សហរដ្ឋអាមេរិក ៖ កាលពីថ្ងៃទី៦ ខែធ្នូ ឆ្នាំ២០២៣ ភ្នាក់ងារគ្រប់គ្រងការហោះហើរ និងអវកាសអាមេរិក (ឬអង្គការ NASA) ព្រមទាំងភ្នាក់ងារស្ថានីយអវកាសអន្តរជាតិ (ឬ ISS) បានរួមគ្នាអបអរសាទរខួបលើកទី២៥ឆ្នាំ នៃការបង្កើតស្ថានីយអវកាសអន្តរជាតិ ។ ការអបអរសាទរនេះបានផ្សាយបន្តផ្ទាល់នូវការជជែកគ្នារវាងអ្នកបើកបរដែលបានបំពេញភារកិច្ចនៅលើអវកាស និងភ្នាក់ងារប្រចាំមជ្ឈមណ្ឌលអវកាស Johnson នៅរដ្ឋតិចសាស់ សហរដ្ឋអាមេរិក ។

មន្ត្រីជាន់ខ្ពស់អង្គការ NASA បានលើកឡើងអំពីភាពជោគជ័យជាច្រើន តាំងពីបានបង្កើតស្ថានីយអវកាសអន្តរជាតិ (ISS) ជាលើកដំបូង ដោយផ្តោតលើការសិក្សាស្រាវជ្រាវជាង៣.០០០ករណីនៅប្រទេសចំនួន១០៨ ។ លើសពីនេះ មន្ត្រីជាន់ខ្ពស់អង្គការ NASA ក៏បានសរសើរអំពីភារកិច្ចជោគជ័យរបស់ក្រុមការងារផងដែរ ។

លោក Bob Cabana មន្ត្រីជាន់ខ្ពស់អង្គការ NASA និយាយថា ៖ «យើងរីករាយណាស់ជាមួយអ្វីដែលពួកគេបានធ្វើ ដូចជា ផ្នែកវិទ្យាសាស្ត្រ និងការត្រួតពិនិត្យផ្សេងៗ ដើម្បីធ្វើឱ្យការរស់នៅលើផែនដីល្អប្រសើរ ។ លើសពីនេះ យើងត្រូវត្រៀមខ្លួនជាមុនសម្រាប់ការស្រាវជ្រាវនៅក្រៅផែនដី ដើម្បីឱ្យយើងអាចធ្វើដំណើរទៅកាន់ភពព្រះច័ន្ទ ក្នុងគម្រោង Artemis និងគម្រោងទៅកាន់ភពអង្គារ» ។

ចំណែកភ្នាក់ងារស្ថានីយអវកាសអន្តរជាតិ (ISS) បានរៀបរាប់អំពីបទពិសោធន៍ និងឧបសគ្គខុសពីគេ ដូចជា ៖ អំពីទម្ងន់ស្មើសូន្យនៅលើអវកាស និងការសាកល្បងជាច្រើនទៀត ដែលបានធ្វើឡើងនៅលើស្ថានីយអវកាសអន្តរជាតិ ។

លោក Joel Montalbano នាយកគ្រប់គ្រងគម្រោង ISS និយាយថា ៖ «អ្វីដែលអ្នកមិនអាចរៀនសូត្រនៅលើផែនដី គឺការងារនេះនឹងជួយឱ្យអ្នកអាចរៀនសូត្រដោយខ្លួនឯង» ។

រីឯលោក Andreas Morgensen ភ្នាក់ងារស្ថានីយអវកាសអន្តរជាតិ (ISS) និយាយថា ៖ «ទម្ងន់នៅលើអវកាសមានចំណុចពិសេសខ្លាំងណាស់ ។ ប៉ុន្តែគួរឱ្យស្តាយ ព្រោះគ្មានការអប់រំអំពីទម្ងន់ស្មើសូន្យនៅលើផែនដី ។ វាមិនដូចគ្នាជាមួយការរស់នៅ និងធ្វើការធម្មតាទេ ដោយសារទម្ងន់របស់យើងស្មើសូន្យនៅទីនោះ ។ ដូច្នេះ យើងមិនត្រឹមតែសប្បាយតែម្យ៉ាងទេ គឺយើងនៅមានឧបសគ្គជាច្រើន» ។

ស្ថានីយអវកាសអន្តរជាតិ (ISS) បានកើតឡើងដោយសារកិច្ចសហការរវាងភ្នាក់ងារអវកាសចំនួន៥ រួមមាន ៖ ភ្នាក់ងារគ្រប់គ្រងការហោះហើរ និងអវកាសអាមេរិក (NASA), រុស្ស៊ី (RKA), កាណាដា (CSA), អឺរ៉ុប (ESA) និងជប៉ុន (JAXA) ដោយបានចំណាយថវិកាប្រមាណ៦០.០០០លានដុល្លារអាមេរិក ។ វាបានក្លាយជាស្ថានីយអវកាសអន្តរជាតិដំបូងគេមានតម្លៃខ្ពស់បំផុត ដែលបង្កើតឡើងដោយមនុស្ស ៕ ប្រភព ៖ TNN World

ប្រទេសទាំងអស់នៅលើពិភពលោក តែងតែមានរបបនយោបាយផ្សេងៗពីគ្នា ដោយប្រទេសខ្លះជ្រើសរើសប្រព័ន្ធប្រជាធិបតេយ្យ និងប្រទេសខ្លះទៀតក៏ប្រកាន់របបយោធានិយម ឬរបបផ្តាច់ការ រីឯប្រទេសខ្លះទៀតក៏ជ្រើសរើសយករបបកុម្មុយនីស្តនិយមទៅវិញ។
លទ្ធិកុម្មុយនីស្តគឺជាមនោគមវិជ្ជាមួយដែលត្រូវបានបង្កើតឡើងដោយផ្អែកលើគំនិតនៃភាពជាម្ចាស់រួម មានន័យថារាល់ធនធានសេដ្ឋកិច្ចទាំងអស់គឺជាកម្មសិទ្ធិរបស់មនុស្សគ្រប់គ្នានៅក្នុងសង្គម ក៏ប៉ុន្តែវាត្រូវបានគ្រប់គ្រងដោយរដ្ឋាភិបាល។ ដូច្នេះបុគ្គលម្នាក់ៗមិនអាចមាននូវទ្រព្យសម្បត្តិផ្សេងៗជាឯកជនភាពបានទេ ពីព្រោះកុម្មុយនីស្តជឿយ៉ាងមុតមាំថា ការដែលបណ្តោយឱ្យមាននូវកម្មសិទ្ធិឯកជនគឺជាកាតាលីកជំរុញឱ្យមាននូវវិសមភាពសង្គម។ ហេតុនេះហើយ តើអ្នកដឹងទេថា ប្រទេសណាខ្លះដែលបានប្រកាន់យករបបកុម្មុយនីស្ត?

១.ប្រទេសចិន៖ ចិនគឺជាប្រទេសកុម្មុយនីស្ត ដែលមានផ្ទៃដីធំបំផុតមួយ និងមានចំនួនប្រជាជនច្រើនជាងគេបំផុតលើពិភពលោកស្ថិតនៅទ្វីបអាស៊ី។ ប្រទេសចិនបានប្រកាន់របបកម្មុនីស្តនៅក្នុងថ្ងៃទី១ ខែតុលា ឆ្នាំ១៩៤៩ រហូតមកដល់បច្ចុប្បន្ន ដោយប្រទេសនេះនៅរក្សារបបនយោបាយតាមបែបកុម្មុយនីស្តដោយមានបក្សកម្មុយនីស្តតែមួយគ្រប់គ្រងនិងដឹកនាំប្រទេស។

២.ប្រទេសគុយបា៖ សាធារណៈរដ្ឋគុយបា ដែលជាប្រទេសដីកោះ មានទីតាំងស្ថិតនៅតំបន់អាមេរិកខាងជើង។ ប្រទេសនេះបានក្លាយជាប្រទេសដែលប្រកាន់យកប្រព័ន្ធនយោបាយកុម្មុនីស្តនៅក្នុងឆ្នាំ ១៦៦១ រហូតមកដល់បច្ចុប្បន្ន។

៣.ប្រទេសឡាវ៖ សាធារណរដ្ឋប្រជាធិបតេយ្យប្រជាមានិតឡាវ គឺជាប្រទេសដីគោកស្ថិតនៅតំបន់អាស៊ីអាគ្នេយ៍។ ប្រទេសឡាវបានកា្លយជាប្រទេសកុម្មុនីស្តមួយនៅឆ្នាំ ១៩៧៥ ក្រោយពីមានចលនាបដិវត្តផ្តួលរំលំរបបរាជានិយម ដោយក្រុមចលនាកុម្មុនីស្ត ផាថេតឡាវ ដឹកនាំដោយទ្រង់សុផានាវង្ស ដែលគាំទ្រដោយប្រទេសវៀតណាម និងសហភាពសូវៀត។

៤.កូរ៉េខាងជើង៖ កូរ៉េខាងជើង គឺជាប្រទេសដែលស្ថិតនៅក្នុងតំបន់អាស៊ីបូព៌ា ហើយបច្ចុប្បន្នប្រទេសនេះត្រូវបានគេចាត់ចូលក្នុងលេខរៀងទី៤ នៃប្រទេសកុម្មុយនីស្តធំៗទាំង ៥ លើពិភពលោក។ កូរ៉េខាងជើងបានប្រែក្លាយជាប្រទេសកុម្មុយនីស្តជាផ្លូវការក្នុងឆ្នាំ ១៩៤៨ ដឹកនាំដោយលោក គីម អ៊ីលស៊ុង។

៥.ប្រទេសវៀតណាម៖ វៀតណាមក៏ជាប្រទេសកុម្មុយនីស្តមួយ ដែលស្ថិតនៅក្នុងតំបន់អាស៊ីអាគ្នេយ៍។ វៀតណាមក្លាយជាប្រទេសកុម្មុយនីស្តពេញលេញចន្លោះពីឆ្នាំ ១៩៧៦ ដល់ឆ្នាំ ១៩៨៦។ រហូតមកដល់បច្ចុប្បន្នប្រទេសនេះ នៅបន្តអនុវត្តរបបនយោបាយបែបសង្គមនិយម តែប្រព័ន្ធសេដ្ឋកិច្ច ត្រូវបានធ្វើកំណែទម្រង់មួយឈ្មោះថា DoiMoi ប្តូរពីផែនការទៅទីផ្សារសេរីនៅទសវត្សទី ៨០នេះ៕

បរទេស៖ បច្ចុប្បន្នពួក Hacker បានកំពុងអនុវត្ត AI ទៅក្នុងដំណើរការវាយប្រហារតាមអ៊ីនធឺណិត ដែលធ្វើឱ្យស្រទាប់សុវត្ថិភាពងាយស្រួលក្នុងការយកឈ្នះ។

យោងតាមការព្យាករណ៍ពីការគំរាមកំហែងផ្នែកសន្តិសុខតាមអ៊ីនធឺណិតនៅឆ្នាំ ២០២៤ របស់ក្រុមស្រាវជ្រាវសន្តិសុខ FortiGuard Labs (USA) បាននិយាយថា បញ្ញាសិប្បនិម្មិត AI កំពុងមាននិន្នាការត្រូវបានក្លាយជា “អាវុធដ៏គ្រោះថ្នាក់បំផុតនៅឆ្នាំ ២០២៤” ដោយមនុស្សអាក្រក់ ឬពួក Hacker បានកំពុងព្យាយាមអនុវត្ត AI សម្រាប់ការវាយប្រហារតាមអ៊ីនធឺណិតកាន់តែខ្លាំងឡើង។

បច្ចេកវិទ្យានេះកំពុងត្រូវបានអនុវត្តនៅដំណាក់កាលជាច្រើន ចាប់ពីការកម្ចាត់ក្បួនដោះស្រាយសុវត្ថិភាព ដល់ការបង្កើតវីដេអូក្លែងក្លាយ ដើម្បីធ្វើត្រាប់តាមឥរិយាបថ និងសំឡេងដើម្បីបញ្ឆោតអ្នកប្រើប្រាស់។ ដូច្នេះហើយ នាពេលខាងមុខនេះ ពួក Hacker នឹងទាញយកអត្ថប្រយោជន៍ពី AI តាមរបៀបថ្មី ដែលធ្វើឱ្យប្រព័ន្ធសុវត្ថិភាពមិនអាចរក្សាបាន។

ក្រុមអ្នកស្រាវជ្រាវក៏មានការព្រួយបារម្ភយ៉ាងខ្លាំងចំពោះបច្ចេកវិទ្យា AI នាពេលអនាគត ដោយនៅពេលខាងមុខនេះ ពួក Hacker នឹងមានឱកាសកាន់តែច្រើនក្នុងការប្រើប្រាស់បញ្ញាសិប្បនិម្មិត ដើម្បីក្លែងបន្លំប្រវត្តិរូបផ្ទាល់ខ្លួន។ ជាពិសេស បន្ទាប់ពីទទួលយកទិន្នន័យពីវេទិកាបណ្តាញសង្គម និងគេហទំព័រសាធារណៈ ពួក Hacker នឹងប្រើប្រាស់ AI ដើម្បីបញ្ចូលគ្នានូវព័ត៌មាន និងបង្កើតទម្រង់ក្លែងក្លាយជាមួយនឹងភាពត្រឹមត្រូវខ្ពស់ ក៏ដូចជាបង្កើនលទ្ធភាពជោគជ័យក្នុងដំណើរការបន្លំ។

យោងតាមក្រុមហ៊ុន FortiGuard Labs អង្គភាពសន្តិសុខជាតិរបស់សហរដ្ឋអាមេរិក បានឱ្យដឹងទៀតថា បច្ចុប្បន្នមនុស្សជាច្រើនកំពុងរងគ្រោះដោយសារ AI សិប្បនិមិត្ត។ ហេតុនេះហើយ ដើម្បីប្រយុទ្ធប្រឆាំងនឹងពួក Hacker ដែលប្រើប្រាស់ AI ទៅនឹងការវាយប្រហារតាមអ៊ីនធឺណិត ប្រព័ន្ធសុវត្ថិភាពរបស់ AI នឹងត្រូវពង្រឹងការត្រួតពិនិត្យជាបន្តបន្ទាប់ ក៏ដូចជាគ្រប់គ្រងការចូលប្រើ ការការពារទិន្នន័យបណ្តុះបណ្តាល AI ការគ្រប់គ្រងកម្មវិធី ការវិភាគអាកប្បកិរិយា ការធ្វើតេស្តអ្នកប្រើប្រាស់ និងការផ្ទៀងផ្ទាត់ភាពត្រឹមត្រូវ។

ទន្ទឹមនឹងនេះ អង្គការក៏ត្រូវបង្រួមគម្លាតក្នុងជំនាញសន្តិសុខតាមអ៊ីនធឺណិត ដើម្បីបង្កើនការចែករំលែកព័ត៌មាន និងបទពិសោធន៍ក្នុងការដោះស្រាយឧបទ្ទវហេតុសុវត្ថិភាព ដោយហេតុនេះធ្វើឱ្យបណ្តាញឧក្រិដ្ឋកម្មតាមអ៊ីនធឺណិតនឹងចុះខ្សោយ៕

ប្រទេសថៃ ៖ អាជ្ញាធរផ្នែកទេសចរណ៍ប្រទេសថៃបានចុះត្រួតពិនិត្យនៅផ្លូវមួយឈ្មោះ «Nana» បន្ទាប់ពីនារីចិនម្នាក់បានសរសេរក្នុងបណ្តាញសង្គមថា វាជាកន្លែងគ្មានសុវត្ថិភាពសម្រាប់ភ្ញៀវទេសចរ ។ ប៉ុន្តែអាជ្ញាធរថៃបញ្ជាក់ថា ដោយសារតែនារីចិនរូបនេះស្លៀកពាក់ខ្លីពេក ទើបបណ្តាលឱ្យមានភាពទាក់ទាញភ្នែក ។ ចំណែកភ្ញៀវទេសចរភាគច្រើននៅតែមានទំនុកចិត្ត ដោយសារអាជ្ញាធរថៃបានថែទាំសុវត្ថិភាពគ្រប់ពេលវេលាដល់ពួកគេ ។

កាលពីថ្ងៃទី៧ ខែធ្នូ ឆ្នាំ២០២៣ អាជ្ញាធរថៃបានប្រមូលកម្លាំងចុះមកស្រាវជ្រាវរកការពិត ក្រោយពីនារីទេសចរចិនម្នាក់បានបង្ហោះវីដេអូមួយក្នុងបណ្តាញសង្គម ដោយបង្ហាញពីបរិវេណផ្លូវសុខុមវីដ ផ្លូវលេខ៤ (ឬផ្លូវ Nana) តំបន់ឃ្លងតឺយ ទីក្រុងបាងកក ថា គឺជាកន្លែងគ្រោះថ្នាក់សម្រាប់ស្ត្រី ។

បរិវេណដែលស្ត្រីចិននិយាយថា គ្មានសុវត្ថិភាព គឺនៅផ្លូវខាងមុខសណ្ឋាគារឈ្មោះ «ណាណា» ។ អាជ្ញាធរថៃបានជជែកជាមួយបុគ្គលិក និងអ្នកគ្រប់គ្រងសណ្ឋាគារ «ណាណា» ព្រមទាំងជជែកជាមួយអ្នកប្រកបអាជីវកម្មក្នុងតំបន់នេះ ពួកគេប្រាប់ថា ផ្លូវ Nana គឺជាតំបន់ទេសចរណ៍ទទួលបានការពេញនិយមពីសំណាក់ជនជាតិថៃ និងជនបរទេស ។

តំបន់នេះមិនគួរឱ្យខ្លាច និងមានគ្រោះថ្នាក់សម្រាប់ភ្ញៀវទេសចរដូចការលើកឡើងនោះទេ ។ បើតាមវីដេអូក្នុងបណ្តាញសង្គម គឺអាចបណ្តាលមកពីនារីជាភ្ញៀវទេសចរចិនរូបនេះស្លៀកពាក់ខ្លីពេក ទើបធ្វើឱ្យភ្ញៀវទេសចរដើរទៅមកចាប់អារម្មណ៍លើរូបនាងជាពិសេស ។

បើតាមអាជ្ញាធរថៃលើកឡើងថា ផ្លូវ Nana គឺជាតំបន់ទេសចរណ៍ទទួលបានការពេញនិយមពីសំណាក់ភ្ញៀវទេសចរ ហើយអាជ្ញាធរបានការពារសុវត្ថិភាពនៅតំបន់នេះគ្រប់ពេលវេលា ។ លើសពីនេះ ផ្លូវ Nana ជាទីប្រជុំជនទេសចរណ៍ដ៏រឹងមាំមួយតាមគម្រោង STC (Strong Tourism Community) ។ ដូច្នេះ អាជ្ញាធរមានតួនាទីការពារសុវត្ថិភាពដល់មនុស្សទាំងអស់ និងការពារទ្រព្យសម្បត្តិរបស់ភ្ញៀវទេសចរផងដែរ ។

អាជ្ញាធរថៃបន្តថា តាមរយៈការត្រួតពិនិត្យនៅកន្លែងដែលបានបង្ហោះក្នុងបណ្តាញសង្គម និងយោងតាមការលើកឡើងពីអ្នកប្រកបអាជីវកម្មក្នុងតំបន់ ក៏ដូចជាការសាកសួរភ្ញៀវទេសចរចិន, ភ្ញៀវទេសចរអឺរ៉ុប និងភ្ញៀវទេសចរផ្សេងទៀតដែលបានមកដើរលេងនៅផ្លូវ Nana និយាយថា ពួកគេមានទំនុកចិត្តចំពោះអាជ្ញាធរថៃ ក្នុងការការពារសុវត្ថិភាពក្នុងតំបន់ ។

អាជ្ញាធរថៃបញ្ជាក់ថា ករណីនេះអាចបណ្តាលមកពីភ្ញៀវទេសចរចិនរូបនេះតែងខ្លួនមានភាពលេចធ្លោខ្លាំងពេក ទើបធ្វើឱ្យភ្ញៀវទេសចរដែលដើរទៅមកចាប់អារម្មណ៍លើរូបនាងជាងគេ ។ ចុងក្រោយ អាជ្ញាធរថៃនិយាយថា បើប្រទះឃើញការប្រព្រឹត្តទង្វើណាមួយដែលបង្កគ្រោះថ្នាក់ដល់ភ្ញៀវទេសចរ ឬការកេងប្រវ័ញ្ចលើភ្ញៀវទេសចរ អាចទូរស័ព្ទមកអាជ្ញាធរគ្រប់ពេលវេលា និង២៤ម៉ោង ៕ ប្រភព ៖ khaosod

ប្រទេសថៃ ៖ កាលពីថ្ងៃទី៧ ខែធ្នូ ឆ្នាំ២០២៣ សារព័ត៌មានថៃឈ្មោះ Mono News បានផ្សាយថា ភ្ញៀវទេសចរបរទេសដែលបានមកលេងប្រាសាទបុរាណនៅអយុធ្យា ត្រូវបានឆ្កែអនាថាដេញខាំ ហើយខាងអាជ្ញាធរប្រចាំតំបន់ទេសចរណ៍អយុធ្យាប្រញាប់ដោះស្រាយបញ្ហានេះ ដោយសារខ្លាចប៉ះពាល់ដល់វិស័យទេសចរណ៍ប្រទេសថៃ ។

ក្រុមការងារសារព័ត៌មានថៃ Mono News បានចុះទៅកាន់សួនសាធារណៈ «បឹងព្រះរ៉ាម» ស្ថិតក្នុងឃុំព្រះទូឆ័យ ស្រុកព្រះណាខន ស្រ៊ីអាយុធ្យា ហើយក៏បានដើរមើលបរិវេណនេះ ដោយប្រទះឃើញឆ្កែញី១ក្បាល ដែលវាទើបតែបង្កើតកូន ។ អ្នកស្រុកនៅម្តុំនេះហៅវាថា «ឆ្កែឌែង» ហើយអ្នកស្រុកប្រាប់ថា កាលពីមុន ឆ្កែនេះមិនកាចសាហាវ និងដេញខាំមនុស្សទេ ប៉ុន្តែរយៈពេល១ខែ ទៅ២ខែកន្លងមក ឆ្កែញីនេះបានបង្កើតកូន ទើបវាការពារកូនរបស់វា និងមិនឱ្យអ្នកណាចូលមកក្នុងបរិវេណនេះ ។

នៅពេលក្រុមការងារសារព័ត៌មានថៃកំពុងជជែកជាមួយអ្នកស្រុក ស្រាប់តែឃើញមានមនុស្សមកចាប់សត្វនៅក្នុងទឹក ខណៈបរិវេណនេះមានបម្រាមហាមចាប់សត្វក្នុងទឹក ស្រាប់តែឆ្កែឌែង បានរត់ទៅព្រូសពួកគេភ្លាមៗ ។

រីឯភ្នាក់ងារសន្តិសុខប្រចាំតំបន់ប្រាប់ថា ក្រោយពីឆ្កែឌែង បង្កើតកូនរួចហើយ តែងតែមានអ្នកយកចំណីមកឱ្យវាស៊ីជានិច្ច ។ កន្លងមក ឆ្កែឌែង ធ្លាប់ខាំភ្ញៀវទេសចរប្រមាណ១០នាក់ហើយ រហូតដល់សន្តិសុខនាំគ្នាជួយតាមដានវា ក្រែងវាខាំអ្នកផ្សេងទៀត ។

សន្តិសុខរូបនេះទទួលស្គាល់ថា លោកដឹងថា ឆ្កែបារម្ភពីកូនរបស់វា ប៉ុន្តែលោកសូមសំណូមពរទៅស្ថាប័នពាក់ព័ន្ធជួយដោះស្រាយបញ្ហាឆ្កែអនាថា ។ លោកបារម្ភថា បើបណ្តោយឱ្យឆ្កែទាំងនេះដេញខាំជនបរទេសជាបន្តបន្ទាប់នោះ វាអាចនឹងប៉ះពាល់ដល់វិស័យទេសចរណ៍ប្រទេសថៃ ។

ចំណែកអាជ្ញាធរប្រចាំតំបន់ទេសចរណ៍អយុធ្យាលើកឡើងថា កន្លងមក អាជ្ញាធរបានចុះពិនិត្យមើលឆ្កែអនាថានៅក្នុងតំបន់ គឺមានឆ្កែប្រមាណ៣០ក្បាល ។ ចំណែកហេតុការណ៍ឆ្កែដេញខាំភ្ញៀវទេសចរ អាជ្ញាធរមិនបានព្រងើយកន្តើយនោះទេ ។ អាជ្ញាធរបានទំនាក់ទំនងទៅព្រះចៅអធិការវត្តតាណូត នៅស្រុកបាងផាហាន់ ខណៈវត្តនេះបានទទួលយកឆ្កែអនាថាឱ្យមករស់នៅក្នុងវត្ត ដើម្បីឱ្យខាងវត្តទទួលខុសត្រូវបញ្ហានេះ ហើយព្រះចៅអធិការវត្តក៏យល់ព្រមទទួលខុសត្រូវ ។

អាជ្ញាធរនិយាយថា ៖ «នាពេលឆាប់ៗនេះ អាជ្ញាធរនឹងទំនាក់ទំនងទៅខាងផ្នែកសត្វ ដើម្បីបញ្ជូនឆ្កែទាំងនេះទៅរស់នៅកន្លែងថែទាំត្រឹមត្រូវ ។ នៅថ្ងៃអនាគត យើងនឹងប្រមូលប្រាក់ពីអ្នកស្រឡាញ់សត្វ សម្រាប់សាងសង់ទីកន្លែងរស់នៅឱ្យឆ្កែបន្ថែមទៀត» ។

អាជ្ញាធរបន្តថា ៖ «មុននេះ យើងក៏បានដោះស្រាយបញ្ហាឆ្កែអនាថារួចហើយ និងរកបានកន្លែងមួយសម្រាប់ឱ្យពួកគេរស់នៅ ប៉ុន្តែអ្នកស្រុកក្នុងតំបន់នោះមិនឯកភាពទេ ទើបអាជ្ញាធរត្រូវស្វែងរកកន្លែងថ្មីទៀតសម្រាប់ឆ្កែអនាថា» ៕ ប្រភព ៖ Mono News

បរទេស៖ សត្វអណ្តើក Jonathan មានដើមកំណើតនៅលើកោះ Saint Helena ក្នុងមហាសមុទ្រអាត្លង់ទិកសហរដ្ឋអាមេរិក ជាមួយនឹងអាយុ ១៩១ឆ្នាំ ដោយបច្ចុប្បន្នវាមានសុខភាពល្អខ្លាំងណាស់។

យោងតាមគេហទំព័រ Live Science ដែលបានរាយការណ៍កាលពីថ្ងៃទី៦ ខែធ្នូថា អណ្តើកយក្សដែលចំណាស់ជាងគេបំផុតលើពិភពលោកនេះបានឈានដល់អាយុ ១៩១ ឆ្នាំហើយ ដោយវាបានបន្តងារជាសត្វដែលរស់នៅលើគោកបានយូរបំផុតរបស់ផែនដី។ សត្វអណ្តើកយក្សពូជ Seychelles មានឈ្មោះថា Jonathan បានរស់នៅលើកោះ Saint Helena ក្នុងមហាសមុទ្រអាត្លង់ទិក ចាប់តាំងពីឆ្នាំ ១៨៨២ មកម្លេះ។ បន្ទាប់មកអណ្តើកនេះត្រូវបានគេចាប់វាប្រគល់ឱ្យអភិបាលនាសម័យនោះដើម្បីចិញ្ចឹម។

តាមការស្រាវជ្រាវបានឱ្យដឹងថា អណ្តើក Jonathan បានកើតនៅក្នុងឆ្នាំ ១៨៣២ មានន័យថាពេលវាបានមកដល់កោះ Saint Helena អណ្តើកយក្សនេះគឺមានអាយុ ៥០ឆ្នាំហើយ។ អាយុប៉ាន់ស្មានរបស់វាត្រូវបានបញ្ជាក់ដោយរូបថតចាស់ៗដែលថតបានប្រហែលឆ្នាំ ១៨៨២ – ១៨៨៦ ដែលរូបថតនោះបង្ហាញពីអណ្តើកយក្ស Jonathan ស៊ីស្មៅនៅក្នុងសួនច្បារនៃវិមានរបស់លោក William Grey-Wilson អភិបាលនៃកោះ Saint Helena ។ យោងតាម Guardian បានឱ្យដឹងទៀតថា អណ្តើកនេះត្រូវបានផ្តល់ខួបកំណើតជាផ្លូវការនៅថ្ងៃទី ៤ ខែធ្នូឆ្នាំ ១៨៣២។

បច្ចុប្បន្នអណ្តើក Jonathan ទទួលបានកំណត់ត្រាពិភពលោក Guinness World Records (GWR) ចំនួនពីរសម្រាប់សត្វលើគោកដែលរស់នៅបានយូរបំផុត និងជាអណ្តើកយក្សដែលចំណាស់ជាងគេបំផុតលើផែនដី។ វាក៏ទទួលបានងារជាថនិកសត្វដែលរស់នៅបានយូរជាងគេបំផុតលើពិភពលោកក្នុងឆ្នាំ ២០២១ រហូតមកដល់បច្ចុប្បន្ន៕

ប្រទេសថៃ ៖ កាលពីថ្ងៃទី៧ ខែធ្នូ ឆ្នាំ២០២៣ សារព័ត៌មានជាច្រើននៅប្រទេសថៃបានបង្ហោះវីដេអូស្ត្រីម្នាក់កំពុងច្រកទឹកចូលដប ហើយសរសេរថា «សង្ឃឹមថា នាងនឹងមិនច្រកទឹកនេះទៅលក់ឱ្យគេផឹក ។ ក្រសួងសុខាភិបាលនៅឯណា សូមជួយត្រួតពិនិត្យផង» ។ នៅក្នុងវីដេអូនេះ គេបានឃើញស្ត្រីម្នាក់កំពុងច្រកទឹកដាក់ដប បន្ទាប់មកក៏បិទគំរបដប ហើយពេលខ្លះ នាងបានបើកក្បាលរ៉ូប៊ីណេបង្ហូរទឹកម៉ាស៊ីនច្រកចូលដបតែម្តង ។

ចំណែកដៃរបស់នាងវិញទទឹកជោគ ហើយនាងពុំបានពាក់ស្រោមដៃឱ្យបានត្រឹមត្រូវទេ ។ ក្រោយពីនាងបង្ហូរទឹកពីក្បាលរ៉ូប៊ីណេចូលដបរួចរាល់ហើយ នាងក៏បោះដបទាំងនេះទុកមួយគំនរ ។ បើតាមវីដេអូបង្ហាញថា ហេតុការណ៍នេះបានកើតឡើងនៅប្រទេសថៃ ពីព្រោះក្នុងស្លាកនៅលើជញ្ជាំងមានសរសេរជាអក្សរថៃទៀតផង ។

វីដេអូនេះត្រូវបានអ្នកលេងបណ្តាញសង្គមថៃចែកចាយ (Share) ជាច្រើននាក់ ហើយពួកគេបានលើកឡើងពីបញ្ហាអនាម័យ និងសួរថា តើទឹកដែលនាងច្រកដាក់ដបនេះត្រៀមយកទៅលក់នៅតាមផ្សារនានាមែនទេ? ខណៈមនុស្សខ្លះទៀត ក្រោយពីបានមើលវីដេអូនេះហើយនិយាយថា ៖ «ផឹកទឹកសុទ្ធហើយមានអារម្មណ៍ស្រស់ថ្លា ត្រជាក់ចិត្តមែន ព្រោះក្រុមហ៊ុនទឹកសុទ្ធភ្លេចគិតពីបញ្ហាអនាម័យ និងបណ្តោយឱ្យបុគ្គលិកបើកក្បាលរ៉ូប៊ីណេបង្ហូរទឹកម៉ាស៊ីនច្រកដប» ។ ចុងក្រោយ អ្នកលេងបណ្តាញសង្គមថៃបានអំពាវនាវឱ្យមន្ត្រីពាក់ព័ន្ធជួយត្រួតពិនិត្យករណីនេះ ។

លោក Narong Aphikulwanich ជាមន្ត្រីការិយាល័យត្រួតពិនិត្យចំណីអាហារ និងឱសថប្រទេសថៃបានជ្រាបពីករណីនេះហើយ ហើយលោកបានផ្ញើវីដេអូដែលល្បីល្បាញក្នុងបណ្តាញសង្គមទៅឱ្យក្រុមការងារធ្វើការត្រួតពិនិត្យ ដើម្បីស្វែងរកទីតាំងពិតប្រាកដនៅក្នុងវីដេអូ ។ បន្ទាប់មក លោកនឹងបញ្ជូនកម្លាំងជំនាញទៅត្រួតពិនិត្យដល់ទីកន្លែងតែម្តង ៕ ប្រភព ៖ 3Plus News