្រទេសទាំងពីរ គឺកងទ័ព និងស្ថាប័នជំនាញរបស់អាមេរិក និងម៉ាឡេស៊ីអាចប្រមូលព័ត៌មានដូចជារូបភាពផ្កាយរណបដែលថតអំឡុងពេលនោះ និងក្រោយពេលនោះរយៈពេល២៤ម៉ោង ដើម្បីផ្ទៀងផ្ទាត់ថា តើភាគីណាបាញ់មុន ដែលនេះជាវិធីសាស្ត្រងាយស្រួល និងមានតម្លាភាពបំផុត ។

នៅថ្ងៃទី១៥ ខែធ្នូ ក្នុងកម្មវិធីមួយ នាយករដ្ឋមន្ត្រីចាំផ្ទះថៃ លោក Anutin បានបដិសេធមិនឱ្យមានការផ្ទៀងផ្ទាត់រូបភាពតាមផ្កាយរណបដើម្បីបញ្ជាក់ថាភាគីណាបង្កសង្គ្រាមមុនដាច់ខាត ដោយលោកនិយាយបំភ្លៃថា ថៃមិនធ្លាប់ឈ្លានពានប្រទេសណាទេ ថៃស្រឡាញ់សន្តិភាព ។ តើមានសិទ្ធិអ្វីក្នុងការប្រើប្រាស់ផ្កាយរណបដើម្បីតាមដានប្រតិបត្តិការរបស់កងទ័ពថៃ? លោកចោទប្រកាន់ថា ការប្រើប្រាស់ផ្កាយរណបនេះដើម្បីចាប់កំហុសថៃដែលចាប់ផ្តើមបង្កហិង្សា ហើយលោកថា ដើម្បីកុំឱ្យសង្គ្រាមកាន់តែតានតឹង ត្រូវតែដកថយទាំងសងខាង ហើយកម្ពុជាត្រូវដកថយដោយស្មោះត្រង់សិន ៕

សារព័ត៌មាន Khaosod របស់ថៃ នៅព្រឹកថ្ងៃចន្ទ ទី១៥ ខែធ្នូ ឆ្នាំ២០២៥ នេះបានចុះផ្សាយថា ដោយបច្ចុប្បន្នប្រទេសថៃមើលឃើញថា កម្ពុជាកំពុងប្រឈមនឹងការខ្វះខាតប្រេងឥន្ធនៈយ៉ាងធ្ងន់ធ្ងរសម្រាប់ផ្គត់ផ្គង់តម្រូវការក្នុងស្រុក ប្រទេសថៃបានចាប់ផ្ដើមរឹតបន្តឹងការនាំចេញប្រេងទៅកាន់ប្រទេសឡាវ ដើម្បីធានាថាឡាវ នឹងមិនលក់ប្រេងបន្តទៅឲ្យប្រទេសកម្ពុជា។

តាមសេចក្ដីរាយការណ៍ខាងលើបានឲ្យដឹងថា ក្បួនរថយន្តដឹកប្រេងឥន្ធនៈចំនួន ៨០ គ្រឿង ចំណុះជាង ៤ លានលីត្រ កំពុងកកស្ទះបន្តគ្នាដើម្បីរង់ចាំឆ្លងកាត់ច្រកព្រំដែនចុងមេក ទៅកាន់ប្រទេសឡាវ។ ស្ថានភាពនេះ កើតឡើងក្រោយ ឧត្តមសេនីយ៍ឯក វីរៈយុទ្ធ រ៉ាក់ស៊ីន មេបញ្ជាការកងទ័ពភូមិភាគទី២ថៃ បានចុះហត្ថលេខាលើបទបញ្ជាមួយ ដើម្បីគ្រប់គ្រងការនាំចេញប្រេងឥន្ធនៈ និងសម្ភារៈយោធា នៅច្រកព្រំដែនចុងមេកអចិន្ត្រៃយ៍ ក្នុងខេត្តឧប៊ុនរ៉ាចាថានី ដែលមានប្រសិទ្ធភាពចាប់ពីម៉ោង ២៤:០០ ថ្ងៃនេះតទៅ។

តាមការបញ្ជាក់ ការធ្វើបែបនេះ គឺត្រូវបានអនុម័តបន្ទាប់ពីមានការសង្ស័យថា អាចមានបណ្តាញរត់ពន្ធប្រេងឥន្ធនៈឆ្លងកាត់ច្រកព្រំដែនចុងមេក ចូលទៅក្នុងប្រទេសឡាវ រួចធ្វើការលក់បន្តទៅឱ្យប្រទេសកម្ពុជា។

មិនតែប៉ុណ្ណោះ របាយការណ៍ខាងលើនេះថែមទាំងបានវាយតម្លៃផងដែរថា បច្ចុប្បន្ន ប្រទេសកម្ពុជាកំពុងប្រឈមមុខនឹងកង្វះខាតប្រេងឥន្ធនៈ និងសម្ភារៈយុទ្ធសាស្ត្រផ្សេងៗដូចជា ថ្នាំពេទ្យ និងស្បៀងអាហារទៀតយ៉ាងធ្ងន់ធ្ងរ។ មូលហេតុនេះហើយ ទើបប្រទេសថៃសម្រេចចិត្តថា នឹងរឹតបន្តឹងការនាំចេញប្រេងរបស់ខ្លួនទៅឲ្យប្រទេសក្បែរខាង ចៀសវាងមានការចែកចាយបន្តទៅឲ្យកម្ពុជា ដើម្បីជាការបន្ថែមសម្ពាធឲ្យកម្ពុជាថែមមួយកម្រិតទៀត។

យ៉ាងណាគួរជម្រាបថា ចាប់តាំងពីមានការបិទព្រំដែនគោកជាឯកតោភាគីដោយប្រទេសថៃមក ប្រមុខរាជរដ្ឋាភិបាលកម្ពុជាបានប្រកាសរួចមកហើយថា នឹងបញ្ឈប់ការនាំចូលប្រេងឥទ្ធនៈគ្រប់ប្រភេទពីប្រទេសថៃ ដោយស្វែងរកនាំចូលពីប្រទេសផ្សេងជំនួសវិញ។

ជាក់ស្ដែង បើតាមចលនាពហិការរបស់ប្រជាពលរដ្ឋកម្ពុជានាពេលនេះ ថៃមិនចាំបាច់ទប់ស្កាត់ការនាំចេញប្រេងមកឲ្យកម្ពុជានោះទេ ព្រោះបើទោះជារាជរដ្ឋាភិបាលកម្ពុជាមិនហាមឃាត់ការនាំចូល ក៏ប្រជាពលរដ្ឋកម្ពុជាខ្លួនឯងឈប់គាំទ្រ និងប្រើប្រាស់ ប្រេងសាំ ឬសេវាកម្មពីក្រុមហ៊ុនថៃដូចមុនដែរ។

ជាឧទាហរណ៍ដែលមានស្រាប់ គឺក្រុមហ៊ុនផ្គត់ផ្គង់ប្រេងឥន្ធនៈដ៏ធំមួយរបស់ថៃ បច្ចុប្បន្នកំពុងស្វែងរកផ្លូវចាកចេញពីទីផ្សាររបស់កម្ពុជាដោយខ្លួនឯងហើយ ក្រោយការលក់មានការធ្លាក់ចុះខ្លាំងមិនធ្លាប់មានជាប្រវត្តិសាស្រ្ត៕

ញូយ៉ក៖ ប្រធានាធិបតីអាមេរិក លោក Donald Trump បានផ្ដល់បទសម្ភាសន៍ជាមួយកាសែត The Wall Street Journal ចុងសប្ដាហ៍មុនថា ប្រទេសថៃ និងកម្ពុជា នឹងប្រឈមជាមួយការតម្លើងពន្ធគយខ្លាំងក្លាពីសហរដ្ឋអាមេរិក ប្រសិនបើពួកគេមិនបញ្ឈប់ជម្លោះប្រដាប់អាវុ.ធទេ ហើយវិលទៅគោរពបទឈប់បា.ញ់វិញនោះទេ។

តាមការចុះផ្សាយរបស់ទីភ្នាក់ងារព័ត៌មានរុស្សុី TASS នាថ្ងៃអាទិត្យ ទី១៤ ខែធ្នូនេះ លោក ដូណាល់ ត្រាំ បានគូសបញ្ជាក់ដូច្នេះថា «ខ្ញុំទើបតែបានគំរាមដំឡើងពន្ធគយកាលពីជាង ១០នាទីមុន…ដើម្បីដោះស្រាយជម្លោះដែលផ្ទុះឡើងជាថ្មីរវាងកម្ពុជា និងថៃ»។

លោក ត្រាំ បានបន្ថែមទៀតថា លោកបានប្រាប់មេដឹកនាំនៃប្រទេសទាំង២ថា «ប្រសិនបើពួកអ្នកធ្វើសង្រ្គាមនឹងគ្នា នោះខ្ញុំមិនត្រឹមតែបញ្ឈប់កិច្ចព្រមព្រៀងពាណិជ្ជកម្មដែលយើងមានប៉ុណ្ណោះទេ ហើយខ្ញុំនឹងដំឡើង ពន្ធគយលើប្រទេសរបស់ពួកអ្នកថែមទៀត។ គ្មាននរណាផ្សេងអាចធ្វើបានដូចខ្ញុំទេ»។

ជាមួយគ្នានេះ បើតាមអ្នកនាំពាក្យសេតវិមានម្នាក់កាលពីថ្ងៃសៅរ៍ បាននិយាយថា លោកប្រធានាធិបតី ដូណាល់ ត្រាំ សង្ឃឹមថា គ្រប់ភាគីទាំងអស់នឹងគោរពអនុវត្តតាមការប្ដេជ្ញាចិត្តរបស់ខ្លួនចំពោះបទឈប់បាញ់ ជាមួយការព្រមានថាលោកនឹងរកមុខអ្នកទទួលខុសត្រូវ ប្រសិនបើចាំបាច់ដើម្បីបញ្ឈប់ការកាប់សម្លាប់គ្នា និងធានាឱ្យបាននូវសន្តិភាពយូរអង្វែង។

យ៉ាងណាគួររម្លឹកថា លោក ដូណាល់ ត្រាំ កាលពីថ្ងៃសុក្រសប្ដាហ៍មុនបានប្រកាសថា រូបលោកបានបើកកិច្ចសន្ទនាតាមទូរស័ព្ទជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីថៃ លោក អានុទីន ហើយបានអះអាងថាមេដឹកនាំទាំង២ បានយល់ព្រមបញ្ឈប់ការប្រយុទ្ធគ្នា។ នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីម កាលពីថ្ងៃសៅរ៍ ក៏បានជំរុញឱ្យកម្ពុជា និងថៃ ទទួលយកបទឈប់បាញ់មួយនៅម៉ោង ១០យប់ កាលពីថ្ងៃសៅរ៍ផងដែរ។

ឆ្លើយតបនឹងសេចក្ដីអំពាវនាវរបស់ម៉ាឡេសុីដូចខាងលើ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានបង្ហាញការស្វាគមន៍យ៉ាងពេញចិត្តនូវបទឈប់បា.ញ់ដែលទើបប្រកាសថ្មីនេះ។ ប៉ុន្តែទោះជាយ៉ាងណា ចំពោះខាងភាគីថៃឯណោះ លោក អានុទីន បានប្រកាសថាយោធានឹងនៅតែបន្តឈ្លានពានកម្ពុជា ដោយមិនខ្វល់ឡើយចំពោះការអំពាវនាវរបស់ភាគីណាមួយ រួមទាំងលោកត្រាំផងដែរ ក្នុងការបញ្ជាថៃឱ្យត្រឡប់ទៅរក បទឈប់បាញ់និងបញ្ចប់ជម្លោះជាមួយកម្ពុជាឡើយ៕

ប្រទេសថៃ ៖ កាលពីថ្ងៃទី១៤ ខែធ្នូ ឆ្នាំ២០២៥ ទីប្រឹក្សាគណៈកម្មាធិការច្បាប់ យុត្តិធម៌ សិទ្ធិមនុស្ស និងជាអតីតបេក្ខជនគណបក្សផ្លាំងប្រាឆារ៉ាត់ លោក ស៊ុនធិយ៉ា សាវ៉ាត់ឌី បានមកស្ថានទូតអាមេរិកនៅតំបន់ប៉ាធុមវ៉ាន់ ទីក្រុងបាងកក ដើម្បីដាក់លិខិតទាមទារឱ្យប្រធានាធិបតីអាមេរិកសូមទោសថៃ ដែលនិយាយថា កងទ័ពថៃជាន់មីនជាច្រើនលើកនៅព្រំដែនជាឧបទ្ទវហេតុ ។ អ្នកនយោបាយរូបនេះក៏ទាមទារឱ្យប្រធានាធិបតីអាមេរិកបញ្ឈប់ជួយអន្តរាគមន៍ក្នុងសង្គ្រា.មឈ្លានពា.នកម្ពុជា និងកុំដាក់សម្ពាធថៃឱ្យឈប់វាយប្រ.ហារកម្ពុជាដោយដំឡើងពន្ធទំនិញ ប៉ុន្តែត្រូវស្ថានទូតអាមេរិកមិនអនុញ្ញាតឱ្យចូលទៅខាងក្នុង ។

អតីតបេក្ខជនគណបក្សផ្លាំងប្រាឆារ៉ាត់ លោក ស៊ុនធិយ៉ា បានយកលិខិតមកដាក់នៅស្ថានទូតអាមេរិក គឺក្រោយពីលោកប្រធាធិបតី Trump មានជំនួបតាមទូរស័ព្ទជាមួយនាយករដ្ឋមន្ត្រីកម្ពុជា-ថៃនាពេលថ្មីៗនេះដើម្បីបញ្ចប់សង្គ្រា.ម បន្ទាប់មក លោកប្រធានាធិបតី Trump បានបង្ហោះសារក្នុងបណ្តាញសង្គម Truth Social ថា ៖ «គ្រាប់មីននៅតាមព្រំដែនដែលកងទ័ពថៃជាន់រងរបួសនោះ គឺជាឧបទ្ទវហេតុ ប៉ុន្តែប្រទេសថៃបានសងសឹកយ៉ាងខ្លាំងក្លាទៅលើប្រទេសកម្ពុជា» ។

បន្ទាប់ពីប្រធានាធិបតីអាមេរិកថ្លែងបែបនេះធ្វើឱ្យពលរដ្ឋថៃ រួមទាំងអ្នកនយោបាយមិនពេញចិត្តយ៉ាងខ្លាំង និងចោទប្រកាន់អាមេរិកលម្អៀងទៅខាងកម្ពុជា បើទោះជាកងទ័ពថៃបានព្យាយាមសម្តែងល្ខោនលេងល្បិចធ្វើជាជាន់មីនរងរបួសនៅព្រំដែនទម្លាក់កំហុសលើកម្ពុជាបង្កប់មីនថ្មីដើម្បីបំភ័ន្តភ្នែកពិភពលោក និងមហាអំណាចអាមេរិក ហើយយកលេសវាយប្រហារកម្ពុជាយ៉ាងចាស់ដៃ ។

លោក ស៊ុនធិយ៉ា បានចោទប្រកាន់កម្ពុជាបង្កប់មីនថ្មីធ្វើឱ្យកងទ័ពថៃរងរបួសម្តងហើយម្តងទៀត ទើបរដ្ឋាភិបាលថៃបើកដៃឱ្យកងទ័ពវាយប្រហារកម្ពុជាយ៉ាងធ្ងន់ធ្ងរ ។ ក្រោយដាក់លិខិតលើរបងមុខស្ថានទូតអាមេរិក លោក ស៊ុនធិយ៉ា ថាប្រធានាធិបតិអាមេរិកមិនទទួលខុសត្រូវចំពោះប្រទេសថៃដែលកងទ័ពរងរបួសដោយសារមីន ហេតុនេះ ទាមទារឱ្យប្រធានាធិបតីអាមេរិកសូមទោសពលរដ្ឋថៃ និងកងទ័ពថៃ ។

ក្រៅពីនេះ ក៏ទាមទារឱ្យប្រធានាធិបតីអាមេរិកឈប់អន្តរាគមន៍ក្នុងជម្លោះព្រំដែនជាមួយកម្ពុជា ពីព្រោះជាជម្លោះទ្វេភាគីដែលប្រទេសទាំងពីរត្រូវចរចា និងដោះស្រាយបញ្ហាជាមួយគ្នា ។ ដូចគ្នានេះ សំណូមពរទៅកាន់នាយករដ្ឋមន្ត្រីម៉ាឡេស៊ី លោក Anwar Ibrahim កុំជួយអន្តរាគមន៍ និងស្នើឱ្យម៉ាឡេស៊ីដោះស្រាយបញ្ហាព្រំដែនជាមួយថៃនៅខេត្តសុងក្លា ជាមុន ។ ក្រៅពីនេះ លោកចោទប្រកាន់កម្ពុជាមិនអនុញ្ញាតឱ្យពលរដ្ឋថៃ ចំនួន៧,០០០នាក់នៅប៉ោយប៉ែតត្រឡប់មកប្រទេសថៃវិញ ។

លោក ស៊ុនធិយ៉ា បន្តថា ទោះជាមន្ត្រីស្ថានទូតអាមេរិកមិនទទួលលិខិត ប៉ុន្តែពលរដ្ឋថៃទូទាំងប្រទេសមិនគាំទ្រពាក្យសម្តីរបស់ប្រធានាធិបតីអាមេរិកទេ ពីព្រោះធ្វើឱ្យប្រទេសថៃខូចខាត កងទ័ពថៃវាយប្រហារកម្ពុជាក្រោមហេតុផលការពារអធិបតេយ្យ ការពារកិត្តិយស និងសុវត្ថិភាព ។ ប៉ុន្តែប្រធានាធិបតីអាមេរិកបែរជានិយាយថា គ្រាប់មីននៅព្រំដែនដែលកងទ័ពថៃជាន់រងរបួសជាឧបទ្ទវហេតុ ប៉ុន្តែប្រទេសថៃបានសងសឹកយ៉ាងខ្លាំងក្លាទៅលើកម្ពុជា ។

កងទ័ពថៃបានវាយប្រហារកម្ពុជាយ៉ាងកំរោល និងសាហាវតាំងពីថ្ងៃទី៧ ខែធ្នូ បន្ទាប់ពីចោទប្រកាន់កម្ពុជាបង្កប់មីនថ្មី ទោះជាកម្ពុជាបញ្ជាក់ជាច្រើនលើកថា មិនបានបង្កប់មីនថ្មីទេ និងសំណូមពរឱ្យកងទ័ពថៃដើរល្បាតតែក្នុងទឹកដីរបស់ខ្លួន ។ លោក ហេង រតនា អគ្គនាយកស៊ីម៉ាក់លើកឡើងថា សម្រាប់ពលរដ្ឋកម្ពុជានរណាៗក៏បានយល់ដឹងច្បាស់ថា បញ្ហាផ្ទុះគ្រាប់មីនគ្រាន់តែជាយុទ្ធសាស្ត្រ និងឧបាយកលរបស់ថៃក្នុងការប្រើកម្លាំងធ្វើសង្គ្រាមឈ្លានពាន និងកាន់កាប់បូរណភាពទឹកកម្ពុជាទាំងកំរោល និងសម្តែងជាតួអង្គគោរពច្បាប់អន្តរជាតិប៉ុណ្ណោះ ។

គួរបញ្ជាក់ថា ក្រសួងការពារជាតិកម្ពុជាបានច្រានចោលការចុះផ្សាយរបស់ព័ត៌មានថៃដែលចោទប្រកាន់កម្ពុជាថា «កម្ពុជាសម្រេចផ្អាកការធ្វើដំណើរឆ្លងកាត់ព្រំដែនដើម្បីឃាត់ ឬបង្ខាំងពលរដ្ឋថៃ និងជាការបំបិទសិទ្ធិសេរីភាពនៃការធ្វើដំណើរ ឬបំពានច្បាប់ និងអនុញ្ញាអន្តរជាតិ» ក្រសួងការពារជាតិកម្ពុជាបានបដិសេធចោលទាំងស្រុងចំពោះការចោទបប្រកាន់ និងផ្សាយព័ត៌មានក្លែងក្លាយ បំភ្លៃខុសការពិតរបស់ថៃ ។

រាជរដ្ឋាភិបាលកម្ពុជាបានសម្រេចផ្អាកការធ្វើដំណើរចេញ-ចូលទាំងស្រុងនៅតាមច្រកទ្វារព្រំដែនគោក និងផ្លូវទឹកជាប់ព្រំដែនកម្ពុជាជាមួយថៃដែលកំពុងមានអរិភាពប៉ុណ្ណោះ ក្នុងគោលបំណងការពារអាយុជីវិត និងការរងរបួសរបស់ជនស៊ីវិលពីការបាញ់ប្រហារដោយមិនរើសអើងនៅតាមបណ្ដោយព្រំដែនពីសំណាក់យោធាថៃ ដោយមិនរាប់បញ្ចូលការធ្វើដំណើរតាមផ្លូវអាកាស និងច្រកទ្វារព្រំដែនដែលគ្មានភាពតានតឹង ឬតាមច្រកទ្វារព្រំដែនកម្ពុជាជាប់ជាមួយប្រទេសផ្សេងឡើយ ៕

នេះហើយសន្តានពិតប្រាកដរបស់ថ្នាក់ដឹកនាំថៃ! ក្រោយប្រកាសក្ដែងៗថាប្រទេសរបស់ខ្លួនត្រូវបានកម្ពុជាឈ្លានពាន និងគំរាមកំហែង អានុទីន បែរជាឡើងច្រៀងរាំយ៉ាងរំភើយនៅជំរុំជនភៀសសឹក ដែលមានពលរដ្ឋរាប់មុឺននាក់កំពុងរងទុក្ខវេ.ទនា និងស្របពេលដែលទាហានថៃបានស្លា.ប់ជាបន្តបន្ទាប់ ហើយចោ.លសា.កស.ពលើដីខ្មែរ។

តាមរយៈវីដេអូឡាយផ្ទាល់នៅលើទំព័រហ្វេសប៊ុក គឺលោកអានុទីន ឆាន់វីរៈគុល នាយករដ្ឋមន្រ្តីចាំផ្ទះរបស់ថៃ បានចុះទៅសួរសុខទុក្ខពលរដ្ឋថៃនៅតាមព្រំដែនដែលរត់គេចខ្លួនពីសង្រ្គា.មមកកាន់ជំរុំភៀសសឹកក្នុងខេត្តមួយ។ នៅក្នុងវីដេអូចុះសួរសុខទុក្ខប្រជាជនភៀសសឹកនោះ លោកអានុទីន ហាក់បង្ហាញពីអារម្មណ៍សប្បាយរីករាយ ដោយមានទាំងការឡើងច្រៀងនិងរាំកម្សាន្តជាមួយចង់តន្រ្តីផង និងនិយាយលេងសើចយ៉ាងក្អាក្អាយផងជាមួយមនុស្សជុំវិញខ្លួន។

មិនត្រឹមតែច្រៀងរាំ និងសើចសប្បាយនៅចំពោះមុខប្រជាជនដែលកំពុងជួបទុក្ខលំបាកដោយសារសង្រ្គា.មដែលបង្ករឡើងដោយមហិច្ចតាលោ.ភលន់អំណាចរបស់ខ្លួនប៉ុណ្ណោះទេ លោក អានុទីន ថែមទាំងបានធ្វើការផ្សាយផ្ទាល់ (Live) លើបណ្តាញសង្គមហ្វេសប៊ុកថែមទៀត ដោយគ្មានភាពរអៀសខ្មាសក្នុងខ្លួនសូម្បីបន្តិច។

ទង្វើរបស់នាយករដ្ឋមន្រ្តីថៃដូចខាងលើនេះ ធ្វើឡើងស្របពេលដែលយោធាថៃ កំពុងបើកការវាយប្រហារយ៉ាងសន្ធាប់ឈ្លានពានមកលើកម្ពុជា ដែលធ្វើឲ្យមានទាហានថៃជាច្រើនបានស្លា.ប់និងកំពុងធ្វើបុណ្យជាបន្តបន្ទាប់ ខណៈដែលស.ពទាហានថៃខ្លះទៀតបានស្លា.ប់យ៉ាងរាយប៉ាយលើទឹកដីខ្មែរ។

បន្ថែមលើនេះ តាមរយៈសកម្មភាពរបស់ អានុទីន ពិភពលោកនឹងបានដឹងកាន់តែច្បាស់ថា ប្រទេសណាគឺជាជនរងគ្រោះនៅក្នុងសង្រ្គា.មរវាងកម្ពុជានិងថៃឲ្យប្រាកដ ព្រោះប្រសិនបើដូចការចោ.ទប្រកាន់របស់ថៃកន្លងមកថាកម្ពុជា គឺជាអ្នកឈ្លានពានថៃ ហេតុអ្វីបានជាថ្នាក់ដឹកនាំថៃសប្បាយអរម្ល៉េះ?

មួយវិញទៀត ប្រសិនបើកម្ពុជា ពិតជាបានឈ្លានពានថៃមែន ហេតុអ្វីបានជាពេលនេះទាំងថ្នាក់ដឹកនាំ និងប្រជាជនកម្ពុជា គ្មាននរណាម្នាក់ពេញចិត្តទាល់តែសោះក្នុងការប្រយុទ្ធគ្នានេះ? ផ្ទុយទៅវិញ ទាំងរដ្ឋាភិបាល និងប្រជាជនកម្ពុជា បានដឹងយ៉ាងច្បាស់ថាប្រទេសដ៏តូចមួយនេះ ត្រូវការតែសន្តិភាពនិងដែនអធិបតេយ្យភាពរបស់ខ្លួនពេញលេញត្រឹមត្រូវតាមច្បាប់តែមួយគត់ ជាពិសេសមិនចង់ឲ្យមានសង្រ្គា.មដែលនាំឲ្យប៉ះពាល់ដល់ជីវិតរបស់ទាហាន និងជនសុីវិលឡើយ។

ខុសពីប្រទេសថៃ ដែលតាមរយៈវីដេអូមួយនេះ វាបានបង្ហាញពីយ៉ាងច្បាស់ពីសន្តានរបស់មេដឹកនាំថៃ ដែលសប្បាយរីករាយ និងសាទរ ពេលឃើញយោធាខ្លួន ឈ្លានពានលើប្រទេសកម្ពុជា៕

ប្រទេសថៃ ៖ កងទ័ពថៃបានបើកការវាយប្រ.ហារយ៉ាងកំរោលមកលើដែនអធិបតេយ្យស្របច្បាប់របស់កម្ពុជាតាំងពីថ្ងៃទី៧ ខែធ្នូ ឆ្នាំ២០២៥ ទោះជាប្រធានាធិបតីអាមេរិក លោក Donald Trump ទូរស័ព្ទមកមេដឹកនាំថៃឱ្យឈប់បង្កសង្គ្រា.មឈ្លានពា.នកម្ពុជា និងកំណត់ពេលឈប់បា.ញ់ចាប់ពីម៉ោង១០យប់ថ្ងៃទី១៣ ខែធ្នូ ប៉ុន្តែកងទ័ពថៃនៅតែបំពានបទឈប់បា.ញ់ ដោយបន្តប្រើប្រាស់សព្វាវុ.ធធ្ងន់គ្រប់ប្រភេទ រួមទាំងផ្សែងពុល គ្រា.ប់បែកចង្កោម យន្តហោះទម្លាក់គ្រាប់បែ.ក F-16 និង Gripen ។ ការឈ្លានពា.នកម្ពុជាជាថ្មីនេះធ្ងន់ធ្ងរ និងសា.ហាវ ក្រោមលេសការពារអធិបតេយ្យ សុវត្ថិភាពពលរដ្ឋ និងកិត្តិយស ប៉ុន្តែបានបំផ្លា.ញប្រាសាទបុរាណ ស្ពាន លំនៅឋាន និងទ្រព្យសម្បត្តិពលរដ្ឋកម្ពុជា ។

លើសពីនេះ នាយករដ្ឋមន្ត្រីថៃចាំផ្ទះ លោក Anutin Charnvirakul បង្ហោះសារថា ៖ «កងទ័ពថៃនឹងឈ្លានពានកម្ពុជាបន្តទៀតរហូតទាល់តែមានអារម្មណ៍គ្មានគ្រោះថ្នាក់ ប្រទេសថៃគ្មានផែនការ ឬព្រមព្រៀងឈប់បាញ់ជាមួយសត្រូវទេ គិតត្រឹមម៉ោង១០យប់ថ្ងៃទី១៣ ខែធ្នូ កងទ័ពថៃនឹងការពារអធិបតេយ្យ និងសុវត្ថិភាពពលរដ្ឋ» ។ កងទ័ពថៃបានធ្វើសង្គ្រាមឈ្លានពានអស់រយៈពេលជាច្រើនថ្ងៃ និងមិនទាន់មានសញ្ញាណាមួយបង្ហាញថា សង្គ្រាមនេះនឹងបញ្ចប់ពេលណាទេ បន្ទាប់ពីរដ្ឋាភិបាលល្មោភសង្គ្រាមថៃទាត់ចោលការអន្តរាគមន៍ឱ្យមានបទឈប់បាញ់របស់ប្រធានាធិបតីអាមេរិក ។

លោក Thanathorn Juangroongruangkit អ្នកនយោបាយដ៏លេចធ្លោ និងជាអតីតប្រធានគណបក្សអនាគតថ្មី ដែលបច្ចុប្បន្នប្តូរមកជាគណបក្សប្រជាជន ជឿជាក់ថា សង្គ្រាមកម្ពុជា-ថៃនឹងមិនកើតឡើងទេ ប្រសិនបើលោក ភីថា លឹមចារើនរ៉ាត់ (Pita Limjaroenrat) អតីតប្រធានគណបក្សកាវក្លៃ ក្លាយជានាយករដ្ឋមន្ត្រីថៃ ។ ប៉ុន្តែមហាជនរិះគន់លោកយ៉ាងខ្លាំង ដោយសារពួកគេគាំទ្រឱ្យកងទ័ពបន្តសង្គ្រាមឈ្លានពានកម្ពុជា ដោយមិនខ្វល់ពីមហាអំណាចដាក់សម្ពាធសេដ្ឋកិច្ច ។

កាលពីថ្ងៃទី១៣ ខែធ្នូ នៅសាកលវិទ្យាល័យមួយក្នុងទីក្រុងបាងកក លោក Thanathorn អតីតប្រធានគណបក្សអនាគតថ្មី នចូលរួមកម្មវិធីសូមទោសពលរដ្ឋជាមួយគណបក្សប្រជាជន ដោយលោកសូមទោសពលរដ្ឋថា កន្លងមក គណបក្សប្រជាជនព្យាយាមទប់ស្កាត់កុំឱ្យកងទ័ពបង្កសង្គ្រាមឈ្លានពានកម្ពុជារីករាលដាលខ្លាំងដូចបច្ចុប្បន្ន ពីព្រោះត្រូវការសន្តិភាព មិនត្រូវការសង្គ្រាម ប៉ុន្តែសង្គ្រាមនៅតែកើតឡើង ។ បើលោក Pita អតីតប្រធានគណបក្សកាវក្លៃធ្វើជានាយករដ្ឋមន្ត្រី នឹងគ្មានសង្គ្រាមដាច់ខាត គឺនឹងមានការអនុវត្តវិធានការផ្សេងៗ រួមមាន ៖ ពាណិជ្ជកម្ម ការចរចាការទូត និងនយោបាយការបរទេសទប់ស្កាត់សង្គ្រាម ហើយពលរដ្ឋនឹងមិនលំបាកដូចពេលនេះ ។

ផ្ទុយទៅវិញ សង្គមថៃមិនគាំទ្រគំនិតនេះទេ ដោយយល់ថា ប្រសិនបើលោក Pita អតីតប្រធានគណបក្សកាវក្លៃធ្វើជានាយករដ្ឋមន្ត្រី ប្រទេសថៃនឹងចាញ់ប្រៀបកម្ពុជាយូរមកហើយ ពីព្រោះលោក Pita មិនបើកដៃឱ្យកងទ័ពធ្វើសង្គ្រាមឈ្លានពានកម្ពុជាដូចលោក Anutin ។ ពលរដ្ឋថៃថែមទាំងចោទប្រកាន់កម្ពុជាបង្កប់មីនថ្មីបណ្តាលឱ្យកងទ័ពថៃរងរបួសជាបន្តបន្ទាប់ និងរិះគន់គោលនយោបាយរបស់លោក Pita ដែលមិនគាំទ្រកងទ័ពបង្កសង្គ្រាម ។

ពលរដ្ឋថៃបាននិយាយក្នុងបណ្តាញសង្គមថា បើលោក Pita អតីតប្រធានគណបក្សកាវក្លៃធ្វើជានាយករដ្ឋមន្ត្រី ប្រទេសជាតិនឹងរលំរលាយមិនខាន ប្រទេសថៃនឹងបាត់បង់ទឹកដី ពីព្រោះលោក Pita កាត់បន្ថយថវិកាកងទ័ព ។ ពួកគេថែមទាំងរិះគន់លោក Thanathorn អតីតប្រធានគណបក្សអនាគតថ្មីដែលគាំទ្រលោក Pita និងថា ថៃមិនចង់បង្កសង្គ្រាមទេ និងចោទប្រកាន់កម្ពុជាល្មើសអធិបតេយ្យ ។

លោក Thanathorn អតីតប្រធានគណបក្សអនាគតថ្មីបានចូលរួមកម្មវិធីសូមទោសពលរដ្ឋនៅសាកលវិទ្យាល័យមួយក្នុងទីក្រុងបាងកក ជាមួយលោក Natthaphong Ruengpanyawut ប្រធានគណបក្សប្រជាជន, លោក Pita Limjaroenrat អតីតប្រធានគណបក្សកាវក្លៃ និងលោក Chaithawat Tulathon អតីតប្រធានគណបក្សកាវក្លៃ ។ គណបក្សប្រជាជនរៀបចំកម្មវិធីសូមទោសពលរដ្ឋនេះ ក្រោយពីកងទ័ពថៃធ្វើសង្គ្រាមឈ្លានពានកម្ពុជាមិនឈប់ឈរ ហើយគណបក្សនេះក៏រងការរិះគន់ពីមហាជនផងដែរ ដែលជំរុញឱ្យលោក Anutin ចរចាបញ្ចប់សង្គ្រាម ។

គួរបញ្ជាក់ថា ភាគីថៃមិនព្រមអនុវត្តបទឈប់បាញ់ និងទាត់ចោលសំណើរបស់លោកប្រធានាធិបតី Trump ដែលនេះឆ្លុះបញ្ចាំងយ៉ាងច្បាស់ពីចេតនាពិតប្រាកដរបស់ភាគីថៃក្នុងការធ្វើសង្គ្រាមឈ្លានពានកម្ពុជា គឺមិនមែនប្រយុទ្ធដើម្បីការពារខ្លួននោះទេ ប៉ុន្តែជាការដណ្តើមទឹកដីកម្ពុជា ៕