ឥណ្ឌា គឺជាប្រទេសដែលសម្បូរទៅដោយអាហារបួស ដែលមានលក្ខណៈជានំ ឬបន្លែ ផ្លែឈើច្រើនជាងសាច់ ដូច្នេះប្រសិនបើអ្នកចង់ទៅកំសាន្តនៅក្នុងប្រទេសនេះ យើងសូមណែនាំអាហារឆ្ងាញ់ៗនិងពេញនិយមបំផុតទាំង ៨ ដូចខាងក្រោម៖

១.Masala dosas៖ ម៉ាសាឡា ដូសា គឺមុខម្ហូបដ៏ល្បីបំផុតរបស់ប្រទេសឥណ្ឌាខាងត្បូង ក៏ដូចជាមានភាពល្បីល្បាញទូទាំងពិភពលោកផងដែរ។ ម្ហូបមួយប្រភេទនេះ មានរូបរាងស្រដៀងនឹងនំខេករបស់បារាំង និងជាម្ហូបប្រពៃណីរបស់ឥណ្ឌា ដែលភ្ញៀវទេសចរជាច្រើនបាននិយាយថា អាហារនេះមានរសជាតិឆ្ងាញ់ណាស់។

២.Chaat៖ ឆាត គឺជាអាហារតាមដងផ្លូវដ៏ពេញនិយមបំផុតនៅទីក្រុងដេលី ប្រទេសឥណ្ឌា។ មុខម្ហូបឆាត មានគ្រឿងផ្សំដ៏អស្ចារ្យនៃបំណែកដំឡូងបារាំង នំបុ័ងចៀន និងសណ្តែកសៀង តុបតែងជាមួយស្លឹកខ្ទឹមស្រស់ ទឹកដោះគោជូរ និងខ្ញីស្ងួត រួមទាំងទឹកអំពិលទុំ។

៣.Dal makhani៖ ដាល់ម៉ាកានី គឺជាស៊ុបធ្វើឡើងដោយការចំហុយសណ្តែកខ្មៅតូចៗជាច្រើនម៉ោង រួមជាមួយបន្លែជាច្រើនមុខ ដោយមុខម្ហូបនេះ ត្រូវបានគេចាត់ទុកថាល្អបំផុត សម្រាប់កម្មវិធីធំៗដូចជាពិធីជប់លៀង និងពិធីមង្គលការជាដើម។

៤.Vada pav៖ វ៉ាដា ប៉ាវ គឺជាម្ហូបបួសដ៏ពេញនិយមបំផុតរបស់ប្រទេសឥណ្ឌា ដែលមនុស្សជាច្រើនហៅម្ហូបនេះថាប៊ឺហ្គឺឥណ្ឌា ដោយនំទាំងនេះត្រូវបានរកឃើញនៅក្នុងតូបលក់អាហារតាមដងផ្លូវទូទាំងទីក្រុងបុមបៃ។

៥.Stuffed paratha៖ ប៉ារ៉ាថា គឺជានំបន្ទះ និងជាអាហារពេលព្រឹកដ៏ល្បីរបស់ឥណ្ឌាភាគខាងជើង ដោយវិធីសាមញ្ញបំផុតក្នុងការញ៉ាំប៉ារ៉ាថាគឺដាក់វាជាមួយនឹងគ្រឿងផ្សំផ្សេងៗទៀតតាមជម្រើសរបស់អ្នក។

៦.Dhokla៖ Dhokla ត្រូវបានគេទទួលស្គាល់ថាជាម្ហូបប្រចាំតំបន់នៃភាគពាយ័ព្យប្រទេសឥណ្ឌា វាគឺជាអាហារសម្រន់បួសដ៏ឈ្ងុយឆ្ងាញ់ដែលធ្វើពីអង្ករ និងសណ្តែកសៀង ជាមួយនឹងម្ទេសចៀន ខ្ទឹមក្រហម ខ្ញី និង baking soda។

៧.Barfi៖ Barfi គឺជាបង្អែមប្រពៃណីដ៏ពេញនិយមបំផុតរបស់ប្រជាជនឥណ្ឌា ដោយបង្អែមនេះត្រូវបានផលិតចេញពីម្សៅទឹកដោះគោ និងទឹកដោះគោខាប់ ក៏ដូចជាត្រូវបានគេចាត់ទុកថាល្អបំផុត សម្រាប់កម្មវិធីធំៗដូចជាពិធីជប់លៀង និងពិធីមង្គលការជាដើម។

៨. Pani puri៖ Pani Puri ឬ gol guppa ត្រូវបានគេចាត់ទុកថាជាអាហារដ៏ឆ្ងាញ់ប្រចាំរដ្ឋ Bihar ភាគខាងជើងប្រទេសឥណ្ឌា។ អាហារសម្រន់តាមដងផ្លូវដ៏ល្អឥតខ្ចោះនេះ ធ្វើពីស្រូវសាលីដំឡូងហឹរ សណ្តែកសៀង និងទឹកអម្ពិលដែលមានរសជាតិហឹរ រួមជាមួយនឹងគ្រឿងទេសដ៏ឈ្ងុយឆ្ងាញ់ជាច្រើនមុខទៀត៕

ប្រទេសថៃ ៖ កាលពីថ្ងៃទី៣១ ខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានបង្ហោះសារនៅក្នុងបណ្តាញសង្គម X (Twitter) អំពីកិច្ចប្រជុំគណៈកម្មការនៃការិយាល័យការពារ និងបង្ក្រាបគ្រឿងញៀនថា នេះជាកិច្ចប្រជុំលើកដំបូងរបស់រដ្ឋាភិបាលថ្មីពាក់ព័ន្ធនឹងបញ្ហាគ្រឿងញៀន ។ លោកនាយករដ្ឋមន្ត្រីថៃសង្ឃឹមថា ការិយាល័យការពារ និងបង្ក្រាបគ្រឿងញៀន នឹងមានគោលនយោបាយកាត់បន្ថយការប្រើប្រាស់គ្រឿងញៀន ពីព្រោះវាជាគោលនយោបាយសំខាន់របស់រដ្ឋាភិបាល ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា ខ្ញុំបានកំណត់គោលដៅកាត់បន្ថយការប្រើប្រាស់គ្រឿងញៀននៅប្រទេសថៃ ឱ្យបានត្រឹមរយៈពេល១ឆ្នាំ ។ ហេតុនេះ ខ្ញុំនឹងផ្តល់ការណែនាំសម្រាប់ធ្វើការជាមួយស្ថាប័នពាក់ព័ន្ធ រួមមាន ៖

១-គ្រប់ស្ថាប័នពាក់ព័ន្ធទាំងអស់ត្រូវសហការគ្នាធ្វើការ និងមិនបែងចែកការងារគ្នាដើម្បីសម្រេចគោលដៅរួមគ្នា គឺកាត់បន្ថយទុក្ខលំបាករបស់ពលរដ្ឋថៃ ដែលបណ្តាលមកពីការប្រើប្រាស់ថ្នាំញៀន ។

២-វិធានការប្តូរអ្នកជក់ថ្នាំញៀនឱ្យក្លាយជាអ្នកជំងឺ, សង្កត់ធ្ងន់លើការចូលរួមរបស់សហគមន៍, ដោះស្រាយបញ្ហាអំពើហិង្សាផ្លូវចិត្តដែលបណ្តាលមកពីថ្នាំញៀន, លើកទឹកចិត្តឱ្យបំបាត់គ្រឿងញៀន ព្រមទាំងត្រៀមការងារ និងឧបករណ៍បំបាត់គ្រឿងញៀនឱ្យបានគ្រប់គ្រាន់នៅទូទាំងប្រទេសថៃ និងមានប្រសិទ្ធភាព ។

៣-អនុវត្តវិធានការផ្លូវច្បាប់ជាក់លាក់ ដោយលុបបំបាត់ក្រុមជួញដូរថ្នាំញៀន, គ្រប់គ្រងការលួចនាំចូល, រឹបអូសយកសម្ភារៈរបស់អ្នកជួញដូរ, ចាត់ការប្រភពជួញដូរ, ស្វែងរកការជួញដូរនៅតាមព្រំដែន និងបង្ក្រាបដើម្បីកាត់ផ្តាច់ច្រកនាំចូលថ្នាំញៀន ព្រមទាំងចរចាជាមួយស្ថានទូតប្រទេសជិតខាង ដើម្បីសហការគ្នាកាត់បន្ថយការលួចនាំចូល ។

៤-គ្រប់គ្រងថ្នាំញៀនតាមរយៈយុទ្ធសាស្ត្រថ្នាក់ខេត្ត ដោយសូមឱ្យថ្នាក់ខេត្តធ្វើការនាំមុខដើម្បីដោះស្រាយបញ្ហាគ្រឿងញៀនក្នុងខេត្ត ហើយត្រូវអនុវត្តតាមមធ្យោបាយវាស់វែងជាក់ស្តែង ។

៥-អនុវត្តតាមច្បាប់ប្រឆាំងគ្រឿងញៀនឱ្យកាន់តែខ្លាំង ពីព្រោះវាជាច្បាប់កែប្រែមូលដ្ឋានសម្រាប់ដោះស្រាយបញ្ហាគ្រឿងញៀន ។ លើសពីនេះ ក៏មានការបង្កើនទំនាក់ទំនងជាមួយស្ថាប័នផ្សេងៗផងដែរ ដើម្បីបង្ខំឱ្យអនុវត្តច្បាប់យ៉ាងមានប្រសិទ្ធភាព ៕ ប្រភព ៖ khaosod

សហអាមេរិក៖ ក្រុមហ៊ុន Meta បានចាប់ផ្តើមគិតលុយចំនួន ១៣ ដុល្លារអាមេរិកក្នុងមួយខែសម្រាប់បណ្តាញសង្គម Facebook និង Instagram នៅក្នុងទីផ្សារអឺរ៉ុបប្រសិនបើអ្នកប្រើប្រាស់មិនចង់ឃើញការផ្សាយពាណិជ្ជកម្ម។

យោងតាមគេហទំព័រ Meta ដែលបានចុះផ្សាយកាលពីថ្ងៃទី ៣០ ខែតុលាកន្លងទៅថា ក្រុមហ៊ុននឹងចាប់ផ្តើមអនុវត្តគិតលុយតែក្នុងទីផ្សារអឺរ៉ុបប៉ុណ្ណោះ សម្រាប់អ្នកដែលមិនចង់ឃើញការផ្សាយពាណិជ្ជកម្មនៅក្នុងបណ្ដាញសង្គម Facebook និង Instagram ។ ដូច្នេះ អ្នកប្រើប្រាស់នៅក្នុងតំបន់នេះអាចបង់ប្រាក់ចំនួន ១៣ ដុល្លារក្នុងមួយខែ នៅលើកម្មវិធី iOS និង Android ចាប់ពីខែវិច្ឆិកានេះតទៅ ដើម្បីជៀសវាងការមើលឃើញការផ្សាយពាណិជ្ជកម្ម។

សម្រាប់អ្នកដែលមានគណនីច្រើន Meta បាននិយាយថាការជាវនឹងគាំទ្ររាល់គណនីទាំងអស់ដែលភ្ជាប់ជាមួយអ្នកប្រើប្រាស់នៅក្នុងមជ្ឈមណ្ឌលគណនី។ ទោះយ៉ាងណាក៏ដោយនៅខែមីនាឆ្នាំក្រោយក្រុមហ៊ុននឹងប្រមូលប្រាក់បន្ថែមចំនួន ៦-៨ ដុល្លារអាមេរិកសម្រាប់គណនីថ្មីនីមួយៗ។
ការផ្លាស់ប្តូរនេះគឺជាលើកទីមួយហើយដែល Meta បានគិតថ្លៃ សេវាអ្នកប្រើប្រាស់ Facebook និង Instagram ដោយ Meta បាននិយាយថាការធ្វើបែបនេះគឺដើម្បីបំពេញតាមបទប្បញ្ញត្តិអឺរ៉ុបស្តីពីការការពារទិន្នន័យ។
គួររំលឹកដែរថា កាលពីពេលថ្មីៗកន្លងទៅនេះ Meta ត្រូវបានចោទប្រកាន់ដោយអាជ្ញាធរការពារទិន្នន័យអៀរឡង់ពីបទបំពានច្បាប់ការពារទិន្នន័យទូទៅ (GDPR) និងពិន័យជាប្រាក់ចំនួន ៤១២ លានដុល្លារអាមេរិក។ ដូច្នេះ ក្រុមហ៊ុនរបស់ Mark Zuckerberg នឹងត្រូវបានបង្ខំឱ្យអនុវត្តតាម ដោយអនុញ្ញាតឱ្យអ្នកប្រើប្រាស់សម្រេចចិត្តយ៉ាងសកម្មថាតើត្រូវអនុញ្ញាតឱ្យវេទិការបស់ពួកគេមានការផ្សាយពាណិជ្ជកម្ម ឬក៏គ្មាន។

ប្រសិនបើអ្នកប្រើប្រាស់សម្រេចចិត្តឱ្យវេទិការបស់ពួកគេមានការផ្សាយពាណិជ្ជកម្មធម្មតានោះ Meta មិនគិតលុយអ្វីទេ មានន័យថាអ្នកអាចប្រើបណ្ដាញសង្គមដោយឥតគិតថ្លៃ ប៉ុន្តែប្រសិនបើអ្នកប្រើប្រាស់សម្រេចចិត្តឱ្យវេទិការបស់ពួកគេមិនមានការផ្សាយពាណិជ្ជកម្មនៅក្នុងបណ្តាញ នោះក្រុមហ៊ុន Meta នឹងគិតលុយចំនួន ១៣ ដុល្លារអាមេរិកក្នុងមួយខែ។
ទោះជាយ៉ាងណាក៏ដោយ Meta មិនបាននិយាយថាតើគោលនយោបាយនេះនឹងត្រូវបានពង្រីកទៅទីផ្សារផ្សេងទៀតឬអត់ទេ ដោយក្រុមហ៊ុននៅតែគាំទ្រការផ្សាយពាណិជ្ជកម្មឥតគិតថ្លៃរបស់ខ្លួន៕

ប្រទេសថៃ ៖ កាលពីថ្ងៃទី៣១ ខែតុលា ឆ្នាំ២០២៣ លោក Charoen Laothamathat នាយកសមាគមនាំចេញស្រូវថៃ បានលើកឡើងអំពីការនាំចេញស្រូវក្នុងរយៈពេល៩ខែនៃឆ្នាំ២០២៣ (គឺចាប់ពីខេមករា រហូតដល់ខែកញ្ញា) ស្មើនឹងបរិមាណ៦.០៨២.១៣៦តោន កើនឡើង១២,៣% ។ រីឯនៅខែកញ្ញា ឆ្នាំ២០២៣ បរិមាណការនាំចេញស្រូវទៅក្រៅប្រទេស ស្មើនឹង៨០៧.៧៧៦តោន ។

ការនាំចេញអង្ករលេខ១ និងអង្ករ៣កំណាត់បានកើនឡើងលើសខែសីហា ឆ្នាំ២០២៣ ដោយសារប្រទេសនាំចូលស្រូវបង្កើនការនាំចូល ដើម្បីបំពេញស្តុកស្រូវក្នុងប្រទេសដែលធ្លាក់ចុះ និងត្រៀមទុកសម្រាប់ពិធីបុណ្យនៅចុងឆ្នាំ២០២៣ ។ លើសពីនេះ ការផ្គត់ផ្គង់អង្ករនៅលើទីផ្សារពិភពលោកមានកំណត់ ដោយសារវិធានការនាំចេញអង្កររបស់ប្រទេសឥណ្ឌា ដែលគេគិតថា នឹងប៉ះពាល់រហូតដល់ដើមឆ្នាំ២០២៤ ទើបធ្វើឱ្យប្រទេសទិញស្រូវងាកមកទិញស្រូវរបស់ថៃច្រើនឡើង ។

លោក Charoen Laothamathat នាយកសមាគមនាំចេញស្រូវថៃលើកឡើងថា ការនាំចេញអង្ករលេខ១ នៅខែកញ្ញា ឆ្នាំ២០២៣ ស្មើនឹងបរិមាណ២៣៦.១២០តោន កើនឡើង១៩០,៥% បើធៀបនឹងខែសីហា ឆ្នាំ២០២៣ ។ ចំណែកទីផ្សារសំខាន់ៗរួមមាន ប្រទេសអាហ្វ្រិកខាងត្បូង, បេនីន, និងយេម៉ែន ប៉ុន្តែការនាំចេញអង្ករស ស្មើនឹងបរិមាណ៣៤៩.៧០៩តោន ធ្លាក់ចុះ៧,៥% ហើយទីផ្សារសំខាន់ៗរួមមាន ប្រទេសឥណ្ឌូណេស៊ី, ម៉ាឡេស៊ី, អ៊ីរ៉ាក់, អង់ហ្គោឡា, ជប៉ុន, ហ្ស៊ីមបាវ៉េ, អាហ្វ្រិកខាងត្បូង, បេនីន និងម៉ូសំប៊ិក ។

ចំណែកការនាំចេញអង្ករក្រអូបផ្កាម្លិះ ស្មើនឹងបរិមាណ១០៧.៦៧៨តោន ធ្លាក់ចុះ០,៤% ហើយទីផ្សារសំខាន់ៗរួមមាន សហរដ្ឋអាមេរិក, កាណាដា, ហុងកុង, សិង្ហបុរី និងចិន ។

នាយកសមាគមនាំចេញស្រូវថៃរំពឹងថា នៅខែតុលា ឆ្នាំ២០២៣ ការនាំចេញស្រូវរបស់ថៃនឹងស្មើចំនួន៨សែនតោន ដោយសារមានស្រូវជាច្រើនដែលក្រុមហ៊ុននាំចេញពុំទាន់បាននាំចេញអស់ ស្របគ្នានឹងប្រទេសនាំចូលស្រូវចម្បងក្នុងតំបន់អាស៊ាន ដូចជា ឥណ្ឌូណេស៊ី, ម៉ាឡេស៊ី រួមទាំងទីផ្សារប្រចាំតំបន់ដូចជា អាហ្វ្រិក, មជ្ឈិមបូព៌ា និងអាមេរិក បានបង្កើនការនាំចូលស្រូវ-អង្ករជាបន្តបន្ទាប់ ក្នុងនោះមាន អង្ករស, អង្ករលេខ១ និងអង្ករក្រអូប ដើម្បីប្រមូលទុកធ្វើស្បៀងសម្រាប់ចុងឆ្នាំ២០២៣ ។

ចំណែកប្រទេសដែលបាននាំចេញស្រូវច្រើនជាងគេនៅលើពិភពលោក រួមមាន ៖ ឥណ្ឌា, វៀតណាម, ថៃ, ប៉ាគីស្ថាន និងសហរដ្ឋអាមេរិក ។ រីឯថៃមិនអាចស្ថិតក្នុងចំណាត់ថ្នាក់លេខ២ ជាប្រទេសនាំចេញស្រូវទៅកាន់ទីផ្សារពិភពលោកទេ ពីព្រោះវៀតណាមកំពុងបង្កើនការនាំចេញស្រូវ ៕ ប្រភព ៖ Thai PBS