ប្រទេសថៃ ៖ កាលពីថ្ងៃទី១០ ខែវិច្ឆិកា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងពីលទ្ធផលកិច្ចប្រជុំគណៈកម្មការនយោបាយគម្រោងចែកប្រាក់១ម៉ឺនបាត តាមរយៈគម្រោង Digital Wallet ថា គម្រោងនេះជាការបន្ថែមប្រាក់ក្នុងប្រព័ន្ធសេដ្ឋកិច្ច ចំនួន៦សែនលានបាត ។ គម្រោងនេះនឹងបែងចែកជាគម្រោង Digital Wallet ចំនួន៥សែនលានបាត ដែលគ្របដណ្តប់លើពលរដ្ឋចំនួន៥០លាននាក់ និងមូលនិធិកសាងសមត្ថកិច្ច ចំនួន១សែនលានបាតទៀត ។

លោក សេដ្ឋា ថាវីស៊ីន នាយករដ្ឋមន្ត្រីប្រទេសថៃបញ្ជាក់ថា តួលេខនេះបានមកពីរដ្ឋាភិបាលស្តាប់មតិយោបល់របស់ធនាគារកណ្តាលថៃ និងស្ថាប័នផ្សេងៗ ដោយកែលម្អលក្ខខណ្ឌគម្រោង Digital Wallet ឱ្យបានច្បាស់លាស់ រួមទាំងការពង្រីកតំបន់ចាយវាយប្រាក់នេះឱ្យគ្របដណ្តប់ដល់ថ្នាក់ស្រុកផងដែរ ។

ខាងក្រោមនេះ គឺជាលក្ខខណ្ឌនៃគម្រោង Digital Wallet ៖
-អ្នកមានសិទ្ធិត្រូវមានអាយុលើស១៦ឆ្នាំឡើងទៅ
-អ្នកមានសិទ្ធិត្រូវមានប្រាក់ចំណូលមិនដល់៧ម៉ឺនបាតក្នុង១ខែ និងមានប្រាក់ផ្ញើក្នុងបញ្ជីធនាគារ តិចជាង៥សែនបាត
-អាចចាយវាយប្រាក់នេះបានតែនៅស្រុកដូចក្នុងអត្តសញ្ញាប័ណ្ណប៉ុណ្ណោះ ។

លោកនាយករដ្ឋមន្ត្រីបានពន្យល់ពីលក្ខខណ្ឌនៃគម្រោង Digital Wallet បន្ថែមថា ពលរដ្ឋថៃដែលមានប្រាក់ចំណូលលើស៧ម៉ឺនបាតក្នុង១ខែ ប៉ុន្តែមានប្រាក់ក្នុងបញ្ជីធនាគារតិចជាង៥សែនបាត គឺពួកគេគ្មានសិទ្ធិទទួលបានប្រាក់១ម៉ឺនបាតទេ ។

*តើប្រាក់ Digital Wallet អាចទិញអ្វីបានខ្លះ ?
លោកនាយករដ្ឋមន្ត្រីពន្យល់ថា ពលរដ្ឋអាចចំណាយប្រាក់តាមគម្រោង Digital Wallet ដើម្បីទិញផលិតផល, ម្ហូបអាហារ, ភេសជ្ជៈ និងផលិតផលប្រើប្រាស់តែប៉ុណ្ណោះ ។ ប៉ុន្តែពលរដ្ឋមិនអាចចំណាយប្រាក់នេះទៅលើផលិតផល និងសេវាកម្មមួយចំនួនដូចខាងក្រោម ៖

-មិនអាចចំណាយប្រាក់ Digital Wallet ជាមួយសេវាកម្មផ្សេងៗ
-មិនអាចទិញផលិតផលតាមអនឡាញ
-មិនអាចទិញគ្រឿងស្រវឹង
-មិនអាចទិញផលិតផលថ្នាំជក់ដូចជា បារី, កញ្ឆា និងផលិតផលផលិតពីកញ្ឆា
-មិនអាចទិញមាស, ពេជ្រ និងត្បូង
-មិនអាចយកទៅសងបំណុល
-មិនយកយកទៅបង់ថ្លៃសាលាកូន
-មិនអាចយកទៅបង់ថ្លៃទឹក, ថ្លៃភ្លើង និងថ្លៃទូរស័ព្ទ
-មិនអាចទិញប្រេងឥន្ធនៈ និងឧស្ម័នធម្មជាតិ ព្រមទាំង
-មិនអាចយកប្រាក់ពីគម្រោង Digital Wallet ទៅប្តូរជាក្រដាសប្រាក់បានទេ ៕

ប្រភព ៖ beartai BRIEF

បរទេស៖ ប្រធានាធិបតីបារាំងលោក Emmanuel Macron បានបង្ហាញជាសាធារណៈនូវការគាំទ្ររបស់គាត់ចំពោះការបង្កើតវត្ត Phra Chetuphon Wimon Mangkhalaram ដែលត្រូវបានគេស្គាល់ជាទូទៅថា Wat Pho Paris ក្នុងរដ្ឋធានីប្រទេសបារាំង។ យោងតាមគេហទំព័រ Bangkok Post ដែលបានចុះផ្សាយនៅថ្ងៃទី១១ ខែវិច្ឆិកាថ្មីៗនេះថា ការប្រកាសនេះត្រូវបានធ្វើឡើងក្នុងពេលទទួលភ្ញៀវនៅវិមាន Elysee សម្រាប់ព្រះចៅអធិការវត្ត Phoo ដែលមានដើមកំណើតនៅក្នុងប្រទេសថៃ ដោយបច្ចុប្បន្នកំពុងគង់នៅប្រទេសបារាំងសម្រាប់ពិធីសម្ពោធវត្តអារ៉ាមនៅទីក្រុងប៉ារីស។

សម្ដេចព្រះសង្ឃរាជនៃប្រទេសថៃ Somdet Phra Maha Theerajarn បានដឹកនាំកិច្ចប្រជុំរយៈពេល ៤៥ នាទីជាមួយប្រធានាធិបតីបារាំងលោក Macron ដោយមានការចូលរួមពី Phra Sri Wichira Thamwithet ប្រធានព្រះសង្ឃនៃវត្ត Pho Paris និង Boonyarit Vichienpuntu ឯកអគ្គរាជទូតស្តីទីនៃស្ថានទូតថៃប្រចាំទីក្រុងប៉ារីស។ កិច្ចពិភាក្សានេះផ្តោតលើការរីកចំរើននៃព្រះពុទ្ធសាសនា និងវិធីដើម្បីអនុវត្តការបង្រៀនព្រះពុទ្ធសាសនាក្នុងការបន្តសន្តិភាពពិភពលោក។

ប្រធានាធិបតីបារាំងបានថ្លែងអំណរគុណចំពោះការខិតខំប្រឹងប្រែង និងបានបង្ហាញការគាំទ្រចំពោះការបង្កើតវត្តផូរនៅក្នុងប្រទេសបារាំង។ លោក Macron ក៏បានចែករំលែកថា កាលពីឆ្នាំមុន លោកក៏ធ្លាប់បានទៅទស្សនាវត្តភូក្នុងប្រទេសថៃ អំឡុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុងបាងកកផងដែរ។
គួរបញ្ជាក់ដែរថា វត្តព្រះពុទ្ធសាសនា Phra Chetuphon របស់ប្រទេសថៃ ដែលបានបង្កើតឡើងនៅក្នុងទីក្រុងប៉ារីសប្រទេសបារាំង នឹងត្រូវសម្ភោធនៅថ្ងៃស្អែកទី១២ ខែវិច្ឆិកា ឆ្នាំ២០២៣ ដោយមានសម្តេចព្រះមហាធៀចជាអធិបតីផងដែរ៕

ភ្នំពេញ៖ កាលពីថ្ងៃសុក្រទី១០ខែវិច្ឆិកានេះ តាមការលើកឡើងរបស់មន្ត្រីជាន់ខ្ពស់ និងអ្នកជំនាញនៃកម្ពុជាបាននិយាយថា ពាណិជ្ជកម្មកម្ពុជា-ចិន នៅតែមានសភាពរឹងមាំ ស្របពេលដែលសេដ្ឋកិច្ចពិភពលោកកំពុងធ្លាក់ចុះ ដោយសារកាលពីពេលកន្លងទៅនេះ កម្ពុជានិងចិនបានចុះកិច្ចព្រមព្រៀង២ជាមួយគ្នា គឺកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ Regional Comprehensive Economic Partnership និងកិច្ចព្រមព្រៀងពាណិជ្ជកម្មសេរីកម្ពុជា-ចិន Cambodia-China Free Trade Agreement។

បើតាមតួលេខចេញផ្សាយដោយអគ្គនាយកដ្ឋានគយនិងរដ្ឋាករកម្ពុជា បានឲ្យដឹងថា ពាណិជ្ជកម្មទំនិញរវាងកម្ពុជានិងចិនបានកើនឡើងដល់១០ពាន់លានដុល្លារក្នុងរយៈពេល១០ខែដំបូងនៃឆ្នាំ២០២៣ កើនឡើង៤,៦ភាគរយពីមួយឆ្នាំទៅមួយឆ្នាំ។ រីឯ ទំហំពាណិជ្ជកម្មអន្តរជាតិសរុបរបស់កម្ពុជាវិញ មានតម្លៃ 38.66 ពាន់លានដុល្លារក្នុងរយៈពេល 10 ខែដំបូងនៃឆ្នាំនេះ បានធ្លាក់ចុះ 3.1ភាគរយពី 39.9 ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ តាមរបាយការណ៍ក៏បានបញ្ជាក់ទៀតថា ប្រទេសចិននៅតែជាដៃគូពាណិជ្ជកម្មធំជាងគេរបស់កម្ពុជា បន្ទាប់ពីសហរដ្ឋអាមេរិក វៀតណាម ថៃ និងជប៉ុន។

លោក ប៉ែន សុវិជាតិ រដ្ឋលេខាធិការនិងជាអ្នកនាំពាក្យក្រសួងពាណិជ្ជកម្មកម្ពុជា បានមានប្រសាសន៍ថា តាមរយៈកិច្ចព្រមព្រៀងនៃប្រទេសយើងទាំង២ បានផ្តល់ការជំរុញដល់កំណើនពាណិជ្ជកម្មយ៉ាងពិតប្រាកដ។ លោកបានបន្តថា ជាមួយនឹងកិច្ចព្រមព្រៀងពាណិជ្ជកម្មសេរីកម្ពុជា-ចិននេះ ធ្វើឲ្យការនាំចេញផលិតផលដែលផលិតនៅកម្ពុជាទៅកាន់ប្រទេសចិន ដែលទទួលបាននូវពន្ធអនុគ្រោះជាច្រើន។ លោកក៏បានបន្តថា ប្រទេសចិនគឺជាទីផ្សារដ៏ធំមួយរបស់ប្រទេសកម្ពុជា ជាពិសេសសម្រាប់ការនាំចេញផលិតផលកសិកម្មដ៏មានសក្តានុពលរបស់កម្ពុជា ដូចជា អង្ករ ចេកលឿង ស្វាយ វែង និងម្រេច ជាដើម។

រីឯលោក គិន ភា អគ្គនាយកវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា បានយល់ស្របដែរថា តាមរយៈកិច្ចព្រមព្រៀងទាំង២ខាងលើ បានធ្វើឲ្យមានសន្ទុះយ៉ាងខ្លាំងរវាងពាណិជ្ជកម្មកម្ពុជា-ចិន បើទោះបីជាមានភាពមិនប្រាកដប្រជានិងមានការធ្លាក់ចុះនៃសេដ្ឋកិច្ចសកលក៏ដោយ ។ ទាំងនេះវាបានសបញ្ចាក់ឲ្យឃើញពីភាពល្អប្រសើរនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា និងចិន ខណៈកំពុងមានការបើកទីផ្សារថ្មីសម្រាប់ផលិតផលកម្ពុជាទៅកាន់ប្រទេសចិនផងដែរ។ លោកបានបន្ថែមថា តាមរយៈគម្រោង «គំនិតផ្តួចផ្តើមខ្សែក្រវាត់ និងផ្លូវ» (BRI) របស់ចិន ដែលបានសម្រេចជោគជ័យនៅកម្ពុជារួចរាល់ហើយដែរ គឺតំបន់សេដ្ឋកិច្ចពិសេសក្រុងព្រះសីហនុ និងផ្លូវល្បឿនលឿនភ្នំពេញ-ព្រះសីហនុ បានជំរុញកំណើនពាណិជ្ជកម្មរបស់កម្ពុជាជាមួយប្រទេសចិន និងពិភពលោកទាំងមូលផងដែរ។

លោកសំ សឿន អ្នកវិភាគគោលនយោបាយនៃរាជបណ្ឌិត្យសភាកម្ពុជា មានប្រសាសន៍ថា គំនិតផ្តួចផ្តើមខ្សែក្រវាត់ និងផ្លូវ របស់ចិននេះ បានដើរតួនាទីយ៉ាងសំខាន់ក្នុងការពង្រឹងទំនាក់ទំនងពាណិជ្ជកម្មរវាងចិន និងកម្ពុជា។ ម៉្យាងវិញទៀត តាមកិច្ចព្រមព្រៀងជាដៃគូរសេដ្ឋកិច្ចនៅក្នុងតំបន់ បានធ្វើឱ្យប្រសើរឡើងនូវហេដ្ឋារចនាសម្ព័ន្ធ និងសមត្ថភាពភ័ស្តុភារ ដែលនាំកម្ពុជាបានក្លាយជាគោលដៅទាក់ទាញសម្រាប់វិនិយោគិនអន្តរជាតិ និងធុរកិច្ច ដែលកំពុងស្វែងរកពង្រីកវត្តមានរបស់ពួកគេនៅក្នុងតំបន់។ ការកើនឡើងទំហំពាណិជ្ជកម្មទ្វេភាគីបានធ្វើឱ្យសេដ្ឋកិច្ចចម្រុះមានកាន់តែច្រើននៅកម្ពុជា និងបានជួយកម្ពុជាក្នុងការអភិវឌ្ឍវិស័យថាមពល ទូរគមនាគមន៍ ហិរញ្ញវត្ថុ ភស្តុភារ ទេសចរណ៍ និងកសិកម្មផងដែរ៕ Xinhua

បរទេស៖ ប្រទេសចិននឹងចាប់ផ្តើមសាងសង់បន្ទប់ពិសោធន៍សម្រាប់ធ្វើការស្រាវជ្រាវទឹកសមុទ្រជ្រៅរលកខ្យល់ខ្នាតធំដំបូងគេរបស់ពិភពលោកដែលមានទទឹង ១៦,០០០ ម៉ែត្រការ៉េ ដោយរំពឹងថានឹងបញ្ចប់នៅចុងឆ្នាំ ២០២៦។
យោងតាមប្រភពព័ត៌មាន China Daily ដែលបានចុះផ្សាយនៅថ្ងៃទី១០ ខែវិច្ឆិកាថា មន្ទីរពិសោធន៍ទឹកជ្រៅរលកខ្យល់ទ្រង់ទ្រាយធំបានចាប់ផ្តើមសាងសង់នៅទីក្រុងឆ្នេរសមុទ្រ Dalian ខេត្ត Liaoning ភាគឦសានប្រទេសចិន។ គម្រោងនេះមានផ្ទៃដីសរុប ១៦,០០០ ម៉ែត្រការ៉េ និងជាន់ផ្ទាល់ដី ៨,១០០ ម៉ែត្រការ៉េ ដោយរំពឹងថានឹងបញ្ចប់នៅចុងឆ្នាំ ២០២៦។

លោក Lyu Lin អនុប្រធានសាលាវិស្វកម្មហេដ្ឋារចនាសម្ព័ន្ធ នៃសាកលវិទ្យាល័យបច្ចេកវិទ្យា Dalian បាននិយាយថា គ្រឿងបរិក្ខារ និងជាកត្តាសំខាន់ដែលត្រូវតែយកមកពិចារណាក្នុងការរចនា និងប្រតិបត្តិការនៃវិស្វកម្មនៅឈូងសមុទ្រ។

មន្ទីរពិសោធន៍នេះក៏នឹងផ្តល់នូវលក្ខខណ្ឌស្រាវជ្រាវ ក៏ដូចជាអភិវឌ្ឍន៍លំដាប់ទីមួយ រួមជាមួយសេវាកម្មបច្ចេកទេសគុណភាពខ្ពស់សម្រាប់តម្រូវការជាតិសំខាន់ៗ ដូចជាការអភិវឌ្ឍន៍ធនធានប្រេង និងឧស្ម័ននៅសមុទ្រជ្រៅ ការប្រើប្រាស់ថាមពលកកើតឡើងវិញនៅឈូងសមុទ្រ និងការសាងសង់ស្ពានឆ្លងកាត់សមុទ្រធំៗ ហេដ្ឋារចនាសម្ព័ន្ធដឹកជញ្ជូនជាដើម។

ទោះជាយ៉ាងណា ការអភិវឌ្ឍន៍ធនធានប្រេង និងឧស្ម័ននៅសមុទ្រជ្រៅក៏ជាតម្រូវការដ៏សំខាន់មួយរបស់ប្រទេសផងដែរ។ កាលពីខែឧសភា សាជីវកម្មប្រេងឈូងសមុទ្រជាតិចិន (CNOOC) បានប្រកាសថា ខ្លួនបានបញ្ចប់ការដំឡើងផ្នែកអណ្តែតទឹកនៃកន្លែងខួងអណ្តូងប្រេង ១៥,០០០ តោន ដែលនេះជាកន្លែងខួងយកប្រេងធំបំផុតរបស់ចិន ដោយមានប្រវែង ៩៥ ម៉ែត្រ និងទទឹង ៤០ ម៉ែត្រ ផ្ទៃរបស់ Rig គឺស្មើនឹងទីលានបាល់បោះចំនួន ៩៕