ប្រទេសថៃ ៖ កាលពីថ្ងៃទី១៧ ខែតុលា ឆ្នាំ២០២៣ នៅទីក្រុងប៉េកាំង លោក Alain Lam មានតួនាទីជា Vice President នៃក្រុមហ៊ុន Xiaomi បានចូលជួបសម្តែងការគួរសមជាមួយលោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ ។ លោក Alain Lam លើកឡើងថា Xiaomi គឺជាក្រុមហ៊ុនផលិតឧបករណ៍អេឡិចត្រូនិកប្រកបដោយភាពច្នៃប្រឌិតខ្ពស់ ដែលបានបង្កើតឧស្សាហកម្មឌីជីថលចម្រុះ និងល្បីល្បាញក្នុងការផលិតទូរស័ព្ទដៃអាចដំណើរការលើកម្មវិធី ដើម្បីគ្រប់គ្រងប្រតិបត្តិការរបស់ឧបករណ៍អេឡិចត្រូនិកក្នុងប្រព័ន្ធ Android ។

ក្រុមហ៊ុន Xiaomi មានបណ្តាញ និងអាជីវកម្មនៅទូទាំងពិភពលោក ហើយក្រុមហ៊ុនបានចាប់ផ្តើមអាជីវកម្មនៅប្រទេសថៃនៅឆ្នាំ២០១៨ និងរីកចម្រើនជាបន្តបន្ទាប់ ។ ក្រុមហ៊ុនបានយកប្រទេសថៃធ្វើជាការិយាល័យកណ្តាលនៅក្នុងតំបន់ ហើយក្រុមហ៊ុនបានគាំទ្រថៃក្នុងផ្នែកផ្សេងៗដូចជា ក្នុងអំឡុងពេលផ្ទុះជំងឺកូវីដ-១៩ ឬផ្នែកអប់រំ ។ ក្រុមហ៊ុនបានបង្កើតក្រុមហ៊ុនឈ្មោះ Xiaomi Technology នៅប្រទេសថៃ ដើម្បីលក់ចែកចាយ និងផលិតទូរស័ព្ទដៃនៅថៃ រួមទាំងពង្រីកទីផ្សារនៅតំបន់អាស៊ីអាគ្នេយ៍ជាបន្តបន្ទាប់ ក្នុងនោះទីផ្សារឥណ្ឌូណេស៊ីមានទំហំធំបំផុត បន្ទាប់មក គឺថៃ ។

ចំណែកលោក សេដ្ឋា ថាវីស៊ីន នាយករដ្ឋមន្ត្រីថៃ បានថ្លែងអំណរគុណចំពោះការជឿជាក់របស់ក្រុមហ៊ុនមកលើប្រទេសថៃ ហើយលោកបញ្ជាក់ថា ថៃនឹងគាំទ្រការពង្រីកទីផ្សារ និងការវិនិយោគនៅថៃបន្ថែមទៀត ។ លោក សេដ្ឋា ថាវីស៊ីន ជឿថា ប្រទេសថៃមានគុណសម្បត្តិផ្នែកអាជីវកម្ម ដែលក្រុមហ៊ុននឹងទទួលបានផលប្រយោជន៍ច្រើនក្នុងការវិនិយោគ និងពង្រីកទីផ្សារក្នុងតំបន់ ។

លោកនាយករដ្ឋមន្ត្រីថៃក៏បានសរសើរចំពោះដំណើរការរបស់ក្រុមហ៊ុន និងស្នើឱ្យក្រុមហ៊ុនពង្រីកការវិនិយោគ និងពាណិជ្ជកម្មនៅប្រទេសថៃ ។ លើសពីនេះ លោកនាយករដ្ឋមន្ត្រីបានអរគុណចំពោះការផ្ទេរបច្ចេកវិទ្យា R&D សម្រាប់គម្រោង Land Bridge ដែលនឹងក្លាយជាឱកាសរបស់ក្រុមហ៊ុន ខណៈក្រុមហ៊ុនកំពុងស្វែងរកទីតាំងផលិត ឬរោងចក្រផលិត ដើម្បីគាំទ្រកំណើនអាជីវកម្មពាក់ព័ន្ធនឹងផ្នែកជាច្រើន រួមទាំងរថយន្តអគ្គិសនីផងដែរ ។

លោកនាយករដ្ឋមន្ត្រីថៃបានបញ្ជាក់ពីការផ្តល់ទំនុកចិត្តដើម្បីក្លាយជាមជ្ឈមណ្ឌលផលិតរថយន្តអគ្គិសនីក្នុងតំបន់ តាមរយៈកត្តាគាំទ្រ និងបរិស្ថានអំណោយផល ។ លោកនាយករដ្ឋមន្ត្រីលើកឡើងថា មានក្រុមហ៊ុនផលិតជាច្រើនមានបំណងសាងសង់រោងចក្រផលិតរថយន្តអគ្គិសនីនៅថៃ ដោយសារថៃមានប្រៀបផ្នែកភូមិសាស្ត្រ និងគម្រោង Land Bridge ដែលអាចតភ្ជាប់ការដឹកជញ្ជូនទៅកាន់តំបន់ផ្សេងៗយ៉ាងឆាប់រហ័ស និងមានប្រសិទ្ធភាព ។

ក្រុមហ៊ុនបញ្ជាក់ថា នឹងពង្រីកការផលិតគ្រឿងបន្លាស់ឧបករណ៍អេឡិចត្រូនិកផ្សេងៗនៅប្រទេសថៃសម្រាប់ផលិតផលរបស់ក្រុមហ៊ុន ហើយចែកចាយទៅកាន់ទីផ្សារពិភពលោក ។ ដូច្នេះ វានឹងជួយបង្កើនជំនាញផ្នែកផលិតដល់ពលរដ្ឋថៃ រួមទាំងការបណ្តុះបណ្តាលដើម្បីកាត់បន្ថយបញ្ហាកង្វះខាតកម្លាំងពលកម្មមានជំនាញផងដែរ ៕ ប្រភព ៖ mgronline

បរទេស៖ យោងតាមសារព័ត៌មាន New York Times បានឱ្យដឹងថា មានមនុស្ស ៣ នាក់បានស្លាប់នៅក្នុងតំបន់ញូវយ៉កដោយសារតែការឆ្លងមេរោគ Vibrio sepsis ដែលជាបាក់តេរីស៊ីសាច់មនុស្សដោយមេរោគនេះភាគច្រើនរស់នៅក្នុងទឹកសមុទ្រក្តៅ។
សាស្ត្រាចារ្យ James Oliver អ្នកជំនាញផ្នែកមីក្រូជីវសាស្រ្តនៅសាកលវិទ្យាល័យ North Carolina បាននិយាយថា ភ្នាក់ងារបង្ករោគទាំងនេះអាចចូលក្នុងខ្លួនមនុស្សបាននៅពេលដែលមានស្នាមឆ្កូត ឬស្នាមមុតរបួសថ្មីៗនៅលើដងខ្លួន ដូច្នេះប្រសិនបើឆ្លងមេរោគនេះ អ្នកអាចនឹងស្លាប់ក្នុងរយៈពេលតែមួយថ្ងៃប៉ុណ្ណោះ។

បាក់តេរី Vibrio sepsis ភាគច្រើនត្រូវបានគេរកឃើញជាចម្បងនៅជុំវិញរដ្ឋផ្លរីដា និងឈូងសមុទ្រម៉ិកស៊ិក ដែលបច្ចុប្បន្នវាកំពុងធ្វើអាណានិគមលើមហាសមុទ្រថ្មីៗទៀត។ មេរោគ Vibrio sepsis ក៏កំពុងតែកើនឡើងយ៉ាងខ្លាំងគួរឱ្យកត់សម្គាល់ផងដែរ ជាពិសេសគឺនៅក្នុងទ្វីបអឺរ៉ុប។ ដូច្នេះការជ្រមុជក្នុងទឹកសមុទ្រកាន់តែមានគ្រោះថ្នាក់ខ្លាំង ក៏ព្រោះតែចំនួនបាក់តេរីរស់នៅក្នុងទឹកសមុទ្រកើនឡើងយ៉ាងឆាប់រហ័ស ដោយសារការឡើងកំដៅផែនដី និងការប្រែប្រួលអាកាសធាតុ។ នេះបើយោងតាមឯកសាររបស់អ្នកស្រាវជ្រាវដាណឺម៉ាកដែលបានបោះពុម្ពផ្សាយនាពេលថ្មីៗនេះនៅក្នុង Emerging Infectious Diseases។

ទោះជាយ៉ាងណាក៏ដោយ យោងតាមការសិក្សាបានរកឃើញថា មនុស្សចាស់ និងបុរសពេញវ័យ ក៏ដូចជាក្មេងប្រុសច្រើនតែមានហានិភ័យខ្ពស់នៃការប៉ះពាល់នឹងមេរោគទាំងនេះ។ អ្នកស្រាវជ្រាវបានប៉ាន់ស្មានថា នេះប្រហែលជាដោយសារតែពួកគេទំនងជាទទួលរងការកោស ឬស្នាមរបួសនៅពេលចូលរួមក្នុងកីឡាដូចជាការនេសាទ ឬជិះទូកជាដើម។ បញ្ហាចម្បងគឺថាមេរោគទាំងនេះមានការឆ្លងតាមរយៈត្រចៀកច្រើនជាងការឆ្លងមុខរបួស។ ជាលទ្ធផលបង្ហាញថា ទោះបីជាមិនមានស្នាមប្រេះនៅលើដងខ្លួនក៏ដោយ ក៏វាមានហានិភ័យខ្ពស់នៃការឆ្លងមេរោគនេះបន្ទាប់ពីចូលទៅក្នុងទឹកសមុទ្រដែលមានសីតុណ្ហភាពក្តៅ៕

រដ្ឋធានីប៉េកាំង៖ ស្របពេលបណ្ដាប្រទេសបស្ចិមលោក និង សម្ពន្ធមិត្ត ក្រោមការដឹកនាំរបស់សហរដ្ឋអាមេរិក បានបង្កើតច្រករបៀងបៃតង តភ្ជាប់ពីតំបន់អាស៊ី ទៅកាន់ទ្វីបអឺរ៉ុប សម្រាប់ទប់ទល់នឹងផែនការរបស់ចិន នោះមក រដ្ឋាភិបាលក្រុងប៉េកាំង បានប្រកាសដាក់កញ្ចប់ថវិកាបន្ថែមថ្មី រហូតដល់ ១០០ពាន់លានដុល្លារ សម្រាប់មូលនិធិ«គំនិតផ្ដួចផ្ដើមខ្សែក្រវាត់ និង ផ្លូវ»។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី១៩ ខែតុលា ដោយដកស្រង់សម្ដីរបស់លោក ស៊ី ជិនពីង (Xi Jinping) ប្រធានាធិបតីចិន បានបញ្ជាក់ កាលពីថ្ងៃពុធ (ទី១៨ ខែតុលា) ថា រដ្ឋាភិបាលចិន នឹងដាក់បញ្ចូលថវិកាបន្ថែម ចំនួន ១០០ពាន់លានដុល្លារអាមេរិក ទៅក្នុងមូលនិធិរបស់ចិន «គំនិតផ្ដួចផ្ដើមខ្សែក្រវាត់ និង ផ្លូវ»។

ខ្សែក្រវាត់ និងផ្លូវ ជាសសរស្តម្ភកណ្តាល ជាការជួយជ្រោមជ្រែងអំណាចរបស់លោកប្រធានាធិបតី ស៊ី ជិនពីង ពង្រីកឥទ្ធិពលរបស់ចិន នៅក្រៅប្រទេស ស្របពេលរដ្ឋាភិបាលក្រុងប៉េកាំង កំពុងតែអះអាង ថា ឥឡូវនេះ ចិនបានចុះហត្ថលេខាលើកិច្ចសន្យា ជាង២ពាន់ពាន់លានដុល្លារអាមេរិក (over $ 2 trillion dollars) នៅជុំវិញពិភពលោក។ ចិនជាគាំទ្រសាទរ ចំពោះការនាំយកធនធាន និង កំណើនសេដ្ឋកិច្ច មកកាន់លោកខាងត្បូង ប៉ុន្តែគំនិតផ្តួចផ្តើមនេះ ក៏បានរងនូវថ្កោលទោស មកពីប្រទេសក្រីក្រ ដែលកំពុងតែជាប់បំណុលដ៏ធំសម្បើមរបស់ខ្លួន។

លោកប្រធានាធិបតី ស៊ី ជិនពីង បានប្រកាស កាលពីថ្ងៃពុធ (ទី១៨ ខែតុលា) ថា ក្រុមហ៊ុនផ្តល់ប្រាក់កម្ចីដ៏សំខាន់ដល់«ខ្សែក្រវាត់ និងផ្លូវ» រួមមាន ធនាគារអភិវឌ្ឍន៍ចិន និង ធនាគារនាំចេញ-នាំចូល ហើយឥឡូវនេះ នឹងផ្តល់ប្រាក់កម្ចីបន្ថែម ចំនួន១០០ពាន់លានដុល្លារអាមេរិក។ ធនាគារទាំង២នេះ នឹងបង្កើតឱកាសផ្ដល់ហិរញ្ញវត្ថុ រហូតដល់ ៣៥០លានយន់ (លុយចិន) ឬស្មើនឹង ៤៧,៩ពាន់លានដុល្លារអាមេរិក (US$47.9 billion) សម្រាប់គម្រោងគំនិតផ្ដួចផ្ដើមខ្សែក្រវាត់និងផ្លូវ ( BRI)។ រីឯទឹកប្រាក់បន្ថែម ចំនួន ៨០ពាន់លានយន់ នឹងត្រូវចាក់បញ្ចូលទៅក្នុងស្ថាប័នផ្តល់ប្រាក់កម្ចីផ្លូវការរបស់គម្រោងនេះ ដែលជាមូលនិធិផ្លូវសូត្រ។

វេទិកាសប្តាហ៍នេះ មានការចូលរួម មកពីតំណាងប្រទេស ចំនួន១៣០ ហើយក្លាយជាកិច្ចប្រជុំកំពូលលើកទី៣ ត្រូវបានរៀបចំឡើង ដោយរដ្ឋាភិបាលក្រុងប៉េកាំង ចាប់តាំងពីការសម្ពោធ«ខ្សែក្រវាត់ និងផ្លូវ» កាលពីឆ្នាំ២០១៣ មក។

ក្រុមអ្នករិះគន់ បានចង្អុលបង្ហាញជាយូរមកហើយ ចំពោះការកំណត់តម្លៃដ៏អាប់អួរ សម្រាប់គម្រោង BRI ដែលបានសាងសង់ ដោយក្រុមហ៊ុនចិន ដោយមានប្រទេសជាច្រើន រួមទាំង ម៉ាឡេស៊ី និង មីយ៉ាន់ម៉ា។ ប្រទេសទាំងនេះ បានចរចាឡើងវិញ ចំពោះកិច្ចព្រមព្រៀងនេះ ដើម្បីកាត់បន្ថយនូវការចំណាយ។

រដ្ឋាភិបាលក្រុងប៉េកាំង បានអះអាង នៅខែតុលា នេះ ថា បណ្ដាប្រទេសជាច្រើន ដែលបានចូលរួម ជាមួយនឹងគម្រោង BRI បានជំពាក់បំណុលច្រើន ជាង៣០០ពាន់លានដុល្លារ ពីធនាគារនាំចេញ-នាំចូលរបស់ចិន។

ដោយឡែក លោក ចូ បៃដិន ប្រធានាធិបតីសហរដ្ឋអាមេរិក កាលពីខែកញ្ញា បានចេញនូវផែនការមួយ ជំរុញឱ្យរដ្ឋាភិបាលក្រុងវ៉ាស៊ីនតោន ក្លាយជាដៃគូដ៏សំខាន់បំផុត សម្រាប់ជំនួសផែនការរបស់ចិន និង ការវិនិយោគ នៅក្នុងប្រទេសអភិវឌ្ឍន៍ ជាពិសេស នៅតំបន់ឥណ្ឌូ-ប៉ាស៊ីហ្វិក។ ស្របគ្នានេះដែរ ក្រុមមន្ត្រីជាច្រើន បានអះអាង ថា កិច្ចព្រមព្រៀងលើហេដ្ឋារចនាសម្ព័ន្ធថ្មីនេះ នឹងអាចកាត់បន្ថយពេលវេលាដឹកជញ្ជូន ការចំណាយលើថ្លៃដើម ការប្រើប្រាស់ប្រេងឥន្ធនៈ និង ធ្វើឱ្យពាណិជ្ជកម្ម កាន់តែលឿន ហើយមានតម្លៃថោក។

ទីភ្នាក់ងារសារព័ត៌មាន អារ៉ាប់ SPA បានរាយការណ៍ កាលពីទី៩ ខែកញ្ញា ថា អារ៉ាប៊ីសាអូឌីត និង សហរដ្ឋអាមេរិក បានចុះហត្ថលេខាលើអនុស្សរណៈ នៃការយោគយល់គ្នាមួយ (MoU) ដើម្បីបង្កើតពិធីសារ ដោយមានគោលបំណង កសាងច្រករបៀងបៃតង។ ច្រករបៀងឆ្លងកាត់នេះ នឹងតភ្ជាប់ រវាងអាស៊ី និង អឺរ៉ុប ដោយឆ្លងកាត់ប្រទេសអារ៉ាប៊ីសាអូឌីត តាមផ្លូវរថភ្លើង ហើយមានគោលបំណង ជួយសម្រួលដល់ការផ្ទេរថាមពលអគ្គិសនីកកើតឡើងវិញ និង សម្អាតអ៊ីដ្រូសែន តាមរយៈខ្សែកាប្ល៍ និង បំពង់ ខណៈ MoU នេះ ត្រូវបានចុះហត្ថលេខា កាលពីថ្ងៃទី៨ ខែកញ្ញា ឆ្នាំ២០២៣។

គម្រោងនេះ ក៏មានគោលបំណង ជួយគាំទ្រដល់កិច្ចខិតខំប្រឹងប្រែង នៅក្នុងការអភិវឌ្ឍថាមពលស្អាត ពង្រីកសេដ្ឋកិច្ចឌីជីថល តាមរយៈការផ្ទេរទិន្នន័យតាមខ្សែកាប្ល៍អុបទិក ពង្រឹងពាណិជ្ជកម្ម និង បង្កើននូវការឆ្លងកាត់ទំនិញ ដោយការភ្ជាប់តាមផ្លូវរថភ្លើង និង កំពង់ផែ។ ទន្ទឹមគ្នានេះ សហរដ្ឋអាមេរិក អារ៉ាប៊ីសាអូឌីត ឥណ្ឌា និង បណ្ដាប្រទេសផ្សេងៗទៀត នៅក្នុងតំបន់ កំពុងតែពិភាក្សាគ្នា អំពីកិច្ចព្រមព្រៀង លើការកសាងហេដ្ឋារចនាសម្ព័ន្ធ ដែលអាចមាន ឬ អាចកំណត់លើហេដ្ឋារចនាសម្ព័ន្ធពាណិជ្ជកម្មឡើងវិញ រវាងតំបន់ឈូងសមុទ្រ និង តំបន់អាស៊ីខាងត្បូង។ បើតាមផែនការនេះ នឹងតភ្ជាប់ពីបណ្តាប្រទេស នៅតំបន់មជ្ឈិមបូព៌ា តាមផ្លូវដែក និង តភ្ជាប់មកកាន់ប្រទេសឥណ្ឌា តាមរយៈកំពង់ផែ។

ផែនការកំពង់ផែចម្រុះជាតិសាសន៍ និង កិច្ចព្រមព្រៀងផ្លូវដែក នឹងឈានមកដល់ នៅក្នុងពេលវេលាដ៏សំខាន់ណាមួយ នាពេលខាងមុខ។ គម្រោងនេះ ធ្វើឡើង សម្រាប់ទប់ទល់នឹងការជំរុញហេដ្ឋារចនាសម្ព័ន្ធរបស់ពិភពលោក ក្រោមគោលនយោបាយ«ខ្សែក្រវាត់និងផ្លូវ»របស់លោក ស៊ី ជិនពីង (Xi Jinping) ប្រធានាធិបតីចិន៕

ប្រទេសកូរ៉េខាងត្បូង ជាប្រទេសដែលចាត់ទុកថាខ្លាំងផ្នែកបច្ចេកវិទ្យាដោយផ្តល់អត្ថប្រយោជន៍ជាច្រើនជូនប្រជាពលរដ្ឋរបស់ខ្លួននូវដំណោះស្រាយទំនើបៗ ដែលលើកកំពស់ការរស់នៅប្រចាំថ្ងៃយ៉ាងខ្លាំង។ ការជំរុញឱ្យមានការរីកចម្រើនរបស់ប្រទេសនេះបង្ហាញពីការលាយបញ្ចូលគ្នានៃការអនុវត្តជាក់ស្តែង និងការច្នៃប្រឌិត ដែលប្រទេសជាច្រើនគួរសិក្សាស្វែងយល់បន្ថែមបាន។

ខាងក្រោមនេះគឺជារឿងគួរឱ្យស្ងប់ស្ងែងនៅក្នុងប្រទេសកូរ៉េខាងត្បូង ដែលអាចផ្តល់ប្រយោជន៍ដល់ប្រទេសនានាជុំវិញពិភពលោកជូនទៅដល់ប្រជាពលរដ្ឋ៖

១. មានឆ័ត្រតាមដងផ្លូវ៖ ប្រសិនបើអ្នកធ្លាប់ទៅប្រទេសកូរ៉េក្នុងរដូវក្តៅ អ្នកដឹងថាវាក្តៅ ប៉ុណ្ណាហើយការរង់ចាំឆ្លងកាត់ភ្លើងសញ្ញាចរាចរណ៍ក្រោមមេឃដ៏ក្ដៅគគុកមិនមែនជារឿងងាយស្រួលនោះទេ។ ប៉ុន្តែកុំបារម្ភអី ព្រោះប្រទេសកូរ៉េបានផ្តល់ភាពងាយស្រួលដល់ប្រជាជនជាមួយឆ័ត្រធំសម្រាប់អ្នកឈររង់ចាំឆ្លងផ្លូវ។

២. ថង់ដាក់ឆ័ត្រ និងម៉ាស៊ីនសម្ងួត៖ ដើម្បីការពារកុំឱ្យមានទឹកហូរពេញហាងពេលមេឃធ្លាក់ភ្លៀងខណៈពេលដែលអ្នកកំពុងដើរទិញអីវ៉ាន់ ប្រទេសកូរ៉េខាងត្បូងបានផ្តល់ភាពងាយស្រួលឱ្យអ្នកនូវថង់តូចៗជាច្រើនទំហំផ្សេងៗសម្រាប់ដាក់ឆ័ត្រព្រមទាំងមានម៉ាស៊ីនសម្ងួតឱ្យអ្នកផងដែរ។

៣. កន្លែងចតរថយន្តសម្រាប់តែនារី៖ យានដ្ឋានចតរថយន្តមួយចំនួននៅក្នុងប្រទេសកូរ៉េផ្តល់កន្លែងចតរថយន្តសម្រាប់តែនារីប៉ុណ្ណោះសម្រាប់គោលបំណងសុវត្ថិភាព។ ជាញឹកញយ ពួកគេនៅជិតច្រកចូលអគារបំផុត ហើយជាធម្មតាត្រូវបានកំណត់ជាពណ៌ផ្កាឈូកសម្រាប់សម្គាល់។

៤. ភ្លើងឆ្លងផ្លូវអ្នកថ្មើរជើង៖ ប្រជាជនកូរ៉េភាគច្រើនតែងតែមើលទូរស័ព្ទរបស់ពួកគេ ជាពិសេសនៅពេលរង់ចាំភ្លើងសញ្ញាចរាចរណ៍។ ដើម្បីជួយសម្រួលប្រជាជនលើចំណុចនេះកូរ៉េបានអនុវត្តភ្លើងសញ្ញាជាបន្តបន្ទាប់នៅលើដី ដែលនឹងភ្លឺពណ៌បៃតង ឬក្រហមអាស្រ័យលើថាតើអ្នកអាចឆ្លងផ្លូវបានឬអត់។

៥. អាចកុម្ម៉ង់អាហារគ្រប់ទីកន្លែង៖ ប្រទេសកូរ៉េបានផ្តល់ភាពងាយស្រួលយ៉ាងខ្លាំងប្រសិនជាអ្នកកំពុងតែឃ្លានស្ថិតក្នុងតំបន់ណាមួយវាគ្មានបញ្ហានាទេ ព្រោះសេវាដឹកជញ្ជូនអាហាររបស់ប្រទេសកូរ៉េ អាចនាំការកុម្ម៉ង់របស់អ្នកបានទោះបីជាកំពុងតែដើរនៅសួនកម្សាន្តក៏ដោយ។

៦. ប៊ូតុង Yogiyo នៅលើតុភោជនីយដ្ឋាន៖ ជាធម្មតាភ្ញៀវលើកដៃឡើងដើម្បីហៅអ្នករត់តុ ប៉ុន្តែប្រទេសកូរ៉េបានសម្រួលដំណើរការដោយដំឡើងប៊ូតុងនៅលើតុដើម្បីហៅអ្នករត់តុ។ គ្រាន់តែចុចប៊ូតុងនោះ អ្នកនឹងឮសំឡេងរោទ៍ ដែលជាសញ្ញាប្រាប់អ្នករត់តុឱ្យមកដល់តុយើងតែម្តង។ អ្នកនឹងឃើញវត្ថុទាំងនេះជាញឹកញាប់នៅក្នុងភោជនីយដ្ឋានកូរ៉េ ហើយវិធីសាស្រ្តនេះមានភាពងាយស្រួលណាស់ដែលភោជនីយដ្ឋានផ្សេងទៀតគួរតែធ្វើតាម។

៧. អាវអៀមនៅភោជនីយដ្ឋាន៖ ប្រសិនបើភ្ញៀវញុំាអាហារនៅភោជនីយដ្ឋានតែខ្លាចប្រឡាក់អាវដែលកំពុងតែពាក់នោះអ្នកអាចស្នើសុំអាវអៀមពាក់បានពេលដែលកំពុងញ៉ាំហើយវាជាភាពងាយស្រួលមួយទៅដល់ភ្ញៀវដែលមកពិសារអាហារ៕

ប្រទេសឥណ្ឌូណេស៊ី ៖ នៅពេលរដ្ឋាភិបាលឥណ្ឌូណេស៊ីព្យាយាមជំរុញឥណ្ឌូណេស៊ីឱ្យក្លាយជាប្រទេសនាំមុខគេផ្នែកឧស្សាហកម្មរថយន្តអគ្គិសនី ប្រទេសផ្សេងៗនៅតំបន់អាស៊ីអាគ្នេយ៍ ក៏អាចរួមគ្នាដើម្បីក្លាយជាមជ្ឈមណ្ឌលផលិតរថយន្តអគ្គិសនីនៅលើពិភពលោក និងក្លាយជាតំបន់នាំមុខក្នុងការជំរុញឱ្យមាននិរន្តរភាពផងដែរ ។

Anindya Bakrie ជានាយកប្រតិបត្តិក្រុមហ៊ុន Bakrie & Brothers នៅប្រទេសឥណ្ឌូណេស៊ីលើកឡើងថា ការប្រកួតប្រជែងក្នុងឧស្សាហកម្មរថយន្តអគ្គិសនីរវាងឥណ្ឌូណេស៊ីជាមួយប្រទេសជិតខាង គឺមិនមែនជាការប្រកួតប្រជែងពិតប្រាកដនោះទេ ពីព្រោះម៉ាឡេស៊ីក៏មានកេរ្តិ៍ឈ្មោះផ្នែកសមត្ថភាពផលិតបន្ទះឈីប ។ ចំណែកថៃមានចំណុចខ្លាំងក្នុងការផលិតរថយន្តកង់៤ និងរថយន្តអគ្គិសនី ខណៈវៀតណាមបានទទួលជោគជ័យក្នុងការចុះបញ្ជីទីផ្សារហ៊ុននៅសហរដ្ឋអាមេរិក ។

នាយកប្រតិបត្តិក្រុមហ៊ុន Bakrie & Brothers បន្តថា អាស៊ានគឺជាក្រុមពាណិជ្ជកម្មក្នុងតំបន់ ហើយអាស៊ានកំពុងស្ថិតនៅលើផ្លូវមួយដើម្បីក្លាយជាតំបន់សេដ្ឋកិច្ចដ៏ធំបំផុតលំដាប់ទី៤ លើពិភពលោក និងជាតំបន់នាំចេញដ៏ធំបំផុតផងដែរ ។ ហេតុនេះ អាស៊ានមិនត្រឹមតែជាតំបន់រីកចម្រើន និងមានស្ថេរភាពផ្នែកភូមិសាស្ត្រប៉ុណ្ណោះទេ ប៉ុន្តែអាស៊ានជាតំបន់ដែលអាចបង្កើតនិរន្តរភាព ។

ប្រទេសឥណ្ឌូណេស៊ីមានគម្រោងពង្រីកឧស្សាហកម្មរថយន្តអគ្គិសនី ហើយប្រទេសនេះបានដាក់គោលដៅផលិតរថយន្តអគ្គិសនីឱ្យស្មើ៦សែនគ្រឿងនៅឆ្នាំ២០៣០ ខណៈរដ្ឋាភិបាលឥណ្ឌូណេស៊ីបានកំណត់គោលដៅជំរុញឱ្យពលរដ្ឋប្រើប្រាស់រថយន្តអគ្គិសនីឱ្យស្មើ២លានគ្រឿងនៅឆ្នាំ២០៣០ ។ ទោះយ៉ាងណា ឥណ្ឌូណេស៊ីបានប្រើរថយន្តអគ្គិសនីតិចជាង១% បើធៀបនឹងការប្រើរថយន្តផ្ទាល់ខ្លួននៅតាមផ្លូវ ដែលស្មើប្រមាណ១៧លានគ្រឿងនៅឆ្នាំ២០២៣ ៕ ប្រភព ៖ AEC connect