BRICS គឺជាពាក្យកាត់តំណាងមកពីប្រទេសចំនួន៥ រួមគ្នាគឺ ប្រេស៊ីល រុស្សី ឥណ្ឌា ចិន និងអាហ្រ្វិកខាងត្បូង ហើយ BRICS ក៏ជាក្រុមប្រទេសមហាអំណាចរីកចម្រើនខាងសេដ្ឋកិច្ចទីផ្សារលើពិភពលោកផងដែរ ដែលគេជឿថានៅត្រឹមឆ្នាំ២០៥០ខាងមុខ អាចនឹងមានប្រទេសណាមួយក្នុងចំណោមប្រទេសទាំង៥នេះនឹងឡើងកាន់តំណែងជើងឯកលើពិភពលោក តាមរយៈការគ្រប់គ្រងផ្នែកហិរញ្ញវត្ថុនិងធនាគារពិភពលោក បន្ទាប់ពីសហរដ្ឋអាមេរិក។

ខណៈពេលនេះ BRICS ដែលជាប្រទេសទាំង៥ខាងលើ កំពុងសម្លឹងរកមើលឪកាសក្នុងការផ្តួលរំលំប្រាក់ដុល្លារអាមេរិក ដោយមានបំណងបើកដំណើរការរូបីយប័ណ្ឌថ្មីនៅលើទីផ្សារអន្តរជាតិ។
ការធ្វើបែបនេះគឺកំពុងតែគំរាមកំហែងយ៉ាងខ្លាំងដល់ប្រាក់ដុល្លារអាមេរិក ដែលគោលបំណងដ៏ធំមួយរបស់ BRICS គឺជាការគ្រងគ្រងហិរញ្ញវិត្ថុពិភពលោក ជំនួសអោយប្រាក់ដុល្លារអាមេរិកទៅនឹងរូបីយប័ណ្ឌថ្មីមួយទៀត។ ជាក់ស្តែងដូចយើងដឹងហើយថាសមាជិកមួយដែររបស់ BRICS គឺប្រទេសអារ៉ាប៊ីសាអូឌីត ដែលជាប្រទេសនាំចេញប្រេងនៅជុំវិញពិភពលោក ហើយប្រសិនបើថ្ងៃណាមួយប្រទេសនេះ បើកទទួលការទូទាត់តម្លៃប្រេងពីប្រទេសផ្សេងៗតាមរយៈរូបីយប័ណ្ឌរបស់ប្រទេសនីមួយៗ ដែលមិនមែនជារូបីយប័ណ្ឌដុល្លារនោះ ប្រាកដណាស់ថាការផ្លាស់ប្តូរនឹងកើតមាន ដោយប្រាក់ដុល្លារអាមេរិកនឹងបាត់បង់ឥទ្ធិពលនៅក្នុងការគ្រងគ្រងប្រេងលំដាប់ពិភពលោក ជំនួសមកវិញដោយអារ៉ាប៊ីសាអូឌីត។

បើទោះបីជាយ៉ាងណាក៏ដោយ BRICS អាចប្រកួតប្រជែងជាមួយប្រាក់ដុល្លារបានដោយមិនចាំបាច់បើកដំណើរការនៃរូបីយប័ណ្ឌថ្មីនោះទេ។ ដោយផ្អែកទៅលើទីប្រឹក្សាជាន់ខ្ពស់មួយរូបគឺលោក Joe Sullivan បានបញ្ជាក់ថា ប្រទេសមួយចំនួនគឺកំពុងតែទូទាត់ប្រាក់ក្នុងការធ្វើពាណិជ្ជកម្មរបស់ពួកគេដោយផ្អែកទៅលើរូបីយប័ណ្ឌក្នុងស្រុករបស់ពួកគេផ្ទាល់ ដែលមិនមែនជាប្រាក់ដុល្លារនោះទេ។

លោកក៏បានបន្តទៀតថា BRICS មិនចាំបាច់រងចាំរហូតដល់រូបីយប័ណ្ឌថ្មីត្រូវដាក់ឲ្យប្រើប្រាស់ជំនួសប្រាក់ដុល្លារនោះទេ។ បើយោងទៅតាមអ្នកវិភាគបានឲ្យដឹងថា ប្រសិនបើប្រទេស BRICS ទាំង៥នេះ បង្កើតច្បាប់ថ្មីមួយដែលតម្រូវឲ្យបណ្តាសមាជិកខ្លួន ធ្វើការទូទាត់ប្រាក់នៅពេលធ្វើពាណិជ្ជកម្មនៅក្នុងទម្រង់រូបីយប័ណ្ឌប្រទេសនីមួយៗ នោះឥទ្ធិពលរបស់ប្រាក់ដុល្លាអាមេរិកនឹងធ្លាក់ចុះដោយស្វ័យប្រវត្តិ លទ្ធផលវានឹងប៉ះពាល់ដល់សេដ្ឋកិច្ចអាមេរិកយ៉ាងធ្ងន់ធ្ងរ ដូចជា ធ្លាក់ចុះនៃប្រព័ន្ធហិរញ្ញវត្ថុនិងវិស័យធនាគារ ក៏ដូចជាប៉ះពាល់ដល់ទីផ្សារមូលធន ការធ្វើពាណិជ្ជកម្ម ការវិនិយោគអន្តរជាតិ ផលិតកម្ម ការប្រើប្រាស់ បច្ចេកវិទ្យា គោលនយោបាយ និងទេសចរណ៍ជាដើម។

ជាមួយគ្នានេះ BRICS គឺកំពុងតែដាក់ប្រាក់យ័នរបស់ចិនសម្រាប់កិច្ចការពាណិជ្ជកម្មនិងការទូទាត់ផ្សេងៗដើម្បីជំនួសឲ្យប្រាក់ដុល្លារអាមេរិក។ ជាក់ស្តែង ថ្មីៗនេះសមាជិករបស់ BRICS មួយរូបដែរគឺ អាហ្សង់ទីនគឺបានប្រើប្រាស់ប្រាក់យ័នក្នុងការទូទាត់ប្រាក់មូលនិធិរូបិយប័ណ្ឌអន្តរជាតិ IMF ជំនួសឲ្យការទូទាត់ដោយប្រាក់ដុល្លារ ដោយសារតែអាហ្សង់ទីនមានកង្វះខាតប្រាក់ដុល្លារនៅក្នុងទុនបម្រុង។ដូច្នេះហើយទើបធនាគារកណ្តាលរបស់ប្រទេសនេះបានទូទាត់ប្រាក់យ័នមួយចំនួនធំទៅកាន់ IMF និង មួយចំនួនតូចប៉ុណ្ណោះជាប្រាក់ដុល្លារ។

ជាថ្នូរត្រឡប់មកវិញ ប៉ុន្មានឆ្នាំទៅមុខទៀត វាអាស្រ័យទៅលើគោលនយោបាយរបស់ BRICS ថានឹងធ្វើដូចម្តេចដើម្បីរក្សាបានតុល្យភាពប្រាក់ដុល្លារមិនឲ្យឡើងថ្លៃ ហើយប្រសិនបើដូច្នោះមែន ពិភពលោកនឹងផ្អៀងពីការកាន់កាប់របស់លោកខាងលិចទៅជាការកាន់កាប់របស់លោកខាងកើតវិញ ប្រសិនបើប្រទេសកំពុងអភិវឌ្ឍទាំងអស់ចាយតែលុយដែលជារូបីប័ណ្ឌក្នុងស្រុករបស់ពួកគេ៕

បរទេស៖ ក្រុមហ៊ុន Tesla គ្រោងនឹងផលិតរថយន្តអគ្គិសនី ដែលមានតម្លៃត្រឹមតែ ២៥,០០០ អឺរ៉ូ (ប្រមាណ ២៦,០០០ ដុល្លារអាមេរិក) ពីរោងចក្រក្នុងប្រទេសអាឡឺម៉ង់នៃទីក្រុងប៊ែរឡាំង។ នេះបើតាមប្រភពព័ត៌មាន Reuters ដែលបានចុះផ្សាយកាលពីថ្ងៃទី៧ ខែវិច្ឆិកាកន្លងទៅ។

បច្ចុប្បន្ននេះ តម្លៃជាមធ្យមនៃរថយន្តអគ្គិសនីនៅអឺរ៉ុបភាគច្រើនជាង ៦៥,០០០ អឺរ៉ូ (ប្រមាណជាង ៦៩,០០០ ដុល្លារអាមេរិក) នេះបើយោងតាមក្រុមហ៊ុនស្រាវជ្រាវទីផ្សារ JATO Dynamics ។ រីឯរថយន្ត Tesla នៅក្នុងប្រទេសចិនវិញមានតម្លៃជាមធ្យម ៣១,០០០ យន់ (ប្រមាណ ៤២,០០០ ដុល្លារអាមេរិក)។

ដូច្នេះ Tesla គ្រោងនឹងផលិតរថយន្តអគ្គិសនីដែលមានតម្លៃទាបបំផុតក្នុងទីផ្សារពិភពលោក ដើម្បីឱ្យសមស្របនឹងបរិយាកាសសង្គម ក៏ដូចជាបំពេញតាមតម្រូវការរបស់ទីផ្សារផងដែរ។ ទោះជាយ៉ាងណាក៏ដោយ យោងតាមប្រភពដដែល បានឱ្យដឹងទៀតថា បច្ចុប្បន្នក្រុមហ៊ុន Tesla មិនទាន់បានបញ្ជាក់ពីតារាងពេលវេលាច្បាស់លាស់នៅឡើយទេ ក្នុងការផលិតរថយន្តអគ្គីសនីដែលតម្លៃ ២៦,០០០ ដុល្លារអាមេរិកនេះ។

គួរបញ្ជាក់ដែរថា ក្រុមហ៊ុន Tesla របស់លោក Elon Musk មានគម្រោងផលិតរថយន្តអគ្គិសនីដែលមានតម្លៃទាបបំផុតក្នុងទីផ្សារពិភពលោកតាំងពីឆ្នាំ ២០២២ មកម្លេះប៉ុន្តែមិនទាន់ឃើញបានអនុវត្តជំនាញបច្ចេកវិទ្យានៅឡើយទេ ហើយបន្ទាប់មកក៏បានបញ្ឈប់ផែនការនេះរហូតមកដល់ពេលបច្ចុប្បន្ន៕

Moscow ៖ កាលពីថ្ងៃពុធ ទី៨ ខែវិច្ឆិកានេះ ជំនួបកំពូលរវាង ប្រធានាធិតីរុស្សី លោកវ៉្លាឌីមៀ ពូទីន និងឧត្តមសេនីយ៍កំពូលរបស់ចិន ដែលជាមន្រ្តីជំនិតរបស់លោកស៊ី ជីនពីង នៅទីក្រុងម៉ូស្កូវ ក្នុងខណៈពេលនោះដែរ លោកពូទីនបានធ្វើការកោតសរសើរចំពោះ ការធ្វើកិច្ចសហប្រតិបត្តិការដ៏សំខាន់ គឺ សមយុទ្ធយោធាបច្ចេកទេសខ្ពស់និងទំនើបបំផុតរវាងចិននិងរុស្សី។

ប្រទេសចិននិងរុស្សីបានប្រកាសថា ពួកគេទាំងទាំង២គឺជាដៃគូរសហការ«គ្មានដែនកំណត់» គឺក្នុងន័យថាអាចពឹងពាក់គ្នាបាននៅគ្រប់កាលៈទេសៈទាំងអស់ ដែលសេចក្តីប្រកាសនេះបានធ្វើឡើងតាំងពីខែកុម្ភះឆ្នាំ២០២២មកម្ល៉េះ នៅពេលដែលលោកពូទីនបានទៅធ្វើទស្សនកិច្ចជាផ្លូវការជាច្រើនថ្ងៃនៅក្នុងទីក្រុងប៉េកាំងប្រទេសចិន ហើយនៅមុនពេលដែលរុស្សីបានបញ្ជូនទាហានរាប់ម៉ឺននាក់របស់ខ្លួនចូលទៅវាយលុកអ៊ុយក្រែន ដែលបង្កជាភ្លើងសង្រ្គាមវាទដីធ្លីដ៏សាហាវបំផុតបន្ទាប់ពីសង្គ្រាមលោកលើកទី២។

នៅក្នុងជំនួបរវាងឧត្តមសេនីយ៍ចិន Zhang Youxia និង លោក Sergei Shoigu រដ្ឋមន្រ្តីក្រសួងការពារជាតិរុស្សី ក៏មានបណ្តាំរបស់លោកពូទីនទៅកាន់លោកស៊ីជិនពីងថា មេដឹកនាំយើងទាំង២នឹងបង្កើតនូវទំនាក់ទងជាមិត្តល្អ និងការងារល្អរួមគ្នាបន្តទៀត។ លោកបានសង្កត់ធ្ងន់ថា រុស្សីនិងចិនមិនត្រឹមតែជាសម្ព័ន្ធមិត្តយោធាប៉ុណ្ណោះទេ ប៉ុន្តែទំនាក់ទំនងប្រទេសយើងទាំង២ គឺជាកម្លាំងជួយរក្សាស្ថេរភាពនិងសន្តិភាពសម្រាប់ពិភពលោកទាំងមូលផងដែរ។

ជាការឆ្លើយតបផងដែរ លោកប្រធានាធិបតីអាមេរិកគឺ លោកចូ បៃឌិន បានចាត់ទុកថាចិនគឺជាគូរប្រជែងសេដ្ឋកិច្ចដ៏ធំបំផុតរបស់ខ្លួន ហើយរុស្សីវិញក៏ជាការគំរាមកំហែងដ៏ធំបំផុតមកកាន់រដ្ឋរបស់ខ្លួនផងដែរ។ លោកចូបៃឌិន ក៏បានបញ្ជាក់ទៀតដែរថា នៅក្នុងសតវត្សនេះគឺជាការប្រកួតប្រជែងដ៏តឹងតែងមួយរវាងលិទ្ធិប្រជាធិបតេយ្យនិងបក្សកម្មុនីស្ត ដើម្បីដណ្តើមយកអាទិភាពក្នុងការគ្រប់គ្រងពិភពលោកទាំងមូល។

លោកពូទីន ដែលជាមេដឹកនាំមហាអំណាចនុយក្លេអ៊ែរ ដ៏ធំបំផុតលើពិភពលោកមួយរូបដែរ ក៏បានលើកឡើងផងដែរថា កិច្ចសហប្រតិបត្តិការរបស់យើងទាំង២គឺ ចិននិងរុស្សី ទៅលើវិស័យយោធា ក៏ដូចជាបច្ចេកទេសយោធាដ៏ទំនើបបំផុតគឺកំពុងតែកើនឡើងជាលំដាប់ និងឈានមុខគេលើពិភពលោក ព្រមទាំងធានាបាននូវយុទ្ធសាស្រ្តសុខសុវត្ថិភាពជាសកលផងដែរ។ ក្នុងន័យនេះ លោកចង់ផ្តោតទៅលើការគ្រប់គ្រងសព្វាវុធទំនើប ទាំងលើគោក ផ្លូវទឹក និងលំហរអាកាសរបស់ចិននិងរុស្សី ព្រមទាំងមានការសន្យាថានឹងធានាអោយបាននូវសន្តិភាពលើពិភពលោក តាមរយៈយុទ្ធសាស្រ្តរបស់ប្រទេសទាំង២នេះផងដែរ។

ឆ្លៀតក្នុងឪកាសនោះ លោកពូទីនក៏បានចោទប្រកាន់អាមេរិកផងដែរថាបានទាក់ទងនឹងការបង្កភាពតានតឹងនៅក្នុងតំបន់អាស៊ីរបស់អាមេរិក ដោយព្យាយាមបង្កើតនូវសម្ព័ន្ធភាពយោធា របស់ខ្លួន ដោយយកលេសអះអាងរបស់ខ្លួនផ្អែកទៅលើសន្ធិសញ្ញា«AUKAS» (ជាសន្ធិសញ្ញាត្រីភាគី បង្កើតឡើងដោយអូស្រ្តាលី អង់គ្លេសនិងអាមេរិក នៅក្នុងការរក្សាបាននូវសន្តិភាពនៅតំបន់ឥណ្ឌូប៉ាស៊ីហ្វិក) ក្នុងការរៀបចំ ពង្រីកកងកម្លាំង ពង្រឹងសមត្ថភាពនិងទំនើបកម្មនុយក្លេអ៊ែររបស់អាមេរិក ដោយត្រៀមខ្លួនរួចជាស្រេចក្នុងការធ្វើសង្រ្គាមជាមួយចិននិងរុស្សីនៅក្នុងពេលណាមួយក៏បាន។

ដូច្នេះហើយជាការឆ្លើយតប ចិននិងរុស្សីក៏បាន ប្រតិកម្មតបវិញយ៉ាងស្ងប់ស្ងាត់និងប្រុងប្រយ័ត្នបំផុត ព្រមទាំងពង្រឹងសមត្ថភាពការពាររបស់ខ្លួនទំាងលើផ្លូវគោក ផ្លូវទឹក និងផ្លូវអាកាស ដើម្បីទប់ទល់ជាមួយនឹងសហរដ្ឋអាមេរិករួមជាមួយលោកខាងលិច។ និយាយដោយអំណួតនិងទំនុកចិត្តបំផុតផងដែរ គឺរុស្សីពិតជាមានសមត្ថភាពនៅក្នុងការទប់ទល់ជាមួយនិងលោកខាងលិចពិតមែន ដែលបានដាក់ទណ្ឌកម្មដ៏តឹងរឹងបំផុតទៅលើផ្នែកសេដ្ឋកិច្ចជាសកលដែលមិនធ្លាប់មានពីមុនមក។ លើសពីនេះទៅទៀត បើទោះបីជាមានការដាក់ទណ្ឌកម្មបែបនេះទៅកាន់លោកខាងលិច ក៏រុស្សីមិនទទួលបានផលប៉ះពាល់ឬមានការលំបាកខ្លាំងតាមរយៈទណ្ឌកម្មនេះទាល់តែសោះ៕

ប្រទេសម៉ាឡេស៊ី៖ លោក Syed Saddiq ដែលជាអតីតរដ្ឋមន្ត្រីក្រសួងយុវជន និងកីឡាម៉ាឡេស៊ីត្រូវបានកាត់ទោសឱ្យជាប់ពន្ធនាគាររយៈពេល ៧ឆ្នាំ និងពិន័យជាប្រាក់ ២.១លានដុល្លារអាមេរិក ដោយសារជាប់ពាក់ព័ន្ធអំពើពុករលួយ។យោងតាមគេហទំព័រ CNA News ដែលបានចុះផ្សាយនៅថ្ងៃទី៩ ខែវិច្ឆិកាថ្មីៗនេះថា សមាជិកសភាមួយរូបនៃប្រទេសម៉ាឡេស៊ី មកពីគណបក្សមួយដែលបានដកខ្លួនចេញពី រដ្ឋាភិបាលចម្រុះកំពុងកាន់អំណាច ជុំវិញក្តីកង្វល់អំពីបញ្ហាអំពើពុករលួយ ត្រូវបានតុលាការជាន់ខ្ពស់នៃទីក្រុងគូឡាឡាំពួរកឃើញថា មានទោសពីបទប្រព្រឹត្តអំពើពុករលួយ។

លោក Syed Saddiq Syed Abdul Rahman ដែលជាសមាជិកសភាខាងលើ មកពីគណបក្ស MUDA ត្រូវបានតុលាការរកឃើញថាពិតជាមានទោសពីបទ ពាក់ព័ន្ធការរំលោភទំនុកចិត្ត ការគៃបន្លំទ្រព្យសម្បត្តិ និងការលាងលុយកខ្វក់ ហើយត្រូវបានផ្តន្ទាទោសដាក់ពន្ធនាគាររយៈពេល ៧ ឆ្នាំ រួមជាមួយការពិន័យជាប្រាក់ចំនួន ១០ លានរីងហ្គីត ឬស្មើនឹង ២.១ លានដុល្លារអាមេរិក។កន្លងទៅ កាលពីខែមីនា ឆ្នាំ២០២០ អតីតរដ្ឋមន្ត្រីក្រសួងយុវជន និងកីឡារូបនេះ ក៏ត្រូវបានចោទប្រកាន់ពីបទរំលោភលើអតីតមន្ត្រីនៃគណបក្ស Bersatu ក្នុងការក្លែងបន្លំថវិកាចំនួន ១ លានរីងហ្គីត (ជាង២១ម៉ឺនដុល្លារ) ដែលជាមូលនិធិសម្រាប់ក្រុមយុវជនរបស់គណបក្ស។

គួរបញ្ជាក់ដែរថា លោក Syed Saddiq បច្ចុប្បន្នមានអាយុ ៣០ ឆ្នាំធ្លាប់ជាប្រធានក្រុមយុវជនរបស់ Bersatu ប៉ុន្តែបានចាកចេញពីក្រុមនេះ ដើម្បីទៅបង្កើតគណបក្សផ្ទាល់ខ្លួនរបស់គាត់គឺ MUDA នៅឆ្នាំ ២០២០។ ទោះជាយ៉ាងណាក៏ដោយ យោងតាមប្រព័ន្ធផ្សព្វផ្សាយក្នុងស្រុកម៉ាឡេស៊ី តុលាការជាន់ខ្ពស់ទីក្រុងគូឡាឡាំពួ បានសម្រេចអនុញ្ញាតឱ្យលោក Syed Saddiq អាចពន្យារពេលអនុវត្តទោសជាបណ្តោះអាសន្ន ដើម្បីរង់ចាំការប្តឹងឧទ្ធរណ៍៕

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃលើកឡើងថា លោកមិនអាចទទួលយកបានទេ ករណីស្ថានីយប្រេងឥន្ធនៈមួយចំនួនដាក់ស្លាកប្រកាសប្រាប់អតិថិជនថា ប្រេងអស់ពីស្តុក ។ ក្រោយពីរដ្ឋាភិបាលមានវិធានការបញ្ចុះតម្លៃប្រេងសាំងនៅទូទាំងប្រទេស ធ្វើឱ្យពលរដ្ឋថៃសម្រុកទៅចាក់ប្រេងនៅតាមស្ថានីយប្រេងឥន្ធនៈ រហូតស្ថានីយប្រេងមួយចំនួនប្រកាសថា ប្រេងអស់ពីស្តុក ។ លោកនាយករដ្ឋមន្ត្រីថៃជឿថា ស្ថានីយទាំងនេះចង់បានប្រាក់ចំណេញច្រើន ហើយលោកក៏បញ្ជាទៅក្រសួងថាមពលឱ្យចាត់ការរឿងនេះ ។

នៅថ្ងៃទី៩ ខែវិច្ឆិកា ឆ្នាំ២០២៣ នៅវិមានរដ្ឋាភិបាល លោក សេដ្ឋា ថាវីស៊ីន នាយករដ្ឋមន្ត្រីប្រទេសថៃ បានផ្តល់សម្ភាសន៍ជាមួយក្រុមអ្នកសារព័ត៌មាន អំពីករណីពលរដ្ឋត្អូញត្អែរថា ស្ថានីយប្រេងឥន្ធនៈមួយចំនួនបានដាក់ស្លាកប្រកាសថា ប្រេងអស់ពីស្តុក ក្រោយពីរដ្ឋាភិបាលមានវិធានការបញ្ចុះតម្លៃប្រេងសាំង ។ លោកនាយករដ្ឋមន្ត្រីបញ្ជាក់ថា លោកបានជ្រាបពីបញ្ហានេះ ហើយលោកនឹងមិនយល់ស្របជាមួយស្ថានីយប្រេងទេ ។

ចំណែកលោក Peeraphan Salirathawiphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលលើកឡើងថា លោកត្រូវតែត្រួតពិនិត្យករណីនេះ ហើយស្ថានីយប្រេងឥន្ធនៈមិនអាចខ្វះប្រេងលក់ឱ្យអតិថិជនបានទេ ។ ដូច្នេះ វាជាតួនាទីរបស់ក្រសួងថាមពល ដែលត្រូវពិនិត្យមើលបញ្ហានេះឡើងវិញ ។

ពេលអ្នកសារព័ត៌មានសួរថា តើវាជាការស្តុកទុកប្រេងដើម្បីប្រមូលប្រាក់ចំណេញមែនទេ ? លោក សេដ្ឋា ថាវីស៊ីន នាយករដ្ឋមន្ត្រីថៃលើកឡើងថា វាជារឿងដែលពួកគេចង់បានប្រាក់ចំណេញច្រើន ប៉ុន្តែយើងមិនអាចទទួលយកបានទេ ហើយយើងត្រូវចាត់ការរឿងនេះ ។

គួរបញ្ជាក់ថា តាំងពីរដ្ឋាភិបាលថៃមានវិធានការបញ្ចុះតម្លៃប្រេងសាំងនៅទូទាំងប្រទេសរយៈពេល៣ខែ ធ្វើឱ្យពលរដ្ឋថៃសម្រុកទៅចាក់ប្រេងនៅតាមស្ថានីយប្រេងឥន្ធនៈ តាំងពីព្រឹកព្រលឹម រហូតដល់ល្ងាច ។ ប៉ុន្តែស្ថានីយប្រេងឥន្ធនៈមួយចំនួនលើកឡើងថា ពួកគេខ្វះខាតប្រេង ហើយក៏ដាក់ស្លាកប្រកាសថា ប្រេងអស់ពីស្តុក ៕ ប្រភព ៖ Thairath

ប្រទេសថៃ ៖ នៅថ្ងៃទី៩ ខែវិច្ឆិកា ឆ្នាំ២០២៣ សារព័ត៌មានថៃចុះផ្សាយថា ក្រោយប្រទេសថៃឆ្លងកាត់ដំណាក់កាលឆ្លងរាតត្បាតនៃជំងឺកូវីដ-១៩ និងវិធានការលើកលែងទិដ្ឋាការដល់ភ្ញៀវទេសចរចិន និងកាហ្សាក់ស្ថានរួចមក ប៉ុន្តែស្ថានភាពទេសចរណ៍នៅតំបន់ផ្សារបណ្តែតទឹក «ដាំណឺនសាឌួក» ស្ថិតក្នុងខេត្តរាជបុរី និងផ្សារបណ្តែតទឹក «អាំផាវ៉ា» ស្ថិតក្នុងខេត្តសមុទ្រសង់ក្រាម មានសភាពស្ងប់ស្ងាត់ភ្ញៀវទេសចរមកកម្សាន្ត ។ ហេតុនេះ អ្នកប្រកបអាជីវកម្ម និងសេវាកម្មក្នុងតំបន់ទាំងពីរបានស្នើឱ្យរដ្ឋាភិបាលចេញវិធានការជំរុញវិស័យទេសចរណ៍បន្ថែមទៀត ។

បើទោះជាស្ថានការណ៍ឆ្លងរាតត្បាតនៃជំងឺកូវីដ-១៩ បានធូរស្រាលមួយរយៈនៅប្រទេសថៃ ប៉ុន្តែផ្សារបណ្តែតទឹក «អាំផាវ៉ា» ស្ថិតក្នុងខេត្តសមុទ្រសង់ក្រាម ស្ទើរតែគ្មានភ្ញៀវទេសចរថៃ និងភ្ញៀវទេសចរបរទេសមកកម្សាន្តទេ ។ គេសង្កេតឃើញថា ហាងលក់ដូរជាច្រើនកន្លែងបានបិទទ្វារជាបន្តបន្ទាប់ និងប្រកាសលក់ហាងប្រមាណ៨០% ។

តាមការសាកសួរម្ចាស់ហាងលក់ដូរជាច្រើននាក់ទទួលស្គាល់ថា ក្រៅពីចំនួនភ្ញៀវទេសចរបានធ្លាក់ចុះហើយ មួយរយៈចុងក្រោយនេះ តម្លៃជួលហាងលក់ដូរ ក៏បានកើនឡើងផងដែរ ។ ដូច្នេះ ធ្វើឱ្យពួកគេគ្មានប្រាក់បង់ឈ្នួលតូប និងមិនអាចតស៊ូបន្តទៀតឡើយ ។

ចំណែកផ្សារបណ្តែតទឹក «ដាំណឺនសាឌួក» ស្ថិតក្នុងខេត្តរាជបុរី ដែលជាផ្សារបណ្តែតទឹកល្បីល្បាញនៅប្រទេសថៃ បើទោះជាមានភ្ញៀវទេសចរបរទេសមកដើរកម្សាន្ត និងស្នាក់នៅទីនេះក្តី ប៉ុន្តែមានចំនួនមិនច្រើន ជាពិសេស ភ្ញៀវទេសចរចិនមកកម្សាន្តនៅទីនេះមិនច្រើនដូចពេលមុនទេ ។

អ្នកនាង Supharadee Sukkasem នាយកក្រុមអភិរក្សផ្សារបណ្តែតទឹក «ដាំណឺនសាឌួក» បានអំពាវនាវឱ្យរដ្ឋាភិបាលជំរុញចាត់វិធានការជំរុញវិស័យទេសចរណ៍បន្ថែមទៀត ក្រៅពីការលើកលែងទិដ្ឋាការឱ្យភ្ញៀវទេសចរឥណ្ឌា និងតៃវ៉ាន់ ។ អ្នកនាងស្នើឱ្យរដ្ឋាភិបាលចេញវិធានការអញ្ជើញភ្ញៀវទេសចរនៅតំបន់អាស៊ីអាគ្នេយ៍ ជាពិសេស ភ្ញៀវទេសចរសិង្ហបុរី, ម៉ាឡេស៊ី និងហ្វីលីពីនមកប្រទេសថៃ ដោយសារពួកគេបានចំណាយប្រាក់ខ្ពស់ពេលដើរកម្សាន្ត ។ លើសពីនេះ រដ្ឋាភិបាលក៏ត្រូវជំរុញវិស័យទេសចរណ៍ឱ្យជនជាតិថៃដើរកម្សាន្តក្នុងប្រទេសថៃផងដែរ ។

អ្នកប្រកបអាជីវកម្មក្នុងតំបន់ទេសចរណ៍សង្ឃឹមថា ប្រទេសថៃនឹងទទួលបានភ្ញៀវទេសចរបន្ថែមទៀត ក្រោយពីគណៈរដ្ឋមន្ត្រីអនុញ្ញាតឱ្យភ្ញៀវទេសចរឥណ្ឌា និងតៃវ៉ាន់ អាចស្នាក់នៅប្រទេសថៃបានរយៈពេល៣០ថ្ងៃដោយមិនគិតថ្លៃទិដ្ឋាការ គឺអនុវត្តចាប់ពីថ្ងៃទី១០ ខែវិច្ឆិកា ឆ្នាំ២០២៣ រហូតដល់ថ្ងៃទី១០ ខែឧសភា ឆ្នាំ២០២៤ ។ ក្នុងអំឡុងពេលនេះ គឺជាអំឡុងពេលដើរកម្សាន្តរបស់ភ្ញៀវទេសចរឥណ្ឌា និងតៃវ៉ាន់ ដើម្បីជាប្រយោជន៍ដល់សេដ្ឋកិច្ចជាតិ និងកិច្ចការបរទេស ៕ ប្រភព ៖ Thai PBS