បរទេស៖ នៅក្នុងត្រីមាសទី ៤ នៃឆ្នាំ ២០២៣ BYD ដែលជាក្រុមហ៊ុនរថយន្តអគ្គិសនីដ៏ធំនៅប្រទេសចិន បានលក់រថយន្តអគ្គិសនីសុទ្ធចំនួន ៥២៦,០០០ គ្រឿង ខណៈដែលរថយន្ត Tesla លក់បានត្រឹមតែ ៤៨៥,០០០ គ្រឿងប៉ុណ្ណោះ។

យោងតាមគេហទំព័រអន្តរជាតិ CBT News ដែលបានចុះផ្សាយនៅថ្ងៃទី៣ ខែមករាថា ក្រុមហ៊ុនចិនដែលជាដៃគូប្រកួតប្រជែងរបស់ Tesla បានកំពុងផ្លាស់ប្តូរកាន់តែខ្ពស់ និងខ្ពស់ជាងនៅក្នុងឋានានុក្រមពិភពលោក ដោយដាក់សម្ពាធលើក្រុមហ៊ុន Tesla ខណៈដែលក្រុមហ៊ុនអាមេរិកត្រូវពឹងផ្អែកលើការកាត់បន្ថយតម្លៃដើម្បីបង្កើនការលក់។

ដូច្នេះហើយ បើប្រៀបធៀបទៅនឹងឆ្នាំ ២០២២ លទ្ធផលឆ្នាំ ២០២៣ របស់ក្រុមហ៊ុន Tesla គឺខ្ពស់ជាងត្រឹមតែ ៣៨% ប៉ុណ្ណោះ ដែលបង្ហាញថាកំណើនរបស់ក្រុមហ៊ុនកំពុងថយចុះបន្តិច ដោយសារវាចូលទៅក្នុងជំពូកថ្មីដែលមានការប្រកួតប្រជែងខ្លាំង។ សម្រាប់ក្រុមហ៊ុន BYD វិញបានលក់រថយន្តអគ្គិសនីជិត ១.៦ លានគ្រឿងនៅឆ្នាំ ២០២៣ កើនឡើង ៧០% បើធៀបនឹងឆ្នាំ ២០២២។

ទោះជាយ៉ាងណាក៏ដោយ ប្រសិនបើគណនាការលក់ពេញមួយឆ្នាំ Tesla នៅតែវ៉ាដាច់ BYD ដោយក្រុមហ៊ុនអាមេរិកបានលក់រថយន្តអគ្គិសនីសរុបចំនួន ១.៨១ លានគ្រឿងនៅទូទាំងពិភពលោកក្នុងឆ្នាំ ២០២៣ ដែលឈានដល់គោលដៅដែលបានកំណត់ និងខ្ពស់ជាងការព្យាករណ៍របស់អ្នកជំនាញមួយចំនួន រួមទាំង WSJ ផងដែរ ។ ចំណែកទីផ្សាររបស់ក្រុមហ៊ុន Tesla នៅក្នុងប្រទេសចិននៅតែមានស្ថិរភាព ហើយបានកើនឡើងដល់ជិត ១២% ក្នុងរយៈពេល ១១ ខែដំបូងនៃឆ្នាំ ២០២៣ ធៀបនឹង ១១% ក្នុងរយៈពេលដូចគ្នាកាលពីឆ្នាំមុន។

រីឯក្រុមហ៊ុន BYD វិញមិនទាន់លក់រថយន្តនៅអាមេរិកទេ ប៉ុន្តែបច្ចុប្បន្នក្រុមហ៊ុនកំពុងពង្រីកទីផ្សារទូទាំងពិភពលោករួមទាំងអឺរ៉ុបផងដែរ។ BYD បានចាប់ផ្តើមនៅឆ្នាំ ១៩៩៥ ក្នុងនាមជាក្រុមហ៊ុនផលិតថ្ម នឹងបានក្លាយជាម៉ាកឈានមុខគេនៅក្នុងរថយន្តថាមពលថ្មី។ កំណើនរបស់ BYD ឆ្លុះបញ្ចាំងពីការរីកចម្រើនរបស់ប្រទេសចិនក្នុងវិស័យរថយន្តអគ្គិសនី។ ហេតុនេះហើយ ក្រុមហ៊ុនផលិតរថយន្តជាច្រើននៅក្នុងប្រទេសអាស៊ីបូព៌ាក៏កំពុងដើរលឿនជាងគូប្រជែងលោកខាងលិចរបស់ពួកគេក្នុងការនាំយកម៉ូដែលរថយន្តអគ្គិសនីជាមួយនឹងសមត្ថភាពឌីជីថលដ៏ល្អឥតខ្ចោះទៅកាន់ទីផ្សារ៕

ប្រទេសជប៉ុន ៖ នៅដើមឆ្នាំ២០២៤ មានហេតុការណ៍ផ្សេងៗកើតឡើងជាបន្តបន្ទាប់នៅប្រទេសជប៉ុន ដូចជា នៅថ្ងៃទី១ ខែមករា កើតគ្រោះរញ្ជួយដីក្នុងតំបន់ Notojo ខេត្ត Ishikawa ស្ថិតនៅភាគកណ្តាលប្រទេសជប៉ុន និងកើតរលកយក្សស៊ូណាមិនៅតាមឆ្នេរសមុទ្រ ។ ហេតុការណ៍នេះបានបណ្តាលឱ្យពលរដ្ឋជប៉ុនស្លា.ប់ យ៉ាងហោចណាស់ ៦២នាក់ និងមានអ្នករងរបួសជាច្រើនទៀត ។

នៅថ្ងៃទី២ ខែមករា កើតហេតុការណ៍យន្តហោះ២គ្រឿងបុកគ្នាត្រង់ចំណុច Runway C នៅអាកាសយានដ្ឋានអន្តរជាតិ Haneda ក្នុងទីក្រុងតូក្យូ ។ យន្តហោះរបស់ក្រុមហ៊ុនអាកាសចរណ៍ Japan Airlines រៀបនឹងចុះចតនៅអាកាសយានដ្ឋាន Haneda បានបុកគ្នាជាមួយយន្តហោះរបស់ឆ្មាំសមុទ្រជប៉ុន ដែលកំពុងត្រៀមហោះហើរទៅកាន់អាកាសយានដ្ឋាន Niigata ដើម្បីជួយសង្គ្រោះអ្នករងគ្រោះដោយសាររញ្ជួយដី ។ ហេតុការណ៍នេះបណ្តាលឱ្យមនុស្សជិះក្នុងយន្តហោះឆ្មាំសមុទ្រជប៉ុន ចំនួន៥នាក់ស្លា.ប់ រីឯអ្នកដំណើរ និងបុគ្គលិកក្នុងយន្តហោះ Airbus 350 រួចផុតពីគ្រោះថ្នាក់ ។

ចំណែកនៅថ្ងៃទី៣ ខែមករា សារព័ត៌មានជប៉ុនរាយការណ៍ថា មានភ្លើងឆេះក្នុងតំបន់ពាណិជ្ជកម្មក្បែរស្ថានីយ Kokura ដែលជាតំបន់លក់ទំនិញដ៏ល្បីល្បាញ និងបង្កើតឡើងតាំងពីយូរឆ្នាំមកហើយក្នុងទីក្រុង Kitakyushu ខេត្ត Fukuoka ។ ក្នុងបរិវេណនេះមានហាងលក់ទំនិញពាសពេញទាំងអស់ ហើយបណ្តាលឱ្យភ្លើងឆេះរាលដាលទៅបរិវេណជុំវិញយ៉ាងឆាប់រហ័ស ។

សារព័ត៌មានជប៉ុនរាយការណ៍ទៀតថា ភ្លើងបានឆេះចេញពីបរិវេណមួយដែលពេញទៅដោយភោជនីយដ្ឋាន និងស្ថិតនៅឆ្ងាយពីស្ថានីយរថភ្លើង JR ប្រមាណ៣០០ម៉ែត្រ ។ បរិវេណភ្លើងឆេះនេះស្ថិតនៅក្បែរផ្សារ Thanka ដែលផ្សារនេះបានបង្កើតឡើងជាយូរឆ្នាំមកហើយ ។ កន្លងមក ផ្សារនេះធ្លាប់មានភ្លើងឆេះខ្លាំងចំនួន២លើក គឺកាលពីមេសា និងខែសីហា ឆ្នាំ២០២៣ ។

គេរាយការណ៍ថា ភ្នាក់ងារពន្លត់ភ្លើងបានតស៊ូពន្លត់ភ្លើងអស់រយៈពេលជាង៤ម៉ោង ដោយសារភ្លើងឆេះសន្ធោសន្ធៅខ្លាំងពេក ។ ប៉ុន្តែពុំទាន់មានសេចក្តីរាយការណ៍ថា មានអ្នកណាម្នាក់រងរបួស ឬស្លា.ប់ក្នុងហេតុការណ៍នេះទេ ។ រីឯសមត្ថកិច្ចបានប្រកាសឱ្យអ្នករស់នៅក្បែរបរិវេណភ្លើងឆេះប្រញាប់នាំគ្នាជម្លៀសចេញជាបន្ទាន់ ៕

ប្រទេសថៃ ៖ សារព័ត៌មានថៃរាយការណ៍ថា នៅដើមខែមករា ឆ្នាំ២០២៤ មានចោរម្នាក់បានដើរចូលក្នុងហាងលក់មាសមួយកន្លែងនៅផ្សារទំនើប Lotus’s ខេត្តណាខន ស្រីថាំម៉ារ៉ាជ ។ បន្ទាប់មក ចោរនេះបានយកខ្សែកចំនួន២ខ្សែរត់ចេញទៅក្រៅ ដោយខ្សែកទាំង២ខ្សែនេះមានតម្លៃជាង២សែនបាត ។ ដូចគ្នានេះ មានចោរម្នាក់ទៀតបានឆក់ខ្សែកពីស្ត្រីម្នាក់ដែលកំពុងដើរនៅតាមផ្លូវ ។ ចុងក្រោយ សមត្ថកិច្ចអាចចាប់ខ្លួនចោរទាំង២នាក់បាន ហើយពួកគេបានបៀមមាសលាក់ក្នុងមាត់ ។

បើតាមបុគ្គលិកធ្វើការក្នុងហាងមាសប្រាប់ថា ពីដំបូង ចោរបានប្រើល្បិចចង់ទិញមាស ហើយសួរថា ៖ «តើមាស១ដំឡឹងមានតម្លៃប៉ុន្មានបាត? ព្រោះខ្ញុំចង់ទិញមាសឱ្យម៉ែសម្រាប់ថ្ងៃចូលឆ្នាំសកល» ។ ក្រោយមក បុគ្គលិកក្នុងហាងក៏យកមាសមកឱ្យចោរជ្រើសរើស ហើយចោរមើលមាសតែមួយភ្លែតប៉ុណ្ណោះ ក៏រត់គេចខ្លួនតែម្តង ។ ចោរខាងលើបានជិះម៉ូតូពណ៌ស គ្មានស្លាកលេខ សំដៅទៅកាន់ទីរួមខេត្តណាខន ស្រីថាំម៉ារ៉ាជ យ៉ាងរហ័ស ។

ក្រោយពេលកើតហេតុមិនដល់២ម៉ោង សមត្ថកិច្ចថៃក៏អាចចាប់ខ្លួនចោរខាងលើបានក្នុងផ្ទះនៅស្រុកថាសាឡា ដោយសារការពិនិត្យមើលតាមកាមេរ៉ាសុវត្ថិភាពនៅតាមផ្លូវ ដែលចោរខាងលើជិះម៉ូតូគេចខ្លួន ។ ពេលនោះ សមត្ថកិច្ចបានយកខ្សែកមាសពីចោរវិញ ដែលចោរបានលាក់ទុកខ្សែកមាសនេះក្នុងផ្ទះរបស់ខ្លួន ។ រីឯខ្សែក១ខ្សែទៀតរកពុំទាន់ឃើញទេ ។

សមត្ថកិច្ចក៏បានបញ្ជូនខ្លួនចោរមកសាកសួរនៅស្ថានីយប៉ូលិស ហើយសមត្ថកិច្ចបានព្យាយាមសួរចោរនេះថា ហេតុអ្វីធ្វើបែបនេះ? តើមានរឿងអ្វីកើតឡើង? បើទោះជាសមត្ថកិច្ចសួរសំណួរចោរយ៉ាងណាក្តី ក៏ចោរពុំព្រមនិយាយស្តីដែរ ហើយថែមទាំងមិនហ៊ានកម្រើកមាត់ទៀតផង ។ ចុងក្រោយ សមត្ថកិច្ចបានប្រទះឃើញខ្សែក១ខ្សែទៀតនៅក្នុងមាត់ចោរ ។

បើតាមសាច់ញាតិប្រាប់ថា ចោរនេះឈ្មោះ សុផាណាត់ អាយុ២៤ឆ្នាំ ជាអ្នកញៀនថ្នាំញៀន និងចូលចិត្តលេងហ្គេមផងដែរ ។ ហេតុនេះ ពួកគេសន្និដ្ឋានថា ចោរអាចយកមាសនេះទៅលក់ដើម្បីយកប្រាក់មកទិញថ្នាំញៀន និងលេងហ្គេម ។

ចំណែកហេតុការណ៍មួយទៀតក៏បានកើតឡើងនៅខេត្តជាមួយគ្នាដែរ គឺចោរបានបៀមខ្សែកមាសក្នុងមាត់ ដើម្បីលក់យកប្រាក់ទិញថ្នាំញៀន ។ ករណីបៀមមាសក្នុងមាត់នេះ គឺជាវិធីថ្មីរបស់ចោរ ប៉ុន្តែគេចមិនផុតពីការចាប់ខ្លួនរបស់សមត្ថកិច្ចទេ ។ សមត្ថកិច្ចបានចាប់ខ្លួនចោរម្នាក់ទៀតឈ្មោះ កាំម៉ុន វ៉ាត់ អាយុ៣៧ឆ្នាំ ដែលបានឆក់ខ្សែកមាសពីស្ត្រីម្នាក់ ។

សមត្ថកិច្ចបានបញ្ជូនចោរឈ្មោះ កាំម៉ុន វ៉ាត់ ទៅត្រួតពិនិត្យទឹកនោម និងឃើញលទ្ធផលវិជ្ជមាន ។ ចោរម្នាក់នេះសារភាពថា ខ្លួនទើបតែជក់ថ្នាំញៀន ហើយមុននេះ ខ្លួនជាអ្នកបើកបររថយន្តដឹកជញ្ជូនអីវ៉ាន់ឱ្យគេ ប៉ុន្តែខ្លួនបានឈប់ធ្វើការអស់២សប្តាហ៍ហើយ ។

ថ្ងៃមួយ ដោយសារតែខ្លួនគ្មានប្រាក់សោះ ហើយឃើញស្ត្រីម្នាក់ពាក់មាស ទើបខ្លួនដើរតាមស្ត្រីនោះ និងឆក់ខ្សែកតែម្តង ។ នៅពេលសមត្ថកិច្ចចាប់បាន ចោរឈ្មោះ កាំម៉ុន វ៉ាត់ ពុំដឹងថា យកមាសនេះទៅលាក់នៅកន្លែងណា ទើបលាក់ក្នុងមាត់តែម្តង ។

រីឯស្ត្រីរងគ្រោះឈ្មោះ សុដាផា ប្រាប់ថា គាត់ភ័យខ្លាំងណាស់ នៅពេលជួបហេតុការណ៍នេះ ។ នៅថ្ងៃនោះ គាត់បានចេញទៅទិញរបស់របរ និងដើរត្រឡប់មកផ្ទះវិញ ។ នៅតាមផ្លូវ គាត់មានអារម្មណ៍ថា ដូចមានមនុស្សដើរតាមក្រោយ ស្រាប់តែចោរបានស្ទុះមកឆក់ខ្សែកដែលគាត់កំពុងពាក់ ហើយរត់គេចខ្លួន ។ គាត់ក៏បានតាំងស្មារតី ស្រែកឱ្យអ្នកនៅក្បែរនោះជួយ និងប្តឹងសមត្ថកិច្ចឱ្យចាប់ខ្លួនចោរឆក់ខ្សែក ។

ចុងក្រោយ សមត្ថកិច្ចបានចោទប្រកាន់ចោរឈ្មោះ កាំម៉ុន វ៉ាត់ ចំនួន៣ករណី ដូចជា ៖ ១-លួចទ្រព្យសម្បត្តិអ្នកដទៃនៅពេលយប់, ២-រត់ឆក់ទ្រព្យសម្បត្តិអ្នកដទៃ និង៣-ជក់ថ្នាំញៀន ៕

កាលពីពេលថ្មីៗនេះ បើយោងទៅតាមប្រភពសារព័ត៌មាន VN Express បានចុះផ្សាយពីទិន្នន័យរបស់ការិយាល័យស្ថិតិក្នុងប្រទេសវៀតណាមបានឲ្យដឹងថា ក្រុមហ៊ុនអចលនទ្រព្យប្រមាណ១៣០០កន្លែងបានប្រកាសក្ស័យធននៅឆ្នាំ២០២៣ ដែលចំនួននេះបានកើនឡើង ៨% បើធៀបនឹងឆ្នាំ២០២២ ។

ពេញមួយឆ្នាំ២០២៣នេះ ជាមធ្យមអាជីវកម្មចំនួន១០៧កន្លែង បានប្រកាសក្ស័យធនជារៀងរាល់ខែ ខណៈចំនួនអាជីវកម្មថ្មីដែលត្រូវបានបង្កើតឡើងធ្លាក់ចុះ ៤៥% បើប្រៀបធៀបទៅនឹងឆ្នាំ២០២២។

ទីផ្សារអចលនៈទ្រព្យរបស់ប្រទេសវៀតណាមបានស្ថិតក្នុងចំណុចក្តៅគគុកចាប់តាំងពីឆ្នាំ២០២២មកម្លេះ ហើយស្ថានភាពដ៏យ៉ាប់យឺននេះបានបន្តរហូតមកដល់បច្ចុប្បន្ន បើទោះបីជាមានការជួយជ្រុំជ្រែងពីរដ្ឋាភិបាលក្តី។

ក្រុមអ្នកវិភាគក៏បាននិយាយថា ការធ្លាក់ចុះនៃវិស័យអចលនៈទ្រព្យរបស់វៀតណាម គឺអាចនឹងបណ្តាលមកពីបញ្ហាមួយចំនួនដូចជា បញ្ហាផ្លូវច្បាប់ក្នុងប្រទេស ការប្រគល់និងកាន់កាប់ដី ការកំណត់តម្លៃ និងដើមទុនជាដើម។ សភាពការអចលនទ្រព្យមិនច្បាស់លាស់បែបនេះហើយ បានធ្វើឱ្យគម្រោងសាងសង់មួយចំនួនត្រូវបានពន្យារពេល ឬផ្អាក ដែលនាំឱ្យមានការខាតបង់សម្រាប់អាជីវកម្មសំណង់ ក៏ដូចជាគ្រោងការផលិតមួយចំនួន។

រីឯ ទីផ្សារអចលនទ្រព្យវិញក៏នៅតែមានអស្ថិរភាពនិងបន្តធ្លាក់ចុះ ដែលនេះបណ្តាលមកពីហានិភ័យនៃការជាប់គាំង កង្វះការផ្គត់ផ្គង់ រចនាសម្ព័ន្ធនៃទំនិញមួយចំនួនមិនដំណើរការបានល្អ រួមជាមួយនឹងកត្តាផ្សេងៗទៀត។

អ្នកវិភាគក៏បានផ្គូរផ្គង់ឃើញថា ទីផ្សារអចលនទ្រព្យរបស់ប្រទេសវៀតណាមក្នុងឆ្នាំ២០២៤នេះ ក៏នឹងនៅតែជួបការលំបាកទាំងក្នុងការផ្គត់ផ្គង់ និងការចំណាយ។ ប៉ុន្តែទោះជាយ៉ាងណា វានឹងក្លាយជាដំណាក់កាលដំបូង មុននឹងឈានដល់ការផ្លាស់ប្តូរកំណែទម្រង់សម្រាប់ឆ្នាំ ២០២៥ គឺវៀតណាមនឹងធ្វើវិសោធនកម្មច្បាប់ថ្មីទាក់ទងទៅនឹងលំនៅដ្ឋាន និងអចលនទ្រព្យដាក់បញ្ចូលជាធរមានផងដែរ៕