បន្ទាប់ពីផែនការឆ្នំាំ២០២៣ នៅមិនទាន់បញ្ចេញអស់និងមានបញ្ហាកកស្ទះខ្លះផលិតកម្ម SM Entertainment កំពុងរៀបចំគម្រោងការសម្រាប់ឆ្នាំជោគជ័យមួយទៀតដោយខាងក្រុមហ៊ុនបានចេញផ្សាយផែនការសម្រាប់សិល្បកររបស់ពួកគេនៅក្នុងត្រីមាសទី១ ឆ្នាំ២០២៤ ជាមួយប្រកាសការចេញបទចម្រៀងថ្មី និងការប្រគំតន្រ្តីជាដើម។
ខាងក្រោមនេះគឺជាផែនការសម្រាប់ក្រុមហ៊ុនកម្សាន្តកូរ៉េ SM ៖
១. ចុងឆ្នាំ២០២៣
ដើម្បីសង្ខេបត្រីមាសចុងក្រោយនៃឆ្នាំ២០២៣ ការចេញថ្មីមួយចំនួននឹងរួមបញ្ចូលអាល់ប៊ុមតូចខែវិច្ឆិកា របស់ Taeyeon សមាជិក Girls’ Generation និងបទចម្រៀងទោលរបស់ Ryeowook សមាជិក Super Junior នៅក្នុងខែតែមួយ។ NCT 127 នឹងចេញចម្រៀងមួយនៅខែធ្នូ ខណៈ TVXQ នឹងបើកដំណើរការអាល់ប៊ុមពេញរបស់ពួកគេ។ លើសពីនេះ NCT 127, Taemin សមាជិក SHINee និង TVXQ នឹងមានការប្រគំតន្ត្រីនៅកូរ៉េក្នុងខែវិច្ឆិកា និងខែធ្នូ។
២. អាល់ប៊ុមសម្រាប់ឆ្នាំ២០២៤
ខណៈពេលដែលកាលបរិច្ឆេទមិនច្បាស់លាស់ផលិតកម្ម SM Entertainment មានគម្រោងសម្រាប់ពេញមួយអាល់ប៊ុមជាភាសាអង់គ្លេសទៅឱ្យក្រុមចម្រៀង aespa បន្ទាប់ពីទទួលលទ្ធផលល្អជាមួយបទ “Better Things” ក្នុងឆ្នាំ២០២៣ ដោយរំពឹងជោគជ័យសម្រាប់ចម្រៀងពេញមួយអាល់ប៊ុម។ ចំណែកឯ Suho សមាជិក EXO នឹងមានអាល់ប៊ុមតូចដូច Wendy សមាជិកRed Velvet និង Taeyong សមាជិក NCT ដែរ។ រីឯសិល្បករ Ten នឹងមានសកម្មភាពទោលម្តងទៀត។ ក្នុងនោះសមាជិក WayV នឹងមានអាល់ប៊ុមខ្នាតតូច ក្រុមថ្មីរបស់ NCT Dream និង NCT នឹងមានការទម្លាក់បទលើទីផ្សារ។ ជាមួយគ្នានេះដែរ HYO, aespa, និង RIIZE នឹងមានបទចម្រៀងភាសាកូរ៉េ ខណៈដែលក្រុមថ្មីរបស់ RIIZE និង NCT នឹងចេញបទចម្រៀងជាភាសាជប៉ុន។
៣. ការប្រគំតន្ត្រីនៅឆ្នាំ២០២៤
តាមគម្រោងរបស់ផលិតកម្ម SM បានឱ្យដឹងថាក្រុមចម្រៀង SHINee នឹងប្រគំតន្ត្រីនៅអាស៊ី។ Yesung សមាជិកក្រុម Super Junior នឹងមានកាលបរិច្ឆេទប្រគំតន្ត្រីទោលនៅប្រទេសហ្វីលីពីន និងម៉ាកាវ។ ចំណែក NCT 127 និង TVXQ នឹងធ្វើដំណើរទៅកាន់ទ្វីបអាស៊ី ខណៈ SMTOWN នឹងទៅកាន់ប្រទេសជប៉ុន ហើយ Taemin ក៏នឹងធ្វើដំណើរកម្សាន្តទោលទៅប្រទេសជប៉ុនផងដែរ៕
