វាជារឿងដែលមនុស្សភាគច្រើនធ្លាប់សង្ស័យសម្រាប់ដបភេសជ្ជៈពិបាកបើកគំរប ប៉ុន្តែមិនដឹងថា នឹងទៅរកចម្លើយនៅទីណា ។ ហេតុអ្វីគេមិនផលិតគំរបរបស់វាឱ្យងាយស្រួលបើកផឹក និងមិនចាំបាច់ប្រើប្រាស់ឧបករណ៍ជំនួយ ។

ជាទូទៅ ដបសម្រាប់ដាក់ភេសជ្ជៈផ្សេងៗមានគំរបបិទជិតឈឹង និងមិនអាចបើកវាដោយដៃទទេបានទេ គឺដើម្បីឱ្យប្រាកដចិត្តថា ភេសជ្ជៈនៅក្នុងដបនេះនៅថ្មីៗជានិច្ច និងគ្មានលាយឡំជាមួយមេរោគ ។ ហេតុនេះ ការបិទគំរបជិតនឹងជួយការពារមិនឱ្យខ្យល់ និងមេរោគផ្សេងៗចូលទៅក្នុងដប ។ នេះជាបញ្ហាសំខាន់យ៉ាងខ្លាំងសម្រាប់ភេសជ្ជៈដូចជា កូកាកូឡា ប៉ិបស៊ី ស្រាបៀរ និង Wine ជាដើម ។ វានឹងបាត់បង់រសជាតិដើម និងកាបូនឌីអុកស៊ីត បើវាប៉ះគ្នាជាមួយខ្យល់ខាងក្រៅ ។ ក្រៅពីនេះ ការបិទគំរបជិត ក៏ជួយការពារការលិចធ្លាយផងដែរ ដោយសារគំរបនេះមានតួនាទីការពារកុំឱ្យភេសជ្ជៈខូចគុណភាព និងរក្សាភាពស្អាត ។

គំរបដបភេសជ្ជៈបានផលិតឡើងពីសន្លឹកដែក ដែលផ្នែកខាងក្នុងមានទ្រនាប់ការពារកុំឱ្យជ្រាបទឹក ។ នៅពេលបានបិទគំរបវាជិត គេនឹងអាចរក្សានូវគុណភាពភេសជ្ជៈ ឬផលិតផលនៅក្នុងដបបានល្អ ។ គំរបប្រភេទនេះត្រូវបានផលិតដំបូងកាលពីឆ្នាំ១៨៩១ នៅសហរដ្ឋអាមេរិក ហើយគេចាត់ទុកថា វាមានប្រវត្តិយូរយាបំផុត និងមានតម្លៃថោក ។ ក្រៅពីនេះ គេបានប្រើប្រាស់ឧបករណ៍បិទគំរបដបភេសជ្ជៈបានឆាប់រហ័ស និងអាចបិទគំរបរហូតដល់១សែនដបក្នុង១ម៉ោង ៕ ប្រភព ៖ sanook

ប្រទេសឡាវ ៖ ក្រុមហ៊ុនរបស់ចិនឈ្មោះ China Southern Power Grid (CSG) កំពុងតែសម្លឹងមើលឱកាសប្រកបអាជីវកម្មបបន្ថែមទៀតនៅប្រទេសឡាវ ក្រោយពីក្រុមហ៊ុននេះបានវិនិយោគលើផ្នែកថាមពល និងទទួលបានប្រាក់ចំណេញជាបន្តបន្ទាប់ រហូតក្លាយជាដៃគូពាណិជ្ជកម្មនៅប្រទេសនេះ ។

សារព័ត៌មាន Vientiane Times ចុះផ្សាយថា លោក Li Xinhao នាយកគ្រប់គ្រងទូទៅផ្នែកសហការអន្តរជាតិរបស់ក្រុមហ៊ុន CSG បានលើកឡើងនៅខែកក្កដា ឆ្នាំ២០២៣ ថា ប្រទេសដៃគូពាណិជ្ជកម្មក្នុងតំបន់អាស៊ានបានជួយគ្នាទៅវិញទៅមក ដើម្បីធ្វើឱ្យការផ្គត់ផ្គង់ថាមពលអគ្គិសនីមានតុល្យភាព ។ ប្រទេសចិនបាននាំចេញថាមពលទៅកាន់តំបន់អាស៊ានក្នុងរដូវក្តៅ និងនាំចូលថាមពលក្នុងរដូវវស្សា នៅពេលសមត្ថភាពផលិតអគ្គិសនីកើនឡើងនៅប្រទេសទាំងនេះ ។

ហេតុនេះ ក្រុមហ៊ុន CSG បានដាក់ផែនការបង្កើតខ្សែបញ្ជូនបន្ថែមនៅប្រទេសឡាវ និងជួយពង្រីកខ្សែបញ្ជូនផ្សេងៗទៅកាន់ប្រទេសជិតខាងរបស់ឡាវ ដើម្បីបង្កើនទំនាក់ទំនងរវាងប្រទេសក្នុងតំបន់ទន្លេមេគង្គ និងតំបន់ Lan Xang នាថ្ងៃអនាគត ។ ប្រទេសឡាវមានសមត្ថភាពគ្រប់គ្រាន់ដើម្បីផលិតថាមពលវារីអគ្គិសនីចែកចាយទៅកាន់ប្រទេសជិតខាង ដោយសារនៅតំបន់អាស៊ានមានទន្លេឆ្លងកាត់ ទើបក្រុមហ៊ុន CSG សម្លឹងឃើញថា វាជាឱកាសល្អសម្រាប់ក្រុមហ៊ុនពង្រីកការវិនិយោគថាមពលបន្ថែមទៀត ។

ទោះយ៉ាងណា ការធ្វើពាណិជ្ជកម្មថាមពលអគ្គិសនីរវាងប្រទេសឡាវ និងចិន នាពេលនេះចាត់ទុកថា មានចំនួនតិចនៅឡើយ ដោយសារមានការដំឡើងខ្សែបញ្ជូនអគ្គិសនីតភ្ជាប់គ្នាត្រឹមតែ១១៥គីឡូវ៉ុលប៉ុណ្ណោះ ។ គេនឹងបង្កើតបណ្តាញបញ្ជូនថាមពលទំហំ៥០០គីឡូវ៉ុល នាប៉ុន្មានឆ្នាំខាងមុខ ដើម្បីធ្វើពាណិជ្ជកម្មថាមពលរវាងប្រទេសទាំងពីរបន្ថែមទៀត ។ ចំណែករថភ្លើងតភ្ជាប់ប្រទេសឡាវ និងចិន បានដំណើរការដោយក្រុមហ៊ុន CSG សហការជាមួយសហគ្រាសរដ្ឋឡាវ EDL ហើយវាបានជួយប្រទេសឡាវធ្វើបង្គោលអគ្គិសនីនៅតាមបណ្តោយផ្លូវរថភ្លើងផងដែរ ៕ ប្រភព ៖ AEC connect

ប្រទេសថៃ ៖ មេដឹកនាំក្រុមគាំទ្រគណបក្សកាវក្លៃបានស្នើឱ្យមហាជនទូទៅក្រោកឈរឡើងតស៊ូជាមួយឧបសគ្គ ដោយបបួលឱ្យស្លៀកពាក់ឈុតខ្មៅកាន់ទុក្ខ រហូតដល់ដាច់ខែកក្កដា ឆ្នាំ២០២៣ ។ លើសពីនេះ ពួកគេក៏បានសំណូមពរឱ្យគណបក្សនយោបាយចំនួន៨ ដែលប្រកាន់យកលទ្ធិប្រជាធិបតេយ្យសហការគ្នាឱ្យរឹងមាំផងដែរ និងមើលឃើញពីទឹកចិត្តពលរដ្ឋថៃ ដែលត្រូវរងទុក្ខវេទនាអស់រយៈពេលជាង៨ឆ្នាំ ។កាលពីថ្ងៃទី១៩ ខែកក្កដា កន្លងមក គេរាយការណ៍ថា ក្រោយពីរដ្ឋសភាបានបោះឆ្នោត និងសម្រេចថា មិនអាចដាក់ឈ្មោះលោក Pita Limjaroenrat មេដឹកនាំគណបក្សកាវក្លៃ ធ្វើជាបេក្ខជននាយករដ្ឋមន្ត្រីម្តងទៀត ក៏បានធ្វើឱ្យពលរដ្ឋថៃស្ទើរទូទាំងប្រទេសបានសម្តែងការមិនពេញចិត្តយ៉ាងខ្លាំង ។

គេសង្កេតឃើញថា នៅបរិវេណវិមានប្រជាធិបតេយ្យ (Democracy Monument) ដែលជាកន្លែងណាត់ជួបគ្នារបស់ក្រុមអ្នកគាំទ្រគណបក្សកាវក្លៃ មានអ្នកគាំទ្រគណបក្សនេះបាននាំគ្នាដើរចូលមកជាបន្តបន្ទាប់ និងបង្កើតវេទិកានិយាយពាក់ព័ន្ធនឹងតុលាការធម្មនុញ្ញដកសមាជិកភាពសភារបស់លោក Pita Limjaroenrat ។ មេដឹកនាំក្រុមគាំទ្រគណបក្សកាវក្លៃមកពីតំបន់ផ្សេងៗបានឆ្លាស់គ្នាឡើងនិយាយលើវេទិកា ។

លោក Somyot Prueksakasemsuk លើកឡើងថា ពួកផ្តាច់ការបានរួមគ្នាបំផ្លាញសិទ្ធិសេរីភាពរបស់ពលរដ្ឋ និងធ្វើឱ្យក្តីសុបិនរបស់ពលរដ្ឋ ដែលចង់ឃើញគណបក្សកាវក្លៃ និងគណបក្សភឿថៃរួមគ្នាបង្កើតរដ្ឋាភិបាលនោះបានរលាយអស់ ហើយគណបក្សកាវក្លៃទំនងជាត្រូវធ្វើបក្សប្រឆាំង ។ តើពលរដ្ឋទាំងអស់ទទួលយកបានដែរឬទេ ?

លោកបន្តថា ចាប់ពីពេលនេះ យើងត្រូវតស៊ូបន្តទៀតតាមគ្រប់វិធី មិនថាការទៅគោះទ្វារ ឬចុចកណ្តឹងផ្ទះរបស់សមាជិកព្រឹទ្ធសភា ដើម្បីឱ្យពួកគេដឹងខ្លួន និងប្តូរចិត្ត ។ ការតស៊ូនេះមិនមែនជារឿងរបស់គណបក្សកាវក្លៃតែមួយទេ ប៉ុន្តែវាជារឿងរបស់ពលរដ្ឋទាំងអស់ដែលត្រូវចេញមកតស៊ូរួមគ្នា ។ លើសពីនេះ យើងនឹងរួមគ្នាកម្ចាត់នូវអំណាចមើលមិនឃើញផងដែរ ។ សូមអញ្ជើញបងប្អូនពលរដ្ឋគ្រប់គ្នាស្លៀកពាក់ឈុតពណ៌ខ្មៅដើម្បីកាន់ទុក្ខ រហូតដល់ថ្ងៃទី៣១ ខែកក្កដា ឆ្នាំ២០២៣ ។

រីឯលោក Rattaphoom Lertphaichit លើកឡើងថា សូមផ្តល់កម្លាំងចិត្តដល់គណបក្សនយោបាយចំនួន៨ ត្រូវចាប់ដៃគ្នាឱ្យណែន និងជជែកដោយបើកចំហ ហើយត្រូវគិតថា អ្វីដែលលោកអ្នកបានធ្វើនោះ គឺពលរដ្ឋជាអ្នកទទួលបានប្រយោជន៍ ព្រោះពលរដ្ឋបានរងទុក្ខវេទនាអស់រយៈពេល៨ឆ្នាំហើយ និងចង់ឃើញពន្លឺ ។

ចំណែកលោក Yingcheep Atchanon លើកឡើងថា លោក Pita Limjaroenrat បានកាន់តំណែងជាសមាជិកសភាតាំងពីឆ្នាំ២០១៩ មកម៉្លេះ បើលោកខ្វះគុណសម្បត្តិ គួរតែខ្វះតាំងពីយូរមកហើយ ។ ម្យ៉ាងទៀត កាលពីខែមេសា ឆ្នាំ២០២៣ លោក Pita Limjaroenrat បានដាក់ពាក្យចូលរួមក្នុងការបោះឆ្នោត ហើយគេត្រូវត្រួតពិនិត្យគុណសម្បត្តិ ដូច្នេះ បើលោកខ្វះគុណសម្បត្តិ គួរតែបញ្ជាក់នៅពេលនោះ ៕ ប្រភព ៖ Thairath

ប្រទេសបារាំង ៖ កាលពីថ្ងៃទី១៩ ខែកក្កដា កន្លងមក ក្រសួងមហាផ្ទៃបារាំងបានប្រកាសថា មានមនុស្សជាង៧០០នាក់ត្រូវបានតុលាការកាត់ទោសឱ្យជាប់ពន្ធនាគារ ។ តុលាការបានចោទប្រកាន់ពួកគេពីបទបង្កចលាចលនៅទូទាំងប្រទេសបារាំង កាលពីចុងខែមិថុនា ឆ្នាំ២០២៣ ។

រដ្ឋមន្ត្រីក្រសួងមហាផ្ទៃបារាំង លោក Eric Dupond-Moretti បានថ្លែងទៅកាន់ស្ថានីយវិទ្យុក្នុងប្រទេសថា វាចាំបាច់ណាស់ដែលអាជ្ញាធរត្រូវចាត់វិធានការប្រឆាំងដាច់ខាតនឹងការប្រើអំពើហិង្សា និងជាប្រព័ន្ធផងដែរ ពីព្រោះការរៀបចំសណ្តាប់ធ្នាប់នៅក្នុងប្រទេសបារាំង គឺជារឿងសំខាន់ ។

តុលាការបានកាត់ទោសក្រុមបង្កចលាចលសរុបចំនួន១.២៧៨នាក់ ក្នុងនោះ៩៥% ត្រូវបានតុលាការកាត់ទោសពាក់ព័ន្ធនឹងបទចោទប្រកាន់ផ្សេងៗដូចជា បំផ្លាញទ្រព្យសម្បត្តិសាធារណៈ រហូតដល់វាយតប់មន្ត្រីប៉ូលិសជាដើម ។ តុលាការបានកាត់ទោសមនុស្សជាង៧០០នាក់ឱ្យជាប់ពន្ធនាគារ ក្នុងនោះគេបានចាប់ខ្លួនមនុស្ស៦០០នាក់ទៅដាក់ពន្ធនាគាររួចហើយ ។ គេសង្កេតឃើញថា ការបង្កចលាចលនេះធ្ងន់ធ្ងរជាងកាលពីឆ្នាំ២០០៥ ទៅទៀត ខណៈកាលពីឆ្នាំ២០០៥ មានអ្នកជាប់ពន្ធនាគារប្រមាណ៤០០នាក់ ។

ការបង្កចលាចលលើកចុងក្រោយនៅប្រទេសបារាំង មានមនុស្សជាង៣.៧០០នាក់ត្រូវបានគេចាប់ខ្លួន ក្នុងនោះមានយុវជនអាយុត្រឹម១៧ឆ្នាំផងដែរ ហើយគេបានបញ្ជូនយុវជនដែលប្រព្រឹត្តខុសទៅកាន់តុលាការយុវជន ។ ចំពោះមូលហេតុនាំឱ្យមានការប្រើហិង្សានេះ ដោយសារប៉ូលិសបានបា.ញ់យុវជនម្នាក់ជនជាតិអាល់ហ្សេរី មានអាយុ១៧ឆ្នាំ បណ្តាលឱ្យស្លា.ប់កាលពីថ្ងៃទី១៧ ខែមិថុនា កន្លងមក ។ ប៉ូលិសនិយាយថា បានហៅយុវជនខាងលើឱ្យចតរថយន្ត ដើម្បីត្រួតពិនិត្យក្នុងតំបន់ Nanterre នៅភាគខាងលិចទីក្រុងប៉ារីស ។

ចាប់ពីពេលនោះមក ក៏មានការធ្វើបាតុកម្មជាប់ៗគ្នាចំនួន៤យប់ ហើយអាជ្ញាធរបានបញ្ជូនភ្នាក់ងារសន្តិសុខរហូតដល់៤៥.០០០នាក់ រួមទាំងប្រើប្រាស់រថពាសដែកផងដែរ ដើម្បីចេញល្បាតនៅតាមកន្លែងប្រើហិង្សានានា រហូតអាចគ្រប់គ្រងស្ថានការណ៍បាន ៕ ប្រភព ៖ TNN World