ប្រទេសម៉ាឡេស៊ី ៖ នៅឆ្នាំ២០២៦ នាយករដ្ឋមន្ត្រីម៉ាឡេស៊ី លោក Anwar Ibrahim បានប្រកាសពីការអនុវត្តច្បាប់កំណត់អាណត្តិនាយករដ្ឋមន្ត្រីមិនអាចកាន់តំណែងលើសពី១០ឆ្នាំ (ឬកាន់តំណែងត្រឹមតែ២អាណត្តិ) ដើម្បីទប់ស្កាត់ការបន្តអំណាច ដែលជាការអនុវត្តតាមការសន្យារបស់លោកក្នុងពេលរកសំឡេងឆ្នោតកន្លងមក ។ លើសពីនេះ ម៉ាឡេស៊ីនឹងអនុវត្តច្បាប់សេរីភាពព័ត៌មាន រួមទាំងប្រយុ.ទ្ធប្រឆាំងនឹងអំពើពុករលួយ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី៥ ខែមករា ឆ្នាំ២០២៦ ។

លោក Anwar ធ្វើកំណែទម្រង់នយោបាយដ៏សំខាន់នៅប្រទេសម៉ាឡេស៊ី ដោយប្រកាសថា រដ្ឋាភិបាលរបស់លោកមានគម្រោងបញ្ជូនសេចក្តីព្រាងច្បាប់នេះទៅកាន់កិច្ចប្រជុំរដ្ឋសភានៅដើមឆ្នាំ២០២៦ ដើម្បីកំណត់អាណត្តិនាយករដ្ឋមន្ត្រីមិនអាចកាន់តំណែងលើសពី១០ឆ្នាំ ឬកាន់តំណែងយូរបំផុតត្រឹមតែ២អាណត្តិប៉ុណ្ណោះ ។

ពេលថ្លែងសុន្ទរកថាទៅកាន់មន្ត្រីរាជការក្រោយបញ្ចប់កិច្ចប្រជុំគណៈរដ្ឋមន្ត្រី លោក Anwar បានបញ្ជាក់អំពីសារៈសំខាន់សម្រាប់មេដឹកនាំប្រទេសមិនផ្តោតលើការកាន់អំណាចថា មនុស្សគ្រប់រូបមានបន្ទុករបស់ខ្លួន ហើយពេលមេដឹកនាំកាន់អំណាចតាមពេលកំណត់ហើយ នឹងត្រូវផ្ទេរអំណាចរបស់ខ្លួនទៅឱ្យមនុស្សជំនាន់ក្រោយដឹកនាំប្រទេសបន្ត ។

បច្ចុប្បន្ន ម៉ាឡេស៊ីគ្មានច្បាប់កំណត់អាណត្តិនាយករដ្ឋមន្ត្រីទេ កាលពីមុន លោក Mahathir Mohamad ធ្លាប់កាន់តំណែងជានាយករដ្ឋមន្ត្រីម៉ាឡេស៊ីយូរបំផុតរហូតដល់រយៈពេល២២ឆ្នាំ ។ លោកបានឡើងកាន់តំណែងម្តងទៀតនៅឆ្នាំ២០១៨ ពេលអាយុ៩២ឆ្នាំ ដែលធ្វើឱ្យលោកក្លាយជានាយករដ្ឋមន្ត្រីមានអាយុច្រើនបំផុតលើពិភពលោកនាពេលនោះ ។

ក្រៅពីការកំណត់អាណត្តិនាយករដ្ឋមន្ត្រី លោក Anwar បានប្រកាសពីវិធានការកំណែទម្រង់សំខាន់ៗចំនួន២ទៀតពាក់ព័ន្ធនឹងតម្លាភាព រួមមាន ៖ ១-សេចក្តីព្រាងច្បាប់ស្តីពីសេរីភាពព័ត៌មានដើម្បីឱ្យពលរដ្ឋទទួលបានព័ត៌មានពីរដ្ឋាភិបាលច្រើនជាងមុន និង២-បង្កើតការិយាល័យកិច្ចការពលរដ្ឋសម្រាប់ជាយន្តការបង្កើនការត្រួតពិនិត្យយ៉ាងតឹងរ៉ឹង ។ លោក Anwar សង្កត់ធ្ងន់ថា គ្មានការលើកលែងសូម្បីតែនាយករដ្ឋមន្ត្រី ពលរដ្ឋគ្រប់រូបត្រូវទទួលខុសត្រូវ និងត្រៀមខ្លួនទទួលការត្រួតពិនិត្យ ។

កំណែទម្រង់នយោបាយនេះ ស្របពេលមានក្តីបារម្ភពីការជ្រៀតជ្រែកនយោបាយក្នុងកិច្ចការតុលាការ ដែលកន្លងមក តុលាការត្រូវបានចោទសួរពីឯករាជ្យជាញឹកញាប់ ដោយសារនាយករដ្ឋមន្ត្រីជាអ្នកជ្រើសរើសតុលាការ ។ ម៉ាឡេស៊ីសង្ឃឹមថា សេចក្តីព្រាងច្បាប់កំណត់អាណត្តិនាយករដ្ឋមន្ត្រីនឹងត្រូវបញ្ចូលក្នុងរបៀបវារៈកិច្ចប្រជុំសភាលើកដំបូងចាប់ផ្តើមនៅខែមករា ឆ្នាំ២០២៦ ហើយនេះជាការធ្វើតាមការសន្យារបស់លោក Anwar ជាមួយពលរដ្ឋពេលរកសំឡេងឆ្នោតកាលពីឆ្នាំ២០២២ ៕

ប្រទេសថៃ ៖ ប្រធានសភាពាណិជ្ជកម្មថៃបារម្ភពីផលប៉ះពាល់សេដ្ឋកិច្ចជាច្រើនផ្នែកដោយសារស្ថានការណ៍តានតឹងរវាងអាមេរិក និងវេណេស៊ុយអេឡា ព្រមទាំងអំពាវនាវឱ្យភាគីទាំងពីរដោះស្រាយបញ្ហាដោយសន្តិវិធី ក៏ដូចជាគោរពច្បាប់អន្តរជាតិ ។ ការអំពាវនាវរបស់ថៃនេះ បន្ទាប់ពីកងទ័ពអាមេរិកវាយប្រ.ហារតាមផ្លូវអាកាសនៅវេណេស៊ុយអេឡា និងចា.ប់ខ្លួនលោកប្រធានាធិបតី លោក Nicolas Maduro និងភរិយា កាលពីថ្ងៃទី៣ ខែមករា ឆ្នាំ២០២៦ ។

នៅថ្ងៃទី៥ ខែមករា លោក ផុត អារ៉ាមវឌ្ឍនាណុន ប្រធានសភាពាណិជ្ជកម្មថៃបាននិយាយពីស្ថានការណ៍តានតឹងរវាងអាមេរិក និងវេណេស៊ុយអេឡា ថា សភាពាណិជ្ជកម្មថៃតាមដានស្ថានការណ៍យ៉ាងដិតដល់ពាក់ព័ន្ធនឹងអាមេរិកចាត់វិធានការលើមេដឹកនាំវេណេស៊ុយអេឡា ដោយសារវាប៉ះពាល់ដល់នយោបាយអន្តរជាតិ និងទំនុកចិត្តលើប្រព័ន្ធសេដ្ឋកិច្ចពិភពលោក ក្នុងពេលសេដ្ឋកិច្ចពិភពលោកកំពុងផុយស្រួយ ព្រមទាំងប្រឈមនឹងភាពមិនប្រាកដប្រជាដោយសារកត្តាជាច្រើន ។

សភាពាណិជ្ជកម្មថៃយល់ថា ស្ថានការណ៍តានតឹងរវាងអាមេរិក និងវេណេស៊ុយអេឡា គួរតែដោះស្រាយតាមរយៈការចរចាដោយសន្តិវិធី និងគោរពច្បាប់អន្តរជាតិ តាមរយៈការប្រើប្រាស់យន្តការសហគមន៍អន្តរជាតិជាចម្បងដើម្បីបញ្ចៀសជម្លោះកុំឱ្យតានតឹង ។ ស្ថានការណ៍នេះអាចនឹងប៉ះពាល់យ៉ាងខ្លាំងដល់ស្ថិរភាពសេដ្ឋកិច្ច និងពាណិជ្ជកម្មនៅលើពិភពលោក ។

ចំណែកប្រទេសថៃរងផលប៉ះពាល់ដោយផ្ទាល់បណ្តាលមកពីការធ្វើពាណិជ្ជកម្មរវាងថៃនិងវេណេស៊ុយអេឡា និងការវិនិយោគរយៈពេលខ្លី ។ ប៉ុន្តែអ្វីគួរឱ្យបារម្ភ គឺផលប៉ះពាល់ដោយប្រយោល ជាពិសេស ការប្រែប្រួលតម្លៃប្រេងឥន្ធនៈ, តម្លៃទំនិញ និងផលិតផលកសិកម្ម ហើយវានឹងមានឥទ្ធិពលដល់វិស័យថាមពល, កសិកម្ម និងការចំណាយដើមទុនអាជីវកម្ម ។

ក្រៅពីនេះ ភាពមិនប្រាកដប្រជាដែលបានកើតឡើងអាចប៉ះពាល់ទិសដៅពាណិជ្ជកម្ម និងការវិនិយោគនៅអាមេរិកឡាទីន ព្រមទាំងប៉ះពាល់ដល់ការធ្វើពាណិជ្ជកម្មនៅទូទាំងពិភពលោក ។ វាក៏ប្រឈមនឹងសម្ពាធពីភាពតានតឹងភូមិសាស្ត្រនយោបាយ និងការបែងចែកផលប្រយោជន៍សេដ្ឋកិច្ចក្នុងតំបន់នានាលើពិភពលោក ។

សភាពាណិជ្ជកម្មថៃបានតាមដានស្ថានការណ៍សេដ្ឋកិច្ចពិភពលោកយ៉ាងដិតដល់ ជាពិសេស តម្លៃប្រាក់បាត, តម្លៃថាមពល និងការប្រែប្រួលទីផ្សារហិរញ្ញវត្ថុអន្តរជាតិ ហើយថៃត្រៀមវិធានការដោះស្រាយបញ្ហាដើម្បីកុំឱ្យកត្តាខាងក្រៅប៉ះពាល់សេដ្ឋកិច្ចថៃ ។ ថៃរំពឹងថា ភាគីទាំងពីរនឹងដោះស្រាយបញ្ហាតានតឹងតាមរយៈការចរចាដោយសន្តិវិធី គោរពច្បាប់អន្តរជាតិ ដើម្បីរក្សាស្ថិរភាពប្រព័ន្ធសេដ្ឋកិច្ចពិភពលោក ដែលជាកត្តាសំខាន់សម្រាប់ទំនុកចិត្ត ពាណិជ្ជកម្ម វិនិយោគ និងការងើបឡើងវិញនៃសេដ្ឋកិច្ចគ្រប់ប្រទេស រួមទាំងថៃ ។

គួរបញ្ជាក់ថា កាលពីថ្ងៃទី៤ ខែមករា ក្រសួងការបរទេសថៃបានចេញសេចក្តីថ្លែងការណ៍អំពាវនាវឱ្យអាមេរិក និងវេណេស៊ុយអេឡា ដោះស្រាយបញ្ហាដោយសន្តិវិធី និងគោរពច្បាប់អន្តរជាតិ ដើម្បីកុំបញ្ហាកាន់តែរីករាលដាលខ្លាំងឡើង ។ ក្រសួងការបរទេសថៃអំពាវនាវឱ្យផ្តល់ភាពសំខាន់លើការការពារជនស៊ីវិល និងគោរពឆន្ទៈរបស់ពលរដ្ឋវេណេស៊ុយអេឡា ។

វាពិតជាគួរឱ្យអស់សំណើច ដែលថៃអំពាវនាវឱ្យអាមេរិក និងវេណេស៊ុយអេឡា ដោះស្រាយបញ្ហាតាមរយៈការចរចាដោយសន្តិវិធី ខណៈថៃខ្លួនឯងបែរជាឈ្លានពានដណ្តើមទឹកដីកម្ពុជាយ៉ាងកំរាល, ល្មើសច្បាប់អន្តរជាតិ និងបើកការវាយប្រហារកម្ពុជាម្តងហើយម្តងទៀត ។ ថៃបង្កសង្គ្រាមឈ្លានពានលើកទី១ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ និងលើកទី២ ចាប់ពីថ្ងៃទី៧ ខែធ្នូ ដល់ថ្ងៃទី២៧ ខែធ្នូ ឆ្នាំ២០២៥ ។

មេដឹកនាំថៃប្រកាសលាងទោសកំហុសរបស់ខ្លួនថា សកម្មភាពឈ្លានពានរបស់កងទ័ពថៃដើម្បីការពារអធិបតេយ្យរបស់ខ្លួន និងប្រឆាំងការឆបោកអនឡាញ ប៉ុន្តែហេតុអ្វីថៃចាំបាច់ប្រើប្រាស់យន្តហោះចម្បាំងទម្លាក់គ្រាប់បែកចូលជ្រៅក្នុងទឹកដីកម្ពុជា រីឯកម្ពុជាមិនបានវាយចូលក្នុងទឹកដីថៃឡើយ ។ មេដឹកនាំថៃថា ធ្វើសង្គ្រាមដើម្បីផ្តល់សុវត្ថិភាពឱ្យពលរដ្ឋខ្លួន ប៉ុន្តែបើកដៃឱ្យកងទ័ពវាយប្រហារតំបន់ស៊ីវិលកម្ពុជាបណ្តាលឱ្យពលរដ្ឋកម្ពុជាស្លាប់ និងរបួសជាច្រើននាក់ ។

ថៃអំពាវនាវឱ្យអាមេរិកដោះស្រាយបញ្ហាជាមួយវេណេស៊ុយអេឡាដោយសន្តិវិធី ប៉ុន្តែថៃខ្លួនឯងមិនស្តាប់ការអំពាវនាវរបស់អន្តរជាតិឱ្យឈប់វាយកម្ពុជា និងដោះស្រាយជម្លោះដោយសន្តិវិធី ។ ការអំពាវនាវរបស់ថៃគ្មានប្រយោជន៍ទេ បើថៃមិនគោរពច្បាប់អន្តរជាតិ ថែមទាំងតម្រៀបកុងទឺន័រ និងរាយបន្លាលួសព័ទ្ធយកទឹកដីកម្ពុជាដោយខុសច្បាប់ ៕

ការ៉ាកាស៖ ក្រោយការគំរា.មរបស់លោកត្រាំ ពេលនេះប្រធានាធិបតីស្តីទីនៃប្រទេសវេណេស៊ុយអេឡាបានបន្ទន់ជំហររបស់ខ្លួន តាមរយៈការស្នើសុំចូលរួមសហការជាមួយសហរដ្ឋអាមេរិក ដើម្បីបង្ហាញពីសញ្ញាចង់ផ្សះផ្សារជាលើកដំបូង ក្រោយការចាប់ខ្លួនរបស់លោក Maduro និងភរិយា។ នេះបើយោងតាមការចេញផ្សាយរបស់ Reuters នាថ្ងៃចន្ទទី៥ ខែមករា។

នៅក្នុងសេចក្តីថ្លែងការណ៍មួយដែលបានបង្ហោះនៅលើប្រព័ន្ធផ្សព្វផ្សាយសង្គម ប្រធានាធិបតីស្តីទីវេណាស៊ុយអេឡា លោកស្រី Delcy Rodriguez បាននិយាយថា រដ្ឋាភិបាលរបស់លោកស្រីកំពុងផ្តល់អាទិភាពដល់ការផ្លាស់ប្តូរឆ្ពោះទៅរកទំនាក់ទំនងដ៏គោរពជាមួយសហរដ្ឋអាមេរិក ដោយបានរិះគន់ការវាយឆ្មក់កាលពីថ្ងៃសៅរ៍ថាជាការចាប់យកធនធានជាតិដោយខុសច្បាប់របស់ប្រទេស។

ក្នុងតួនាទីជារដ្ឋមន្រ្តីប្រេងផង និងបច្ចុប្បន្នត្រូវបានតែងតាំងជាប្រធានាធិបតីស្ដីទី ក្រោមការបង្គាប់របស់តុលាការកំពូល និងការគាំទ្រពីយោធាវ៉េណេស៊ុយអេឡាផង ដំបូងលោកស្រី Rodriguez នៅតែប្រកាន់ជំហរថា វេណេស៊ុយអេឡា នឹងស្វែងរកកិច្ចអន្តរាគមន៍ពីគ្រប់ភាគីពាក់ព័ន្ធនានា និងលោកស្រីថែមទាំងបានប្រកាសថា លោក Maduro នៅតែបន្តជាប្រធានាធិបតីរបស់វេណេស៊ុយអេឡាដដែល។

ប៉ុន្តែក្រោយមានការឆ្លើយតបពីលោក ដូណាល់ត្រាំ ដែលគំរាមថា លោកស្រី ចនឹងជួបផលវិបាកធំជាងលោក Maduro ទៅទៀត ប្រសិនបើលោកស្រីមិនព្រមធ្វើអ្វី ដែលលោកចាត់ទុកថា ជារឿងត្រឹមត្រូវនោះ។ ឥឡូវនេះ លោកស្រី Rodriguez បាននិយាយឡើងមកថា “យើងសូមអញ្ជើញរដ្ឋាភិបាលអាមេរិកឱ្យសហការជាមួយយើងលើរបៀបវារៈនៃកិច្ចសហប្រតិបត្តិការដែលផ្តោតលើការអភិវឌ្ឍរួមគ្នាក្នុងក្របខ័ណ្ឌនៃច្បាប់អន្តរជាតិដើម្បីពង្រឹងការរួមរស់ជាមួយគ្នាយូរអង្វែង”។ “ប្រធានាធិបតី Donald Trump ប្រជាជនរបស់យើង និងតំបន់របស់យើងសមនឹងទទួលបានសន្តិភាព និងការសន្ទនា មិនមែនសង្គ្រាមទេ”។

តាមន័យនេះ គឺវេណេស៊ុយអេឡា ហាក់បន្ទន់ឥរិយបថរបស់ខ្លួនចំពោះសហរដ្ឋអាមេរិក ដោយធ្វើយ៉ាងណាព្យាយាមស្វែងរកដំណោះស្រាយជាមួយសហរដ្ឋអាមេរិកដោយសន្តិវិធី ជាជាងការប្រឈមមុខជាមួយធម៌ក្ដៅ ដែលអាចនាំឲ្យឈានដល់វិនាសកម្មដ៏ធ្ងន់ធ្ងរ។

គួរបញ្ជាក់ថា កាលពីថ្ងៃអាទិត្យម្សិលមិញ លោក ដូណាល់ ត្រាំ បានព្រមា.នថា សហរដ្ឋអាមេរិក អាចនឹងបើកការវាយប្រហារយោធាជាលើកទី២ លើវ៉េណេស៊ុយអេឡា ក្រោយការចាប់ខ្លួនប្រធានាធិបតី លោក Nicolas Maduro ប្រសិនបើសមាជិកនៅសេសសល់ក្នុងរដ្ឋាភិបាលវ៉េណេស៊ុយអេឡា មិនព្រមសហការជាមួយ កិច្ចប្រឹងប្រែងរបស់លោក ដើម្បីកែតម្រូវប្រទេសអាមេរិកឡាទីនមួយនេះឡើងវិញ។

បច្ចុប្បន្នលោក Maduro កំពុងស្ថិតក្នុងពន្ធនាគារនៅទីក្រុងញូវយ៉ក ដើម្បីរង់ចាំបង្ហាញខ្លួននៅតុលាការ ក្រោមបទចោទប្រកាន់ ពាក់ព័ន្ធឧកិដ្ឋកម្មគ្រឿងញៀន។ តែទោះជាយ៉ាងណា ការចាប់ខ្លួនរូបលោកដោយសហរដ្ឋអាមេរិក បានបង្កភាពមិនច្បាស់លាស់យ៉ាងស៊ីជម្រៅ អំពីដំណាក់កាលបន្ទាប់ សម្រាប់ប្រទេសដែលសម្បូរទៅដោយធនធានប្រេងបម្រុងមួយនេះ ខណៈមនុស្សជាច្រើនបានហៅការឃុំខ្លួនលោក Maduro និងភរិយារបស់គាត់ថា ជាការចាប់ជំរិត ហើយបាននិយាយថា លោក Maduro នៅតែជាមេដឹកនាំស្របច្បាប់របស់ប្រទេស៕

សារព័ត៌មាន Reuters រាយការណ៍នៅថ្ងៃទី៥ ខែមករា ឆ្នាំ២០២៦ ថា ប្រធានាធិបតីអាមេរិក លោក Donald Trump បានប្រកាសពីកងទ័ពអាមេរិកអាចនឹងកំណត់គោលដៅវាយប្រ.ហារបន្តទៀត គឺមេដឹកនាំប្រទេសកូឡុំប៊ី បន្ទាប់ពីការវាយប្រ.ហារប្រទេសវេណេស៊ុយអេឡាតាមផ្លូវអាកាស និងចា.ប់ខ្លួនលោកប្រធានាធិបតី Nicolas Maduro រួមទាំងភរិយាបានសម្រេចកាលពីថ្ងៃទី៣ ខែមករា ឆ្នាំ២០២៦ ។

លោកប្រធានាធិបតី Trump បានផ្តល់សម្ភាសន៍ពេលជិះយន្តហោះចាកចេញពីរដ្ឋផ្លរីដា ថា ប្រទេសកូឡុំប៊ីកំពុងតែឈឺ ដោយសារគ្រប់គ្រងដោយមេដឹកនាំឈឺ គឺលោកប្រធានាធិបតីកូឡុំប៊ី Gustavo Petro ។ លោក Trump ចោទប្រកាន់ថា រដ្ឋាភិបាលកូឡុំប៊ីពាក់ព័ន្ធនឹងការផលិត និងនាំចេញថ្នាំញៀនដ៏ធំបំផុតដែលប៉ះពាល់អាមេរិក ហេតុនេះ កងទ័ពអាមេរិកអាចធ្វើប្រតិបត្តិការបំផ្លាញរោងចក្រផលិតថ្នាំញៀននៅកូឡុំប៊ី ប៉ុន្តែវានឹងធ្វើឱ្យមានការបារម្ភពីភាពតានតឹងនៅអាមេរិកឡាទីន ។

ចំណែកប្រធានាធិបតីកូឡុំប៊ី លោក Gustavo Petro បានបង្ហោះសារក្នុងបណ្តាញសង្គម X បន្ទាប់ពីកងទ័ពអាមេរិកវាយប្រហារប្រទេសវេណេស៊ុយអេឡាកាលពីថ្ងៃទី៣ ខែមករា ថា ហេតុការណ៍នេះបង្កឱ្យមានការភ័យស្លន់ស្លោនៅទូទាំងពិភពលោក ។ លោកបារម្ភយ៉ាងខ្លាំងចំពោះទង្វើរបស់អាមេរិក និងដាស់តឿនទង្វើនេះធ្វើឱ្យស្ថានការណ៍ក្នុងតំបន់កាន់តែតានតឹងខ្លាំងឡើង ។

បើតាមសេចក្តីរាយការណ៍ កូឡុំប៊ី គឺជាប្រទេសជិតខាងរបស់វេណេស៊ុយអេឡា បានពង្រាយកម្លាំងទ័ពនៅតាមបណ្តោយព្រំដែនជាប់វេណេស៊ុយអេឡា ដើម្បីត្រៀមខ្លួនទប់ទល់នឹងស្ថានការណ៍ ។ ការពង្រាយកម្លាំងទ័ពនេះ បន្ទាប់ពីលោកប្រធានាធិបតី Trump ប្រកាសជាសាធារណៈថា នឹងគ្រប់គ្រងវេណេស៊ុយអេឡា ដែលធ្វើឱ្យអាមេរិករងការរិះគន់យ៉ាងខ្លាំងពីប្រទេសនានាលើពិភពលោក ។

ហេតុការណ៍វាយប្រហារវេណេស៊ុយអេឡា និងគោលដៅវាយប្រហារកូឡុំប៊ីនាពេលបន្ទាប់ បង្ហាញឱ្យឃើញថា រដ្ឋាភិបាលរបស់លោកប្រធានាធិបតី Trump ក្នុងអាណត្តិទី២នេះ កំពុងជំរុញយ៉ាងខ្លាំងដើម្បីរៀបចំទ្វីបអាមេរិកឡើងវិញ និងរៀបចំតំបន់យុទ្ធសាស្ត្រសំខាន់ៗ ដោយមិនចាប់អារម្មណ៍នឹងការប្រឆាំងពីអន្តរជាតិ ។ ទង្វើរបស់អាមេរិកអាចនឹងធ្វើឱ្យប្រទេសនានាមានជម្លោះព្រំដែនជាមួយគ្នានាពេលឆាប់ៗ ។

គួរបញ្ជាក់ថា អន្តរជាតិបានរិះគន់រដ្ឋាភិបាលក្រុងវ៉ាស៊ីនតោនដែលបញ្ជូនកងទ័ពទៅវាយប្រហារវេណេស៊ុយអេឡា គឺល្មើសច្បាប់អន្តរជាតិ និងគំរាមកំហែងស្ថិរភាពក្នុងតំបន់ ។ កាលពីថ្ងៃទី៤ ខែមករា ក្រសួងការបរទេសចិនបានចេញសេចក្តីថ្លែងការណ៍អំពាវនាវឱ្យអាមេរិកធានាសុវត្ថិភាពប្រធានាធិបតីវេណស៊ុយអេឡា លោក Nicolas Maduro និងភរិយា ព្រមទាំងឱ្យអាមេរិកដោះលែងបុគ្គលទាំង២រូបជាបន្ទាន់ ។ ទន្ទឹមនឹងនេះ រដ្ឋាភិបាលចិនអំពាវនាវឱ្យរដ្ឋាភិបាលអាមេរិកបញ្ឈប់ការព្យាយាមផ្តួលរំលំរបបដឹកនាំរបស់វេណេស៊ុយអេឡា និងងាកមកដោះស្រាយបញ្ហាដោយការចរចា ។

ចំណែកមេដឹកនាំកូរ៉េខាងជើង លោក គឹម ជុងអ៊ុន បានថ្កោលទោសអាមេរិកថា ធ្វើប្រតិបត្តិការកងទ័ពដោយឥតខ្មាស់អៀនក្នុងការចាប់ខ្លួនប្រធានាធិបតីវេណស៊ុយអេឡា ដែលនេះជាការស្វែងរកអំណាចរបស់អាមេរិក និងជាគំរូអាក្រក់ ។ រីឯនាយករដ្ឋមន្ត្រីម៉ាឡេស៊ី លោក Anwar Ibrahim បានបង្ហោះសារកាលពីថ្ងៃទី៤ ខែមករា បារម្ភពីកងទ័ពអាមេរិកវាយប្រហារវេណេស៊ុយអេឡា ថាល្មើសច្បាប់អន្តរជាតិ និងអំពាវនាវឱ្យអាមេរិកដោះលែងប្រធានាធិបតីវេណេស៊ុយអេឡាជាបន្ទាន់ ៕

ទីក្រុងគៀវ៖ នៅខណៈពេលដែលពិភពលោកកំពុងប្រតិកម្មនឹងការចាប់ខ្លួន ប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ ពីសំណាក់សហរដ្ឋអាមេរិក លោក វ៉ូឡូឌីមៀ ហ្សេឡេនស្គី ប្រធានាធិបតីអ៊ុយក្រែន ក៏បានបង្ហាញគំនិតចង់ឲ្យលោក ដូណាល់ត្រាំ ធ្វើការព័ទ្ធចាប់ខ្លួនមេដឹកនាំរុស្ស៊ី លោក វ៉ាឡាឌីមៀ ពូទីន ដូចគ្នាដែរ។

យោងតាមពាក្យសំដីរបស់លោក ហ្សេឡេនស្គី បានថ្លែងទៅកាន់អ្នកសារព័ត៌មានកាលពីថ្ងៃអាទិត្យម្សិលមិញ បានឲ្យដឹងថា បន្ទាប់ពីបញ្ចប់ប្រតិបត្តិការដោយជោគជ័យក្នុងការចាប់ខ្លួនលោក ម៉ាឌូរ៉ូ ប្រធានាធិបតីវេណេស៊ុយអេឡា ពេលនេះលោកប្រធានាធិបតីត្រាំគួរតែដឹងហើយថា «តើនរណាជាអ្នកបន្ទាប់?»

លោក ហ្សេឡេនស្គី បានលើកឡើងបន្ថែមថា៖ «ប្រសិនបើអាមេរិកអាចចាត់ការជាមួយមេដឹកនាំផ្តាច់ការតាមវិធីនេះបាន នោះសហរដ្ឋអាមេរិកនឹងដឹងពីអ្វីដែលត្រូវធ្វើបន្ទាប់ហើយ» លោក ហ្សេឡេនស្គី បាននិយាយបន្ថែមដោយទទូចថា លោក Trump គួរតែដោះស្រាយជាមួយលោក Putin តាមវិធីដូចគ្នា។ ក្នុងន័យនេះ មេដឹកនាំរបស់អ៊ុយក្រែន ហាក់បង្ហាញពីចេតនាចង់ជំរុញឲ្យមេដឹកនាំសហរដ្ឋអាមេរិក ធ្វើការចាប់ខ្លួនលោកពូទីន ដូចប្រតិបត្តិការដែលលោកបានធ្វើចំពោះមេដឹកនាំវេណេស៊ុយអេឡាដែរ។

ដោយឡែក ទាក់ទងនឹងប្រតិបត្តិការរបស់អាមេរិកក្នុងការចាប់ខ្លួន លោក ម៉ាឌូរ៉ូ ដដែលនេះ ប្រទេសរុស្ស៊ីបានបង្ហាញប្រតិកម្មនិងជំហរផ្ទុយពីប្រទេសអ៊ុយក្រែន ដែលដូចទៅនឹងប្រទេសជាច្រើនផ្សេងទៀត គឺរុស្ស៊ី ជំរុញឲ្យសហរដ្ឋអាមេរិក ធ្វើការដោះលែងលោក ម៉ាឌូរ៉ូ និង ភរិយារបស់លោកមកវេណេស៊ុយអេឡាវិញ ព្រមទាំងធ្វើការថ្កោ.លទោសយ៉ាងដាច់អហង្ការចំពោះការសម្រេចចិត្តរបស់លោកត្រាំ។

តែទោះជាយ៉ាងណា ដោយប្រឈមមុខនឹងការចោទប្រកាន់ពីបទភេរវកម្មគ្រឿងញៀនសហព័ន្ធដ៏ធំពីសំណាក់សហរដ្ឋអាមេរិក ប្ដីប្រពន្ធមេដឹកនាំរបស់វេណេស៊ុយអេឡា នឹងត្រូវដាក់ឲ្យស្ថិតក្រោមការឃុំខ្លួននៅមជ្ឈមណ្ឌលឃុំឃាំង Metropolitan ក្នុងទីក្រុង Brooklyn ហើយអ្នកទាំងពីរត្រូវបានគេរំពឹងថា នឹងឡើងបង្ហាញខ្លួនក្នុងសវនាការរបស់តុលាការសហព័ន្ធនៅដើមថ្ងៃចន្ទសប្ដាហ៍នេះ៕