ប្រទេសថៃ ៖ ទំព័រហ្វេសប៊ុករបស់រដ្ឋាភិបាលថៃបានបង្ហាញព័ត៌មានអំពីគោលនយោបាយលើកលែងទិដ្ឋាការដល់ភ្ញៀវទេសចរចិន ដើម្បីជំរុញវិស័យទេសចរណ៍ និងបង្កើនប្រាក់ចំណូលចូលប្រទេសថៃរាប់លានបាត ខណៈចំនួនភ្ញៀវទេសចរចិនដែលធ្វើដំណើរមកថៃ ត្រឹមតែ១ថ្ងៃ គឺថ្ងៃទី២៥ ខែកញ្ញា ឆ្នាំ២០២៣ ស្មើរហូតដល់១០.៩៨៨នាក់ ។ ចំណែកនៅថ្ងៃទី២៦ ខែកញ្ញា ឆ្នាំ២០២៣ ថៃទទួលបានភ្ញៀវទេសចរចិនរហូតដល់១១.១៦០នាក់ ។

តាមសេចក្តីរាយការណ៍ពីឯកអគ្គរដ្ឋទូតចិនប្រចាំប្រទេសថៃបង្ហាញថា នៅពេលរដ្ឋាភិបាលថៃប្រកាសប្រើប្រាស់គោលនយោបាយ Visa Exemption ធ្វើឱ្យភ្ញៀវទេសចរចិនពេញចិត្ត រហូតដល់មានការជជែកគ្នាច្រើនពីរឿងនេះ ។ ចំណែកចំនួនអ្នកចូលមើលគេហទំព័រដើម្បីធ្វើដំណើរកម្សាន្តនៅប្រទេសថៃ ក៏បានកើនឡើងជាបន្តបន្ទាប់ ហើយចំនួនអ្នកកក់ការធ្វើដំណើរមកថៃ នៅខែតុលា ឆ្នាំ២០២៣ ស្មើជាង៦៥ម៉ឺននាក់ ។

ចំណែកសារព័ត៌មានបរទេសក៏បានចាប់អារម្មណ៍ចុះផ្សាយព័ត៌មានការធ្វើដំណើរមកប្រទេសថៃរបស់ភ្ញៀវទេសចរចិនផងដែរ គឺពលរដ្ឋចិនចាប់អារម្មណ៍ចង់មកប្រទេសថៃយ៉ាងខ្លាំង ដោយពួកគេបានស្វែងរកកន្លែងកម្សាន្តតាមរយៈគេហទំព័រផ្សេងៗ ហើយការកក់កញ្ចប់ដំណើរកម្សាន្តកើនឡើងជិត៨០០% ។

រដ្ឋាភិបាលថៃបញ្ជាក់ថា ករណីនេះឆ្លុះបញ្ចាំងឱ្យឃើញពីភាពជោគជ័យរបស់គោលនយោបាយលើកលែងទិដ្ឋាការ ដែលជួយជំរុញដល់ទីផ្សារភ្ញៀវទេសចរចិនឱ្យក្លាយជាយន្តការសំខាន់មួយទៀតដើម្បីជំរុញសេដ្ឋកិច្ចថៃ រួមទាំងការស្តារឡើងវិញនៃការរីកចម្រើនរបស់ឧស្សាហកម្មទេសចរណ៍ថៃ ។ គេចាត់ទុកថា វាជាពេលវេលាសមស្របដើម្បីទាក់ទាញភ្ញៀវទេសចរចិនមកកម្សាន្តនៅប្រទេសថៃ ក្នុងអំឡុងពេលថ្ងៃឈប់សម្រាក Golden Week ដែលភ្ញៀវទេសចរចិននិយមធ្វើដំណើរកម្សាន្តជាបន្តបន្ទាប់ រហូតដល់ពេលឆ្លងឆ្នាំ ។

អាជ្ញាធរទេសចរណ៍ប្រទេសថៃព្យាករណ៍ថា គោលនយោបាយ Visa Exemption នេះ នឹងជួយជំរុញទីផ្សារភ្ញៀវទេសចរចិនឱ្យធ្វើដំណើរមកប្រទេសថៃ ប្រមាណជាង៤លាននាក់នៅឆ្នាំ២០២៣ ។ លើសពីនេះ ក្នុងរយៈពេល៥ខែ ដែលប្រទេសថៃចេញគោលនយោបាយលើកលែងទិដ្ឋាការដល់ភ្ញៀវទេសចរចិន និងកាហ្សាក់ស្ថាន នឹងមានភ្ញៀវទេសចរចិនប្រមាណ២.៨៨៨.៥០០នាក់ធ្វើដំណើរមកថៃ ព្រមទាំងបង្កើតប្រាក់ចំណូលចំនួន១៤០.៣១៣លានបាត ៕ ប្រភព ៖ beartai BRIEF

បរទេស៖ មនុស្សជាង ១០០,០០០ នាក់ប្រមាណ ៨០% នៃចំនួនប្រជាជនក្នុងប្រទេសអាមេនី បានសម្រុកចាកចេញពីស្រុកកំណើតរបស់ពួកគេ បន្ទាប់ពីប្រទេស អាស៊ែបៃហ្សង់ បានកាន់កាប់តំបន់នេះ។

យោងតាមលោក Nazeli Baghdasaryan អ្នកនាំពាក្យរបស់នាយករដ្ឋមន្ត្រីអាមេនី បាននិយាយកាលពីថ្ងៃទី ៣០ ខែកញ្ញាថា មនុស្សចំនួន ១០០,៤១៧ នាក់ក្នុងចំណោមប្រជាជនសរុប ១២០,០០០ នាក់នៅតំបន់ Nagorno-Karabakh បានភៀសខ្លួនទៅបណ្តាប្រទេសជិតខាងកាលពីសប្តាហ៍មុន បន្ទាប់ពីកងទ័ព អាស៊ែបៃហ្សង់ បានចាប់ផ្តើមយុទ្ធនាការប្រឆាំងនឹងអំពើភេរវកម្ម និងបង្ខំឱ្យរដ្ឋាភិបាលអាមេនីចុះចាញ់ផ្តាច់ខ្លួនចេញពីតំបន់ Nagorno-Karabakh។ តំបន់ Nagorno-Karabakh គឺជាផ្នែកមួយនៃទឹកដីរបស់ប្រទេសអាស៊ែបៃហ្សង់ ប៉ុន្តែប្រជាជនអាមេនីភាគច្រើនបានរស់នៅក្នុងតំបន់នេះ។

កាលពីឆ្នាំ ១៩៩១ ជនជាតិអាមេនីបានចាត់ទុកតំបន់ Nagorno-Karabakh ជាទឹកដីដូនតារបស់ពួកគេ ហើយបានបង្កើតចលនាស្វ័យភាព ដែលនាំឱ្យមានជម្លោះជាមួយអាមេនី។ ដោយសារតំបន់ Nagorno-Karabakh គឺជា ចំណុចប្រទាក់ក្រឡាគ្នា រវាង អាស៊ែបៃហ្សង់ និង អាមេនី។
លោក Artak Beglaryan អតីតមន្ត្រីរដ្ឋាភិបាលរបស់ប្រទេសអាមេនី បាននិយាយថា មានមនុស្សតែពីរបីរយនាក់ប៉ុណ្ណោះដែលនៅសល់ក្នុងតំបន់នេះ ដែលភាគច្រើនជាអតីតមន្ត្រីក្នុងតំបន់ និងបុគ្គលិកភ្នាក់ងារឆ្លើយតបបន្ទាន់ រួមជាមួយអ្នកស្ម័គ្រចិត្ត និងមនុស្សដែលមានតម្រូវការពិសេស។

ដូច្នេះហើយ បន្ទាប់ពីយុទ្ធនាការយោធារបស់អាស៊ែបៃហ្សង់ រដ្ឋាភិបាលរបស់អាមេនីបានធ្វើការផ្តាច់ខ្លួនចេញពីតំបន់ Nagorno-Karabakh ដោយបានប្រកាសថាខ្លួននឹងរំសាយភ្នាក់ងារទាំងអស់ រួមទាំងបញ្ឈប់អត្ថិភាពរបស់ខ្លួនចាប់ពីថ្ងៃទី ១ ខែមករា ឆ្នាំ ២០២៤៕
ប្រភព៖vnexpress

សហរដ្ឋអាមេរិក ៖ ទីក្រុងញូវយ៉កបានប្រកាសអាសន្នពីគ្រោះទឹកជំនន់ភ្លាមៗក្រោយពីរងគ្រោះដោយសារខ្យល់ព្យុះត្រូពិច «Ophelia» ដែលបណ្តាលឱ្យមានភ្លៀងធ្លាក់ខ្លាំង និងទឹកហូរស្រដៀងនឹងទឹកជ្រោះនៅស្ថានីយរថភ្លើងក្រោមដី ។ គេចាត់ទុកថា នៅខែកញ្ញា ឆ្នាំ២០២៣ នេះ គឺជាហេតុការណ៍ភ្លៀងធ្លាក់ខ្លាំងបំផុតក្នុងរយៈពេល១៤១ឆ្នាំ ។

សារព័ត៌មានរ៉យទ័របានផ្សព្វផ្សាយវីដេអូភ្លៀងកំពុងធ្លាក់ចុះពីលើដំបូល និងជញ្ជាំង រួចហើយវាក៏ហូរធ្លាក់តាមកាំជណ្តើរ ដែលមានសភាពមិនខុសគ្នាពីទឹកជ្រោះហូរចូលមកកាន់ស្ថានីយរថភ្លើងក្រោមដីឈ្មោះ «ក្រែន អាមី ផ្លាហ្សា» នៅទីក្រុងញូវយ៉ក សហរដ្ឋអាមេរិក ។ ទឹកភ្លៀងបានបណ្តាលឱ្យកើតទឹកជំនន់នៅផ្លូវរថភ្លើងឆានសាឡា និងស្ថានីយ ខណៈស្ថានីយរថភ្លើងក្រោមដីនៅទីក្រុងញូវយ៉កជាច្រើនកន្លែងទៀត ក៏បានប្រឈមនឹងទឹកជំនន់ដូចគ្នាដែរ ។

ចំណែកនៅតំបន់ព្រូឃ្លីនមានទឹកជំនន់ខ្លាំងបំផុតក្នុងចំណោមតំបន់ផ្សេងទៀតនៅទីក្រុងញូវយ៉ក ។ គេឃើញរថយន្តជាច្រើនគ្រឿងបានលិចក្នុងទឹក ក្រោយពីភ្លៀងធ្លាក់ពាសពេញតំបន់នេះ រហូតដល់តំបន់ថាមឃ្វែរ ។ ទឹកបានលិចខ្លាំងក្នុងកម្ពស់ក្បាលជង្គង់ ហើយផ្លូវជាច្រើនបានលិចក្នុងទឹក ដែលបណ្តាលឱ្យការធ្វើចរាចរត្រូវកកស្ទះនៅតាមផ្លូវនានា ។ លើសពីនេះ ក៏មានសំរាមអណ្តែតតាមទឹកនៅពាសពេញតំបន់ព្រូឃ្លីន និងតំបន់ផ្សេងទៀតនៅក្រុងញូវយ៉ក ។

ក្រោយពីក្រុងញូវយ៉កប្រឈមនឹងភ្លៀងខ្លាំង និងទឹកជំនន់ អាជ្ញាធរបានប្រកាសអាសន្នពីឥទ្ធិពលខ្យល់ព្យុះត្រូពិចឈ្មោះ «Ophelia» ។ គេចាត់ទុកថា នៅខែកញ្ញា ឆ្នាំ២០២៣ គឺជាខែមានភ្លៀងធ្លាក់ខ្លាំងបំផុតនៅទីក្រុងញូវយ៉ក ក្នុងរយៈពេល១៤១ឆ្នាំ ។

លោកស្រី ខេធី ហូសុល អភិបាលក្រុងញូវយ៉កបានប្រកាសអាសន្នពីទឹកជំនន់ភ្លាមៗនៅទូទាំងក្រុងញូវយ៉ក រួមទាំងតំបន់ឡងអាយឡិន និងតំបន់ហាត់ស័ន វែលលី ដែលធ្វើឱ្យពលរដ្ឋញូវយ៉ក ចំនួន១៨លាននាក់រស់នៅក្រោមការដាស់តឿនពីទឹកជំនន់ និងខ្យល់ព្យុះដែលអន្តរាយដល់ជីវិត ។ អាជ្ញាធរបានណែនាំឱ្យពលរដ្ឋចៀសវាងធ្វើដំណើរតាមផ្លូវមានទឹកជំនន់ ហើយអាជ្ញាធរក៏បានដាស់តឿនពីភ្លៀងធ្លាក់បន្ថែមទៀត ក្រោយពីមានបរិមាណទឹកភ្លៀង១២៧មីលីម៉ែត្រធ្លាក់មកជាបន្តបន្ទាប់ កាលពីថ្ងៃទី២៩ ខែកញ្ញា ឆ្នាំ២០២៣ ។

មជ្ឈមណ្ឌលគ្រប់គ្រងអាកាសធាតុប្រចាំសហរដ្ឋអាមេរិកបញ្ជាក់ថា នេះជាលើកដំបូងហើយក្នុងរយៈពេល១៤១ឆ្នាំ ដែលមានបរិមាណទឹកភ្លៀងរហូតដល់៣៤៩មីលីម៉ែត្រ នៅខែកញ្ញា ឆ្នាំ២០២៣ ។ ដូច្នេះ វាជាហេតុការណ៍ភ្លៀងធ្លាក់ខ្លាំងបំផុតដែលបានកើតឡើងនៅខែកញ្ញា គិតចាប់ពីឆ្នាំ១៨៨២ ដែលមានបរិមាណភ្លៀងធ្លាក់នៅខែកញ្ញា រហូតដល់៤២៨មីលីម៉ែត្រ ៕ ប្រភព ៖ TNN World

រដ្ឋធានីណៃពិដោរ៖ ប្រទេសមីយ៉ាន់ម៉ា បានធ្លាក់ចូលទៅក្នុងវិបត្ដិយ៉ាងធ្ងន់ធ្ងរ ចាប់តាំងពីលោកឧត្ដមសេនីយ៍ មីន អ៊ោងហ្លាង (Min Aung Hlaing) បានដឹកនាំធ្វើរដ្ឋប្រហារយោធា ផ្ដួលរំរំលំរដ្ឋាភិបាលស៊ីវិល ជាប់ឆ្នោតតាមបែបលទ្ធិប្រជាធិបតេយ្យ ដឹកនាំដោយម្ចាស់ពានរង្វាន់ណូបែលសន្ដិភាព លោកស្រី អួង សានស៊ូជី (Aung San Suu Kyi) កាលពីថ្ងៃទី១ ខែកុម្ភៈ ឆ្នាំ២០២១ រហូតមក ហើយឥឡូវនេះ របបសឹកមួយនេះ កំពុងតែដើរជំរឿន ទើបធ្វើឲ្យគេសង្ស័យ អំពីសកម្មភាពរបស់រដ្ឋាភិបាលយោធា។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃទី២ ខែតុលា ថា រដ្ឋាភិបាលយោធាមីយ៉ាន់ម៉ា បានប្រកាស កាលពីថ្ងៃអាទិត្យ (ទី១ខែតុលា) ថា រដ្ឋាភិបាលក្រុងណៃពិដោរ បានចាប់ផ្តើមជំរឿន នៅក្នុងទីក្រុងចំនួន២០ នៅទូទាំងប្រទេស។ រីឯវិធានការនេះ ត្រូវបានក្រុមអ្នករិះគន់ អះអាង ថា អាជ្ញាធររបបយោធា នឹងប្រើប្រាស់ជំរឿននេះ ជាមធ្យោបាយ បង្កើនការឃ្លាំមើល ដល់ក្រុមអ្នកប្រឆាំងនឹងរបបសឹករបស់ពួកគេ។

ពួកយោធាមីយ៉ាន់ម៉ា បានធ្វើរដ្ឋប្រហារ កាលពីថ្ងៃទី១ ខែកុម្ភៈ ឆ្នាំ២០២១ ក្រោយពេលគណបក្សរបស់ពួកគេ បានចាញ់យ៉ាងអាម៉ាស នៅក្នុងការបោះឆ្នោតសកលនាឆ្នាំ២០២០ នៅក្នុងប្រទេសអាស៊ានមួយនេះ។ ពួកយោធា បានចោទប្រកាន់ ដោយមិនមានភាពច្បាស់លាស់ អំពីការលួចបន្លំសន្លឹកឆ្នោតយ៉ាងទូលំទូលាយ ទើបនាំឲ្យគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អួង សានស៊ូជី (Aung San Suu Kyi) បានឈ្នះភ្លូកទឹកភ្លូកដី។

ការធ្វើរដ្ឋប្រហារយោធានេះ បាននាំឲ្យមានការបង្ក្រាប និង សម្លាប់យ៉ាងព្រៃផ្សៃ ប្រឆាំងនឹងក្រុមបាតុករអហិង្សា។ សកម្មភាពរបស់អាជ្ញាធររបបសឹក បានរុញច្រានឲ្យប្រទេសមីយ៉ាន់ម៉ា ធ្លាក់ចូលទៅក្នុងសង្គ្រាមស៊ីវិល ហើយមានការវាយប្រយុទ្ធគ្នាស្ទើរគ្រប់រដ្ឋ ជារៀងរាល់ថ្ងៃ រវាងកងទ័ពរបស់រដ្ឋាភិបាលសឹក និង កម្លាំងប្រដាប់អាវុធចម្រុះ នៃចលនាតស៊ូ។

ក្រុមមន្រ្ដី នៃរដ្ឋាភិបាលយោធា បានបញ្ជាក់ ថា ជំរឿនជាតិ នឹងត្រូវតែបញ្ចប់ នៅមុនការបោះឆ្នោតថ្មី តាមអ្វីដែលរដ្ឋាភិបាលសឹក បានណែនាំ ថា វាអាចនឹងកើតឡើង នៅឆ្នាំ២០២៥។ ជំរឿននេះ នឹងចាប់ផ្ដើមធ្វើ ចន្លោះពីថ្ងៃទី១ ដល់ថ្ងៃទី១៥ ខែតុលា ឆ្នាំ២០២៣ នៅនៅក្នុងសង្កាត់ ចំនួន២០ ដែលបានជ្រើសរើស នៅក្នុងរដ្ឋធានីណៃពិដោរ (Naypyidaw) ហើយរដ្ឋ និង តំបន់ផ្សេងៗទៀត។

ក្រុមអ្នករិះគន់ បានអះអាង ថា របបយោធា នឹងប្រើប្រាស់ជំរឿននេះ សម្រាប់បង្កើនការឃ្លាំមើលទៅលើក្រុមអ្នកប្រឆាំងនឹងអំពើរដ្ឋប្រហាររបស់ពួកគេ រួមទាំង មន្ត្រីរាជការ វេជ្ជបណ្ឌិត និង គ្រូបង្រៀន រាប់ពាន់នាក់ ដែលមិនព្រមចូលធ្វើការវិញ ដើម្បីបង្ហាញពីការតវ៉ា ប្រឆាំងនឹងរបបសឹក នៅក្នុងប្រទេសមីយ៉ាន់ម៉ា។

ប្រទេសអាស៊ីអាគ្នេយ៍មួយនេះ បានបែកបាក់គ្នាយ៉ាងខ្លាំង ក្រោយអំពើរដ្ឋប្រហារយោធា ហើយការប្រយុទ្ធគ្នា តែងតែកើតឡើង ជារៀងរាល់ថ្ងៃ។ របបយោធា បានទទួលស្គាល់ ថា ខ្លួនមិនអាចគ្រប់គ្រងតំបន់មួយចំនួន ទាំងស្រុងឡើយ។

បើតាមរបាយការណ៍របស់អង្គការសហប្រជាជាតិ បានឲ្យដឹង ថា បច្ចុប្បន្ន ប្រជាជនមីយ៉ាន់ម៉ា ប្រហែល ជាង ១,៦លាននាក់ ក៏បានផ្លាស់ទីលំនៅ ដោយសារតែអំពើហិង្សា និង ការវាយប្រយុទ្ធគ្នា រវាងកងទ័ពរដ្ឋាភិបាល និង ក្រុមចលនាតស៊ូប្រដាប់អាវុធចម្រុះ ចាប់តាំងពីរដ្ឋប្រហារបានផ្ទុះឡើង នៅក្នុងប្រទេសនេះ។

សហរដ្ឋអាមេរិក បានអះអាង ថា ការបោះឆ្នោតណាមួយ ក្រោមរបបយោធា នឹងក្លាយជាការបោកប្រាស់ ខណៈក្រុមអ្នកវិភាគ បាននិយាយថា ការបោះឆ្នោត នឹងត្រូវបានកំណត់គោលដៅ ដោយគូប្រជែងរបស់យោធា និង បង្កឱ្យមានការបង្ហូរឈាមបន្ថែមទៀត។

ដោយឡែក ប្រទេសរុស្ស៊ី បានអះអាង ថា រដ្ឋាភិបាលក្រុងមូស្គូ គាំទ្រដល់ផែនការលោកឧត្ដមសេនីយ៍ មីន អ៊ោងហ្លាង មេដឹកនាំរដ្ឋាភិបាលយោធា សម្រាប់ការបោះឆ្នោតនេះ។ ទន្ទឹមគ្នានេះដែរ គណៈកម្មាធិការរៀបចំការបោះឆ្នោតរុស្ស៊ី ក៏បានចុះហត្ថលេខា លើអនុស្សរណៈ ស្តីពី«កិច្ចសហប្រតិបត្តិការ នៅក្នុងសកម្មភាពបោះឆ្នោត» ជាមួយមីយ៉ាន់ម៉ា កាលពីខែកញ្ញា ឆ្នាំ២០២៣។

សមាគមជំនួយការអ្នកទោសនយោបាយភូមា (AAPP) បានបញ្ចេញនូវរបាយការណ៍របស់ខ្លួន កាលពីថ្ងៃទី២៩ ខែកញ្ញា ឆ្នាំ២០២៣ ថា ចាប់តាំងពីការធ្វើរដ្ឋប្រហារយោធា នៅក្នុងប្រទេសមីយ៉ាន់ម៉ា រហូតមកដល់ពេលនេះ មានជនស៊ីវិល ចំនួន ២៤ ៨៥៨នាក់ ត្រូវបានចាប់ខ្លួន ហើយក្នុងនោះ មានចំនួន ១៩ ២៨៦នាក់ នៅបន្ដជាប់ឃុំឃាំង និង ចំនួន៥ ៥៧២នាក់ ត្រូវបានដោះលែង។ ដោយឡែក ជនរងគ្រោះ ចំនួន ៤ ១៣១នាក់ផ្សេងទៀត ត្រូវបានពួកយោធាសម្លាប់៕