ក្រុមការងារក្រសួងសុខាភិបាល ក៏ដូចជាក្រុមការងារមន្ទីរពេទ្យមិត្តភាពខ្មែរ-សូវៀត បានចុះទៅដល់ផ្ទះជនរងគ្រោះ ដែលបានស្លាប់ដោយកង្វះភាពយកចិត្តទុកដាក់ពីសំណាកបុគ្គលិកពេទ្យ។
យោងតាមគណនីហ្វេសប៊ុក Sreypich Thou ត្រូវជាកូនរបស់បុរសម្នាក់បានបង្ហោះថា៖”នៅថ្ងៃទី ៣០ ខែមករា ឆ្នាំ ២០២៤ ក្រុមការងារក្រសួងសុខាភិបាល ក៏ដូច ក្រុមការងារមន្ទីរពេទ្យមិត្តភាពខ្មែរ-សូវៀត បានអញ្ជើញមកដល់គេហដ្ឋាននាងខ្ញុំផ្ទាល់។ បានអុចធូបសុំខមាទោសដល់សព និងបាននាំយកបច្ច័យនិងគ្រឿងឧបភោគបរិភោគមកចូលបុណ្យ ដល់គេហដ្ឋាននាងខ្ញុំផ្ទាល់ ដោយពួកគាត់បានលេីកឡេីងទាក់ទងនឹងករណីដែលកេីតឡេីងនៅថ្ងៃកេីតហេតុ។ ដោយខាងមន្ទីរពេទ្យនឹងបង្កេីតក្រុមប្រឹក្សាវិន័យ ដេីម្បីដាក់វិន័យទៅលើបុគ្គលដែលបានប្រព្រឹត្តខុសតាមច្បាប់សហលក្ខន្តិកៈមន្រ្តីរាជការស៊ីវីល និងច្បាប់ការងាររបស់ព្រះរាជាណាចក្រកម្ពុជា។ ជាកុសលមួយសម្រាប់ព្រលឹងសពលោកឪពុកនាងខ្ញុំ។ ទាក់ទងនឹងព័ត៌មានបន្ថែម នាងខ្ញុំនឹងជម្រាបជូនបងប្អូនបន្ត”។
សូមបញ្ជាក់ថា ថ្មីៗនេះ មន្ទីរពេទ្យមិត្តភាពខ្មែរ-សូវៀត បានរងការចោទប្រកាន់ពីសំណាកម្ចាស់គណនីហ្វេសប៊ុកមួយ ដែលថាបានធ្វើឱ្យប៉ារបស់គាត់ បានបាត់បង់ជីវិត ដោយខាងពេទ្យហាក់មិនមានការយកចិត្តទុកដាក់។ តែយ៉ាងណាមិញខាងពេទ្យក៏បានចេញលិខិតបកស្រាយហើយដែរ ជុំវិញករណីនេះ ដោយខាងគ្រូពេទ្យលើកឡើងថា៖” ស្ថាន ភាពអ្នកជំងឺពេលចូលមកដល់មន្ទីរពេទ្យក៏មានសភាពធ្ងន់ធ្ងរខ្លាំង ក្រុមគ្រូពេទ្យក៍បាន ព្យាយាមជួយសង្គ្រោះអស់ពីលទ្ធភាពនៅតែមិនអាចសង្គ្រោះបាន”៕
