ប្រទេសថៃ ៖ នាយកសមាគមអាជីវកម្មទេសចរណ៍ប្រចាំខេត្តឈៀងម៉ៃលើកឡើងថា ប្រទេសថៃបានលើកលែងទិដ្ឋាការដល់ភ្ញៀវទេសចរចិនជិត១ខែហើយ ប៉ុន្តែប្រទេសថៃទទួលបានចំនួនភ្ញៀវទេសចរចិនមិនទាន់ស្មើគោលដៅទេ ។ នាយកសមាគមរូបនេះសង្ឃឹមថា ថៃនឹងទទួលបានអត្ថប្រយោជន៍ពីដំណើរទស្សនកិច្ចរបស់លោកនាយករដ្ឋមន្ត្រីថៃទៅប្រទេសចិន ដោយអាចទាក់ទាញភ្ញៀវទេសចរចិនមកកម្សាន្តនៅថៃបន្ថែមទៀត ។ ប៉ុន្តែលោកបារម្ភថា សង្គ្រាមនៅអ៊ីស្រាអែលនឹងប៉ះពាល់ដល់តម្លៃប្រេងឥន្ធនៈ និងធ្វើឱ្យតម្លៃសំបុត្រយន្តហោះកើនឡើង ។

គិតមកដល់ថ្ងៃទី២១ ខែតុលា ឆ្នាំ២០២៣ គឺមានរយៈពេលជិត១ខែហើយ ដែលប្រទេសថៃមានគោលនយោបាយលើកលែងទិដ្ឋាការដល់ភ្ញៀវទេសចរចិន ក្នុងគោលបំណងឱ្យភ្ញៀវទេសចរចិនធ្វើដំណើរមកប្រទេសថៃកាន់តែច្រើន ។ ចំណែកឈៀងម៉ៃ គឺជាខេត្តមួយដែលជនជាតិចិនចូលចិត្ត ប៉ុន្តែបច្ចុប្បន្ននេះ ចំនួនភ្ញៀវទេសចរចិនមកកាន់ខេត្តឈៀងម៉ៃក្នុងរយៈពេល១ខែ គឺមិនទាន់ស្មើនឹងគោលដៅកំណត់ទេ ។

លោក Suphamit Kitjapipat នាយកសមាគមអាជីវកម្មទេសចរណ៍ប្រចាំខេត្តឈៀងម៉ៃ និយាយថា ក្រោយពីប្រទេសថៃបានលើកលែងទិដ្ឋាការដល់ភ្ញៀវទេសចរចិនជិត១ខែ ប៉ុន្តែចំនួនភ្ញៀវទេសចរចិនមកលេងថៃ មិនទាន់ស្មើគោលដៅរបស់ខេត្តឈៀងម៉ៃទេ ។ វាបណ្តាលមកពីនាពេលកន្លងមក មានកត្តាជាច្រើនធ្វើឱ្យប៉ះពាល់ដល់ទំនុកចិត្តភ្ញៀវទេសចរ ដូចជា ហេតុការណ៍បា.ញ់ប្រហា.រនៅ Siam Paragon នាក្រុងបាងកក ដែលបណ្តាលឱ្យជនជាតិចិនស្លា.ប់ ។ ដូច្នេះ ថៃអាចត្រូវរង់ចាំមើលចំនួនភ្ញៀវទេសចរនៅខែវិច្ឆិកា ដល់ខែធ្នូ ឆ្នាំ២០២៣ រហូតដល់ខែមករា ឆ្នាំ២០២៤ ពីព្រោះនឹងមានពិធីបុណ្យធំៗដែលភ្ញៀវទេសចរបរទេសចូលចិត្ត ។

លោកបន្តថា ខេត្តឈៀងម៉ៃបានព្យាយាមជំរុញវិស័យទេសចរណ៍រហូតមក ហើយមុននេះ លោក សេដ្ឋា ថាវីស៊ីន នាយករដ្ឋមន្ត្រីថៃ ក៏បានធ្វើដំណើរទស្សនកិច្ចទៅប្រទេសចិន និងជជែកជាមួយមេដឹកនាំចិនផងដែរ ។ ហេតុនេះ វិស័យទេសចរណ៍ខេត្តឈៀងម៉ៃរំពឹងថា ចាប់ពីពេលនេះ នឹងមានសញ្ញាវិជ្ជមានបន្ថែមទៀត ។ ប៉ុន្តែអ្វីដែលយើងបារម្ភ គឺសង្គ្រាមនៅអ៊ីស្រាអែលជាមួយក្រុមហាម៉ាស់មិនទាន់បញ្ចប់ និងរាលដាល គឺវាអាចនឹងធ្វើឱ្យតម្លៃប្រេងឥន្ធនៈកើនឡើង ហើយតម្លៃសំបុត្រយន្តហោះក៏កើនឡើងតាមដែរ ។ ដូច្នេះ វិស័យទេសចរណ៍ថៃអាចធ្លាក់ចុះ ហើយនៅសល់តែការធ្វើដំណើរចាំបាច់មួយចំនួនប៉ុណ្ណោះ ដូចជា ក្រុមវិនិយោគិន, អ្នកមកសួរសុខទុក្ខសាច់ញាតិ, មន្ត្រីរាជការ, និស្សិត និងកិច្ចប្រជុំផ្សេងៗ ។

លោកបន្ថែមថា មូលហេតុមួយទៀតដែលបណ្តាលឱ្យភ្ញៀវទេសចរបរទេសធ្វើដំណើរមកខេត្តឈៀងម៉ៃមិនច្រើនប៉ុន្មាន ដោយសារចំនួនក្រុមហ៊ុនអាកាសចរណ៍ ដែលហោះហើរត្រង់មកខេត្តឈៀងម៉ៃមានតិច បើធៀបនឹងមុនពេលផ្ទុះជំងឺកូវីដ-១៩ ។ ដូច្នេះ បើចង់បង្កើនចំនួនភ្ញៀវទេសចរ ថៃត្រូវបន្ថែមចំនួនជើងហោះហើរ និងចំនួនក្រុមហ៊ុនអាកាសចរណ៍ដែលហោះហើរត្រង់មកខេត្តឈៀងម៉ៃ ។ ចំណែកការបង្កើនពេលវេលាបើកអាកាសយានដ្ឋានខេត្តឈៀងម៉ៃ រហូតដល់ម៉ោង១យប់ក្នុងឆ្នាំដំបូង លោកគិតថា វាជាចំណុចចាប់ផ្តើមល្អ ដោយសារការបន្ថែមពេលផ្តល់សេវាកម្មរបស់អាកាសយានដ្ឋានឈៀងម៉ៃ ។ វានឹងអាចបង្កើនចំនួនភ្ញៀវទេសចរមកខេត្តឈៀងម៉ៃក្នុង១ថ្ងៃៗ, បង្កើនការចំណាយប្រាក់របស់ភ្ញៀវទេសចរ និងការស្នាក់នៅសណ្ឋាគារក្នុងខេត្តផងដែរ ។

រីឯភ្ញៀវទេសចរថៃបានធ្វើដំណើរកម្សាន្តក្នុងប្រទេសកាន់តែច្រើន ប៉ុន្តែរយៈពេលដើរកម្សាន្ត និងការចំណាយផ្សេងៗបែរជាធ្លាក់ចុះ ដោយសារស្ថានភាពសេដ្ឋកិច្ចមិនទាន់ងើបឡើងវិញច្រើន ។ បើចង់ចំណាយអ្វី ពួកគេត្រូវគិតឡើងវិញ ព្រោះពួកគេចង់សន្សំសំចៃឱ្យបានច្រើនបំផុត ហើយមិនមែនមានតែជនជាតិថៃប៉ុណ្ណោះទេដែលសន្សំសំចៃ ភ្ញៀវទេសចរបរទេស រួមទាំងភ្ញៀវចិន ក៏សន្សំសំចៃដូចគ្នាដែរ ព្រោះស្ថានភាពសេដ្ឋកិច្ចពិភពលោកមិនសូវល្អ ។

បើក្រឡេកមើលទិន្នន័យភ្ញៀវទេសចចិនដែលធ្វើដំណើរមកខេត្តឈៀងម៉ៃតាមជើងយន្តហោះ គេនឹងឃើញថា ចំនួនភ្ញៀវទេសចរចិនមិនបានកើនឡើងច្រើនទេ ។ ជាក់ស្តែង នៅខែសីហា ឆ្នាំ២០២៣ ភ្ញៀវទេសចរចិនមកខេត្តឈៀងម៉ៃ ស្មើនឹង២១.៥៦៨នាក់, នៅខែកញ្ញា ស្មើនឹង១២.៥៥៦នាក់ ហើយចាប់ពីថ្ងៃទី១ ដល់ថ្ងៃទី១៥ ខែតុលា ឆ្នំាំ២០២៣ ស្មើនឹង៧.៨២៨នាក់ ៕ ប្រភព ៖ nation tv

ពិតណាស់ នៅពេលដែលអ្នកមានអារម្មណ៍ថាតានតឹង ឬថប់បារម្ភ អាហារសុខភាពដូចខាងក្រោមនេះនឹងជួយធ្វើឱ្យអ្នកមានអារម្មណ៍ធូរស្រាល ក៏ដូចជាបង្កើនសារធាតុ serotonin នៅក្នុងខួរក្បាល។ ដូច្នេះដើម្បីទទួលបានអារម្មណ៍ស្រស់ស្រាយឡើងវិញ ចូលអ្នកទទួលទានអាហារដូចជា៖

១.ផ្លែដូង៖ ដូងសម្បូរទៅដោយសារធាតុ triglycerides ដែលត្រូវបានគេចាត់ទុកថា ជាអាហារបង្កើនអារម្មណ៍ល្អ និងជួយឱ្យមានថាមពលឡើងវិញ ដូច្នេះខ្សែសង្វាក់មធ្យមនៅក្នុងទឹកដូងអាចកាត់បន្ថយការថប់បារម្ភយ៉ាងមានប្រសិទ្ធភាព។

២.កាហ្វេ៖ យោងតាមការសិក្សាក្នុងឆ្នាំ ២០២០ បានឱ្យដឹងថា ការប្រើប្រាស់កាហ្វេត្រូវបានផ្សារភ្ជាប់យ៉ាងខ្លាំងជាមួយនឹងការថយចុះហានិភ័យនៃជំងឺធ្លាក់ទឹកចិត្ត។ ដោយសារកាហ្វេ មានផ្ទុកជាតិកាហ្វេអ៊ីន ធ្វើឱ្យអារម្មណ៍ប្រសើរឡើងយ៉ាងខ្លាំង បើប្រៀបធៀបទៅនឹងអ្នកដែលផឹកភេសជ្ជៈផ្សេងទៀត។

៣.ផ្លែប៊ឺរី៖ ផ្លែប៊ឺរី បានផ្សារភ្ជាប់យ៉ាងខ្លាំងជាមួយនឹងភាពប្រសើរឡើងនៃសុខភាពផ្លូវចិត្ត ក៏ដូចជាកាត់បន្ថយរោគសញ្ញានៃជំងឺធ្លាក់ទឹកចិត្ត នេះបើយោងតាមការស្រាវជ្រាវដែលធ្វើឡើងក្នុងឆ្នាំ ២០១៨។ លើសពីនេះ ការទទួលទានផ្លែបឺរីក៏អាចជួយពន្យាអាយុជីវិតរបស់អ្នកបានផងដែរ។

៤.ផ្លែចេក៖ ចេកមានផ្ទុកសារធាតុ serotonin ដែលវាមានតួនាទីយ៉ាងសំខាន់ក្នុងការគ្រប់គ្រងអារម្មណ៍ និងបង្កើតសារធាតុ serotonin។ លើសពីនេះ ចេកក៏សម្បូរទៅដោយសារធាតុចិញ្ចឹមជាច្រើន ដោយចេកទំហំមធ្យមមួយមានផ្ទុកវីតាមីន B6 ដល់ទៅ 0.4 mg ដែលស្មើនឹង 25% នៃបរិមាណដែលបានណែនាំប្រចាំថ្ងៃ៕
ប្រភព៖ kormedi.com

ប៉េកាំង៖ កាលពីថ្ងៃសុក្រទី២០ខែតុលានេះ ប្រធានាធិបតីចិនលោកស៊ីជីនពីងបានប្រាប់ទៅមន្ត្រីជាន់ខ្ពស់លំដាប់ទីពីររបស់វៀតណាមថា ប្រទេសយើងទាំងពីរមិនត្រូវភ្លេចនូវ «ចេតនាដំបូង» ដែលជាចំណងមិត្តភាពរបស់ពួកយើងតាំងពីបុរាណកាលនោះទេ។

ប្រទេសចិនមានទំនាក់ទំនងជាប្រពៃណីយ៉ាងរឹងមាំបំផុតជាមួយនឹងវៀតណាមតាំងពីទំនាក់ទំនងការទូតបានបង្កើតឡើងនៅឆ្នាំ១៩៥០មកម្លេះ ទោះបីជាមានសង្គ្រាមតូចមួយនៅឆ្នាំ១៩៧៩ក៏ដោយ។ ចិនបានគាំទ្រវៀតណាមនៅក្នុងការវាយប្រហារប្រឆាំងនឹងការគ្រប់គ្រងរបស់អាណានិគមនិយមបារាំងម្តងរួចទៅហើយ បន្ទាប់មកទៀតក៏មានប្រឆាំងជាមួយនឹង Saigon និង ជួយទប់ទល់ជាមួយនឹងសហរដ្ឋអាមេរិកក្នុងអំឡុងពេលសង្គ្រាមវៀតណាមផងដែរ។

នៅក្នុងវេទិកានាទីក្រុងប៉េកាំង “Belt and Road Forum” លោកស៊ីជីនពីងបានប្រាប់ទៅកាន់ប្រមុខរដ្ឋាភិបាលទី២របស់រៀតណាម គឺលោក Vo Van Thuong ថា «ទោះបីជាស្ថានការអន្តរជាតិកំពុងតែប្រឈមមុខនឹងការផ្លាស់ប្តូរជាបន្តបន្ទាប់ ហើយកិច្ចការអភិវឌ្ឍប្រទេសរៀងៗខ្លួនកំពុងស្ថិតនៅក្នុងភាពលំបាកក៏ដោយ ក៏ប្រទេសយើងទាំងពីរមិនត្រូវភ្លេចនូវចំណងដែលជាការចាប់ផ្តើមដំបូងនៃមិត្តភាពជាប្រពៃណីរបស់ពួកយើងនោះទេ»។ លោកបានបន្ថែមថា ចិននិងវៀតណាមគួរតែប្រកាន់ខ្ជាប់នូវគោលការណ៍មួយគឺជជែកវែកញែក ពិគ្រោះយោបល់រួមគ្នាទៅលើបញ្ហាផ្សេងៗ ហើយគួរតែទាញយកផលប្រយោជន៍ឲ្យបានច្រើនពីផ្នែកភូមិសាស្រ្តនយោបាយនិងការបំពេញបន្ថែមឧស្សាហកម្មរបស់ពួកយើង។

គួរបញ្ជាក់ផងដែរថា នៅដើមខែតុលានេះសារព័ត៌មាន Reuter បានចុះផ្សាយថា លោកស៊ីជីនពីងនឹងធ្វើដំណើរទស្សនៈកិច្ចជាផ្លូវការនៅទីក្រុងហាណូយនៅចុងខែតុលាឬដើមខែវិច្ឆិកា នេះគឺជាសេចក្តីបញ្ជាក់របស់មន្ត្រីរៀបចំផែនការ៕ ប្រភព CNA News

ប្រទេសថៃ ៖ ក្រសួងការបរទេសថៃលើកឡើង នៅថ្ងៃទី២១ ខែតុលា ឆ្នាំ២០២៣ ពលករថៃបានធ្វើដំណើរត្រឡប់មកប្រទេសវិញចំនួន៥៣៤នាក់ ហើយចាប់ពីថ្ងៃទី២៣ ខែតុលា តទៅ ប្រទេសថៃនឹងបង្កើនជើងយន្តហោះចំនួន៣ជើងក្នុង១ថ្ងៃ ដោយហោះហើរត្រង់ពីប្រទេសថៃចំនួន២ជើង និងពីទីក្រុងឌូបៃ១ជើង ហើយថៃរំពឹងថា នឹងអាចជម្លៀសពលរដ្ឋខ្លួនពីអ៊ីស្រាអែល ចំនួន៨០០នាក់ក្នុង១ថ្ងៃ ។

ក្រសួងការបរទេសថៃបានប្រកាសព័ត៌មានលម្អិតអំពីជើងយន្តហោះជម្លៀសពលរដ្ឋថៃចេញពីប្រទេសអ៊ីស្រាអែល ដែលនឹងធ្វើដំណើរមកដល់ថៃ នៅថ្ងៃទី២១ ខែតុលា ឆ្នាំ២០២៣ មានដូចជា ៖ ក្រុមហ៊ុនអាកាសចរណ៍ Arkia (IZ591) មានអ្នកចុះឈ្មោះចំនួន២១៤នាក់ និងក្រុមហ៊ុនអាកាសចរណ៍ Spice Jet (SG9011) មានអ្នកចុះឈ្មោះចំនួន៣២០នាក់ ។

ក្រៅពីនេះ នៅថ្ងៃទី២១ ខែតុលា ក៏មានយន្តហោះរបស់កងទ័ពអាកាសផងដែរនឹងហោះចេញពីប្រទេសថៃ ហើយយន្តហោះកងទ័ពអាកាសនេះ នឹងហោះមកកាន់ប្រទេសថៃវិញ នៅថ្ងៃទី២២ ខែតុលា ដោយធ្វើការដឹកជញ្ជូនពលករថៃចំនួន១៤០នាក់ត្រឡប់មកប្រទេស ។ នៅថ្ងៃដដែល នឹងមានយន្តហោះរបស់ក្រុមហ៊ុនអាកាសចរណ៍ El Al សម្រាប់ដឹកពលករថៃត្រឡប់មកប្រទេសវិញ ប្រមាណ៣១១នាក់ផងដែរ ។

ចាប់ពីថ្ងៃទី២៣ ខែតុលា តទៅ អាជ្ញាធរថៃនឹងរៀបចំយន្តហោះត្រង់ពីអ៊ីស្រាអែលមកថៃ ចំនួន២ជើងក្នុង១ថ្ងៃ ព្រមទាំងយន្តហោះពីអ៊ីស្រាអែលមកកាន់ទីក្រុងឌូបៃ ចំនួន១ជើងទៀត បន្ទាប់មក នឹងមានជើងយន្តហោះមួយទៀតចេញពីទីក្រុងឌូបៃមកប្រទេសថៃ ។ ដូច្នេះ គម្រោងនេះនឹងធ្វើឱ្យប្រទេសថៃអាចជម្លៀសពលរដ្ឋខ្លួនចេញពីអ៊ីស្រាអែល បានជាង៨០០នាក់ក្នុង១ថ្ងៃ ។

ក្រសួងការបរទេសថៃក៏បានអំពាវនាវឱ្យជនជាតិថៃនៅអ៊ីស្រាអែល ដែលពុំទាន់សម្រេចចិត្តត្រឡប់មកប្រទេសវិញ សូមពិចារណាឱ្យគ្រប់ជ្រុងជ្រោយ និងសូមឱ្យប្រាកដចិត្តថា ពួកគេរស់នៅកន្លែងមានសុវត្ថិភាព ។ លើសពីនេះ ក្រសួងការបរទេសថៃបានស្នើឱ្យអ្នកដែលធ្លាប់ចុះឈ្មោះនៅស្ថានទូត ហើយប្តូរចិត្តមិនត្រឡប់មកថៃ សូមជូនដំណឹងទៅស្ថានទូតជាមុន ដើម្បីឱ្យការរៀបចំកៅអីអង្គុយនៅលើយន្តហោះមានប្រសិទ្ធភាពបំផុត ។ ចំណែកជនជាតិថៃផ្សេងទៀតដែលមានបំណងធ្វើដំណើរត្រឡប់មកប្រទេសវិញ ក្រសួងនឹងមិនបិទឱកាសទេ ៕ ប្រភព ៖ The better

បរទេស៖ យោងតាមប្រភពព័ត៌មាន Sky News ដែលបានរាយការណ៍នៅថ្ងៃទី២០ ខែតុលាថា ប្រធានាធិបតីអាមេរិកលោក Joe Biden បានថ្កោលទោសក្រុម Hamas និងលោក Putin តាមរយៈកញ្ចក់ទូរទស្សន៍ ដោយនិយាយថា ពួកគេកំពុងបំផ្លាញលទ្ធិប្រជាធិបតេយ្យនៅក្នុងប្រទេសជិតខាង ហើយក៏បានប្រកាសថានឹងត្រៀមចំណាយប្រាក់ជំនួយសម្រាប់អ៊ុយក្រែន និងអ៊ីស្រាអែល។

មេដឹកនាំអាមេរិកបានថ្លែងដូច្នេះថា ក្រុមហាម៉ាស់ និងពូទីន គឺជាអ្នកគំរាមកំហែងផ្សេងៗគ្នា ដោយពួកគេសុទ្ធតែមានគោលដៅដូចគ្នាគឺបំផ្លាញលទ្ធិប្រជាធិបតេយ្យក្នុងប្រទេសជិតខាង។ លោក Biden ក៏បានបន្តទៀតថា ការរងគ្រោះដោយអយុតិ្តធម៌របស់អ៊ីស្រាអែល និងអ៊ុយក្រែន គឺជាបញ្ហាសន្តិសុខជាតិរបស់សហរដ្ឋអាមេរិក ហើយលោកនឹងសន្យាថា លោកនឹងផ្តល់ថវិការាប់ពាន់ដុល្លារ ដើម្បីជួយអ៊ីស្រាអែល និងអ៊ុយក្រែន ដែលជាជំនួយមនុស្សធម៌។

ការប្រកាសនេះបានធ្វើឡើងបន្ទាប់ពីលោក Biden បានធ្វើទស្សនកិច្ចនៅអ៊ីស្រាអែល និងបានជំរុញឱ្យមានការបើកព្រំដែន Rafah ដើម្បីអនុញ្ញាតឱ្យរថយន្តដឹកទំនិញដឹកជញ្ជូនគ្រឿងផ្គត់ផ្គង់ ដើម្បីជួយជនស៊ីវិលដែលជាប់គាំងនៅប៉ាឡេស្ទីន។ លោក Biden ក៏បានបញ្ជាក់ផងដែរថា អ៊ីស្រាអែលមិនមែនជាអ្នកនៅពីក្រោយការផ្ទុះមន្ទីរពេទ្យហ្កាហ្សានោះទេ។
ទោះជាយ៉ាងណាក៏ដោយ យោងទៅតាមការស្ទង់មតិរបស់ CNBC នាពេលបច្ចុប្បន្នបានឱ្យដឹងថា ប្រជាប្រិយភាពរបស់ Biden បានធ្លាក់ចុះយ៉ាងខ្លាំង ដោយសារបញ្ហាពីរដែលប្រជាពលរដ្ឋមិនយល់ស្របនោះ គឺនយោបាយសេដ្ឋកិច្ច និងនយោបាយការបរទេស៕

ក្រសួងពាណិជ្ជកម្មបានប្រកាសឱ្យដឹងថា តម្លៃប្រេងសាំងបានឡើងថ្លៃ៥០រៀលក្នុង១លីត្រនិងម៉ាស៊ូតរក្សាតម្លៃចាស់ដដែើក្នុងមួយលីត្របើធៀបនឹងតម្លៃចាស់។ នេះបើតាមសេចក្តីជូនដំណឹងនៅថ្ងៃទី២១ តុលា។

តម្លៃលក់រាយប្រេងសាំងធម្មតាក្នុង១លីត្រ គឺកំណត់ថ្លៃ ៤ ៣៥០រៀល និងប្រេងម៉ាស៊ូតថ្លៃ ៤ ៦៥០រៀលក្នុង១លីត្រ ដែលគ្រប់ស្ថានីយ៍ប្រេងឥន្ធនៈត្រូវអនុវត្តចាប់ពីថ្ងៃទី២១-៣១ ខែតុលា ឆ្នាំ២០២៣។

គូសបញ្ជាក់ថា តម្លៃប្រេងខាងលើនេះគឺផ្អែកទៅលើទីផ្សារអន្តរជាតិ ក្នុងនោះរាជរដ្ឋាភិបាលបានសម្រេចបញ្ចុះតម្លៃលក់រាយប្រេងឥន្ទនៈនេះចំនួន៦,៥ សេនដុល្លារ ក្នុងមួយលីត្រ ដើម្បីជួយសម្រួលដល់ជីវភាពរបស់ប្រជាពលរដ្ឋ៕