តារាសម្តែងស្រីជួរមុខប្រចាំប្រទេសកម្ពុជាកញ្ញា ស៊ីន យូប៊ីន ទទួលបានការអញ្ជើញសាជាថ្មីចូលរួមកម្មវិធីសប្តាហ៍ផ្លាស់ប្តូរវប្បធម៌និងភាពយន្តកម្ពុជា-ចិន២០២៣នាឱកាសខួបទី៦៥នៃចំណងមិត្តភាពកម្ពុជា-ចិន។ អ្វីដែលកាន់តែគួរឱ្យចាប់អារម្មណ៍ ទន្ទឹមនឹងចូលរួមកម្មវិធីអន្តរជាតិលើកនេះ យូប៊ីន បានរំលេចខ្លួនយ៉ាងស្រស់ស្អាតជាមួយសំលៀកបំពាក់ពីរឈុតហើយសុទ្ធតែលើកស្ទួយអត្តសញ្ញាណជាតិបង្កប់អត្ថន័យមិនធម្មតា។
កម្មវិធីសប្តាហ៍ផ្លាស់ប្តូរវប្បធម៌និងភាពយន្តកម្ពុជា-ចិន២០២៣នាឱកាសខួបទី៦៥នៃចំណងមិត្តភាពកម្ពុជា-ចិននៅសៀកមិន ខេត្តហ្វុចូវ ប្រព្រឹត្តិទៅចាប់ពីថ្ងៃទី១៩-២១ ខែធ្នូ ឆ្នាំ២០២៣ ។ នៅថ្ងៃបើកកម្មវិធី ស៊ីន យូប៊ីន បានស្លៀកសំលៀកបំពាក់ ទ័ពហនុមានរបស់ព្រះរាមនិងទ័ពរបស់យក្សក្រុងមារ ក្នុងរឿងរាមកេរ្តិ៍ដោយដណ្ដប់ស្បៃរូបល្ខោនស្រមោលស្បែកធំ។ ថ្ងៃបន្ទាប់ ស៊ីន យូប៊ីន បានបង្ហាញឈុតដ៏ស្រស់ស្អាតមួយទៀតពីយ័ន្តធាតុទំាង៥ ដែលមានអក្សរ ន ទឹក , ម ដី , ព ភ្លើង , ទ ខ្យល់ និង យ អាកាស។
ពីរឈុតរបស់ ស៊ីន យូប៊ីន នេះដែរបានធ្វើឱ្យអ្នកគាំទ្រកោតសរសើរមិនដាច់ពីមាត់ សំលៀកបំពាក់ចេញមកមួយៗរបស់តារាសម្តែងរូបនេះពិតជាមិនធម្មតានោះទេ។ មិនត្រឹមតែមានភាពស្រស់ស្អាត តែការច្នៃម៉ូតមួយៗរបស់ យូប៊ីន ញឹកញាប់តែងតែលើកស្ទួយអត្តសញ្ញាណជាតិ បង្ហាញពីវប្បធម៌ អរិយធម៌ខ្មែរ ដ៏ស្រស់ផូរផង់។ ជាក់ស្តែងដូចឈុតខាងលើនេះជាដើមវាឆ្លុះបញ្ចាំងពី យ័ន្តខ្មែរ និងល្ខោនស្រមោលស្បែកធំផងដែរ។
គួបផ្សំពីរំលេចខ្លួនដ៏ស្រស់ស្អាតទាក់ភ្នែកក្នុងកម្មវិធីប៉ុណ្ណោះទេ តែអ្នកគាំទ្រកម្ពុជាក៏សម្លឹងឃើញការប្រើប្រាស់ភាសាអង់គ្លេសរបស់ ស៊ីន យូប៊ីន ក៏បានល្អផងដែរក្នុងពេលផ្តល់បទសម្ភាស។ ក្នុងការចូលរួមព្រឹត្តិការណ៍នេះ ក៏មានការចាក់បញ្ចាំងខ្សែភាពយន្ត «តម្លៃស្នេហ៍ »ដែលនាងបានសម្តែងផងដែរ ដែលរឿងនេះធ្លាប់ទទួលបានពានរង្វាន់ភាពយន្តឆ្នើមនិងពានរង្វាន់តារាសម្តែងស្រីឆ្នើមក្នុងឆ្នាំ២០១៧ ។
គួរបញ្ជាក់ផងដែរថា កម្មវិធីខាងលើនេះមិនត្រឹមតែមាន ស៊ីន យូប៊ីន ចូលរួមប៉ុណ្ណោះក្នុងនោះក៏មានលោក ខាត់ វៃហាំង លោក ហ៊ុយយ៉ាឡេង និងលោក ប៉ុក បូរក្ស ប្រធាននាយកដ្ឋានភាពយន្តចូលរួមដូចគ្នា។ កាលពីខែកញ្ញា យូប៊ីន ក៏បានតំណាងកម្ពុជាចូលរួមនៅក្នុងកម្មវិធីគម្រប់ខួប១០ឆ្នាំមហោស្រពភាពយន្តមួយដែលបានធ្វើឡើងនៅទីក្រុង ហ្វូចូវ នៃខេត្ត ហ្វូចៀន ប្រទេសចិនដូចគ្នា៕
