ពិតណាស់ ប្រភេទកីឡានៅលើពិភពលោកយើងនេះគឺមានច្រើនណាស់ ដូច្នេះហើយតើអ្នកដឹងទេ? កីឡាប្រភេទណាខ្លះដែលមានអ្នកគាំទ្រច្រើន និងមានការពេញនិយមបំផុតនៅលើពិភពលោក? ខាងក្រោមនេះគឺជាបញ្ជីឈ្មោះកីឡាពេញនិយមបំផុតទាំង ១០ របស់ពិភពលោក៖

១.កីឡាបាល់ទាត់ (Football)៖ មានចំនួនអ្នកគាំទ្ររហូតដល់ ៣.៥ ពាន់លាននាក់ ដែលពេញនិយមលេងនៅទូទាំងពិភពលោក។

២.កីឡាគ្រីឃីត (Cricket)៖ មានអ្នកគាំទ្រ ២.៥ ពាន់លាននាក់ ដែលពេញនិយមនៅបណ្តាប្រទេសមួយចំនួនដូចជា អូស្រ្តាលី អាហ្រ្វិក ចក្រភពអង់គ្លេស និងទ្វីបអាស៊ី។

៣.កីឡាហុកគី (Hockey)៖ ហុកគី មានអ្នកគាំទ្រចំនួន ២ ពាន់លាននាក់ ហើយកីឡានេះត្រូវគេនិយមលេងនៅតំបន់អាស៊ី អឺរ៉ុប អាហ្រ្វិក និងនៅអូស្រ្តាលី។

៤.កីឡាតេនីស (Tennis)៖ មានអ្នកគាំទ្រប្រហែល ១ ពាន់លាននាក់ និងមានការពេញនិយមទូទាំងពិភពលោក។

៥.កីឡាបាល់ទះ (Volleyball)៖ មានអ្នកគាំទ្រ ៩០០ លាននាក់ និងត្រូវគេនិយមលេងនៅជុំវិញពិភពលោក។

៦.កីឡាវាយប៉េងប៉ុង (Table Tennis/Ping Pong)៖ មានអ្នកគាំទ្រ ៨៥០ លាននាក់ និងមានការពេញនិយមទូទាំងពិភពលោក។

៧.កីឡាបាល់បោះ (Basketball)៖ មានអ្នកគាំទ្រ ៥០០ លាននាក់ និងមានការពេញនិយមជាសកល។

៨.កីឡាវាយកូនគោល (Golf)៖ មានអ្នកគាំទ្រប្រហែល ៤៥០ លាននាក់ កីឡាប្រភេទនេះត្រូវគេនិយមលេងនៅក្នុងតំបន់អាមេរិកខាងជើង អឺរ៉ុបខាងលិច និងអាស៊ីខាងកើត។

៩.កីឡាវាយកូនបាល់ (Baseball)៖ មានអ្នកគាំទ្រប្រមាណ ៤០០ លាននាក់ ដែលមានការនិយមលេងនៅតំបន់អាមេរិក សមុទ្រការីបង់ និងអាស៊ីខាងកើត។

១០.កីឡាបាល់ឱប (Rugby)៖ មានអ្នកគាំទ្រខ្ទង់ ៤០០ លាននាក់ ហើយមានការពេញនិយមនៅតំបន់អាហ្រ្វិក អាស៊ី អាមេរិក អឺរ៉ុប ចក្រភពអង់គ្លេស និងអូស្រ្តាលី៕

ពិតណាស់ នៅពេលដែលចំនួនប្រជាជនកើនឡើង ហើយសេដ្ឋកិច្ចកាន់តែរីកធំ កាកសំណល់ ឬសំរាមក៏កាន់តែច្រើនពាសពេញបណ្តាប្រទេសជុំវិញពិភពលោក។ គិតត្រឹមពាក់កណ្តាលឆ្នាំ២០២៣ នេះដោយយោងតាមទិន្នន័យសកលរបស់អង្គការគ្រប់គ្រងកាកសំណល់ និងធនាគាពិភពលោក បានរកឃើញថា មានប្រទេសចំនួន ៥ ដែលផលិតកាកសំណល់ច្រើនជាងគេបង្អស់នៅលើពិភពលោក ដោយប្រទេសទាំងនោះមានដូចជា៖

១.ប្រទេសកាណាដា (Canada)៖ យោងតាមការប៉ាន់ប្រមាណនៃការបង្កើតកាកសំណល់សរុបរបស់ប្រទេសកាណាដាគឺធំជាងគេបំផុតនៅក្នុងពិភពលោកទាំងមូល។ វាមានកាកសំណល់សរុបប្រចាំឆ្នាំប៉ាន់ស្មានគឺជាង ១ ពាន់លានតោន។ ដោយគិតគូរពីប្រជាជនកាណាដាចំនួន ៣៦.៧ លាននាក់ នោះកាកសំណល់ប្រចាំឆ្នាំប៉ាន់ស្មានក្នុងមនុស្សម្នាក់ផលិតសំរាមជាង ៣៦.១ តោន។

២.ប្រទេសប៊ុលហ្គារី (Bulgaria)៖ ប្រទេសប៊ុលហ្គារីមានប្រជាជនប្រមាណ ៧ លាននាក់ ដោយមនុស្សម្នាក់បង្កើតសំរាម ២៦.៧ តោន ដូចនេះចំនួនកាកសំណល់សរុបប្រចាំឆ្នាំប៉ាន់ស្មានគឺជាង ១០០ លានតោន។

៣.ប្រទេសអាមេរិក (United States)៖ សហរដ្ឋអាមេរិកមានប្រជាជនច្រើនជាងគេទីបីក្នុងចំណោមប្រទេសទាំងអស់នៅលើពិភពលោក យោងតាមការប៉ាន់ប្រមាណនៃការបង្កើតកាកសំណល់សរុបប្រចាំឆ្នាំរបស់ប្រទេសនេះគឺ ២៥៨ លានតោន ដោយក្នុងម្នាក់ផលិតសំរាម ៤.៥ តោន។

៤.ប្រទេសអេស្តូនី (Estonia)៖ សំណល់ប្រចាំឆ្នាំប៉ាន់ស្មានរបស់អេស្តូនីក្នុងមនុស្សម្នាក់គឺ ២៣.៥ តោន ហើយចំនួនកាកសំណល់ប្រចាំឆ្នាំប៉ាន់ស្មានរបស់វាគឺជាង ៣០ លានតោន។

៥.ប្រទេសហ្វាំងឡង់ (Finland)៖ ប្រជាជនហ្វាំងឡង់មានចំនួន ៥,៥ លាននាក់។ កាកសំណល់ប្រចាំឆ្នាំដែលបានប៉ាន់ប្រមាណក្នុងមនុស្សម្នាក់ៗគឺ ១៦.៦ តោន ហើយបរិមាណកាកសំណល់ប្រចាំឆ្នាំប៉ាន់ស្មានរបស់ប្រទេសនេះគឺជាង ៩០ លានតោន៕

នៅថ្ងៃបុណ្យចូលឆ្នាំថ្មីរបស់ជនជាតិចិន គឺជារដូវកាលដែលផ្លែឈើជាច្រើនប្រភេទទទួលបានការពេញនិយមជាខ្លាំង ពីព្រោះពួកគេជឿថា ផ្លែឈើទាំងនេះមានអត្ថន័យល្អ និងនាំមកនូវលាបសំណាង ។ បើតាមជំនឿរបស់ជនជាតិចិន ការប្រគល់ផ្លែឈើជូនគ្នាទៅវិញទៅមក គឺជាការឱ្យពរដល់អ្នកដែលបានទទួល ។

ផ្លែឈើមួយក្នុងចំណោមផ្លែឈើដែលផ្តល់នូវលាភសំណាងតាមជំនឿរបស់ជនជាតិចិន គឺផ្លែទទឹម ។ គេជឿថា ផ្លែទទឹមមានពណ៌ក្រហមជាផ្លែឈើមង្គល ហើយស្លឹក និងមែករបស់វាអាចជួយបណ្តេញពពួកបីសាច និងរឿងរ៉ាវអាក្រក់ចេញពីលំនៅឋានបាន ។

ក្រៅពីនេះ ជនជាតិចិនជឿថា ផ្លែទទឹមមានគ្រាប់ច្រើន គឺជានិមិត្តសញ្ញានៃភាពសម្បូរបែប ហើយគ្រួសារនោះនឹងមានកូនប្រុសច្រើននាក់ ដើម្បីជួយធ្វើការនៅក្នុងគ្រួសារ និងអាចបន្តវង្សត្រកូលបាន ។ ហេតុនេះ គេសង្កេតឃើញពលរដ្ឋចិនតែងទិញផ្លែទទឹមធ្វើជាអំណោយដល់កូនកំលោះ កូនក្រមុំ ក្នុងថ្ងៃអាពាហ៍ពិពាហ៍ដើម្បីឱ្យពួកគេមានកូនច្រើននាក់ ។

ជនជាតិចិនមួយចំនួននិយមដាំដើមទទឹមនៅបរិវេណជុំវិញផ្ទះ ឬបេះស្លឹកទទឹមដាក់តាមខ្លួនដើម្បីការពារគ្រោះភ័យផ្សេងៗ ។ ចំណែកអ្នកខ្លះទៀតបានបេះស្លឹកទទឹមទៅត្រាំទឹកទុកលាងមុខ និងលាងដៃ នៅពេលពួកគេត្រឡប់ពីពិធីបុណ្យសព ដើម្បីការពារកុំឱ្យខ្មាចព្រាយបីសាចដើរតាមពួកគេ ៕ ប្រភព ៖ Kaset Go

តើដឹងឬទេថា ទឹកឃ្មុំធម្មជាតិសុទ្ធដែលមានការវេចខ្ចប់ត្រឹមត្រូវ វានឹងគ្មានថ្ងៃផុតកំណត់ទេ ។ ជាក់ស្តែង អ្នកបុរាណវិទ្យាមួយក្រុមបាននាំគ្នាជីកដី ហើយពួកគេក៏ប្រទះឃើញទឹកឃ្មុំដែលមានអាយុកាលរាប់ពាន់ឆ្នាំនៅក្នុងផ្នូរអេហ្ស៊ីបបុរាណ ។ ពួកគេរកឃើញថា ទឹកឃ្មុំនេះនៅតែអាចទទួលទានបានធម្មតា ។

អាថ៌កំបាំងទាំងអស់អាស្រ័យលើរចនាសម្ព័ន្ធជីវសាស្ត្ររបស់ទឹកឃ្មុំ ខណៈទឹកឃ្មុំមានសារធាតុផ្សំចម្បង គឺស្ករ និងមានម៉ូលេគុលទឹកតិចតួចបំផុត ។ ហេតុនេះ ធ្វើឱ្យវាមានបរិមាណសំណើមទាប ។

លើសពីនេះ ទឹកឃ្មុំមានសារធាតុ pH ទាប (pH គឺជាតម្លៃអាស៊ីតមូលដ្ឋាន) ក្នុងបរិមាណចាប់ពី៣,២ ទៅ៤,៥ ដែលវាអាចជួយការពារការធំលូតលាស់របស់បាក់តេរី ឬអតិសុខុមប្រាណបាន ។ កោសិកាអតិសុខុមប្រាណមានដូចជា បាក់តេរីដែលធ្លាក់ចូលទៅក្នុងទឹកឃ្មុំ វានឹងមិនអាចរស់នៅបានយូរទេ ដោយសារតែកំហាប់នៅក្នុងកោសិកាបាក់តេរី មានបរិមាណតិចជាងទឹកឃ្មុំ ។

ដូច្នេះ ទឹកនៅក្នុងកោសិកាបាក់តេរីបានធ្លាយចេញពីកោសិកា ហើយវាធ្វើឱ្យបាក់តេរីងា.ប់ ។ គេសង្កេតឃើញថា សូម្បីតែកោសិកាផ្សិត ក៏មិនអាចធំលូតលាស់បានដែរ ដោយសារតែហេតុផលដូចគ្នានេះ ៕ ប្រភព ៖ Kaset Go

ប្រទេសថៃ ៖ ក្រុមគ្រូពេទ្យនៅប្រទេសថៃបានចេញសេចក្តីថ្លែងការណ៍មួយប្រកាសមិនគាំទ្រលោក Anutin Charnvirakul ធ្វើជារដ្ឋមន្ត្រីក្រសួងសុខាភិបាលបន្តទៀត ។ ក្រុមគ្រូពេទ្យលើកឡើងថា ស្ថិតនៅក្រោមការគ្រប់គ្រងរបស់លោក Anutin ក្នុងរយៈពេល៤ឆ្នាំកន្លងមកនេះ បានធ្វើឱ្យពួកគេយល់ច្បាស់ថា លោក Anutin មិនសាកសម និងមិនអាចដឹកនាំប្រព័ន្ធសុខាភិបាលថៃទេ ។ លើសពីនេះ លោក Anutin បានអនុញ្ញាតឱ្យយកកញ្ឆាមកប្រើប្រាស់ក្នុងផ្នែកពេទ្យថែមទៀត ។

សេចក្តីថ្លែងការណ៍នេះបញ្ជាក់ថា ពួកយើងជាបុគ្គលិកពេទ្យទាំងអស់មិនចង់ធ្វើការនៅក្រោមការគ្រប់គ្រងរបស់រដ្ឋមន្ត្រីក្រសួងសុខាភិបាល លោក Anutin Charnvirakul ទៀតទេ ព្រោះក្នុងរយៈពេល៤ឆ្នាំកន្លងមកបានពិសោធន៍ឱ្យពួកយើងឃើញថា លោក Anutin មិនសាកសម និងមិនយល់ពីប្រព័ន្ធសុខាភិបាលថៃគ្រប់គ្រាន់ទេ រហូតបណ្តាលឱ្យប្រទេសថៃកើតភាពក្តៅក្រហាយ និងធ្វើឱ្យពលរដ្ឋស្លា.ប់ក្នុងអំឡុងពេលការឆ្លងរាតត្បាតនៃជំងឺកូវីដ-១៩ ។

ក្រុមគ្រូពេទ្យលើកឡើងថា ការបែងចែកវ៉ាក់សាំងប្រឆាំងនឹងជំងឺកូវីដ និងវ៉ាក់សាំងមានប្រសិទ្ធភាព គឺប្រទេសថៃមិនមានវ៉ាក់សាំងគ្រប់គ្រាន់សម្រាប់ចាក់ឱ្យពលរដ្ឋទេ ។ លើសពីនេះ លោក Anutin បានអនុញ្ញាតឱ្យយកកញ្ឆាមកប្រើប្រាស់ក្នុងផ្នែកពេទ្យ ហើយមានវិធានការឱ្យគ្រូពេទ្យពន្លឿនការចែកចាយកញ្ឆាឱ្យបានតាមក្រសួងសុខាភិបាលកំណត់ ។ មិនតែប៉ុណ្ណោះ មានការយឺតយ៉ាវក្នុងការផ្តល់ថវិកា ដើម្បីលើកកម្ពស់សុខភាពសម្រាប់សិទ្ធិសុខភាពផ្សេងទៀត ។

សេចក្តីថ្លែងការណ៍របស់ក្រុមគ្រូពេទ្យបញ្ជាក់ថា អ្នកមកទទួលសេវាកម្មជាច្រើននាក់ពីមន្ទីរពេទ្យជួបការលំបាកជាខ្លាំង ដូចជា ពួកគេមិនអាចទទួលបានសេវារំលូតកូនដោយសុវត្ថិភាព ។ ក្រសួងសុខាភិបាលអសមត្ថភាពក្នុងការថែទាំបុគ្គលិកពេទ្យ, គ្រូពេទ្យត្រូវទទួលបន្ទុកការងារច្រើន រហូតធ្វើឱ្យគ្រូពេទ្យមួយចំនួនដាក់ពាក្យលាឈប់ពីការងារ ប៉ុន្តែពួកគេទទួលបានការឆ្លើយតបពីលោក Anutin ថា ៖ «សាកសួរនៅពេលនេះ ធ្វើអ្វីមិនបានទេ គឺមានតែប្រមូលរបស់តែម្យ៉ាងប៉ុណ្ណោះ» ។

សេចក្តីថ្លែងការណ៍បញ្ជាក់ទៀតថា ពួកយើងមិនត្រូវការស្ថិតនៅក្រោមការដឹកនាំរបៀបនេះបន្តទៀតទេ ។ ហេតុនេះ ពួកយើងសូមផ្តាំផ្ញើថា យើងមិនត្រូវការលោក Anutin Charnvirakul ធ្វើជារដ្ឋមន្ត្រីក្រសួងសុខាភិបាលប្រទេសថៃទេ ព្រោះគ្រូពេទ្យមិនអាចអត់ធ្មត់បន្ត ៕ ប្រភព ៖ chiangmai news

ប្រទេសកាណាដា ៖ ភ្លៀងធ្លាក់ខ្លាំងបំផុតក្នុងរយៈពេលជាង៤០ឆ្នាំ បានធ្វើឱ្យផ្លូវ ស្ពាន ព្រមទាំងអគារជាច្រើនកន្លែងរងការខូចខាតនៅរដ្ឋ Nova Scotia ប្រទេសកាណាដា ។ ប៉ូលិសបានប្រើប្រាស់ទូកវែងដើម្បីស្វែងរកពលរដ្ឋបាត់ខ្លួនចំនួន៤នាក់ ក្នុងនោះមានកុមារ២នាក់ផងដែរនៅទីក្រុង Bedford ប៉ុន្តែគេមិនទាន់ទទួលបានដំណឹងអ្វីទេ ។

លោក Tim Houston ប្រមុខរដ្ឋមន្ត្រីប្រចាំរដ្ឋ Nova Scotia លើកឡើងថា ទឹកជំនន់បានធ្វើឱ្យផ្លូវជាច្រើនកន្លែង និងប្រព័ន្ធហេដ្ឋារចនាសម្ព័ន្ធផ្សេងទៀតរងការខូចខាត ។ រដ្ឋបានអំពាវនាវឱ្យពលរដ្ឋទាំងអស់ស្ថិតនៅតែក្នុងលំនៅឋានរបស់ខ្លួន និងហាមប្រើប្រាស់រថយន្តក្នុងអំឡុងពេលនេះ ។ អាជ្ញាធរបញ្ជាក់ថា មានពលរដ្ឋបាត់ខ្លួនចំនួន៤នាក់ ក្នុងនោះមានកុមារ២នាក់, មនុស្សចាស់ម្នាក់ និងយុវវ័យម្នាក់ទៀត ដែលពួកគេមានគ្រោះថ្នាក់ដោយសាររថយន្តលិចក្នុងទឹកជ្រៅ ។

អាជ្ញាធរបានប្រកាសឱ្យពលរដ្ឋប្រុងប្រយ័ត្នចំពោះហេតុការណ៍គ្រោះថ្នាក់នៅទីក្រុង Halifax រដ្ឋ Nova Scotia និងតំបន់៤ផ្សេងទៀតដែលស្ថិតនៅជិតគ្នា ។ កាលពីថ្ងៃទី២១ ខែកក្កដា កន្លងមក មានខ្យល់ព្យុះបោកបក់នៅក្នុងតំបន់ទាំងនេះ ដែលធ្វើឱ្យមានភ្លៀងធ្លាក់ខ្លាំង និងទឹកជំនន់ភ្លាមៗ ។

មុននេះ នាយករដ្ឋមន្ត្រីប្រទេសកាណាដា លោក Justin Trudeau បានលើកឡើងថា លោកមានការបារម្ភពីស្ថានការណ៍ទឹកជំនន់នៅរដ្ឋ Nova Scotia ជាខ្លាំង ។ ចំណែករដ្ឋាភិបាលកណ្តាលបានទំនាក់ទំនងយ៉ាងជិតស្និទ្ធជាមួយអាជ្ញាធរមូលដ្ឋាន ព្រមទាំងបានត្រៀមខ្លួនជាស្រេច ដើម្បីជួយសង្គ្រោះពលរដ្ឋក្នុងអំឡុងពេលពួកគេរងគ្រោះដោយសារទឹកជំនន់ ។ លើសពីនេះ រដ្ឋាភិបាលកណ្តាលនឹងរៀបចំក្រុមការងារចុះពិនិត្យមើលទ្រព្យសម្បត្តិខូចខាតក្រោយពីទឹកជំនន់ស្រកផងដែរ ៕ ប្រភព ៖ TNN World