បរទេស៖ ប្រទេសចិនដែលត្រូវបានគេស្គាល់ថាជាប្រទេសនិយមផឹកតែច្រើនជាងគេបំផុត ប៉ុន្តែឥឡូវនេះចិនបានវ៉ាដាច់សហរដ្ឋអាមេរិក ដើម្បីក្លាយខ្លួនជាទីផ្សារខ្សែសង្វាក់កាហ្វេដ៏ធំបំផុតរបស់ពិភពលោក។

យោងតាមប្រភពព័ត៌មាន CNN ដែលបានចុះផ្សាយនៅថ្ងៃទី១៤ ខែធ្នូថា ហាងកាហ្វេម៉ាកយីហោនៅក្នុងសេដ្ឋកិច្ចធំទីពីររបស់ពិភពលោកបានកើនឡើង ៥៨% ក្នុងរយៈពេល ១២ ខែចុងក្រោយនេះ ដែលឈានដល់ ៤៩,៦៩១។ ទន្ទឹមនឹងនេះ សហរដ្ឋអាមេរិកបច្ចុប្បន្នមានហាងកាហ្វេត្រឹមតែ ៤០,០៦២ ប៉ុណ្ណោះ ។ ហាងកាហ្វេម៉ាកយីហោគឺជាគំនិតមួយដែលសំដៅទៅលើហាងដែលផ្ទុកម៉ាកល្បីៗ ដែលជាកម្មសិទ្ធិរបស់ក្រុមហ៊ុន។ លក្ខណៈទូទៅរបស់ហាងគឺវាដំណើរការនៅក្នុងខ្សែសង្វាក់មួយ ដោយមានការរចនាខាងក្នុងឯកសណ្ឋាន ម៉ឺនុយស្តង់ដារ និងផ្តល់ជាប្រចាំនូវផលិតផលម៉ាកជាក់លាក់។

ដូច្នេះហើយ បច្ចុប្បន្នកំណើននៅក្នុងប្រទេសចិនត្រូវបានដឹកនាំដោយការពង្រីកយ៉ាងឆាប់រហ័សនៃហាងតូចៗ និងគំនិតដែលផ្តោតលើការដឹកជញ្ជូនរបស់ Luckin Coffee និង Cotti Coffee ដែលបានបន្ថែមហាងថ្មីៗចំនួន ៥,០៥៩ និង ៦,០០៤ រៀងៗខ្លួន។ ហាងកាហ្វេ Luckin ដែលបង្កើតឡើងកាលពី ៦ ឆ្នាំមុន សព្វថ្ងៃមានហាងចំនួន ១៣,២៧៣ និងជាហាងកាហ្វេដ៏ធំបំផុតនាពេលបច្ចុប្បន្ននេះ។ រីឯ Starbucks វិញបានបើកហាងដំបូងរបស់ខ្លួននៅក្នុងប្រទេសចិនកាលពីឆ្នាំ ១៩៩៩ ដោយបច្ចុប្បន្នជាហាងធំទីពីរ។

យោងតាមការស្ទង់មតិបានរាយការណ៍ថាជាង ៩០% នៃអ្នកប្រើប្រាស់ហាងកាហ្វេចិនចំនួន ៤,០០០ បានផឹកកាហ្វេក្តៅរៀងរាល់សប្តាហ៍ ខណៈដែល ៦៤% ទៀតបានផឹកកាហ្វេទឹកកកយ៉ាងហោចណាស់ម្តងក្នុងមួយសប្តាហ៍ និង៨៩% នៃអតិថិជនមកហាង ឬបញ្ជាទិញយ៉ាងហោចណាស់ម្តងក្នុងមួយសប្តាហ៍។ នេះបើតាម World Coffee Portal ក៏បានព្យាករណ៍ដែរថា កំណើនហាងកាហ្វេតាមខ្សែសង្វាក់ក្នុងប្រទេសចិននឹងផ្ទុះឡើងក្នុងអត្រា ២៤% នៅឆ្នាំ ២០២៤។

លោក Jeffrey Young ស្ថាបនិក និងជានាយកប្រតិបត្តិនៃក្រុមហ៊ុន Allegra Group រួមទាំងម្ចាស់ក្រុមហ៊ុន World Coffee Portal ក៏បានវាយតម្លៃដែរថា ទីផ្សារហាងកាហ្វេអាស៊ីបូព៌ាបច្ចុប្បន្ននេះកំពុងរីកចម្រើនយ៉ាងឆាប់រហ័ស ដោយសារការពង្រីកហាងដ៏អស្ចារ្យនៅក្នុងប្រទេសចិន ដែលនឹងក្លាយជាមហាអំណាចយ៉ាងឆាប់រហ័សក្នុងឧស្សាហកម្មកាហ្វេពិភពលោក៕

ប្រទេសហ្វីលីពីន ៖ សារព័ត៌មានបរទេសបានរាយការណ៍កាលពីថ្ងៃទី១៤ ខែធ្នូ ឆ្នាំ២០២៣ ថា ហ្វីលីពីនបានបញ្ជូនជនជាតិចិនចំនួន១៨០នាក់ត្រឡប់ទៅប្រទេសរបស់ខ្លួនវិញ ក្រោយពីជនជាតិចិនទាំងនេះត្រូវបានឃុំខ្លួនក្នុងករណីជួញដូរមនុស្ស និងការបោកប្រាស់តាមអនឡាញនៅទីក្រុងម៉ានីល ។

សារព័ត៌មាន AFP រាយការណ៍ថា រដ្ឋាភិបាលហ្វីលីពីនបានបញ្ជូនជនជាតិចិនចំនួន១៨០នាក់ ដែលគេសង្ស័យថា ពាក់ព័ន្ធនឹងករណីជួញដូរមនុស្ស ក្រោយពីពួកគេត្រូវបានចាប់ខ្លួននៅទីក្រុងម៉ានីល ។ សារព័ត៌មាននេះរាយការណ៍បន្តថា ជនជាតិចិន, កូរ៉េខាងត្បូង, វៀតណាម និងហ្វីលីពីន បានស្ថិតក្នុងចំណោមមនុស្សជិត៦០០នាក់ ដែលអាជ្ញាធរហ្វីលីពីនបានឃាត់ខ្លួន ក្នុងអំឡុងពេលប្រតិបត្តិការកាលពីខែតុលា ឆ្នាំ២០២៣ ។

ប៉ូលិសហ្វីលីពីនបានឆ្មក់ចូលអគារមួយកន្លែងដែលបានចុះឈ្មោះបើកអាជីវកម្មហ្គេមអនឡាញ ប៉ុន្តែគេប្រទះឃើញអគារនេះបានលួចបើកកន្លែងលក់ឧប.ករណ៍សិ.ច, ហាងម៉ាស្សា, បន្ទប់ខារ៉ាអូខេ និងភោជនីយដ្ឋាន ។ ក្នុងពេលរឆ្មក់ចូលអគារ ប៉ូលិសបានជួយសង្គ្រោះនារីជាច្រើននាក់ ដែលត្រូវគេឃុំខ្លួននៅទីក្រុងម៉ានីលដោយខុសច្បាប់ ។Gilberto Cruz ជាគណៈកម្មការប្រឆាំងអំពើឧក្រិដ្ឋកម្មបានផ្តល់សម្ភាសន៍ជាមួយសារព័ត៌មាន AFP ថា ៖ «ជនជាតិចិនដែលហ្វីលីពីនបណ្តេញចេញពីប្រទេសនេះ គ្មានលិខិតអនុញ្ញាតធ្វើការទេ ។ ជនបរទេសជាច្រើននាក់ត្រូវបានគេឃាត់ខ្លួន ហើយហ្វីលីពីននឹងបញ្ជូនពួកគេឱ្យត្រឡប់ទៅប្រទេសវិញនាពេលឆាប់ៗ» ។

មុននេះ សមាជិកព្រឹទ្ធសភាហ្វីលីពីនបានដាស់តឿនថា ប្រទេសហ្វីលីពីនកំពុងក្លាយជាកន្លែងអាជីវកម្មបោកប្រាស់របស់ជនបរទេស ដែលបានចូលមករស់នៅហ្វីលីពីនទាំងស្របច្បាប់ និងខុសច្បាប់ ។

ចំណែកក្រសួងការបរទេសអាមេរិកបានបញ្ជាក់ក្នុងរបាយការណ៍ជួញដូរមនុស្សថា ហ្វីលីពីនមិនអើពើនឹងការស៊ើបអង្កេត ឬកាត់ក្តីឱ្យបានត្រឹមត្រូវទេ ចំពោះករណីជួញដូ.រមនុស្សមកធ្វើការក្នុងប្រទេសនេះ ។ លើសពីនេះ ក៏មានអំពើពុករលួយពាក់ព័ន្ធនឹងករណីឧក្រិដ្ឋកម្មផងដែរ ដែលធ្វើឱ្យគេកាន់តែបារម្ភពីបញ្ហានេះ ៕ ប្រភព ៖ Thai post

ប្រទេសចិន៖ ម្ចាស់ហាង និងបុគ្គលិកចំនួន ១៣ នាក់ ត្រូវបានតុលាការសម្រេចកាត់ទោសឱ្យជាប់ពន្ធនាគារ ១២ឆ្នាំ និងពិន័យជាទឹកប្រាក់ ៧០ ម៉ឺនដុល្លារអាមេរិកជុំវិញករណីចម្រាញ់ប្រេងពីកាកសំណល់ស៊ុប Hotpot ទុកលក់ឱ្យភ្ញៀវនៅថ្ងៃបន្ទាប់។

យោងតាមគេហទំព័រអន្តរជាតិ China Daily ដែលបានចុះផ្សាយនៅខែធ្នូថ្មីៗនេះថា ករណីដ៏គួរឱ្យភ្ញាក់ផ្អើលនៃការបំពានសុវត្ថិភាពម្ហូបអាហារនេះបានធ្វើឱ្យអ្នកគ្រប់គ្រង និងចុងភៅចំនួន ១៣ នាក់នៃភោជនីយដ្ឋានហតផតមួយកន្លែងដែលមានឈ្មោះថា Ruchuan Beef Tripe Hotpot ស្ថិតក្នុងខេត្តអានហ៊ុយ ភាគខាងជើងប្រទេសចិន ត្រូវបានតុលាការចិនកាត់ទោសឱ្យជាប់ពន្ធនាគាររហូតដល់ ១២ ឆ្នាំ និងពិន័យជាប្រាក់ជាង ៥ លានយន់ (ប្រមាណ ៧០ ម៉ឺនដុល្លារអាមេរិក) សម្រាប់ការកែច្នៃប្រេងឆាចោលដោយខុសច្បាប់ ទុកបម្រើដល់ភ្ញៀវនៅថ្ងៃបន្ទាប់។

យោងតាមក្រុមអាជ្ញាធរបានឱ្យដឹងទៀតថា ហេតុការណ៍នេះកើតឡើងនៅថ្ងៃទី១២ ខែធ្នូ ឆ្នាំ២០២៣ នៅពេលដែលអាជ្ញាធរចិនចុះទៅត្រួតពិនិត្យអនាម័យ។ ក្នុងថ្ងៃដដែលនោះអាជ្ញាធរក៏បានបញ្ជាក់ដែរថា អ្នកគ្រប់គ្រង និងចុងភៅភោជនីយដ្ឋានលក់ស៊ុប Hotpot នេះបានប្រើប្រាស់ប្រេងកែច្នៃខុសច្បាប់និងគ្មានគុណភាពតាំងពីឆ្នាំ ២០១៩-២០២១ មកម្លេះ ដោយបុគ្គលិកក្នុងភោជនីយដ្ឋាននោះបានប្រមូលយកកាកសំណល់ស៊ុប Hotpot ដែលភ្ញៀវបានទទួលទានរួចហើយ ទៅរក្សាទុកនៅកន្លែងមួយដើម្បីច្រោះយកកាកសំណល់រឹងចេញ បន្ទាប់មកក៏ធ្វើការចម្រាញ់យកប្រេងក្នុងកាកសំណល់រាវនោះដើម្បីទុកប្រើប្រាស់រម្ងាស់ជាទឹកស៊ុបសម្រាប់លក់នៅថ្ងៃបន្ទាប់ទៀត។

អាជ្ញាធរក៏បានបង្ហាញដែរថា មុនពេលគេរកឃើញរឿងដ៏រន្ធត់នេះភោជនីយដ្ឋាន Ruchuan Beef Tripe Hotpot បានលក់ស៊ុប Hotpot ប្រមាណជាង ៦៥,០០០ ឈុតរួចទៅហើយ ដែលមានតម្លៃជាទឹកប្រាក់សរុបចំនួន ១,៧ លានយន់ (ប្រមាណ ២៣៩,៩៦០ ដុល្លារអាមេរិក) ផងដែរ។

ទោះជាយ៉ាងណាក៏ដោយ ក្នុងករណីនេះតុលាការនៅទីក្រុង Chengdu ខេត្ត Sichuan បានសម្រេចកាត់ទោស បុគ្គលិកហាងចំនួន ១៣ នាក់ដែលមានអ្នកគ្រប់គ្រងម្នាក់ និងចុងភៅពីរនាក់ជាប់ពន្ធនាគារពី ៥ ឆ្នាំទៅ ១០ ឆ្នាំ គួបផ្សំនឹងការពិន័យជាប្រាក់ចំនួន ១៣.៧ លានយ័ន (ប្រមាណជិត ២ លានដុល្លារអាមេរិក) ស្មើនឹង ១០ ដងនៃប្រាក់ចំណូលរបស់ពួកគេនៅក្នុងការរំលោភបំពានដោយខុសច្បាប់បែបនេះ៕

ប្រទេសចិន ៖ សារព័ត៌មានបរទេសរាយការណ៍ថា កាលពីថ្ងៃទី១៤ ខែធ្នូ ឆ្នាំ២០២៣ ប្រព័ន្ធបញ្ជារថភ្លើងក្រោមដីក្នុងតំបន់ Changping នៅទីក្រុងប៉េកាំង ប្រទេសចិន មិនដំណើរការរហូតបណ្តាលឱ្យទូររថភ្លើងចំនួន២ នៅផ្នែកខាងក្រោយបង្អស់របូតដាច់ចេញពីគ្នា ខណៈរថភ្លើងនេះកំពុងតែបើកបរនៅផ្លូវក្រោមដីក្បែរស្ថានីយរថភ្លើង «ស៊ីអឺឈី» ។ ហេតុការណ៍នេះបានបណ្តាលឱ្យអ្នកដំណើរជាង៣០នាក់រងរបួ.ស ។

ក្រុមហ៊ុនរថភ្លើងក្រោមដីប្រចាំទីក្រុងប៉េកាំង បានចេញសេចក្តីប្រកាសមួយនៅក្នុងគេហទំព័រ Weibo ថា ៖ «យើងសូមអភ័យទោសយ៉ាងខ្លាំងចំពោះហេតុការណ៍កើតឡើងនេះ ហើយអ្នកដំណើរបានចាកចេញពីរថភ្លើងដោយគ្មានភ្នាក់ងារជួយថែទាំ ។ ចំណែកអ្នកមានបញ្ហាសុខភាពទាំងអស់អាចទាក់ទងមកកាន់យើងបានគ្រប់ពេលវេលា យើងនឹងទទួលខុសត្រូវរាល់ការចាយវាយក្នុងការព្យាបាល» ។

ហេតុការណ៍នេះបានកើតឡើងស្របពេលទីក្រុងប៉េកាំង និងតំបន់ជាច្រើននៅប្រទេសចិនបានប្រឈមនឹងអាកាសធាតុត្រជាក់ខ្លាំង និងមានព្យុះព្រិលធ្លាក់ជាបន្តបន្ទាប់ ។ រីឯអាជ្ញាធរប្រចាំតំបន់ Changping បានស៊ើបអង្កេតរកមូលហេតុដែលបណ្តាលឱ្យកើតគ្រោះថ្នាក់នេះ ។

អ្នកឃើញហេតុការណ៍ប្រាប់ថា នៅពេលទូររថភ្លើងរបូតចេញពីគ្នា គេឃើញអ្នកដំណើរមួយចំនួនបានធ្លាក់ទៅផ្នែកខាងក្រោម ខណៈអ្នកដំណើរខ្លះទៀតសន្លប់លែងដឹងខ្លួននៅក្នុងរថភ្លើង ។ ក្រោយកើតហេតុ ស្ថានីយររថភ្លើងក្រោមដីនៅទីក្រុងប៉េកាំង បានប្រកាសផ្អាកផ្តល់សេវាកម្មដឹកអ្នកដំណើរតាមរថភ្លើងក្រោមដីក្នុងតំបន់ Changping ៕ ប្រភព ៖ khaosod

បរទេស៖ យោងតាមសេចក្តីរាយការណ៍ពីប្រព័ន្ធផ្សព្វផ្សាយ Anadolu AjansI កាលពីថ្ងៃទី១៣ ខែធ្នូថា ប្រទេសអ៊ីតាលីបានបិទមជ្ឈមណ្ឌលសហគមន៍ឥស្លាមចំនួនពីរកន្លែងដែលជាអតីតផ្សារទំនើបដោយប្រកាសថាវាជាកន្លែងសាងសង់ហេដ្ឋារចនាសម្ព័ន្ធនោះទេ ។យោងតាមប្រភពដដែលបានឱ្យដឹងទៀតថា ការបិទមជ្ឈមណ្ឌលសហគមន៍អ៊ីស្លាមចំនួនពីរ និងកន្លែងអធិស្ឋាននៅក្នុងស្រុក Monfalcone នៃខេត្ត Gorizia ភាគឦសាននៃប្រទេសអ៊ីតាលី បានធ្វើឱ្យសហគមន៍មូស្លីមនិងកម្មករបង់ក្លាដែសភាគច្រើនខកចិត្តនៅក្នុងតំបន់នេះយ៉ាងខ្លាំង។

អភិបាលក្រុង Anna Maria Cisint ដែលនៅជាមួយគណបក្សស្តាំនិយម Lega បានធ្វើការបិទមជ្ឈមណ្ឌលនេះតាំងពីខែវិច្ឆិកាមកម្លេះ ហើយក៏បានផ្លាស់ប្តូរដើម្បីទប់ស្កាត់ការអធិស្ឋានរបស់មូស្លីមផងដែរ។ រីឯអ្នកនយោបាយឆ្វេងនិយម Furio Honsell បានកត់សម្គាល់ថាការសម្រេចចិត្តរបស់អភិបាលក្រុងបានរំលោភលើមាត្រាសំខាន់ៗរបស់រដ្ឋធម្មនុញ្ញ។

យោងតាមកាសែត La Repubblica ក៏បានឱ្យដឹងដែរថា អភិបាលក្រុងដែលនៅជាមួយគណបក្សស្តាំនិយម Lega ក៏បានប្រឆាំងអ៊ីស្លាមហាមមិនឱ្យគោរពបូជានៅមជ្ឈមណ្ឌលសហគមន៍នេះផងដែរ ដោយសារកន្លែងនេះជាកន្លែងដែលត្រូវសាងសងហេដ្ឋារចនាសម្ព័ន្ធ។ក្នុងថ្ងៃដដែលនោះ បូជាចារ្យកាតូលិកពីរនាក់គឺលោក Flavio Zanetti និង Paolo Zuttion បាននិយាយនៅក្នុងសេចក្តីថ្លែងការណ៍មួយថាសេរីភាពក្នុងការថ្វាយបង្គំគឺជាតម្លៃដែលគួរត្រូវបានគោរពបំផុត។

ទោះជាយ៉ាងណាក៏ដោយ អ៊ីម៉ាមដ៏លេចធ្លោ Abdel Majid Kinani ក៏បានជំរុញឱ្យសហគមន៍មូស្លីមទាំងអស់រួមគ្នាតវ៉ាដោយសន្តិវិធីនៅថ្ងៃទី២៣ ខែធ្នូខាងមុខនេះ ដើម្បីឱ្យអភិបាលក្រុងបើកដំណើរការមជ្ឈមណ្ឌលសហគមន៍ឥស្លាមចំនួនពីរកន្លែងនេះឡើងវិញ៕

បរទេស៖ ក្រុមហ៊ុនផ្លូវដែកជាតិហ្វាំងឡង់ (VR) បាននិយាយថា ខ្លួនបានរឹបអូសរថភ្លើងចំនួន ៤ ដែលជាសហកម្មសិទ្ធិនៃការបណ្តាក់ទុករួមគ្នាជាមួយសមភាគីរុស្ស៊ីរបស់ខ្លួនគឺក្រុមហ៊ុនផ្លូវដែករុស្ស៊ី (RZD) ដែលធ្លាប់ធ្វើដំណើររវាងប្រទេសទាំងពីរ ដើម្បីទូទាត់បំណុលដែលមិនទាន់បានបង់។

យោងតាមគេហទំព័រអន្តរជាតិ Daily Maverick ដែលបានចុះផ្សាយនៅថ្ងៃទី១៤ ខែធ្នូថា រថភ្លើងល្បឿនលឿន Allegro ចំនួន ៤ ត្រូវបានក្រុមហ៊ុនផ្លូវដែកជាតិហ្វាំងឡង់ (VR) រឹបអូសជាកម្មសិទ្ធផ្ទាល់ខ្លួន ដោយសារតែក្រុមហ៊ុនផ្លូវដែករុស្ស៊ី (RZD) មិនអើពើនឹងកាតព្វកិច្ចហិរញ្ញវត្ថុរបស់ខ្លួនចំពោះក្រុមហ៊ុនបណ្តាក់ទុនរួមគ្នា Karelian Trains ។ ក្រុមហ៊ុនហ្វាំងឡង់បាននិយាយថា រថភ្លើងដែលរឹបអូសបាននីមួយៗមានទូរថភ្លើងចំនួន ៧ ហើយពួកគេនឹងប្រើប្រាស់នៅលើផ្លូវវែងៗក្នុងប្រទេសហ្វាំងឡង់ចាប់ពីឆ្នាំ ២០២៥ តទៅ។

រថភ្លើងដឹកអ្នកដំណើររវាងហ្វាំងឡង់ និងរុស្ស៊ីត្រូវបានផ្អាកនៅក្នុងខែមីនា ឆ្នាំ ២០២២ បន្ទាប់ពីប្រទេសរុស្ស៊ីបានចាប់ផ្តើមយុទ្ធនាការមួយនៅក្នុងអ៊ុយក្រែន។ យោងតាម VR បានឱ្យដឹងទៀតថា ពួកគេមានសិទ្ធិរឹបអូសរថភ្លើងចំនួន ៤ នេះដោយសារតែពួកគេបានសងប្រាក់កម្ចីរបស់ក្រុមហ៊ុន Karelian Trains ដែលជាក្រុមហ៊ុនបណ្តាក់ទុនរវាងរុស្ស៊ីនិងហ្វាំងឡង់ ដែលធ្លាប់ប្រឈមនឹងការក្ស័យធនក្នុងខែមិថុនា ឆ្នាំ ២០២៣។

Karelian Trains ត្រូវបានបង្កើតឡើងក្នុងឆ្នាំ ២០០៦ ដោយ VR និង RZD មានភាគហ៊ុនស្មើគ្នា។ ទោះជាយ៉ាងណាក៏ដោយ ក្រុមហ៊ុន Karelian Trains ឥឡូវនេះបានក្លាយជាកម្មសិទ្ធរបស់ហ្វាំងឡង់តែមួយគត់។
បច្ចុប្បន្នទំនាក់ទំនងរុស្ស៊ី និងប្រទេសហ្វាំងឡង់កាន់តែតានតឹងជាងមុន បន្ទាប់ពីប្រទេស Nordic បានចូលរួមជាមួយអង្គការណាតូក្នុងខែមេសា ដោយបោះបង់ចោលគោលនយោបាយរបស់ខ្លួន គ្មានសម្ព័ន្ធភាពយោធារយៈពេលជាច្រើនទសវត្សរ៍។ ហ្វាំងឡង់ក៏បានសាងសង់របងព្រំដែនដ៏រឹងមាំជាមួយរុស្ស៊ីផងដែរ ដោយសារមានការព្រួយបារម្ភថាទីក្រុងម៉ូស្គូអាចប្រើប្រាស់លំហូរជនចំណាកស្រុកដើម្បីដាក់សម្ពាធលើនយោបាយរបស់ខ្លួន៕