ប្រទេសជប៉ុន ៖ ប្រទេសជប៉ុននឹងអនុញ្ញាតឱ្យកូនសិស្សប្រើប្រាស់មនុស្សយន្តចូលសាលារៀនជំនួស ហើយពួកគេអាចបញ្ជាវាពីផ្ទះបានដើម្បីកាត់បន្ថយភាពតានតឹង និងត្រូវគេធ្វើបាប ក្រោយពីអត្រាកូនសិស្សមិនចូលសាលានៅប្រទេសជប៉ុនកើនឡើងខ្ពស់ ។

សារព័ត៌មានក្រៅប្រទេសចុះផ្សាយថា គណៈកម្មការអប់រំនៃទីក្រុង Kumamoto ប្រទេសជប៉ុនបារម្ភថា កូនសិស្សកម្រិតបឋមសិក្សា និងមធ្យមសិក្សា ចាប់ផ្តើមចូលសាលារៀនតិចជាងមុន ។ គេបានយកទិន្នន័យរបស់កុមារក្នុងក្រុមអាយុនេះ មកប្រៀបធៀបគ្នារវាងឆ្នាំ២០១៨ និងឆ្នាំ២០២២ បង្ហាញថា មានកូនសិស្សមិនចូលសាលានៅឆ្នាំ២០២២ ចំនួន២.៧៦០នាក់ ។ ដូច្នេះ ចំនួននេះបានកើនឡើងទ្វេដង បើធៀបនឹងឆ្នាំ២០១៨ ។

គណៈកម្មការអប់រំនៃទីក្រុង Kumamoto គិតថា នឹងយកមនុស្សយន្តមកដោះស្រាយបញ្ហាកូនសិស្សចូលរៀនតិចជាងមុន ព្រោះមនុស្សយន្តនឹងអាចដោះស្រាយបញ្ហានេះបាន ។ មនុស្សយន្តទាំងនេះមិនមែនមានតួនាទីត្រួតពិនិត្យកូនសិស្សទេ ប៉ុន្តែមនុស្សយន្តនឹងចូលរៀនជំនួសកូនសិស្ស ហើយឱ្យកូនសិស្សដែលមិនបានចូលសាលាអាចគ្រប់គ្រងមនុស្សយន្តពីចម្ងាយបាន ។

មនុស្សយន្តនេះមានកម្ពស់១ម៉ែត្រ ដែលបំពាក់ដោយមីក្រូហ្វូន និងកាមេរ៉ា ហើយវាអាចចូលរៀនក្នុងថ្នាក់ជាមួយមិត្តភក្តិផ្សេងទៀតបាន ដោយកូនសិស្សអាចតភ្ជាប់មនុស្សយន្តតាមរយៈកុំព្យូទ័រយួរដៃនៅផ្ទះ ។ ម្យ៉ាងទៀត មនុស្សយន្តមិនចាំបាច់នៅតែក្នុងថ្នាក់រៀនទេ គឺវាអាចដើរទៅមកពេញសាលាបាន ហើយវាអាចចូលរួមក្នុងកម្មវិធីផ្សេងៗ និងអាចទំនាក់ទំនងជាមួយអ្នកដទៃបានតាមតម្រូវការរបស់កូនសិស្សរៀនពីចម្ងាយ ។ គេរំពឹងថា ការបង្កើនចំនួនមនុស្សយន្តនឹងជួយឱ្យកូនសិស្សដែលអវត្តមានញឹកញាប់អាចយកឈ្នះភាពតានតឹង និងមានទំនុកចិត្តលើខ្លួនឯង រហូតពួកគេអាចត្រឡប់មកចូលរៀននៅសាលាតាមធម្មតាវិញ ។

គណៈកម្មការអប់រំនឹងមិនបង្ខំឱ្យកូនសិស្សប្រើប្រាស់មនុស្សយន្តទេ បើពួកគេមិនត្រូវការ ។ វាគ្រាន់តែជាគម្រោងតូចដែលទើបចាប់ផ្តើមនៅទីក្រុងតូចៗ ដូចជា ទីក្រុង Kumamoto ដែលមានពលរដ្ឋរស់នៅត្រឹមតែ៧៣ម៉ឺននាក់ប៉ុណ្ណោះ ។ គម្រោងនេះនឹងប្រើប្រាស់មនុស្សយន្តចំនួន២ និងបញ្ជូនទៅកាន់សាលារៀនណាដែលស្នើសុំ ហើយនឹងចាប់ផ្តើមអនុវត្តនៅខែវិច្ឆិកា ឆ្នាំ២០២៣ ។ គេនឹងវាយតម្លៃក្រោយបញ្ចប់ឆ្នាំសិក្សានៅខែមីនា ឆ្នាំ២០២៤ ថា តើគួរពង្រីកគម្រោងនេះដែរឬទេ ៕ ប្រភព ៖ khaosod

ថ្លើមគឺជាសរីរាង្គផ្នែកខាងក្នុងមួយប្រភេទ ដែលមានតួនាទីសំខាន់ណាស់ នៅក្នុងរាងកាយរបស់យើង។ ប៉ុន្តែមនុស្សភាគច្រើនមិនបានយកចិត្តទុកដាក់ ថែរក្សាថ្លើមរបស់ខ្លួនឱ្យមានសុខភាពល្អនោះទេ គឺមានតែបំផ្លាញវាថែមទៀត។ តើអ្នកដឹងទេថាសកម្មភាពមួយចំនួនដែលអ្នកកំពុងធ្វើជាប្រចាំថ្ងៃនេះ ៦0% គឺបានបំផ្លាញថ្លើមដោយមិនដឹងខ្លួន ហើយឥរិយាបថទាំង ៤ នោះមានដូចខាងក្រោម៖

១.ចូលគេងយប់ជ្រៅ៖ ក្នុងអំឡុងពេលដែលយើងគេង រាងកាយនឹងកំចាត់កាកសំណល់ចេញពីសរីរាង្គផ្សេងៗ ហើយដំណើរការនឹងចាប់ផ្តើមពីម៉ោង ៩:០០ យប់ ដល់ម៉ោង ៧:០០ ព្រឹក ប្រសិនបើយើងចូលគេងយូរពេក ប្រព័ន្ធនេះនឹងមិនដំណើរការពេញលេញទេ រហូតទាល់តែជាតិពុលច្រើនកកកុញក្នុងខ្លួន ដែលបណ្តាលឱ្យមានផលប៉ះពាល់ទៅលើថ្លើមយ៉ាងធ្ងន់ធ្ងរ។

២.ញ៉ាំអាហារដែលមានជាតិខ្លាញ់ច្រើន៖ ម្ហូបអាហារទាំងនេះគឺវាមានគ្រោះថ្នាក់ខ្លាំងណាស់ចំពោះថ្លើម ព្រោះវាធ្វើឱ្យថ្លើមពិបាកធ្វើការ ឬធ្វើការធ្ងន់ខ្លាំងជាងធម្មតា។ លើសពីនេះទៀតជាតិខ្លាញ់ទាំងនេះ នឹងផ្ទុកនៅក្នុងថ្លើម ហើយត្រូវបានបម្លែងទៅជាទ្រីគ្លីសេរីដ និងបង្កឱ្យមានខ្លាញ់កកនៅក្នុងថ្លើម ដែលជាមូលហេតុនៃជំងឺក្រិនថ្លើម និងមហារីកថ្លើមផងដែរ។

៣.ផឹកស្រា៖ ពិតណាស់ ការទទួលទានជាតិស្រវឹងច្រើនពេកវានឹងបំផ្លាញសុខភាពថ្លើមរបស់អ្នកយ៉ាងច្បាស់ ព្រោះជាតិពុលកកកុញនៅក្នុងថ្លើម បូករួមជាមួយនឹងការចូលគេងយប់ជ្រៅផងនោះ វាបានក្លាយជាមូលហេតុដែលធ្វើឱ្យថ្លើមរបស់យើងកាន់តែត្រូវបានបំផ្លាញបន្តិចម្តងៗ រហូតដល់មានជំងឺខូចខាតជាខ្លាំង។ 

៤.ភាពតានតឹង៖ កុំគិតថាភាពតានតឹងប៉ះពាល់តែទៅលើខួរក្បាល និងក្រពះប៉ុណ្ណោះ ប៉ុន្តែថ្លើមរបស់អ្នកក៏ត្រូវបានវាយប្រហារយ៉ាងខ្លាំងផងដែរ ដោយសារតែភាពតានតឹង។ វាអាចធ្វើឱ្យអ្នកមិនបានដេកពួន ឬទទួលទានអាហារមិនបានច្រើនដូចពេលធម្មតា។ លើសពីនេះ ថ្លើមផលិតជាតិស្ករច្រើន ពេលដែលយើងមានភាពតានតឹងម្តងៗ ហើយជាលទ្ធផល ហានិភ័យនៃការកើតជំងឺទឹកនោមផ្អែម និងការលើសជាតិស្ករនៅក្នុងឈាមគឺមានកម្រិតខ្ពស់ជាងមនុស្សធម្មតាទៅទៀត៕

ប្រភព៖sanook

វណ្ណដា ជាមួយតារារ៉េប suboi នៅលើឆាកវៀតណាមរញ្ជួយពេញបណ្តាញសង្គម

ទីបំផុតការបង្ហាញវត្តមានរបស់ វណ្ណដា ដែលត្រូវបានខាងកម្មវិធី Rap Viet  អញ្ជើញជាតារាកិត្តិយសសម្តែងនៅថ្ងៃផ្តាច់ព្រ័ត្រមហាជនអ្នកគាំទ្របានឃើញហើយដោយតារាចម្រៀង វណ្ណដា ក៏បានចាប់ដៃគូច្រៀងជាមួយតារាចម្រៀងរ៉េប suboi ផងដែរ។ ការបង្ហាញShow រួមគ្នារបស់អ្នកទាំងពីរផ្ទុះការចាប់អារម្មណ៍យ៉ាងខ្លាំងពេញបណ្តាញសង្គមទាំងនៅក្នុងនិងក្រៅប្រទេស។

នៅថ្ងៃទី៩ ខែកញ្ញា វគ្គផ្តាច់ព្រ័ត្រកម្មវិធី Rap Viet  រដូវកាលទី៣បានចាក់ផ្សាយរួចហើយដោយក្នុងវគ្គពិសេសនេះ វណ្ណដា ក៏បានបង្ហាញវត្តមាននៅក្នុងកម្មវិធីដូចគ្នា។ វណ្ណដា បានលើកយកបទ Solo និងបទ អីតែមិនអី ដោយកែសម្រួលច្រៀងMixភាសារួមគ្នាជាមួយតារារ៉េបវៀតណាមដ៏ល្បី suboi ចេញជាចម្រៀងមួយបទមានចំណងជើងថា «Not ok but sickerrr» ។ ការបង្ហាញវត្តមានរបស់តារារ៉េបទាំងពីរធ្វើឱ្យមហាជនអ្នកប្រើបណ្តាញសង្គមចាប់អារម្មណ៍យ៉ាងខ្លាំងសូម្បីតែឯកឧត្តមខៀវ កាញារីទ្ធ ក៏បានស៊ែរពី Show របស់អ្នកទាំងពីរផងដែរ។

ដ្បិតតែតារាចម្រៀងទាំងពីររូបច្រៀងពីរភាសាផ្សេងគ្នាក្នុងបទតែមួយក្តីប៉ុន្តែត្រូវបានមហាជនសម្លឹងឃើញថាពិតជាច្រៀងចូលគ្នាបានល្អខណៈបទខាងលើក៏មានការសម្តែងពិសេសពីអ្នករាំទៀតកាន់តែជំរុញឱ្យការច្រៀង និងសម្តែងរបស់ពួកគេមានភាពទាក់ទាញកាន់តែខ្លាំងដោយអ្នកលេងបណ្តាញសង្គមវៀតណាមក៏បង្ហាញការចាប់អារម្មណ៍និងសរសើរយ៉ាងខ្លាំងមកលើតារាចម្រៀងកម្ពុជា វណ្ណដា ផងដែរ។

ការចូលរួមនៅក្នុងកម្មវិធីនៅឯប្រទេសវៀតណាមលើកទី១នេះ វណ្ណដា ក៏បានបង្ហាញពីចំណាប់អារម្មណ៍របស់ខ្លួនដែរថា រូបគេពិតជារំភើបដែលត្រូវបានអញ្ជើញ និងទទួលបានការស្វាគមន៍យ៉ាងកក់ក្តៅពីសំណាក់ខាងកម្មវិធី និងមានទំនាក់ទំនងយ៉ាងល្អជាមួយតារាល្បីៗជាច្រើននៅប្រទេសវៀតណាម៕

យន្តហោះដឹកអ្នកដំណើររបស់ក្រុមហ៊ុន Air China ចុះចតបន្ទាន់នៅសិង្ហបុរី

ប្រទេសសិង្ហបុរី ៖ កាលពីថ្ងៃទី១០ ខែកញ្ញា ឆ្នាំ២០២៣ នៅអាកាសយានដ្ឋានអន្តរជាតិ Changi ប្រទេសសិង្ហបុរី បានចេញសេចក្តីថ្លែងការណ៍មួយថា ជើងហោះហើរ CA403 របស់ក្រុមហ៊ុនអាកាសចរណ៍ Air China ដែលប្រើប្រាស់យន្តហោះដឹកអ្នកដំណើរ Airbus A320neo ធ្វើដំណើរចេញពីទីក្រុង Chengdu មកកាន់អាកាសយានដ្ឋានអន្តរជាតិ Changi ត្រូវបង្ខំចិត្តចុះចតជាបន្ទាន់នៅ Run Way លេខ៣ ។ ការចុះចតបន្ទាន់នេះ ដោយសារមានភ្លើងឆាបឆេះនៅផ្នែកម្ខាងនៃគ្រឿងម៉ាស៊ីន ហើយអាកាសយានដ្ឋានត្រូវផ្អាកដំណើរការអស់ប្រមាណ៣ម៉ោងនៅរសៀលថ្ងៃដដែល ។

គ្រឿងម៉ាស៊ីនយន្តហោះដែលត្រូវបានភ្លើងឆាបឆេះនោះ គឺស្ថិតនៅបរិវេណកន្លែងផ្ទុកឥវ៉ាន់ និងបន្ទប់ទឹក ។ ចំណែកអ្នកដំណើរចំនួន១៤៦នាក់ និងអ្នកបម្រើការលើយន្តហោះ៩នាក់ទៀត ត្រូវបានអាជ្ញាធរជម្លៀសចេញដោយសុវត្ថិភាព ហើយគ្មានអ្នកណាមានគ្រោះថ្នាក់ដល់ជីវិតទេ ។ ក្រោយមក ភ្នាក់ងារសង្គ្រោះបន្ទាន់របស់អាកាសយានដ្ឋានអន្តរជាតិ Changi ប្រទេសសិង្ហបុរី អាចពន្លត់ភ្លើងគ្រឿងម៉ាស៊ីនផ្នែកខាងឆ្វេងបានដោយជោគជ័យ និងធ្វើការបម្លាស់ទីយន្តហោះនេះចេញពីកន្លែងចំណត ។

បើទោះជាអាជ្ញាធរអាចគ្រប់គ្រងភ្លើងកុំឱ្យឆេះរាលដាលក៏ដោយ ប៉ុន្តែអាកាសយានដ្ឋានអន្តរជាតិ Changi ចាំបាច់ត្រូវបិទ Run Way លេខ៣ ជាបណ្តោះអាសន្នសិន ។ ហេតុនេះ វានឹងធ្វើឱ្យប៉ះពាល់ដល់ជើងយន្តហោះចូល និងយន្តហោះចេញមួយចំនួន ខណៈភ្នាក់ងារពាក់ព័ន្ធបានស៊ើបអង្កេតហេតុការណ៍នេះ ៕

ប្រភព ៖ on route trip

នាព្រឹកថ្ងៃអាទិត្យ ១០រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១០ ខែកញ្ញា ឆ្នាំ២០២៣ ស.ស.យ.ក.ស្រុករុក្ខគិរី បានរៀបចំពិធីសំណេះសំណាល និងបញ្ចូលសមាជិកថ្មី ចំនួន ៥៤រូប ក្រោមអធិបតីភាព លោក ម៉ម ដារ៉េត ប្រធានក្រុមប្រឹក្សា សហភាពសហព័ន្ធយុវជនកម្ពុជា ស្រុករុក្ខគិរី ខេត្តបាត់ដំបង នៅទីស្នាក់ការ ស.ស.យ.ក.ស្រុករុក្ខគិរី។ ក្នុងឱកាសនោះ លោក ម៉ម ដារ៉េត បានជម្រាបជូនដល់សមាជិក សមាជិកា អំពីបុព្វហេតុ ចក្ខុវិស័យ បេសកកម្មចម្បងៗ របស់ ស.ស.យ.ក និង ការចូលរួមសកម្មភាពរបស់ ស.ស.យ.ក. ក្នុងដំណើរវិវឌ្ឍន៍របស់កម្ពុជា និងសមិទ្ធផលនានា ដែលសម្រេចបាននាពេលកន្លងមក ឆ្លៀតក្នុងឱកាសនោះលោកក៏បានជម្រាបជូនដល់សមាជិក សមាជិកា ត្រូវផ្សព្វផ្សាយអំពីការទទួលសមាជិក ស.ស.យ.ក ថ្មី តាមការណែនាំរបស់ ឯកឧត្តម ស រដ្ឋា ប្រធាន ស.ស.យ.ក.ខេត្តបាត់ដំបង ជាចុងក្រោយ លោក ម៉ម ដារ៉េត ក៏បានជម្រាបជូនដល់សមាជិក សមាជិកា ដែលបានចូលរួមថា ថ្នាក់ដឹកនាំនឹងត្រៀមបញ្ជូនក្រុមការងារ ដើម្បីបើកវគ្គបណ្តុះបណ្តាល វគ្គសិក្សា ជំនាញផ្សេងៗ ដោយឥតគិតថ្លៃជូនដល់ សមាជិក សមាជិកា ប្អូនៗសិស្សានុសិស្ស ដែលរៀបចំឡើងដោយក្រុមប្រឹក្សាសហភាពសហព័ន្ធយុវជនកម្ពុជា ស្រុករុក្ខគិរី នៅពេលខាងមុខនេះផងដែរ។