ប្រទេសថៃ ៖ សារព័ត៌មានថៃរាយការណ៍ថា ប៉ូលិសស៊ើបអង្កេតប្រចាំខេត្តរ៉ាក់យ៉ង ប្រទេសថៃ បានចាប់ខ្លួនបុរសម្នាក់ឈ្មោះ អៃ អាយុ៣៣ឆ្នាំ ដោយសារបុរសនេះបានយកប្រេងសាំងស្រោចលើរថយន្តអ្នកដទៃ និងដុតអស់ចំនួន២គ្រឿង ។ បុរសឈ្មោះ អៃ សារភាពថា ខ្លួនគ្មានទំនាស់អ្វីជាមួយម្ចាស់រថយន្តទេ ប៉ុន្តែខ្លួនតានតឹងផ្លូវចិត្តខ្លាំងពេកដោយសារចាញ់ល្បែង ទើបដុតរថយន្តលេង ។

ហេតុការណ៍ដុតរថយន្តនេះបានកើតឡើងតាំងពីថ្ងៃទី៦ ខែវិច្ឆិកា ឆ្នាំ២០២៣ មកម៉្លេះ នៅត្រង់បរិវេណមុខខុនដូមួយកន្លែងក្នុងឃុំប្លួកឌែង ស្រុកប្លួកឌែង ខេត្តរ៉ាក់យ៉ង ។ ក្រោយមក ម្ចាស់រថយន្តបានទៅដាក់ពាក្យបណ្តឹងនៅស្ថានីយប៉ូលិសស្រុកប្លួកឌែង ខេត្តរ៉ាក់យ៉ង ហើយលោកវរសេនីយ៍ទោ Chaiphong Saengphongchai នាយប៉ុស្តិ៍នគរបាលស្រុកប្លួកឌែង ក៏បានបញ្ជាឱ្យប៉ូលិសបង្កើនការស៊ើបអង្កេតករណីនេះ ។

ប៉ូលិសក៏បានចុះស៊ើបអង្កេតនៅទីកន្លែងកើតហេតុ និងរកឃើញភស្តុតាងសំខាន់ពីកាមេរ៉ាសុវត្ថិភាពចាប់រូបភាពជនបង្កហេតុឈ្មោះ អៃ ដែលបានជិះម៉ូតូនៅក្បែរនោះ បន្ទាប់មក ក៏យកប្រេងសាំងមកស្រោចលើរថយន្ត រួចដុតតែម្តង ។ ពេលធ្វើសកម្មភាពរួចហើយ បុរសរូបនេះក៏បានជិះម៉ូតូគេចខ្លួន ។

រហូតមកដល់ថ្ងៃទី១៥ ខែវិច្ឆិកា ឆ្នាំ២០២៣ ប៉ូលិសបានប្រមូលភស្តុតាង និងធ្វើការចាប់ខ្លួនបុរសឈ្មោះ អៃ នៅផ្ទះស្ថិតក្នុងស្រុកប្លួកឌែង ដើម្បីឱ្យបុរសឈ្មោះ អៃ បង្ហាញកន្លែងទិញប្រេងសាំង បន្ទាប់មក បង្ហាញកន្លែងដុតរថយន្ត ។ ប៉ូលិសឱ្យដឹងថា ជនបង្កហេតុធ្លាប់បានជាប់ពន្ធនាគារជាច្រើនលើក និងសេពគ្រឿងញៀនទៀតផង ។ ក្រោយមក ប៉ូលិសក៏បានឃុំខ្លួន និងបញ្ជូនជនល្មើសទៅភ្នាក់ងារស៊ើបអង្កេតដើម្បីចាត់វិធានការតាមផ្លូវច្បាប់ ។

វីដេអូក្នុងកាមេរ៉ាសុវត្ថិភាព គឺជាភស្តុតាងសំខាន់ដែលប៉ូលិសទទួលបាន ដោយវីដេអូទី១ បង្ហាញពីពេលមុនបង្កហេតុ បុរសឈ្មោះ អៃ បានជិះម៉ូតូទៅមកនៅក្បែរនោះ ។ បន្ទាប់មក រូបគេក៏បានជិះម៉ូតូទៅទិញប្រេងសាំងយកមកដុតរថយន្តអស់ចំនួន២គ្រឿង ហើយជិះម៉ូតូគេចខ្លួន ។ រីឯវីដេអូ១ទៀតបង្ហាញថា មានផ្សែងកំពុងហុយចេញពីកន្លែងដុតរថយន្ត ។ ប៉ូលិសប្រចាំស្រុកប្លួកឌែង បានចំណាយពេលស៊ើបអង្កេតអស់រយៈពេល៩ថ្ងៃ ទើបអាចចាប់ខ្លួនបុរសឈ្មោះ អៃ បាន ។

ហេតុការណ៍នេះចាត់ទុកថា ជាសំណាងអាក្រក់របស់ម្ចាស់រថយន្តដែលបានចតរថយន្តយ៉ាងល្អ ប៉ុន្តែត្រូវបានគេដុតចោល ដោយជនបង្កហេតុគ្រាន់តែអះអាងថា តានតឹងផ្លូវចិត្ត ។ ចំណែកពលរដ្ឋបានសរសើរពីការបំពេញការងាររបស់ប៉ូលិសប្រចាំស្រុកប្លួកឌែង ដែលអាចចាប់ខ្លួនជនល្មើសបាន ៕ ប្រភព ៖ 3Plus News

Vietiane ៖ កាលពីថ្ងៃពីថ្ងៃទី១៧ខែវិច្ឆិកានេះ យោងតាមរបាយការណ៍ចេញផ្សាយដោយសភាពាណិជ្ជកម្ម និងឧស្សាហកម្មជាតិឡាវបានឲ្យដឹងថា បច្ចុប្បន្ននេះ សេវាកម្មក៏ដូចជាការលក់ទំនិញតាមអនឡាញនៅប្រទេសឡាវកំពុងតែមានការកើនឡើងជាបន្តបន្ទាប់ ខណៈរដ្ឋាភិបាលឡាវក៏បានចេញនូវសេចក្តីប្រកាសពីការជំរុញពាណិជ្ជកម្មតាមប្រព័ន្ធអេឡិចត្រូនិក E-commerce) ដែលជាយុទ្ធសាស្ត្រមួយក្នុងគម្រោងអភិវឌ្ឍន៍របស់ខ្លួនសម្រាប់ឆ្នាំ ២០១៦-២០២៥។

លោក Latthana Douangboupha អគ្គនាយករងនៃនាយកដ្ឋានជំរុញសហគ្រាសធុនតូចនិងមធ្យម នៃក្រសួងឧស្សាហកម្ម និងពាណិជ្ជកម្មឡាវ បាននិយាយនៅក្នុងសិក្ខាសាលាមួយនៅរដ្ឋធានីវៀងចន្ទន៍នាឡាវថា រដ្ឋាភិបាលឡាវបានធ្វើការលើកកម្ពស់សហគ្រាសធុនតូច និងមធ្យម (Small and Medium Enterprises) ហើយកំណត់ជាគោលដៅអាទិភាពមួយរបស់ខ្លួន ដើម្បីជំរុញកំណើនសេដ្ឋកិច្ចជាតិ។

សិក្ខាសាលានេះបានផ្តោតសំខាន់ទៅលើការអភិវឌ្ឍន៍គោលនយោបាយពាណិជ្ជកម្មតាមប្រព័ន្ធអេឡិចត្រូនិក និងការអនុវត្តយុទ្ធសាស្រ្តសម្រាប់ការពង្រឹងសហគ្រាសធុនតូច និងមធ្យមនៅប្រទេសឡាវក្នុងយុគសម័យឌីជីថល។ ជាមួយគ្នានេះ តំណាងក្រុមហ៊ុនមួយចំនួននៅប្រទេសឡាវក៏បានចូលរួមក្នុងសិក្ខាសាលានេះដែរ ដើម្បីស្វែងយល់ និងចែករំលែកបទពិសោធន៍ក្នុងការលក់តាមអនឡាញ ក៏ដូចជាការធ្វើអាជីវកម្មឌីជីថលសម្រាប់ការអភិវឌ្ឍន៍សហគ្រាសរបស់ពួកគេ និងដើម្បីប្រកួតប្រជែងជាមួយអាជីវកម្មក្នុងតំបន់។

លោកក៏បានបន្តទៀតថា ទោះបីជាសហគ្រាសធុនតូច និងមធ្យមជាច្រើនកំពុងប្រើប្រាស់ប្រព័ន្ធ e-commerce សម្រាប់ការលក់ និងការគ្រប់គ្រងអាជីវកម្មក៏ដោយ ក៏នៅមានផែនការអភិវឌ្ឍន៍ និងកែលម្អសម្រាប់ប្រតិបត្តិការអាជីវកម្មឌីជីថលឲ្យបានជោគជ័យបន្ថែមទៀត ដែលគួរតែត្រូវបានលើកកម្ពស់ដោយរដ្ឋាភិបាលផងដែរ។

ម៉្យាងវិញទៀត ការចែករំលែកបទពិសោធន៍និងការរៀនសូត្រពីសិក្ខាសាលានេះ នឹងជួយអភិវឌ្ឍអាជីវកម្មរបស់សហគ្រាសធុនតូច និងមធ្យម ក៏ដូចជាពង្រឹងពួកគេឲ្យមានសមត្ថភាពដើម្បីប្រកួតប្រជែងជាមួយធុរកិច្ចនៅក្រៅប្រទេស។

ទោះជាយ៉ាងណាក៏ដោយ ពាណិជ្ជកម្មតាមប្រព័ន្ធអេឡិចត្រូនិកនេះកំពុងកើនឡើងនៅក្នុងប្រទេសឡាវ។ រដ្ឋាភិបាលឡាវយល់យ៉ាងច្បាស់ពីតម្រូវការរបស់អ្នកវិនិយោគ និងបានចេញបទបញ្ញាត្តិថ្មីមួយផងដែរដើម្បីគាំទ្រដល់ភាពប្រសើរឡើងនៃរបៀបធ្វើអាជីវកម្មថ្មីសម័យទំនើប។ បទបញ្ញាត្តិនេះក៏នាំឱ្យមានទំនុកចិត្តកាន់តែខ្លាំងក្នុងចំណោមពាណិជ្ជករ និងអ្នកប្រើប្រាស់ទាក់ទងនឹងប្រតិបត្តិការឌីជីថល។

យ៉ាងណាមិញ វានៅតែទាមទារឲ្យមានការអភិវឌ្ឍលើវិស័យផ្សេងៗដែលពាក់ព័ន្ធជាមួយនឹងការធ្វើពាណិជ្ជកម្មអេឡិចត្រូនិកនៅក្នុងប្រទេសឡាវផងដែរ និងដើម្បីបង្កើនសក្តានុពលនៃរបៀបធ្វើអាជីវកម្មថ្មីនេះ។

គួរបញ្ជាក់ផងដែរថា រដ្ឋាភិបាលឡាវបានអនុម័តច្បាប់ស្តីពីប្រតិបត្តិការអេឡិចត្រូនិកក្នុងឆ្នាំ ២០១២ និងចេញនូវក្រឹត្យស្តីពីពាណិជ្ជកម្មអេឡិចត្រូនិកក្នុងឆ្នាំ ២០២១។ វាបានផ្តោតសំខាន់ទៅលើមធ្យោបាយជំរុញកំណើនសេដ្ឋកិច្ច និងបង្កើនប្រាក់ចំណូលពីពាណិជ្ជកម្មតាមប្រព័ន្ធអនឡាញផងដែរ៕ Xinhua

ប្រទេសថៃ៖ គិតត្រឹមថ្ងៃទី ១២ ខែវិច្ឆិកា ប្រទេសថៃបានទទួលភ្ញៀវទេសចរណ៍អន្តរជាតិជាង ២៣.៤ លាននាក់ និងរកចំណូលបានជិត ២៨ ពាន់លានដុល្លារ។
យោងតាមរដ្ឋមន្ត្រីក្រសួងទេសចរណ៍ និងកីឡា Sudawan Wangsuphakijkosol បាននិយាយកាលពីថ្ងៃទី ១៤ ខែវិច្ឆិកាថា ប្រទេសថៃបានស្វាគមន៍ភ្ញៀវអន្តរជាតិជាង ២៣.៤ លាននាក់ ចាប់តាំងពីដើមឆ្នាំដល់ថ្ងៃទី ១២ ខែវិច្ឆិកា ដោយនាំមកនូវប្រាក់ចំណូលជិត ៩៨២ ពាន់លានបាត (ប្រមាណ ២៧.៧ ពាន់លានដុល្លារអាមេរិក)។ ក្នុងនោះទីផ្សារទេសចរណ៍អន្តរជាតិកំពូលទាំង ៥ ទៅកាន់ប្រទេសថៃនៅឆ្នាំនេះគឺម៉ាឡេស៊ី (ជាង ៣.៨ លាននាក់) ចិន (២.៩ លាននាក់) កូរ៉េ (ជិត ១.៤ លាននាក់) ឥណ្ឌា (១.៣៥ លាននាក់) និងរុស្ស៊ី (ជិត ១.២ លាននាក់) ។

រដ្ឋមន្ត្រី Sudawan រំពឹងថានឹងមានភ្ញៀវអន្តរជាតិជាច្រើនមកកាន់ប្រទេសថៃនាពេលខាងមុខ ដោយសារការកើនឡើងនៃជើងហោះហើរអន្តរជាតិ និងដើម្បីបញ្ចៀសរដូវរងា។ នៅដើមឆ្នាំនេះ ប្រទេសថៃបានកំណត់គោលដៅទទួលភ្ញៀវអន្តរជាតិពី ១៨-២០ លាននាក់ និងបានបង្កើនគោលដៅដល់ ២៥ លាននាក់ចាប់ពីដើមខែឧសភា ស្មើនឹង ៦៦% បើធៀបនឹងរយៈពេលដូចគ្នាក្នុងឆ្នាំ ២០១៩ ដែលប្រទេសនេះបានស្វាគមន៍ភ្ញៀវទេសចរចំនួន ៣៩,៨ លាននាក់។ ដូច្នេះ នៅឆ្នាំ ២០២៤ ប្រទេសថៃត្រូវបានគេរំពឹងថានឹងទទួលភ្ញៀវអន្តរជាតិចំនួន ៣៥ លាននាក់ និងឈានដល់ ៥៦ ពាន់លានដុល្លារនៅក្នុងចំណូលពីទេសចរណ៍។

គួរបញ្ជាក់ដែរថា បច្ចុប្បន្ន ថៃគឺជាប្រទេសដែលទទួលភ្ញៀវអន្តរជាតិច្រើនជាងគេនៅអាស៊ីអាគ្នេយ៍ ជាមួយនឹងចំនួនភ្ញៀវអន្តរជាតិលើសពី ២៣.៤ លាននាក់។ ក្នុងរយៈពេល ១០ ខែដើមឆ្នាំនេះ វៀតណាមទទួលភ្ញៀវអន្តរជាតិជិត ១០ លាននាក់ ដែលតួលេខគឺស្រដៀងគ្នាទៅនឹងសិង្ហបុរី។ រីឯប្រទេសឥណ្ឌូនេស៊ីបានស្វាគមន៍ភ្ញៀវអន្តរជាតិចំនួន ៨.៥ លាននាក់ ប្រទេសហ្វីលីពីនបានស្វាគមន៍ជិត ៣.៩ លាននាក់ ប្រទេសកម្ពុជាបានស្វាគមន៍ជាង ២.៥ លាននាក់ និងប្រទេសម៉ាឡេស៊ីបានស្វាគមន៍ភ្ញៀវទេសចរចំនួន ១៣ លាននាក់ ចំណែកឯប្រទេសខ្លះទៀតមិនទាន់មានស្ថិតិនៅឡើយទេ៕

ប្រទេសចិន ៖ សារព័ត៌មានចិន China Media Group រាយការណ៍ថា លោក វ៉ាង សៀវពីង រដ្ឋមន្ត្រីក្រសួងសង្គម និងធនធានមនុស្សរបស់ចិនថ្លែងថា ពេលប្រទេសចិនប្រឈមនឹងភាពមិនប្រាកដប្រជាកើនឡើងផ្នែកសេដ្ឋកិច្ច ប៉ុន្តែការងារក្នុងប្រទេសចិននៅឆ្នាំ២០២៣ បានកើនឡើងប្រកបដោយស្ថិរភាព ខណៈអត្រាគ្មានការងារធ្វើបានធ្លាក់ចុះជាបន្តបន្ទាប់ ។ វាជាលទ្ធផលបានមកពីកិច្ចខិតខំប្រឹងប្រឹងសហការគ្នារបស់មន្ត្រីរដ្ឋាភិបាលគ្រប់ជាន់ថ្នាក់ ។

គណៈកម្មការកណ្តាលនៃបក្សកុម្មុយនិស្តចិនបានផ្តល់ភាពសំខាន់លើការជួលកម្លាំងពលកម្មជាចម្បង ដើម្បីអភិវឌ្ឍន៍សេដ្ឋកិច្ច និងសង្គម ដោយបង្កើនស្ថិរភាពនៃការជួលកម្លាំងពលកម្ម និងជំរុញការព្យាយាមគ្រប់វិស័យ ។ បើតាមទិន្នន័យបង្ហាញថា ទីផ្សារការងារនៅប្រទេសចិនបានកើនឡើងជាបន្តបន្ទាប់ និងមានការជួលកម្លាំងពលកម្មដើម្បីបំពេញការងារថ្មីនៅទីក្រុង ស្មើនឹង១០លាន២សែន២ម៉ឺនការងារ គិតចាប់ពីខែមករា រហូតដល់ខែកញ្ញា ឆ្នាំ២០២៣ ។

ស្ថាប័នរដ្ឋាភិបាលបានកំណត់គោលដៅការជួលកម្លាំងពលកម្មនៅទីក្រុង រហូតដល់ដំណាច់ឆ្នាំ២០២៣នេះ គឺស្មើនឹង១២លានការងារ ។ រីឯការងារសម្រាប់និស្សិតទើបបញ្ចប់ការសិក្សាពីសាកលវិទ្យាល័យ និងយុវវ័យទូទៅនៅតែមានស្ថិរភាព ។ ចំនួនពលរដ្ឋជនបទមកស្វែងរកការងារធ្វើនៅទីក្រុងបានកើនឡើងជាបន្តបន្ទាប់ គឺមានពលរដ្ឋប្រមាណ៣២លាន៩សែន៧ម៉ឺននាក់បានចៀសផុតពីភាពក្រីក្រ ដោយសារពួកគេទទួលបានប្រាក់ចំណូលកើនឡើង តាមរយៈការបំពេញការងារដែលមិនមែនជាការងារកសិកម្ម ។

ចាប់តាំងពីដើមឆ្នាំ២០២៣ កន្លងមក រដ្ឋាភិបាលចិនបានចំណាយថវិកាប្រមាណ២សែនលានយាន់សម្រាប់គាំទ្រការជួលកម្លាំងពលកម្ម ព្រមទាំងព្យាយាមបង្កើតស្ថិរភាព និងពង្រីកការងារបន្ថែមទៀតនៅប្រទេសចិន ដូចជា ការបណ្តុះបណ្តាលជំនាញអាជីព និងការកែលម្អសេវាកម្មផ្សេងៗ ៕ ប្រភព ៖ TV5 HD

បរទេស៖ នាយករដ្ឋមន្ត្រីហ្វាំងឡង់លោក Petteri Orpo បានប្រកាសថា ប្រទេសនេះនឹងបិទច្រកព្រំដែនចំនួន ៤ ក្នុងចំណោមច្រកព្រំដែនចំនួន ៩ ជាមួយរុស្ស៊ី ដើម្បីទប់ស្កាត់លំហូរជនភៀសខ្លួនដែលបានឆ្លងកាត់ព្រំដែន។
យោងតាមប្រភពព័ត៌មាន Reuters ដែលបានចុះផ្សាយកាលពីថ្ងៃទី១៦ ខែវិច្ឆិកាថា រដ្ឋាភិបាលហ្វាំងឡង់បានសម្រេចចិត្តបិទច្រកព្រំដែនមួយចំនួននៅព្រំដែនភាគខាងកើត ដោយចាប់ផ្តើមបិទពីព្រឹកព្រលឹមថ្ងៃទី ១៨ ខែវិច្ឆិកានេះតទៅ។ ដូច្នេះច្រកព្រំដែនដែលត្រូវបានបិទនោះគឺ Vaalimaa, Nuijamaa, Imatra និង Niirala ដែលស្ថិតនៅលើព្រំដែនដីរវាងហ្វាំងឡង់ និងរុស្ស៊ី ដោយច្រកព្រំដែនទាំងនេះ ច្រើនតែជាចំណុចចរាចរណ៍ដ៏មមាញឹកបំផុតរវាងប្រទេសទាំងពីរ។

រដ្ឋាភិបាលហ្វាំងឡង់បាននិយាយថា កន្លងមកមានមនុស្សប្រហែល ៣,០០០ នាក់បានឆ្លងកាត់ច្រកព្រំដែនភាគអាគ្នេយ៍នៃប្រទេសហ្វាំងឡង់ជារៀងរាល់ថ្ងៃ។ ដោយប្រទេសហ្វាំងឡង់បានកត់ត្រាជនភៀសខ្លួនដែលគ្មានឯកសារត្រឹមត្រូវប្រហែល ១៣១ នាក់កាលពីសប្តាហ៍មុន។ យោងតាមទីភ្នាក់ងារព្រំដែនហ្វាំងឡង់ បានឱ្យដឹងដែរថា មនុស្សទាំងនេះមិនមែនជាពលរដ្ឋរុស្ស៊ីនោះទេ ប៉ុន្តែភាគច្រើនមកពីមជ្ឈិមបូព៌ា ដូចជាអ៊ីរ៉ាក់ យេម៉ែន សូម៉ាលី និងស៊ីរី ឆ្លងកាត់ក្នុងប្រទេសរុស្ស៊ីមុនពេលចូលប្រទេសហ្វាំងឡង់ដោយគ្មានទិដ្ឋាការ។

ទោះជាយ៉ាងណាក៏ដោយ នាយករដ្ឋមន្ត្រីហ្វាំងឡង់លោក Petteri Orpo បានយល់ឃើញថា ការបិទព្រំដែននឹងធ្វើឱ្យជីវិតប្រចាំថ្ងៃកាន់តែលំបាកសម្រាប់អ្នកដែលត្រូវបានអនុញ្ញាតឱ្យធ្វើដំណើររវាងហ្វាំងឡង់ និងរុស្ស៊ី។ គាត់ក៏បានបន្តទៀតថា រុស្ស៊ីអាចនឹងមានចេតនា ដើម្បីធ្វើឱ្យប្រទេសហ្វាំងឡង់មានអស្ថិរភាព ដូច្នេះយើងសម្រេចថានឹងបិទច្រកព្រំដែនមួយរយៈដើម្បីឱ្យស្ថានភាពនេះស្ងប់ស្ងាត់ឡើងវិញ។

គួរបញ្ជាក់ដែរថា ហ្វាំងឡង់ គឺជាប្រទេសដែលមានប្រជាជន ៥.៥ លាននាក់ នឹងមានព្រំដែនសរុប ១.៣០០ គីឡូម៉ែត្រជាមួយរុស្ស៊ី ។ ព្រំដែនរវាងប្រទេសទាំងពីរនេះ ពីមុនមកត្រូវបានដំឡើងដោយរបងទាបៗ ជាចម្បងដើម្បីការពារគោក្របី និងសត្វចិញ្ចឹមកុំឱ្យរត់ចេញពីស្រុកប៉ុណ្ណោះ៕

បរទេស៖ មន្ត្រីការពារជាតិអង់គ្លេសបាននិយាយថា ទាហានរុស្ស៊ីជាង ៣០០,០០០ នាក់បានស្លាប់ និងរងរបួសនៅក្នុងជម្លោះជាមួយអ៊ុយក្រែន ដោយទាហានរាប់ម៉ឺននាក់ទៀតបានបោះបង់ចោល។

យោងតាមគេហទំព័រ UK Defence Journal ដែលបានចុះផ្សាយកាលពីថ្ងៃទី១៥ ខែវិច្ឆកាថា នៅក្នុងជម្លោះរវាងរុស្ស៊ីនិងអ៊ុយក្រែន បានធ្វើឱ្យយោធារុស្ស៊ីប្រហែល ៣០២.០០០ នាក់ស្លាប់ ឬរងរបួស និងទាហានរុស្ស៊ីរាប់ម៉ឺននាក់ទៀតបានបោះបង់ចោលចាប់តាំងពីការចាប់ផ្តើមនៃសង្គ្រាម។ រីឯរថពាសដែករុស្ស៊ីជាង ៧.១១៧ គ្រឿងត្រូវបានបំផ្លាញ ចំណែករថក្រោះប្រយុទ្ធសំខាន់ជិត ២,៤៧៥ បានបាត់បង់ រួមទាំងយន្តហោះ ៩៣ គ្រឿងបានធ្លាក់ ក៏ដូចជាឧទ្ធម្ភាគចក្រ ១៣២ គ្រឿងត្រូវបានបំផ្លាញ យានជំនិះគ្មានមនុស្សបើកចំនួន ៣២០ គ្រឿងបានបាត់បង់ នាវាកងទ័ពជើងទឹកចំនួន ១៦ គ្រឿងបានលិច ឬខូចខាត និងប្រព័ន្ធកាំភ្លើងធំរុស្ស៊ីជាង ១,៣០០ នៃគ្រប់ប្រភេទត្រូវបានបំផ្លាញទាំងអស់។

លោក James Heappey រដ្ឋលេខាធិការទទួលបន្ទុកកងកម្លាំងប្រដាប់អាវុធនៃក្រសួងការពារជាតិអង់គ្លេសបាននិយាយថា ទាហានរុស្ស៊ីប្រហែល ៣០២,០០០ នាក់ត្រូវបានសម្លាប់ ឬរងរបួស ហើយរាប់ម៉ឺននាក់បានបោះបង់ចោលចាប់តាំងពីការចាប់ផ្តើមនៃសង្រ្គាម។ លោក James Heappey បានបន្តទៀតថា រុស្ស៊ីបានប្រើប្រាស់ក្រុមហ៊ុនយោធាឯកជនមួយចំនួន និងអង្គភាពស្ម័គ្រចិត្តដើម្បីពង្រឹងកងកម្លាំងរបស់ខ្លួនដែលចូលរួមក្នុងសង្រ្គាមជាមួយ អ៊ុយក្រែន ។ ទោះជាយ៉ាងណាក៏ដោយ សមាជិកនៃអង្គការទាំងនេះបានស្លាប់ក្នុងការប្រយុទ្ធគ្នា នឹងមិនត្រូវបានចុះបញ្ជីក្នុងបញ្ជីឈ្មោះទុក្ករបុគ្គលនៃកងទ័ពរុស្ស៊ីនោះទេ។ ដូច្នេះហើយ វាមិនអាចទៅរួចទេក្នុងការកំណត់ចំនួនពិតប្រាកដ ដោយសារតែមានការលំបាកជាច្រើនក្នុងការប្រមូលទិន្នន័យ។

គួរបញ្ជាក់ដែរថា រុស្ស៊ី កម្រផ្សព្វផ្សាយពីការបាត់បង់ជីវិតយោធារបស់ខ្លួនណាស់។ ទោះជាយ៉ាងណាក៏ដោយ យោងតាមក្រសួងការពារជាតិរុស្ស៊ីបាននិយាយកាលពីដើមឆ្នាំមុនថាទាហានរុស្ស៊ីជាង ៦,០០០ នាក់បានស្លាប់នៅក្នុងជម្លោះជាមួយអ៊ុយក្រែន។ រីឯក្រសួងការពារជាតិអង់គ្លេសបាននិយាយកាលពីខែកុម្ភៈថាទាហានរុស្ស៊ីប្រហែល ៤០,០០០-៦០,០០០ នាក់ត្រូវបានសម្លាប់នៅក្នុងជម្លោះជាមួយអ៊ុយក្រែន។ នេះបើតាមឯកសារលេចធ្លាយពីទីភ្នាក់ងារស៊ើបការណ៍សម្ងាត់យោធាអាមេរិក (DIA) ក៏បានបង្ហាញដែរថា ចំនួនទាហានរុស្ស៊ីដែលត្រូវបានសម្លាប់ក្នុងឆ្នាំដំបូងនៃអរិភាពគឺ ៣៥,០០០-៤៣,០០០នាក់៕

មូលហេតុថ្មីនៃការស្លា.ប់របស់មនុស្សសម័យបច្ចុប្បន្នគួរឱ្យបារម្ភ គឺការស្លា.ប់ក្នុងអំឡុងពេលថតរូបសែលហ្វី ជាពិសេស ក្រុមយុវវ័យចូលចិត្តថតរូបនៅទីកន្លែងមានគ្រោះថ្នាក់ ដូចជា នៅមាត់ច្រាំងថ្មចោទ ឬមាត់ជ្រោះ រហូតដល់ធ្លាក់ស្លា.ប់ ។ អ្នកថតរូបនៅតាមទីកន្លែងគ្រោះថ្នាក់ទាំងនេះ មិនចាប់អារម្មណ៍នឹងការបិទស្លាកបម្រាមនោះទេ ដោយសារពួកគេចង់បានរូបថតស្អាតៗយកទៅបង្ហោះក្នុងបណ្តាញសង្គម និងចង់ឱ្យមានអ្នកចុច Like ច្រើន ។

តាមរបាយការណ៍របស់ JMIR ដែលធ្វើការស្រាវជ្រាវផ្នែកសុខភាពលើប្រព័ន្ធឌីជីថលបង្ហាញថា មូលហេតុនៃការស្លា.ប់ដែលគេកំពុងបារម្ភ គឺការស្លា.ប់ពេលកំពុងថតរូបសែលហ្វី ។ រយៈពេលប៉ុន្មានឆ្នាំថ្មីៗនេះ គេរកឃើញថា មានមនុស្សស្លាប់ដោយសារមូលហេតុនេះកាន់តែច្រើន គឺចាប់ពីឆ្នាំ២០០៨ រហូតដល់ឆ្នាំ២០២១ មានអ្នកស្លា.ប់ដោយសារការថតរូបសែលហ្វីនៅទូទាំងពិភពលោក ស្មើរហូតដល់៣៧៩នាក់ ។

របាយការណ៍បង្ហាញថា អ្នកស្លា.ប់ភាគច្រើន គឺជាភ្ញៀវទេសចរដែលព្យាយាមថតរូបនៅតាមទីកន្លែងខ្ពស់ៗ ឬនៅមាត់ជ្រោះ ហើយបានធ្លាក់ស្លា.ប់តែម្តង ។ លើសពីនេះ គឺការស្លា.ប់ដោយសារលង់ទឹក ខណៈពេលពួកគេព្យាយាមថតរូបសែលហ្វីពេលកំពុងលេងទឹកនៅកន្លែងគ្រោះថ្នាក់ ។

របាយការណ៍បង្ហាញទៀតថា អ្នកស្លា.ប់ភាគច្រើនមានអាយុប្រមាណ២២ឆ្នាំ ក្នុងចំណោមនោះមានស្ត្រីច្រើនជាងបុរស ។ ពួកគេមិនចាប់អារម្មណ៍ពីការបិទស្លាកគ្រោះថ្នាក់នៅតាមទីកន្លែងនីមួយៗទេ ហើយជារឿយៗ ពួកគេតែងផ្លោះរបងសម្រាប់ការពារមិនឱ្យមនុស្សចូលនៅជិតទីខ្ពស់ ឬមាត់ជ្រោះ ដើម្បីឱ្យពួកគេទទួលបានរូបភាពស្រស់ស្អាតបំផុត ។

Samuel Cornell មកពីសាកលវិទ្យាល័យ New South Wales ជាអ្នកស្រាវជ្រាវលើប្រធានបទ «ការស្លា.ប់ដោយសារថតរូបសែលហ្វី» និយាយថា នេះជាបញ្ហាសុខភាពសាធារណៈដ៏ធំលំដាប់ពិភពលោក ហើយបញ្ហានេះកាន់តែធ្ងន់ធ្ងរឡើងក្នុងសម័យប្រើប្រាស់បណ្តាញសង្គម ។ មនុស្សគ្រប់គ្នាចង់ថតរូបឱ្យបានស្អាត ឡូយឆាយ និងយកទៅបង្ហោះក្នុងបណ្តាញសង្គមរបស់ខ្លួន ហើយបើរូបនោះមើលទៅគួរឱ្យខ្លាច និងរំភើប នឹងកាន់តែមានអ្នកចុច Like ច្រើន ទើបធ្វើឱ្យមនុស្សសម័យនេះ ជាពិសេស យុវវ័យចូលចិត្តថតរូបដោយមិនបានគិតដល់គ្រោះថ្នាក់ ។

អ្នកស្រាវជ្រាវណែនាំថា ចាំបាច់ត្រូវកំណត់តំបន់ហាមថតរូប ឬហាមថតរូបសែលហ្វីជាដាច់ខាតនៅទីកន្លែងមានគ្រោះថ្នាក់ ។ លើសពីនេះ ត្រូវមានការសាងសង់របងឱ្យរឹងមាំជាងមុន ឬមានសន្តិសុខជួយការពារសុវត្ថិភាពនៅតាមទីកន្លែងគ្រោះថ្នាក់ ។ បើអនុវត្តតាមចំណុចទាំងនេះ វានឹងអាចជួយកាត់បន្ថយចំនួនអ្នកស្លា.ប់ដោយសារការថតរូបសែលហ្វីបានខ្លះ ៕ ប្រភព ៖ nation