បរទេស៖ ប្រទេសន័រវេសកំពុងសាងសង់របងឡើងវិញនៅតាមបណ្តោយព្រំដែនជាមួយរុស្ស៊ីក្នុងតំបន់អាកទិកដើម្បីការពារសត្វរមាំងពីការវង្វេងចូលទៅក្នុងប្រទេសជិតខាងដែលបណ្តាលឱ្យមានការខាតបង់រូបិយវត្ថុ។

យោងតាមអាជ្ញាធរន័រវេសកាលពីថ្ងៃទី ២៤ ខែសីហាបានប្រកាសថានៅឆ្នាំនេះសត្វរមាំងចំនួន ៤២ ក្បាលបានឆ្លងកាត់ព្រំដែនទៅកាន់ប្រទេសរុស្ស៊ីដើម្បីស្វែងរកវាលស្មៅបៃតងដែលជំរុញឱ្យរដ្ឋាភិបាលន័រវេសផ្តល់សំណងដល់ប្រទេសរុស្ស៊ីសម្រាប់ការខូចខាត។ ដូច្នេះហើយ រុស្ស៊ីបានបញ្ជូនបណ្តឹងចំនួនពីរទាមទារសំណង ដែលការទាមទារមួយគឺមានតម្លៃជិត ៤,៧០០ ដុល្លារសម្រាប់សត្វរមាំងនីមួយៗដែលបានភៀសខ្លួនទៅកាន់ប្រទេសរុស្ស៊ីដើម្បីស៊ីស្មៅនៅតំបន់អភិរក្សធម្មជាតិ Pasvik Zapovednik ក្នុងតំបន់ Murmansk នៃប្រទេសរុស្ស៊ី។ ការទាមទារផ្សេងទៀតមានចំនួនសរុប ៤.៤ លានដុល្លារសម្រាប់ចំនួនថ្ងៃដែលសត្វរមាំងស៊ីស្មៅនៅក្នុងឧទ្យានដែលភាគច្រើនមានទន្លេ បឹង ព្រៃឈើ និងវាលភក់។

របាំងសត្វរមាំងនៅតាមបណ្តោយព្រំដែនរវាងន័រវេស-រុស្ស៊ី លាតសន្ធឹងប្រវែង ៩៣ គីឡូម៉ែត្រ ហើយមានអាយុកាលតាំងពីឆ្នាំ ១៩៥៤ ។ យោងតាមលោក Magnar Evertsen តំណាងនៃសេវាកសិកម្មន័រវេស បានឱ្យដឹងថា គម្រោងសាងសង់របងនេះគឺមានតម្លៃ ៣៤៨,០០០ ដុល្លារអាមេរិក នឹងត្រូវបញ្ចប់នៅថ្ងៃទី ១ ខែតុលា។ ទោះជាយ៉ាងណាក៏ដោយ នេះគឺជាបញ្ហាប្រឈមមួយ ពីព្រោះកម្មករត្រូវការនៅខាងព្រំដែនរុស្ស៊ី អំឡុងពេលសាងសង់ បើកម្មករទៅទឹកដីរុស្ស៊ីដោយគ្មានទិដ្ឋាការ នោះនឹងជាការបំពានខុសច្បាប់។

បច្ចុប្បន្ន សត្វរមាំងចំនួន ៤២ ក្បាលបានត្រឡប់មកប្រទេសន័រវេសដោយសុវត្ថិភាពហើយ។ សត្វរមាំងមានដើមកំណើតនៅអាស៊ីកណ្តាល ហើយតាំងទីលំនៅជាមួយហ្វូងសត្វរមាំងនៅអឺរ៉ុបប្រហែល ៩,០០០ ឆ្នាំមុន។ ជាធម្មតាពួកគេរស់នៅក្នុងទីក្រុង Lapland ដែលជាទឹកដីលាតសន្ធឹងពីភាគខាងជើងប្រទេសន័រវេសឆ្លងកាត់ប្រទេសស៊ុយអែត និងហ្វាំងឡង់ទៅកាន់ប្រទេសរុស្ស៊ី៕
ប្រភព៖vnexpress

រដ្ឋធានីហាណូយ៖ ក្រុមអ្នកពាក់ព័ន្ធ នៅក្នុងវិស័យឧស្សាហកម្ម បានច្រានចោលនូវការព្រួយបារម្ភ ថា វៀតណាម អាចនឹងដើរតាមលំនាំឥណ្ឌា ហាមឃាត់ការនាំចេញអង្ករ ខណៈឥឡូវ ប្រទេសអាស៊ានមួយនេះ កំពុងតែខិតខំប្រឹងប្រែង បង្កើនការដាំដុះស្រូវ។

ប្រទេសវៀតណាម កំពុងតែសម្លឹងមើល អំពីតម្រូវការកើនឡើងខ្ពស់ ហើយតម្លៃអង្កររបស់ខ្លួនក៏ឡើងខ្ពស់ ក្រោយពេលឥណ្ឌា ជាប្រទេសផ្គត់ផ្គង់អង្ករដ៏ធំជាងគេ នៅលើពិភពលោក បានប្រកាសពីការទប់ស្កាត់នូវការនាំចេញអង្ករ កាលពីខែមុន

ក្រុមអ្នកដើរតួនាទីយ៉ាងសំខាន់ នៅក្នុងវិស័យឧស្សាហកម្ម បានអះអាង ថា តម្លៃអង្ករនៅលើពិភពលោក កំពុងតែឡើងថ្លៃ ហើយវាជាឱកាសដ៏ល្អបំផុត សម្រាប់វៀតណាម នៅក្នុងការជំរុញផលិតកម្ម និង ការនាំចេញ។ ប៉ុន្តែការព្រួយបារម្ភក៏បានកើតឡើងផងដែរ ចំពោះបញ្ហាអាកាសធាតុមិនអំណោយផលឲ្យ ដោយសារតែការប្រែប្រួលអាកាសធាតុ នាំឲ្យប៉ះពាល់ដល់ដំណាំ នាពេលអនាគត។

ឥណ្ឌា បានដាក់បម្រាមនូវការនាំចេញអង្ករ កាលពីខែកក្កដា ដើម្បីរក្សាតម្លៃអង្ករសំរូប នៅក្នុងស្រុក ដោយសារអតិផរណា និង ការភ័យខ្លាច អំពីការខ្វះខាតអង្ករ នៅក្នុងប្រទេស។ ការទប់ស្កាត់នូវការនាំចេញអង្ករ បានធ្វើតាមការដាក់កំហិត លើការនាំចេញអង្ករខូច កាលពីខែកញ្ញាឆ្នាំ២០២២។

វិធានការរបស់ឥណ្ឌា បានធ្វើឱ្យតម្លៃអង្ករ នៅលើពិភពលោក កើនឡើងខ្ពស់ ខណៈអ្នកទិញបានងាកទៅរកប្រភពផ្សេងៗទៀត ចំពេលមានការព្រួយបារម្ភ ថា ការផ្គត់ផ្គង់មានកម្រិត នឹងជំរុញឱ្យមានអតិផរណាលើស្បៀងអាហាររបស់ពិភពលោក ហើយបណ្តាលឱ្យមានការទប់ស្កាត់ស្រដៀងគ្នា ពីបណ្ដាប្រទេសជាអ្នកផ្គត់ផ្គង់ផ្សេងៗទៀត។

បុរស វ័យ៣៩ឆ្នាំម្នាក់ បានប្រាប់ដល់សារព័ត៌មាន CNA ខណៈចុះពិនិត្យវាលស្រែរបស់គាត់នៅជាយទីក្រុងកាន់ធើ (Can Tho) ដែលជាទីក្រុងមួយ នៅតាមតំបន់ដីសណ្ដទន្លេមេគង្គ នាភាគខាងត្បូង ប្រទេសវៀតណាម ថា «តម្លៃស្រូវ កាលពីប៉ុន្មានឆ្នាំកន្លងមកនេះ មានតម្លៃប្រហែល ០,២២ដុល្លារ ទៅ ០,២៣ ដុល្លារ នៅក្នុងមួយគីឡូក្រាម។ ដូច្នេះនៅពេលឈ្មួញមក ហើយផ្តល់ជូនដល់ខ្ញុំ ២៨សេន នៅក្នុងមួយគីឡូក្រាម គឺខ្ញុំសប្បាយចិត្តណាស់។ តម្លៃស្រូអាចនឹងកើនដល់០,៣៤ដុល្លារ ក្នុង១គីឡូក្រាម»។

លោក ហ្វាម ហ៊្វុក ហ៊ូ (Pham Phuoc Huu) ប្រធានផ្នែកផលិតកម្ម នៃក្រុមហ៊ុននាំចេញអង្ករ Hoang Minh Nhat Food (ហ៊ួងមីញញ៉ាតហ៊្វូដ) បានបញ្ជាក់ ថា «ចាប់តាំងពីឥណ្ឌា បានហាមឃាត់នូវការនាំចេញអង្ករមក តម្លៃអង្ករ នៅទីនេះបានឡើងខ្ពស់បំផុត។ តម្លៃនឹងកើនឡើង ជារៀងរាល់ពីរបីម៉ោងម្តង មិនមែនត្រឹមតែមួយថ្ងៃនោះឡើយ»។

បណ្ដាក្រុមហ៊ុននាំចេញអង្ករជាច្រើនរបស់វៀតណាម មានការស្ទាក់ស្ទើរ នៅក្នុងការចុះកិច្ចសន្យាថ្មី ជាមួយក្រុមហ៊ុនទិញអន្តរជាតិ ដោយសារតែតម្លៃអង្ករមានការប្រែប្រួលយ៉ាងខ្លាំង។ ដូច្នេះក្រុមហ៊ុនទាំងអស់របស់វៀតណាម ពិបាកនឹងបំពេញកិច្ចសន្យាដែលមានស្រាប់ ជាមួយក្រុមហ៊ុននានា ជាអ្នកទិញ៕

ព្រះច័ន្ទដ៏អស្ចារ្យបំផុតប្រចាំឆ្នាំនឹងបំភ្លឺភពផែនដីជាថ្មីម្តងទៀតនៅថ្ងៃទី ៣០ ខែសីហា ឆ្នាំ២០២៣នេះ ដែលស្ថិតនៅចំណុចជិតបំផុតនៃផ្ទៃផែនដី។
យោងតាមប្រភពព័ត៌មាន Live Science បានឱ្យដឹងថា ព្រះច័ន្ទដ៏ធំបំផុត និងភ្លឺបំផុតត្រូវបានគេដាក់រហស្សនាមថា “ព្រះច័ន្ទពណ៌ខៀវ” ។ ព្រះច័ន្ទពណ៌ខៀវមានពីរប្រភេទដែលវាកើតឡើងក្នុងខែតែមួយ ដូច្នេះព្រះច័ន្ទប្រភេទទីមួយហៅថា Sturgeon ដែលកើតឡើងនៅថ្ងៃទី ១ ខែសីហា និង ព្រះច័ន្ទប្រភេទទីពីរហៅថា Blue moon កើតឡើងនៅចុងខែនេះ នាថ្ងៃទី៣០ ខែសីហា ឆ្នាំ២០២៣។

ព្រះច័ន្ទពណ៌ខៀវជាទូទៅលេចឡើង ២-៣ ឆ្នាំម្តង ដែលវានឹងកើតឡើងបន្តទៀតនៅថ្ងៃទី២៦ ខែសីហា ឆ្នាំ២០២៦។ Blue moon កើតឡើងនៅពេលដែលព្រះច័ន្ទពេញលេញនៅជិតផែនដីបំផុតក្នុងគន្លង។ គន្លងរបស់ព្រះច័ន្ទនៅជុំវិញផែនដីគឺរាងអេលីប ដូច្នេះរៀងរាល់ខែ វាឆ្លងកាត់ចំណុចដែលនៅជិតផែនដីបំផុត និងចំណុចឆ្ងាយបំផុតពីផែនដី នេះបើយោងតាម Fred Espenak ដែលជាតារាវិទូប្រចាំអង្គការណាសា។

ព្រះច័ន្ទពេញវង់ទីពីរនៅក្នុងខែសីហានេះគឺស្ថិតនៅចម្ងាយ ៣៥៧,៣៤៤ គីឡូម៉ែត្រពីផែនដី វាគឺជាព្រះច័ន្ទដ៏ធំបំផុតនិងភ្លឺបំផុតប្រចាំឆ្នាំ ហើយចំពោះព្រះច័ន្ទបន្ទាប់ទៀតហៅថា Super moon ដែលវានឹងរះនៅថ្ងៃទី២៩ ខែកញ្ញា និងជាព្រះច័ន្ទចុងក្រោយនៃឆ្នាំ ២០២៣ ផងដែរ៕ប្រភព៖vnexpress