បរទេស៖ យោងតាមប្រភពព័ត៌មាន Sky News ដែលបានរាយការណ៍នៅថ្ងៃទី២០ ខែតុលាថា ប្រធានាធិបតីអាមេរិកលោក Joe Biden បានថ្កោលទោសក្រុម Hamas និងលោក Putin តាមរយៈកញ្ចក់ទូរទស្សន៍ ដោយនិយាយថា ពួកគេកំពុងបំផ្លាញលទ្ធិប្រជាធិបតេយ្យនៅក្នុងប្រទេសជិតខាង ហើយក៏បានប្រកាសថានឹងត្រៀមចំណាយប្រាក់ជំនួយសម្រាប់អ៊ុយក្រែន និងអ៊ីស្រាអែល។

មេដឹកនាំអាមេរិកបានថ្លែងដូច្នេះថា ក្រុមហាម៉ាស់ និងពូទីន គឺជាអ្នកគំរាមកំហែងផ្សេងៗគ្នា ដោយពួកគេសុទ្ធតែមានគោលដៅដូចគ្នាគឺបំផ្លាញលទ្ធិប្រជាធិបតេយ្យក្នុងប្រទេសជិតខាង។ លោក Biden ក៏បានបន្តទៀតថា ការរងគ្រោះដោយអយុតិ្តធម៌របស់អ៊ីស្រាអែល និងអ៊ុយក្រែន គឺជាបញ្ហាសន្តិសុខជាតិរបស់សហរដ្ឋអាមេរិក ហើយលោកនឹងសន្យាថា លោកនឹងផ្តល់ថវិការាប់ពាន់ដុល្លារ ដើម្បីជួយអ៊ីស្រាអែល និងអ៊ុយក្រែន ដែលជាជំនួយមនុស្សធម៌។

ការប្រកាសនេះបានធ្វើឡើងបន្ទាប់ពីលោក Biden បានធ្វើទស្សនកិច្ចនៅអ៊ីស្រាអែល និងបានជំរុញឱ្យមានការបើកព្រំដែន Rafah ដើម្បីអនុញ្ញាតឱ្យរថយន្តដឹកទំនិញដឹកជញ្ជូនគ្រឿងផ្គត់ផ្គង់ ដើម្បីជួយជនស៊ីវិលដែលជាប់គាំងនៅប៉ាឡេស្ទីន។ លោក Biden ក៏បានបញ្ជាក់ផងដែរថា អ៊ីស្រាអែលមិនមែនជាអ្នកនៅពីក្រោយការផ្ទុះមន្ទីរពេទ្យហ្កាហ្សានោះទេ។
ទោះជាយ៉ាងណាក៏ដោយ យោងទៅតាមការស្ទង់មតិរបស់ CNBC នាពេលបច្ចុប្បន្នបានឱ្យដឹងថា ប្រជាប្រិយភាពរបស់ Biden បានធ្លាក់ចុះយ៉ាងខ្លាំង ដោយសារបញ្ហាពីរដែលប្រជាពលរដ្ឋមិនយល់ស្របនោះ គឺនយោបាយសេដ្ឋកិច្ច និងនយោបាយការបរទេស៕

ក្រសួងពាណិជ្ជកម្មបានប្រកាសឱ្យដឹងថា តម្លៃប្រេងសាំងបានឡើងថ្លៃ៥០រៀលក្នុង១លីត្រនិងម៉ាស៊ូតរក្សាតម្លៃចាស់ដដែើក្នុងមួយលីត្របើធៀបនឹងតម្លៃចាស់។ នេះបើតាមសេចក្តីជូនដំណឹងនៅថ្ងៃទី២១ តុលា។

តម្លៃលក់រាយប្រេងសាំងធម្មតាក្នុង១លីត្រ គឺកំណត់ថ្លៃ ៤ ៣៥០រៀល និងប្រេងម៉ាស៊ូតថ្លៃ ៤ ៦៥០រៀលក្នុង១លីត្រ ដែលគ្រប់ស្ថានីយ៍ប្រេងឥន្ធនៈត្រូវអនុវត្តចាប់ពីថ្ងៃទី២១-៣១ ខែតុលា ឆ្នាំ២០២៣។

គូសបញ្ជាក់ថា តម្លៃប្រេងខាងលើនេះគឺផ្អែកទៅលើទីផ្សារអន្តរជាតិ ក្នុងនោះរាជរដ្ឋាភិបាលបានសម្រេចបញ្ចុះតម្លៃលក់រាយប្រេងឥន្ទនៈនេះចំនួន៦,៥ សេនដុល្លារ ក្នុងមួយលីត្រ ដើម្បីជួយសម្រួលដល់ជីវភាពរបស់ប្រជាពលរដ្ឋ៕

ប្រទេសថៃ ៖ នៅខែតុលា ឆ្នាំ២០២៣ ពលរដ្ឋរស់នៅខេត្តឈៀងម៉ៃ ប្រទេសថៃ បាននាំគ្នាយកមាសមកលក់នៅតាមហាងនានា ដោយសារតម្លៃមាសបានកើនឡើងខ្ពស់ជាបន្តបន្ទាប់ ។ ហាងមាសមួយចំនួនបានផ្អាកទិញមាសបណ្តោះអាសន្នដើម្បីរក្សាសាច់ប្រាក់ ក្រោយពីតម្លៃលក់ចេញបានកើនឡើងដល់៣៤.០៥០បាតក្នុង១តម្លឹង រីឯតម្លៃទិញចូលស្មើនឹង៣៣.៩៥០បាតក្នុង១តម្លឹង កាលពីថ្ងៃទី២០ ខែតុលា ឆ្នាំ២០២៣ ។

តម្លៃមាសបានកើនឡើងខ្ពស់ជាបន្តបន្ទាប់ធ្វើឱ្យបណ្តាហាងលក់មាសនៅម្តុំផ្សារ Warorot ក្នុងស្រុកមឿង ខេត្តឈៀងម៉ៃ មានសភាពអ៊ូអរ ដោយសារពលរដ្ឋជាច្រើននាក់សម្រុកយកមាសរបស់ពួកគេមកលក់ ។

លោក Chatphon Sunthornpaiboon ជាម្ចាស់ហាងលក់មាសនិយាយថា រយៈពេលពេញ១សប្តាហ៍នេះ អតិថិជនជាច្រើននាក់បានយកមាសមកលក់ ក្នុងនោះមានពលរដ្ឋធម្មតា និងអ្នករកស៊ី ។ តម្លៃមាសនៅប្រទេសថៃកើនឡើង ដោយសារបញ្ហាសង្គ្រាមនៅប្រទេសអ៊ីស្រាអែល ហើយបើសង្គ្រាមនេះកាន់តែធ្ងន់ធ្ងរបន្តទៀត លោកជឿថា តម្លៃមាសនឹងកើនឡើងរហូតដល់៣៤.៥០០បាតក្នុង១តម្លឹង ។ ដូច្នេះ នៅពេលតម្លៃមាសកើនឡើងមិនឈប់ លោកចង់ណែនាំឱ្យអ្នករកស៊ីយកមាសមកលក់យកប្រាក់ចំណេញ ព្រោះបើស្ថានការណ៍សង្គ្រាមធូរស្រាលនោះអាចធ្វើឱ្យតម្លៃមាសធ្លាក់ចុះ ។

ទោះយ៉ាងណា តម្លៃមាសបានកើនឡើងជាង១.០០០បាតក្នុងរយៈពេល១សប្តាហ៍នេះ និងធ្វើឱ្យហាងលក់មាសមួយចំនួននៅខេត្តឈៀងម៉ៃ ផ្អាកទិញចូលបណ្តោះអាសន្នសិនដើម្បីរក្សាសាច់ប្រាក់ ។ ចំណែកហាងមាសធំៗនៅតែទទួលទិញមាសតាមធម្មតា ប៉ុន្តែគេទទួលស្គាល់ថា តម្លៃមាសកើនឡើងធ្វើឱ្យបរិមាណទិញមាសធ្លាក់ចុះ ព្រោះមានតែអ្នកយកមាសមកលក់ ។

អ្នកនាង Darunee Sakuna ជាអ្នករកស៊ីប្រាប់ថា តម្លៃមាសកើនឡើងធ្វើឱ្យនាងសម្រេចចិត្តយកមាសមកលក់យកប្រាក់ចំណេញ ហើយនាងទទួលបានប្រាក់ចំណេញចំនួន១.០០០បាតក្នុង១តម្លឹង ។ នាងបានយកមាសមកលក់សរុបជាង៥០តម្លឹង ចំណែកមាសនៅសេសសល់នោះ នាងនឹងរង់ចាំមើលស្ថានការណ៍មួយរយៈទៀត ។ បើនាងអាចទទួលបានប្រាក់ចំណេញច្រើន នាងនឹងយកមាសទាំងអស់មកលក់ រួចហើយចាំទិញម្តងទៀតនៅពេលតម្លៃធ្លាក់ចុះ ៕ ប្រភព ៖ Thairath

បរទេស៖ យោងតាមគេហទំព័រ The independent ដែលបានរាយការណ៍កាលពីថ្ងៃទី ១៩ ខែតុលាថា ក្រុមអ្នកជំនាញអេហ្ស៊ីប បានរកឃើញបន្ទប់អាថ៌កំបាំងជាច្រើនដែលពោរពេញទៅដោយកំទេចកំទីខណៈពេលដែលកំពុងជីកពីរ៉ាមីត Sahure ដោយប្រើបច្ចេកវិទ្យា lidar កម្រិតខ្ពស់។
Sahure គឺជាស្តេចផារ៉ោនដែលកាន់អំណាចក្នុងកំឡុងរាជវង្សទី ៥ នៃប្រទេសអេហ្ស៊ីបបុរាណប្រហែល ២,៤០០ មុនគ.ស ដូចស្តេចផារ៉ោនដទៃទៀតដែរ។ ប្រាសាទពីរ៉ាមីតរបស់ Sahure ត្រូវបានចាត់ទុកថាជាវិមានមួយសម្រាប់ការគ្រប់គ្រងរបស់គាត់។ ពីរ៉ាមីតនេះត្រូវបានជីកកកាយជាច្រើនដងហើយក្នុងរយៈពេលប៉ុន្មានសតវត្សកន្លងមកនេះដើម្បីធ្វើការស្រាវជ្រាវ។

ក្រុមអ្នកជំនាញអេហ្ស៊ីបបាននិយាយថា ការរកឃើញបន្ទប់អាថ៌កំបាំងនៅក្នុងពីរ៉ាមីតនេះមានចំនួន ៨ ដោយគេជឿថាបន្ទប់ទាំងនោះត្រូវបានស្តេចផារ៉ោនប្រើសម្រាប់ទុករបស់មានតម្លៃជាច្រើនដូចជាមាស ពេជ្រ ក៏ដូចជាសម្រាប់ផ្ទុកវត្ថុបញ្ចុះសពរបស់មេដឹកនាំរាជវង្សនាសម័យមុនៗជាដើម។ ការរកឃើញនេះបានជួយឱ្យក្រុមស្រាវជ្រាវយល់កាន់តែច្បាស់អំពីរចនាសម្ព័ន្ធនៃប្រាសាទពីរ៉ាមីត។
ទោះជាយ៉ាងណាក៏ដោយ បច្ចុប្បន្នប្រាសាទពីរ៉ាមីតបានធ្លាក់ចូលទៅក្នុងការបំផ្លិចបំផ្លាញ ដោយសារតែបច្ចេកទេសសំណង់ដើមរបស់វា រីឯស្នូលក៏មានបំណែកថ្មកំបោរ គ្រឿងស្មូន ខ្សាច់ និងកំទេចកំទីជាច្រើនទៀត។

គួរបញ្ជាក់ដែរថា បច្ចុប្បន្នក្រុមអ្នកជំនាញកំពុងធ្វើការដើម្បីរក្សាលំនឹងរចនាសម្ព័ន្ធ ដោយជំនួសផ្នែកដែលដួលរលំជាច្រើន រួមជាមួយនឹងជញ្ជាំងរក្សា។ ពួកគេសង្ឃឹមថានឹងធ្វើឱ្យបន្ទប់ដែលរកឃើញថ្មីៗនេះស្អាត ក៏ដូចជាមានសុវត្ថិភាព ហើយអាចនឹងបើកបង្ហាញបន្ទប់បុរាណចំនួន ៨ របស់ប្រាសាទពីរ៉ាមីតជាសាធារណៈនៅពេលអនាគត៕

បាំងកក៖ គម្រោងកាបូនឌីជីថល( Digital Wallet Program) ជាគម្រោងដែលគាំទ្រដោយ លោកសេដ្ឋា ថាវីស៊ីន ក្នុងចំនួនទឹកប្រាក់ដប់ប្រាំពាន់លានដុល្លារ នៅក្នុងការជំរុញការប្រើ ប្រាស់ផលិតផលក្នុងស្រុក ទោះបីជាមានមតិលើកឡើងជាច្រើន ទាក់ទងជាមួយនឹងគោល នយោបាយនេះ។

គម្រោងនេះត្រូវបានរចនាឡើងសម្រាប់តែជនជាតិថៃតែប៉ុណ្ណោះក្រោមលក្ខខណ្ឌតែមួយគឺត្រូវតែមានអាយុចាប់ពី១៦ឆ្នាំឡើងទៅ។វាត្រូវបានធ្វើឡើងនៅក្នុងគោលបំណងដើម្បីបង្កើននូវការចំណាយរបស់អ្នកដែលរកប្រាក់ចំណូលបានទាបបំផុតខណៈវាបានជំរុញសេដ្ឋកិច្ចថៃតាមរយៈវិភាគទានប្រាក់ចំណូលនៅក្នុងសហគមន៍ទូទាំងប្រទេស។

លោកប្រាឌីត ប៊ូនខាត អាយុ៦៧ឆ្នាំជាសន្តិសុខម្នាក់នៅក្នុងទីក្រុងបាំងកកអស់រយៈពេល១៦ ឆ្នាំហើយតាំងពីគាត់បានចាកចេញពីខេត្តរ៉ាឆាបូរីដែលជាស្រុកកំណើតគាត់មកម្លេះ។ ឥឡូវនេះគាត់អាចរកបានប្រាក់ចំណូល១៥ ៩០០បាត ប្រមាណ៤៣៧ដុល្លារនៅក្នុងមួយខែ និងមានការឈប់សម្រាក៦ថ្ងៃក្នុងមួយឆ្នាំ។ តាមរយៈប្រាក់ខែដ៏ស្តួចស្តើងរបស់គាត់ ធ្វើឲ្យគាត់ សប្បាយចិត្តយ៉ាងខ្លាំងបន្ទាប់ពីបានឮថាគាត់ជាម្នាក់នៅក្នុងចំណោមប្រជាជនថៃ៥៦លាន នាក់ដែលនឹងទទួលបាន«ប្រាក់ឌីជីថល»ចំនួន១០ ០០០បាតពីរដ្ឋាភិបាលទើបឡើងកាន់អំណាចថ្មីគឺគណបក្សភឿថៃចាប់ពីខែកុម្ភៈឆ្នាំក្រោយ។

មុនដំបូង ពួកគេគិតថាការទទួលបាននូវប្រាក់ឌីជីថល ១០០០០បាត សម្រាប់អ្នកដែលរកចំណូលបានទាបដូចលោកប្រាឌីតនេះគឺជារឿងមួយដ៏ប្រសើរ។ ប៉ុន្តែផ្ទុយទៅវិញប្រសិនបើ យើងពិចារណាទៅលើសាច់ប្រាក់ដែលត្រូវបានចំណាយ ក្នុងរយៈពេលប្រាំមួយខែមាន ដូចជាថ្លៃម្ហូបអាហារ ថ្នាំពេទ្រ របស់ប្រើប្រាស់ផ្សេងៗ និងចំពោះអ្នកដែលធ្វើការឆ្ងាយពីផ្ទះ វិញគឺពិបាកនឹងរីករាយនៅក្នុងការទទួលយកនូវប្រាក់នេះណាស់។

ទោះបីជាយ៉ាងណាក៏ដោយ រដ្ឋាភិបាលថៃគ្រោងនឹងកែសម្រួលនូវគម្រោងនេះបន្ថែមទៀត ដើម្បីធានាថាប្រាក់ឌីជីថលអាចដំណើរការបាននៅក្នុងតំបន់ដាច់ស្រយាល និងទទួលបាន នូវអត្ថប្រយោជន៍នៅគ្រប់ផ្នែកទាំងអស់នៅប្រទេសថៃ។ ប៉ុន្តែមនុស្សមួយចំនួននៅតែមានការ សង្ស័យថា ទឹកប្រាក់ដប់ប្រាំពាន់លានដុល្លារនោះហាក់ដូចជាបម្រើតែផលប្រយោជន៍ពួក អ្នកមាននិងអ្នកមានមុខជំនួញធំៗ ព្រោះពួកគេអាចមានលទ្ធភាពផ្គត់ផ្គង់ទំនិញបានកាន់តែ ច្រើននិងគ្រប់គ្រងនូវបច្ចេកវិទ្យាដើម្បីសម្រួលដល់ប្រតិបត្តិការផ្សេងៗ។

ក្រុមអ្នកសិក្សាផ្នែកសេដ្ឋកិច្ចនិងអតីតមន្រ្តី ធនាគារកណ្តាលរបស់ប្រទេសថៃ ចំនួន៩៩នាក់បានចេញនូវសេចក្តីថ្លែងការមួយប្រឆាំងនឹងការអនុវត្តវិធានការនេះ។ ពួកគេ បានស្នើឲ្យរដ្ឋាភិបាលថៃលុបចោលនូវគម្រោងនេះ ដែលបានលើកឡើងពីហេតុផល នៃការចំណាយដ៏ច្រើននេះដែលជំរុញការចំណាយរយៈពេលខ្លី ដែលធ្វើកើនឡើងនៃបំណុល ជាសាធារណៈនិងប៉ះពាល់ទៅដល់ស្ថេរភាពហិរញ្ញវត្ថុរបស់ប្រទេសថៃក្នុងរយៈពេលវែង។

សេចក្តីថ្លែងការណ៍នោះបាននិយាយដែរថា «នៅទីបញ្ចប់ វាជាអ្វីដែលប្រជាជនត្រូវបង់ត្រឡប់ ទៅវិញមិនថាក្នុងរូបភាពដោយការបង្កើនតម្លៃពន្ធ ឬ បង្កើនតម្លៃទំនិញខ្ពស់នោះទេ គឺអាចហៅបានថាជាអតិផរណាដែលវាជាលទ្ធផលនៃការបញ្ជៀតចូលនៃរូបីយវត្ថុ»៕ប្រភព CAN News

សហរដ្ឋអាមេរិក៖ យោងតាមប្រភពព័ត៌មាន The Guardian ដែលបានរាយការណ៍កាលពីថ្ងៃទី ១៨ ខែតុលាថា ការបង្កាត់ពូជរបស់ម្រេចជាមួយម្ទេសបានបំបែកកំណត់ត្រាជាស្តេចម្ទេសដែលហឹរបំផុតលើពិភពលោក ជាមួយនឹងកម្រិតហឹរ ២.៦៩ លានស្កូវីលក្នុងមួយគ្រាប់ ខណៈដែលម្ទេសទូទៅមានកម្រិតហឹរនិងក្តៅត្រឹមតែ ៥ ម៉ឺនស្កូវីលក្នុងមួយគ្រាប់ប៉ុណ្ណោះ។
ពូជម្ទេសដែលហឹរបំផុតលើពិភពលោកនេះ មានឈ្មោះថា Pepper X ដោយបានបំបែកឯតទគ្គកម្មចាស់របស់ម្ទេសពូជ Carolina Reaper ក្នុងកម្រិតហឹរត្រឹមតែ ១.៦៤ លានស្កូវីល។ ដូច្នេះពានរង្វាន់ Guinness World Records បានទៅលើលោក Ed Currie ដែលគាត់គឺជាស្ថាបនិកក្រុមហ៊ុនម្ទេស Puckerbutt និងជាអ្នកបង្កាត់ពូជរបស់ស្តេចម្ទេស Pepper X។

លោក Ed Currie បាននិយាយថា គាត់ពិតជារំភើបខ្លាំងណាស់ ហើយគាត់បានដាំម្ទេសពូជ Pepper X នៅក្នុងកសិដ្ឋានរបស់គាត់អស់រយៈពេលជាង ១០ ឆ្នាំមកហើយ ដោយឆ្លងកាត់ការបង្កាត់ពូជជាមួយនឹងម្ទេសហឹរខ្លាំងផ្សេងៗទៀត រួមជាមួយម្រេច។ លោក Ed Currie ក៏បានបន្តទៀតថា ការបង្កាត់ពូជម្ទេសថ្មីនេះបានចំណាយពេលយ៉ាងយូរ និងទាមទារការអត់ធ្មត់ច្រើន ទម្រាំចេញជាពូជថ្មីដែលគេចង់បាន។ ដូច្នេះជារៀងរាល់ឆ្នាំ គាត់តែងតែព្យាយាមបង្កាត់ពូជម្ទេសជាង ១០០ ដង ដោយសង្ឃឹមថាមានពូជចំនួន ១ ឬ ២ អាចជាប់កំណត់ត្រាក្នុងរយៈពេល ១០ ឆ្នាំកន្លងមក។

គួរបញ្ជាក់ដែរថា កំណត់ត្រាម្ទេសដែលហឹរបំផុតលើពិភពលោកនេះ ផ្អែកលើពិន្ទុស្កូវីលរបស់ Pepper X ត្រូវបានគណនាដោយសាកលវិទ្យាល័យ Winthrop ក្នុងរដ្ឋ South Carolina សហរដ្ឋអាមេរិក។ ទោះជាយ៉ាងណាក៏ដោយ ម្ទេសដែលមានកម្រិតហឹរខ្លាំងបែបនេះអាចធ្វើឱ្យមនុស្សមានអារម្មណ៍ថាក្តៅក្នុងខ្លួនខ្លាំងរហូតដល់មានក្លិនមិនល្អនៅលើបបូរមាត់ អណ្តាត ក៏ដូចជារលាកមាត់ផងដែរ។ អាហារហឹរក៏បង្កឱ្យមានភាពមិនស្រួលក្នុងក្រពះពោះវៀន ឈឺក្បាល និងក្អួត ដូច្នេះអ្នកដែលធ្លាប់ជួបប្រទះនឹងផលប៉ះពាល់បែបនេះ គួរចៀសវាងការទទួលទានវា ព្រោះអាចនឹងមិនល្អចំពោះសុខភាព៕

ប្រទេសថៃ ៖ ឯកអគ្គរដ្ឋទូតអ៊ីរ៉ង់ប្រចាំប្រទេសថៃលើកឡើងថា ក្រុមហាម៉ាស់នឹងដោះលែងចំណាប់ខ្មាំង ប្រសិនបើប្រទេសអ៊ីស្រាអែលបញ្ឈប់ការវា.យប្រហា.រ និងយល់ព្រមចរចាគ្នា ។ នាពេលថ្មីៗនេះ ពួកគេបានវា.យប្រហា.រមកលើតំបន់ Gaza និងបណ្តាលឱ្យចំណាប់ខ្មាំងស្លា.ប់ចំនួន៩នាក់ ហើយមិនដឹងថា ជាជនជាតិអ្វីទេ ។

លោក Sayyid Reza Nobadti ឯកអគ្គរដ្ឋទូតអ៊ីរ៉ង់ប្រចាំប្រទេសថៃ និងលោក Somchai Wirunhaphon ប្រធានទីប្រឹក្សា Palestine Solidarity Campaign (PSC) Thailand បានថ្លែងពីការជួយសង្គ្រោះចំណាប់ខ្មាំងជនជាតិថៃថា ប្រធានាធិបតីប្រទេសអ៊ីរ៉ង់បានជជែកពិភាក្សាជាមួយមេដឹកនាំក្រុមហាម៉ាស់នៅប្រទេស Qatar ដើម្បីឱ្យក្រុមហាម៉ាស់ដោះលែងចំណាប់ខ្មាំងជនជាតិថៃ និងជនជាតិហ្វីលីពីន ។

ក្នុងការជជែកគ្នានេះ មេដឹកនាំក្រុមហាម៉ាស់បញ្ជាក់ថា នឹងដោះលែងចំណាប់ខ្មាំងជនបរទេស ប៉ុន្តែបច្ចុប្បន្ន ពួកគេមិនទាន់អាចដោះលែងបានភ្លាមៗទេ ព្រោះអ៊ីស្រាអែលនៅតែវា.យប្រហា.រមកលើតំបន់ Gaza ឥតឈប់ឈរ ។ ការវា.យប្រហា.រនេះបណ្តាលឱ្យចំណាប់ខ្មាំងស្លា.ប់ចំនួន៩នាក់ ហើយក្នុងចំនួននេះ គេមិនដឹងថា តើមានជនជាតិថៃដែរឬទេ ។ ដូច្នេះ មេដឹកនាំក្រុមហាម៉ាស់ជឿថា ចំណាប់ខ្មាំងនឹងគ្មានសុវត្ថិភាពទេ ប្រសិនបើធ្វើការផ្លាស់ទីក្នុងអំឡុងពេលនេះ ។

ចំណែកលោក Somchai Wirunhaphon ប្រធានទីប្រឹក្សា Palestine Solidarity Campaign (PSC) Thailand បានថ្លែងថា ក្រុមហាម៉ាស់បានថែទាំសុវត្ថិភាពចំណាប់ខ្មាំងបានយ៉ាងល្អ ប៉ុន្តែការវា.យប្រហា.ររបស់អ៊ីស្រាអែលធ្វើឱ្យតំបន់ Gaza រងការខូចខាត ។ ហេតុនេះ ក្រុមហាម៉ាស់ចង់អំពាវនាវឱ្យមានការចរចាគ្នាដើម្បីបញ្ឈប់អំពើហិ.ង្សា ។ បើភាគីទាំងពីរមិនព្រមចរចាគ្នាទេ វាអាចបណ្តាលឱ្យបញ្ហាជម្លោះលើកនេះរាលដាលកាន់តែខ្លាំងឡើង ៕ ប្រភព ៖ The Better New

ក្រសួងវប្បធម៌និងវិចិត្រ នាយប់ថ្ងៃទី២០ តុលា បានឱ្យដឹងថាក្រុមការងារជួសជុលព្រះវិហារវត្តល្អក់របស់អាជ្ញាធរជាតិអប្សរា បានប្រទះឃើញប្រាក់កាស(ស្លឹង)បុរាណសរុបទាំងអស់ប្រមាណ១១៦កាស ដែលគេបញ្ចុះនៅតាមជើងសសររបស់ព្រះវិហារវត្តល្អក់ ឬហៅវត្តអរញ្ញរង្សី ដែលស្ថិតនៅឃុំកណ្តែក ស្រុកប្រាសាទបាគង ខេត្តសៀមរាប កាលពីពេលថ្មីៗ។

កាសបុរាណ ដែលគេប្រទះឃើញទាំងនោះ មានបីប្រភេទ ដោយកាសនីមួយៗមានទំហំពី១៣-១៥មីលីម៉ែត្រ មានរូបសត្វ«ហង្ស» មួយបែបទៀតក៏មានរូប«ហង្ស»ដែរ តែលាយដោយអក្សរចិនអានថា«ជី»មានន័យថា«សំណាងល្អ»និងកាសម្យ៉ាងទៀតមានអក្សរថា«ព្រះតំបង» ឯផ្ទៃម្ខាងទៀតមានរូបគ្រុឌ។

បើតាមសហប្រធានសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន លោក ប្លែស គីលីយ៉ង់ បានពន្យល់ថា កាសដែលមានរូប«ហង្ស»គឺបានបោះពុម្ព ឱ្យប្រើប្រាស់នៅស្រុកខ្មែរចាប់ពីអំឡុងសតវត្សរ៍ទី១៦-១៩នៃគ្រិស្ដសករាជ ឯកាសមួយបែបទៀត មានរូប«ហង្ស»ដែរនិងមានអក្សរចិនអានថា«ជី»នោះ ភាគច្រើនបានបោះពុម្ព និងដាក់ឱ្យចរាចរនៅខេត្តបាត់ដំបងក្នុងអំឡុងសតវត្សរ៍ទី១៩។ ចំណែកកាសមួយប្រភេទទៀត មានអក្សរថា«ព្រះតំបង» ហើយផ្ទៃម្ខាងទៀតមានរូបគ្រុឌ គឺបោះពុម្ពនិងចរាចរនៅខេត្តបាត់ដំបង អំឡុងនាសតវត្សរ៍ទី១៩។

ក្រសួងបានបញ្ជាក់ទៀតថា ព្រះវិហារវត្តល្អក់ មានតម្លៃប្រវត្តិសាស្ត្រ ទាំងវិស័យសាសនា និងសិល្បៈដោយសារតែវត្តនេះមានអាយុកាលយូរលង់មកហើយ។ វត្តល្អក់ បានសាងសង់ឡើងដោយគ្រឿងបង្គុំធ្វើអំពីឈើ ដំបូលប្រក់ក្បឿង ជញ្ជាំងជុំវិញធ្វើពីឥដ្ឋបូកកំបោរបាយអរ។ សំណង់នេះ មានសសរ៤ជួរ ដោយមាន២ជួរនៅកណ្តាលជាសសរកន្លោងនិង២ជួរទៀតជាសសរជើងរាង។ បច្ចុប្បន្ន សសរឈើរបស់ព្រះវិហារ ដែលកប់ក្នុងដីជាច្រើនឆ្នាំមកហើយ កំពុងមានភាពពុកផុយខូចខាតខ្លាំង ដែលអាចបង្កគ្រោះថ្នាក់ដល់ការស្នាក់នៅរបស់ព្រះសង្ឃ ហើយវាទាមទារឱ្យក្រុមអ្នកជំនាញធ្វើការជួសជុលជាចាំបាច់៕

បរទេស៖ ក្រុមហ៊ុន Suzuki របស់ជប៉ុនគ្រោងនឹងបង្ហាញម៉ូតូស៊េរីថ្មីសម្រាប់ការចល័តទីក្រុងដ៏ងាយស្រួលនៅឯពិព័រណ៍ Japan Mobile ដែលត្រូវបានធ្វើឡើងនៅទីក្រុងតូក្យូចាប់ពីថ្ងៃទី ២៨ ខែតុលាដល់ថ្ងៃទី ៥ ខែវិច្ឆិកា។
យោងតាមគេហទំព័រ Yahoo ដែលបានរាយការណ៍កាលពីថ្ងៃទី ១៩ ខែតុលាថា ម៉ូតូស៊េរីថ្មីរបស់ក្រុមហ៊ុន Suzuki មានឈ្មោះថា MOQBA ដែលវាត្រូវបានបំពាក់ទាំងជើង និងកង់ ក៏ដូចជាផ្តល់នូវការចល័តមិនធម្មតា រីឯតួរថយន្តវិញមានកង់អគ្គិសនីតូចៗចំនួន ៤ ដែលកង់នីមួយៗភ្ជាប់ទៅនឹងជើងមនុស្សយន្ត។ ចំណែកឯស៊ុម ត្រូវបានភ្ជាប់ទៅនឹងរចនាសម្ព័ន្ធដែលមានរាងដូច boomerang ពីរដែលបង្កើតជាគ្រឹះរបស់ម៉ូតូ។

លក្ខណៈពិសេសគួរឱ្យកត់សម្គាល់របស់ MOQBA គឺវាមានសមត្ថភាពក្នុងការយកឈ្នះលើឧបសគ្គ រួមទាំងជណ្តើរ។ ទោះបីជាមិនដូចម៉ូតូបុរាណក៏ដោយ ម៉ូតូថ្មីនេះផ្តល់នូវស្ថេរភាពកាន់តែខ្លាំងនៅពេលធ្វើដំណើរលើដីមិនស្មើគ្នា។ ការរចនារបស់វាមានតម្លៃជាពិសេសនៅក្នុងបរិស្ថានទីក្រុងដែលមានឧបសគ្គជាច្រើនដូចជាគែមខ្ពស់ រន្ធ និងជណ្តើរ។ ដូច្នេះ ម៉ូតូថ្មីនេះអាចមានប្រយោជន៍សម្រាប់មនុស្សចាស់ និងអ្នកដែលពិបាកធ្វើដំណើរ។
ចំពោះការរចនាម៉ូឌុលវិញនឹងអនុញ្ញាតឱ្យមានការផ្លាស់ប្តូរផ្នែកដែលបានដំឡើងនៅលើតួ ដោយបំប្លែងពីកៅអីម៉ូតូទៅជាកៅអីរុញ រទេះរុញ ដៃមនុស្សយន្ត ឬរទេះទិញទំនិញ។ សមត្ថភាពបំប្លែងនេះ ក៏អាចប្រែក្លាយម៉ូតូទៅជាយានជំនិះចម្រុះសម្រាប់ស្ថានភាពផ្សេងៗ ចាប់ពីការដឹកជញ្ជូនផ្ទាល់ខ្លួន រហូតដល់ជួយក្រុមសង្គ្រោះក្នុងពេលមានគ្រោះមហន្តរាយនៅកន្លែងដែលមានដីស្មុគស្មាញ។

គួរបញ្ជាក់ដែរថា MOQBA ផ្តល់ជូននូវរបៀប ៣ ដើម្បីបំពេញតាមតម្រូវការផ្សេងៗគ្នា រួមទាំងកៅអី ឈរ និង stretcher ។ Seat Mode ផ្តល់នូវកន្លែងអង្គុយបែបប្រពៃណីសម្រាប់អ្នកបើកបរ ចំពោះរបៀបឈរវិញគឺសមរម្យសម្រាប់អ្នកដែលចូលចិត្តឈរនៅពេលផ្លាស់ទី ជាចុងក្រោយរបៀប Stretcher ត្រូវបានរចនាឡើងដើម្បីដឹកអ្នករបួស។ទោះជាយ៉ាងណាក៏ដោយ ខណៈពេលដែលស្ថិតក្នុងដំណាក់កាលដំបូងនៃការអភិវឌ្ឍន៍ MOQBA នឹងផ្តល់នូវទស្សនវិស័យតែមួយគត់លើការចល័តទីក្រុង ដោយវាមិនច្បាស់ទេថាតើរម៉ូតូនេះអាចដំណើរការពីគំនិតទៅការផលិតជាក់ស្តែងឬអត់ ប៉ុន្តែគំនិតនេះបើកលទ្ធភាពដ៏គួរឱ្យរំភើបសម្រាប់ដំណោះស្រាយដឹកជញ្ជូនដែលផ្តល់អាទិភាពដល់ការរួមបញ្ចូល និងភាពងាយស្រួល៕