តើដឹងឬទេថា ដើម្បីឱ្យអង្ករលីងមានក្លិនឈ្ងុយបានល្អ និងយូរថ្ងៃ តើគេធ្វើវាតាមវិធីណាខ្លះ? យើងឃើញថា ចុងភៅម្នាក់ៗមានបទពិសោធន៍ និងវិធីចម្អិនម្ហូបអាហារមិនដូចគ្នាទេ ហើយអាហាររបស់ពួកគេ ក៏មានរសជាតិឆ្ងាញ់ទៅតាមចំណង់ចំណូលចិត្តរៀងៗខ្លួន ។

ចុងភៅថៃម្នាក់បានចែករំលែកពីវិធីធ្វើអង្ករលីងឱ្យមានក្លិនឈ្ងុយ និងទុកបានយូរថ្ងៃ ។ ជំហានដំបូង យើងត្រូវហាន់រំដេង និងស្លឹកគ្រៃជាចំណិតតូចៗ ។ បន្ទាប់មក បេះស្លឹកក្រូចយកតែស្លឹករបស់វាប៉ុណ្ណោះ ហើយត្រូវបេះទងនៅកណ្តាលស្លឹកចេញ ។

ជំហានបន្ទាប់ យើងត្រូវយកអង្ករដំណើបមកលីងនៅក្នុងខ្ទះជាមួយរំដេង, ស្លឹកគ្រៃ និងស្លឹកក្រូចសើច ដែលបានត្រៀមទុក ។ ចំណែកភ្លើងចង្ក្រានវិញ គឺត្រូវបើកភ្លើងតិចៗដើម្បីលីងអង្ករលីងរហូតដល់វាមានក្លិនឈ្ងុយ និងពណ៌លឿង ទើបយើងបិទភ្លើងចង្ក្រាន ហើយទុកវាឱ្យត្រជាក់ ។

ចុងក្រោយ ត្រូវយកអង្ករលីងដែលបានលីងរួចយកទៅកិនឱ្យម៉ត់តាមតម្រូវការ ។ ហេតុនេះ យើងនឹងទទួលបានអង្ករលីងមានក្លិនឈ្ងុយ ដែលអាចច្រកចូលកំប៉ុង និងយកទៅដាក់ក្នុងទូរទឹកកក ។ ការធ្វើតាមវិធីនេះធានាថា វាមានសុវត្ថិភាព និងក្លិនឈ្ងុយជានិច្ច ។

*គ្រឿងផ្សំ ៖
-អង្ករដំណើប ៣០០ក្រាម
-រំដេង ១មើមតូច
-ស្លឹកគ្រៃ ២គល់
-ស្លឹកក្រូចសើច ៦សន្លឹក

*វិធីធ្វើ ៖
១-ហាន់រំដេង និងស្លឹកគ្រៃជាចំណិតតូចៗ បន្ទាប់មក ហែកស្លឹកក្រូចសើច និងទាញទងខាងក្នុងស្លឹកចេញ

២-យកអង្ករដំណើប និងគ្រឿងផ្សំទាំងអស់ដាក់ចូលក្នុងខ្ទះ ហើយកូរវាដោយបើកភ្លើងចង្ក្រានតិចៗរហូតដល់មានក្លិនឈ្ងុយ និងគ្រាប់អង្ករចេញពណ៌លឿង ។ ពេលអង្ករលីងឆ្អិនហើយ ត្រូវទុកឱ្យវាត្រជាក់សិន

៣-យកអង្ករលីងដែលបានលីងរួចហើយទៅកិនឱ្យម៉ត់ និងច្រកដបទុក ៕

បរទេស៖ ក្រុមហ៊ុន GAC, Geely និងក្រុមហ៊ុនផ្សេងៗទៀតបានកំពុងប្រញាប់ប្រញាល់ក្នុងការផលិត ក៏ដូចជាចេញលក់ម៉ូដែលរថយន្តស្ព័រអគ្គិសនីដែលមានប្រសិទ្ធភាពខ្ពស់។

យោងតាមគេហទំព័រអន្តរជាតិ Nikkei Asia ដែលបានរាយការណ៍នៅថ្ងៃទី២៦ ខែធ្នូថា ក្រុមហ៊ុនផលិតរថយន្តជាច្រើនរបស់ប្រទេសចិន កំពុងចាប់ផ្តើមផលិតរថយន្តស្ព័រអគ្គិសនីជាបន្តបន្ទាប់នៅក្នុងផ្នែកកីឡា សម្រាប់ការប្រណាំងរថយន្ត ដោយបង្ហាញពីសមត្ថភាពបច្ចេកវិទ្យាខ្ពស់ និងពង្រឹងវត្តមានរបស់យីហោនៅក្នុងទីផ្សាររថយន្តអគ្គិសនីដែលមានការប្រកួតប្រជែងកាន់តែខ្លាំង។

បច្ចុប្បន្នកម្រិតនៃការប្រកួតប្រជែងកាន់តែខ្លាំងឡើងនៅក្នុងទីផ្សាររថយន្តថាមពលថ្មី នៅពេលដែលម៉ាកយីហោកាន់តែច្រើនឡើង។ ដូច្នេះ សម្រាប់ក្រុមហ៊ុនផលិតរថយន្តស្ព័រអនុញ្ញាតឱ្យពួកគេបែងចែកខ្លួនពីគូប្រជែងដោយការបង្ហាញបច្ចេកវិទ្យា ដូចជាការបង្កើនល្បឿន និងការគ្រប់គ្រងច្បាស់លាស់ ក៏ដូចជាការធ្វើឱ្យប្រសើរឡើងនូវរូបភាពម៉ាកយីហោនឹងធ្វើឱ្យការធ្វើអាជីវកម្មក្នុងទីផ្សារបរទេស “កាន់តែងាយស្រួល”។

ហេតុនេះហើយ រោងចក្រនៃម៉ាករង Aion របស់ GAC មានទីតាំងនៅ Guangzhou ខេត្ត Guangdong លើផ្ទៃដីប្រហែល ៣,០០០ ម៉ែត្រការ៉េ ដោយនៅលើខ្សែសង្វាក់ផលិតកម្មនេះគឺជាយាន “គ្រោងឆ្អឹង” ដែលវិស្វករកំពុងផ្គុំសមាសធាតុដោយដៃយ៉ាងប្រុងប្រយ័ត្ន។ នោះហើយជាកន្លែងដែល ម៉ូដែល Hyper SSR កំពុងមានរូបរាង។ រីឯម៉ាក Zeekr ដែលជាកម្មសិទ្ធិរបស់ Geely – ក៏បានបើកដំណើរការម៉ូដែល 001 FR នៅចុងខែតុលាផងដែរ ។

ចំណែកឯ BYD វិញក៏បានប្រកាសពីគម្រោងដាក់បង្ហាញ រថយន្តម៉ូដែល U9 ដែលជារថយន្តស្ព័រទំនើប ក្រោមម៉ាកយីហោរងប្រណីត Yang Wang ដោយតម្លៃសមរម្យគឺជាកត្តាសំខាន់ក្នុងការរីកចម្រើននៃរថយន្តថាមពលថ្មីក្នុងប្រទេសចិន។ ជាឧទាហរណ៍ BYD លក់រថយន្តកូនកាត់អគ្គិសនី និងដោតឌុយអ៊ីន (PHEVs) ចំនួន ៣០០,០០០ គ្រឿងរៀងរាល់ខែ ដោយម៉ូដែលទាំងពីរនេះមានតម្លៃប្រហែល ១៤,០០០-២៨,០០០ ដុល្លារអាមេរិក៕

តៃវ៉ាន់ ៖ សារព័ត៌មានរបស់តៃវ៉ាន់រាយការណ៍ថា សមត្ថកិច្ចតៃវ៉ាន់បានចាប់ខ្លួននារីថៃ ចំនួន៣៣នាក់ ដែលពួកនាងបានចូលមកទឹកដីតៃវ៉ាន់ក្នុងឋានៈជាភ្ញៀវទេសចរ ប៉ុន្តែបានលួចមកធ្វើការក្នុងភោជនីយដ្ឋានមួយកន្លែងនៅតំបន់ស៊ីមឺនទីង ។ ពួកនាងត្រូវបានភោជនីយដ្ឋានជួលឱ្យមកអង្គុយផឹកស្រាជាមួយភ្ញៀវ ប៉ុន្តែក្នុងចំណោមនោះ មាននារីថៃខ្លះលួចចូលសណ្ឋាគារជាមួយភ្ញៀវ ។

នៅចុងខែធ្នូ ឆ្នាំ២០២៣ សមត្ថកិច្ចតៃវ៉ាន់បានទទួលដំណឹងថា នៅជាន់ក្រោមដីតាមផ្លូវមួយកន្លែង គឺជាភោជនីយដ្ឋានបើកលក់ម្ហូបអាហារថ្ងៃត្រង់ឱ្យអតិថិជន ។ ប៉ុន្តែនៅពេលល្ងាច ភោជនីយដ្ឋាននេះបានប្តូរមកលក់ទឹកតែ ហើយគេឃើញមានអតិថិជនវ័យចំណាស់មកអង្គុយជជែកគ្នាជាមួយនារីស្អាតៗ ។ ពេលខ្លះ ពួកនាងលួចបម្រើសេវាកម្មផ្លូ.វភេ.ទទៀតផង ។

ពេលចុះត្រួតពិនិត្យភោជនីយដ្ឋាន សមត្ថកិច្ចបានប្រទះឃើញភាពខុសប្រក្រតីមួយចំនួន គឺមាននារីថៃចូលក្នុងភោជនីយដ្ឋាននេះជាញឹកញាប់ ។ ហេតុនេះ សមត្ថកិច្ចក៏បានស៊ើបអង្កេតរកភស្តុតាងអស់រយៈពេល៤ខែ ។ នៅថ្ងៃទី២៦ ខែធ្នូ ឆ្នាំ២០២៣ ប៉ូលិសក៏បានចាប់ខ្លួនមេការឈ្មោះ ឆាយ ស៊ែហ៊ូ, បុគ្គលិកធ្វើការក្នុងភោជនីយដ្ឋានចំនួន៣នាក់, អតិថិជន ២១នាក់ និងនារីថៃ ៣៣នាក់ ដែលពួកនាងមានអាយុប្រមាណ២០ឆ្នាំ ។

បើតាមរបាយការណ៍បង្ហាញថា នារីថៃទាំង៣៣នាក់នេះ បានចូលមកតៃវ៉ាន់ដោយប្រើប្រាស់ទិដ្ឋាការជាភ្ញៀវទេសចរ ប៉ុន្តែពួកគេលួចធ្វើការខុសច្បាប់ ហើយនារីថៃខ្លះបានរស់នៅតៃវ៉ាន់ហួសសុពលភាពទិដ្ឋាការជាច្រើនខែ ។ ក្រោយសួរចម្លើយរួច សមត្ថកិច្ចក៏បានបញ្ជូនពួកនាងទៅកាន់កន្លែងឃុំឃាំង និងពិន័យជាប្រាក់ពីករណីបំពានច្បាប់ចេញ-ចូលតៃវ៉ាន់ ។ បន្ទាប់មក សមត្ថកិច្ចក៏បញ្ជូនពួកនាងទៅកាន់ការិយាល័យប៉ូលិសអន្តោប្រវេសន៍ដើម្បីបញ្ជូនត្រឡប់ទៅប្រទេសថៃវិញ ។

សមត្ថកិច្ចនិយាយថា មេការឈ្មោះ ឆាយ ស៊ែហ៊ូ អាយុ៣៦ឆ្នាំ ជាអ្នកទទួលខុសត្រូវ និងបានបើកហាងលក់ទឹកតែ នៅជាន់ក្រោមដី ។ ឆាយ ស៊ែហ៊ូ បានជួលនារីថៃជាច្រើននាក់ឱ្យមកអង្គុយហូបបាយ និងបបួលភ្ញៀវផឹកគ្រឿងស្រវឹង ។ នារីថៃទាំងអស់ធ្វើការបានល្អ ទើប ឆាយ ស៊ែហ៊ូ អាចបើកអាជីវកម្មបានចំនួន៣ ហើយដំណើរការបានយ៉ាងល្អអស់រយៈពេលជាច្រើនខែ ។

អាជ្ញាធរតៃវ៉ាន់បញ្ជាក់ថា នារីថៃទាំងនេះបានអង្គុយផឹកស្រាជាមួយភ្ញៀវ ហើយនារីថៃខ្លះទៀតហ៊ានទៅសណ្ឋាគារជាមួយភ្ញៀវប្រុសបន្តទៀត ទើបធ្វើឱ្យអាជីវកម្មរបស់ ឆាយ ស៊ែហ៊ូ កាន់តែរីកចម្រើន ។ រីឯពលរដ្ឋតៃវ៉ាន់រស់នៅក្នុងតំបន់នេះមិនពេញចិត្តទេ ហើយពួកគេបានប្តឹងទៅសមត្ថកិច្ច ដោយសារតែសំឡេងរំខាននៅពេលយប់ ៕

បរទេស៖ ប្រទេសម៉ាឡេស៊ីបានស្នើឱ្យប្រជាជនរបស់ខ្លួនបង្កើនកម្រិតសេវាកម្មដើម្បីទាក់ទាញភ្ញៀវទេសចរណ៍ថៃឡើងវិញ បន្ទាប់ពីអ្នកទេសចរណ៍ថៃជាច្រើននាក់មានការមិនពេញចិត្តដោយសារសេវាកម្មមិនល្អ ហើយប្រជាជនម៉ាឡេស៊ីមិនរួសរាយរាក់ទាក់។

យោងតាមការស្ទង់មតិលើភ្ញៀវទេសចរថៃដែលធ្វើដំណើរក្នុងប្រទេសម៉ាឡេស៊ីគឺស្ថិតនៅកម្រិតមិនពេញចិត្ត នេះបើតាមគេហទំព័រ World of Buzz ដែលបានចុះផ្សាយនៅថ្ងៃទី២៧ ខែធ្នូ។

នៅក្នុងការស្ទង់មតិនេះ ភ្ញៀវទេសចរថៃបានផ្តល់ហេតុផលថាពួកគេទទួលបានសេវាកម្មមិនល្អ រួមទាំងត្រូវប្រឈមមុខនឹងបញ្ហាក្នុងការអនុវត្តភារកិច្ចរបស់ភ្នាក់ងាររដ្ឋាភិបាល។

លោក Aida Guje ប្រធានសមាគមពាណិជ្ជកម្មទេសចរណ៍ហាឡាល់ថៃ-អាស៊ាន បានធ្វើការស្នើឱ្យប្រជាជនម៉ាឡេស៊ីទាំងអស់បង្កើនកម្រិតសេវាកម្ម ក៏ដូចជាបង្កើនភាពរួសរាយរាក់ទាក់បន្ថែមទៀត ក្នុងគោលបំណងបង្កើនភាពទាក់ទាញភ្ញៀវទេសចរថៃមកទស្សនាប្រទេសម៉ាឡេស៊ី។ លោកក៏បានគូសបញ្ជាក់ដែរថា បញ្ហានេះគឺមានសារៈសំខាន់ខ្លាំងណាស់ ព្រោះភ្ញៀវទេសចរថៃ នឹងត្រូវធ្វើដំណើរមកប្រទេសម៉ាឡេស៊ីបន្ថែមទៀត។

ទន្ទឹមនឹងនេះ ប្រជាជនម៉ាឡេស៊ីក៏បានបញ្ចេញមតិដែរថា ពិតណាស់ប្រជាជនយើងគួរតែបង្កើនកម្រិតសេវាកម្មទេសចរណ៍បន្ថែមទៀត ហើយក៏បានទទួលស្គាល់ដែរថា ប្រជាជនម៉ាឡេស៊ីមិនសូវរួសរាយរាក់ទាក់ពិតមែន។

គួរបញ្ជាក់ដែរថា កាលពីខែមុនប្រជាជនម៉ាឡេស៊ីចំនួន ៣.៨ លាននាក់បានធ្វើដំណើរទៅកាន់ប្រទេសថៃ ដែលធ្វើឱ្យប្រទេសនេះមានអ្នកទេសចរម៉ាឡេស៊ីចូលទស្សនាច្រើនជាងគេបំផុតនៅឆ្នាំនេះ ដោយសារតែប្រជាជនថៃរស់រាយរាក់ទាក់ រួមជាមួយទេសភាព និងអាហារសម្បូរបែប៕

កាលពីពេលថ្មីៗនេះ មានបុរសម្នាក់ឈ្មោះ Thana Benjasak អាយុ ៣៣ ឆ្នាំ ជាជនជាតិថៃ បានធ្វើឲ្យមហាជនចាប់អារម្មណ៍យ៉ាងខ្លាំង បន្ទាប់ពីបានដាក់បង្ហោះនៅលើបណ្តាញសង្គមអំពីវិធីសាស្រ្តនៅក្នុងការសន្សំលុយរបស់គាត់។

ថាណា ដែលជាអ្នកបង្កាត់ពូជត្រីជុល បច្ចុប្បន្នកំពុងរស់នៅ សង្កាត់ខ្លងជុកចែ ខេត្តឆាឈឿងសៅ ដែលហេតុថាស្រលាញ់ក្រដាសប្រាក់៥០បាតពេក ទើបធ្វើការសន្សំត្រឹមរយៈពេល ៦ខែប៉ុណ្ណោះ សន្សំបានរហូតដល់ទៅ ៣០០,០០០ បាត (៨,៧២៧ ដុល្លារ)។ រីឯលុយនោះទៀតសោត សុទ្ធតែក្រដាស ៥០ បាតទាំងអស់។

ដំណើរការនៃការសន្សំប្រាក់របស់ថាណា គឺបានចាប់ផ្ដើមនៅពេលដែលគាត់បានឃើញវីដេអូ TikTok ដែលមនុស្សម្នាក់កំពុងតែសន្សំក្រដាសប្រាក់៥០បាត។ ដោយមានការចាប់អារម្មណ៍ខ្លាំងទៅលើវីដេអូនោះ គាត់ក៏បានសម្រេចចិត្តសាកល្បងវាដែរ។ រាល់ពេលដែលគាត់លក់ត្រីបានម្តងៗ គាត់បានប្តូរលុយទាំងនោះទៅជាលុយក្រដាស 50 បាតទាំងអស់ ហើយទម្លាក់ចូលក្នុងពាង។ លុះដល់កន្លះឆ្នាំក្រោយមក នៅពេលដែលលោកបើកពាងនោះមើល គាត់សប្បាយចិត្តយ៉ាងខ្លាំង ស្ទើរតែមិននឹកស្មានដល់ថាសន្សំបានប្រាក់ច្រើនដល់ថ្នាក់នេះសោះ។

បើទោះបីជានេះគ្រាន់តែវិធីសាស្ត្រសាមញ្ញមួយប៉ុណ្ណោះ ប៉ុន្តែគឺប្រកបដោយប្រសិទ្ធភាពខ្ពស់ដែលបានធ្វើឲ្យគាត់សន្សំប្រាក់បានរហូតដល់ ៣០០ ០០០ បាតក្នុងរយៈពេលត្រឹមតែកន្លះឆ្នាំ៕