ប្រទេសថៃ ៖ ពលរដ្ឋរស់នៅខេត្តនគររាជសីម៉ា ប្រទេសថៃ បានសម្លឹងឃើញឱកាសសម្រាប់ដំណាំក្រូចសើច ដែលមានតម្រូវការខ្ពស់នៅលើទីផ្សារទាំងការនាំចេញ និងការកែច្នៃ ។ ហេតុនេះ កសិករក៏បានសម្រេចចិត្តចំណាយដើមទុនដាំដើមក្រូចសើចចំនួន៧ពាន់ដើម និងប្រើប្រាស់ប្រព័ន្ធកសិកម្មឆ្លាតវៃសម្រាប់ថែទាំដំណាំ ។

លោក សុឆាតិ លុងសាំរ៉ូង មានមុខរបរជាអ្នកម៉ៅការសំណង់ ហើយលោកក៏បានសម្រេចចិត្តដាំដើមក្រូចសើចធ្វើជាមុខរបរទី២ បន្ថែមទៀតដើម្បីយកស្លឹកលក់ ដោយការប្រើប្រាស់ប្រព័ន្ធកសិកម្មឆ្លាតវៃជួយថែទាំដំណាំ ។ លោកបានដាំដើមក្រូចសើចចំនួន៧ពាន់ដើមនៅលើផ្ទៃដី០.៣២ហិកតា នៅស្រុកតាខុប ស្រុកប៉ាថុងឆ័យ ខេត្តនគររាជសីម៉ា ហើយលោកប្រាប់ថា លោកបានដំឡើងឧបករណ៍គ្រប់គ្រងការស្រោចទឹកដើមក្រូចសើចដែលទើបដាំថ្មី ហើយការដាំដុះ ត្រូវមានគម្លាតគ្នាពីដើមមួយទៅដើមមួយទៀត ចំនួន៥០សង់ទីម៉ែត្រ ។

លោក សុឆាតិ សង្ឃឹមថា ក្រោយពីបានដាំដុះដំណាំក្រូចសើចរយៈពេល៨ខែ លោកនឹងអាចកាត់ស្លឹករបស់វាលក់បាន ។ លើសពីនេះ អ្នកលក់ពូជដើមក្រូចសើច បានសុំទិញទិន្នផលផលិតទាំងអស់ ហើយលោកជឿថា គ្មានបញ្ហារឿងទីផ្សារទេ ។ លោកថា ៖ «ស្លឹកក្រូចសើចមានតម្លៃថ្លៃគួរសម នៅតាមផ្សារនីមួយៗឃើញថា ស្លឹកក្រូចសើចមានតម្លៃ៥០បាតក្នុង១គីឡូក្រាម ហើយខ្ញុំត្រូវកាត់ស្លឹកនៅជាប់នឹងមែករបស់វាដើម្បីលក់បានថ្លៃ ។ ខ្ញុំបានថែទាំតាំងពីចាប់ផ្តើមដាំ រហូតដល់វាមានអាយុ៨ខែ ទើបកាត់ស្លឹកលក់» ។

លោកបានតាំងចិត្តថា នឹងដាំដើមក្រូចសើចឱ្យបាន១ម៉ឺនដើម ព្រោះលោកសម្លឹងឃើញឱកាសថា ក្រូចសើចអាចនាំចេញ ឬកែច្នៃបាន ហើយបើលោកអាចថែទាំដើមវាបានល្អ គឺលោកអាចកាត់ត្រួយរបស់វាលក់បានមិនក្រោម១០ឆ្នាំទេ ។ ចំណែកការថែទាំដំណាំនេះ លោក សុឆាតិ ប្រាប់ថា តាមធម្មជាតិ ក្រូចសើច ជាដំណាំធុននឹងជំងឺ និងមានសត្វល្អិតយាយីតិចតួច បើធៀបនឹងដំណាំផ្សេងទៀត ។ ទោះយ៉ាងណា ត្រូវប្រយ័ត្នជំងឺផ្សិត និងដង្កូវស៊ីស្លឹក ជាពិសេស ក្នុងអំឡុងពេលដាំដំបូង ដែលដើមរបស់វាមិនទាន់រឹងមាំល្អ គឺត្រូវថែទាំជាពិសេស ៕ ប្រភព ៖ Thai PBS

បរទេស៖ យោងតាមប្រភពព័ត៌មាន Interesting Engineering ដែលបានចុះផ្សាយកាលពីថ្ងៃទី៩ ខែតុលាថា រដ្ឋាភិបាល UAE កំពុងពិចារណាសាងសង់រថភ្លើងល្បឿនលឿន ក្នុងគោលបំណងកាត់បន្ថយពេលវេលា ដោយក្រុមហ៊ុនមានគម្រោងតភ្ជាប់សមុទ្រអារ៉ាប់ជាមួយទីក្រុង Mumbai ប្រទេសឥណ្ឌា។
ដូច្នេះ អ្នកដែលធ្វើដំណើរពី Mumbai ទៅ United Arab Emirates (UAE) នាពេលអនាគតអាចជ្រើសរើសមធ្យោបាយដឹកជញ្ជូនដោយរថភ្លើងឆ្លងកាត់សមុទ្រជំនួសឱ្យការហោះហើរ។ គម្រោងនេះមិនត្រឹមតែបម្រើអ្នកដំណើរដែលចង់ផ្លាស់ប្តូរផ្លូវធ្វើដំណើរប៉ុណ្ណោះទេ ប៉ុន្តែថែមទាំងជួយពង្រីកពាណិជ្ជកម្មជាមួយប្រទេសឥណ្ឌាផងដែរ។ 

សហព័ន្ធអារ៉ាប់រួមរំពឹងថា រថភ្លើងឆ្លងកាត់សមុទ្ររបស់ខ្លួនអាចរត់ក្នុងល្បឿនរហូតដល់ ១,០០០ គីឡូម៉ែត្រក្នុងមួយម៉ោង ខណៈដែលចម្ងាយរវាងទីតាំងទាំងពីរគឺតិចជាង ២,០០០ គីឡូម៉ែត្រ។ ប៉ុន្តែការសាងសង់នៅក្នុងទឹកជ្រៅគឺជាបញ្ហាប្រឈមដ៏សំខាន់មួយ ក្នុងការត្រួសត្រាយផ្លូវរូងក្រោមដីដោយឥដ្ឋស្រអាប់ ហើយគម្រោងនេះក៏ទាមទារទុនវិនិយោគច្រើនផងដែរ យ៉ាងហោចណាស់ក៏រាប់ពាន់លានដុល្លារអាមេរិក។ ទោះជាយ៉ាណាក៏ដោយ បច្ចុប្បន្នក្រុមហ៊ុន National Advisor Bureau Limited នៅក្នុង UAE ក៏កំពុងពិចារណាលើគម្រោងបែបនេះ និងធ្វើរបាយការណ៍លទ្ធភាពច្បាស់លាស់មួយ។

គួរបញ្ជាក់ដែរថា សហព័ន្ធអារ៉ាប់រួមមានភាពល្បីល្បាញសម្រាប់គម្រោងខ្នាតធំដូចជាអគារខ្ពស់កប់ពពករបស់ពិភពលោក និងកោះ Palm Islands ដែលសាងសង់នៅឆ្នេរសមុទ្រឌូបៃ។ ហេតុនេះហើយ នៅក្នុងគម្រោងធំបន្ទាប់ UAE នឹងស្វែងរកការឆ្លងកាត់សមុទ្រអារ៉ាប់ ដោយភ្ជាប់រដ្ឋធានីហិរញ្ញវត្ថុរបស់ឥណ្ឌា Mumbai ជាមួយទីក្រុងកំពង់ផែ Fujairah របស់ខ្លួន។ ផែនការនេះត្រូវបានណែនាំជាលើកដំបូងនៅក្នុងឆ្នាំ ២០១៨ ប៉ុន្តែវាមិនទាន់ដល់ពេលនោះទេ ដោយថ្មីៗនេះ UAE ទើបតែបានស្វែងរកការលើកកម្ពស់ការសាងសង់បន្ថែម៕

ប្រទេសអ៊ីស្រាអែល ៖ ប្រទេសជាច្រើនចាប់ផ្តើមបញ្ជូនយន្តហោះមនុស្សធម៌ទៅកាន់ប្រទេសអ៊ីស្រាអែល ដើម្បីជម្លៀសពលរដ្ឋរបស់ខ្លួនចេញពីតំបន់មានជម្លោះរវាងអ៊ីស្រាអែល និងក្រុមហាម៉ាស់ ក្រោយពីក្រុមហាម៉ាស់បើកប្រតិបត្តិការកងទ័ពវា.យលុ.កមកលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ។ ការវា.យលុ.កនេះបានបណ្តាលឱ្យពលរដ្ឋអ៊ីស្រាអែលស្លា.ប់ជាង៩០០នាក់ ខណៈពលរដ្ឋប៉ាឡេស្ទីនស្លា.ប់៦២៦នាក់ និងរ.ងរបួ.សសរុបជិត៥.០០០នាក់ ។

រដ្ឋមន្ត្រីក្រសួងការបរទេសប្រទេសម៉ិកស៊ិក ឈ្មោះ អាលិសៀ បាសេណា បានថ្លែងកាលពីថ្ងៃទី៨ ខែតុលា កន្លងមកថា មានជនជាតិម៉ិកស៊ិកចំនួន២នាក់ស្ថិតក្នុងក្រុមចំណាប់ខ្មាំង ដែលក្រុមហាម៉ាស់ចាប់ធ្វើជាចំណាប់ខ្មាំងមួយចំនួន ។ លោក អាន់ដ្រែស ម៉ានូអែល ឡូប៉ែស អូប្រាឌ័រ ប្រធានាធិបតីម៉ិកស៊ិកបញ្ជាក់ថា នឹងមានយន្តហោះមនុស្សធម៌ចំនួន២ជើងទៅកាន់ប្រទេសអ៊ីស្រាអែល ដើម្បីទទួលយកពលរដ្ឋឱ្យត្រឡប់មកប្រទេសវិញ ។ លោកបន្តថា មានពលរដ្ឋម៉ិកស៊ិករស់នៅអ៊ីស្រាអែលប្រមាណ៥.០០០នាក់ ក្នុងនោះពលរដ្ឋចំនួន៣.០០០នាក់ចង់ធ្វើដំណើរមកប្រទេសខ្លួនវិញ ។

ចំណែកប្រទេសឈីលីបានបញ្ជូនយន្តហោះមនុស្សធម៌ទៅកាន់អ៊ីស្រាអែល កាលពីថ្ងៃទី៩ ខែតុលា កន្លងមក ។ ក្រសួងការបរទេសឈីលីបញ្ជាក់ថា មានពលរដ្ឋឈីលី យ៉ាងហោចណាស់ម្នាក់បានបាត់ខ្លួន ក្រោយពីក្រុមហាម៉ាស់វា.យលុ.កអ៊ីស្រាអែល ។ លើសពីនេះ មានភ្ញៀវទេសចរឈីលីនៅអ៊ីស្រាអែលចំនួន១១៣នាក់ និង២៧នាក់ទៀតស្ថិតនៅទឹកដីប៉ាឡេស្ទីន ។

រីឯប្រទេសហុងក្រី និងអាល់បានី ក៏បានជម្លៀសពលរដ្ឋរបស់ពួកគេចេញពីអ៊ីស្រាអែលជាបន្តបន្ទាប់ផងដែរ ហើយគេសង្ឃឹមថា នឹងមានការបញ្ជូនយន្តហោះពិសេសបន្ថែមទៀតទៅកាន់ទីក្រុង Tel Aviv ដើម្បីជួយសង្គ្រោះពលរដ្ឋឱ្យធ្វើដំណើរត្រឡប់មកប្រទេសវិញប្រកបដោយសុវត្ថិភាព ។

ដូចគ្នានេះ ក្រសួងការបរទេសថៃ ក៏បានត្រៀមខ្លួនបញ្ជូនពលរដ្ឋថៃនៅអ៊ីស្រាអែលឱ្យត្រឡប់មកប្រទេសថៃវិញ ប្រសិនបើស្ថានការណ៍ជម្លោះនេះកាន់តែរាលដាលខ្លាំង រហូតធ្វើឱ្យប៉ះពាល់ដល់សុវត្ថិភាពពលរដ្ឋថៃនៅអ៊ីស្រាអែល ។ ពលរដ្ឋថៃដែលស្នាក់នៅប្រទេសអ៊ីស្រាអែល គឺស្មើប្រមាណ៣ម៉ឺននាក់ ក្នុងនោះភាគច្រើនជាពលករធ្វើការផ្នែកកសិកម្ម ។

ក្រសួងការបរទេសថៃបញ្ជាក់ថា មានពលរដ្ឋថៃស្លា.ប់ក្នុងហេតុការណ៍នេះចំនួន១៨នាក់, រ.ងរបួ.ស៩នាក់ និងមានពលរដ្ឋថៃត្រូវឃុំខ្លួនដោយកងកម្លាំងទាហានប៉ាឡេស្ទីន ចំនួន១១នាក់ ។ ក្រៅពីពលរដ្ឋថៃហើយ ក៏មានពលរដ្ឋអ៊ីស្រាអែល, ហ្វីលីពីន, នេប៉ាល់ និងហ្សកហ្ស៊ីផងដែរ ត្រូវបានគេចាប់ឃុំខ្លួន ។

លោកស្រី កាន់ចាណា ផាន់ឆូក អ្នកនាំពាក្យក្រសួងការបរទេសថៃថ្លែងថា ៖ «កងទ័ពអ៊ីស្រាអែលបានសហការជាមួយភ្នាក់ងារពាក់ព័ន្ធក្នុងតំបន់ដើម្បីជម្លៀសពលរដ្ឋប្រទេសផ្សេងៗ រួមទាំងពលករថៃផងដែរចេញពីតំបន់មានគ្រោះថ្នាក់បំផុត ។ យើងបានទទួលការរាយការណ៍ថា មានពលរដ្ឋថៃរាប់រយនាក់បានភៀសខ្លួនទៅកាន់តំបន់មានសុវត្ថិភាពហើយ» ៕ ប្រភព ៖ TNN World

បរទេស៖ យោងតាមប្រភពព័ត៌មាន IFL Science ដែលបានរាយការណ៍កាលពីថ្ងៃទី ១០ ខែតុលាថា ក្រុមអ្នកស្រាវជ្រាវជនជាតិចិនបានរកឃើញអាងស្តុកទឹកដ៏ធំសម្បើមមួយ ដែលលាក់ខ្លួននៅក្រោមមហាសមុទ្រប៉ាស៊ីហ្វិក ដោយបង្ហាញតាមរយៈរូបភាពរញ្ជួយដី 3D។ អាងស្តុកទឹកបុរាណនេះស្ថិតនៅចម្ងាយ ៣.២ គីឡូម៉ែត្រពីបាតសមុទ្រនៃប្រទេសនូវែលសេឡង់ ដែលជាកន្លែងអាចបង្អាក់កំហុសរញ្ជួយដីដ៏ធំមួយទល់មុខកោះខាងជើង។

លោក Andrew Gase អ្នកដឹកនាំការសិក្សានៅឯសាកលវិទ្យាល័យ Texas (UTIG) បាននិយាយថា ទីតាំងដែលអ្នកស្រាវជ្រាវបានរកឃើញនេះ គឺជាផ្នែកមួយនៃតំបន់ភ្នំភ្លើងដ៏ធំដែលបង្កើតឡើងនៅពេលដែលដុំកំអែភ្នំភ្លើងទំហំប៉ុនសហរដ្ឋអាមេរិកបានឡើងមកលើផ្ទៃផែនដីក្នុងមហាសមុទ្រប៉ាស៊ីហ្វិកកាលពី ១២៥ លានឆ្នាំមុន។ ព្រឹត្តិការណ៍នេះគឺជាការផ្ទុះភ្នំភ្លើងដ៏ធំបំផុតមួយនៅលើផែនដី និងបណ្តាលឱ្យមានការរញ្ជួយជាច្រើនលានឆ្នាំមកហើយ។ ដូច្នេះ ដោយសារអាងស្តុកទឹកបុរាណដ៏ធំនៅក្រោមមហាសមុទ្រប៉ាស៊ីហ្វិកនេះហើយ ទើបធ្វើឱ្យផែនដីរបស់យើងជួបប្រទះបញ្ហារញ្ជួយដីឥតឈប់ឈរ។

លោក Gase បានបន្តទៀតថា អ្នកស្រាវជ្រាវបានប្រើការស្កែនរញ្ជួយដីដើម្បីបង្កើតរូបភាព 3D នៃខ្ពង់រាបភ្នំភ្លើងបុរាណមួយ ហើយគាត់បានឃើញដីល្បាប់ដ៏ក្រាស់នៅជុំវិញភ្នំភ្លើងដែលកប់ ដោយអ្នកស្រាវជ្រាវក៏បានធ្វើការពិសោធន៍ជាមួយនឹងគំរូស្នូលខួងភ្នំភ្លើង ហើយបានរកឃើញថាទឹកមានជិតពាក់កណ្តាលនៃបរិមាណរបស់វា។ ការរកឃើញអាងស្តុកទឹកបុរាណដ៏ធំនៅក្រោមមហាសមុទ្រប៉ាស៊ីហ្វិកនេះ គឺជាព័ត៌មានសំខាន់មួយ ដែលអាចជួយយើងឱ្យយល់ច្បាស់ពីការរញ្ជួយដីធំៗ។ ការរញ្ជួយដីជារឿយៗកើតឡើងដោយសារកម្លាំងធ្វើឱ្យផ្លាកតិចតូនិចមានចលនាដូចជា រុញ ទាញ និងកកិតគ្នា ដែលបណ្តាលឱ្យផ្លាកខូចទ្រង់ទ្រាយក្នុងការទប់ទល់និងកម្លាំង។ ទោះជាយ៉ាងណាក៏ដោយ ក្រុមការងារមានបំណងចង់ខួងយកគំរូបន្ថែមទៀតសម្រាប់ការសិក្សា ដើម្បីកាត់បន្ថយការរញ្ជួយដី៕

ប្រទេសវៀតណាម ៖ យោងតាមទិន្នន័យរបស់ក្រសួងការងារ ជនពិការ និងសុខុមាលភាពសង្គមវៀតណាមបង្ហាញថា ប្រទេសវៀតណាមមានចំនួនពលរដ្ឋទៅធ្វើការនៅក្រៅប្រទេស រហូតដល់១១១.៥០៧នាក់ គិតចាប់ពីខែមករា រហូតដល់ខែកញ្ញា ឆ្នាំ២០២៣ ។ ចំនួននេះ គឺកើនលើសគោលដៅដែលស្មើចំនួន១១ម៉ឺននាក់នៅឆ្នាំ២០២៣ និងកើនឡើង៨% បើធៀបនឹងរយៈពេលដូចគ្នាកាលពីឆ្នាំ២០២២ ។

ប្រទេសជប៉ុន និងតៃវ៉ាន់បានក្លាយជាទីផ្សារធំបំផុតសម្រាប់ពលករវៀតណាម ដោយជប៉ុនបានទទួលពលករវៀតណាមចំនួន៥៥.៦៩០នាក់ បន្ទាប់មក តៃវ៉ាន់ទទួលពលករវៀតណាមចំនួន៤៦.១៦៦នាក់ ។ ចំណែកប្រទេសកូរ៉េខាងត្បូងបានទទួលពលករវៀតណាមចំនួន២.៤៤៩នាក់, ចិន ១.៣៦១នាក់, ហុងគ្រី ១.១៤៨នាក់ និងសិង្ហបុរី ១.០១៥នាក់ ។

បច្ចុប្បន្ន វៀតណាមបានជាប់លំដាប់លេខ១ ក្នុងចំណោម១៥ប្រទេស ដែលបានបញ្ជូនពលករទៅធ្វើការនៅតំបន់អាស៊ីខាងកើតច្រើនបំផុត ។ កាលពីខែកុម្ភៈ ឆ្នាំ២០២២ មានពលករវៀតណាមរហូតដល់៣៤ម៉ឺន៥ពាន់នាក់បានទៅធ្វើការនៅជប៉ុន ។

ក្រសួងការងារវៀតណាមឱ្យដឹងថា នេះមកពីគម្រោងសហការរវាងប្រទេសវៀតណាម និងជប៉ុនជាច្រើនគម្រោង ។ ប្រទេសទាំងពីរបានធ្វើការរួមគ្នាដើម្បីជំរុញគម្រោងជួយពលករវៀតណាមឱ្យមានការងារសមរម្យនៅប្រទេសជប៉ុន ។ លើសពីនេះ ការទទួលបានព័ត៌មានការងារក្រោយពីពួកគេត្រឡប់មកផ្ទះវិញ ក៏ជួយឱ្យក្រុមហ៊ុនអាជីវកម្មអាចស្វែងរកពលករដើម្បីបំពេញមុខតំណែងទំនេរផងដែរ ។

ទោះយ៉ាងណា ដើម្បីការពារផលប្រយោជន៍របស់ពលករវៀតណាមនៅប្រទេសជប៉ុន ក្រសួងការងារវៀតណាមបានចុះហត្ថលេខាលើកិច្ចព្រមព្រៀងសហការជាមួយខេត្តផ្សេងៗ ដូចជា Chiba, Saitama, Gunma, Kanagawa និង Nagano ។

ក្រៅពីនេះ វៀតណាមបានស្វែងរកទីផ្សារការងារថ្មីៗសម្រាប់ពលករវៀតណាមផងដែរ ជាពិសេស ប្រទេសនៅតំបន់អឺរ៉ុប ដូចជា ហុងគ្រី, ប៉ូឡូញ, ស្លូវ៉ាគី និងក្រូអាស៊ី ។ កាលពីខែសីហា ឆ្នាំ២០២៣ ក្រសួងការងារវៀតណាម និង Greek Union of Agricultural Cooperatives បានពិភាក្សាគ្នា ដើម្បីសហការបញ្ជូនពលករវៀតណាមទៅធ្វើការផ្នែកកសិកម្មនៅក្រៅប្រទេស ។ បច្ចុប្បន្ន មានក្រុមហ៊ុនចំនួន៦ បានអនុញ្ញាតឱ្យបញ្ជូនពលករវៀតណាមទៅប្រទេសក្រិករួចហើយ ៕ ប្រភព ៖ AEC connect