ប្រទេសចិន ៖ យូណាន គឺជាខេត្តដាំដុះដំណាំកាហ្វេច្រើនបំផុតនៅប្រទេសចិន ដោយសារខេត្តនេះស្ថិតនៅតំបន់ខ្ពង់រាប និងមានអាកាសធាតុអំណោយផល ។ កសិករនៅខេត្តយូណានបានដាំដំណាំកាហ្វេមានគុណភាពខ្ពស់ ស្របគ្នាជាមួយតម្លៃកាហ្វេនៅខេត្តយូណានកើនឡើងជាបន្តបន្ទាប់ ។ ក្រៅពីនេះ កសិករនៅតំបន់ផ្សេងទៀត ក៏បាននាំគ្នាដាំកាហ្វេផងដែរ ដូចជា ៖ នៅទីក្រុងភូអឺ និងទីក្រុងប៉ៅសាន ។

ចំណែក Hu Wenbin ជាអ្នកគ្រប់គ្រងក្នុងចម្ការកាហ្វេមួយកន្លែងនៅទីក្រុងភូអឺ និយាយថា ក្រុមហ៊ុនរបស់លោកបានដាំដំណាំកាហ្វេនៅលើផ្ទៃដីប្រមាណ៤០ហិកតា ហើយលោកសង្ឃឹមថា នឹងទទួលបានផលខ្ពស់រហូតដល់៤៦០តោន ។ ក្នុងរយៈពេលប៉ុន្មានឆ្នាំកន្លងមកនេះ តម្លៃកាហ្វេបានកើនឡើងជាបន្តបន្ទាប់ ហើយតម្លៃកាហ្វេនៅខេត្តយូណានបានកើនឡើងទ្វេដង បើធៀបនឹងកាហ្វេនៅទីក្រុងភូអឺ ។

កាលពីឆ្នាំ២០២២ តម្លៃជាមធ្យមរបស់គ្រាប់កាហ្វេពុំទាន់ឆ្អិននៅខេត្តយូណាន គឺស្មើនឹង៣០យាន់ក្នុង១គីឡូក្រាម ខណៈតម្លៃជាមធ្យមរបស់គ្រាប់កាហ្វេពុំទាន់ឆ្អិននៅទីក្រុងប៉ៅសាន ស្មើនឹង៤០យាន់ក្នុង១គីឡូក្រាម ។ ចំណែកតម្លៃគ្រាប់កាហ្វេពិសេសក្នុងតំបន់ផ្សេងៗបានកើនឡើងខ្ពស់ជាងនេះទៀត ដូចជា គ្រាប់កាហ្វេ Guixia មានតម្លៃខ្ពស់រហូតដល់១.២០០យាន់ឯណោះក្នុង១គីឡូក្រាម ។

Yang Zhu ជានាយកក្រុមហ៊ុន Baoshan Zhongka Food លើកឡើងថា តម្លៃគ្រាប់កាហ្វេនៅទីក្រុងប៉ៅសាន បានកើនឡើងជាបន្តបន្ទាប់ ប៉ុន្តែក្រុមហ៊ុនរបស់លោក នៅតែទិញគ្រាប់កាហ្វេមកពីទីក្រុងប៉ៅសាន ដោយសារតែអតិថិជនពេញចិត្តលើគុណភាពរបស់វា ។ នៅឆ្នាំ២០២៣ នេះ ក្រុមហ៊ុនបានទិញគ្រាប់កាហ្វេរហូតដល់ជាង៤.០០០តោន ដែលបរិមាណនេះច្រើនជាងឆ្នាំ២០២២ ប្រមាណ២០% ។

នៅទីក្រុងប៉ៅសាន គេបានបើកវគ្គបណ្តុះបណ្តាលកសិករក្នុងតំបន់អំពីការដាំដំណាំកាហ្វេជាង៤០ពូជ ដោយការប្រើប្រាស់ជីសរីរាង្គ ដើម្បីទទួលបានកាហ្វេមានគុណភាពខ្ពស់លក់ឱ្យអតិថិជន ។ កសិករចូលរួមក្នុងវគ្គបណ្តុះបណ្តាលនេះនិយាយថា ដំណាំកាហ្វេបានធ្វើឱ្យជីវភាពរបស់ពួកគេល្អប្រសើរជាងមុន ៕

កម្មវិធីប្រកួតសម្រស់ Miss Amazing Malaysia 2023/2024 ជាព្រឹត្តិការណ៍មួយដែលត្រូវរៀបចំឡើងនៅរដ្ឋ Bangsar ទីក្រុង Kuala Lumpur ប្រទេសម៉ាឡេស៊ី។

អ្នកចូលរួមប្រកួតគឺមានស្ត្រីសរុបចំនួន ១២ នាក់។ ស្រីទាំងនោះគឺមានអាយុចន្លោះពី ១៦ ទៅ ៣៨ ឆ្នាំ ដែលមកពីជាតិសាសន៍ផ្សេងៗគ្នាបាននឹងកំពុងចូលរួមក្នុងកម្មវិធីប្រកួតសម្រស់ដើម្បីលើកកម្ពស់ស្ត្រីដែលមានសមត្ថភាពខុសៗគ្នា។

វេទិកានេះផងដែរ គឺបានរៀបចំឡើងសម្រាប់ស្ត្រីដែលជាស្រ្តីជនពិការ ក៏ដូចជាស្រ្តីកំពុងប្រឈមនឹងបញ្ហាផ្នែកសតិអារម្មណ៍ (ដូចជាស្រ្តីកើតជំងឺអូទីស្សឹម ជាដើម) និងលើកចិត្តពួកគេឲ្យមកចូលរួមបង្ហាញនូវលក្ខណៈវិសេសក្នុងខ្លួនរបស់ពួកគេរៀងៗខ្លួន តាមរយៈការបញ្ចេញនូវទេពកោសល្យចម្រុះ និងការបញ្ចេញមតិយោបល់។ល។

កម្មវិធីនេះបានរួមបញ្ចូលនូវសកម្មភាពជាច្រើនទៀត សម្រាប់ការអភិវឌ្ឍខ្លួនពួកគេ និង បណ្តុះបណ្តាលជំនាញក្នុងការប្រាស្រ័យទាក់ទង ការនិយាយជាសាធារណៈ ការហាត់ប្រាណ ការដើរបង្ហាញម៉ូដ ការប្រឹក្សាផ្សេងៗ ព្រមទាំងការណែនាំក្នុងការតុបតែងខ្លួន ការតុបតែងមុខ និងបង្ហាញម៉ូតសម្លៀកបំពាក់ផងដែរ។

ការប្រកួតវគ្គផ្តាច់ព្រ័ត្រនៃកម្មវិធី Miss Amazing Malaysia នឹងប្រារព្ធធ្វើឡើងនៅថ្ងៃទី ៧ ខែមករា ឆ្នាំ ២០២៤ នៅក្នុងរដ្ឋ Petaling Jaya ប្រទេសម៉ាឡេស៊ី។ រីឯបេក្ខនារីដែលទទួលបានជ័យលេភី នឹងត្រូវបានដាក់ពិន្ទុយ៉ាងយកចិត្តទុកដាក់ដោយផ្អែកលើវដ្តមាន ការប្តេជ្ញាចិត្ត ការចូលរួមយ៉ាងសកម្ម និងការផ្លាស់ប្តូរខ្លួនឯងឲ្យប្រសើរជាងមុនជាដើម៕

ប្រទេសអាហ្វហ្គានីស្ថាន ៖ កាលពីថ្ងៃទី២៦ ខែធ្នូ ឆ្នាំ២០២៣ សារព័ត៌មានបរទេសបានចុះផ្សាយពីពិធីរៀបអាពាហ៍ពិពាហ៍ដ៏ធំមួយនៅប្រទេសអាហ្វហ្គានីស្ថាន ដែលមានកូនកំលោះ និងកូនក្រមុំជាច្រើនគូ ។ ពួកគេបានសម្រេចចិត្តរៀបអាពាហ៍ពិពាហ៍ជាក្រុមនៅទីកន្លែង និងថ្ងៃតែមួយបែបនេះ ដោយសារចង់កាត់បន្ថយការចំណាយប្រាក់ ហើយកូនកំលោះខ្លះក៏មានប្រាក់ចំណូលតិចតួចផងដែរ ។

ពិធីរៀបអាពាហ៍ពិពាហ៍ជាក្រុមនេះបានរៀបចំឡើងនៅទីក្រុងកាប៊ុល ប្រទេសអាហ្វហ្គានីស្ថាន ដោយគេបានបំបែកកូនកំលោះ និងកូនក្រមុំឱ្យនៅឆ្ងាយពីគ្នា មុនពេលពួកគេបានជួបគ្នាក្រោយអាហារថ្ងៃត្រង់ ។ បន្ទាប់មក ពួកគេនឹងឡើងជិះរថយន្តដែលតុបតែងទៅដោយផ្កាជ័រ និងខ្សែបូចម្រុះពណ៌ ។ កូនកំលោះម្នាក់និយាយថា ដោយសារការរៀបចំពិធីអាពាហ៍ពិពាហ៍ដោយខ្លួនឯង ខ្លួនត្រូវចំណាយប្រាក់ច្រើន ទើបសម្រេចចិត្តរៀបអាពាហ៍ពិពាហ៍ជាក្រុម ។

ពិធីរៀបអាពាហ៍ពិពាហ៍ដ៏ធំនេះរៀបចំឡើងដោយអង្គការសប្បុរសធម៌មួយ និងមានការផ្តល់វត្ថុមួយចំនួនដើម្បីឱ្យគូស្រករថ្មីចាប់ផ្តើមកសាងជីវិតរួមគ្នា ដូចជា ៖ កម្រាលព្រំ និងសម្ភារៈប្រើប្រាស់ក្នុងផ្ទះបាយ ជាដើម ។ លើសពីនេះ គេក៏បានអញ្ជើញមន្ត្រីមកពីក្រសួងលើកកម្ពស់សីលធម៌មកចូលរួមជាភ្ញៀវកិត្តិយស និងឡើងមានមតិក្នុងពិធីផងដែរ ។ បើទោះជាមានការអានគម្ពីក្តី ប៉ុន្តែគេបានហាមឃាត់ការរាំ និងសំឡេងតន្ត្រីគ្រប់ប្រភេទ ចាប់តាំងពីក្រុមតាលីបង់បានគ្រប់គ្រងប្រទេសនេះឡើងវិញ នៅខែសីហា ឆ្នាំ២០២១ ។

លោក Roohullah Rezayi ជាកូនកំលោះ អាយុ១៨ឆ្នាំ បាននិយាយប្រាប់សារព័ត៌មាន AFP ថា លោកគ្មានលទ្ធភាពរៀបចំពិធីអាពាហ៍ពិពាហ៍ដោយខ្លួនឯងទេ ។ បច្ចុប្បន្ន ការចំណាយសម្រាប់ការរៀបចំពិធីអាពាហ៍ពិពាហ៍ដូចពីមុន គឺត្រូវចំណាយប្រាក់ចាប់ពី២.៧៥០ដុល្លារ ទៅ៣.៣០០ដុល្លារអាមេរិកឯណោះ ។ ប៉ុន្តែការរៀបអាពាហ៍ពិពាហ៍រួមគ្នាបែបនេះ លោកចំណាយប្រាក់ចាប់ពី១៣៦ដុល្លារ ទៅ២០៨ដុល្លារអាមេរិកប៉ុណ្ណោះ ។

កូនកំលោះវ័យក្មេងរូបនេះ គឺជនជាតិភាគតិចមូស្លីម Hazara Shia មកពីខេត្ត Ghor ។ លោកប្រាប់ថា លោកទទួលបានប្រាក់ចំណូលតិចតួចប៉ុណ្ណោះក្នុង១ថ្ងៃ ហើយលោកបានអញ្ជើញភ្ញៀវខាងប្រុស និងខាងស្រី ដើម្បីមកចូលរួមក្នុងពិធីអាពាហ៍ពិពាហ៍របស់លោក ត្រឹមតែ៣៥នាក់ប៉ុណ្ណោះ ។ បើលោករៀបចំពិធីអាពាហ៍ពិពាហ៍ដោយខ្លួនឯងវិញ គឺលោកត្រូវអញ្ជើញភ្ញៀវចាប់ពី៣០០នាក់ ទៅ៤០០នាក់ ៕

បរទេស៖ មហាសេដ្ឋីអាមេរិកម្នាក់ឈ្មោះ Bryan Johnson អាយុ ៤៦ ឆ្នាំបានសាកល្បងការកែសម្រួលហ្សែនដើម្បីបញ្ច្រាសភាពចាស់ទោះបីជាវិធីសាស្ត្រនេះមិនត្រូវបានអនុម័តដោយរដ្ឋបាលចំណីអាហារនិងឱសថអាមេរិក (FDA) ក៏ដោយ។
យោងតាមគេហទំព័រអន្តរជាតិមួយ បានឱ្យដឹងថា មហាសេដ្ឋីបច្ចេកវិទ្យារូបនេះបានចំណាយប្រាក់ប្រហែល ២ លានដុល្លារអាមេរិកជារៀងរាល់ឆ្នាំលើកម្មវិធី Project Blueprint ដើម្បីរស់នៅបានយូរ និងបញ្ច្រាសអាយុជីវសាស្ត្រ។ ដោយថ្មីៗនេះ គាត់បានចាប់ផ្តើមទៅកោះ Caribbean ដើម្បីសាកល្បងវិធីព្យាបាលនេះ រួមទាំងការកែសម្រួលហ្សែនជាមួយនឹងការចាក់ថ្នាំ follistatin ផងដែរ។

Follistatin គឺជាប្រូតេអ៊ីននៅក្នុងខ្លួនមនុស្សដែលត្រូវបានគេគិតថាអាចជួយបង្កើនម៉ាសសាច់ដុំ និងកាត់បន្ថយការរលាក។ ដូច្នេះលោក Johnson បានទទួលយកការព្យាបាលដំបូងដែលផ្តល់ដោយក្រុមហ៊ុនជីវបច្ចេកវិទ្យា Minicircle នៅក្នុងខែកញ្ញា ដែលជាក្រុមហ៊ុនគាំទ្រដោយមហាសេដ្ឋី Peter Thiel និងនាយកប្រតិបត្តិ OpenAI លោក Sam Altman ។ ហេតុនេះហើយ ជាមធ្យមការចាក់ថ្នាំនេះម្តងត្រូវចំណាយអស់ ២៥.០០០ ដុល្លារអាមេរិក។

ទោះជាយ៉ាងណាក៏ដោយគួរកត់សំគាល់ដែរថាការព្យាបាលនេះមិនត្រូវបានអនុម័តដោយ រដ្ឋបាលចំណីអាហារនិងឱសថអាមេរិក FDA ទេ។ អ្នកវិទ្យាសាស្ត្រខ្លះក៏មិនទាន់ប្រាកដដែរថាការសាកល្បងនេះអាចដំណើរការបានឬអត់នោះទេ នេះបើយោងតាមរបាយការណ៍បាននិយាយថាក្រុមហ៊ុនមិនទាន់បានបញ្ចេញទិន្នន័យស្តីពីការសាកល្បងព្យាបាលរបស់ខ្លួននៅឡើយទេ។ ទោះជាយ៉ាងណាលោក Johnson បានសរសេរនៅលើ Instagram ថា “កាលពីម្សិលមិញខ្ញុំបានទទួលការព្យាបាលដោយហ្សែនដំបូងរបស់ខ្ញុំគឺ follistatin “។

យោងតាមមហាសេដ្ឋីវ័យ ៤៦ ឆ្នាំរូបនេះបាននិយាយថា ក្រុមវេជ្ជបណ្ឌិតនៅ Project Blueprint បានជួយគាត់ឱ្យមានស្បែកក្មេងជាងវ័យដូចអាយុ ២៨ ឆ្នាំ បេះដូងអាយុ ៣៧ ឆ្នាំ និងសមត្ថភាពសួតរបស់គាត់ដូចអាយុ ១៨ ឆ្នាំ។ ការអះអាងទាំងនេះមិនត្រូវបានផ្ទៀងផ្ទាត់ដោយឯករាជ្យនោះទេ។ គោលគំនិតពិតប្រាកដនៃ “អាយុជីវសាស្រ្ត” នៅតែត្រូវបានជជែកវែកញែកយ៉ាងខ្លាំង។

ទោះបីជាលោក Johnson កំពុងចំណាយប្រាក់រាប់លានលើការប្រឆាំងភាពចាស់ក៏ដោយ ក៏សហស្ថាបនិករបស់ Minicircle លោក Mac Davis និយាយថាក្រុមហ៊ុនមិនគិតប្រាក់ដល់មហាសេដ្ឋីនោះទេ។ Davis បានពន្យល់ថា “Johnson គឺជាមនុស្សដែលមានទម្រង់ខ្ពស់បំផុតដែលមិនធ្លាប់មកព្យាបាល ដូច្នេះគាត់កំពុងផ្តល់ឱ្យយើងនូវតម្លៃច្រើនជាងអ្វីដែលយើងអាចផ្តល់ឱ្យគាត់” ។

គួរបញ្ជាក់ដែរថា Bryan Johnson គឺជាសហគ្រិនជនជាតិអាមេរិក អ្នកវិនិយោគទុន និងជាអ្នកនិពន្ធ។ គាត់គឺជាស្ថាបនិក និងជានាយកប្រតិបត្តិនៃ Kernel ដែលជាក្រុមហ៊ុនផលិតឧបករណ៍ដែលត្រួតពិនិត្យ និងកត់ត្រាសកម្មភាពខួរក្បាល និង OS Fund ដែលជាក្រុមហ៊ុនបណ្តាក់ទុនដែលវិនិយោគនៅក្នុងក្រុមហ៊ុនវិទ្យាសាស្ត្រ និងបច្ចេកវិទ្យាដំណាក់កាលដំបូង៕

កាលពីពេលថ្មីៗនេះ កំពុងតែទទួលបាននូវការចាប់អារម្មណ៍យ៉ាងខ្លាំងនៅលើបណ្តាញសង្គម TikTok គឺមានបុរសជនជាតិជប៉ុនម្នាក់ឈ្មោះ Jin From Japan បន្ទាប់ពីគាត់បានបង្ហោះវីដេអូបង្ហាញថា «ម្ចាស់តុកតុកជប៉ុនម្នាក់បានទិញ Tuk-Tuk របស់ថៃ ដើម្បីប្រើប្រាស់ជាយានជំនិះដឹកអ្នកដំណើរនៅទីក្រុងតូក្យូ ហើយក៏មានការប្រម៉ូសិនពិសេសជូនអ្នកដំណើរដែលជិះតុកតុកគាត់សម្រាប់ការជិះរយៈចម្ងាយ ៣ គីឡូម៉ែត្រដំបូងដោយឥតគិតថ្លៃផងដែរ»។

Jin បានបង្ហាញពីវិធីសាស្រ្តធ្វើដំណើរដ៏ពិសេសរបស់គាត់នៅទីក្រុងតូក្យូ ខណៈដែលគាត់បបានជិះតុកតុកមិនចំណាយប្រាក់សូម្បីតែមួយយ៉េន។ តុកតុកនោះផងដែរគឺបើកដោយបុរសម្នាក់ឈ្មោះ Ryushacho ។ លោក Ryushacho ក៏ចែករំលែកថា គាត់បានទៅលេងប្រទេសថៃ និងធ្លាប់ជិះកង់បីនេះនៅជុំវិញទីក្រុងបាំងកក។ បទពិសោធន៍ដ៏ល្អនេះបានធ្វើឱ្យគាត់មានអារម្មណ៍ថាដូចជាបានជួបស្នេហាពិត ហើយគាត់បានជក់ចិត្តយ៉ាងខ្លាំងជាមួយនឹងការជិះកង់បី។

នៅពេលដែល Ryushacho ត្រឡប់ទៅប្រទេសជប៉ុនវិញ គាត់មិនអាចឈប់គិតអំពីយានជំនិះកង់បីដ៏គួរឱ្យទាក់ទាញនេះបានទេ។ ដូច្នេះហើយ ទើបលោកសម្រេចបញ្ជាទិញម៉ូតូកង់បីពីប្រទេសថៃ ហើយចុះបញ្ជីរថយន្តនៅប្រទេសជប៉ុន ដើម្បីឲ្យតុកតុកនេះដំណើរការលើដងផ្លូវដោយស្របច្បាប់។ បុរស Ryushacho ម្នាក់នេះក៏ត្រូវបានស្គាល់ថាជាម្ចាស់ភោជនីយដ្ឋានមួកន្លែងដែរ ខណៈលោកកំពុងតែចាប់អារម្មណ៍ខ្លាំងទៅលើការបើកតុកតុក ហើយគាត់ថែមទាំងមានឆន្ទៈក្នុងការផ្តល់ជូន ៣ គីឡូម៉ែត្រដំបូងដោយឥតគិតថ្លៃដល់អ្នកដំណើរទៀតផង។

លោកបានបញ្ជាក់ថា គឺលោកពិតជាចង់ឲ្យអ្នករាល់គ្នាទទួលបានដ៏រីករាយពីបទពិសោធន៍ជិះតុកតុកថៃ។យានជំនិះកង់បីដ៏ល្បីនេះតែងតែមានតម្លៃធូរថ្លៃរថយន្តតាក់ស៊ីផ្សេងៗ។ ការជិះតុកតុកតាមដងផ្លូវនឹងធ្វើឲ្យយើងមើលឃើញនូវទិដ្ឋភាពនិងបរិយាកាសជុំវិញដ៏រស់រវើក។ លើសពីភាពងាយស្រួលក្នុងការធ្វើដំណើរ តុកតុកក៏ជាវប្បធម៌ក្នុងស្រុកថៃផងដែរ៕

@jinfromjapansub

Taxis are expensive in Japan????? Don’t worry, he will give you a free Tuk Tuk ride???? Hope you enjoy your free Tuk Tuk???????? #japan #japanese #tokyo #tuktuk #taxi #shibuya

♬ Tokyo Drift – Xavier Wulf

បរទេស៖ នៅថ្ងៃទី ២៤ ខែធ្នូ យោងតាមប្រភពព័ត៌មាន Izvestia បានឱ្យដឹងថា ប្រទេសរុស្ស៊ីបច្ចុប្បន្នកំពុងខ្វះខាតកម្មករប្រហែល ៤.៨ លាននាក់នៅឆ្នាំ ២០២៣ ដែលចំនួននេះស្មើនឹងជាង ៦% នៃកម្លាំងពលកម្មរុស្ស៊ី។

យោងតាមទេសាភិបាលធនាគារកណ្តាលរុស្ស៊ី Elvira Nabiullina បានសម្តែងការព្រួយបារម្ភអំពីកង្វះកម្លាំងពលកម្ម ដោយនាងបាននិយាយថា បញ្ហានេះមានលក្ខណៈធ្ងន់ធ្ងរជាពិសេសក្នុងឧស្សាហកម្មផលិត និងគីមី។ ដូច្នេះការកង្វះអ្នកជំនាញផ្នែកព័ត៌មានវិទ្យា វិស្វករ វេជ្ជបណ្ឌិត និងអ្នកបើកបរនឹងបន្តមានសភាពធ្ងន់ធ្ងរនៅឆ្នាំ ២០២៤។

លោក Nikolai Akhapkin ក៏បាននិយាយដែរថា ការកង្វះកម្លាំងពលកម្មបានកើនឡើងយ៉ាងខ្លាំងនៅឆ្នាំ ២០២២ និង ២០២៣ ដែលចំនួនទំនេរនៅក្នុងកម្លាំងការងារសរុបបានកើនឡើងដល់ ៦.៨% នៅពាក់កណ្តាលឆ្នាំ ២០២៣ បើធៀបនឹងឆ្នាំមុនកើនឡើងត្រឹមតែ ៥.៨% ។ រដ្ឋមន្ត្រីក្រសួងការងាររុស្ស៊ីលោក Anton Kotykov បាននិយាយថា កង្វះកម្មករគឺធ្ងន់ធ្ងរនៅក្នុងវិស័យផលិតកម្ម សំណង់ និងដឹកជញ្ជូន ដែលបង្ខំឱ្យក្រុមហ៊ុនដំឡើងប្រាក់ឈ្នួល ដើម្បីព្យាយាមទាក់ទាញបុគ្គលិកបន្ថែមទៀត។

ទោះជាយ៉ាងណាក៏ដោយ បើតាមប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រាប់អ្នកសារព័ត៌មានកាលពីដើមខែធ្នូថា សេដ្ឋកិច្ចរបស់ប្រទេសនេះ នៅតែមានស្ថិរភាព ទោះបីជាមានទណ្ឌកម្មក៏ដោយ។ លោកបានប្រកាសដោយមោទនភាពថា អត្រាគ្មានការងារធ្វើបានឈានដល់កម្រិតទាបជាប្រវត្តិសាស្ត្រគឺ ២.៩% ។ មេដឹកនាំរុស្ស៊ីបានបន្ថែមទៀតថា ប្រាក់ឈ្នួលអប្បបរមានឹងកើនឡើង ១៨% នៅខែមករា ឆ្នាំ២០២៤។

គួរបញ្ជាក់ដែរថា ការកង្វះកម្លាំងពលកម្មផ្នែកសំណង់ ដឹកជញ្ជូន ព័ត៌មានវិទ្យា វិស្វករ វេជ្ជបណ្ឌិតនៅក្នុងស្ថាប័ននានាក្នុងប្រទេសនេះ គឺដោយសារតែប្រជាជនរុស្ស៊ីភាគច្រើនបាននាំគ្នាជ្រើសរើសការងារយោធា ឬធ្វើកងទ័ពដើម្បីការពារជាតិរវាងរុស្ស៊ីនិងអ៊ុយក្រែន៕

្រទេសថៃ ៖ នៅថ្ងៃទី២៦ ខែធ្នូ ឆ្នាំ២០២៣ សារព័ត៌មានថៃរាយការណ៍ថា គេបានដាំទុរេនលើទីធ្លាទំនេរមួយកន្លែងនៅតាមផ្លូវផាត់តាណាកានឃូខ្វាង ស្ថិតក្នុងឃុំប៉ាកណាខន ស្រុកមឿង ខេត្តនគររាជសីម៉ា គឺនៅបរិវេណខាងមុខអគារពាណិជ្ជកម្មក្នុងភូមិ ។ ប៉ុន្តែអ្វីដែលអ្វីឱ្យអ្នកដំណើរទៅមកចាប់អារម្មណ៍ និងចម្លែកចិត្តនោះ គឺគេបានចោះស៊ីម៉ងត៍ដើម្បីដាំទុរេន ខណៈអ្នកស្រុកពុំធ្លាប់ប្រទះឃើញសោះកាលពីមុនមក ។

មតិមួយចំនួនលើកឡើងថា តាមធម្មតា ទុរេនត្រូវបានគេដាំដុះនៅក្នុងចម្ការ ឬដាំនៅតាមជើងភ្នំតែប៉ុណ្ណោះ ពីព្រោះសម្បូរដីមានជីជាតិ ។ ប៉ុន្តែហេតុអ្វីបានជាមានការដាំទុរេននៅលើស៊ីម៉ងត៍បែបនេះ ។

ក្រុមអ្នកសារព័ត៌មានថៃបានធ្វើដំណើរទៅដល់ទីតាំងដាំទុរេនឃើញថា ក្នុងភូមិនេះបានបែងចែកជា២ផ្នែក គឺផ្នែកខាងក្រៅ គឺជាអគារពាណិជ្ជកម្ម និងផ្នែកខាងក្នុង គឺជាផ្ទះសម្រាប់រស់នៅ ព្រមទាំងមានកន្លែងដាំទុរេនផងដែរ ។ វាជាទីធ្លាយ៉ាងធំទូលាយដែលគេបានចាក់ស៊ីម៉ងត៍ពីលើ ។ ក្នុងរយៈពេលជាច្រើនឆ្នាំកន្លងមក ទីធ្លានេះជាកន្លែងលក់ទំនិញ និងម្ហូបអាហារ ប៉ុន្តែបច្ចុប្បន្ន គេក៏បានរុះរើតូបលក់ដូរចេញអស់ហើយ នៅសល់តែទីធ្លាស៊ីម៉ងត៍ប៉ុណ្ណោះ ។

ម្ចាស់ទុរេនបានជួលកម្មករ២នាក់មកចោះស៊ីម៉ងត៍ ដើម្បីជីករណ្តៅដាំទុរេនពូជម៉ន់ថង និងពូជកានយ៉ាវ ។ កម្មករប្រាប់ថា ពួកគេពុំបានដឹងពីមូលហេតុនៃការដាំទុរេននេះទេ គ្រាន់តែដឹងថា ថៅកែបានជួលពួកគេមកដាំទុរេននៅទីនេះចំនួន៥០០ដើម ។ រីឯនៅផ្នែកខាងកើតទីធ្លានេះ ថៅកែបានឱ្យពួកគេដាំក្រូចឆ្មារចំនួន២០០ដើមទៀត ។ ចំណែកការថែទាំដំណាំ គឺជាតួនាទីរបស់កម្មករផ្សេងទៀត ។

បើតាមអ្នកជំនាញផ្នែកកសិកម្មនិយាយថា ការដាំទុរេនបែបនេះអាចធ្វើទៅបាន ប្រសិនបើមានការថែទាំយ៉ាងល្អ ហើយដីត្រូវតែមានជីជាតិផងដែរ ។ អ្នកជំនាញកសិកម្មរូបនេះជឿថា អ្នកដាំទុរេនបែបនេះ ពួកគេមានប្រាក់គ្រប់គ្រាន់ដើម្បីថែទាំទុរេន ប៉ុន្តែដំណាំដែលផ្តល់ផលពិតប្រាកដ គឺក្រូចឆ្មារ ។

អ្នកជំនាញកសិកម្មបន្តថា ចំណែកទុរេន ខ្លួនពុំទាន់បានឃើញកន្លែងដាំដោយផ្ទាល់ភ្នែកទេ ហើយបានឃើញតាមរូបភាពប៉ុណ្ណោះ ។ ប៉ុន្តែបើដាំហើយទទួលបានជោគជ័យ វានឹងក្លាយជាចម្ការទុរេនថ្មីតែមួយគត់ស្ថិតនៅកណ្តាលខេត្តនគររាជសីម៉ា ។ ហេតុនេះ អ្នកដាំទុរេននៅកណ្តាលក្រុង គឺមានតែអ្នកមានទ្រព្យសម្បត្តិច្រើនប៉ុណ្ណោះដែលអាចធ្វើបាន ។

ក្រោយមក ក្រុមអ្នកសារព័ត៌មានថៃបានព្យាយាមទំនាក់ទំនងទៅខាងម្ចាស់ដំណាំទុរេន ដើម្បីសួរនាំពីការដាំទុរេននៅកណ្តាលក្រុង ប៉ុន្តែបុគ្គលិកពួកគេប្រាប់ថា ម្ចាស់ទុរេនបានធ្វើដំណើរទៅតាមខេត្ត ៕