រដ្ឋធានីវ៉ាស៊ីនតោន៖ ដោយសារតែក្រុងវ៉ាស៊ីនតោន មានការព្រួយបារម្ភ កាន់តែខ្លាំងពីចិន លួចបច្ចេកវិទ្យដ៏ទំនើបរបស់ខ្លួន ទៅអភិវឌ្ឍវិស័យយោធារបស់រដ្ឋាភិបាលក្រុងប៉េកាំង នោះ ទើបសហរដ្ឋអាមេរិក ផ្ដោតកំណត់គោលដៅ លើការនាំចេញរបស់ខ្លួន ទៅកាន់ប្រទេសមហាយក្សអាស៊ីមួយនេះ ប៉ុន្ដែការបង្កើតច្បាប់បែបនេះ នឹងធ្វើឲ្យប៉ះពាល់ដល់ប្រាក់ចំណូលរបស់ក្រុមហ៊ុនជាច្រើនរបស់ប្រទេសមហាអំណាចមួយនេះ។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ នៅថ្ងៃសុក្រ ទី២៨ ខែកក្កដា ថា រដ្ឋមន្រ្ដីក្រសួងពាណិជ្ជកម្មសហរដ្ឋអាមេរិក លោកស្រី ហ្គីណា រេម៉ុនដូ (Gina Raimondo) បានបញ្ជាក់ កាលពីថ្ងៃពុធ ថា រដ្ឋបាលរបស់លោក ចូ បៃដិន (Joe Biden) ប្រធានាធិបតីសហរដ្ឋអាមេរិក កំពុងតែផ្ដោតយ៉ាងខ្លាំង ទៅលើការកំណត់គោលដៅយ៉ាងប្រុងប្រយ័ត្ន ចំពោះការគ្រប់គ្រងការនាំចេញរបស់សហរដ្ឋអាមេរិក ទៅកាន់ប្រទេសចិន។ បទប្បញ្ញត្ដិនេះ នឹងធ្វើឲ្យប៉ះពាល់ដល់ប្រាក់ចំណូលមួយចំនួនរបស់ក្រុមហ៊ុនជាច្រើនរបស់សហរដ្ឋអាមេរិក ។

លោកស្រី រដ្ឋមន្រ្ដីក្រសួងពាណិជ្ជកម្ម បានអះអាង នៅក្នុងវេទិកាមួយ ថា «ការរឹតបន្តឹង មិនគួរធ្វើគ្របដណ្ដប់យ៉ាងទូលំទូលាយខ្លាំងពេកនោះឡើយ ព្រោះវាប្រៀបបីដូចជា អ្នករារាំងដល់ប្រាក់ចំណូលរបស់ក្រុមហ៊ុនជាច្រើនរបស់សហរដ្ឋអាមេរិក អ៊ីចឹងដែរ។ ប្រទេសចិន អាចនឹងទទួលយកផលិតផល មកពីកន្លែងផ្សេងៗ ឬ អាចទទួលយកផលិតផល មកពីប្រទេសផ្សេងៗទៀត តាមតម្រូវការរបស់ពួកគេ។ ច្បាប់នេះ នឹងរាំងខ្ទប់ដល់ប្រាក់ចំណូលមួយចំនួន សម្រាប់ក្រុមហ៊ុនជាច្រើនរបស់សហរដ្ឋអាមេរិក ប៉ុន្តែយើងគិត ថា វាមានតម្លៃខ្លាំងណាស់ សម្រាប់ប្រទេសជាតិ»។

បណ្ដានាយកប្រតិបត្ដិក្រុមហ៊ុនបន្ទះឈីបជាច្រើនរបស់សហរដ្ឋអាមេរិក កាលពីសប្ដាហ៍មុន បានជួបពិភាក្សា ជាមួយនឹងមន្រ្ដីកំពូលៗ នៃរដ្ឋបាលរបស់លោកប្រធានាធិបតី ចូ បៃដិន ដោយរាប់បញ្ចូលទាំងលោកស្រី រេម៉ុនដូ រដ្ឋមន្រ្ដីក្រសួងពាណិជ្ជកម្ម ផងដែរ។ ជំនួបរបស់ពួកគេ បានពិភាក្សាគ្នា ផ្ដោតទៅលើអំពីគោលនយោបាយរបស់សហរដ្ឋអាមេរិក សម្រាប់ប្រទេសចិន ខណៈក្រុមអ្នកបញ្ចុះបញ្ចូល សម្រាប់ក្រុមហ៊ុនផលិតបន្ទះឈីបដ៏មានឥទ្ធិពលបំផុត បានជំរុញឱ្យបញ្ឈប់នូវការរាំងខ្ទប់បន្ថែមទៀត ដោយសារតែច្បាប់នេះកំពុងតែស្ថិតក្នុងការពិចារណានៅឡើយ។

លោកស្រី រដ្ឋមន្រ្ដីក្រសួងពាណិជ្ជកម្មសហរដ្ឋអាមេរិក បានបន្ថែម ថា «រដ្ឋបាលរបស់លោកប្រធានាធិបតី បៃដិន កំពុងតែពិភាក្សាគ្នា ជាមួយនឹងក្រុមហ៊ុនជាច្រើនរបស់សហរដ្ឋអាមេរិក ដើម្បីទទួលយកចំណុចដ៏ត្រឹមត្រូវ។ ដូច្នេះយើងនឹងមិនធ្វើឲ្យខូចខាត ដល់ពាណិជ្ជកម្មរបស់សហរដ្ឋអាមេរិក នោះឡើយ ប៉ុន្តែយើងពិតជាការពារ ដល់សន្តិសុខជាតិរបស់សហរដ្ឋអាមេរិក ដោយស្មោះត្រង់»។

បើតាមសមាគមឧស្សាហកម្មក្រុមហ៊ុនផលិតបន្ទះឈីប បានឲ្យដឹងថា កាលពីឆ្នាំកន្លងទៅ ប្រទេសចិន ត្រៀមទុកលុយ រហូតដល់ ១៨០ពាន់លានដុល្លារ សម្រាប់ទិញ Semiconductor ដែលស្មើនឹងជិត១ភាគ៣ នៃចំនួនសរុប នៅទូទាំងពិភពលោក ដែលមានចំនួន ៥៧៤,១ពាន់លានដុល្លារ និង ជាទីផ្សារដ៏ធំបំផុតតែមួយគត់ នៅលើពិភពលោក។

ជាមួយគ្នានេះ ក្រុមហ៊ុនបច្ចេកវិទ្យាពហុជាតិសាសន៍សហរដ្ឋអាមេរិក Nvidia, ក្រុមហ៊ុនសាជីវកម្មពហុជាតិសាសន៍អាមេរិក Qualcomm និង ក្រុមហ៊ុនសាជីវកម្ម និង បច្ចេកវិទ្យាពហុជាតិសាសន៍អាមេរិក Intel មានការលក់ដ៏សំខាន់ ទៅកាន់ប្រទេសចិន។ ស្របគ្នានេះដែរ ក្រុមហ៊ុន Qualcomm ក៏ក្លាយជាក្រុមហ៊ុនតែមួយគត់ ទទួលបានអាជ្ញាប័ណ្ណ ពីនិយតករអាមេរិក លក់ឈីបទូរស័ព្ទចល័ត ទៅកាន់ក្រុមហ៊ុនបច្ចេកវិទ្យាយក្សរបស់ចិន Huawei ។

រដ្ឋបាលរបស់លោកប្រធានាធិបតី ចូ បៃដិន កំពុងតែពិចារណា អំពីការធ្វើបច្ចុប្បន្នភាពលើច្បាប់ដ៏ធំទូលាយមួយ នឹងត្រូវដាក់ចេញ នៅក្នុងខែតុលា សម្រាប់ការទាក់ទាញឧស្សាហកម្មបន្ទះឈីបរបស់ប្រទេសចិន និង មានបទបញ្ជាប្រតិបត្តិថ្មី ដោយដាក់កម្រិតទៅលើការវិនិយោគនៅក្រៅប្រទេសមួយចំនួនទៀត។

លោកស្រី រេម៉ុនដូ រដ្ឋមន្រ្ដីក្រសួងពាណិជ្ជកម្ម បានបន្ថែម ថា «ការបង្កើតច្បាប់នេះ មិនមែនរារាំងដល់ប្រទេសចិន ឬ បដិសេធបច្ចេកវិទ្យាទំនិញនោះឡើយ។ ប៉ុន្ដែប្រទេសចិន ចង់ប្រើប្រាស់បច្ចេកវិទ្យាដ៏ទំនើបបំផុតរបស់សហរដ្ឋអាមេរិក សម្រាប់ជំរុញវិស័យយោធារបស់ក្រុងប៉េកាំង។ ដោយសារតែបញ្ហានេះ ទើបយើងរារាំងដល់វិស័យយោធារបស់ចិន។

លោកស្រី រដ្ឋមន្រ្ដីក្រសួងពាណិជ្ជកម្មសហរដ្ឋអាមេរិក បានបន្ដ ថា «តារាងពេលវេលា គឺលឿន តាមអ្វីដែលយើងអាចធ្វើទៅបាន ហើយត្រូវតែប្រាកដ ថា វាត្រឹមត្រូវ»។

លោក អេនតូនី ប្ល៊ីនខេន (Antony Blinken) រដ្ឋមន្រ្ដីក្រសួងការបរទេសសហរដ្ឋអាមេរិក, លោកស្រីរដ្ឋមន្រ្ដី រេម៉ុនដូ, លោក ឡាអែល ប្រេណាដ (Lael Brainard) នាយកក្រុមប្រឹក្សាសេដ្ឋកិច្ចជាតិ និង លោក ជេក ស៊ូលលីវ៉ាន់ (Jake Sullivan) នាយកក្រុមប្រឹក្សាសន្តិសុខជាតិ សហរដ្ឋអាមេរិក ក៏បានស្ថិតក្នុងចំណោមមន្ត្រីជានខ្ពស់ នៃរដ្ឋាភិបាលរបស់លោកប្រធានាធិបតី បៃដិន បានជួបពិភាក្សា ជាមួយនឹងប្រធានក្រុមហ៊ុន Intel, Qualcomm និង Nvidia កាលពីសប្តាហ៍មុន៕

ប្រទេសថៃ ៖ កាលពីថ្ងៃទី២៧ ខែកក្កដា កន្លងមក ប៉ូលិសបង្ក្រាបគ្រឿងញៀនប្រចាំខេត្តបុរីរាំ សហការជាមួយកងកម្លាំងយោធាបានចាប់ខ្លួនព្រះសង្ឃ១អង្គឈ្មោះ ណាត់ថាវុធ អាយុ២៦ឆ្នាំ គង់នៅវត្តក្នុងស្រុកឡាំផ្លាយម៉ាស ខេត្តបុរីរាំ និងលោក សមប៊ូន (ហៅឡិក) អាយុ៣៦ឆ្នាំ ព្រមទាំងថ្នាំញៀនចំនួន២.៣៨៩គ្រាប់ ប្រគល់ឱ្យមន្ត្រីស៊ើបអង្កេតនៅស្ថានីយប៉ូលិសស្រុកបុរីរាំ ដើម្បីចាត់ការតាមច្បាប់ ។

ព្រះសង្ឃឈ្មោះ ណាត់ថាវុធ សារភាពថា ខ្លួនទើបបានបួសជាព្រះសង្ឃត្រឹម៣ថ្ងៃប៉ុណ្ណោះ ហើយបានលាក់ថ្នាំញៀនជាង២ពាន់គ្រាប់នៅក្នុងកុដិ ។ ព្រះអង្គបានលក់ និងជក់ថ្នាំញៀនមុនពេលមកបួសជាព្រះសង្ឃទៅទៀត ហើយនៅមុនថ្ងៃហែរនាគ និងមុនពេលប៉ូលិសចាប់ខ្លួន ព្រះអង្គក៏បានជក់ថ្នាំញៀនដែរ ។ ព្រះអង្គតាំងចិត្តថា នឹងជក់វាឱ្យអស់រហូតដល់ថ្ងៃចូលវស្សា ព្រះអង្គនឹងឈប់ជក់ហើយ ។

តាមការត្រួតពិនិត្យក្នុងកុដិ ប៉ូលិសបានប្រទះឃើញឧបករណ៍ប្រើប្រាស់មួយចំនួន និងថ្នាំញៀន១គ្រាប់ដែលព្រះសង្ឃទើបជក់រួច ។ ប៉ូលិសបានដកហូតថ្នាំញៀនដែលលាក់ទុកក្នុងទូរសៀវភៅ បន្ទាប់មក ក៏បាននាំខ្លួនព្រះសង្ឃរូបនេះមកប្រគល់ឱ្យចៅអធិការវត្តធ្វើការផ្សឹក ។ ព្រះសង្ឃទទួលស្គាល់ថា នៅមានថ្នាំញៀនមួយចំនួនទៀតដែលលោក សមប៊ូន ឱ្យព្រះអង្គទៅយកពីទ្រង់មាន់ក្នុងផ្ទះរបស់ខ្លួន ដោយលោក សមប៊ូន ប្រាប់ថា ត្រូវយកថ្នាំញៀនទាំងនេះមកទុកក្នុងវត្ត ព្រោះវត្តមានសុវត្ថិភាពជាងនៅផ្ទះ ។

ព្រះសង្ឃ ណាត់ថាវុធ សារភាពថា ខ្លួនបានជក់ថ្នាំញៀន និងជិតស្និទ្ធជាមួយលោក សមប៊ូន យូរមកហើយ ។ មុនពេលបួសជាព្រះសង្ឃ ខ្លួនជាអ្នកចិញ្ចឹមមាន់ជល់ឱ្យលោក សមប៊ូន ហើយខ្លួនទើបបួសបាន៣ថ្ងៃប៉ុណ្ណោះ ។ ចំណែកថ្នាំញៀនដែលខ្លួនជក់នេះ គឺលោក សមប៊ូន បានយកមកឱ្យសម្រាប់ជាថ្លៃឈ្នួលចិញ្ចឹមមាន់ ។ ព្រះសង្ឃបន្តថា នៅថ្ងៃបួស ឬថ្ងៃហែរនាគ ខ្លួនបានជក់ថ្នាំញៀន ហើយពេលបួសរួច ក៏ខ្លួនជក់ដែរ ។

ព្រះសង្ឃបន្តថា នៅថ្ងៃប៉ូលិសចុះមកចាប់ ខ្លួនបានប្រើប្រាស់ថ្នាំញៀនអស់៤គ្រាប់ គឺប្រើនៅពេលព្រឹក, ពេលរសៀល និងក្បាលព្រលប់ ។ ព្រះសង្ឃចង់ប្រើប្រាស់ថ្នាំញៀនដែលនៅសេសសល់ឱ្យវាឆាប់អស់ ព្រោះបានតាំងចិត្តរួចហើយថា នឹងឈប់ប្រព្រឹត្តទៀតហើយនៅថ្ងៃចូលវស្សា ប៉ុន្តែបែរជាត្រូវប៉ូលិសចាប់ខ្លួនមុន ៕ ប្រភព ៖ Thairath tv

ដើម្បី​ជា​ការ​ស្វាគមន៍ ឬ​គោរព​គ្នា លោក​អ្នក​ភាគ​ច្រើន​តែង​ចាប់​រលាក់​ដៃ​ នៅ​ពេល​ជួប​គ្នា​ម្ដងៗ។ ទោះ​ជា​យ៉ាង​ណា​នេះ ប្រហែល​ជា​មាន​ប្រិយមិត្ត​មិន​តិច​ទេ ដែល​មិន​ដឹង​ពី​ប្រវត្តិ​នៃ​ទំនៀម​មួយ​នេះ។

ការ​ចាប់​រលាក់​ដៃ​គ្នា ត្រូវបានប្រទះឃើញឆ្លាក់នៅលើរូប​ចម្លាក់​មួយ​ដែល​មាន​អាយុ​កាល​តាំងពី​សតវត្ស​ទី ៩ មុន​គ.ស​មក​ម្ល៉េះ។ ក្នុង​រូប​នោះ បាន​បង្ហាញ​ពី រូប​មេ​ដឹកនាំ​នគរ អាស់ សុី រី (Assyria) គឺ​ស្ដេច សាល មែន នេស ហ្សឺ (Shalmaneser) ទី ៣ បាន​ចាប់​ដៃ​មេដឹកនាំ បេប៊ី ឡុន (Babylon) ដើម្បី​បង្ហាញ​ពី​ការ​ចង​សម្ព័ន្ធ​ភាព​គ្នា។ នគរ​ទាំង​ពីរ​ស្ថិត​នៅ​ផ្នែក​មួយ​ក្នុង​តំបន់​មជ្ឈិមបូព៌ា​បច្ចុប្បន្ន។

បន្ថែម​ពី​លើ​នេះ ក្នុង​កំណាព្យ​ក្រិក​ល្បី​ឈ្មោះ អុី ឡេត(Illiad) និង អូ ឌឺ សុី (Odyssey) របស់​អ្នក​និពន្ធ​ ហូម មឺរ(Homer) នៅ​សតវត្ស​ទី ៨​នៃ​គ.ស ក៏​បាន​រៀប​រាប់​ពី​ការ​ចាប់​រលាក់​ដៃ​ផង​ដែរ។ ក្នុង​នោះ ទំនៀម​នេះ​ត្រូវ​បាន​គេ​ចាត់​ទុក​ជា​និមិត្តរូប​នៃ​ការ​សន្យា និង​ការ​ជឿជាក់​លើ​គ្នា​ទៅ​វិញ​ទៅ​មក។ ទោះ​ជា​យ៉ាង​ណា ក្រោយ​មក ក្នុង​ផ្ទាំង​គំនូរ​សិល្បៈ​ជា​ច្រើន​របស់​ក្រិក​នៅ​សតវត្ស​ទី ៤ និង ៥ មុន​គ.ស ការ​ចាប់​រលាក់​ដៃ ត្រូវ​បាន​គេ​ចាត់​ទុក​ជា​ការ​លា​គ្នា​រវាង​អ្នក​រៀប​នឹង​ស្លាប់ និង​សាច់​ញាតិ​របស់​ខ្លួន​ទៅ​វិញ។

ដោយ​ឡែក ក្នុង​សម័យ​អាណាចក្រ​រ៉ូម​បុរាណ​វិញ ការ​ចាប់​រលាក់​ដៃ​ត្រូវ​បាន​ចាត់​ទុក​ជា​និមិត្តរូប​នៃ​មិត្ត​ភាព និង​ភាព​ស្មោះ​ត្រង់។

បើ​ទោះ​ជា​មាន​វត្តមាន​ទាំង​ពី​យូរ​យារ​ក្ដី ការ​ចាប់​រលាក់​ដៃ​ទើប​តែ​ចាប់​ផ្ដើម​មាន​ប្រជាប្រិយ​នៅ​អំឡុង​សតវត្ស​ទី ១៧​ប៉ុណ្ណោះ។ អ្នក​ប្រវត្តិសាស្ត្រ​ជា​ច្រើន​បាន​យល់ឃើញ​ដូច​គ្នា​ថា មូលហេតុ​ដែល​នាំ​មាន​ប្រការ​ដូច្នេះ គឺ​ដោយ​សារ​ទំនៀម​នេះ​បង្ហាញ​ពី​ភាព​ស្មើ​ភាព​គ្នា​រវាង​មនុស្ស​ និង​មនុស្ស ជាង​ទំនៀម​ផ្សេងៗ​ទៀត​ដូច​ជា​ការ​អោន​ក្បាល​គោរព ឬ​ដោះ​មួក​ជា​ដើម។ តាំង​ពី​ពេល​នោះ​មក ការ​ចាប់​រលាក់​ដៃ​គ្នា បាន​សាយ​ភាយ​ឥទ្ធិពល​ខ្លួន រហូត​ស្ទើរ​តែ​ក្លាយ​ជា​ទម្លាប់​ទូទៅ​សម្រាប់​ប្រទេស​ជា​ច្រើន​ក្នុង​ពិភព​លោក​នា​ពេល​បច្ចុប្បន្ន៕

ប្រភព៖ History

បរទេស៖ ក្រុមអ្នកវិទ្យាសាស្ត្រម៉ិកស៊ិក បានរកឃើញសាកសពមនុស្សបុរាណតាំងពីឆ្នាំ ៦០០ – ១៣៥០ ជាមួយនឹងលលាដ៍ក្បាលដ៏ចម្លែកមានរាងស្រដៀងនឹងបេះដូង។

យោងតាមសារព័ត៌មាន Newsweek កាលពីថ្ងៃទី ២៦ ខែកក្កដា បានរាយការណ៍ថា លលាដ៍ក្បាលទាំងនេះគឺជាកម្មសិទ្ធិរបស់សាកសពចំនួន ២ ក្នុងចំណោម ១៦ នាក់ដែលត្រូវបានកប់នៅក្នុងតំបន់បុរាណវិទ្យានៃទីក្រុង La Ferrería រដ្ឋ Durango ភាគពាយព្យប្រទេសម៉ិកស៊ិក។

អ្នកជំនាញបានកត់សម្គាល់ឃើញថា មានលលាដ៍ក្បាលពីរដែលត្រូវបានបង្ខូចទ្រង់ទ្រាយដោយចេតនា ក្លាយជារាងបេះដូង នៅពេលមើលពីមុំជាក់លាក់។ ការខូចទ្រង់ទ្រាយលលាដ៍ក្បាលដោយចេតនានេះ គឺជាការអនុវត្តដែលត្រូវបានចងក្រងជាឯកសារនៅក្នុងវប្បធម៌បុរាណមួយចំនួន រួមទាំងជនជាតិ Mesoamerica ម៉ិកស៊ិក និងអាមេរិកកណ្តាល។ ក្រុមអ្នកវិទ្យាសាស្ត្រដែលមកពីវិទ្យាស្ថានជាតិនរវិទ្យា និងប្រវត្តិសាស្ត្ររបស់ប្រទេសម៉ិកស៊ិក (INAH) បានសន្និដ្ឋានថា លលាដ៍ក្បាលដ៏ចម្លែកមានរាងស្រដៀងនឹងបេះដូងនេះ អាចត្រូវបានមនុស្សសម័យមុនធ្វើទារុណកម្មដោយចងក្បាលមនុស្សពីរនាក់ជាប់គ្នា។ ដូច្នេះគេជឿថាការអនុវត្តបែបនេះនៅតែបន្តក្នុងកន្លែងមួយចំនួនជុំវិញពិភពលោ។

La Ferrería គឺជាតំបន់ស្ថាបត្យកម្មបុរាណដែលមានអាយុកាល ៦០០ – ១៣៥០ អ្នកស្រាវជ្រាវក៏បានរកឃើញផ្នូរ និងសាកសពមនុស្សជាច្រើននៅក្នុងតំបន់នេះផងដែរ ដែលនាំឱ្យអ្នកស្រាវជ្រាវសន្និដ្ឋានថា នេះគឺជាកន្លែងទុកសម្រាប់មនុស្សស្លាប់៕ ប្រភព៖vnexpress

ប្រទេសថៃ ៖ អ្នកនាង Paethongthan Shinawatra បេក្ខជននាយករដ្ឋមន្ត្រីរបស់គណបក្សភឿថៃ បាននិយាយពាក់ព័ន្ធនឹងការត្រៀមធ្វើដំណើរត្រឡប់មកប្រទេសថៃរបស់អតីតនាយករដ្ឋមន្ត្រីថៃ លោក Thaksin Shinawatra ថា គឺជាការសម្រេចចិត្តផ្ទាល់ខ្លួន ហើយវាជារឿងក្នុងគ្រួសារ មិនពាក់ព័ន្ធនឹងនយោបាយទេ ។ អ្នកនាងបន្តថា អស់រយៈពេល១៧ឆ្នាំហើយ ដែលឪពុករបស់នាងបានចាកចេញពីប្រទេសថៃ ។

អ្នកនាង Paethongthan លើកឡើងថា នាងមានអារម្មណ៍រំភើបនៅពេលបានបង្ហោះក្នុងហ្វេសប៊ុក អំពីពេលវេលាកំណត់របស់លោក Thaksin នឹងធ្វើដំណើរត្រឡប់មកប្រទេសថៃ ។ ចំណែកហេតុផលថា ហេតុអ្វីបានជាលោកជ្រើសយកថ្ងៃទី១០ ខែសីហា ឆ្នាំ២០២៣ ការពិត លោកចង់ត្រឡប់មកប្រទេសថៃមុនថ្ងៃនេះ ប៉ុន្តែវាស្របគ្នានឹងថ្ងៃឈប់សម្រាក ទើបលោកត្រូវជ្រើសរើសថ្ងៃធ្វើដំណើរសមស្រប ។

អ្នកនាង Paethongthan បង្ហើបថា ឪពុករបស់នាងជាអ្នកវាយតម្លៃស្ថានការណ៍ផ្សេងៗដោយខ្លួនឯង ជាពិសេស ស្ថានការណ៍នយោបាយស្រុកទេស ហើយហេតុការណ៍ផ្សេងៗមិនទាន់បញ្ចប់ ។ ហេតុនេះ លោក Thaksin ត្រូវរង់ចាំឱ្យស្ថានការណ៍នយោបាយស្ងប់សិន ចំណែកការទៅទទួលលោក Thaksin នោះ អ្នកនាង Paethongthan មិនជ្រាបទេ ដោយសារឪពុកនាង ជាអ្នកចាត់ចែងខ្លួនឯង ហើយនាងមានតួនាទីត្រឹមតែជម្រាបទៅបងប្អូនពលរដ្ឋថៃ និងប្រព័ន្ធផ្សព្វផ្សាយប៉ុណ្ណោះ ។

អ្នកនាង Paethongthan បញ្ជាក់ថា ការសម្រេចចិត្តធ្វើដំណើរត្រឡប់មកប្រទេសថៃរបស់លោក Thaksin នោះ គឺជារឿងក្នុងគ្រួសារ ហើយមិនមែនជារឿងនយោបាយទេ ។ អ្នកនាងថា ៖ «លោកឪពុកធ្លាប់បានបង្ហោះសាររួចហើយតាំងពីឆ្នាំ២០២២ ថា លោកនឹងត្រឡប់មកប្រទេសថៃវិញ ។ ដូច្នេះ វាជារឿងគ្រួសារ ហើយមិនពាក់ព័ន្ធនឹងនយោបាយទេ ព្រោះលោកបានចាកចេញពីប្រទេសថៃ អស់រយៈពេល១៧ឆ្នាំហើយ» ។

ចុងក្រោយ អ្នកនាង Paethongthan ក៏បានថ្លែងអំណរគុណដល់ពលរដ្ឋថៃទាំងអស់ដែលបារម្ភ និងស្វាគមន៍ការធ្វើដំណើរត្រឡប់មកប្រទេសថៃរបស់លោក Thaksin ហើយអ្នកនាងជឿថា បើឪពុករបស់នាងបានជ្រាបថា ពលរដ្ឋថៃទទួលស្វាគមន៍លោកត្រឡប់មកផ្ទះវិញនោះ លោក Thaksin មុខជាសប្បាយចិត្តខ្លាំង ។ អ្នកនាងមានអារម្មណ៍សប្បាយចិត្តជំនួសឪពុកនាង ប៉ុន្តែនាងក៏បារម្ភពីសុវត្ថិភាពដូចគ្នាដែរ ៕ ប្រភព ៖ pheuthai party

ប្រទេសថៃ៖ ថៃគឺជាប្រទេសដែលបានចាប់ផ្តើមដំណើរការព្រះអាទិត្យសិប្បនិម្មិតដំបូងគេបង្អស់របស់សមាគមប្រជាជាតិអាស៊ីអាគ្នេយ៍ (អាស៊ាន)។ ម៉ាស៊ីនរ៉េអាក់ទ័រ Tokamak-1 របស់ប្រទេសថៃ បានចាប់ផ្តើមដំណើរការនៅថ្ងៃទី ២៥ ខែកក្កដា ឆ្នាំ២០២៣។

រ៉េអាក់ទ័រ Tokamak-1 របស់ថៃ ត្រូវបានប្រដូចទៅនឹង “ព្រះអាទិត្យសិប្បនិម្មិត” ដែលមានសមត្ថភាពក្លែងធ្វើការលាយបញ្ចូលគ្នាជាមួយនុយក្លេអ៊ែរ ឬប្រតិកម្មផ្សំឡើងនៅក្នុងព្រះអាទិត្យ។ Tokamak-1 គឺជាកិច្ចខិតខំប្រឹងប្រែងរួមគ្នារវាងវិទ្យាស្ថានបច្ចេកវិទ្យានុយក្លេអ៊ែរថៃ និងវិទ្យាស្ថានរូបវិទ្យាប្លាស្មានៃបណ្ឌិត្យសភាវិទ្យាសាស្ត្រចិន។ ថៃក៏មានគម្រោងរចនា និងសាងសង់ឡដុត tokamak ផ្ទាល់ខ្លួនសម្រាប់ប្រើប្រាស់ក្នុងទសវត្សរ៍ក្រោយផងដែរ ដោយមានគោលដៅចង់ក្លាយជាមជ្ឈមណ្ឌលអភិវឌ្ឍន៍អាស៊ីអាគ្នេយ៍ដំបូងគេសម្រាប់បច្ចេកវិទ្យាទំនើបៗ។

គោលបំណងដ៏ធំនៃការបង្កើតម៉ាស៊ីនរ៉េអាក់ទ័រ Tokamak-1 ដែលដំណើរការដោយព្រះអាទិត្យសិប្បនិម្មិតនេះគឺដើម្បីស្វែងរកមធ្យោបាយប្រកបដោយនិរន្តរភាព និងសន្សំសំចៃ ដើម្បីបំពេញតម្រូវការថាមពលរបស់ពិភពលោក។
Tokamak-1 ត្រូវបានធ្វើឱ្យប្រសើរឡើងពី HT-6M ដែលត្រូវបានបង្កើតឡើងដោយវិទ្យាស្ថានចិននៃរូបវិទ្យាប្លាស្មាក្នុងឆ្នាំ ១៩៨៤ ។ ឧបករណ៍នេះត្រូវបានបញ្ឈប់ជាផ្លូវការនៅឆ្នាំ ២០០២ បន្ទាប់ពីប្រតិបត្តិការរយៈពេល ១៨ ឆ្នាំ។

រ៉េអាក់ទ័រ Tokamak បានឆ្លងកាត់ការសាកល្បងអស់ជាច្រើនឆ្នាំ ហើយត្រូវបានបញ្ជូនទៅវិទ្យាស្ថានបច្ចេកវិទ្យានុយក្លេអ៊ែរថៃក្នុងខែធ្នូ ឆ្នាំ ២០២២។ ម៉ាស៊ីនទាំងមូលមាន ៤៦២ ផ្នែកសំខាន់ៗដែលមានទម្ងន់ជាង ៨៤ តោន។ យោងតាមលោក Nopporn Poolyarat ប្រធានផ្នែក fusion និងប្លាស្មានៃវិទ្យាស្ថានបច្ចេកវិទ្យានុយក្លេអ៊ែរថៃ បាននិយាយថា ការធ្វើតេស្តម៉ាស៊ីននេះដោយជោគជ័យបានធ្វើឡើងនៅថ្ងៃទី ២១ ខែមេសា នឹងចាប់ផ្តើមដំណើរការជាលើកដំបូងនៅថ្ងៃទី២៥ ខែកក្កដា ឆ្នាំ២០២៣៕ ប្រភព៖vnexpress

រាជធានីបាងកក៖ នាយករដ្ឋមន្រ្ដីដ៏មានឥទ្ធិពលបំផុតរបស់ប្រទេសថៃ ត្រូវបានមេដឹកនាំយោធា ធ្វើរដ្ឋប្រហារ បណ្ដាញចេញពីអំណាច កាលពី១៧ឆ្នាំមុន ប៉ុន្ដែឥឡូវមេដឹកនាំយោធាទាំងនោះ បានបង្ហាញសញ្ញាគាំទ្រ ដល់ដំណើរវិលត្រឡប់របស់លោក ថាក់ស៊ីន មកកាន់ប្រទេសកំណើត ហើយពួកគេចង់មើលឃើញ ពីឱកាសផ្សះផ្សាជាតិឡើងវិញផងដែរ។

សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃព្រហស្បតិ៍ ទី២៧ ខែកក្កដា ថា លោកឧត្ដមសេនីយ៍ សុនធី ប៊ូនយ៉ារ៉ាតគ្លីន (Sonthi Boonyaratglin) អតីតអគ្គមេបញ្ជាការកងយោធពលភូមិន្ទថៃ បានដឹកនាំធ្វើរដ្ឋប្រហារយោធា ផ្ដួលរំលំរដ្ឋាភិបាលជាប់ឆ្នោតរបស់លោកនាយករដ្ឋមន្រ្ដី ថាក់ស៊ីន ស៊ីណាវ៉ាត្រា (Thaksin Shinawatra) នៅក្នុងអំឡុងខែកញ្ញា ឆ្នាំ២០០៦។ ប៉ុន្ដែក្រោយពេលលោក ថាក់ស៊ីន រស់នៅនិរទេសខ្លួន អស់រយៈពេល១៧ឆ្នាំកន្លងមក ខណៈប្រទេសថៃ ក៏នៅតែមានជម្លោះនយោបាយបន្ថែមទៀតនោះ ទើបមេដឹកនាំរដ្ឋប្រហារថៃ ងាកមកគាំទ្រ ដល់ដំណើរវិលត្រឡប់របស់លោក ថាក់ស៊ីន មកកាន់ប្រទេសថៃ ហើយចង់ឃើញប្រទេសអាស៊ានមួយនេះ មានឱកាសល្អ សម្រាប់ការផ្សះផ្សាជាតិ។

លោកឧត្ដមសេនីយ៍ អតីតអគ្គមេបញ្ជាការកងយោធពលភូមិន្ទថៃ រូបនេះ កាលពីថ្ងៃព្រហស្បតិ៍ បានបញ្ជាក់ ថា លោក ថាក់ស៊ីន មានសិទ្ធិវិលមកប្រទេសកំណើតរបស់គាត់វិញ ហើយនឹងផ្ដល់ឱកាសដល់គាត់ ចូលទៅក្នុងប្រព័ន្ធយុត្ដិធម៌ និង ដោះស្រាយសំណុំរឿងតាមផ្លូវច្បាប់ ប្រឆាំងនឹងរូបគាត់។

បើតាមលោកឧត្ដមសេនីយ៍ សុនធី បានឲ្យដឹងទៀត ថា លោក ថាក់ស៊ីន បានប្រាប់គាត់ តែប៉ុន្មានថ្ងៃប៉ុណ្ណោះ បន្ទាប់ពីការធ្វើរដ្ឋប្រហារយោធា នាអំឡុងខែកញ្ញា ឆ្នាំ២០០៦ ថា គាត់ជាសុភាពបុរស និង មានអត្តចរិតល្អ ហើយគាត់ក៏កំពុងតែទន្ទឹងរង់ចាំនូវការផ្សះផ្សាជាតិ។

ដោយសារតែគណបក្សភឿថៃ កំពុងតែព្យាយាមដឹកនាំបង្កើតរដ្ឋាភិបាលថ្មីនោះ លោកឧត្ដមសេនីយ៍ សុនធី បានបញ្ជាក់ ថា គណបក្សភឿថៃ ទំនងជានឹងផ្តោត ទៅលើការស្វែងរកដំណោះស្រាយ ជុំវិញបញ្ហាជម្លោះ នៅក្នុងប្រទេស។ កូនស្រីពៅរបស់លោក ថាក់ស៊ីន គឺលោកស្រី ផេថុងថាន ស៊ីណាវ៉ាត្រា (Paetongtarn Shinawatra) ក៏ជាបេក្ខនារីនាយករដ្ឋមន្ត្រីមួយរូបរបស់គណបក្សភឿថៃ ផងដែរ។

លោកឧត្ដមសេនីយ៍ បានសង្កត់ធ្ងន់ ថា «ប្រសិនបើកើតមានជម្លោះ នៅក្នុងប្រទេស វាមានការពិបាកខ្លាំង នៅក្នុងការគ្រប់គ្រងប្រទេសជាតិ។ បញ្ហានេះ ក៏ជាឱកាសដ៏ល្អបំផុត សម្រាប់ប្រទេសជាតិ ត្រូវតែដោះស្រាយបញ្ហាទាំងនេះ»។

លោកឧត្ដមសេនីយ៍ សុនធី បានបន្ដ ថា គាត់ជាសិស្សជំនាន់ទី៦ នៃសាលាត្រៀមរបស់កងយោធពលខេមរភូមិន្ទថៃ ហើយលោក ថាក់ស៊ីន ជាសិស្សប្អូន នៅសាលាដូចគ្នានេះ។ សិស្សទាំងអស់ ត្រូវបានអប់រំឲ្យចេះស្រឡាញ់ជាតិ សាសនា និង ព្រះមហាក្សត្រ។

លោកឧត្ដមសេនីយ៍ សុនធី បានបន្ថែម ថា «យើងដឹង ថា ស្ថាប័នរាជវង្ស បានរួមចំណែកអ្វីខ្លះ សម្រាប់កសាងប្រទេសជាតិ។ ខ្ញុំជឿជាក់ ថា ព្រះអង្គ នៅតែមានភក្តីភាពបែបនេះជានិច្ច»។

លោកស្រី ផេថុងថាន ស៊ីណាវ៉ាត្រា (Paetongtarn Shinawatra) ជាកូនស្រីពៅរបស់លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្រ្ដីថៃ បានប្រកាស នៅលើបណ្ដាញសង្គម Instagram កាលពីថ្ងៃពុធ ថា លោក ថាក់ស៊ីន នឹងមកដល់អាកាសយានដ្ឋាន ដន មឿង (Don Mueang) នាថ្ងៃទី១០ ខែសីហា។

លោកស្រី ផេថុងថាន ជាបេក្ខនារីមួយរូប នៅក្នុងចំណោមបេក្ខជននាយករដ្ឋមន្រ្ដី ទាំង៣រូបរបស់គណបក្សភឿថៃ បានសរសេរ នៅចំថ្ងៃខួបកំណើត គម្រប់៧៤ឆ្នាំរបស់លោក ថាក់ស៊ីន ជាឪពុករបស់លោកស្រី ថា «ខ្ញុំស្ទើរតែមិនគួរឲ្យចង់ជឿ ថា អ្វីៗដែលខ្ញុំកំពុងតែសរសេរ នៅពេលនេះ គឺឪពុករបស់ខ្ញុំ នឹងធ្វើមាតុភូមិនិវត្ដន៍ មកដល់អាកាសយានដ្ឋានដនមឿង នៅថ្ងៃទី១០ ខែសីហា ខាងមុខនេះ»។

លោកស្រី បានសរសេរបន្ដ ថា « ដំណឹងនេះ ធ្វើឲ្យគ្រួសាររបស់យើង មានទាំងសេចក្ដីត្រេកអរផង និង ការព្រួយបារម្ភផង។ ប៉ុន្ដែយើងទាំងអស់គ្នា ត្រូវតែគោរពនូវការសម្រេចចិត្តរបស់ឪពុកយើង»។

ជាមួយគ្នានេះដែរ លោកស្រី ផេថុងថាន បានជូនពរដល់ឪពុករបស់លោកស្រី ជាមួយនឹងក្ដីសង្ឃឹម ថា ឪពុករបស់លោកស្រី នឹងមានសុខភាពល្អ ហើយមានសុវត្ថិភាព។ គាត់អាចបំពេញតាមគោលបំណងរបស់គាត់បាន ដោយនាំចៅៗរបស់គាត់ ទៅសាលារៀន ជាប្រចាំថ្ងៃ។ ឪពុករបស់លោកស្រី ជានាយករដ្ឋមន្ត្រី ហើយត្រូវបានប្រជាជនថៃទូទៅ ទទួលស្គាល់ ថា គាត់បានចូលរួមចំណែក ជួយកសាងដល់ប្រទេសជាតិ ច្រើនជាងគេ។ ប៉ុន្តែគាត់ក៏បានប្រឈមនឹងការលំបាកខ្លាំង និង ការបៀតបៀនជាច្រើនផងដែរ៕