ប្រទេសថៃ ៖ មុននេះ សារព័ត៌មានប្រទេសថៃបានចុះផ្សាយព័ត៌មានពីការកិបកេងប្រាក់សម្រាប់ធ្វើម្ហូបអាហារថ្ងៃត្រង់ឱ្យកូនសិស្ស ដោយសាលាទាំងនោះបានផ្តល់អាហារឱ្យកូនសិស្សតិចពេក, ខ្វះអាហារូបត្ថម្ភ ឬអាហារគ្មានស្តង់ដារជាដើម រហូតធ្វើឱ្យអាណាព្យាបាលសិស្សជាច្រើននាក់មិនពេញចិត្ត និងរិះគន់ក្នុងបណ្តាញសង្គម ។

នៅថ្ងៃទី២៥ ខែកញ្ញា ឆ្នាំ២០២៣ ទំព័រហ្វេសប៊ុករបស់សាលាសង្កាត់ឡាំលូកា បានបង្ហោះថាសដាក់អាហារថ្ងៃត្រង់របស់កូនសិស្សថ្នាក់មត្តេយ្យ ព្រមទាំងសរសេរថា ៖ « សាលាមត្តេយ្យសាលាសង្កាត់ឡាំលូកា បានរៀបចំអាហារថ្ងៃត្រង់ជាច្រើនមុខសម្រាប់កូនសិស្ស មានដូចជា ៖ បាយស, ខសាច់មាន់ដាក់ស៊ុត និងតៅស៊ូ, ត្រីចៀនបំពងម្សៅ និងផ្លែទំពាំងបាយជូរ» ។

បន្ទាប់មក នៅថ្ងៃទី២៧ ខែកញ្ញា ឆ្នាំ២០២៣ ទំព័រហ្វេសប៊ុករបស់សាលាសង្កាត់ឡាំលូកា បានបង្ហោះថាសដាក់អាហារថ្ងៃត្រង់របស់កូនសិស្សថ្នាក់មត្តេយ្យ ព្រមទាំងសរសេរទៀតថា ៖ «សាលាមត្តេយ្យសាលាសង្កាត់ឡាំលូកា បានរៀបចំអាហារថ្ងៃត្រង់ជាច្រើនមុខសម្រាប់កូនសិស្ស រួមមាន ៖ បាយស, ឆាមីសួជាមួយសាច់មាន់ចិញ្ច្រាំ, ស្ងោរសាច់ជ្រូកចិញ្ច្រាំជាមួយស្លឹកបាស់, បង្អែមគ្រាប់សាគូដាក់ខ្ទិះដូង និងផ្លែទំពាំងបាយជូរគ្មានគ្រាប់» ។

ក្រោយពីទំព័រហ្វេសប៊ុករបស់សាលាសង្កាត់ឡាំលូកា បានបង្ហោះរូបម្ហូបអាហាររបស់កូនសិស្សថ្នាក់មត្តេយ្យក្នុងបណ្តាញសង្គមរួចមក ធ្វើឱ្យពលរដ្ឋថៃជាច្រើននាក់ចូលមកបញ្ចេញយោបល់ ក្នុងនោះពលរដ្ឋថៃម្នាក់និយាយថា ៖ «ចង់នាំកូនទៅរៀននៅសាលានេះណាស់ ព្រោះនឹងបានញ៉ាំអាហារឆ្ងាញ់ៗរាល់ថ្ងៃ» ។ ពលរដ្ឋថៃម្នាក់ទៀតថា ៖ «គួរឱ្យចង់ញ៉ាំណាស់ សាលាបានយកចិត្តទុកដាក់ជាមួយកូនសិស្សបានល្អ» ។ ពលរដ្ឋថៃម្នាក់ទៀតថា ៖ «បើបានអាហារបែបនេះនៅគ្រប់សាលារៀន គឺជាការប្រសើរណាស់ ព្រោះមានអាហារូបត្ថម្ភច្រើន» ។ ពលរដ្ឋថៃម្នាក់ទៀតថា ៖ «សាលារៀនរបស់យើងគួរឱ្យចង់រៀន សាលាល្អបែបនេះ ពិតមានប្រាកដមែន» ៕ ប្រភព ៖ 3plus News

បរទេស៖ យោងតាមទីភ្នាក់ងារសារព័ត៌មានកណ្តាលរបស់កូរ៉េខាងជើង KCNA ដែលបានរាយការណ៍នៅថ្ងៃទី ២៧ ខែកញ្ញាថា រដ្ឋសភាកូរ៉េខាងជើងបានយល់ព្រមធ្វើវិសោធនកម្មរដ្ឋធម្មនុញ្ញ រួមទាំងគោលនយោបាយកសាងកម្លាំងនុយក្លេអ៊ែររបស់ប្រទេស។

មេដឹកនាំកូរ៉េខាងជើង លោក គីម ជុងអ៊ុន បាននិយាយក្នុងកិច្ចប្រជុំសភាថា គោលនយោបាយកសាងកងកម្លាំងនុយក្លេអ៊ែរបានក្លាយជាផ្នែកថេរនៃច្បាប់មូលដ្ឋានរបស់ប្រទេស។ លោក គីម ជុងអ៊ុន ក៏បានអំពាវនាវឱ្យបង្កើនល្បឿននៃការធ្វើទំនើបកម្មអាវុធនុយក្លេអ៊ែរ ដើម្បីរក្សាអត្ថប្រយោជន៍រារាំងជាយុទ្ធសាស្ត្រ ក៏ដូចជាស្នើឱ្យមន្ត្រីពង្រឹងសាមគ្គីភាពជាមួយបណ្តាប្រទេសដែលប្រឆាំងសហរដ្ឋអាមេរិក និងយុទ្ធសាស្ត្រអនុត្តរភាពលោកខាងលិច។ មេដឹកនាំកូរ៉េខាងជើង ក៏បានរិះគន់លើសម្ព័ន្ធភាពត្រីភាគីរវាងសហរដ្ឋអាមេរិក ជប៉ុន និងកូរ៉េខាងត្បូងថាជា “កំណែទម្រង់អាស៊ីរបស់ណាតូ”។

ការប្រកាសនេះត្រូវបានធ្វើឡើងមួយថ្ងៃបន្ទាប់ពីកូរ៉េខាងត្បូងធ្វើព្យុហយាត្រាយោធាដ៏ធំបំផុតរបស់ខ្លួនក្នុងរយៈពេល ១០ ឆ្នាំកាលពីថ្ងៃទី ២៦ ខែកញ្ញា។ យោងតាមប្រធានាធិបតីកូរ៉េខាងត្បូងលោក Yoon Suk-yeol បាននិយាយថា “កូរ៉េខាងជើងត្រូវតែដឹងយ៉ាងច្បាស់ថាអាវុធនុយក្លេអ៊ែរនឹងមិនអាចធានាសន្តិសុខរបស់ពួកគេបានទេ ដូច្នេះកូរ៉េខាងជើងនឹងលែងមាន ប្រសិនបើប្រទេសនេះប្រើប្រាស់អាវុធនុយក្លេអ៊ែរ។
ទោះជាយ៉ាងណាក៏ដោយ ថ្មីៗនេះកូរ៉េខាងជើងបានអនុម័តច្បាប់ដែលអនុញ្ញាតឱ្យមានការវាយប្រហារនុយក្លេអ៊ែរជាមុន “ដោយស្វ័យប្រវត្តិ និងភ្លាមៗ” ដើម្បីបំផ្លាញកងកម្លាំងអរិភាព នៅពេលដែលប្រទេសមួយផ្សេងទៀតបង្កើតការគំរាមកំហែងយ៉ាងធ្ងន់ធ្ងរដល់ទីក្រុងព្យុងយ៉ាង។

បច្ចុប្បន្ន កូរ៉េខាងជើងបានធ្វើការសាកល្បងនុយក្លេអ៊ែរចំនួនប្រាំមួយ ដែលជាឧបករណ៍ថ្មីៗបំផុត នឹងដាក់ឱ្យដំណើរការនូវប្រភេទមីស៊ីលផ្លោងអន្តរទ្វីប (ICBMs) ជាច្រើនប្រភេទ ដែលមានសមត្ថភាពផ្ទុកក្បាលគ្រាប់នុយក្លេអ៊ែរ ក្នុងនោះមីស៊ីល Hwasong-១៧ មានរយៈចម្ងាយប៉ាន់ស្មានរហូតដល់ ១៥,០០០ គីឡូម៉ែត្រ មានកម្លាំងបំផ្លិចបំផ្លាញប្រហែល ១០០ គីឡូតោន ប្រហែលប្រាំដងនៃគ្រាប់បែកបរមាណូដែលអាមេរិកបានទម្លាក់លើទីក្រុងណាហ្គាសាគីរបស់ប្រទេសជប៉ុនក្នុងឆ្នាំ ១៩៤៥។

ប្រធានអគ្គសេនាធិការចម្រុះអាមេរិក លោក Mark Milley បាននិយាយថា ទីក្រុងព្យុងយ៉ាងមានសមត្ថភាពនុយក្លេអ៊ែរ ក្នុងការគំរាមកំហែងពិតប្រាកដ ដល់ដីគោករបស់សហរដ្ឋអាមេរិក ក៏ដូចជាសម្ព័ន្ធមិត្ត និងដៃគូរបស់ទីក្រុងវ៉ាស៊ីនតោន នៅទូទាំងមហាសមុទ្រឥណ្ឌា និងប៉ាស៊ីហ្វិក៕
ប្រភព៖vnexpress

ប្រទេសជប៉ុន ៖ លោក ហ៊ិរូខាសិ ម៉ាត់សឹណុ ប្រមុខខុទ្ទកាល័យប្រទេសជប៉ុន លើកឡើងថា ៖ «នៅថ្ងៃអនាគត យើងនឹងផ្តល់ទិន្នន័យច្បាស់លាស់បំផុតទៅគ្រប់ផ្នែក និងក្នុងឱកាសផ្សេងៗ ។ យើងសូមសំណូមពរឱ្យប្រទេសរុស្ស៊ីសម្រេចចិត្តផ្អែកតាមមូលដ្ឋានវិទ្យាសាស្ត្រ» ។ នេះគឺជាសេចក្តីថ្លែងការណ៍ពីមន្ត្រីប្រទេសជប៉ុន ក្រោយពីជប៉ុនបារម្ភថា ប្រទេសរុស្ស៊ីអាចហាមឃាត់ការនាំចូលអាហារសមុទ្រជប៉ុន តាមប្រទេសចិនដែរ ។

កាលពីខែសីហា ឆ្នាំ២០២៣ ប្រទេសជប៉ុនបានបង្ហូរទឹកកខ្វក់មានលាយសារធាតុវិទ្យុសកម្មចូលក្នុងមហាសមុទ្រ ដែលធ្វើឱ្យមានមតិរិះគន់ជាច្រើន ក្នុងនោះប្រទេសចិនក៏បានរិះគន់ជប៉ុនផងដែរ ។ ប្រទេសចិនបានប្រកាសហាមនាំចូលអាហារសមុទ្រគ្រប់ប្រភេទពីជប៉ុន ដោយសារបារម្ភពីផលប៉ះពាល់សុខភាពអ្នកបរិភោគអាហារទាំងនេះ ។

ចំណែកផ្នែកត្រួតពិនិត្យសុវត្ថិភាពម្ហូបអាហាររបស់រុស្ស៊ី បានបញ្ជាក់កាលពីថ្ងៃទី២៦ ខែកញ្ញា ថា រុស្ស៊ីបានពិភាក្សាជាមួយចិន អំពីការនាំចេញអាហារសមុទ្ររបស់ជប៉ុន ។ លើសពីនេះ រុស្ស៊ីបានផ្ញើលិខិតទៅឱ្យជប៉ុនដើម្បីពិភាក្សាគ្នា និងស្នើសុំទិន្នន័យពាក់ព័ន្ធនឹងការត្រួតពិនិត្យសារធាតុវិទ្យុសកម្មទៅលើត្រីនាំចេញ នៅត្រឹមថ្ងៃទី១៦ ខែតុលា ឆ្នាំ២០២៣ ។

ប្រទេសជប៉ុនបញ្ជាក់ថា ទឹកបង្ហូរចេញពីរោងចក្រថាមពលនុយក្លេអ៊ែរហ្វូគូស៊ីម៉ា គឺវាមានសុវត្ថិភាព ពីព្រោះបានឆ្លងកាត់ការចម្រោះរួចរាល់ហើយ មុននឹងបង្ហូរចូលក្នុងទឹកសមុទ្រ ។ នៅឆ្នាំ២០២៣នេះ រុស្ស៊ីបាននាំចូលអាហារសមុទ្រពីជប៉ុន ចំនួន១១៨តោន ។

វិធានការហាមនាំចូលអាហារសមុទ្រជប៉ុនរបស់ចិន បានធ្វើឱ្យប៉ះពាល់ដល់ឧស្សាហកម្មនេសាទជប៉ុន ដោយជប៉ុនបាននាំចេញអាហារសមុទ្រទៅចិនធ្លាក់ចុះ៤១,២% នៅខែសីហា ឆ្នាំ២០២២ ។ រដ្ឋាភិបាលជប៉ុនបានផ្តល់ប្រាក់ឧបត្ថម្ភដល់ឧស្សាហកម្មនេសាទនៅក្នុងប្រទេសរបស់ខ្លួន ចំនួន១សែន៧ពាន់លានយេន ៕ ប្រភព ៖ TNN World

ប្រទេសថៃ ៖ រដ្ឋាភិបាលថៃបានចេញវិធានការលើកលែងទិដ្ឋាការឱ្យភ្ញៀវទេសចរចិន និងកាហ្សាក់ស្ថានមកកម្សាន្តនៅប្រទេសថៃរយៈពេល៥ខែ ហើយរដ្ឋាភិបាលថៃកំណត់គោលដៅថា ភ្ញៀវទេសចរចិននឹងមកប្រទេសថៃ ចំនួន២លាន៨សែននាក់ និងបង្កើតប្រាក់ចំណូលចូលប្រទេសថៃរាប់លានបាតក្នុងរយៈពេល៥ខែ ។ ប៉ុន្តែវិធានការនេះអាចមិនជួយជំរុញសេដ្ឋកិច្ច និងវិស័យទេសចរណ៍តាមការរំពឹងទុករបស់ថៃទេ ។ តើវាបណ្តាលមកពីមូលហេតុអ្វីខ្លះ ?

មូលហេតុទី១ ៖ សេដ្ឋកិច្ចចិនមិនបានរីកចម្រើនដូចកាលពីមុនទេ ព្រោះក្នុងរយៈពេល៦ខែកន្លងមក អត្រាការលូតលាស់សេដ្ឋកិច្ចចិនបានធ្លាក់ចុះ ។ ចាប់ពីឆ្នាំ១៩៨៩ រហូតមក សេដ្ឋកិច្ចចិនបានលូតលាស់៩% ក្នុង១ឆ្នាំ ប៉ុន្តែនៅឆ្នាំ២០២៣ នេះ គេសង្ឃឹមថា សេដ្ឋកិច្ចចិននឹងលូតលាស់បានត្រឹមតែ៤,៥% ប៉ុណ្ណោះ ។

ចំណែកការនាំចេញបានធ្លាក់ចុះ១៤,៥% កាលពីខែកក្កដា ឆ្នាំ២០២២ បើធៀបនឹងរយៈពេលដូចគ្នានៅឆ្នាំ២០២១ ។ ក្រៅពីនេះ អត្រាគ្មានការងារធ្វើសម្រាប់យុវជនចិនជំនាន់ថ្មី នៅតែកើនឡើងខ្ពស់ ។ នៅខែកក្កដា ឆ្នាំ២០២៣ ពលរដ្ឋចិនម្នាក់ក្នុងចំណោម៥នាក់ ដែលមានអាយុចាប់ពី១៦ឆ្នាំ ដល់២៤ឆ្នាំ គឺគ្មានការងារធ្វើ រហូតដល់រដ្ឋាភិបាលចិនបញ្ឈប់ការផ្សព្វផ្សាយតួលេខគ្មានការងារធ្វើរបស់ពលរដ្ឋ ។

លើសពីនេះ ប្រទេសចិនបានជួបបញ្ហាតម្លៃប្រាក់យាន់ធ្លាក់ថ្លៃ គឺនៅឆ្នាំ២០២៣ ប្រាក់យាន់បានធ្លាក់ថ្លៃជាមធ្យម៥% បើធៀបនឹងប្រាក់ដុល្លារអាមេរិក ខណៈកាលពីខែសីហា ឆ្នាំ២០២៣ ប្រាក់យាន់បានធ្លាក់ថ្លៃបំផុតក្នុងរយៈពេល១៦ឆ្នាំ គឺស្មើ៧.៣២យាន់ក្នុង១ដុល្លារអាមេរិក ។ ចុងក្រោយ ផ្នែកអចលនទ្រព្យចិនក៏ជួបនឹងវិបត្តិផងដែរ ទើបប៉ះពាល់ដល់ពលរដ្ឋចិនជាច្រើននាក់ ។ ដូច្នេះ ស្ថានភាពសេដ្ឋកិច្ចចិនបែបនេះ ទើបធ្វើឱ្យពលរដ្ឋចិនចំណាយតិចជាងមុន ។

មូលហេតុទី២ ៖ បើទោះជាពលរដ្ឋចិនធ្វើដំណើរកម្សាន្តកាន់តែច្រើន ក្រោយពីរដ្ឋាភិបាលលុបចោលគោលនយោបាយកូវីដស្មើសូន្យ ប៉ុន្តែពលរដ្ឋចិនបានជ្រើសរើសដើរលេងក្នុងប្រទេស ឬនៅតំបន់ជិតៗ ដូចជា ម៉ាកាវ និងហុងកុង ច្រើនជាងទៅកម្សាន្តនៅក្រៅប្រទេសឆ្ងាយៗ ព្រោះវាចំណាយប្រាក់តិចជាង ។ នេះហើយជាមូលហេតុធ្វើឱ្យពលរដ្ឋចិនមកលេងប្រទេសនៅតំបន់អាស៊ាន រហូតដល់ពាក់កណ្តាលឆ្នាំ២០២៣ គឺមានចំនួនតិចជាងមុនពេលជំងឺកូវីដរាតត្បាត រហូតដល់៦០% ។

លើសពីនេះ ជើងហោះហើរចេញពីប្រទេសចិន មានចំនួនមិនច្រើនទេ ក្នុងរយៈពេល៤ខែដំបូងនៃឆ្នាំ២០២៣ បន្ទាប់ពីចិនបើកប្រទេស ។ ជើងហោះហើរចេញពីប្រទេសចិន មានត្រឹមតែ១ ក្នុងចំណោម៣ នៅមុនពេលជំងឺកូវីដឆ្លងរាតត្បាត ជាពិសេស ជើងហោះហើរមកតំបន់អាស៊ាន នៅខែមិថុនា ឆ្នាំ២០២៣ គឺតិចជាងមុនពេលជំងឺកូវីដឆ្លងរាតត្បាត រហូតដល់៥៧% ។

មូលហេតុធ្វើឱ្យជើងហោះហើរចាកចេញពីប្រទេសចិនមានចំនួនតិច គឺមួយផ្នែកដោយសារក្រុមហ៊ុនអាកាសចរណ៍ធំៗរបស់ចិនចំនួន៣ ប្រឈមនឹងបញ្ហាតម្លៃប្រេងឥន្ធនៈកើនឡើង និងប្រាក់យាន់ធ្លាក់ថ្លៃ ។ នេះជាស្ថានការណ៍ទាំងអស់ដែលកើតឡើងនៅប្រទេសចិន ហើយត្រូវតាមដានបន្តថា តើវិធានការលើកលែងទិដ្ឋាការដើម្បីទាក់ទាញភ្ញៀវទេសចរចិនមកកម្សាន្តនៅប្រទេសថៃ អាចសម្រេចតាមគោលដៅរបស់រដ្ឋាភិបាលថៃដែរឬទេ ? ប្រភព ៖ BBC Thai

បរទេស៖ យោងតាមទីភ្នាក់ងារព័ត៌មាន Reuters ដែលបានរាយការណ៍កាលពីថ្ងៃទី ២៦ ខែកញ្ញាថា ប្រទេសឥណ្ឌានឹងទម្លាក់តម្លៃអង្ករសម្រាប់ការនាំចេញទៅក្រៅប្រទេសក្នុងរយៈពេលប៉ុន្មានថ្ងៃខាងមុខនេះ។
យោងតាមប្រភពដដែល បានឱ្យដឹងទៀតថា តម្លៃអង្ករបាម៉ាទី (ប្រភេទអង្ករពេញនិយមនៅអាស៊ីខាងត្បូង) នឹងធ្លាក់ចុះមកត្រឹម ៨៥០ ដុល្លារក្នុងមួយតោន បើធៀបនឹងពីមុនគឺ ១២០០ ដុល្លារក្នុងមួយតោន។ ការបញ្ចុះតម្លៃនេះ គឺដើម្បីជួយសម្រួលដល់ម្ចាស់រោងម៉ាស៊ីនកិនស្រូវ និងអាជីវករលក់អង្ករនៅក្រៅប្រទេស។

គួររំលឹកដែរថា កាលពីខែមុន ប្រទេសឥណ្ឌាបានផ្អាកការនាំចេញអង្ករទៅក្រៅប្រទេស គឺដើម្បីទប់ស្កាត់ការរត់ពន្ធអង្ករ នឹងធានាសន្តិសុខស្បៀង ការពារទីផ្សារក្នុងស្រុកពីការប្រែប្រួលតម្លៃ ក៏ដូចជាការពារទឹកជំនន់ និងគ្រោះរាំងស្ងួតដោយសារ El Nino ផងដែរ។ ក្នុងរយៈពេលមួយខែកន្លងមកនេះ ប្រទេសនេះបានហាមឃាត់ ឬដាក់កម្រិតលើការនាំចេញអង្ករគ្រប់ប្រភេទដែលធ្វើឱ្យតម្លៃអង្ករនៅអាស៊ីក្នុងខែសីហាឡើងដល់កម្រិតខ្ពស់បំផុតក្នុងរយៈពេល ១៥ ឆ្នាំ។

ប៉ុន្តែទោះជាយ៉ាងក៏ដោយ ថ្មីៗនេះប្រទេសឥណ្ឌាបានធ្វើចលនាជាបន្តបន្ទាប់ទាក់ទងនឹងទីផ្សារអង្ករ ដោយមានការអនុញ្ញាតឱ្យនាំចេញអង្ករទៅក្រៅប្រទេសវិញហើយ ព្រោះដើម្បីគាំទ្រដល់កសិករដែលបាត់បង់ប្រាក់ដោយសារតែការនាំចេញអង្ករថយចុះ។

ដូច្នេះហើយ បច្ចុប្បន្នឥណ្ឌាគឺជាប្រទេសនាំចេញអង្ករធំជាងគេរបស់ពិភពលោកដោយមានចំណែកទីផ្សារ ៤០%។ ជារៀងរាល់ឆ្នាំ ឥណ្ឌាបាននាំចេញអង្ករបាម៉ាទីប្រហែល ៤ លានតោនទៅកាន់ប្រទេសមួយចំនួនដូចជា អ៊ីរ៉ង់ អ៊ីរ៉ាក់ យេម៉ែន អារ៉ាប៊ីសាអូឌីត អារ៉ាប់រួម និងសហរដ្ឋអាមេរិក៕
ប្រភព៖vnexpress

ប្រទេសថៃ ៖ កាលពីថ្ងៃទី២៧ ខែកញ្ញា ឆ្នាំ២០២៣ សារព័ត៌មានថៃចុះផ្សាយថា លោក សេដ្ឋា ថាវីស៊ិន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ នឹងធ្វើដំណើរមកកាន់ប្រទេសកម្ពុជាជាផ្លូវការ នៅថ្ងៃទី២៨ ខែកញ្ញា ឆ្នាំ២០២៣ ។ កម្ពុជា គឺជាប្រទេសដំបូងគេក្នុងតំបន់អាស៊ាន ដែលនាយករដ្ឋមន្ត្រីថៃធ្វើដំណើរមកទស្សនកិច្ចដើម្បីណែនាំខ្លួនជាផ្លូវការ ក្រោយពីលោកឡើងកាន់តំណែងជានាយករដ្ឋមន្ត្រី ទី៣០ របស់ប្រទេសថៃ ។

នៅវេលាម៉ោង៩និង១០នាទីព្រឹក លោកនាយករដ្ឋមន្ត្រីថៃ ព្រមទាំងមន្ត្រីនានានឹងធ្វើដំណើរចេញពីអាកាសយានដ្ឋានកងទ័ព២ ដនមឿង ទីក្រុងបាងកក ដោយជិះយន្តហោះពិសេសរបស់កងទ័ពអាកាស Airbus 340-500 ទៅកាន់អាកាសយានដ្ឋានអន្តរជាតិភ្នំពេញ ។

នៅពេលមកដល់ប្រទេសកម្ពុជា លោកនាយករដ្ឋមន្ត្រីថៃនឹងចូលរួមក្នុងពិធីទទួលស្វាគមន៍ជាផ្លូវការនៅវិមានសន្តិភាព (Peace Palace) នៃទីស្តីការនាយករដ្ឋមន្ត្រីកម្ពុជា និងពិភាក្សាទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ ក្រោយពីបញ្ចប់កិច្ចពិភាក្សាទ្វេភាគី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងធ្វើជាម្ចាស់ផ្ទះរៀបចំពិធីជប់លៀងអាហារថ្ងៃត្រង់ ដើម្បីផ្តល់កិត្តិយសដល់លោកនាយករដ្ឋមន្ត្រីថៃ ។

នៅវេលារសៀល លោកនាយករដ្ឋមន្ត្រីថៃនឹងធ្វើដំណើរទៅដាក់កម្រងផ្កានៅវិមានឯករាជ្យ ព្រមទាំងថ្វាយបង្គំព្រះបរមរតនកោដ្ឋ ព្រះបាទសម្តេចនរោត្តម សីហនុ ជាអតីតព្រះមហាក្សត្រកម្ពុជា ។ បន្ទាប់មក លោកនាយករដ្ឋមន្ត្រីថៃនឹងចូលជួបសម្តែងការគួរសមជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា ព្រមទាំងចូលជួបសម្តែងការគួរសមជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជាផងដែរ ។

នៅពេលល្ងាច លោកនាយករដ្ឋមន្ត្រីថៃនឹងចូលជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន និងចូលរួមទទួលទានអាហារពេលព្រលប់ជុំគ្នាជាផ្លូវការ ។ ក្រោយពីបញ្ចប់ភារកិច្ច លោកនាយករដ្ឋមន្ត្រីថៃ ព្រមទាំងមន្ត្រីនានានឹងធ្វើដំណើរចាកចេញពីអាកាសយានដ្ឋានអន្តរជាតិភ្នំពេញ ហើយនឹងមកដល់ប្រទេសថៃវិញ នៅវេលាម៉ោង៨និង២០នាទីយប់ ថ្ងៃទី២៨ ខែកញ្ញា ឆ្នាំ២០២៣ ៕ ប្រភព ៖ Tna

អាមេរិក៖ យោងតាមលេខាធិការថាមពល Jennifer Granholm កាលពីថ្ងៃទី ២៥ ខែកញ្ញា បានឱ្យដឹងថា រដ្ឋាភិបាលសហរដ្ឋអាមេរិកគ្រោងនឹងសាងសង់រោងចក្រកម្ដៅនុយក្លេអ៊ែរពាណិជ្ជកម្មក្នុងរយៈពេល ១០ ឆ្នាំខាងមុខ ក្នុងកិច្ចខិតខំប្រឹងប្រែងដើម្បីផ្លាស់ប្តូរទៅជាថាមពលស្អាត។ រោងចក្រថាមពលថ្មីដែលគេគ្រោងនឹងសាងសង់មានឈ្មោះថា Fusion។ រោងចក្រ Fusion សន្យាថានឹងផលិតថាមពលចម្រុះច្រើនជាងរោងចក្រនុយក្លេអ៊ែរដោយមិនបង្កើតកាកសំណល់វិទ្យុសកម្ម។

ថាមពលចម្រុះរបស់រោងចក្រ Fusion គឺជាដំណើរការដោយការលាយអាតូមអ៊ីដ្រូសែនដើម្បីបង្កើតអេលីយ៉ូម បញ្ចេញថាមពល និងកំដៅយ៉ាងច្រើននៅក្នុងដំណើរការ។ មិនដូចប្រតិកម្មនុយក្លេអ៊ែរមួយចំនួនទៀតទេ ប្រតិកម្មលាយបញ្ចូលគ្នាមិនបង្កើតកាកសំណល់វិទ្យុសកម្មទេ។ ដូច្នេះ អ្នកគាំទ្របច្ចេកវិទ្យានេះសង្ឃឹមថាវាអាចជំនួសឥន្ធនៈហ្វូស៊ីល និងប្រភពថាមពលប្រពៃណីជាច្រើននាពេលអនាគត។ យោងតាមក្រុមអ្នកស្រាវជ្រាវនៅមន្ទីរពិសោធន៍ជាតិ Lawrence Livermore ក្នុងរដ្ឋកាលីហ្វ័រញ៉ា បានទទួលជោគជ័យនូវប្រតិកម្មលាយឡំជាលើកដំបូងកាលពីខែធ្នូឆ្នាំមុន បន្ទាប់ពីការងារជាច្រើនទសវត្សរ៍។ នៅក្នុងខែសីហាឆ្នាំនេះ ពួកគេក៏បានធ្វើប្រតិកម្មម្តងទៀត ហើយសម្រេចបាននូវអតិរេកថាមពលខ្ពស់ជាងមុន។

លោកសាស្ត្រាចារ្យ Dennis Whyte នាយកមជ្ឈមណ្ឌលសម្រាប់ Fusion and Plasma Science នៅវិទ្យាស្ថាន Massachusetts Institute of Technology បាននិយាយថា សហរដ្ឋអាមេរិកកំពុងប្រើវិធីសាស្រ្តដ៏ឆ្លាតវៃមួយចំពោះថាមពលលាយបញ្ចូលគ្នា ដោយជំរុញការស្រាវជ្រាវ និងការរចនានៅក្រុមហ៊ុនជាច្រើន ដើម្បីអនុវត្តគម្រោងសាកល្បងនេះក្នុងរយៈពេលមួយទសវត្សរ៍ខាងមុខ។

ថាមពលចម្រុះ គឺជាផ្នែកមួយដ៏សំខាន់នៃគោលដៅរបស់រដ្ឋាភិបាលសហរដ្ឋអាមេរិក ដែលរួមមានការធ្វើឱ្យកាបូនអព្យាក្រឹតក្នុងវិស័យថាមពលនៅឆ្នាំ ២០៣៥ និងទូទាំងសេដ្ឋកិច្ចនៅឆ្នាំ ២០៥០។ បច្ចុប្បន្ននេះ ប្រេងឥន្ធនៈភាគច្រើនត្រូវបានប្រើប្រាស់និងរក្សាទុកក្នុងរ៉េអាក់ទ័រនុយក្លេអ៊ែរនៅទូទាំងសហរដ្ឋអាមេរិក។ ដូច្នេះ ឥន្ធនៈនុយក្លេអ៊ែរអាចត្រូវបានកែច្នៃឡើងវិញដើម្បីបង្កើតជាឥន្ធនៈថ្មីសម្រាប់ពេលខាងមុខ៕
ប្រភព៖vnexpress

កាលពីថ្ងៃចន្ទ ទី២៦ ខែកញ្ញ ឆ្នាំ២០២៣ កន្លងទៅ តុលាការវៀតណាម បានធ្វើការកាត់ទោសមនុស្ស ១១នាក់នៅខេត្ត Dong Nai ភាគខាងត្បូងប្រទេសវៀតណាម ឱ្យជាប់ពន្ធនាគារ ពីបទជួយដូរមនុស្សខុសច្បាប់មកកម្ពុជា។

នៅក្នុងចំណោម១១នាក់នោះ មានម្នាក់ជាមេខ្លោងឈ្មោះ Vuong Van Thanh អាយុ ៣៦ឆ្នាំ ត្រូវបានតុលាការកាត់ទោសឱ្យជាប់ពន្ធនាគាររយៈពេល ១២ឆ្នាំកន្លះ ខណៈ១០នាក់ទៀតជាអ្នកសមគំនិតត្រូវជាប់ទោសពី៣ឆ្នាំកន្លះ ទៅ៨ឆ្នាំ។
នៅក្នុងការជួយដូរមនុស្សនេះ លោក Vuong Van Thanh បានបង្ហោះសារតាមបណ្តាញសង្គមជ្រើសពលករ មកធ្វើការនៅកម្ពុជា ដោយសន្យាថានឹងបានប្រាក់ខែខ្ពស់រាប់ពាន់ដុល្លារ។
ពេលមកដល់កម្ពុជា ពលករទាំងនោះត្រូវបានជនជាតិវៀតណាម បញ្ជូនមកឱ្យជនជាតិចិនគ្រប់គ្រង ហើយវាយធ្វើបាន ឬបង្ខំឱ្យធ្វើសកម្មភាពផ្សេងៗជាដើម។

នៅក្នុងករណីពលករទាំងនោះ ចង់ត្រឡប់មកប្រទេសវៀតណាមវិញ គ្រួសាររបស់ពួកគេនឹងត្រូវបង់ថ្លៃលោះខ្លួន ដល់ក្រុមនៅក្នុងប្រទេសកម្ពុជា ចាប់ពី ២៥០០-៥០០ដុល្លារអាមេរិក ក្នុងមនុស្សម្នាក់។

តែយ៉ាងណាមិញ ក្រុមជួញដូរមនុស្សត្រូវបានអជ្ញាធរវៀតណាមចាប់ខ្លួនជាបន្ដបន្ទាប់ ដោយសារការអំពាវនាវសុំជំនួយពីជនរងគ្រោះកាលពីខែកក្កដា ឆ្នាំមុន៕

ប្រភព៖ VN EXPRESS