ទីក្រុងប៉េកាំង ៖ ក្រសួងសន្តិសុខសាធារណៈរបស់ចិន បានប្រកាសពីជោគជ័យធំមួយជាមួយនឹងការបង្រ្កាបបានជនសង្ស័យកម្រិតព្រហ្មទ័ណ្ឌពាក់ព័ន្ធនឹងអំពើឆបោ.កចំនួន 1,500 នាក់ ព្រមទាំងបានវា.យបំផ្លា.ញអគារដែលជាជម្រកក្រុមឆបោកជាង ៦៣០ ខ្នងនៅ Myawaddy KK complex ក្នុងតំបន់ព្រំដែនមីយ៉ាន់ម៉ា-ថៃផងដែរ។

យោងតាមប្រភពព័ត៌មានក្នុងស្រុករបស់ចិន អាជ្ញាធរចិនបានបញ្ជាក់ថា នេះគឺជាជោគជ័យដ៏ធំមួយ តាមរយៈប្រតិបត្តិការរួមគ្នារវាងកងកម្លាំងចិន មីយ៉ាន់ម៉ា និងថៃ ក្នុងការកម្ចាត់ក្រុមឧក្រិដ្ឋជនឆ្លងដែនទាំងនេះ ដើម្បីការពារសុវត្ថិភាពប្រជាពលរដ្ឋ និងពង្រឹងឡើងវិញនូវសន្តិសុខនៅក្នុងតំបន់។

អស់រយៈពេលជាយូរមកហើយ Myawaddy ជាពិសេស KK Complex ឬ KK Park ដែលស្ថិតព្រំដែនប្រទេសមីយ៉ាន់ម៉ានិងថៃ គឺជាជម្រករបស់ក្រុមល្បែងស៊ីសង កាស៊ីណូខុសច្បាប់ និងការឆ.បោកជាច្រើន ដែលចូលរួមក្នុងការក្លែងបន្លំតាមប្រព័ន្ធអនឡាញយ៉ាងទូលំទូលាយ និងបានបង្កគ្រោះថ្នាក់យ៉ាងធ្ងន់ធ្ងរដល់សង្គម។

សូមជម្រាបថា ប្រតិបត្តិការនេះបានចាប់ផ្តើមតាំងពីដើមឆ្នាំ ២០២៥ មកម្ល៉េះ ដោយសារសកម្មភាពបោកប្រាស់នៅតំបន់នោះមានការកើនឡើងខ្លាំងពេក។ គិតត្រឹមដើមឆ្នាំ ២០២៦ នេះ កម្លាំងសមត្ថកិច្ចនៃប្រទេសទាំងបីបានសហការគ្នាបញ្ជូនជនសង្ស័យត្រឡប់ទៅវិញបានចំនួន ១០ លើករួចមកហើយ ដែលបង្កើតការទប់ស្កាត់យ៉ាងខ្លាំងប្រឆាំងនឹងឧក្រិដ្ឋជន។

ជាមួយគ្នានេះ មន្ត្រីពាក់ព័ន្ធម្នាក់មកពីក្រសួងសន្តិសុខសាធារណៈចិនបាននិយាយថា ស្ថាប័នសន្តិសុខសាធារណៈនឹងបន្តពង្រឹងកិច្ចសហប្រតិបត្តិការអនុវត្តច្បាប់អន្តរជាតិ លើកកម្ពស់ប្រតិបត្តិការបង្ក្រាប និង លុបបំបាត់កន្លែងលាក់ខ្លួនរបស់ឧក្រិដ្ឋជនយ៉ាងម៉ឺងម៉ាត់ ព្រមទាំងខិតខំប្រឹងប្រែងគ្រប់បែបយ៉ាងដើម្បីចាប់ខ្លួនជនសង្ស័យព្រហ្មទណ្ឌ និងបន្តពង្រឹង និងពង្រីកលទ្ធផលនៃការបង្ក្រាបឲ្យមានប្រសិទ្ធភាពខ្ពស់បំផុត៕

ប្រទេសថៃ ៖ ប្រធានគណបក្សភូមិចៃថៃ លោក Anutin Charnvirakul ថា កងទ័ពថៃនឹងចាប់ផ្តើមធ្វើរបងព្រំដែនកម្ពុជា-ថៃភ្លាមៗនៅតំបន់មួយចំនួន ពលរដ្ឋមិនចាច់ព្រួយបារម្ភពីថវិកាសម្រាប់ធ្វើរបងទេ ពីព្រោះរដ្ឋាភិបាលថៃមានថវិកាគ្រប់គ្រាន់ដែលទទួលបានពីការបរិច្ចាគ និងថវិការបស់ព្រះរាជវាំង ដោយសារព្រះរាជវង្សគ្រប់អង្គបារម្ភពីស្ថានការណ៍ព្រំដែន ។

បន្ទាប់ពីលទ្ធផលរាប់សន្លឹកឆ្នោតមិនផ្លូវការបង្ហាញថា គណបក្សភូមិចៃថៃរបស់លោក Anutin ទទួលបានសំឡេងគាំទ្រច្រើនលើសលប់ ពលរដ្ឋថៃនៅខេត្តបុរីរាំ និងខេត្តត្រាត ទាមទារឱ្យរដ្ឋាភិបាលធ្វើរបងព្រំដែនកម្ពុជា-ថៃជាបន្ទាន់តាមការសន្យាពេលរកសំឡេងឆ្នោត ។ ជាការឆ្លើយតប លោក Anutin ប្រាប់ពលរដ្ឋកុំបារម្ភពីការធ្វើរបងព្រំដែននេះ រដ្ឋាភិបាលនឹងធ្វើចាប់ផ្តើមធ្វើភ្លាមៗ ពីព្រោះមានថវិកាគ្រប់គ្រាន់ ព្រមទាំងទទួលបានថវិកាពីព្រះរាជវាំងផងដែរ ។

ពលរដ្ឋថៃបានបោះឆ្នោតគាំទ្រគណបក្សភូមិចៃថៃយ៉ាងភ្លូកទឹកភ្លូកដី ដែលធ្វើឱ្យគណបក្សនេះទទួលបានអាសនៈក្នុងរដ្ឋសភាច្រើនជាងគណបក្សផ្សេងៗ បន្ទាប់ពីសន្យាជាមួយពលរដ្ឋ បើឈ្នះឆ្នោត នឹងធ្វើរបងព្រំដែនកម្ពុជា-ថៃ, បិទព្រំដែនជាមួយកម្ពុជារៀងរហូត និងលុបចោលអនុស្សរណៈនៃការយោគយល់ (MOU) ឆ្នាំ២០០១ ស្តីពីការបែងចែកផលប្រយោជន៍ដែនសមុទ្រ ខណៈលោក Anutin ជាមនុស្សជំនិតរបស់ព្រះមហាក្សត្រ ។

ការជ្រើសយកការធ្វើសង្គ្រាមបង្ហូរឈាមជាមួយកម្ពុជារបស់លោក Anutin គឺដើម្បីដូរនឹងសន្លឹកឆ្នោត ហើយលទ្ធផលឈ្នះឆ្នោតបង្ហាញថា ថៃបង្កសង្គ្រាមឈ្លានពានកម្ពុជាកន្លងមក គឺជាផែនការយ៉ាងច្បាស់លាស់ក្នុងបំណងដណ្តើមទឹកដីផង និងបំពេញមហិច្ឆតាស្តារអំណាចរបស់ព្រះមហាក្សត្រផង ដោយសារគណបក្សប្រជាជនទាមទារឱ្យធ្វើកំណែទម្រង់កាត់បន្ថយអំណាចរបស់ព្រះមហាក្សត្រ ។

កាលពីថ្ងៃទី១០ ខែកុម្ភៈ ឆ្នាំ២០២៦ លោក Anutin បានផ្តល់សម្ភាសន៍ជាមួយសារព័ត៌មាន បន្ទាប់ពីធ្វើជាអធិបតីក្នុងពិធីរំលឹកខួប៧២ឆ្នាំ នៃការបង្កើតកងទ័ពស្ម័គ្រចិត្តការពារជាតិ ថាពលរដ្ឋថៃទាមទារឱ្យធ្វើរបងព្រំដែនកម្ពុជា-ថៃជាបន្ទាន់ គឺកងទ័ពថៃនឹងរាយការណ៍ពីតំបន់ដែលអាចធ្វើរបងភ្លាមៗ រីឯថវិកាវិញបានត្រៀមរួចហើយ ។ ក្រៅពីនេះ ក៏មានការបរិច្ចាគថវិកាយ៉ាងច្រើនសម្រាប់ធ្វើរបង ព្រមទាំងថវិកាពីព្រះរាជវាំងផងដែរ ពលរដ្ឋមិនបាច់បារម្ភទេ ។

ចំណែកស្ថានការណ៍នៅតាមបណ្តោយព្រំដែនកម្ពុជា-ថៃបច្ចុប្បន្នស្ងប់ស្ងាត់ ប៉ុន្តែកងទ័ពថៃត្រៀមខ្លួនប្រយុទ្ធគ្រប់ពេលវេលា ។ បន្ទាប់ពីថៃបោះឆ្នោតរួចរាល់ បញ្ហាជាមួយកម្ពុជាត្រូវតែអនុវត្តតាមលក្ខខណ្ឌនៃការជជែកគ្នា ព្រមទាំងមានការងារជាច្រើនទៀតដែលប្រទេសទាំងពីរធ្វើរួមគ្នា ដូចជា ៖ ការបោសសម្អាតគ្រាប់មីនក្នុងដែនដីរៀងៗខ្លួន ភាគីណាទទួលខុសត្រូវតំបន់ណា ហើយគ្រប់យ៉ាងនឹងដំណើរការតាមគោលការណ៍មនុស្សធម៌ ព្រមទាំងការដកអាវុធធុនធ្ងន់ ។

គួរបញ្ជាក់ថា ពលរដ្ឋថៃនៅខេត្តព្រំដែនជាប់កម្ពុជា ដូចជា ខេត្តបុរីរាំ និងត្រាត ទាមទារឱ្យលោក Anutin ដែលពលរដ្ឋនៅទូទាំងប្រទេសបោះឆ្នោតគាំទ្រ ត្រូវធ្វើរបងព្រំដែនកម្ពុជា-ថៃឱ្យបានឆាប់បំផុតតាមការសន្យាពេលរកសំឡេងឆ្នោត និងផ្តោតលើបញ្ហាព្រំដែនជាមួយកម្ពុជាឱ្យខ្លាំងជាងការអភិវឌ្ឍសេដ្ឋកិច្ច ។ ក្រៅពីនេះ ពលរដ្ឋថៃបារម្ភពីកងទ័ពថៃអាចនឹងបើកការវាយប្រ.ហារធ្វើសង្គ្រា.មឈ្លាមពានកម្ពុជា លើកទី៣ ប៉ះពាល់ដល់ការប្រមូលផលដំណាំ ៕

ប្រទេសថៃ ៖ ការបង្កសង្គ្រា.មឈ្លានពា.នកម្ពុជា ចំនួន២លើកកាលពីឆ្នាំ២០២៥ពីសំណាក់កងទ័ពថៃ បានធ្វើឱ្យពលរដ្ឋថៃជាច្រើនគ្រួសារនៅខេត្តជាប់ព្រំដែនកម្ពុជា ត្រូវជម្លៀសពីលំនៅឋានម្តងហើយម្តងទៀត មិនបានប្រកបរបរ បាត់បង់ចំណូល ខណៈពលរដ្ឋថៃទិញរថយន្តដោយការបង់រំលោះ ។ រហូតមកដល់ពេលនេះ ពលរដ្ឋខេត្តបុរីរាំ ប្រឈមនឹងហាងលក់រថយន្តដកហូតរថយន្ត សរុបជាង១,៤០០គ្រឿង ដោយសារគ្មានប្រាក់បង់រំលោះបន្ត ។

កងទ័ពថៃបានធ្វើសង្គ្រាមឈ្លានពានទន្ទ្រានទឹកដីកម្ពុជាតាំងពីពាក់កណ្តាលឆ្នាំ២០២៥ ដែលមិនត្រឹមតែធ្វើឱ្យពលរដ្ឋកម្ពុជានៅខេត្តជាប់ព្រំដែនថៃបាត់បង់ដីធ្លីស្រែចម្ការ ផ្ទះសម្បែង និងបន្តស្នាក់នៅក្នុងជំរំភៀសសឹកប៉ុណ្ណោះទេ វាក៏ធ្វើឱ្យពលរដ្ឋថៃខ្លួនឯងជួបការលំបាកផងដែរ ដោយសារត្រូវជម្លៀសពីលំនៅឋានម្តងជាពីរដង មិនបានប្រកបមុខរបរអ្វីឡើយ ។ ពលរដ្ឋខេត្តបុរីរាំជាច្រើនគ្រួសារដែលទិញរថយន្តដោយការបង់រំលោះនិយាយថា ពួកគេបាត់បង់ចំណូលដោយសារកងទ័ពថៃធ្វើសង្គ្រាមឈ្លានពានកម្ពុជា ។

តាមការចុះផ្សាយរបស់សារព័ត៌មាន PPTV នៅថ្ងៃទី១១ ខែកុម្ភៈ ឆ្នាំ២០២៦ ពលរដ្ឋស្រុកបានក្រួត ខេត្តបុរីរាំ ត្រូវបានហាងលក់រថយន្តដកហូតរថយន្តទៅវិញចំនួន៥គ្រឿងហើយ ដោយសារគ្មានប្រាក់បង់រំលោះបន្ត ហើយមានរថយន្តរបស់ពលរដ្ឋ ជាង១,៤០០គ្រឿងទៀតនឹងត្រូវដកហូតជាបន្តបន្ទាប់ ។

កសិករជៀរជ័រកៅស៊ូនៅស្រុកបានក្រួត ខេត្តបុរីរាំ និយាយថា ខ្លួនត្រូវបង់រំលោះរថយន្តជជុះ ស្មើទឹកប្រាក់៧សែនបាត (ឬជាង២ម៉ឺន ២ពាន់ដុល្លារ) ដើម្បីយករថយន្តទុកដឹកជ័រកៅស៊ូលក់ ។ មុនពេលកងទ័ពថៃធ្វើសង្គ្រាមឈ្លានពានកម្ពុជា ខ្លួនមានប្រាក់គ្រប់គ្រាន់សម្រាប់បង់រំលោះរថយន្តជារៀងរាល់ខែ គឺចំនួន៩,៣០៥បាតក្នុង១ខែ និងបានបង់ប្រាក់អស់ជាង៣សែនបាត ។

ពេលកងទ័ពថៃវាយប្រហារកម្ពុជា លើកទី១ ខ្លួនមានប្រាក់ខ្លះសម្រាប់បង់រំលោះរថយន្ត ប៉ុន្តែពេលកងទ័ពថៃឈ្លានពានកម្ពុជា លើកទី២ ដែលអូសបន្លាយជាច្រើនថ្ងៃ ខ្លួនបាត់បង់ចំណូលទាំងស្រុង និងមិនអាចចៀរជ័រកៅស៊ូ ។ ខ្លួនមិនបានបង់រំលោះអស់រយៈពេល៣ខែហើយ ក៏ត្រូវហាងលក់រថយន្តដកហូតរថយន្តទៅវិញ ពេលនេះ ពិបាកខ្លាំងណាស់ និងសំណូមពរឱ្យរដ្ឋាភិបាលជួយពលរដ្ឋព្រំដែន ។

កសិករម្នាក់ទៀតនៅស្រុកជាមួយគ្នាប្រាប់ថា មិនអាចប្រកបរបរអ្វីឡើយដោយសារកងទ័ពថៃវាយប្រហារកម្ពុជាមិនឈប់ឈរ ទើបគ្មានប្រាក់បង់រំលោះរថយន្ត ។ កសិកររូបនេះបារម្ភពីស្ថានការណ៍ព្រំដែនកម្ពុជា-ថៃ មិនដឹងថា កងទ័ពថៃនឹងបង្កសង្គ្រាមឈ្លានពានកម្ពុជា លើកទី៣ ពេលណា ដោយសារកងទ័ពថៃនៅតែពង្រាយទូរកុងទ័ន័រ ពេលនេះ ពលរដ្ឋថៃនៅព្រំដែន ជាពិសេស កសិករ ប្រឈមនឹងបញ្ហាគ្មានប្រាក់បង់រំលោះរថយន្ត ។

គួរបញ្ជាក់ថា ទោះជាស្ថានការណ៍ព្រំដែនកម្ពុជា-ថៃស្ងប់ស្ងាត់ ប៉ុន្តែពលរដ្ឋខេត្តបុរីរាំបារម្ភពីកងទ័ពថៃអាចធ្វើសង្គ្រាមវាយកម្ពុជាជាលើកទី៣ ដែលធ្វើឱ្យពួកគេមិនបានប្រកបរបររកស៊ី បាត់បង់ចំណូល ខណៈរថយន្តដែលបានបង់រំលោះជាច្រើនខែហើយត្រូវដកហូតជាបន្តបន្ទាប់ ៕

ត្រឹមពេលតែមួយព្រឹកនៅថ្ងៃទី 11 ខែកុម្ភៈ ឆ្នាំ 2026 ផ្នែកត្រួតពិនិត្យគ្រោះរញ្ជួយដីថៃបានរាយការណ៍ថា គ្រោះរញ្ជួយដីចំនួនពីរលើកបានកើតមាន នៅខេត្តស៊ូរ៉ាតថានី នៃភាគខាងត្បូងប្រទេសថៃ ដែលធ្វើឲ្យប្រជាពលរដ្ឋនៅក្នុងតំបន់មានការភិតភ័យជាខ្លាំង។

យោងតាមការចុះផ្សាយរបស់សារព័ត៌មាន The Nation នាយកដ្ឋានឧតុនិយមជាតិរបស់ថៃ បានរាយការណ៍អំពីការរញ្ជួយដីបន្ទាន់មួយនៅម៉ោង 08:58 នាទី ដែលចំណុចកណ្តាលរបស់វាស្ថិតនៅក្នុងឃុំខៅផាង ស្រុកបានតាឃុន ខេត្តស៊ូរ៉ាតថានី និងមានកម្លាំងរញ្ជួយក្នុងកម្រិត 2.4 រ៉ិចទ័រក្រោមដីជម្រៅជាង 1គីឡូម៉ែត្រ។

បន្ទាប់មកនៅម៉ោង 09:12 នាទីព្រឹកថ្ងៃដដែល រញ្ជួយដីមួយទៀតត្រូវបានរាយការណ៍ ជាមួយកម្លាំងខ្លាំងជាងមុនកម្រិត 2.9 រ៉ិចទ័រក្នុងជម្រៅ 1 គីឡូម៉ែត្រចុះក្រោមដូចគ្នា ប៉ុន្តែមិនបានបង្កផលប៉ះពាល់ធ្ងន់ធ្ងរណាមួយឡើយ។

បច្ចុប្បន្នផ្នែកត្រួតពិនិត្យគ្រោះរញ្ជួយដីនៃនាយកដ្ឋានឧតុនិយម កំពុងធ្វើការតាមដានលើស្ថានភាពនេះបន្ថែមទៀត និងអំពាវនាវឲ្យប្រជាជនតាមដានព័ត៌មានថ្មីៗអំពីគ្រោះធម្មជាតិទាំងនេះឲ្យបានជាប់ជាប្រចាំ៕

ប្រទេសថៃ ៖ សូម្បីតែខ្យល់ពុលកើនឡើងនៅប្រទេសរបស់ខ្លួន ក៏ចោទ និងទម្លាក់កំហុសលើកម្ពុជាដែរ! រដ្ឋាភិបាលថៃបានចោទប្រកាន់ជាថ្មីដោយគ្មានមូលដ្ឋានថា ខ្យល់ពុលកើនឡើងខ្លាំងនៅទីក្រុងបាងកក គឺមានប្រភពពីការដុតកាកសំណល់កសិកម្មជាច្រើនកន្លែងនៅប្រទេសកម្ពុជា និងប្រកាសឱ្យពលរដ្ឋថៃប្រុងប្រយ័ត្នផលប៉ះពាល់សុខភាព ចាប់ពីថ្ងៃទី១១ ដល់ថ្ងៃទី១២ ខែកុម្ភៈ ឆ្នាំ២០២៦ ។

អ្នកនាំពាក្យរងរដ្ឋាភិបាលថៃ អ្នកស្រី លីដា ភារិទ្ធវឌ្ឍនា នៅថ្ងៃទី១១ ខែកុម្ភៈ ឆ្នាំ២០២៦ និយាយថា ខ្យល់ពុល PM 2.5 បានកើនឡើងខ្លាំងនៅទីក្រុងបាងកក តំបន់ជុំវិញ និងភាគខាងកើតប្រទេសថៃ ជាពិសេស ខ្យល់ពុលកើនឡើងខ្លាំងចាប់ពីថ្ងៃទី១១ ដល់ថ្ងៃទី១២ ខែកុម្ភៈ នៅខេត្តស្រះកែវ ប្រាជីនបុរី និងឆាក់ឈើងឆៅ ។

អ្នកនាំពាក្យរូបនេះចោទប្រកាន់ថា ខ្យល់ពុលនេះមានប្រភពពីទិសខាងកើត ដែលបក់ពីប្រទេសជិតខាង (កម្ពុជា) ទើបបណ្តាលឱ្យទីក្រុងបាងកក តំបន់ជុំវិញ និងភាគខាងកើតប្រទេសថៃ ដែលស្ថិតក្រោមខ្យល់ទទួលខ្យល់ពុល ។ លើសពីនេះ ថៃបានរកឃើញចំណុចក្តៅច្រើនបំផុតនៅកម្ពុជា រហូតដល់៤,៤៦២កន្លែង ហើយចំណុចក្តៅទាំងនេះនឹងបន្តកើនឡើង ទើបបណ្តាលឱ្យខ្យល់ពុលនៅថៃកើនឡើងខ្លាំងនៅខែកុម្ភៈ ។

នាយកដ្ឋានត្រួតពិនិត្យការបំពុលខ្យល់ថៃបានសុំការសហការពីគ្រប់ស្ថាប័នពាក់ព័ន្ធបង្កើនការប្រុងប្រយ័ត្ន និងគ្រប់គ្រងប្រភពខ្យល់ពុល ជាពិសេស ហាមឃាត់ការកាកសំណល់នៅទីវាលដើម្បីកាត់បន្ថយផលប៉ះពាល់គុណភាពខ្យល់ក្នុងប្រទេស ។ រីឯពលរដ្ឋត្រូវថែទាំសុខភាព ផ្អាក ឬចៀសវាងធ្វើសកម្មភាពនៅក្រោមកំដៅថ្ងៃ ប្រសិនបើចាំបាច់ចេញទៅក្រៅ គួរតែពាក់ម៉ាស់ ឬមានឧបករណ៍ការពារខ្យល់ពុល ព្រមទាំងអនុវត្តតាមការណែនាំរបស់ក្រសួងសុខាភិបាល ។ ក្រៅពីនេះ ពលរដ្ឋត្រូវតាមដានគុណភាពខ្យល់ពុលតាមរយៈគេហទំព័រផ្សេងៗ ដើម្បីដឹងពីពេលវេលាខ្យល់ពុលកើនឡើងខ្លាំងប៉ះពាល់សុខភាព ។

គួរបញ្ជាក់ថា ថ្មីៗនេះ កាសែតថៃ The Nation បានផ្សាយព័ត៌មានចោទប្រកាន់ដោយគ្មានមូលដ្ឋានថា ខ្យល់ពុលកើនឡើងខ្លាំងនៅទីក្រុងបាងកកមានប្រភពពីប្រទេសកម្ពុជា ប៉ុន្តែត្រូវក្រសួងបរិស្ថានកម្ពុជាច្រានចោល និងបញ្ជាក់ពីមូលហេតុខ្យល់ពុលនៅទីក្រុងបាងកកកើនឡើងខ្លាំងដោយសារមានប្រភពពីប្រទេសថៃខ្លួនឯង ។

យោងតាមក្រសួងបរិស្ថានកម្ពុជា ការបំពុលខ្យល់នៅទីក្រុងបាងកកមិនពាក់ព័ន្ធជាមួយកម្ពុជាទេ គឺកើតឡើងដោយសារការបំភាយពីការដឹកជញ្ជូន ក្នុងនោះទីក្រុងបាងកកមានចំនួនយានយន្ត និងសកម្មភាពចរាចរណ៍មមាញឹកខ្លាំង, ការបំភាយពីសកម្មភាពឧស្សាហកម្ម, ធូលីការដ្ឋានសំណង់ និងការប្រើប្រាស់ថាមពលក្នុងទីក្រុង ។ ប្រភពទាំងនេះរួមផ្សំនឹងលក្ខខណ្ឌឧតុនិយមក្នុងស្រុកមិនអំណោយផល ដូចជា ៖ បាតុភូតបញ្ច្រាស់សីតុណ្ហភាព និងការធ្លាក់ចុះរយៈកម្ពស់បរិយាកាខាងក្រោម ដែលដើរតួនាទីសំខាន់ធ្វើឱ្យសារធាតុបំពុលដែលមានប្រភពក្នុងស្រុកប្រមូលផ្តុំ និងកើនឡើង បង្កការបំពុលបរិយាកាសនៅទីក្រុងបាងកក ៕

តើមានមនុស្សប៉ុន្មាននាក់ហើយដែលរងគ្រោះ? អាហារបំប៉នសុខភាព ខូឡាជេនជំនួយស្បែកស និងឱសថព្យាបាលជំងឺជាច្រើនប្រភេទដែលមានបិទស្លាកសញ្ញាថានាំចូលមកពីប៉ែកអឺរ៉ុប ត្រូវបានប៉ូលីសវៀតណាមចុះឆែកឆេនិងពិនិត្យឃើញថាសុទ្ធតែជាផលិតផលក្លែងក្លាយ ដែលមិនមានផ្ទុកនូវសារធាតុគីមីអាចបណ្ដាលឲ្យប៉ះពាល់ដល់សុខភាពអ្នកប្រើប្រាស់យ៉ាងធ្ងន់ធ្ងរ។

យោងតាមការចុះផ្សាយរបស់ VNExpress នៅថ្ងៃទី 8 ខែកុម្ភៈ ប៉ូលីសខេត្ត Thanh Hoa បានចុះរុះរើបណ្តាញធំៗចំនួន 2ទីតាំងដែលផលិត និងជួញដូរអាហារបំប៉ន និងថ្នាំក្លែងក្លាយក្នុងទ្រង់ទ្រាយធំមួយ ដោយរឹបអូសផលិតផលរាប់លានមុខ រួមជាមួយនឹងវត្ថុធាតុដើម និងគ្រឿងចក្រសម្រាប់ផលិតរាប់សិបតោន។

តាមការឲ្យដឹងរបស់ប៉ូលីស បុគ្គលឈ្មោះ Nguyen Manh Tu និង Nguyen Van Xuan ដែលជាម្ចាស់ទីតាំងទាំង 2 ខាងលើរួមទាំងអ្នកពាក់ព័ន្ធចំនួន 24នាក់ផ្សេងទៀត ត្រូវរងការចោ.ទប្រកាន់ពីបទឧក្រិដ្ឋផលិត និងជួញដូរផលិតផលអាហារក្លែងក្លាយ។ ក្រុមទាំងនេះបានរៀបចំផលិតកម្មដោយប្រើដំណើរការបិទជិតតំបន់ដាច់ស្រយាល ប្រើប្រាស់វត្ថុធាតុដើមមិនត្រូវតាមស្តង់ដារ និងជួលមនុស្សឱ្យឡាយលក់ពីបរទេស ដើម្បីទាក់ទាញទំនុកចិត្តរបស់អ្នកប្រើប្រាស់។

ផលិតផលក្លែងក្លាយទាំងនេះភាគច្រើនផ្តោតលើមនុស្សចាស់ ស្ត្រី និងកុមារ រួមទាំងថ្នាំបំបាត់ការឈឺចាប់សន្លាក់ ផលិតផលធ្វើឱ្យស្បែកស ផលិតផលប្រឆាំងស្នាមអុចខ្មៅ អាហារបំប៉ន DHA និងថ្នាំពន្លូតកម្ពស់។ ជាមួយគ្នានេះ ផលិតផលសម្រកទម្ងន់មួយចំនួនត្រូវបានគេរកឃើញថាមានផ្ទុកនូវ Sibutramine ដែលជាសារធាតុហាមឃាត់ ព្រោះអាចបណ្តាលឱ្យដាច់សរសៃឈាមខួរក្បាល និងខ្សោយបេះដូង។

ក្នុងអំឡុងពេលចុះបង្រ្កាប អាជ្ញាធរវៀតណាមបានរឹបអូសប្រអប់ថ្នាំ និងអាហារបំប៉នជិត ៧.២០០ គ្រាប់ ថ្នាំគ្រាប់ជាង ១.១២០ គីឡូក្រាម (ស្មើនឹងថ្នាំគ្រាប់ជាង ២.៥ លានគ្រាប់) ដប និងធុងជាងពីរលាន ស្លាកចំនួន ៦០.០០០ និងម្សៅ និងសារធាតុបន្ថែមជិត ២២.៥ តោន។ លើសពីនេះ គ្រឿងចក្រ និងឧបករណ៍ចំនួន ១៥ ប្រភេទដែលប្រើសម្រាប់ផលិតក៏ត្រូវបានរឹបអូសផងដែរ។ គេប៉ាន់ប្រមាណថា ប្រសិនបើសម្ភារៈទាំងនេះត្រូវបានចេញផ្សាយនៅលើទីផ្សារ តម្លៃនៃទំនិញក្លែងក្លាយទាំងនេះអាចឡើងដល់ប្រហែល ១៥០ ពាន់លានដុង។

បច្ចុប្បន្នរដ្ឋបាលឱសថវៀតណាមកំពុងជំរុញការពិន័យកាន់តែធ្ងន់ធ្ងរ និងការឃ្លាំមើលដើម្បីប្រយុទ្ធប្រឆាំងនឹងការគំរាមកំហែងដែលកំពុងកើនឡើង។ រហូតមកដល់បច្ចុប្បន្ន ទីភ្នាក់ងារស៊ើបអង្កេតប៉ូលិសខេត្តតថាញ់ហ័របានចេញសេចក្តីសម្រេចចោទប្រកាន់មនុស្សចំនួន ២៦ នាក់ចំពោះឧក្រិដ្ឋកម្មផលិត និងជួញដូរផលិតផលអាហារក្លែងក្លាយ និងផលិត និងជួញដូរថ្នាំក្លែងក្លាយ៕