ប្រទេសថៃ ៖ គណបក្សភឿថៃអះអាងថា ខ្លួនគ្មានកិច្ចពិភាក្សាសម្ងាត់អ្វីទេ ហើយគណបក្សនេះបានជជែកពិភាក្សាជាមួយគណបក្សទាំងអស់យ៉ាងបើកចំហរ ។ គណបក្សភឿថៃលើកឡើងទៀតថា ខ្លួនបានទទួលភារកិច្ចបង្កើតរដ្ឋាភិបាលពីគណបក្សកាវក្លៃ បើមិនជជែកជាមួយគណបក្សណាសោះ គឺអាចគ្មានពិន្ទុ ។

គណបក្សភឿថៃបានប្រជុំពិភាក្សាជាមួយគណបក្សភូមិចៃថៃ ដើម្បីដោះស្រាយបញ្ហាជាប់គាំងនយោបាយរបស់ប្រទេសជាតិ និងរកផ្លូវចេញ ដោយមានលោក Chonnan Srikaew ប្រធានគណបក្សភឿថៃ ជាអ្នកទទួលស្វាគមន៍គណបក្សនានា ក្នុងនោះមានលោក Anutin Charnvirakul មេដឹកនាំគណបក្សភូមិចៃថៃ, លោក Suwat Liptapanlop ប្រធានគណបក្សឆាត ផាត់តាណាក្លា, លោក Peeraphan Salirathaviphak ប្រធានគណបក្សរួមថៃ សាងឆាត និងលោក Warawut Silpa-archa ប្រធានគណបក្សឆាតថៃ ផាត់តាណា ។

ក្រោយពីជំនួបពិភាក្សាគ្នារវាងគណបក្សភឿថៃជាមួយគណបក្សនានារួចមក ប្រធានគណបក្សទាំងនេះបាននាំគ្នាផឹកភេសជ្ជៈ Mint Choc ឬ Chocolate Mint ដែលជាភេសជ្ជៈរបស់ហាង Think Lab ប្រកបដោយបរិយាកាសរីករាយ ។ ការផឹកភេសជ្ជៈក្នុងចំណោមប្រធានគណបក្សទាំងនេះបានធ្វើឱ្យពលរដ្ឋថៃជាច្រើននាក់រិះគន់ ព្រោះពួកគេគិតថា គណបក្សកាវក្លៃនឹងត្រូវបានរុញឱ្យធ្វើជាគណបក្សប្រឆាំង ខណៈគណបក្សភឿថៃរួមសហការជាមួយគណបក្សចាស់ៗ ដែលមានគោលជំហរផ្ទុយគ្នាដើម្បីបង្កើតរដ្ឋាភិបាល ។

ចុងក្រោយ គណបក្សភឿថៃបានបង្ហោះរូបភាព និងសារនៅក្នុង Twitter ថា ៖ «គណបក្សភឿថៃ ក្នុងឋានៈជាគណបក្សដឹកនាំបង្កើតរដ្ឋាភិបាល ដូច្នេះ យើងបានទទួលភារកិច្ចពីគណបក្សកាវក្លៃ និងគណបក្សចំនួន៨ ។ យើងគ្មានអាថ៌កំបាំងអ្វីទេ យើងជជែកពិភាក្សាជាមួយគ្រប់គណបក្សទាំងអស់យ៉ាងបើកចំហរ រីឯជាមួយសមាជិកព្រឹទ្ធសភា ក៏យើងបានបញ្ជូនអ្នកទៅជជែកដែរដើម្បីប្រាប់ទៅគណបក្សទាំង៨ ។ យើងបំពេញការងារទៅមុខដើម្បីរកសំឡេងគាំទ្រ និងបន្ថែមសំឡេងគាំទ្រថ្មី ព្រោះបើយើងមិនជជែកជាមួយគណបក្សណាសោះ យើងនឹងគ្មានពិន្ទុទេ» ៕ ប្រភព ៖ sanook

ប្រទេសអ៊ីតាលី ៖ កាលពីថ្ងៃទី១៩-២០ ខែកក្កដា ឆ្នាំ២០២៣ ព្យុះព្រិលដ៏ធំមួយបានបោកបក់មកលើប្រទេសអ៊ីតាលី រហូតបណ្តាលឱ្យមានទឹកជំនន់ និងមានពលរដ្ឋរងរបួសជាង១០០នាក់ ។ ព្យុះព្រិលនេះបានកើតឡើងក្នុងទីក្រុង Seregno និងតំបន់មួយចំនួនទៀតដែលស្ថិតនៅភាគខាងជើងប្រទេសអ៊ីតាលី ។

គេរាយការណ៍ថា ដុំព្រិលភាគច្រើនដែលបានធ្លាក់ចុះមកនេះ មានទំហំជាង១០សង់ទីម៉ែត្រឯណោះ ។ លើសពីនេះ មានការហៅទូរស័ព្ទចេញរហូតដល់៥០០លើកពាក់ព័ន្ធនឹងគ្រោះថ្នាក់ផ្សេងៗក្នុងអំឡុងពេលព្យុះកំពុងបោកបក់ ដើម្បីឱ្យអាជ្ញាធរចុះមកជួយសង្គ្រោះអ្នករងរបួស ។

លោក Luca Zaia អាជ្ញាធរប្រចាំតំបន់ Veneto លើកឡើងថា អ្នករងរបួសដោយសារហេតុការណ៍នេះ គឺមានទាំងអ្នកត្រូវព្រិលទឹកកកធ្លាក់លើ និងមុតកញ្ចក់ផងដែរ ។ ព្រិលធ្លាក់មកលើកនេះ វាមានទំហំធំជាងធម្មតា ។

មុននេះ នៅតំបន់ភាគខាងជើងប្រទេសអ៊ីតាលី បានប្រឈមនឹងអាកាសធាតុក្តៅខ្លាំង ហើយហេតុការណ៍ព្យុះព្រិលធ្លាក់នៅតំបន់ Veneto ស្របគ្នានឹងតំបន់ផ្សេងៗរបស់អ៊ីតាលីកំពុងប្រឈមនឹងអាកាសធាតុក្តៅខ្លាំងអស់រយៈពេលជាច្រើនថ្ងៃជាប់ៗគ្នា ហើយវាក៏បានគ្របដណ្តប់លើប្រទេសជាច្រើនទៀតនៅតំបន់អឺរ៉ុបផងដែរ ។

នៅតាមទីក្រុងផ្សេងៗនៅប្រទេសអ៊ីតាលី អាជ្ញាធរបានជូនដំណឹងពីអាកាសធាតុក្តៅខ្លាំងក្នុងកម្រិតពណ៌ក្រហម ហើយអាជ្ញាធរក៏បានដាស់តឿនឱ្យពលរដ្ឋនៅតែក្នុងម្លប់ ចាប់ពីម៉ោង១១ព្រឹក រហូតដល់ម៉ោង៦ល្ងាច ៕

ប្រភព ៖ Mono News

ប្រទេសចិន ៖ នៅខែកក្កដា ឆ្នាំ២០២៣ នេះ ភោជនីយដ្ឋានមួយកន្លែងនៅទីក្រុងប៉េកាំង ប្រទេសចិន បានបង់ប្រាក់សំណងទៅឱ្យបុរសម្នាក់ ខណៈបុរសរូបនេះអះអាងថា គាត់បានបរិភោគសត្វកន្លាតនៅក្នុងចានម្ហូប ដែលគាត់បានកុម្ម៉ង់ពីភោជនីយដ្ឋាន ។

ក្រោយពីឃើញសត្វកន្លាត បុរសរូបនេះបានប្រាប់ទៅកាន់បុគ្គលិកបម្រើការឱ្យមកពិនិត្យ ហើយខាងភោជនីយដ្ឋានខ្លាចខូចកេរ្តិ៍ឈ្មោះ ពួកគេសម្រេចមិនយកប្រាក់ពីបុរសនេះទេ គឺឱ្យគាត់បរិភោគអាហារដោយមិនបាច់ចំណាយប្រាក់ ។ ប៉ុន្តែបុរសនេះបដិសេធថា គាត់នឹងចំណាយប្រាក់ថ្លៃអាហារតាមធម្មតា ។

ភោជនីយដ្ឋានគិតថា រឿងនេះចប់ហើយ ប៉ុន្តែផ្ទុយទៅវិញ បុរសនេះបានទូរស័ព្ទមកភោជនីយដ្ឋានឱ្យបង់ប្រាក់សំណងថ្លៃម្ហូបដល់គាត់ លើសមុន១០ដង ហើយបើភោជនីយដ្ឋានមិនយល់ព្រមទេ គាត់នឹងបង្ហោះរឿងនេះក្នុងបណ្តាញសង្គមឱ្យខូចឈ្មោះភោជនីយដ្ឋាន ។ ពេលនោះ ភោជនីយដ្ឋានក៏បានសុំឱ្យគាត់ចុះថ្លៃខ្លះ និងយល់ព្រមផ្ទេរប្រាក់សំណងឱ្យគាត់ភ្លាមៗ ។

ក្រោយមក ភោជនីយដ្ឋានក៏បានមកពិនិត្យមើលម្ហូបនេះឡើងវិញ ហើយសង្ស័យថា សត្វកន្លាតនៅក្នុងចានម្ហូបមិនបានងា.ប់ដោយសារការចម្អិនម្ហូបទេ ប៉ុន្តែវាបានងា.ប់ពីខាងក្រៅ ។ ដូច្នេះ ភោជនីយដ្ឋានក៏ដាក់ពាក្យបណ្តឹងទៅប៉ូលិស ហើយប៉ូលិសក៏បានចាប់ខ្លួនបុរសកំហូចខាងលើ ។ បុរសនេះបានសារភាពប្រាប់ប៉ូលិសថា គាត់ធ្វើបែបនេះ ព្រោះគាត់គ្មានប្រាក់ចាយ គ្មានការងារធ្វើ ហើយគាត់បានប្រព្រឹត្តបែបនេះជាច្រើនលើកមកហើយ ។

ប៉ូលិសបានរកឃើញថា បុរសខាងលើបានលាក់សត្វកន្លាតងា.ប់ជាច្រើនក្បាលទៀតនៅក្នុងប្រអប់ដាក់តាមខ្លួនផងដែរ ។ បុរសខាងលើប្រាប់ថា គាត់បានទិញសត្វកន្លាតជាច្រើនក្បាលពីស្រុកកំណើត បន្ទាប់មក យកវាទៅស្ងោរឱ្យឆ្អិន ហើយជ្រើសយកតែកន្លាតណាល្អៗទុកដាក់ក្នុងចានម្ហូប និងទាមទារប្រាក់ពីភោជនីយដ្ឋានល្បីៗ ព្រោះភោជនីយដ្ឋានទាំងនេះមានប្រាក់បង់ឱ្យគាត់ ដើម្បីកុំឱ្យខូចកេរ្តិ៍ឈ្មោះ ៕ ប្រភព ៖ World Forum Th

បរទេស៖ យោងតាមទិន្នន័យដែលបានចេញផ្សាយថ្មីកាលពីថ្ងៃទី២៣ ខែកក្កដា បានឱ្យដឹងថា អតិផរណាស្នូលរបស់ប្រទេសជប៉ុន ក្នុងខែមិថុនា បានកើនឡើង ០.១% បើធៀបនឹងខែឧសភា គឺ ៣.៣%។ មូលហេតុចម្បងគឺដោយសារតម្លៃអគ្គិសនីកើនឡើងខ្លាំង ដែលការកើនឡើងនេះនៅតែទាបជាងការព្យាករណ៍ (៣.៥%) របស់ធនាគារកណ្តាលជប៉ុន (BOJ)។ ទន្ទឹមនឹងនេះ អតិផរណារបស់សហរដ្ឋអាមេរិកមានត្រឹមតែ ៣% នៅក្នុងខែមិថុនា។ ដូច្នេះហើយ អតិផរណារបស់ជប៉ុនបានលើសសហរដ្ឋអាមេរិកជាលើកដំបូងក្នុងរយៈពេល ៨ ឆ្នាំ ។

នៅថ្ងៃទី ២០ ខែកក្កដា រដ្ឋាភិបាលជប៉ុនបានព្យាករណ៍ថា អតិផរណានៅឆ្នាំនេះអាចឈានដល់ ២.៦% ខ្ពស់ជាង ២% ដែលស្នើឡើងដោយ BOJ ។ ខណៈពេលដែលកាត់បន្ថយគោលដៅកំណើនពី ១.៥% ទៅ ១.៣% ។ នៅសប្តាហ៍នេះ ទេសាភិបាលធនាគារកណ្តាលជប៉ុន លោក Kazuo Ueda បានផ្តល់សញ្ញាថា វិធានការបន្ធូរបន្ថយ នឹងត្រូវរក្សានៅកិច្ចប្រជុំនៅសប្តាហ៍ក្រោយ។ ការផ្លាស់ប្តូរនេះដោយលោក Ueda បានបណ្តាលឱ្យ ប្រាក់យ៉េនធ្លាក់ចុះធៀបនឹង USD ទោះបីជាមានសញ្ញាកើនឡើងក្នុងសប្តាហ៍មុនក៏ដោយ។

លោក Yoshiki Shinke ប្រធានសេដ្ឋវិទូនៅវិទ្យាស្ថានស្រាវជ្រាវ Dai-ichi Life បាននិយាយថា អតិផរណានៅកម្រិត ៣-៤% គឺ “មិនទាបទៀតទេ” ។ លោកបានអត្ថាធិប្បាយថា “អាជ្ញាធរចាំបាច់ត្រូវចាត់វិធានការដោយប្រុងប្រយ័ត្នពីព្រោះក្រុមហ៊ុនមានឆន្ទៈក្នុងការបញ្ជូនបន្ទុកលើអ្នកប្រើប្រាស់” ។
បច្ចុប្បន្ននេះ ប្រទេសជប៉ុនគឺជាប្រទេសតែមួយគត់ក្នុងពិភពលោកដែលមានអត្រាការប្រាក់អវិជ្ជមាន។ ទោះជាយ៉ាងណាក៏ដោយ ការរក្សាបាននូវអត្រាការប្រាក់ទាបកំពុងធ្វើឱ្យគោលនយោបាយរបស់ពួកគេប្រឆាំងនឹងរលកនៃការរឹតបន្តឹងជាសកល។ នៅក្នុងបរិបទបច្ចុប្បន្ន ទិន្នន័យអតិផរណាកំពុងបង្កើនប្រូបាប៊ីលីតេដែល BOJ នឹងកែសម្រួលគោលនយោបាយរូបិយវត្ថុ ហើយដូច្នេះអាចបណ្តាលឱ្យមានផលប៉ះពាល់មួយចំនួនលើហិរញ្ញវត្ថុសកល៕ ប្រភព៖vnexpress

ប្រទេសហ្វីលីពីន ៖ ធនាគារអភិវឌ្ឍន៍អាស៊ី (The Asian Development Bank: ADB) បានរំពឹងថា នៅឆ្នាំ២០២៣ ហ្វីលីពីននឹងក្លាយជាប្រទេសដែលមានសេដ្ឋកិច្ចរីកចម្រើនបំផុតនៅតំបន់អាស៊ាន ហើយផលិតផលក្នុងស្រុកសរុប (GDP) អាចនឹងកើនឡើងស្មើ៦% នៅឆ្នាំ២០២៣ ។ ចំណែកសេដ្ឋកិច្ចប្រទេសឥណ្ឌូណេស៊ីនឹងកើនឡើងស្មើ៤,៨%, ម៉ាឡេស៊ី ៤,៧%, សិង្ហបុរី ១,៥%, ថៃ ៣,៥% និងវៀតណាម ៥,៨% ។

ទោះយ៉ាងណា សេដ្ឋកិច្ចហ្វីលីពីនបានកើនឡើងស្មើ៦,៤% ក្នុងត្រីមាសទី១ ឆ្នាំ២០២៣ ដោយសារការវិនិយោគទុនដ៏រឹងមាំរបស់ក្រុមហ៊ុនឯកជន ។ ហេតុនេះ វាបានជំរុញដល់ការជួលកម្លាំងពលកម្មកាន់តែខ្ពស់, ការពង្រីកផ្នែកផលិតកម្ម និងការលក់រាយ ព្រមទាំងការសាងសង់របស់រដ្ឋ និងក្រុមហ៊ុនឯកជនផងដែរ ។

ចំណែកវិស័យទេសចរណ៍របស់ហ្វីលីពីន ក៏បានងើបឡើងវិញផងដែរ ខណៈវិស័យសេវាកម្មគ្រប់គ្រងប្រព័ន្ធអាជីវកម្ម រួមទាំងសេវាព័ត៌មានបានរក្សាកម្រិតលូតលាស់យ៉ាងរឹងមាំ ។ ហេតុនេះ ធនាគារ ADB ប៉ាន់ស្មានថា សេដ្ឋកិច្ចហ្វីលីពីននឹងរីកលូតលាស់រហូតដល់៦,២% នៅឆ្នាំ២០២៤ ។ ជាមួយគ្នានេះ គេរំពឹងថា អតិផរណានឹងឈានដល់៦,២% នៅឆ្នាំ២០២៣ ប៉ុន្តែវានឹងធ្លាក់ចុះនៅត្រឹម៤% នៅឆ្នាំ២០២៤ ។

សម្រាប់កំណើនសេដ្ឋកិច្ចនៅតំបន់អាស៊ានទាំងមូលត្រូវបានគេរំពឹងថា នឹងធ្លាក់ចុះពីអត្រា៤,៧% មកស្មើត្រឹម៤,៦% នៅឆ្នាំ២០២៣ ។ លើសពីនេះ វានឹងធ្លាក់ចុះពីអត្រា៥% មកស្មើត្រឹម៤,៧% នៅឆ្នាំ២០២៤ ដោយសារការធ្លាក់ចុះនៃតម្រូវការនាំចេញទំនិញនៅទូទាំងពិភពលោក បើទោះជាតម្រូវការនៅក្នុងស្រុកពុំទាន់មានការផ្លាស់ប្តូរ ៕ ប្រភព ៖ AEC connect

រាជធានីបាងកក៖ គណបក្សភឿថៃ កំពុងតែប្រឈមមុខនឹងសម្ពាធយ៉ាងធ្ងន់ មកពីគណបក្សមានទំនោរទៅលើយោធារាជានិយម នៅក្នុងការបង្កើតរដ្ឋាភិបាលថ្មី ហើយគណបក្សមួយនេះ នឹងសម្រេចជោគវាសនារបស់គណបក្សឆ្ពោះទៅមុខ នៅថ្ងៃអង្គារនេះ។

សារព័ត៌មានរបស់ថៃ បានចេញផ្សាយ កាលពីថ្ងៃចន្ទ ទី២៤ ខែកក្កដា ថា សម្ពន្ធភាពចម្រុះចំនួន៨គណបក្ស នឹងជួបប្រជុំគ្នា នៅថ្ងៃអង្គារ ដើម្បីសម្រេច ថាតើគណបក្សឆ្ពោះទៅមុខ (Move Forward Party) ហៅកាត់ MFP ដែលបានឈ្នះ នៅក្នុងការបោះឆ្នោតសកល កាលពីថ្ងៃ ទី១៤ ខែកក្កដា នឹងនៅតែចូលរួមជាមួយសម្ពន្ធភាព នៅក្នុងការបង្កើតរដ្ឋាភិបាលថ្មី ក្រោយពេលគណបក្សនយោបាយផ្សេងៗទៀត មិនគាំទ្រដល់សម្ពន្ធភាពចម្រុះទាំង៨គណបក្សនេះ នៅក្នុងការបោះឆ្នោតនាយករដ្ឋមន្រ្ដីថ្មីរបស់ប្រទេសថៃ ប្រសិនបើគណបក្សឆ្ពោះទៅមុខ នៅតែបន្ដរួបរួមជាមួយគណបក្សភឿថៃ។

គណបក្សភឿថៃ (Pheu Thai Party) ហៅកាត់ PT កំពុងតែខិតខំប្រឹងប្រែង រួមគ្នាបង្កើតរដ្ឋាភិបាលថ្មី នៅក្នុងរយៈពេលប៉ុន្មានថ្ងៃកន្លងមកនេះ បន្ទាប់ពីលោក ភីថា លីមចារឿនរ៉ាត មេដឹកនាំគណបក្ស MFP មិនបានទទួលនូវសំឡេងគាំទ្រ ភាគច្រើនគ្រប់គ្រាន់ ទៅតាមច្បាប់កំណត់ ពីសភាទាំង២របស់ប្រទេសថៃ សម្រាប់ការឈានទៅកាន់កាប់តំណែងនាយករដ្ឋមន្រ្ដី កាលពីថ្ងៃទី១៣ ខែកក្កដា ខណៈសភាបានច្រានចោលនូវការតែងតាំងជាលើកទី២ នៅថ្ងៃទី១៩ ខែកក្កដា។ ឥឡូវ គណបក្សភឿថៃ កំពុងតែស្នើឲ្យមានកិច្ចគាំទ្រ មកពីគណបក្សផ្សេងៗទៀត នៅក្នុងអំឡុងពេលបោះឆ្នោត ជាលើកទី២ គ្រោងនឹងធ្វើ នៅថ្ងៃព្រហស្បតិ៍ ទី២៧ ខែកក្កដា។

លោក ឆូលណាន់ ស្រីកែវ (Cholnan Srikaew) ប្រធានគណបក្សភឿថៃ បានបញ្ជាក់ ថា ការឆ្លើយតបជាទូទៅ គឺគណបក្សនយោបាយជាច្រើន អាចមិនព្រមធ្វើការជាមួយនឹងគណបក្សភឿថៃ ប្រសិនបើគណបក្សឆ្ពោះទៅមុខ ក្លាយជាដៃគូសម្ពន្ធភាពដ៏ធំរបស់ខ្លួន។ គណបក្សឆ្ពោះទៅមុខ នៅតែប្រកាន់គោលជំហររបស់ខ្លួន ធ្វើវិសោធនកម្ម លើមាត្រាទី១១២ នៃក្រមព្រហ្មទណ្ឌ ពាក់ព័ន្ធនឹងការប្រមាថព្រះមហាក្សត្រ។

លោក ឆូលណាន់ ស្រីកែវ ប្រធានគណបក្សគណបក្សភឿថៃ បានបន្ដ ថា គាត់កំពុងតែនិយាយគ្នា អំពីរឿងនេះ ក្រោយចរចាជាមួយនឹងគណបក្សប៉ាឡាំងប្រាឆារ៉ាត (Palang Pracharath Party) ហៅកាត់ PPRP កាលពីថ្ងៃអាទិត្យ។ ចំណុចដ៏សំខាន់ទាំងនេះ នឹងត្រូវបានរាយការណ៍ ត្រឡប់ទៅកាន់សម្ពន្ធភាពរបស់គណបក្សភឿថៃ នៅមុនពេលការសម្រេចចិត្តបន្ថែមទៀត នឹងត្រូវធ្វើឡើង ទាក់ទងនឹងសមាសភាព នៃសម្ពន្ធភាពចម្រុះ។

គណបក្សភឿថៃ កំពុងតែផ្ដោតលើគោលបំណង ស្វែងរកការចរចាជាមួយនឹងគណបក្សនយោបាយជាច្រើនផ្សេងទៀត លើកលែងតែគណបក្សប្រជាធិបតេយ្យ ហាក់បីដូចជា នៅមិនទាន់ពិចារណានៅឡើយ សម្រាប់កិច្ចពិភាក្សា។

លោក ឆូលណាន់ ស្រីកែវ បានបន្ដ ថា «នៅមុនពេលគណបក្សភឿថៃ តែងតាំងបេក្ខជននាយករដ្ឋមន្រ្ដី គឺសម្ពន្ធភាពចម្រុះទាំង៨គណបក្សនេះ នឹងត្រូវតែសន្និដ្ឋាន អំពីវិធីសាស្រ្ដផ្សេង សម្រាប់គណបក្សភឿថៃ អាចធានាដល់ការទទួលបានសំឡេងគាំទ្រយ៉ាងតិច ចំនួន៣៧៥សំឡេង សម្រាប់ការគាំទ្រដល់បេក្ខភាពនាយករដ្ឋមន្រ្ដី។

គណបក្សភឿថៃ ក៏បានសម្រេចចិត្តបញ្ជូនលោក ស៊ូរីយ៉ា ចាំងគ្រុងគ្រាងគីត (Suriya Jungrungreangkit) អតីតរដ្ឋមន្ត្រីឧស្សាហកម្ម ដឹកនាំកិច្ចពិភាក្សានេះ ដោយចាប់ផ្តើម កាលពីពីថ្ងៃចន្ទ ជាមួយនឹងសមាជិកព្រឹទ្ធសភាមួយចំនួន។

លោក សានទី ប៊្រុមផាត (Santi Promphat) អគ្គលេខាធិការគណបក្សប៉ាឡាំងប្រាឆារ៉ាត (Palang Pracharath Party) ហៅកាត់ PPRP បានបញ្ជាក់ ថា គណបក្សរបស់គាត់ យល់ឃើញ ថា ចេតនារបស់គណបក្សឆ្ពោះទៅមុខ (MFP) ចង់ធ្វើវិសោធនកម្ម លើមាត្រា១១២ ពាក់ព័ន្ធនឹងការប្រមាថព្រះមហាក្សត្រ។ សកម្មភាពបែបនេះ ជាការមិនអាចទទួលយកបាននោះឡើយ ហើយគណបក្ស PPRP ក៏បានប្រកាសអំពីគោលជំហរយ៉ាងម៉ឺងម៉ាត់របស់ខ្លួន ប្រឆាំងនឹងគោលដៅរបស់គណបក្សឆ្ពោះទៅមុខ។

លោក សានទី ប៊្រុមផាត អគ្គលេខាធិការគណបក្សប៉ាឡាំងប្រាឆារ៉ាត បានបន្ដ ថា «គណបក្ស PPRP ក៏បានប្រាប់រួចមកហើយទៅដល់គណបក្សភឿថៃ អំពីករណីនេះ។ គោលបំណងរបស់គណបក្សឆ្ពោះទៅមុខ ត្រូវតែធ្វើវិសោធនកម្មច្បាប់ ស្តីពីការប្រមាថព្រះមហាក្សត្រ ហើយបញ្ហានេះ ក្លាយជាដើមចមដ៏សំខាន់ អាចជំរុញឲ្យគណបក្ស PPRP មិនគាំទ្រ ដល់គណបក្សភឿថៃ ព្រោះតែគណបក្សនេះ បានចូលរួមជាមួយសម្ពន្ធភាពចម្រុះថ្មីទាំង៨គណបក្សនោះ»។

ទន្ទឹមគ្នានេះ លោក ថាម៉ាណាត ប៊្រុមប៉ាវ (Thamanat Prompow) សមាជិកសភា មកពីគណបក្សប៉ាឡាំងប្រាឆារ៉ាត សម្រាប់ខេត្តផាយ៉ាវ (Phayao) បានបញ្ជាក់ ថា គណបក្ស PPRP របស់គាត់ នឹងមិនតែងតាំងលោកឧត្ដមសេនីយ៍ ប្រាវីត វង់ស៊ូវ៉ាន់ (Prawit Wongsuwon) សម្រាប់ការបោះឆ្នោតនាយករដ្ឋមន្រ្ដី នោះទេ។ បញ្ហានេះក៏ដោយសារតែគណបក្សរបស់គាត់ខកខាតមិនឈានដល់គោលដៅរបស់ខ្លួន សម្រាប់ការឈ្នះឆ្នោតសកលរបស់ប្រទេសថៃ យ៉ាងតិច ចំនួន២៥០អាសនៈ នៅក្នុងរដ្ឋសភា។

ជាមួយនឹងការទន្ទឹងរង់ចាំគណបក្សភឿថៃ បង្កើតរដ្ឋាភិបាលចម្រុះនោះ ព្រឹទ្ធសភា កាលពីថ្ងៃអាទិត្យ (ទី២៣ ខែកក្កដា) បានលើកឡើង ថា គណបក្សភឿថៃ អាចនឹងពិចារណាពន្យារពេលការបោះឆ្នោតនាយករដ្ឋមន្ត្រីថ្មី រហូតដល់ដើមខែសីហា ប្រសិនបើគណបក្សភឿថៃ នៅតែមិនទាន់ប្រមូលសំឡេងគាំទ្រឲ្យមានចំនួនគ្រប់គ្រាន់ សម្រាប់បេក្ខជនរបស់ខ្លួន និងមិនទាន់បានត្រៀមខ្លួនរួចរាល់ សម្រាប់ការបោះឆ្នោតបន្ដទៀត៕