ថ្មីៗនេះសាធារណជនមានការចាប់អារម្មណ៍យ៉ាងច្រើនទាក់ទឹងនឹងនារីវ័យក្មេងម្នាក់ត្រូវបានក្រុមហ៊ុនបញ្ឈប់ដោយនាងអះអាងថាគេងនៅម៉ោងសម្រាក។ ជុំវិញការជជែកវែកញែកនេះ Rick Kh ក៏បានចែករំលែកបទពិសោធន៍ផ្ទាល់ខ្លួនធ្លាប់ត្រូវបានក្រុមហ៊ុនបញ្ឈប់ហើយបង្ហោះជេរក្រុមហ៊ុន។ ទោះយ៉ាងណានៅពេលលោកដឹងក្តីជាងមុន Rick Kh និយាយថាអ្វីដែលអាចលាក់បានគួរតែលាក់ព្រោះអាចធ្វើឱ្យក្រុមហ៊ុនដទៃមើលមកថាយើងហែកហួរក្រុមហ៊ុន។
នៅព្រឹកថ្ងៃទី១១ Rick Kh បានចេញវីដេអូមួយដោយបានចែករំលែកថាកាលពីអតីតកាលលោកក៏ធ្លាប់ត្រូវបានគេបញ្ឈប់ពីការងារហើយពេលនោះគឺពោរពេញដោយការឈឺចាប់ ព្រមទាំងបង្ហោះដៀមដាមជេរក្រុមហ៊ុន។ ការឈឺចាប់មួយពេល ពេលនៅវ័យក្មេងអាយុខ្ទង់២០ឆ្នាំ Rick Kh បានលាតត្រដាងថាពេលនោះលោកធ្វើការបានប្រាក់ខែ៦០ដុល្លារ ដោយក្រុមហ៊ុនសន្យាថាធ្វើការមួយឆ្នាំនឹងឡើងប្រាក់ខែ១០០ដុល្លារ។ ផ្ទុយទៅវិញនៅពេលជិតដល់ថ្ងៃឡើងប្រាក់ខែស្រាប់តែក្រុមហ៊ុនបានឱ្យលោកដាក់ពាក្យសុំលាឈប់ពីការងារធ្វើឱ្យលោកកើតចិត្តខឹងបង្ហោះជេរក្រុមហ៊ុនតែម្តង។
មួយរយៈក្រោយមកលោកបានគិតទៅដល់ពេលវេលាល្អៗ មានការផ្តល់ជាលុយកាក់ក្នុងថ្ងៃបុណ្យណូអែលធ្វើឱ្យលោកកាត់បន្ថយការខឹងសម្បារ។ Rick Kh ថាក្រោយមកលោកបន្តរកការងារថ្មីដោយទទួលបានប្រាក់ខែចំនួន២៥០ដុល្លារដែលខ្ពស់ជាងកន្លែងចាស់ទៅទៀត។ នេះមានន័យថាប្រសិនបើគេមិនបញ្ឈប់ទេលោកក៏មិនអាចទទួលបានប្រាក់ខ្ពស់យ៉ាងនេះដែរ។ ទោះយ៉ាងណា លោកបានផ្លាស់ប្តូរការងារពីកន្លែងមួយទៅកន្លែងមួយដោយទទួលបានប្រាក់ខែកាន់តែខ្ពស់ប៉ុន្តែភាពឈឺចាប់ក៏ទទួលបានដូចគ្នាដែលមិនអាចនិយាយប្រាប់ទស្សនិកជនបាន ខណៈបានប៉ះមេចិត្តអាក្រក់ជាងនៅកន្លែងចាស់ទៅទៀត។
Rick Kh ថាជីវិតមួយនេះបើលាក់ការឈឺចាប់បានក៏លាក់ទៅកាលណាដែលបង្ហាញគេក្រុមហ៊ុនផ្សេងៗគេមើលមកថាយើងហែកហួរក្រុមហ៊ុន។ ទោះបីជានិយាយបែបនេះក្តី Rick Kh បានសម្តែងការយល់ចិត្តពីទំហំនៃការឈឺចាប់ដែលត្រូវជួបប្រទះរឿងនេះប៉ុន្តែត្រូវតែមានការតស៊ូ ព្រោះកើតមកជាមនុស្សបើគេមិនដេញយើង ក៏យើងឈប់ដែរ។ Rick Kh បន្ថែមថា ពេលមានចិត្តខឹងសម្បារនឹកទៅដល់ពេលគេក៏ធ្លាប់ឱ្យប្រាក់ខែយើង នោះយើងមិនសូវមានភាពឈឺចាប់ ពីព្រោះនេះគឺជាតថភាពជាក់ស្តែងនៅក្នុងសង្គម ធ្វើជាបុគ្គលិកគេ៕
