ប្រទេសបារាំង ៖ ការផ្លាស់ប្តូរទីលំនៅអាចជាការឈានទៅរកជីវិតដ៏ល្អប្រសើររបស់មនុស្សជាច្រើននាក់ ប៉ុន្តែសម្រាប់ជនភៀសខ្លួនដែលមកធ្វើការនៅប្រទេសបារាំង ពួកគេកំពុងប្រឈមនឹងការធ្វើវិសោធនកម្មច្បាប់របស់បារាំង ហើយមិនដឹងថា តើវានឹងកើតឡើងនៅពេលណាទេ ។

កាលពីថ្ងៃទី១១ ខែធ្នូ ឆ្នាំ២០២៣ សភាតំណាងរាស្ត្របារាំងបានបដិសេធការធ្វើវិសោធនកម្មច្បាប់ជនអន្តោប្រវេសន៍ ដែលស្នើឡើងដោយប្រធានាធិបតីបារាំង លោក អេមម៉ានូអែល ម៉ាគ្រង ។ ការធ្វើវិសោធនកម្មច្បាប់នេះ គឺអាចដកលិខិតអនុញ្ញាតធ្វើការរបស់ជនបរទេស និងបណ្តេញពួកគេចេញពីប្រទេសបារាំងបាន ករណីពួកគេប្រព្រឹត្តទង្វើខុសច្បាប់ណាមួយ ។ ទោះយ៉ាងណា ការបដិសេធនេះមិនបានធ្វើឱ្យការធ្វើវិសោធនកម្មច្បាប់ត្រូវបានគេលុបចោលទេ ។

លោក ស៊ូឡេម៉ាណេ ប័ររី ជនជាតិហ្គីណេ អាយុ២០ឆ្នាំ ដែលគ្មានលិខិតអនុញ្ញាតធ្វើការនៅប្រទេសបារាំង និយាយថា វាកាន់តែលំបាកខ្លាំងឡើង និងធ្វើឱ្យជនបរទេសធ្វើការនៅបារាំងជាច្រើននាក់ព្រួយបារម្ភ ។ លោកថា ៖ «ការពិត វាជាការងារមួយដែលខ្ញុំចូលចិត្តធ្វើ ព្រោះខ្ញុំតែងភ្ញាក់ពេលព្រឹកព្រលឹមស្រាប់ហើយ ។ ការងារនេះជាការប្រើប្រាស់កម្លាំងកាយ ហើយខ្ញុំបានសម្រេចចិត្តធ្វើនំ ព្រោះវាជាការងារល្អបំផុតលើពិភពលោក» ។

បុរសជនជាតិហ្គីណេម្នាក់នេះកំពុងតែប្រឈមនឹងប៉ូលិសបារាំងចាប់បញ្ជូនចេញពីប្រទេសបារាំង ហើយបដិសេធការស្នើសុំលិខិតអនុញ្ញាតធ្វើការរបស់គាត់ រហូតដល់២លើក ។ ម្ចាស់ហាងនំបានដាក់ពាក្យស្នើសុំធ្វើការតាមអនឡាញ និងស្នើឱ្យលោក ស៊ូឡេម៉ាណេ ប័ររី អាចរស់នៅប្រទេសបារាំងបន្តទៀត ដោយបញ្ជាក់ថា ជនភៀសខ្លួន គឺជាធនធានមនុស្សមានតម្លៃ ។ លើសពីនេះ ម្ចាស់ហាងនំបានសំណូមពរទៅកាន់រដ្ឋាភិបាលបារាំង ដែលកំពុងត្រួតពិនិត្យជនបរទេសគ្មានលិខិតអនុញ្ញាតធ្វើការ ដើម្បីឱ្យពួកគេធ្វើការដោយស្របច្បាប់នៅបារាំង ។

រីឯអ្នកស្រី ជូលៀត ហិកណាត ជាមេធាវីនិយាយថា ៖ «យើងបានទាមទារនៅតុលាការអស់រយៈពេល២ឆ្នាំហើយ តែគ្មានការលើកឡើងពីករណីនេះទេ ។ បើនិយាយអំពីឋានៈជាពលរដ្ឋបារាំង តាមគំនិតខ្ញុំ គឺតុលាការពុំបានពិចារណាទេ» ។

ការធ្វើវិសោធនកម្មច្បាប់ជនអន្តោប្រវេសន៍ គឺជាកូនសោរសំខាន់ដែលប្រធានាធិបតីបារាំង លោក អេមម៉ានូអែល ម៉ាគ្រង ព្យាយាមបង្ហាញឱ្យឃើញថា លោកកាន់តែរឹតបន្តឹងច្បាប់ជាងមុន ដើម្បីទទួលយកជនបរទេសមកធ្វើការនៅបារាំង និងជួយជំរុញសេដ្ឋកិច្ចជាតិផងដែរ ៕ ប្រភព ៖ TNN World

បរទេស៖ ស្ត្រីម្នាក់ឈ្មោះ Jessica Vincent បានទិញថូកែវចំណាស់មួយនៅហាងជជុះ ក្នុង Hanover County រដ្ឋ Virginia សហរដ្ឋអាមេរិកក្នុងតម្លៃ ៣.៩៩ ដុល្លារ ប៉ុន្តែត្រូវបានគេស្គាល់ថាជាថូដ៏កម្រមួយរបស់ស្ថាបត្យករអ៊ីតាលីដ៏ល្បីល្បាញ Carlo Scarpa និងត្រូវបានលក់ដេញថ្លៃក្នុងម្លៃជាង ១០ ម៉ឺនដុល្លារអាមេរិក។

យោងតាមគេហទំព័រអន្តរជាតិ USA Today ដែលបានចុះផ្សាយនៅថ្ងៃទី១៨ ខែធ្នូថា ស្ត្រីដើរទិញឥវ៉ាន់ម្នាក់នៅរដ្ឋ Virginia បានប្រទះឃើញថូកែវចំណាស់មួយក្នុងហាង thrift បន្ទាប់មកនាងក៏ទិញវាក្នុងតម្លៃត្រឹមតែ ៣.៩៩ ដុល្លារអាមេរិកប៉ុណ្ណោះ។ នៅថ្ងៃដដែរនោះ Vincent បានប្រទះឃើញ M តូចមួយនៅខាងក្រោមថូ ហើយគិតថាវាអាចតំណាងឱ្យ Murano ដែលជាកោះអ៊ីតាលីដ៏ល្បីល្បាញសម្រាប់គ្រឿងកញ្ចក់របស់វា។

ថូដ៏កម្រនោះមានពណ៌ ក្រហម និងពណ៌ទឹកសមុទ្រដែលអាចប្រែពណ៌នៅក្នុងស្ថានភាពល្អឥតខ្ចោះ ធ្វើឱ្យនាងគិតថាថូនេះអាចមានតម្លៃ ១,០០០ ទៅ ២,០០០ ដុល្លារ។ បន្ទាប់មកស្ត្រីម្នាក់នោះក៏បានរៀនអំពីថូតាមអ៊ីនធឺណិត ហើយអ្នកដែលចូលចិត្តវត្ថុបុរាណបានចង្អុលបង្ហាញថា ថូរបស់នាងគឺស្រដៀងនឹងស្នាដៃរបស់ស្ថាបត្យករអ៊ីតាលីដ៏ល្បីល្បាញម្នាក់គឺលោក Carlo Scarpa ។

ដូច្នេះហើយ នៅថ្ងៃបន្ទាប់ Vincent ក៏បានផ្ញើរូបភាពនៃថូទៅមជ្ឈមណ្ឌលដេញថ្លៃ Wright ហើយប្រធានមជ្ឈមណ្ឌល Richard Wright បានទាក់ទងទៅនាងភ្លាមៗតែម្តង ដោយប្រធានមជ្ឈមណ្ឌលនោះ បាននិយាយថា៖ «ពេលគាត់បានឃើញរូបថតនោះ គាត់គិតថាវាអស្ចារ្យណាស់។
មិនយូរប៉ុន្មាន ថូកែវដ៏ចំណាស់របស់ Vincent ក៏ត្រូវបានលក់ដេញថ្លៃក្នុងតម្លៃ ១០៧,១០០ ដុល្លារអាមេរិក បន្ទាប់ពីវាត្រូវបានគេកំណត់ថាជាផ្នែកមួយនៃស្នាដៃសិល្បៈបុរាណ និងជាវត្ថុដ៏កម្រមួយរបស់ស្ថាបត្យករក្នុងទសវត្សរ៍ឆ្នាំ ១៩៤០៕

បើយោងទៅតាមប្រភពព័ត៌មាន TheGuardian បានចុះផ្សាយថា កាលពីថ្ងៃច័ន្ទ ទី១៨ ខែធ្នូ ឆ្នាំ២០២៣នេះ វេលាម៉ោង៨នាទីយប់ នៅម្តុំបរិវេណទីក្រុង Wilmington រដ្ឋ North Carolina សហរដ្ឋអាមេរិក គឺបានកើតមានឧបទ្ទវហេតុមួយដោយរថយន្តមួយគ្រឿងបានបើកមកបុកក្បួនដង្ហែររបស់ប្រធានាធិបតីគឺលោកចូ បៃដិន ខណៈលោកប្រធានាធិបតីគឺពុំមានគ្រោះថ្នាក់អ្វីនោះទេ។

ហេតុការណ៍នេះ គឺបានកើតឡើងបន្ទាប់ពីលោកប្រធានាធីបតីត្រូវបានអញ្ជើញឲ្យទៅចូលរួមទទួលទានអាហារពេលល្ងាចជាមួយនឹងបុគ្គលិកនៅហាងមួយកន្លែង ក៏ដូចជាសំណេះសំណាលពីផែនការបោះឆ្នោតសម្រាប់អាណត្តិឆ្នាំ២០២៤។ នៅវេលាប្រហែលម៉ោង៨យប់ ស្របពេលដែលកំពុងមានភ្លៀងខ្លាំងនៅត្រង់ចំណុចកើតហេតុ ស្រាប់តែរថយន្តម៉ាក Sedan ពណ៌ទឹកប្រាក់មួយគ្រឿងបានស្ទុះមកបុកក្បួនដង្ហែររបស់លោកប្រធានាធិបតីដោយអចេតនា បណ្តាលឲ្យរងរថយន្តនោះរងការខូចខាតផ្នែកខាងមុខ រីឯអ្នកនៅក្នុងរថយន្តគឺគ្មានរបួសអ្វីឡើយ។

ប៉ូលីសនៅទីក្រុង Wilmington បាននិយាយថា អ្នកបើកបរអាយុ 46 ឆ្នាំម្នាក់ត្រូវបានគេជឿថាកំពុងស្ថិតនៅក្នុងស្ថានភាពស្រវឹង ហើយចៃដន្យបានបើកបុករថយន្ត SUV ចតស្ងៀមរបស់លោកប្រធានាធិបតី ចូ បៃឌិន ខណៈពេលដែលលោកបៃឌិនកំពុងស្ថិតនៅក្នុងពិធីនៅឡើយ។ ទោះជាយ៉ាងណាក៏ដោយ បុរសម្នាក់នោះត្រូវបានគេចោតប្រកាន់ពីបទស្រវឹងហើយបើកបរនិងមិនចេះប្រុងប្រយ័ត្ន ហើយអាជ្ញាធរកំពុងតែដាក់ដំណើរការរឿងនេះទៅតាមផ្លូវច្បាប់ផងដែរ៕

ប្រទេសថៃ៖ កសិករ Tanyapong Jaikham និងកម្មករមួយក្រុមបានបង្កើតរូបភាពឆ្មាមួយក្បាលកំពុងដេកក្នុងវាលស្រែ នៅខេត្តឈៀងរ៉ៃភាគខាងជើងប្រទេសថៃ ដើម្បីទាក់ទាញអ្នកទេសចរ និងអ្នកស្រលាញ់ឆ្មា។

យោងតាមគេហទំព័រអន្តរជាតិ Rice News Today ដែលបានចុះផ្សាយនៅថ្ងៃទី១៨ ខែធ្នូថា កសិករ Tanyapong និងកម្មករកសិដ្ឋានមួយក្រុមបានដាំស្រូវនៅតាមកន្លែងផ្សេងៗក្នុងចំការ នៃខេត្តឈៀងរ៉ៃភាគខាងជើងប្រទេសថៃ ដើម្បីបង្កើតជារូបរាងឆ្មាដ៏ធំមួយនៅក្នុងវាលស្រែ ក្នុងគោលបំណងទាក់ទាញអ្នកទេសចរ និងអ្នកស្រលាញ់សត្វឆ្មា។

កសិកររូបនេះបាននិយាយថា ដំណើរការនៃការបង្កើតរូបភាពឆ្មានៅក្នុងវាលត្រូវពឹងផ្អែកលើកូអរដោនេ GPS ដើម្បីកំណត់ទីតាំងដាំស្រូវឱ្យបានសមស្រប។ លោកបន្តទៀតថា វាសំខាន់ខ្លាំងណាស់ក្នុងការមានទីតាំងច្បាស់លាស់ ដើម្បីឱ្យស្រូវលូតលាស់បានល្អនឹងផ្លាស់ប្តូរពណ៌បន្តិចម្តងៗតាមពេលវេលា។ ដូច្នេះនៅពេលច្រូតកាត់ ស្រូវទុំនឹងបង្កើតរូបភាពឆ្មាពណ៌មាសរបស់ Cooper ដែលយើងយកជាគំរូ»។

Tanyapong ក៏បានបន្ថែមទៀតថា យើងបានសាងសង់ប៉មមើលទេសភាពជាច្រើននៅជុំវិញវា ដោយជឿជាក់ថា ភ្ញៀវទេសចររាប់ពាន់នាក់នឹងមកទីនេះដើម្បីមើលស្នាដៃសិល្បៈនៅវាលស្រែ។ ស្នាដៃនេះត្រូវបានបំផុសគំនិតដោយពាក្យថា “មានត្រីនៅក្នុងទឹកមានស្រូវនៅក្នុងវាល” របស់ប្រជាជនថៃដើម្បីបង្ហាញពីភាពរុងរឿង។
លោក Tanyapong បាននិយាយថា អ្នកដែលចង់ស្វែងយល់បន្ថែមអំពីការរួមបញ្ចូលគ្នានៃសិល្បៈ និងបច្ចេកវិទ្យា ក៏អាចមកមើលទីតាំងនេះបាន ដើម្បីទទួលយកបទពិសោធន៍ផងដែរ។

កាលពីមុន អង្ករប្រើសម្រាប់តែហូបប៉ុណ្ណោះ ប៉ុន្តែទោះជាយ៉ាងណា មធ្យោបាយច្នៃប្រឌិតថ្មីនេះអាចឱ្យយើងអភិវឌ្ឍវិស័យទេសចរណ៍ និងកសិកម្មព្រមគ្នា»។ ហេតុនេះហើយ ក្នុងនាមយើងជាអ្នកនាំចេញអង្ករដ៏ធំបំផុតមួយរបស់ពិភពលោក ប្រទេសថៃ នឹងកំណត់គោលដៅនាំចេញអង្ករចំនួន ៨.៥ លានតោននៅឆ្នាំនេះ៕

យោងតាមរបាយការណ៍របស់ Google បង្ហាញថា ជនជាតិវៀតណាមចាប់អារម្មណ៍ធ្វើដំណើរទៅកម្សាន្តនៅក្រៅប្រទេស ស្របពេលតម្លៃសំបុត្រយន្តហោះនៅប្រទេសវៀតណាមកើនឡើងខ្ពស់ ។ របាយការណ៍នេះបង្ហាញថា តៃវ៉ាន់ គឺជាគោលដៅទេសចរណ៍ទី១ ដែលជនជាតិវៀតណាមបានស្វែងរកច្រើនបំផុត បន្ទាប់មក គឺប្រទេសថៃ និងតំបន់អឺរ៉ុប ស្ថិតក្នុងលំដាប់ទី២ និងទី៣ ។

បើតាមរបាយការណ៍របស់ការិយាល័យទេសចរណ៍ជាតិវៀតណាមបញ្ជាក់ថា ចាប់ពីខែមករា រហូតដល់តុលា ឆ្នាំ២០២៣ មានភ្ញៀវទេសចរវៀតណាមរហូតដល់៣៣ម៉ឺន២ពាន់នាក់បានធ្វើដំណើរទៅកម្សាន្តនៅតៃវ៉ាន់ ។ ចំនួននេះប្រហាក់ប្រហែលគ្នានឹងអំឡុងពេលមុនជំងឺកូវីដ-១៩ ឆ្លងរាតត្បាត ដែលស្មើចំនួន៤០៥.៤០០នាក់ (ស្មើជាង៤០ម៉ឺននាក់) នៅឆ្នាំ២០១៩ ។

ចំណែកប្រទេសថៃបានទទួលភ្ញៀវទេសចរវៀតណាមចំនួន៩០ម៉ឺននាក់ ក្នុងរយៈពេល១០ខែដំបូងនៃឆ្នាំ២០២៣ ឬជិតទ្វេដងនៃចំនួនភ្ញៀវទេសចរថៃដែលធ្វើដំណើរទៅកាន់ប្រទេសវៀតណាម ។

ខាងក្រោមនេះ គឺជាតំបន់ទេសចរណ៍ចំនួន១០ ដែលជនជាតិវៀតណាមស្វែងរកច្រើនបំផុត រួមមាន ៖

១-តៃវ៉ាន់២-ប្រទេសថៃ៣-តំបន់អឺរ៉ុប
៤-ទីក្រុង Ha Sang ៖ ស្ថិតនៅតំបន់ខ្ពង់រាបខាងជើងនៃប្រទេសវៀតណាម ៥-ទីក្រុង Can Tho ៖ ស្ថិតនៅតំបន់ដីសណ្តទន្លេមេគង្គ និងល្បីល្បាញពីផ្សារបណ្តែតទឹក ៦-កោះបាលី ប្រទេសឥណ្ឌូណេស៊ី៧-ប្រទេសសិង្ហបុរី ៨-កោះ Phu Quoc (កោះត្រល់) ៖ ស្ថិតនៅភាគខាងត្បូងវៀតណាម បច្ចុប្បន្ន ការធ្វើដំណើរកម្សាន្តរបស់ភ្ញៀវទេសចរទៅកាន់កោះ Phu Quoc បានធ្លាក់ចុះ ហើយធ្វើឱ្យការតភ្ជាប់ផ្លូវធ្វើដំណើរទៅកាន់កោះនេះត្រូវផ្អាក ។៩-កោះ Phung ៖ គឺជាកោះមួយសម្បូរផ្លែឈើជាច្រើនប្រភេទ ជាពិសេស ផ្លែដូង រួមទាំងអាហារឆ្ងាញ់ៗរបស់ជនជាតិវៀតណាមរស់នៅតំបន់អាគ្នេយ៍ ១០-ទីក្រុង Buon Ma Thuot ៖ គឺជាទីក្រុងដ៏ធំបំផុតស្ថិតក្នុងតំបន់ខ្ពង់រាបកណ្តាលនៃប្រទេសវៀតណាម ឬត្រូវបានគេហៅឈ្មោះថា «ទីក្រុងកាហ្វេ» ៕

ប្រភព ៖ AEC connect