ប្រទេសថៃ ៖ ពលរដ្ឋរស់នៅខេត្តឈុនបុរី ប្រទេសថៃ និងទំព័រហ្វេសប៊ុកថៃបានលើកឡើងពីសត្វស្វាជាច្រើនក្បាលដេញខាំភ្ញៀវទេសចរ និងបណ្តាលឱ្យរងរបួសត្រង់ជើងឆ្វេងដេរអស់ជាច្រើនថ្នេរ ។ ពលរដ្ឋនិយាយថា សត្វទាំងនេះចូលចិត្តធ្វើបាបមនុស្ស ហើយពួកវាមិនត្រឹមតែពូកែខាំនោះទេ តែពួកវាក៏ពូកែខាងលួចចំណីអាហារផងដែរ ។

ទំព័រហ្វេសប៊ុកប្រទេសថៃបានដាស់តឿនដល់ភ្ញៀវទេសចរទាំងអស់ ដែលមានបំណងទៅកម្សាន្តនៅលើភ្នំសាមម៉ុក ខេត្តឈុនបុរី ត្រូវប្រយ័ត្នខ្លួនកុំឱ្យសត្វស្វាខាំ ពីព្រោះមានពលរដ្ឋថៃជាច្រើននាក់ដែលទៅកាន់ភ្នំនេះត្រូវបានស្វាខាំ ។ កាលពីពេលថ្មីៗនេះ ស្វាបានខាំជើងឆ្វេងរបស់ពលរដ្ឋថៃម្នាក់បណ្តាលឱ្យរងរបួស និងដេរអស់ជាច្រើនថ្នេរ ហើយអ្នករងរបួសអាចនឹងឆ្លងជំងឺពីស្វាផងដែរ ដោយត្រូវចាក់ថ្នាំការពារជាច្រើនម្ជុល ។

ក្រោយពីមានការបង្ហោះរឿងរ៉ាវនេះក្នុងបណ្តាញសង្គមដើម្បីឱ្យភ្ញៀវទេសចរប្រុងប្រយ័ត្ននោះ មានអ្នកលេងបណ្តាញសង្គមថៃជាច្រើននាក់ចូលមកបញ្ចេញមតិ ក្នុងនោះជនជាតិថៃម្នាក់និយាយថា ៖ «ស្វាទាំងនេះចូលចិត្តរំខានភ្ញៀវទេសចរជាច្រើននាក់ ហើយស្វាខ្លះបានលួចចំណីអាហារទៀតផង ។ ដូច្នេះ យើងគួរចែកចាយរឿងរ៉ាវនេះដើម្បីកុំឱ្យវាកើតឡើងម្តងទៀត ព្រមទាំងអំពាវនាវឱ្យស្ថាប័នពាក់ព័ន្ធប្រញាប់ដោះស្រាយបញ្ហាផងដែរ» ។

ក្រុមការងារសារព័ត៌មានថៃ Amarin TV បានធ្វើដំណើរទៅកាន់ភ្នំសាមម៉ុក ស្ថិតក្នុងឃុំសែនសុខ ស្រុកមឿង ខេត្តឈុនបុរី ឃើញថា ស្វាទាំងនេះបានដេញខាំភ្ញៀវទេសចរគ្រប់ពេលវេលា ហើយអ្នករងរបួសជើងដោយសារស្វាខាំនោះមិនមែនជាមនុស្សដំបូងទេ ព្រោះកន្លងមក អ្នកខ្លះត្រូវស្វាខាំរហូតដល់ចូលព្យាបាលនៅមន្ទីរពេទ្យទៀតផង ។

ក្រុមការងារសារព័ត៌មាន Amarin TV ក៏បានទៅសាកសួរអាជីវករនៅក្បែរនោះ ហើយពួកគេប្រាប់ថា ស្វាមិនមែនសុទ្ធតែរំខានភ្ញៀវទេសចរទាំងអស់ទេ ប៉ុន្តែគ្រាន់តែចង់ឱ្យភ្ញៀវទេសចរប្រុងប្រយ័ត្នសុវត្ថិភាពខ្លួនឯង ។ ភ្ញៀវទេសចរមិនគួរផ្តល់ចំណីឱ្យស្វានៅក្បែរវាពេកទេ ចំណែកទ្រព្យសម្បត្តិមានតម្លៃផ្សេងៗត្រូវទុកដាក់ឱ្យបានត្រឹមត្រូវ ចៀសវាងស្វាលួចយកទៅ ៕ ប្រភព ៖ amarin tv

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃលើកឡើងថា លោកមិនត្រូវការឱ្យមានទំនាស់គ្នានោះទេ ជុំវិញការផ្តល់ប្រាក់ចំនួន១ម៉ឺនបាតដល់ពលរដ្ឋថៃ ។ លោកបន្តថា ការផ្តល់ប្រាក់ឌីជីថលនឹងមានភាពច្បាស់លាស់ ហើយមិនយូរជាងថ្ងៃទី១០ ខែវិច្ឆិកា ឆ្នាំ២០២៣ ទេ គឺមុនពេលលោកធ្វើដំណើរទៅចូលរួមកិច្ចប្រជុំ APEC នៅសហរដ្ឋអាមេរិក ។ ដូច្នេះ សូមឱ្យពលរដ្ឋទាំងអស់ស្តាប់លោកតែម្នាក់ប៉ុណ្ណោះ និងកុំសួរទៅខាងរដ្ឋមន្ត្រី ឬទីប្រឹក្សាផ្សេងទៀត ។

លើសពីនេះ លោក សេដ្ឋា ថាវីស៊ីន នាយករដ្ឋមន្ត្រីប្រទេសថៃបានលើកឡើងពីករណីសារព័ត៌មានថៃមួយចំនួនចុះផ្សាយរិះគន់លោកផងដែរ ដោយលោកលើកឡើងថា លោកមិនចង់ឱ្យបញ្ហាកាន់តែធំនោះទេ ហើយសូមកុំផ្តល់ភាពសំខាន់លើវាខ្លាំងពេក ។ ហេតុនេះ លោកមិនត្រូវការឱ្យកើតទំនាស់ជាមួយគ្នាទេ ។

ចំណែកបញ្ហាពាក់ព័ន្ធនឹងកិច្ចប្រជុំគណៈកម្មការផ្តល់ប្រាក់ឌីជីថលចំនួន១ម៉ឺនបាតនោះ លោកនាយករដ្ឋមន្ត្រីថៃលើកឡើងថា នៅល្ងាចថ្ងៃទី៣ ខែវិច្ឆិកា ឆ្នាំ២០២៣ នឹងមានកិច្ចប្រជុំផ្ទៃក្នុង បន្ទាប់មក នឹងមានការជូនដំណឹងឱ្យជ្រាបថា នឹងបង្កើតក្រុមគណៈកម្មការនៅពេលណា ។ លោកសង្ឃឹមថា ការងារទាំងអស់នឹងបញ្ចប់រួចរាល់នៅដើមខែវិច្ឆិកា ឆ្នាំ២០២៣ ហើយសូមពលរដ្ឋទាំងអស់កុំសួរទៅខាងរដ្ឋមន្ត្រី ឬទីប្រឹក្សាផ្សេងទៀតពាក់ព័ន្ធនឹងការផ្តល់ប្រាក់ឱ្យពលរដ្ឋម្នាក់១ម៉ឺនបាត ។

លោកនាយករដ្ឋមន្ត្រីប្រទេសថៃបន្ថែមថា ពលរដ្ឋត្រូវស្តាប់លោកតែម្នាក់ គឺនៅម៉ោង៣រសៀលថ្ងៃទី៣ ខែវិច្ឆិកា ឆ្នាំ២០២៣ លោកត្រូវចូលរួមប្រជុំ ហើយបើការងារទាំងអស់រួចរាល់ គឺអាចនឹងមានការប្រជុំអនុគណៈកម្មការ បន្ទាប់មក ត្រូវប្រជុំគណៈកម្មការបន្តទៀត ។ នៅថ្ងៃទី១២ ខែវិច្ឆិកា ឆ្នាំ២០២៣ លោកនាយករដ្ឋមន្ត្រីថៃនឹងធ្វើដំណើរទៅចូលរួមកិច្ចប្រជុំ APEC នៅសាន់ហ្វ្រេនស៊ីស្កូ សហរដ្ឋអាមេរិក ។ ដូច្នេះ លោកចង់ឱ្យការងារទាំងអស់បញ្ចប់នៅថ្ងៃទី១០ ខែវិច្ឆិកា ឆ្នាំ២០២៣ ៕ ប្រភព ៖ 3Plus NEWS

បរទេស៖ ភ្ញៀវទេសចរណ៍ថៃជាច្រើននាក់ត្រូវបានប្រទេសកូរ៉េខាងត្បូងត្រួតពិនិត្យយ៉ាងដិតដល់ជាច្រើនខែ ទោះបីជាពួកគេមានឯកសារត្រឹមត្រូវក៏ដោយ។

យោងតាមគេហទំព័រ South China Morning Post ដែលបានចុះផ្សាយនៅថ្ងៃទី២ ខែវិច្ឆិកាថា ជនជាតិថៃជាច្រើនដែលធ្វើដំណើរទៅកាន់ប្រទេសកូរ៉េខាងត្បូងបានស្ថិតនៅក្រោមការត្រួតពិនិត្យក្នុងរយៈពេលប៉ុន្មានខែថ្មីៗនេះ បើទោះបីជាមានឯកសារត្រឹមត្រូវក៏ដោយ ដែលបង្កឱ្យមានការចោទប្រកាន់ពីបទរើសអើង។

បច្ចុប្បន្ន អ្នកទេសចរថៃជាច្រើននាក់មានការតានតឹងយ៉ាងខ្លាំងក្នុងការចូលទៅប្រទេសកូរ៉េខាងត្បូង ខណៈដែលប្រទេសនេះបានបញ្ជូនឯកសារបស់ភ្ញៀវទេសចរថៃត្រឡប់មកវិញ និងថែមទាំងត្រូវបានបដិសេធមិនឱ្យចូលទៀតផង ដែលនាំឱ្យអ្នកដំណើរជនជាតិថៃជាច្រើនបញ្ចេញការខកចិត្តរបស់ពួកគេនៅលើប្រព័ន្ធផ្សព្វផ្សាយសង្គម។

យោងតាមអ្នកប្រើប្រាស់បណ្តាញសង្គមម្នាក់បានចែករំលែកនៅលើ Twitter ថា ពួកគេបានចំណាយលើសំបុត្រយន្តហោះទៅវិញទៅមក និងបានកក់បន្ទប់សណ្ឋាគារ ហើយថែមទាំងទិញសំបុត្រប្រគុំតន្ត្រីទៅមើលនៅប្រទេសកូរ៉េទៀតផង ប៉ុន្តែត្រូវបានកូរ៉េខាងត្បូងមិនអនុញ្ញាតឱ្យចូលក្នុងប្រទេស ហើយថែមទាំងបញ្ជូនត្រឡប់ទៅប្រទេសថៃវិញទៀត។

រីឯអ្នកទេសចរថៃផ្សេងទៀតក៏បាននិយាយដែរថា “ប្រទេសកូរ៉េខាងត្បូងមានចេតនារក្សាឱ្យឆ្ងាយពីប្រជាជនថៃ”។ ដូច្នេះ ដើម្បីកាត់បន្ថយការរើសអើងនេះ មនុស្សជាច្រើនអំពាវនាវឱ្យរដ្ឋាភិបាលដោះស្រាយបញ្ហាដ៏រ៉ាំរ៉ៃរបស់ពលរដ្ឋថៃជាច្រើននាក់ដែលលាក់ខ្លួននៅប្រទេសកូរ៉េដើម្បីធ្វើការ។ នាយករដ្ឋមន្ត្រីថៃ ស្រេថាថាវីស៊ីន បានសន្យាថានឹងធ្វើការជាមួយអនុរដ្ឋមន្ត្រីការបរទេសរបស់កូរ៉េខាងត្បូង ដើម្បីដោះស្រាយបញ្ហាភ្ញៀវទេសចរថៃជារឿយៗត្រូវបានបដិសេធមិនឱ្យចូលក្នុងប្រទេសកូរ៉េ។

គួរបញ្ជាក់ដែរថា កន្លងមកពលករថៃខុសច្បាប់ប្រមាណ ១០០,០០០ នាក់កំពុងរស់នៅក្នុងប្រទេសកូរ៉េខាងត្បូង ហេតុនេះហើយទើបប្រទេសកូរ៉េបានសម្រេចចិត្តរឹតបន្តឹងការចូលទស្សនារបស់ភ្ញៀវទេសចរថៃ ដែលធ្វើអ្នកទេសចរមានការមិនពេញចិត្ត។ ទោះជាយ៉ាងណាក៏ដោយ កូរ៉េខាងត្បូងគឺជាប្រទេសកំពូលទាំង ៥ ដែលមានភ្ញៀវទេសចរថៃទៅទស្សនាច្រើនបំផុតក្នុងរយៈពេល ៨ ខែដំបូងនៃឆ្នាំនេះដោយមានចំនួន ២៥០,០០០ នាក់ នេះបើយោងតាមទិន្នន័យពីអង្គការទេសចរណ៍កូរ៉េ (KTO)៕

លោក Nawat ដែលជាស្ថាបនិកកម្មវិធីប្រកួតបវរកញ្ញា Miss Grand International បានចាត់វិធានការយ៉ាងធ្ងន់ធ្ងរ ដោយហាមប្រាម MJ Lastimosa ជា Miss Universe Philippines 2014 មិនឱ្យចូលរួមក្នុងព្រឹត្តិការណ៍ Miss Grand International បន្តទៀត។ ការសម្រេចចិត្តនេះធ្វើឡើងបន្ទាប់ពីអតីតបវរកញ្ញារូបនេះបានបង្ហោះវីដេអូមួយដោយបាននិយាយលេងសើចទាក់ទងនឹងកម្មវិធី របស់លោកជាមួយ Miss Grand Philippines។ភាពចម្រូងចម្រាស់នៃវិស័យបវរកញ្ញាបានសាយភាពពេញបណ្តាញសង្គមនៅពេលដែល MJ Lastimosa បានធ្វើវីដេអូ vlog ដោយបានចោទសួរទៅកាន់ភ្ញៀវកិត្តិយសរបស់នាងគឺ Maki Gingoyon ដោយសុំឱ្យកំណត់អត្តសញ្ញាណកម្មវិធីប្រកួតសម្រស់ដ៏អាក្រក់បំផុតនៅក្នុងប្រទេសហ្វីលីពីន។ ភ្ញៀវកិត្តិយសរូបនេះបានជ្រើសរើស Miss Grand Philippines ព្រោះតែជាបេក្ខភាពមិនសូវអំណោយផលក្នុងចំណោមបវរកញ្ញាក្នុងប្រទេស ពេលចូលរួមប្រកួតMiss Grand International ។ ការលើកឡើងនេះបានបង្កឱ្យមានការខឹងសម្បារពីលោក ណាវ៉ាត់ យ៉ាងខ្លាំងរហូតដល់ស្ថាបនិករូបនេះប្រកាសផ្តាច់ទំនាក់ទំនងធ្វើជាមនុស្សមិនធ្លាប់ស្គាល់គ្នាជាមួយ MJ ចាប់ពីពេលនេះតទៅ។

ឧប្បត្តិហេតុនេះកើតឡើងពីការខកចិត្តពីមុនរបស់លោក ណាវ៉ាត់ ជាមួយ Miss Grand Philippines 2023 គឺកញ្ញា Nikki De Moura ដែលបានចាកចេញភ្លាមៗ បន្ទាប់ពីបរាជ័យក្នុងការទទួលបានតំណែងក្នុងបេក្ខនារីកំពូលទាំង២០ (TOP20) តាមដែលខ្លួនចង់បាន។

ការខកចិត្តរបស់មេ Miss Grand International នេះកាន់តែកើនឡើងនៅពេលដែល MJ Lastimosa ដែលធ្លាប់ចូលរួមកម្មវិធី MGI និងភ្ញៀវកិត្តិយសរបស់នាងបាននិយាយសើចចំអកឱ្យកម្មវិធីប្រកួត Miss Grand នៅក្នុង vlog របស់ពួកគេ។

នៅក្នុងសេចក្តីថ្លែងការណ៍ដ៏តឹងរ៉ឹងមួយរបស់ លោក ណាវ៉ាត់ បានរិះគន់ MJ Lastimosa ថា «គ្មានចំណេះដឹង និងគ្មានគំនិត»។ លោកបញ្ជាក់ថា សកម្មភាពនិងការបញ្ចេញមតិរបស់នាងធ្លាក់ចុះក្រោមស្ដង់ដាររបស់រាជនីសម្រស់ដែលជាហេតុធ្វើឱ្យមានភាពចម្រូងចម្រាស់កាន់តែខ្លាំងជុំវិញរឿងនេះ។

«កុំមក Miss Grand ទៀតអី យើងមិនស្គាល់គ្នាចាប់ពីពេលនេះទៅ។ ខ្ញុំមិនចង់ជួបមនុស្សដូចអ្នកទេ វាស្ថិតនៅក្រោមស្តង់ដារ វាមិនស្មោះត្រង់ទេ»។ នេះជាសម្តីរបស់លោក ណាវ៉ាត់ អំឡុងពេល Live លើ TitTok ដោយនិយាយទៅកាន់ Miss Universe Philippines 2014 ។ ការប្រកាសបញ្ចប់ទំនាក់ទំនងនិងហាមប្រាមរបស់លោក ណាវ៉ាត់ មិនឱ្យ MJ Lastimosa ចូលកម្មវីធីរបស់លោកទៀតនេះបានធ្វើឱ្យមានការភ្ញាក់ផ្អើលពេញសហគមន៍កម្មវិធីប្រកួតសម្រស់ ខណៈ MJ Lastimosa មិនបានចេញសេចក្តីថ្លែងការណ៍ណាមួយទាក់ទងនឹងការប្រតិកម្មរបស់លោក ណាវ៉ាត់ ឡើយ៕

ប្រទេសថៃ ៖ ពលរដ្ឋរស់នៅស្រុកខោវង់ ខេត្តកាឡាក់ស៊ីន ប្រទេសថៃ បានប្រើប្រាស់កង់ធ្វើជាឧបករណ៍សម្រាប់ការប្រមូលផលស្រូវ ក្រោយពីពួកគេបានច្រូតស្រូវរួចរាល់ ។ ពលរដ្ឋនិយាយថា ការប្រមូលផលស្រូវតាមវិធីនេះ គឺពួកគេចេះមកពីបុព្វបុរស ហើយពួកគេមិនចាំបាច់បញ្ចេញកម្លាំងច្រើននោះទេ ខណៈគ្រាប់ស្រូវដែលបានមមក មានសភាពល្អដូចដើម និងមិនបាក់ជាកំណាត់ ។

ចំពោះវិធីប្រមូលផលស្រូវដោយប្រើប្រាស់កង់ គឺត្រូវដាក់បញ្ឈរកង់ ដោយឱ្យកង់ទាំងពីររបស់វាស្ថិតនៅផ្នែកខាងលើ ហើយមានមនុស្សម្នាក់អង្គុយចាំបង្វិលកង់ឱ្យវិល ខណៈមនុស្សម្នាក់ទៀតយកកណ្តាប់ស្រូវដែលបានចងជាបាច់រួចហើយមកដាក់ពីលើវា ។ ដូច្នេះ គ្រាប់ស្រូវនឹងធ្លាក់ចេញពីកណ្តាប់អស់គ្មានសល់ ហើយគ្រាប់ស្រូវទាំងនេះមានសភាពល្អស្អាត និងមិនបាក់ ។

ស្ត្រីម្នាក់ដែលកំពុងប្រមូលផលស្រូវជាមួយកសិករផ្សេងទៀតនិយាយថា ៖ «វិធីប្រមូលផលស្រូវដោយប្រើប្រាស់កង់ គឺឆាប់រហ័ស ហើយនៅពេលយកស្រូវទៅកិននៅរោងម៉ាស៊ីនកិនស្រូវ គឺគ្រាប់អង្ករនៅតែមានសភាពល្អ និងមិនបាក់ជាកំណត់ទេ ។ ប៉ុន្តែការប្រមូលផលស្រូវតាមវិធីនេះ ត្រូវយកដៃរបស់យើងមកជួយផងដែរ ដើម្បីឱ្យគ្រាប់ស្រូវធ្លាក់ចេញអស់ពីដើម ។ ទោះយ៉ាងណា ការប្រើប្រាស់ដៃអាចមានគ្រោះថ្នាក់ ប្រសិនបើមិនប្រុងប្រយ័ត្ន» ។

ស្ត្រីរូបនេះបន្តទៀតថា ៖ «ដូច្នេះ អ្នកធ្វើការងារនេះត្រូវតែមានជំនាញច្បាស់លាស់ និងប្រុងប្រយ័ត្នជានិច្ច ។ ការប្រមូលស្រូវតាមវិធីខាងលើ គឺជាគំនិតច្នៃប្រឌិតរបស់អ្នកភូមិបន្តតាំងពីសម័យបុព្វបុរសមកម្ល៉េះ ហើយក៏បានទាញផលប្រយោជន៍ពីកង់ផងដែរ» ៕ ប្រភព ៖ CNews

ប្រទេសថៃ ៖ ក្រោយពីទំព័រហ្វេសប៊ុកមួយនៅប្រទេសថៃបានបង្ហោះរូបភាពគំនរសំរាម ព្រមទាំងសរសេរថា «ខ្យល់រងាមកដល់ហើយ និងធុំក្លិនជូរចេញពីភ្នំសំរាម» បានធ្វើឱ្យអ្នកលេងបណ្តាញសង្គមថៃជាច្រើននាក់ចូលមកបញ្ចេញមតិ ដូចជា ៖ «សំរាមនេះបានកើតឡើងដោយសារតែមនុស្សគ្រប់គ្នា» ។ ចំណែកពលរដ្ឋថៃម្នាក់ទៀតនិយាយថា ៖ «បញ្ហាសំរាមនេះ គ្មានអ្នកណាហ៊ានចូលមកដោះស្រាយទេ» ។ ពលរដ្ឋថៃម្នាក់ទៀតថា ៖ «ទទួលយកបរិយាកាសបែបនេះ ធ្វើឱ្យចិត្តស្រស់ស្រាយ ។ នេះហើយទីក្រុងគួរឱ្យចង់រស់នៅ ហើយក្លិននេះសាយភាយមកដល់សាលារៀនទៀតផង» ។

នៅព្រឹកថ្ងៃទី៣ ខែវិច្ឆិកា ឆ្នាំ២០២៣ ក្រុមសារព័ត៌មានថៃ Mono News បានធ្វើដំណើរមកដល់បរិវេណរណ្តៅសំរាមឈ្មោះ «ព្រេកសា» ដែលស្ថិតនៅឃុំព្រេកសា ស្រុកមឿងសមុទ្រប្រាកាន ខេត្តសមុទ្រប្រាកាន ប្រទេសថៃ ឃើញថា រណ្តៅសំរាមនេះមានកម្ពស់ខ្ពស់ស្មើនឹងភ្នំមួយ ហើយវាបានបញ្ចេញក្លិនស្អុយយ៉ាងខ្លាំង ។ ចំណែកពលរដ្ឋរស់នៅក្បែរនោះប្រាប់ថា បច្ចុប្បន្ន ពួកគេបារម្ភពីផលប៉ះពាល់សុខភាព ដោយសារសំរាមមានក្លិនស្អុយ ។

លោក ណុច ជាអ្នកស្រុកមានផ្ទះនៅឆ្ងាយពីរណ្តៅសំរាមមិនដល់១គីឡូម៉ែត្រប្រាប់ថា លោកបានរស់នៅទីនេះអស់រយៈពេល៣០ឆ្នាំហើយ ។ កាលពីមុន គំនរសំរាមនេះមិនខ្ពស់ដូចពេលនេះទេ ប៉ុន្តែបច្ចុប្បន្ន គំនរសំរាមខ្ពស់ខ្លាំងណាស់ ។ លើសពីនេះ នៅខែវិច្ឆិកា ឆ្នាំ២០២៣ ខ្យល់ត្រជាក់ចាប់ផ្តើមបក់មក ហើយនាំយកក្លិនស្អុយមកជាមួយដែរ គឺស្អុយចាប់ពីពេលរសៀល រហូតដល់ពេលល្ងាច ប៉ុន្តែវាមិនស្អុយខ្លាំងដូចនៅខែវស្សាទេ ។ លោកបារម្ភថា សត្វរុយចេញពីគំនរសំរាមនឹងចម្លងរោគមកពលរដ្ឋរស់នៅក្នុងភូមិរបស់លោក ។

ចំណែកបុគ្គលិកផ្នែកប្រមូលសំរាមនៅរណ្តៅសំរាម «ព្រេកសា» និយាយថា បច្ចុប្បន្ន ខ្លួន និងក្រុមការងារបានប្រមូលសំរាមចាប់ពី៩តោន រហូតដល់១០តោនក្នុង១ថ្ងៃ ។ បរិមាណសំរាមនេះចាត់ទុកថា បានកើនឡើងយ៉ាងខ្លាំង ហើយក្រុមការងារប្រមូលសំរាមត្រូវបន្ថែមកម្លាំងច្រើនដើម្បីប្រមូលសំរាមទាំងនេះ ដែលខុសពីឆ្នាំមុនៗ ៕ ប្រភព ៖ Mono News

ឆ្មា គឺសត្វដែលមានភាពឆ្លាតវៃ និងរហ័សរហួន ក៏ដូចជាមានជំនាញ និងសម្ថភាពពិសេសប្លែកៗខុសពីសត្វដទៃ ដោយជាទូទៅវាតែងតែរស់នៅប្រាស្រ័យទាក់ទងជាមួយនឹងមនុស្ស។ ដូច្នេះហើយ យោងតាមការសិក្សាមួយដែលត្រូវបានចេញផ្សាយនៅក្នុងទស្សនាវដ្ដី Behavioral Processes កាលពីខែមុន អ្នកវិទ្យាសាស្ត្រអាមេរិកពីរនាក់បានរាប់ចំនួន ២៧៦ ដងនៃទឹកមុខផ្សេងៗគ្នារបស់សត្វឆ្មា នៅពេលដែលឆ្មាក្នុងស្រុកមានទំនាក់ទំនងគ្នាទៅវិញទៅមក។

លោក Brittany Florkiewicz សហអ្នកនិពន្ធការសិក្សា និងជាចិត្តវិទូវិវត្តនៅមហាវិទ្យាល័យ Lyon ក្នុងរដ្ឋ Arkansas បាននិយាយថា ការប្រាស្រ័យទាក់ទងរបស់សត្វឆ្មាគឺមានភាពស្មុគស្មាញខ្លាំងណាស់។ លោក Florkiewicz ក៏បានពន្យល់ដែរថា ឆ្មាដែលចិញ្ចឹមតាមផ្ទះជាធម្មតាមានភាពអត់ធ្មត់ក្នុងសង្គមជាងសត្វឆ្មាព្រៃ ទោះជាយ៉ាងណាក៏ដោយសត្វឆ្មាទាំងនោះបានផ្លាស់ប្តូរទឹកមុខភ្លាមៗ នៅពេលដែលពួកវាធ្វើការប្រាស្រ័យទាក់ទងគ្នាទៅវិញទៅមក ដោយការស្រាវជ្រាវបានរកឃើញថា សត្វឆ្មាទាំងនោះបានផ្លាស់ប្តូរទឹកមុខរហូតទៅដល់ ២៧៦ ដងខុសៗគ្នា។

ដូច្នេះ ដើម្បីប្រមូលទិន្នន័យទាំងអស់នេះបាន អ្នកស្រាវជ្រាវបានធ្វើការពិសោធន៍ ដោយយកសត្វឆ្មាចំនួន ៥៣ ក្បាលនៅហាងកាហ្វេក្នុងស្រុកមួយ ទៅដាក់នៅសាកលវិទ្យាល័យកាលីហ្វ័រញ៉ា ឡូសអេនជឺលេស ចន្លោះខែសីហា ឆ្នាំ២០២១ ដល់ខែមិថុនា ឆ្នាំ ២០២២ ពីការថតវីដេអូរយៈពេល ១៩៤ នាទី ដោយបានកត់ត្រាទំនាក់ទំនងសត្វឆ្មាសរុបចំនួន ១៨៦ ក្បាល ហើយក៏បានរកឃើញរឿងមួយដ៏គួរឱ្យភ្ញាក់ផ្អើលបំផុត។ ដោយក្នុងកាមេរានោះគេរកឃើញថា សត្វឆ្មាចំនួន ៥៣ ក្បាលដែលមកពីហាងកាហ្វេក្នុងស្រុកមួយកន្លែងនោះ បានផ្លាស់ប្តូរទឹកមុខនៅពេលដែលវាបានឃើញសត្វឆ្មាដទៃទៀត ហើយអ្នកស្រាវជ្រាវក៏បានរាប់ចំនួននៃការផ្លាស់ប្តូរទឹកមុខរបស់ពួកវា ដោយរកឃើញថាសត្វឆ្មាទាំងអស់ពិតជាមានសមត្ថភាពអាចប្តូរទឹកមុខបានរហូតដល់ ២៧៦ ដងខុសៗគ្នាពិតប្រាកដមែន។

ទោះជាយ៉ាងណាក៏ដោយ អ្នកស្រាវជ្រាវមិនទាន់ដឹងច្បាស់ពីអត្ថន័យនៃការបញ្ចេញទឹកមុខប្លែកៗរបស់សត្វឆ្មាទាំងអស់នោះទេ ដោយពួកគេសង្ឃឹមថានឹងសិក្សាបន្ថែមអំពីជម្រៅចិត្តរបស់សត្វឆ្មា ដើម្បីកំណត់ពីអត្ថន័យនៃការបញ្ចេញទឹកមុខរបស់ពួកវា៕